Genesis 5; Moises 6; Lesson 13

Moises 6:1–39

Ang Pagtawag kay Enoc

Nang tawagin si Enoc para mangaral ng pagsisisi sa isang masamang grupo ng mga tao, nakadama siya ng kakulangan. Siya ay tinulungan at pinalakas ng Panginoon upang maisakatuparan ang inakala niyang hindi niya magagawa. Ang lesson na ito ay makatutulong sa mga estudyante na magtiwala sa Panginoon at sa Kanyang kapangyarihang tulungan at palakasin sila.

Paghahanda ng estudyante: Anyayahan ang mga estudyante na mag-isip ng mga pagkakataon kung kailan naranasan ng mga tao ang kapangyarihan ng Panginoon nang tulungan Niya sila na makayanan ang mga paghihirap. Hikayatin sila na maghanap ng mga halimbawa sa mga banal na kasulatan.

Mga Posibleng Aktibidad sa Pag-aaral

Pakiramdam na may kakulangan

Maaari kang magdispley sa pisara ng mga pahayag na tulad ng mga sumusunod: Hindi ko kaya. Hindi ako ganoon kagaling. Masyado itong mahirap.

• Ano ang mga sitwasyon kung saan maaaring maranasan ng mga tinedyer ang ganitong mga uri ng damdamin?

Maaari mong ilista sa pisara ang mga sitwasyong ibinabahagi ng mga estudyante.

Mag-isip ng sitwasyon sa sarili ninyong buhay na maaaring nagdudulot sa iyo ng pakiramdam na may kakulangan kayo o nahihirapan kayo. Maglaan ng sandali at pag-isipan ang tanong na ito:

• Gaano kalaki ang tiwala mo na tutulungan ka ng Panginoon sa sitwasyong ito?

Hikayatin ang mga estudyante na isipin ang kanilang sariling sitwasyon habang pinag-aaralan nila ang tawag kay Enoc na maging propeta. Anyayahan sila na hingin ang patnubay ng Espiritu Santo upang madagdagan ang kanilang tiwala sa kakayahan ng Panginoon na tulungan at palakasin sila.

Naranasan ni Enoc ang kapangyarihan ng Panginoon

Ilang henerasyon pagkatapos ni Adan, isa sa kanyang mga inapo, si Enoc, ay namuhay kasama ng may matitigas na puso at masasamang tao. Basahin ang Moises 6:26–28, at alamin kung ano ang iniutos ng Panginoon na gawin ni Enoc.

• Ano ang inyong madarama kung kayo si Enoc? Bakit?

Upang matulungan ang mga estudyante na pag-aralan ang karanasan ni Enoc sa Panginoon, maaari mong gamitin ang handout na may pamagat na “Naranasan ni Enoc ang Kapangyarihan ng Panginoon.” Maaaring gawin ng mga estudyante ang handout nang may kapartner. Para maiba, maaari silang magpalitan ng mga kapartner pagkatapos ng bawat aktibidad sa pag-aaral. Maaari mo ring gamitin ang mga ideya sa handout para matulungan ang mga estudyante na sama-samang pag-aralan ang karanasan ni Enoc bilang isang klase.

Nahihirapan ang ilang estudyante na alamin kung paano sisimulan ang isang pag-uusap na nakatuon sa ebanghelyo. Kasama sa handout ang ilang tanong sa talakayan. Ang pagbibigay ng mga tanong sa talakayan tulad ng mga ito ay makatutulong sa mga estudyante na magsanay na ibahagi ang kanilang mga iniisip at nadarama tungkol sa pinag-aaralan nila sa mga banal na kasulatan o sa mga salita ng mga propeta. (Para sa karagdagang training sa mga talakayan, tingnan ang “Hikayatin ang mga mag-aaral na ibahagi ang mga katotohanang natututuhan nila” sa Mga Kasanayan para sa Pag-unlad ng Guro.)

Bigyan ng oras ang mga estudyante na ibahagi ang natutuhan nila mula sa kanilang pag-aaral at talakayan, kabilang ang mga katotohanang natukoy nila sa Aktibidad sa Pag-aaral 4. Gamit ang sarili nilang mga salita, maaaring nakatukoy ang mga estudyante ng katotohanang tulad ng sumusunod: Kung tapat nating gagawin ang iniuutos ng Panginoon, tutulungan at palalakasin Niya tayo.

