Genesis 1–2; Moises 2–3; Abraham 4–5: Lesson 8

Genesis 1:26–27

“Nilalang ng Diyos ang Tao ayon sa Kanyang Sariling Larawan”

Sa ikaanim na panahon ng paglikha, nilikha ng Diyos ang lalaki at babae. Ang bawat tao sa mundo ay minamahal na anak na lalaki o anak na babae ng mga magulang sa langit at may banal na katangian at tadhana. Ang lesson na ito ay makatutulong sa mga estudyante na maunawaan ang kahalagahan ng kanilang pagkakakilanlan o identidad at potensyal bilang mga anak na lalaki at babae ng mga magulang sa langit.

Paghahanda ng estudyante: Sabihin sa mga estudyante na isaulo o rebyuhin ang mga panimulang linya ng mga tema ng Young Women at Aaronic Priesthood, at pagnilayan ang kahalagahan ng bawat pahayag:

Mga Posibleng Aktibidad sa Pag-aaral

Mga pagkakakilanlan at label

Maaaring magdrowing ng isang timeline sa pisara at sabihin sa mga estudyante na gumawa ng sarili nilang timeline sa kanilang study journal. May halimbawang timeline sa ibaba.

Magdrowing ng isang pahalang na linya na kumakatawan sa inyong buhay at isulat dito ang iba’t ibang pagkakakilanlan at titulo ninyo noon, ngayon, o na inaasam ninyong taglayin sa hinaharap. Maaaring kabilang dito ang, “kaibigan,” “estudyante,” o naging posisyon o katungkulan ninyo sa trabaho. Ang sumusunod ay isang halimbawa:

• Ano ang ilang pagkakakilanlan o titulo na pinili ninyong ilagay sa inyong timeline? Bakit?

• Sa anong mga paraan nakakaimpluwensya ang mga pagkakakilanlan o titulo na ito sa mga pagpiling ginagawa ninyo?

Ipinaliwanag ni Pangulong Russell M. Nelson kung paano tayo maaapektuhan ng kung paano natin nilalagyan ng label ang ating sarili.

Ang mga label o titulo ay maaaring maging masaya at magpahiwatig ng inyong suporta sa kahit ilang positibong bagay. Maraming titulo ang magbabago para sa inyo sa paglipas ng panahon. At hindi lahat ng mga ito ay pare-pareho ang halaga. Ngunit kung pinapalitan ng anumang titulo ang pinakamahahalagang bagay na tumutukoy sa inyo, maaari nito kayong pahinain. (“Mga Pagpiling May Epekto sa Kawalang-Hanggan” [pandaigdigang debosyonal para sa mga young adult, Mayo 15, 2022], broadcasts.ChurchofJesusChrist.org)

• Sa inyong palagay, paano maaaring magpahina ang ilang label?

Mga anak ng mga magulang sa langit

Basahin ang Genesis 1:26–27 at ang sumusunod na pahayag mula sa “Ang Mag-anak: Isang Pagpapahayag sa Mundo,” at hanapin ang mga kaalaman tungkol sa iyong walang-hanggang pagkakakilanlan o identidad.

Ang Genesis 1:26–27 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.

Lahat ng tao—lalaki at babae—ay nilalang [ayon] sa larawan ng Diyos. Bawat isa ay minamahal na espiritung anak na lalaki o anak na babae ng mga magulang na nasa langit, at bilang gayon, bawat isa ay may katangian at tadhana na tulad ng sa Diyos. Ang kasarian ay mahalagang katangian ng pagkakakilanlan at layunin ng isang tao sa kanyang buhay bago pa ang buhay niya sa mundo, sa buhay niyang mortal, at sa walang hanggan. (“Ang Mag-Anak: Isang Pagpapahayag sa Mundo,” ChurchofJesusChrist.org)

• Ano ang mga natutuhan ninyo tungkol sa inyong walang-hanggang pagkakakilanlan o identidad?

