Moises 1; Abraham 3: Lesson 5

Moises 1:12–26

“Lumayo Ka, Satanas”

Naramdaman na nating lahat ang mga tukso ni Satanas. Gayunpaman, tulad ni Moises, kapag inalala natin kung sino talaga tayo, makatatanggap tayo ng lakas mula sa Diyos para madaig si Satanas at ang kanyang mga tukso sa ating buhay. Ang layunin ng lesson na ito ay tulungan ang mga estudyante na humugot ng lakas mula sa Diyos upang mapaglabanan ang mga tuksong kinakaharap nila sa kanilang personal na buhay.

Paghahanda ng estudyante: Sabihin sa mga estudyante na pagnilayan ang isa sa mga tuksong kinakaharap nila sa kanilang personal na buhay at pumasok sa klase na handang matuto kung paano ito mapaglalabanan.

Mga Posibleng Aktibidad sa Pag-aaral

Pagharap sa tukso

Upang maihanda ang mga estudyante na matuto tungkol sa paglaban sa mga tukso, maaari mong ibahagi ang sumusunod na pahayag at mga tanong.

Itinuro ni Pangulong Jeffrey R. Holland ng Korum ng Labindalawang Apostol:

Hayagan kaming nagsasalita dahil si Satanas ay tunay at gusto niya kayong sirain, at pabata nang pabata ang mga taong tinutukso niya. (“Tayong Lahat ay Kabilang,” Liahona, Nob. 2011, 45)

• Ano ang nadarama ninyo tungkol sa pahayag na ito ni Pangulong Holland?

• Ano ang ilan sa mga tuksong kinakaharap ng mga tinedyer na Banal sa mga Huling Araw?

Makatutulong na isulat sa pisara ang mga tuksong babanggitin ng mga estudyante. Sasabihin mo sa mga estudyante na pag-isipan ang mga ito kalaunan sa lesson.

Para sa mga sumusunod na tanong, maaari mong sabihin sa mga estudyante na isulat ang kanilang mga sagot sa kanilang study journal.

Mag-isip ng tukso na kinaharap mo o maaaring kinakaharap mo. Pag-isipan ang mga sumusunod:

• Bakit mahirap para sa iyo na labanan ang tuksong iyon?

• Ano ang ginagawa mo para humingi ng tulong at lakas para mapaglabanan iyon?

• Sa iyong palagay, gaano kaepektibo mong napaglalabanan ang tukso sa iyo?

Habang pinag-aaralan ninyo ang Moises 1:1–26 ngayon, humingi ng patnubay mula sa Espiritu Santo para matukoy ang mga katotohanang makapagpapalakas sa inyo sa pagharap ninyo sa tukso.

Tinukso ni Satanas si Moises

Anyayahan ang mga estudyante na ibahagi ang naaalala nila sa nakaraang lesson, o maaari nilang mabilisang basahing muli ang Moises 1:1–10 at pagnilayan ang natutuhan nila. Kung kinakailangan, ipaalala sa kanila na “nakita [ni Moises] ang Diyos nang harapan, at siya ay nakipag-usap sa Kanya” (Moises 1:2) at tatlong beses itinuro ng Diyos kay Moises na siya ay Kanyang anak (tingnan sa talata 4, 6, at 7).

Bagama’t isang dakilang propeta si Moises, naharap din siya sa matinding tukso. Hindi nagtagal matapos ang karanasan ni Moises sa Diyos, nagkaroon siya ng napakahirap na karanasan kung saan “dumating si Satanas na tinutukso siya” (Moises 1:12). Dahil sa nalalaman at ginawa ni Moises, nanaig siya. Basahin ang Moises 1:12–22, at alamin kung ano ang nakatulong kay Moises na mapaglabanan ang mga tukso ni Satanas. Maaari ninyong markahan ang mahahanap ninyo.

Maaari mong ipanood ang video na “I Am a Son of God” mula sa time code na 2:50 hanggang 6:30, o ang buong video kung hindi mo ipinanood sa mga estudyante ang unang bahagi sa nakaraang lesson. Pagkatapos ng video, maaari mong anyayahan ang mga estudyante na basahin ang mga talata, at alamin kung ano ang nakatulong kay Moises na mapaglabanan ang mga tukso ni Satanas. Pagkatapos ay maaaring talakayin ng mga estudyante ang sumusunod na tanong nang magkakapartner o sa maliliit na grupo:

• Ano ang natutuhan ninyo mula sa karanasan ni Moises na makatutulong sa atin na mapaglabanan ang mga tukso sa atin?