Ang tulong at lakas ng Panginoon sa inyong buhay

Upang matulungan ang mga estudyante na maunawaan ang alituntunin sa itaas, maaari kang magpakita ng ilang halimbawa mula sa banal na kasulatan o sa makabagong panahon. Sabihin sa mga estudyante na basahin (o panoorin) ang halimbawa at maghandang ibahagi kung paano tinulungan at pinalakas ng Panginoon ang mga tao sa halimbawa. Maaaring kasama sa mga halimbawa si Nephi at ang kanyang pamilya sa ilang (tingnan sa 1 Nephi 5:7–8; 7:16–18; 17:1–3; 18:1–4), Si Alma at ang kanyang mga tao sa pagkaalipin (tingnan sa Mosias 24:10–22), o si Propetang Joseph Smith sa Liberty Jail (tingnan sa Doktrina at mga Tipan 121:1–10; 122:7–9). Maaari mo ring ipakita ang halimbawang ibinahagi ni Pangulong Russell M. Nelson mula sa kanyang buhay sa “Becoming True Millennials“ (time code na 9:05 hanggang 12:29). Makikita ang video na ito sa ChurchofJesusChrist.org.

• Paano ninyo nakita o naranasan ang kapangyarihan ng Panginoon na magbigay ng tulong at lakas sa inyong buhay?

Maaari kang magbahagi ng sarili mong mga personal na karanasan sa kapangyarihan ng Panginoon.

Pagnilayan ang natutuhan ninyo

Bigyan ng oras ang mga estudyante na pagnilayan ang kanilang natutuhan at nadama ngayon mula sa mga banal na kasulatan, sa isa’t isa, at sa Espiritu. Ang isang paraan para magawa ito ay sa pamamagitan ng pagpapakita ng sumusunod na tanong at pagbibigay sa mga estudyante ng oras para isulat ang mga sagot nila sa kanilang study journal.

• Ano ang natutuhan o nadama ko ngayon tungkol sa Panginoon na makatutulong sa akin kapag nakadarama ako ng kakulangan, pinanghihinaan ako ng loob, o hindi sapat ang aking lakas?

Maaari mong anyayahan ang ilang estudyante na handang magbahagi sa klase ng kanilang isinulat. Patotohanan ang Tagapagligtas at ang Kanyang kapangyarihan na palakasin at tulungan tayo.

Karagdagang Resources

Naaangkop ba sa akin ngayon ang mga pangako ng Panginoon kay Enoc?

Ipinangako ni Pangulong Russell M. Nelson:

Hihilingan kayong tumanggap ng mahihirap na gawain at magiging kasangkapan kayo sa mga kamay ng Panginoon. At bibigyan Niya kayo ng kakayahang gawin ang imposible.

Paano ninyo isasagawa ang imposible? Sa paggawa ng lahat ng kailangan para mapalakas ang inyong pananampalataya kay Jesucristo sa pamamagitan ng pagpapaibayo ng inyong pag-unawa sa doktrinang itinuturo sa Kanyang ipinanumbalik na Simbahan at sa walang-sawang paghahangad sa katotohanan. …

… Kapag tinupad ninyo ang inyong mga tipan sa mas tumpak na paraan, at ipinagtanggol ninyo ang Simbahan at kaharian ng Diyos sa lupa ngayon, bibiyayaan kayo ng Panginoon ng lakas at karunungang gawin ang imposible. (“Pagiging mga Tunay na Isinilang sa Milenyong Ito” [pandaigdigang debosyonal para sa mga young adult, Ene. 10, 2016], Gospel Library)

Paano naiiba ang pagtingin sa akin ng Diyos sa pagtingin ko sa aking sarili?

Itinuro ni Elder Joseph B. Wirthlin (1917–2008) ng Korum ng Labindalawang Apostol:

Talagang nakatutuwa na malamang mahal tayo ng ating Ama sa Langit—sa kabila ng lahat ng ating pagkakamali! Napakatindi ng Kanyang pagmamahal na kahit pa sukuan natin ang ating sarili, hindi Niya tayo kailanman susukuan.

Nakikita natin ang ating sarili batay sa nakaraan at kasalukuyan. Nakikita tayo ng ating Ama sa Langit batay sa kawalang-hanggan. Bagama’t maaaring kampante na tayo sa kung ano tayo ngayon, ngunit hindi ang Ama sa Langit, dahil tinitingnan Niya tayo sa kakayahan natin na maging mga maluwalhating nilalang.

Ang ebanghelyo ni Jesucristo ay ebanghelyo ng pagbabago. Itinuturing tayo nito bilang kalalakihan at kababaihan ng mundo at pinadadalisay tayo para sa kawalang-hanggan. (“Ang Dakilang Utos,” Liahona, Nob. 2007, 29–30)

Moises 6:34. Paano ko masusunod ang payo ng Panginoon na “manahan” sa Kanya at “lumakad na kasama” Siya?