  Ang isang katotohanan na maaaring natukoy ng mga estudyante ay tayo ay mga anak na lalaki at babae ng mga magulang sa langit, na nilikha ayon sa kanilang larawan. Kung hindi pa nila ito nagagawa, sabihin sa mga estudyante na isulat ang “Anak ng Diyos” sa tapat ng kanilang timeline.

• Ano sa palagay ninyo ang ibig sabihin ng nilikha ayon sa larawan ng Diyos?

Ibinahagi ni Pangulong Thomas S. Monson (1927–2018) ang sumusunod na kabatiran tungkol sa paglikha ayon sa larawan ng Diyos.

Ang ating Diyos Ama ay may mga tainga para marinig ang ating mga dalangin. Mayroon Siyang mga mata para makita ang ating mga ginagawa. Mayroon Siyang bibig para makapangusap sa atin. Mayroon Siyang puso para makadama ng awa at pagmamahal. Siya ay tunay. Siya ay buhay. Tayo ay kanyang mga anak na nilikha sa kanyang larawan. Kamukha niya tayo at kamukha natin siya. (“I Know That My Redeemer Lives,” Ensign, Abr. 1990, 6)

• Sa inyong palagay, bakit mahalagang ituring na mas mahalaga ang inyong identidad bilang anak ng Diyos kaysa sa iba pang identidad ninyo?

  Bigyan ng oras ang mga estudyante na pagnilayan kung gaano kahalaga sa kanila sa kasalukuyan ang kanilang identidad bilang mga anak ng Diyos. Kapag ginawa ito, maaanyayahan ang Espiritu Santo na patotohanan ang katotohanan o ihanda ang kaisipan at kalooban ng mga estudyante para maturuan.

• Anong mga balakid ang maaaring magpahirap na paniwalaan o alalahanin ang inyong identidad bilang anak ng Diyos na nilikha ayon sa Kanyang larawan?

Maaari mong isulat sa pisara ang mga sagot ng mga estudyante sa nakaraang tanong. Ang mga posibleng sagot ay maaaring hindi maunawaan ng ilang tao kung bakit mahalaga ang pagiging anak ng Diyos, nahihirapan silang madama ang pagmamahal ng Diyos, o nagagambala sila ng mga di-gaanong mahalagang identidad. Kung may mga tanong ang mga estudyante tungkol sa kasarian, tularan ang halimbawa ng Tagapagligatas habang itinuturo mo ang Kanyang doktrina sa paraang naghahatid ng pang-unawa, pag-asa, at pagpapagaling. Patotohanan na mahal ng Diyos ang lahat ng Kanyang anak at tutulungan Niya ang mga estudyante na pag-isipan ang kanilang mga tanong habang ipinamumuhay nila ang mga alituntunin ng pagtatamo ng espirituwal na kaalaman.

Para sa ideya sa kung paano matutulungan ang mga estudyante sa mga tanong tungkol sa kasarian, tingnan ang Mga Karagdagang Aktibidad sa Pag-aaral.

Mga salita ng mga banal na kasulatan at mga propeta

Bigyan ang mga estudyante ng handout na pinamagatang “Ako ay Anak ng Diyos.” Sabihin sa mga estudyante na maghangad ng inspirasyon mula sa Diyos habang nag-aaral sila para matulungan silang matukoy ang kahalagahan ng kanilang banal na identidad. Bukod pa sa handout, maaari mong sabihin sa mga estudyante na balikan ang mga turo na matatagpuan sa mga tema ng Young Women at Aaronic Priesthood. Maaaring gawin ito ng mga estudyante nang mag-isa o sa maliliit na grupo.

Kapag natapos nang mag-aral ang mga estudyante, maaari mong sabihin sa kanila na ibahagi sa klase o sa maliliit na grupo ang natutuhan nila. Maaari mo ring itanong ang mga sumusunod:

• Ano ang nahanap ninyo sa napag-aralan ninyong resources na makabuluhan sa inyo?

• Paano makakaapekto na alam ninyo ang inyong identidad bilang anak ng Diyos sa pagtingin ninyo sa inyong sarili at sa ibang tao?

