Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Mosesy 1:12–26: “Mialà eto ry Satana”

“Mosesy 1:12–26: ‘Mialà eto ry Satana,’” Testamenta Taloha: Boky torolalana ho an’ny mpampianatra seminera (2026)

“Mosesy 1:12–26: Mialà eto ry Satana,” Testamenta Taloha: Boky torolalana ho an’ny mpampianatra seminera

Mosesy 1; Abrahama 3: Lesona 5

Mosesy 1:12–26

“Mialà eto ry Satana”

Samy efa nahatsapa ny fakam-panahy avy amin’i Satana avokoa isika rehetra. Tahaka an’i Mosesy anefa, rehefa tsaroantsika hoe iza marina isika, dia afaka mandray hery avy amin’ Andriamanitra handresena an’i Satana sy ireo fakam-panahiny eo amin’ny fiainantsika isika. Ny tanjon’ity lesona ity dia ny hanampiana ny mpianatra handray hery avy amin’ Andriamanitra mba handresena ny fakam-panahy atrehin’izy ireo manokana.

Fanomanana ny mpianatra: Asao hisaintsaina ny iray amin’ireo fakam-panahy atrehin’izy ireo manokana ny mpianatra ary ho vonona hianatra ny fomba handresena izany rehefa tonga ao an-dakilasy.

Sahanasa fianarana azo atao

Fiatrehana fakam-panahy

Mba hanomanana ny mpianatra hianatra ny fomba handresena ny fakam-panahy, dia ampiasao ireto teny nambara sy fanontaniana manaraka ireto.

Nampianatra toy izao ny Filoha Jeffrey R. Holland ao amin’ny Kôlejin’ny Apôstôly Roambinifololahy:

Miresaka amim-pahasahiana izahay satria tena misy i Satana ary vonona ny handrava anareo ary mbola tena tanora fanahy ianareo dia efa miatrika sahady ny fitaomany. (“Mpandray Anjara Avokoa Isika,” Liahona, nôv. 2011, 45)

Inona no tsapanao momba an’io tenin’i Filoha Holland io?
Inona avy ireo fakam-panahy atrehin’ny tanora Olomasin’ny Andro Farany?

Mety hanampy ny manoratra eny amin’ny solaitrabe ireo fakam-panahy resahin’ny mpianatra. Hangataka ny mpianatra hisaintsaina an’ireo ianao any amin’ny faramparan’ny lesona.

Ho an’ireto fanontaniana manaraka ireto dia azonao asaina ny mpianatra hanoratra ny valinteniny ao anaty diary fandalinana.

Saintsaino ny fakam-panahy natrehinao na mety nitolomanao. Hevero ireto manaraka ireto:

Inona no maha sarotra aminao ny miatrika an’io fakam-panahy io?
Inona no ataonao mba hahazoana fanampiana sy tanjaka hanoherana azy?
Manao ahoana ny fahatsapanao ny fahombiazanao mandresy ilay fakam-panahinao?

Rehefa manadalina ny Mosesy 1:1–26 ianao androany, dia katsaho ny fitarihan’ny Fanahy Masina mba hanampy anao hahita ireo fahamarinana izay afaka manome hery anao rehefa miatrika fakam-panahy.

Maka fanahy an’i Mosesy i Satana

Asao ny mpianatra hizara ny zavatra tadidin’izy ireo tamin’ny lesona teo aloha, na afaka mamerina mijery kely ny Mosesy 1:1–10 izy ireo, dia misaintsaina ny zavatra nianaran’izy ireo. Raha ilaina, dia ampahatsiahivo azy ireo fa “nahita an’ Andriamanitra nifanatrika [i Mosesy] ary niresaka Taminy,” (Mosesy 1:2) ary nampianatra an’i Mosesy intelo Andriamanitra fa zananilahy izy (jereo ny andininy 4, 6, ary 7).

Na dia mpaminany mahery aza i Mosesy, dia niatrika fakam-panahy lehibe ihany koa izy. Fotoana fohy taorian’ny nahitan’i Mosesy an’ Andriamanitra, dia niaina zavatra tena sarotra izy satria “naka fanahy azy i Satana” (Mosesy 1:12). Noho ny zavatra fantatr’i Mosesy sy nataony, dia afaka nandresy izy. Vakio ny Mosesy 1:12–22, mba hahitanao ny zavatra nanampy an’i Mosesy handresy ireo fakam-panahin’i Satana. Hevero ny hanisiana marika ny zavatra hitanao.

