Zanafilla 6–11; Moisiu 8: Mësimi 20

Zanafilla 6–8

“Noeu Bëri … Ashtu siç i Kishte Urdhëruar Zoti”

Perëndia na kërkon me dashuri që t’iu bindemi urdhërimeve të Tij. Disa urdhërime mund të jenë të vështira për t’u kuptuar, por ato janë gjithmonë për të mirën tonë. Familja e Noeut u shpëtua nga një përmbytje e paprecedent, e mbinatyrshme për shkak se iu bind urdhërimit të Perëndisë për të ndërtuar një arkë. Ky mësim mund t’i ndihmojë nxënësit që t’iu shtohet dëshira për t’iu bindur urdhërimeve të Perëndisë.

Përgatitja e nxënësve: Ftojini nxënësit të përsiatin dhe të vijnë të përgatitur për të treguar se si një urdhërim i caktuar e tregon dashurinë e Atit Qiellor për ne dhe dëshirën e Tij për të na mbrojtur.

Veprimtari të Mundshme të të Mësuarit

Urdhërimet e Perëndisë

Merreni parasysh ta filloni mësimin duke i inkurajuar nxënësit të përsiatin mbi atë pse Ati ynë i dashur në Qiell na jep urdhërime. Një mënyrë për ta bërë këtë është të paraqitni fotografitë vijuese dhe të nisni një diskutim duke përdorur pyetjet më poshtë. Një mënyrë tjetër është t’i vini nxënësit të tregojnë rregullat që prindërit e tyre kanë vendosur për ta mbajtur të sigurt fëmijën e tyre.

Përfytyro sikur po kujdesesh për një grup të madh fëmijësh të vegjël në këtë vendfushim.

• Çfarë rregullash të caktuara mund t’u japësh fëmijëve për t’i mbajtur të sigurt?

• Po të zemëroheshin fëmijët me ty ngaqë u vendose rregulla, çfarë do t’u shpjegoje atyre?

  Ftojini nxënësit t’i tregojnë një partneri se si mund ta krahasojnë këtë situatë me urdhërimet e Atit Qiellor për ne.

  Më pas, ftojini nxënësit t’i shënojnë ndjenjat vetjake rreth Perëndisë dhe urdhërimeve të Tij në ditarët e tyre të studimit duke përdorur pyetje si ato në vijim. Mund të ftoni disa vullnetarë ta tregojnë atë që shkruan.

• Si mendon, pse Perëndia do që ti personalisht t’i mbash urdhërimet e Tij?

• Sa i/e gatshëm/me je të bindesh për atë që kërkon Perëndia, edhe nëse nuk e kupton arsyen e atij urdhërimi? Përse?

Njerëzit në kohën e Noeut

Merreni parasysh të paraqitni figurën e Noeut në fillim të mësimit. Kërkojuni nxënësve të tregojnë se çfarë dinë tashmë rreth koncepteve vijuese. Ftojini ata të përdorin fragmentet e sugjeruara të shkrimeve të shenjta nëse është nevoja.

• Gjendja shpirtërore e popullit në kohën e Noeut dhe ajo që bëri Perëndia si rrjedhojë (shih te Moisiu 8:17, 20, 22, 28–29)

• Ajo që Perëndia i urdhëroi Noeut të bënte për të shpëtuar të bindurit (shih te Moisiu 7:43)

Ndërsa nxënësit vazhdojnë të studiojnë, inkurajojini ata të kërkojnë ndikimin e Frymës së Shenjtë për ta kuptuar dashurinë e Perëndisë për ne. Gjithçka që bën Perëndia, përfshirë përmbytjen, merr shtysë nga dashuria (shihni te 2 Nefi 26:24). Ndihmojini nxënësit të kuptojnë se Jezu Krishti vuajti për mëkatet e njerëzve që vdiqën gjatë përmbytjes, në mënyrë që ata të mund të mësonin dhe pendoheshin në botën e shpirtrave (shihni te Moisiu 7:38–40; 1 Pjetër 3:18–20). Gjithashtu, zgjedhja e Perëndisë për të dërguar përmbytjen i mbrojti fëmijët e Tij të tjerë shpirtërorë që të mos lindeshin në rrethana aq të rrezikshme dhe të liga (shihni te John Taylor, në Journal of Discourses, 19:158–159).