• Paano nakaapekto sa inyong buhay ang kaalaman tungkol sa inyong banal na identidad at potensyal?

Kung makatutulong sa mga estudyante na makakita ng halimbawa ng kung paano makakaapekto sa kanila ang kaalaman sa kanilang walang-hanggang identidad, maaaring ipanood ang “Running Toward the Light” (17:34), na makikita sa ChurchofJesusChrist.org, mula sa time code na 11:00 hanggang 15:19. Sa video na ito, ibinahagi ni Elder Peter M. Johnson ng Pitumpu ang kanyang karanasan nang malaman niya na siya ay anak ng Diyos at ang impluwensya ng kaalamang iyon sa kanyang buhay. Pagkatapos ng video, maaari mong sabihin sa ilang estudyante na magbahagi ng sang bagay na tumimo sa kanila mula sa mensahe ni Elder Johnson.

Pagnilayan ang iyong identidad

Bigyan ng oras ang mga estudyante na pagnilayan ang natutuhan nila tungkol sa kanilang identidad at potensyal bilang mga anak na babae at lalaki ng mga magulang sa langit. Sabihin sa kanila na isulat sa kanilang study journal ang anumang impresyon o ideyang natanggap nila na gusto nilang tandaan. Maaari mong tapusin ang lesson sa pagkanta ng “Ako ay Anak ng Diyos” ng buong klase, pagkatapos ay ibahagi ang iyong patotoo tungkol sa pagiging anak ng Diyos.

Isaulo

Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at balikan ang mga ito sa mga susunod na lesson. Ang mahalagang parirala ng banal na kasulatan para sa Genesis 1:26–27 ay “Nilalang ng Diyos ang tao ayon sa kanyang sariling larawan.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”

Karagdagang Resources

Ano ang ating banal na potensyal bilang mga anak ng Diyos?

Dahil tayo ay mga espiritung anak ng Diyos, namana natin ang potensyal na magkaroon ng mga banal na katangian na Kanyang taglay. Sa pamamagitan ng Pagbabayad-sala ni Jesucristo, maaari tayong maging katulad ng ating Ama sa Langit at tumanggap ng lubos na kagalakan. (Topics and Questions, “Spirit Children of Heavenly Parents,” topics.ChurchofJesusChrist.org)

Para sa karagdagang impormasyon, tingnan ang “Becoming Like God” sa Gospel Topics Essays.

Tingnan din sa “The Origin of Man,” Ensign, Peb. 2002, 26–30.

Ano ang alam natin tungkol sa Ina sa Langit?

Itinuro ni Elder Dale G. Renlund ng Korum ng Labindalawang Apostol:

Kakaunti lang ang naihayag tungkol sa Ina sa Langit, ngunit ang alam natin ay nakabuod sa isang paksa ng ebanghelyo na matatagpuan sa ating Gospel Library application. Kapag nabasa ninyo kung ano ang naroon, malalaman ninyo ang lahat ng alam ko tungkol sa paksang iyon. Sana’y mas marami pa akong alam. Maaaring may mga tanong pa rin kayo at gusto ninyong mahanap ang iba pang mga sagot. Ang paghahangad na mas makaunawa ay mahalagang bahagi ng ating espirituwal na pag-unlad, ngunit maging maingat sana kayo. Hindi mapapalitan ng katwiran ang paghahayag.

Ang haka-haka ay hindi hahantong sa mas maraming espirituwal na kaalaman, sa halip maaari tayong malinlang nito o malihis ang ating tuon sa naihayag na. (“Ang Inyong Banal na Katangian at Walang Hanggang Tadhana,” Liahona, Mayo 2022, 70)

Para sa karagdagang impormasyon, tingnan sa “Mga Magulang sa Langit” sa Mga Paksa at Mga Tanong sa Gospel Library.