Maaari mong isulat sa pisara ang sumusunod na hindi kumpletong alituntunin: Makatatanggap tayo ng tulong ng Diyos para mapaglabanan ang mga tukso sa pamamagitan ng … Sabihin sa mga estudyante na pumunta sa pisara at kumpletuhin ang alituntunin gamit ang sarili nilang mga salita. Kung kailangan ng mga estudyante ng tulong, maaari mo silang gabayan sa pamamagitan ng pagtatanong ng tulad ng mga sumusunod:

• Ano ang itinawag ni Satanas kay Moises sa talata 12, at paano tumugon si Moises sa talata 13?

• Ano ang naalala ni Moises mula sa kanyang espirituwal na karanasan sa Diyos na nakatulong sa kanya nang maharap siya sa tukso?

Maaaring tapusin ng mga estudyante ang alituntunin sa ilang paraan, na kinabibilangan ng ilan sa mga sumusunod:

… pag-alaala na tayo ay mga anak ng Diyos

… pag-alaala sa mga nakaraang espirituwal na karanasan

… paghingi ng lakas sa Diyos

Matapos matukoy ang maraming alituntunin, maaari mong gamitin ang sumusunod na pahayag at mga tanong para mapalalim ang pang-unawa ng mga estudyante sa mga katotohanang natuklasan nila.

Ibinahagi ni Pangulong Russell M. Nelson ang sumusunod tungkol sa kapangyarihan ng pag-alaala na tayo ay mga anak ng Diyos:

Mahal kong mga kaibigan, kayo ay literal na mga espiritung anak ng Diyos. Nakanta na ninyo ang katotohanang ito mula nang matutuhan ninyo ang mga titik sa “Ako ay Anak ng Diyos.” Ngunit nakatatak ba sa puso ninyo ang walang-hanggang katotohanang iyan? Nakadaig na ba kayo ng tukso dahil sa katotohanang ito? (“Mga Pagpiling May Epekto sa Kawalang-Hanggan” [pandaigdigang debosyonal para sa mga young adult, Mayo 15, 2022])

• Ano sa palagay ninyo ang ibig sabihin ng itatak sa inyong puso ang katotohanang kayo ay anak ng Diyos?

• Paano tayo mapapalakas ng pag-alaala na tayo ay mga anak ng Diyos kapag nahaharap tayo sa tukso?

• Sa inyong palagay, bakit kailangan natin ang tulong ng Diyos para mapaglabanan ang tukso?

Sabihin sa mga estudyante na magbahagi ng mga halimbawa kung saan pinalakas ng Diyos ang isang tao laban sa tukso. Maaaring ito ay mula sa mga banal na kasulatan, sa mga taong malapit sa kanila, o sa sarili nilang buhay. Dahil personal ang mga tukso, ipaalala sa mga estudyante na huwag magbahagi ng anumang partikular na tukso.

Paglabanan ang mga tuksong nararanasan nang personal

Upang matulungan ang iyong mga estudyante na maunawaan kung paano nila maisasabuhay ang mga alituntuning tinalakay ngayon, sabihin sa kanila na pumili ng isa o dalawang tukso na nakasulat sa pisara kanina sa lesson. Bilang isang klase o sa maliliit na grupo, sabihin sa mga estudyante na mag-isip ng mga praktikal na paraan kung saan magagamit ng isang taong nahaharap sa tukso ang mga alituntuning ito para mapaglabanan ang tuksong iyon.

Maaari mong sabihin sa mga estudyante na isulat sa pisara ang kanilang mga ideya, o maaari kang magpakita ng ilan sa mga sumusunod na ideya.

Mga paraan para maisabuhay ang natutuhan natin sa Moises 1:12–26:

• Magsulat sa iyong journal ng pagkakataon kung kailan nadama mo ang pagmamahal ng Panginoon at alam mong ikaw ay anak ng Diyos. Maaari mong balikan ito kapag nahaharap ka sa tukso.

• Isaulo at ulit-ulitin ang mga nagbibigay-inspirasyong banal na kasulatan, himno, o panalangin sa sakramento na sasabihin mo sa iyong sarili kapag natutukso ka. (Ito ang estratehiya na ginamit ng Tagapagligtas sa Mateo 4:1–11.)

• Manalangin araw-araw para sa lakas at kapangyarihan ng Panginoon na mapaglabanan ang tukso. Manalangin sa Ama sa Langit tuwing gabi para pasalamatan Siya, kilalanin ang anumang kahinaan, humingi ng tawad, at mangakong patuloy na magsisikap (tingnan sa 3 Nephi 18:15, 18).

