Zanafilla 12–17; Abraham 1–2: Mësimi 22

Abraham 1

“Duke Dëshiruar … të Jem Ndjekës … i Drejtësisë”

Abrahami u rrit i rrethuar nga ligësia dhe idhujtaria. Pavarësisht nga këto rrethana, Abrahami dëshironte ta ndiqte Jezu Krishtin, i cili në jetën para lindjes dhe nga Abrahami njihej si Jehova. Teksa Abrahami ndiqte dëshirat e tij të drejta, Zoti e bekoi që t’i merrte ato. Ky mësim mund t’i ndihmojë nxënësit të ndiejnë shpresë se Ati Qiellor mund t’i ndihmojë të marrin bekimet që Ai do që ata të marrin.

Përgatitja e nxënësve: Ftojini nxënësit të bëjnë një listë të atyre që dëshirojnë më së shumti në jetë dhe të mendojnë rreth mënyrës se si ndihet Ati Qiellor për ato që ata dëshirojnë më së shumti.

Veprimtari të Mundshme të të Mësuarit

Çfarë dëshiron?

Fillojeni mësimin duke i ndihmuar nxënësit të mendojnë për situata ku mund ta kenë të vështirë të besojnë se Zoti mund t’i ndihmojë të marrin një bekim të drejtë që e dëshirojnë. Për ta bërë këtë, mund të tregoni skenarët vijues të papërfunduar dhe t’i ftoni nxënësit të përcaktojnë një pengesë me të cilën mund të përballet ai individ.

Sara ka një dëshirë të fortë për ta ndjekur Jezu Krishtin duke ua predikuar ungjillin e Tij njerëzve të tjerë. Megjithatë, për momentin kjo duket e vështirë sepse …

Jori ka një dëshirë të fortë për ta ndjekur Jezu Krishtin duke paguar të dhjetën. Megjithatë, për momentin kjo duket e vështirë sepse …

Klesti ka një dëshirë të fortë për ta ndjekur Jezu Krishtin duke u pagëzuar. Megjithatë, për momentin kjo duket e vështirë sepse …

Ftojini nxënësit të mendojnë për rrethanat e tyre dhe pengesat me të cilat mund të përballen për ndjekjen e Jezu Krishtit. Kërkojuni t’i plotësojnë hapat vijues në ditarët e tyre të studimit.

Në ditarin tënd të studimit:

1. Shëno disa nga bekimet që dëshiron më së shumti në jetë.

2. Rendit çdo pengesë që sheh për marrjen e këtyre bekimeve.

Ndërsa nxënësit studiojnë kapitullin tek Abraham 1, ftojini të kërkojnë ndihmën e Atit Qiellor nëpërmjet Frymës së Shenjtë. Fryma e Shenjtë mund t’i ndihmojë të ndiejnë shpresë se mund ta ndjekin Jezu Krishtin dhe të marrin bekimet e Tij pavarësisht nga pengesat me të cilat mund të përballen.

Rrethanat e Abrahamit

Te Mësimi 3: Abraham 3, nxënësit mësuan origjinën e librit të Abrahamit. Nëse nuk e shpjeguat këtë te Mësimi 3, mund ta bëni tani. Nëse nxënësit kanë pyetje për origjinën e librit të Abrahamit, mund të shfaqni materialin filmik “The Book of Abraham | Now You Know” [“Libri i Abrahamit: Tani e Dini”] nga kodi kohor 0:00 deri në 2:43. Ky material filmik gjendet te ChurchofJesusChrist.org.

Mund të jetë e dobishme t’i vini nxënësit të krijojnë një tabelë me dy kolona. Ata mund ta titullojnë kolonën e parë “Bekimet që dëshiroi Abrahami” dhe të dytën “Pengesat me të cilat u përball Abrahami”. Kjo mund të ndihmojë për organizimin e atyre që mësojnë nxënësit tek Abraham 1:1–7.

Bekimet që dëshiroi Abrahami	Pengesat me të cilat u përball Abrahami
Bekimet që dëshiroi Abrahami	Pengesat me të cilat u përball Abrahami

Lexo tek Abraham 1:1–7, duke kërkuar se çfarë bekimesh dëshironte Abrahami dhe me çfarë pengesash u përball ai për t’i marrë ato bekime.

• Çfarë të bën përshtypje nga bekimet që dëshironte Abrahami?

• Pse këto bekime mund të jenë diçka që e dëshiron dhe ti?