Arka

Merreni parasysh t’u jepni letra grupeve të vogla të nxënësve dhe t’u jepni një kohë të shkurtër për të plotësuar veprimtarinë vijuese së bashku. (Kini kujdes që të lini kohë pas kësaj veprimtarie që nxënësit ta diskutojnë atë që mësojnë dhe ta lidhin atë me jetën e tyre.)

1. Lexo te Zanafilla 6:14–22; 7:1–12, 23; 8:13–17, duke kërkuar atë që na mëson ky tregim rreth Perëndisë dhe asaj që mund të mësojmë nga Noeu.

2. Bëj një vizatim të thjeshtë të asaj që ndodhi.

3. Përfshi në vizatimin tënd një gjë që mësove rreth Perëndisë dhe një gjë që mësove nga shembulli i Noeut.

Ftojini grupet t’ia tregojnë dhe shpjegojnë vizatimet e tyre një grupi tjetër (edhe nëse janë të papërfunduara). Më pas, ftojini grupet t’ia tregojnë klasës atë që mësuan rreth Perëndisë dhe atë që mësuan nga shembulli i Noeut.

Një e vërtetë që mund të përcaktojnë nxënësit nga ky tregim, është se ndërsa i bindemi Zotit me besim, Ai do të na bekojë e do të na mbrojë.

Merreni parasysh të paraqitni thënien vijuese dhe t’i ftoni grupet që ta lexojnë dhe të diskutojnë se si gjen zbatim ajo sot për ne.

Presidenti Spenser W. Kimball (1895–1985) dha disa arsye pse Noeut dhe familjes së tij i nevojitej besim te Krishti për të përmbushur urdhërimin për të ndërtuar arkën.

“Deri në atë kohë nuk kishte prova të shiut dhe përmbytjes. Populli i [Noeut] e talli dhe e quajti atë të pamend. Predikimi i tij ra në vesh të shurdhër. Paralajmërimet e tij u konsideruan të paarsyeshme. Nuk kishte asnjë precedent; kurrë nuk ishte bërë e ditur se një rrebesh [ose përmbytje] mund ta mbulonte tokën. Sa marrëzi të ndërtoje një arkë në tokë të thatë me diellin që shndriste dhe jetën që shkonte përpara si zakonisht!” (Teachings of Presidents of the Church: Spencer W. Kimball [2006], f. 140–141)

• Cilat janë disa nga urdhërimet e Zotit që njerëzit i shpërfillin ose përqeshin sot?

• Çfarë di rreth Perëndisë dhe profetëve të Tij që mund të na ndihmojë t’i bindemi Zotit pavarësisht nga kundërshtimi?

Ftojini nxënësit të tregojnë urdhërimet që besojnë se janë mbrojtje me dashuri nga Perëndia.

Bindja ndaj Perëndisë në jetën tonë

Merreni parasysh të paraqitni thënien vijuese së bashku me nxitjet për reflektim vetjak më poshtë.

Presidenti Tomas S. Monson (1927–2018) dha një nga mësimet më të mëdha që mund të mësojmë në jetën tonë.

“Noeu pati besimin e palëkundur për t’i ndjekur urdhërimet e Perëndisë. Bëfshim edhe ne gjithmonë të njëjtën gjë! Kujtofshim se urtësia e Perëndisë shpesh duket si marrëzi për njerëzit; por mësimi më i madh që mund të mësojmë në vdekshmëri, është se, kur Perëndia flet dhe ne bindemi, do të jemi gjithnjë në rregull.” (“Models to Follow”, Liahona, nëntor 2002, f. 61)

Shëno në ditarin tënd të studimit:

1. Si mendon se lidhet thënia e Presidentit Monson me situatat ose urdhërimet në jetën tënde.

2. Çfarë mësove ose ndjeve sot rreth Atit Qiellor dhe urdhërimeve të Tij.

3. Çfarë beson se do të donte Ati Qiellor të bëje për të ndjekur shembullin e bindjes me besnikëri të Noeut.

Mund ta mbyllni mësimin duke i ftuar nxënësit të shenjojnë shembullin e Noeut te Zanafilla 7:5 dhe ta bëjnë referencë‑kryq me shembullin e Shpëtimtarit para lindjes te Moisiu 4:2. Merreni parasysh të dëshmoni që Perëndia do t’i bekojë nxënësit tuaj për përpjekjet e tyre besnike për të ndjekur shembullin e bindjes së Shpëtimtarit.