• Alalahanin ang mga nakaraan mong espirituwal na karanasan at isulat ang mga ito sa isang journal. Tingnan ang mga ito kapag dumarating ang tukso.

• Talakayin sa mga magulang o mga mapagkakatiwalaang adult o kaibigan kung paano nakatulong ang mga alituntuning ito sa kanila at ang mga paraang mairerekomenda nila para isabuhay mo ang mga ito.

Sabihin sa mga estudyante na gumawa ng plano na makatutulong sa kanila na mapaglabanan ang mga tuksong kinakaharap nila. Magagawa mo ito sa pamamagitan ng pagbibigay ng mga sumusunod na tagubilin:

Alalahanin ang tuksong pinag-isipan ninyo sa simula ng lesson o iba pang tukso na kinakaharap ninyo.

Ibahagi ang iyong patotoo tungkol sa naranasan mong kapangyarihan at lakas ng Panginoon sa iyong buhay at sa pagnanais Niya na matulungan ang iyong mga estudyante na mapaglabanan ang kanilang mga tukso. Ipahayag ang iyong tiwala sa kanila at sa kanilang kakayahang mapaglabanan ang mga tukso sa tulong ng Diyos.

Nang humihingi ng patnubay sa Ama sa Langit, kumpletuhin ang sumusunod na pahayag sa inyong study journal o sa inyong isipan: “Upang matulungan akong maghanda laban sa tuksong ito, ako ay .”

Karagdagang Resources

Paano makatutulong sa akin ang pag-alaala sa pagmamahal ng Diyos sa akin bilang Kanyang anak kapag natutukso ako?

Sinabi ni Pangulong M. Russell Ballard (1928–2023) ng Korum ng Labindalawang Apostol:

Tandaan ninyo na, una, mahal kayo ng inyong Ama sa Langit, at, pangalawa, mahal kayo ng inyong Tagapagligtas, ang Panginoong Jesucristo. Unawain ang mga katotohanang ito sa inyong isipan at pagkatapos ay itimo ito nang malalim sa inyong puso. Ang mga ito ang gagabay sa inyo kung paano kayo dapat kumilos at kung paano ninyo dapat pakitunguhan ang iba, at bibigyan kayo ng mga ito ng lakas para mapaglabanan ang tukso at manatili sa landas ng tipan ng Simbahan. (“Children of Heavenly Father” [Debosyonal sa Brigham Young University, Mar. 3, 2020])

Paano makatutulong sa atin ang pag-alaala sa ating mga nakaraang espirituwal na karanasan para mapaglabanan ang tukso?

Ipinayo ni Pangulong Jeffrey R. Holland ng Korum ng Labindalawang Apostol:

Sa mga sandali ng takot o pag-aalinlangan o problema, panindigan ang inyong pananampalataya, kahit limitado pa iyon. … Pagdating ng mga sandaling iyon at magkaroon ng mga problema, at hindi ito malutas kaagad, manangan nang mahigpit sa nalalaman na ninyo at manindigan hanggang sa dumating ang karagdagang kaalaman. … Hindi mahalaga ang laki ng inyong pananampalataya o antas ng inyong kaalaman—ang mahalaga ay ang katapatan ninyo sa inyong pananampalataya at sa katotohanang alam na ninyo. (“Panginoon, Nananampalataya Ako,” Liahona, Mayo 2013, 93–94)

Bakit kadalasang dumarating ang mga tukso kapag sinisikap kong espirituwal na umunlad o pagkatapos kong magkaroon ng mga espirituwal na karanasan?

Itinuro ni Propetang Joseph Smith (1805–44):

Kapag mas lumalapit ang isang tao sa Panginoon, magpapakita ng higit na kapangyarihan ang kaaway upang hadlangan ang pagsasakatuparan ng Kanyang mga layunin. (sa Orson F. Whitney, Life of Heber C. Kimball [Salt Lake City: Bookcraft, 1967], 132)

Ipinaliwanag ni Pangulong Jeffrey R. Holland:

Gusto kong hikayatin ang lahat sa inyo tungkol sa oposisyong napakadalas dumating pagkaraang makagawa ng mabubuting desisyon, pagkaraang maibigay sa atin ng paghahayag at pananalig ang kapayapan at katiyakang inakala nating hindi kailanman mawawala sa atin. …

Hindi tayo maaaring sumali sa isang kaganapan na may gayong walang-hanggang kahalagahan at walang-hanggan ang epekto nang hindi batid na pakikipaglaban ito—isang mabuting pakikipaglaban at isang nananalong pakikipaglaban, ngunit pakikipaglaban pa rin na maituturing. (“Cast Not Away Therefore Your Confidence” [Debosyonal sa Brigham Young University, Mar. 1999], 2–3)

Paano natin mapaglalabanan ang kapangyarihan ni Satanas?