• Në ç’mënyrë dëshira e Abrahamit për ta ndjekur Jezu Krishtin mund ta ketë ndihmuar atë në rrethanat e vështira me të cilat u përball?

Jehova e ndihmoi Abrahamin t’i kapërcente pengesat e tij

Lexo tek Abraham 1:15–20, duke kërkuar mënyrën se si Jehova e ndihmoi Abrahamin t’i kapërcente pengesat me të cilat u përball.

Përndryshe, mund të zgjidhni të shfaqni materialin filmik “Deliverance of Abraham” [“Çlirimi i Abrahamit”] (1:38), në dispozicion në ChurchofJesusChrist.org.

Nëse e lejon koha dhe keni dëshirë, mund të shpenzoni ca kohë duke diskutuar mënyrën e mrekullueshme se si e çliroi Jehova Abrahamin. Mund ta krahasoni këtë çlirim me mënyrat se si Zoti na çliron nga pengesat për të jetuar me drejtësi. Zoti mund të na çlirojë nga zakone të pashëndetshme si përdorimi i tepruar i mediave shoqërore, teknologjisë ose pornografisë. Mund të dëshmoni se Jehova mund të na çlirojë nga çdo pengesë që përndryshe mund të na e bënte të vështirë ta ndiqnim Atë.

• Si mendon, çfarë mësoi Abrahami rreth Jehovës nga kjo përvojë?

• Si mund të na ndihmojë Ati Qiellor t’i kapërcejmë pengesat për të marrë bekimet e drejta që dëshirojmë?

Shpjegojuni nxënësve se pasi Abrahami u çlirua, ai përfundimisht shkoi në Kanaan. Zoti e nderoi Abrahamin që veproi sipas dëshirave të Tij duke e bekuar me priftërinë dhe bekime të tjera domethënëse. Perëndia ia premtoi Abrahamit këto bekime si pjesë e asaj që ne e quajmë besëlidhja e Abrahamit. Nxënësit do të mësojnë më shumë rreth kësaj besëlidhjeje në mësimet e ardhshme.

Më vonë në jetën e Abrahamit, Zoti e vizitoi atë dhe premtoi se do t’i plotësonte të gjitha dëshirat e drejta të Abrahamit (shih tek Abraham 2:9–11). Lexo tek Abraham 2:12–13, duke kërkuar atë që tha Abrahami pas kësaj përvoje.

• Çfarë parimesh mund të mësojmë nga përvoja e Abrahamit?

Nxënësit mund të përcaktojnë një larmi parimesh, përfshirë: Nëse kërkojmë ta ndjekim Jezu Krishtin, Perëndia do të na i japë bekimet e drejta që dëshirojmë.

Lexo thënien vijuese nga Presidenti Xhefri R. Holland, i Kuorumit të Dymbëdhjetë Apostujve, ose shikoje materialin filmik “Një Ndriçim i Përkryer i Shpresës” nga kodi kohor 11:09 deri në 11:38. Materiali filmik gjendet te ChurchofJesusChrist.org.

“Pse të mos shpresojmë ne që dëshirat e drejta dhe dëshirimet si të Krishtit munden ende të marrin përgjigje në mënyrë të mahnitshme e mrekullibërëse nga Perëndia i çdo shprese? Të gjithë kemi nevojë të besojmë se ajo që dëshirojmë me drejtësi, mundet një ditë, në njëfarë mënyre, disi, të jetë e jona.” (“Një Ndriçim i Përkryer i Shpresës”, Liahona, maj 2020, f. 83)

Ftojini nxënësit t’i diskutojnë pyetjet vijuese në dyshe ose grupe të vogla ose vërini nxënësit t’i shënojnë përgjigjet në ditarët e tyre të studimit. Pas një kohe të mjaftueshme, nxënësit e gatshëm mund t’i tregojnë klasës një ose të dyja përgjigjet.

• Si të japin shpresë fjalët e Presidentit Holland dhe përvoja e Abrahamit se Zoti mund të të ndihmojë t’i kapërcesh pengesat për ta ndjekur Jezu Krishtin?

• Kur të ka ndihmuar Ati Qiellor ty ose dikë që ti e njeh, për të kapërcyer pengesat për ta ndjekur Jezu Krishtin?

Merreni parasysh të tregoni përvojën tuaj të kohës kur Ati Qiellor ju ka ndihmuar të kapërceni një pengesë për të marrë një bekim të drejtë.