Mga Karagdagang Aktibidad sa Pag-aaral

Mga salaysay tungkol sa paglikha

Ang mga banal na kasulatan ay naglalaman ng iba’t ibang salaysay tungkol sa Paglikha. Ang bawat salaysay ay nagdaragdag sa ating pang-unawa. Sabihin sa mga estudyante na pag-aralan ang mga sumusunod na scripture passage tungkol sa paglikha sa lalaki at babae, at alamin ang mga detalye na idinaragdag ng bawat salaysay sa ating pang-unawa.

1. Genesis 1:26–27

2. Moises 2:26–27

3. Abraham 4:26–27

Isinilang para maging hari

Ikinuwento ni Sister Elaine S. Dalton, na dating Young Women General President, ang tungkol sa anak na lalaki ni Haring Louis XVI para ituro kung paano makakaimpluwensya sa ating mga pagpili ang kaalaman natin sa ating potensyal. Maaaring panoorin ang “Remember Who You Are!” mula sa time code na 6:03 hanggang 6:50.

• Paano naaangkop ang kuwentong ito sa ating identidad at potensyal bilang mga anak ng Diyos?

Mga tanong tungkol sa kasarian

Kung may mga tanong ang mga estudyante tungkol sa kasarian, maaaring makatulong na maglaan ng oras sa klase para tugunan ang ilan sa kanilang mga alalahanin. Humingi ng patnubay mula sa Espiritu Santo para matulungan kang malinaw na maituro ang katotohanan nang may pagmamahal at pang-unawa.

Maaaring ibahagi ang sumusunod na pahayag ni Elder Ronald A. Rasband ng Korum ng Labindalawang Apostol upang maihanda ang mga estudyante na talakayin ang sensitibong paksang ito.

Lalo nang madaling matukso … [ay] ang mga kabataan at mga young single adult na nakikibaka sa mga isyu hinggil sa kasarian. Dapat silang yakapin sa bisig ng kanilang Tagapagligtas at malaman na minamahal sila. Palagi tayong tinatawag ng Panginoon; inaasahan Niya na tayo ang tatanggap sa kanila at magiging mapagmahal na bisig Niya. Dapat nating hikayatin ang kanilang mga kaibigan na gawin din iyon. (“Si Jesucristo ang Sagot” [gabi kasama ang isang General Authority, Peb. 8, 2019])

Ituon ang pansin ng mga estudyante sa pahayag mula sa “Ang Mag-Anak: Isang Pagpapahayag sa Mundo” na tinukoy sa lesson.

• Ano ang alam ninyo tungkol sa plano ng Ama sa Langit para sa Kanyang mga anak na makatutulong sa inyo na maunawaan kung bakit mahalagang katangian ang kasarian?

Ibigay ang sumusunod na sources sa mga estudyante. Sabihin sa kanila na magsaliksik ng isa o mahigit pa upang mas maunawaan ang papel na ginagampanan ng kasarian sa plano ng Ama sa Langit o iba pang ideya tungkol sa paksa.

• Binigyang-kahulugan ng Simbahan ang kasarian bilang biological na kasarian noong isinilang (Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw [2023], 38.6.23).

• “Lesson 7 Materyal sa Paghahanda para sa Klase: Ang Walang-Hanggang Likas na Katangian at Layunin ng Kasarian,” Materyal para sa Paghahanda sa Klaseng Ang Walang Hanggang Pamilya, institute.ChurchofJesusChrist.org.

• Pangulong Dallin H. Oaks sa “General Conference Leadership Meetings Begin,” Newsroom.ChurchofJesusChrist.org.

• “Transgender” sa bahaging Life Help ng Gospel Library.

Mga opsiyon sa video

Maaari mong ipanood ang isa sa mga sumusunod na video, na makikita sa ChurchofJesusChrist.org, para tulungan ang mga estudyante na maunawaan ang kanilang banal na potensyal at ang pagmahahal sa kanila ng Ama sa Langit bilang Kanyang mga anak.

Learn about God’s Plan for You (0:56)

Earthly Father, Heavenly Father (3:59)

God’s Greatest Creation (2:51)