Burime Shtesë

Si mund të krahasohet gjendja e botës sot me një përmbytje?

Presidenti Henri B. Ajring, i Presidencës së Parë, u shpjegoi sa vijon mësuesve të seminarit dhe institutit:

“Bota në të cilën jetojnë të rinjtë e të rejat, po ndryshon me shpejtësi. Kur vëllezërit dhe motrat e tyre më të mëdhenj kthehen për të vizituar të njëjtat shkolla dhe komplekse universitare që frekuentuan, gjejnë një klimë rrënjësisht të ndryshme morale. Gjuha në korridore dhe në dhomat e zhveshjes është bërë e vrazhdë. Veshja është më pak e thjeshtë. Pornografia ka dalë sheshit. Jo vetëm që është shtuar toleranca për ligësinë, por shumë prej asaj që quhej e gabuar, nuk dënohet më fare dhe mund të admirohet edhe nga rinia jonë shenjtore e ditëve e mëvonshme. …

… Shumë [të rinj e të reja], jashtëzakonisht shumë, thonë me vete: ‘… Do të ndjek rrymën’.

Epo, rryma është bërë përmbytje dhe shpejt do të jetë një përrua. Do të bëhet një përrua tingujsh, pamjesh dhe ndjesish që e ftojnë tundimin dhe e fyejnë Shpirtin e Perëndisë.” (“We Must Raise Our Sights”, Ensign, shtator 2004, f. 14)

Çfarë mund të mësojmë nga refuzimi i paralajmërimeve të Noeut nga njerëzit?

Presidenti Henri B. Ajring, i Presidencës së Parë, tha:

“Një tjetër ide e gabuar është të besosh se zgjedhja për ta pranuar ose jo këshillën e profetëve nuk është më tepër se të vendosësh a ta pranosh një këshillë të mirë dhe të përfitosh dobinë e saj, ose të mbetesh aty ku je. Por zgjedhja për të mos e zbatuar këshillën profetike e ndryshon vetë terrenin ku qëndrojmë. Ai bëhet më i rrezikshëm. Mospranimi i këshillës profetike e zvogëlon fuqinë tonë për të marrë këshillë të frymëzuar në të ardhmen. Çasti më i mirë i vendimmarrjes për ta ndihmuar Noeun për ndërtimin e arkës ishte qëkurse ai e kërkoi për herë të parë. Çdo herë që ai e kërkoi më pas, çdo dështim për t’iu përgjigjur [kërkesës], e zvogëlonte ndjeshmërinë ndaj Shpirtit. Si rrjedhim, kërkesa e tij çdo herë do të jetë dukur edhe më marrëzi, derisa erdhi shiu. Por atëherë ishte tepër vonë.” (“Finding Safety in Counsel”, Ensign, maj 1997, f. 25)

Shenjë për çfarë u bë ylberi pas përmbytjes?

“Ylberi” është një shenjë që Perëndia nuk do ta përmbytë më kurrë të gjithë tokën (shih te Zanafilla 9:13–15). Gjithsesi, te besëlidhja që Perëndia bëri me Noeun, kishte më shumë se kaq. Përkthimi prej Joseph Smith‑it na ndihmon të kuptojmë se Perëndia po ripërtërinte të njëjtën besëlidhje që bëri me Enokun (shih te Përkthimi prej Joseph Smith‑it, Zanafilla 9:21–25 [tek Udhëzuesi për Shkrimet e Shenjta]). Kjo besëlidhje përfshiu një premtim që kur pasardhësit e Noeut t’u bindeshin të gjitha urdhërimeve të Perëndisë, qiejt dhe toka do të gëzonin dhe qyteti i Sionit të Enokut do të kthehej përsëri në tokë.

Cilat ishin përmasat e arkës?

Shkrimet e shenjta e matin arkën me kubitë. Një kubit përgjithësisht llogaritet se është midis 46–56 centimetra. Nëse përdoren 46 cm si një kubit, arka ishte rreth 138 metra e gjatë, rreth 23 metra e gjerë dhe rreth 14 metra e lartë. Mund të jetë e dobishme ta lidhni madhësinë e arkës me diçka që e njihni. Për shembull, një fushë futbolli profesionistësh është rreth 100–110 metra e gjatë dhe rreth 64–73 metra e gjerë. Arka do të ishte më e gjatë se një fushë futbolli, por pak a shumë e gjerë sa një e treta e saj.