Ftojini nxënësit ta shënojnë atë që mësuan sot, në ditarët e tyre të studimit.

Merreni parasysh t’i ftoni nxënësit e gatshëm ta tregojnë atë që shkruan. Mbylleni duke dhënë dëshminë tuaj për këto të vërteta.

Burime Shtesë

Ku mund të mësoj më tepër rreth librit të Abrahamit?

Kisha ka botuar një numër burimesh rreth librit të Abrahamit, si:

• Kapitulli “The Book of Abraham” [“Libri i Abrahamit”] tek The Pearl of Great Price Student Manual [Manuali i Nxënësit për Perlën me Vlerë të Madhe] (2017).

• The Church History Topic [Tema të Historisë së Kishës], “Book of Abraham Translation” [“Përkthimi i Librit të Abrahamit”].

• Ese mbi Temat e Ungjillit, “Përkthimi dhe Vërtetësia Historike e Librit të Abrahamit”.

Më 5 korrik 1835, Jozef Smithi shkroi për daljen në dritë të librit të Abrahamit dhe rëndësinë e këtyre shkrimeve të lashta egjiptiane:

“Unë, me U[illiam] W. Felpsin dhe O[liver] Kaudërin si shkrues, e fillova përkthimin e disa prej karaktereve ose hieroglifëve dhe, për gëzimin tonë të madh, gjeta se një prej rrotullave përmbante shkrimet e Abrahamit. … Me të vërtetë mund të themi se Zoti po fillon të zbulojë begatinë e paqes dhe të vërtetës.” (Joseph Smith, te History, 1838–1856 [Manuscript History of the Church], volume B1, f. 596, josephsmithpapers.org; pikësimi i standardizuar)

Ndërsa e studiojmë librin e Abrahamit, është e rëndësishme të vëmë re sa vijon, që gjendet në Church History Topic [Tema të Historisë së Kishës] “Book of Abraham Translation” [“Përkthimi i Librit të Abrahamit”]:

“Pozita e librit si shkrim i shenjtë mbështetet në të vërtetat e përjetshme që libri na i mëson, dhe shpirtin e fuqishëm që përçon ai. E vërteta e librit të Abrahamit më së fundi gjendet nëpërmjet studimit të kujdesshëm të mësimeve të tij bashkëngjitur lutjes së sinqertë dhe pohimit nga Shpirti.” (Church History Topics, “Book of Abraham Translation”, Gospel Library [Biblioteka e Ungjillit])

Si mund të ndikojnë dëshirat e mia në jetën time?

Presidenti Dallin H. Ouks, i Presidencës së Parë, dha mësim:

“Dëshirat diktojnë përparësitë tona, përparësitë drejtojnë zgjedhjet tona dhe zgjedhjet përcaktojnë veprimet tona. Dëshirat sipas të cilave veprojmë, përcaktojnë se si po ndryshojmë, atë që po arrijmë dhe cilët po bëhemi. …

… Kur kemi një përfytyrim të asaj që mund të bëhemi, dëshira jonë dhe fuqia jonë për të vepruar rriten jashtëzakonisht.” (“Dëshirë”, Liahona, maj 2011, f. 42, 44)

Po nëse dëshirat tona të drejta duken të paplotësuara?

Plaku Nil L. Andersen, i Kuorumit të Dymbëdhjetë Apostujve, dha mësim:

“Si shërbëtor i Zotit, unë ju premtoj se, në qoftë se jeni besnikë ndaj Jezu Krishtit dhe besëlidhjeve tuaja, ju do të merrni bekimet shpërblyese në këtë jetë dhe dëshirat tuaja të drejta në kohën e përjetshme, të caktuar nga Zoti. Mund të ketë lumturi në udhëtimin në vdekshmëri edhe kur të gjitha shpresat tona të drejta nuk janë realizuar.” (“Udhëtimi Vetjak i një Fëmije të Perëndisë”, Liahona, maj 2021, f. 47)

Si i zhvillojmë dëshirat e drejta?