Itinuro ni Elder David A. Bednar ng Korum ng Labindalawang Apostol:

Sa huli, si Enoc ay naging magiting na propeta at naging kasangkapan sa mga kamay ng Diyos sa pagsasakatuparan ng isang dakilang gawain, ngunit hindi sa ganyang paraan nagsimula ang kanyang ministeryo! Sa halip, lumawak ang kanyang mga kakayahan sa paglipas ng panahon habang natututuhan niyang manahan sa Anak ng Diyos at lumakad na kasama Niya. …

… [N]nananahan tayo kay Cristo kapag matatag at matibay ang ating pagsampalataya sa Manunubos at sa Kanyang mga banal na pangako, anuman ang ating kalagayan. …

Binibigyang-diin ng paglakad sa Tagapagligtas at nang kasama Niya ang dalawang mahalagang aspekto ng pagiging disipulo: (1) pagsunod sa mga kautusan ng Diyos, at (2) pag-alaala at pagtupad sa mga sagradong tipan na nag-uugnay sa atin sa Ama at sa Anak. …

… Kung mananahan tayo sa Kanya, Siya ay mananahan sa atin. At kapag tayo ay lumakad sa Kanya at kasama Niya, tayo ay pagpapalaing makagawa ng maraming kabutihan. (“Manahan sa Akin, at Ako sa Iyo; Kaya Nga, Lumakad Kang Kasama Ko,” Liahona, Mayo 2023, 123–24, 125)

Mga Karagdagang Aktibidad sa Pag-aaral

Pagpapahalaga sa pagsasalin ni Joseph Smith ng Biblia

Upang matulungan ang mga estudyante na makita kung gaano nakatulong si Propetang Joseph Smith sa ating kaalaman tungkol sa buhay at mga turo ni Enoc, maaari mong gamitin ang sumusunod na aktibidad. Anyayahan ang mga estudyante na paghambingin ang haba ng Genesis 5:18–19, 21–24 at ng Moises 6:21–68; 7:1–69; 8:1. Maaaring ihambing ng mga estudyante ang pagkakaiba sa pamamagitan ng pagbilang ng mga talata o pahina o sa pamamagitan ng pagsukat ng haba gamit ang kanilang mga daliri, o maaari mong i-print ang dalawang set ng mga talatang ito para ipakita sa mga estudyante ang pagkakaiba sa dami o haba.

Makikita sa mga set ng mga talatang ito ang pagkakaiba sa dami ng impormasyon na mayroon tayo tungkol kay Enoc mula sa Biblia at sa dami ng inihayag ng Panginoon kay Propetang Joseph Smith habang ginagawa niya ang kanyang inspiradong pagsasalin ng Biblia.

• Ano ang itinuturo sa inyo ng detalye na ito tungkol kay Propetang Joseph Smith?

• Ano ang itinuturo sa inyo ng detalyeng ito tungkol sa Panginoon?

Pagsusuri sa alalahanin ni Enoc mula sa pananaw ng Panginoon

Isa sa mga kasanayang tumutulong sa atin na suriin ang mga konsepto at tanong nang may walang-hanggang pananaw ay ibahin ang pananaw sa mga tanong at alalahanin. Upang maipakita sa mga estudyante kung paano ibahin ang pananaw sa mga tanong, maaari mong ipanood ang “Pagsusuri sa mga Tanong nang may Walang-hanggang Pananaw” (2:59) sa ChurchofJesusChrist.org. Maaaring magsanay ang mga estudyante na baguhin ang pananaw sa mga tanong o alalahanin sa pamamagitan ng paggamit ng halimbawa ni Enoc. Sabihin sa mga estudyante na basahin ang Moises 6:31, at alamin ang mga palagay na maaaring mayroon si Enoc tungkol sa kanyang sarili, sa ibang tao, o sa Panginoon. Pagkatapos, basahin ang Moises 6:32–39, at tingnan ang mga palagay ring iyon mula sa pananaw ng Panginoon. Tulungan ang mga estudyante na maunawaan ang mga pakinabang ng pagtingin sa mga konsepto at tanong mula sa pananaw ng Panginoon at sa konteksto ng Kanyang plano. Ang pananaw na ito ay makatutulong sa atin na makahanap ng mga sagot, mas lalong magtiwala, at magkaroon ng kapayapaan.

Pananahan kay Cristo at paglakad na kasama Niya

Maaaring makatulong na gumugol pa ng oras sa pag-aaral ng mga salita ng Tagapagligtas kay Enoc sa pagtatapos ng talata 34. Upang matulungan ang mga estudyante na mas maunawaan pa ang tungkol sa paanyaya ng Tagapagligtas na manahan sa Kanya at lumakad na kasama Niya, maaari mong gamitin ang pahayag ni Elder David A. Bednar sa “Karagdagang Resources.” Maaari mo ring talakayin ang ilan o ang lahat ng sumusunod na tanong:

• Ano sa palagay ninyo ang madarama ng isang tinedyer na nananahan sa Tagapagligtas at lumalakad na kasama Niya?

• Para sa inyo, ano ang naidudulot na kaibahan na nalaman ninyo na nais ng Panginoon na manahan sa inyo at lumakad na kasama ninyo habang nahaharap kayo sa mga paghihirap sa inyong buhay?

• Kailan ninyo nadama na nanahan sa inyo ang Tagapagligtas o lumakad kayo na kasama Siya habang nagsisikap kayong sumunod sa Kanya?