Ibinahagi ni Elder Ulisses Soares ng Korum ng Labindalawang Apostol ang sumusunod tungkol sa paglaban sa tukso:

Ang paglaban sa tukso ay nangangailangan ng habambuhay na pagsisikap at pananampalataya. Ngunit nais kong malaman ninyo na handa tayong tulungan ng Panginoon sa ating mga personal na pagsisikap at nangangako Siya ng mga pambihirang pagpapala kung magtitiis tayo hanggang wakas. (“Saliksikin si Cristo sa Bawat Pag-iisip,” Liahona, Nob. 2020, 83)

Mga Karagdagang Aktibidad sa Pag-aaral

Isang halimbawa ng paglaban sa tukso sa tunay na buhay

Upang matulungan ang mga estudyante na maaaring nagpatangay sa tukso o nahihirapan sa adiksyon, maaari mong ipanood ang video na “Let God Guide You: From Weakness to Strength” (6:07), ang kuwento tungkol sa isang lalaking tumanggap ng kapangyarihan at lakas ng Panginoon para mapaglabanan ang kanyang mga tukso at adiksyon sa pornograpiya. Ang video na ito ay maaaring makatulong lalo na sa mga estudyanteng nagpatangay na sa tukso. Pagkatapos ng video, itanong sa mga estudyante kung ano ang mga natutuhan nila tungkol sa paglaban sa tukso at sa papel na ginagampanan ng Diyos sa kakayahan nating mapaglabanan ang mga ito. Maaari mong ipanood ang video bago ang bahaging “Paglabanan ang mga tuksong nararanasan nang personal” ng lesson.

Moises 1 sa Mahalagang Perlas sa halip na sa aklat ng Genesis

Kung sa palagay mo ay makikinabang ang mga estudyante sa pagtalakay kung bakit wala sa aklat ng Genesis ang Moises 1, ipabasa sa kanila ang Moises 1:23, at alamin ang dahilan kung bakit kasalukuyang hindi ito kasama. Maaari mong itanong ang mga sumusunod:

• Sa inyong palagay, bakit hindi gusto ni Satanas na “[mapasa] mga anak ng tao” ang salaysay na ito (Moises 1:23)?

• Ano ang mga dahilan kung bakit masaya kayo na ibinalik ng Panginoon ang kabanatang ito sa pamamagitan ni Joseph Smith?

Pagkukumpara ng karanasan ni Moises sa karanasan ni Joseph Smith

Upang matulungan ang mga estudyante na mas maunawaan kung paano mapaglalabanan ang mga tukso ni Satanas ang mga pagpapalang maaaring dumating sa paggawa nito, sabihin sa mga estudyante na ikumpara ang mga karanasan nina Moises at Joseph Smith.

Sa kanilang study journal, maaaring magdrowing ang mga estudyante ng stick figure na may label na Moises at isa pang stick figure na may label na Joseph Smith. Pagkatapos ay maaari nilang ikumpara ang Moises 1:12–22 at Joseph Smith—Kasaysayan 1:13–16, at alamin ang mahahalagang detalye sa bawat pagharap kay Satanas, at kung ano ang ginawa nina Moises at Joseph Smith para madaig siya. Maaari nilang ilista ang mga detalyeng ito sa ilalim ng bawat drowing.

Kung kailangan ng mga estudyante ng tulong, maaari mong ipakita ang mga tanong na tulad ng:

• Anong espirituwal na karanasan ang naalala ninyong naranasan ng propeta bago niya nakaharap si Satanas?

• Sa huli, paano nadaig ng Propeta si Satanas?

• Anong nangyari dahil nadaig ng Propeta si Satanas (tingnan sa Moises 1:24-25; Joseph Smith—Kasaysayan 1:17)?

Naglalaho ang tukso kapag sinasaliksik natin si Cristo sa bawat pag-iisip

Upang matulungan ang mga estudyante na maunawaan ang kahalagahan ng pagtuon kay Cristo kapag nahaharap sa tukso, tulungan sila na makitang nakatuon si Moises kay Jesucristo nang makaharap niya si Satanas (tingnan sa Moises 1:13, 16–18). Ipanood ang video na “Temptation Fades as We Seek Christ in Every Thought” (2:57), at sabihin sa mga estudyante na magbahagi ng anumang karagdagang kaalaman na natamo nila tungkol sa paglaban sa tukso.