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Ne arrijmë ta njohim Shpëtimtarin kur bëjmë më të mirën tonë për të shkuar atje ku Ai do që ne të shkojmë, kur përpiqemi të themi atë që Ai do që ne të themi, dhe kur bëhemi ajo që Ai do që ne të bëhemi. Kur e pranojmë me bindje varësinë tonë të plotë prej Tij, Ai e shton aftësinë tonë për të shërbyer edhe me më shumë efektshmëri. Pak nga pak, dëshirat tona përputhen në mënyrë më të plotë me dëshirat e Tij, dhe qëllimet e Tij bëhen qëllimet tona, pasi ne nuk ‘do të kërko[jmë] atë që është në kundërshtim me vullnetin [e Tij]’.” (“Po Të Më Kishit Njohur”, Liahona, nëntor 2016, f. 104)

Veprimtari Plotësuese të të Mësuarit

Abraham 1:11. Shembulli i të rejave të virtytshme

Shembujt e tri virgjëreshave të drejta mund të përdoren për t’i ndihmuar nxënësit të kuptojnë se nganjëherë nuk na realizohen dëshirat e drejta në mënyrat që presim.

Lexoni tek Abraham 1:11 dhe krahasojeni çlirimin e Abrahamit me historinë e këtyre tri të rejave.

Mund edhe t’i referoheni thënies së Plakut Andersen te pjesa Burime Shtesë rreth dëshirave të drejta të paplotësuara.

Ftojini nxënësit të përfytyrojnë sikur një shok ose shoqe u ka dërguar mesazh në celular. Ky shok ose shoqe është në stres sepse Perëndia nuk e ka bekuar ende me forcë për t’i rezistuar një tundimi të caktuar (ose një dëshire tjetër të drejtë që ka kërkuar). Ftojini disa nxënës të mendojnë se si mund t’i përgjigjen shokut ose shoqes së tyre. Pyetjet vijuese mund të ndihmojnë:

• Si mendoni, pse dëshirat e drejta të disa njerëzve plotësohen ndërsa të tjerat nuk duket se plotësohen?

• Si mund ta ruajmë besimin tonë te Jezu Krishti edhe kur dëshirat tona të drejta duken të paplotësuara?

Shembuj të tjerë të kërkimit të dëshirave të drejta

Për ta thelluar kuptueshmërinë e nxënësve për realizimin e dëshirave të drejta, ata mund ta krahasojnë Abrahamin me individë të tjerë në shkrimet e shenjta.

Ftojini nxënësit të zgjedhin një nga individët vijues ose një tjetër që e zgjedhin vetë. Vërini të kërkojnë se çfarë dëshire kishte personi dhe çfarë na mëson tregimi rreth realizimit të dëshirave tona.

• Nefi: 1 Nefi 10:17; 11:1

• Enosi: Enosi 1:2–8

• Alma dhe Amuleku: Alma 14:9–13

• Hajrëm Smithi: Doktrina e Besëlidhje 11:8, 15–17, 21–22

Përputhja me vullnetin e Zotit

Nxënësit mund të kenë dobi nga diskutimi i mëtejshëm rreth faktit që dëshirat e drejta ndonjëherë nuk marrin përgjigje në mënyrën që duam ose presim. Nëse është kështu, merreni parasysh të shfaqni materialin filmik “Ask in Faith” [“Kërkoni me Besim”] nga kodi kohor 10:47 deri në 13:03.

Merreni parasysh të bëni pyetjet vijuese:

• Çfarë mësoni rreth përputhjes së dëshirave tona të drejta me vullnetin e Zotit?

• Çfarë këshille do t’i jepje dikujt që ndien se Zoti nuk po e bekon me një dëshirë të drejtë?

Rëndësia e shkrimeve të shenjta

Për t’i ndihmuar nxënësit të kuptojnë rëndësinë e shkrimeve të shenjta në jetën tonë, merreni parasysh të bëni pyetjet vijuese:

• Çfarë do të thotë ta ruash diçka?

• Si mund të ruash një fotografi ose letër të një njeriu të dashur?

Ftojini nxënësit të lexojnë tek Abraham 1:28, duke kërkuar atë që mori Abrahami. Pasi nxënësit të raportojnë për atë që gjetën, ftojini ata të lexojnë vargun 31 dhe bëni pyetjet vijuese:

• Çfarë u ruajt në analet që mbajti Abrahami?

• Si mund të kemi dobi ngaqë i dimë këto të vërteta?

Ndihmojini nxënësit të shohin se Zoti ka thirrur profetë për t’i ruajtur shkrimet e shenjta për shkak të dashurisë së Tij për ne. Ftojini nxënësit të tregojnë të vërteta të rëndësishme nga shkrimet e shenjta për të cilat janë mirënjohës që janë ruajtur.