Veprimtari Plotësuese të të Mësuarit

Fillim alternativ

Për t’i ndihmuar nxënësit të përqendrohen te mënyra se si Shpëtimtari dhe ungjilli i Tij mund t’i mbrojnë ata nga ligësia e ditëve të mëvonshme, merreni parasysh ta filloni mësimin duke paraqitur thënien e parë të Presidentit Ajring në pjesën “Burime Shtesë”. Kërkojuni nxënësve të tregojnë atë që mendojnë për thënien. Ata mund të tregojnë mënyra se si ligësia dhe tundimet me të cilat përballen, i ngjasojnë një përmbytjeje.

Ftojini nxënësit të kërkojnë frymëzim sot për atë që mund të bëjnë për të marrë bekimet e Perëndisë dhe mbrojtje nga përmbytja bashkëkohore e ligësisë dhe tundimeve.

Zanafilla 6:14. “Lyeje me bitum nga jashtë e nga brenda”

Nxënësit mund të kenë dobi nga studimi i mënyrës se si Perëndia mund të na izolojë nga tundimet dhe mëkatet rrotull nesh. Mund t’i ftoni ata të lexojnë udhëzimet që Perëndia u dha dy profetëve vijues për të mbrojtur familjet e tyre që të mos u hynte uji nëpër varka. Më pas ftojini nxënësit t’i diskutojnë pyetjet më poshtë me një partner.

1. Noeu – Zanafilla 6:14 (Shënim: Bitumi është një lëndë e ngjashme me katranin që përdoret për të bërë izolimin nga uji.)

2. Vëllai i Jaredit – Ethëri 2:17

   • Si mendoni se mund ta ndihmojnë udhëzimet e Perëndisë ndaj këtyre profetëve dikë që po përpiqet ta pengojë mëkatin që të mos hyjë në jetën e vet?

   • Cilat janë disa mënyra se si ne mund ta “lyej[më] shpirtërisht [jetën tonë] me bitum nga jashtë e nga brenda” për të mos e lënë mëkatin të na fundosë?

Gjithashtu, mund t’i ftoni nxënësit të lexojnë poezinë vijuese, të cituar nga Presidenti Bojd K. Paker (1924–2015), i Kuorumit të Dymbëdhjetë Apostujve. Mund t’i vini ta shënojnë poezinë në shkrimet e tyre të shenjta pranë vargut te Zanafilla 6:14. Kërkojuni atyre të tregojnë se si besojnë se gjen zbatim ajo në jetën e tyre.

Të gjithë ujërat e botës,

Sado fort të shtyjnë,

As anijen më të vogël nuk e fundosin dot

Veç nëse i le brenda të hyjnë.

Dhe e gjithë e keqja në botë,

Mëkati më i zi,

Aspak nuk të dëmton dot

Po nuk e fute në brendi.

(Autori i panjohur. Cituar nga Boyd K. Packer, “The Spirit of Revelation”, Ensign, nëntor 1999, f. 24)

Simbolika e Përmbytjes

Nëse doni, mund t’i ndihmoni nxënësit të ushtrohen për të kuptuar simbolikën në shkrimet e shenjta duke bërë krahasime. Mund t’i ftoni nxënësit të plotësojnë vendet bosh me një partner.

“Përmbytja mund të krahasohet me pagëzimin sepse ___________.”

“Arka që ndërtoi Noeu, më kujton Jezu Krishtin sepse _____________.”

Më pas mund t’u kërkoni nxënësve të jenë krijues dhe të tregojnë se si tregimi për Noeun dhe arkën mund t’u mësojë atyre rreth ndonjë parimi tjetër të ungjillit si besimi, pendimi, adhurimi në tempull, puna misionare, profetët dhe kështu me radhë.

Mund t’i ftoni nxënësit të tregojnë atë që mësojnë nga mësimet e Jezu Krishtit, i cili e krahasoi përgatitjen për përmbytjen në kohën e Noeut me përgatitjen për Ardhjen e Dytë (shih te Mateu 24:36–39).