Azonao aseho ilay horonantsary hoe “I Am a Son of God” manomboka eo amin’ny mari-potoana 2:50 hatramin’ny 6:30, na ilay horonantsary manontolo raha tsy nasehonao ny mpianatra ny tapany voalohany tamin’ny lesona teo aloha. Rehefa tapitra ilay horonantsary, dia asao ny mpianatra hamaky ireo andinin-teny, mba hahitany ny zavatra nanampy an’i Mosesy handresy ireo fakam-panahin’i Satana. Afaka mifanakalo hevitra momba ireto fanontaniana manaraka ireto tsiroaroa na ao anatina vondrona kely ny mpianatra avy eo:

6:31

Inona no ianaranao avy amin’ny zavatra niainan’i Mosesy ka afaka manampy antsika handresy ny fakam-panahy atrehintsika?

Soraty eny amin’ny solaitrabe ity fitsipika misy banga ity: Afaka mahazo ny fanampian’ Andriamanitra isika handresena fakam-panahy amin’ny alalan’ny … Asao ny mpianatra ho eny amin’ny solaitrabe ary hameno ilay fitsipika amin’ny teniny manokana. Raha mila fanampiana ny mpianatra, dia tariho izy ireo amin’ny alalan’ny fametrahana fanontaniana toy ireto manaraka ireto:

Ahoana no fomba niantsoan’i Satana an’i Mosesy ao amin’ny andininy 12, ary ahoana no fomba namalian’i Mosesy ao amin’ny andininy 13?
Inona no zavatra tsaroan’i Mosesy tamin’ny zavatra ara-panahy niainany niaraka tamin’ Andriamanitra, izay nanampy azy rehefa niatrika fakam-panahy?

Mety hameno ilay fitsipika amin’ny fomba isan-karazany ireo mpianatra, anisan’izany ireto manaraka ireto:

… fahatsiarovana fa zanak’ Andriamanitra isika

… fahatsiarovana ireo zavatra niainana ara-panahy tany aloha

… fangatahana hery avy amin’ Andriamanitra

Rehefa nahita fitsipika maromaro, dia ampiasao ireto teny notsongaina sy fanontaniana manaraka ireto mba hanampiana ny mpianatra hahatakatra lalina kokoa ny fahamarinana hitan’izy ireo.

Nizara izao manaraka izao ny Filoha Russell M. Nelson momba ny herin’ny fahatsiarovana fa zanak’ Andriamanitra isika:

Ry namako malala, tena zanak’ Andriamanitra ara-bakiteny ianareo. Nihira io fahamarinana io ianao hatramin’ny nianaranao ny tonon’ny “Zanaky ny Ray aho.” Kanefa, moa ve izany fahamarinana mandrakizay izany miraikitra ao am-ponao? Moa ve namonjy anao io fahamarinana io rehefa tojo fakam-panahy ianao? (“Safidy ho an’ny mandrakizay” [fampaherezam-panahy maneran-tany ho anʼny tanora tokan-tena, 15 Mey 2022])

Ahoana no fiheveranao ny hevitry ny hoe fananana ny fahamarinana miorim-paka ao am-ponao fa zanak’ Andriamitra ianao?
Nahoana no manome hery antsika ny fahatsiarovana fa zanak’ Andriamanitra isika rehefa miatrika fakam-panahy?
Araka ny hevitrao, nahoana isika no mila ny fanampian’ Andriamanitra raha te handresy fakam-panahy?

Asao ny mpianatra hizara ohatra momba ny fomba nankaherezan’ Andriamanitra olona iray niatrika fakam-panahy? Mety avy amin’ny soratra masina izany, na olona akaiky azy, na tamin’ny fiainan’izy ireo manokana. Koa satria mahakasika ny tena manokana ny fakam-panahy, dia ampahatsiahivo mba tsy hiresaka fakam-panahy manokana loatra ny mpianatra.

Fandresena ireo fakam-panahy atrehin’ny tena manokana

Mba hanampiana ny mpianatrao hahatakatra ny fomba ahafahan’izy ireo miaina ireo fitsipika noresahina androany, dia asao izy ireo hisafidy fakam-panahy iray na roa voasoratra teo amin’ny solaitrabe tamin’ny lesona teo aloha. Asao ny iray kilasy na atambaro anaty vondrona kely izy ireo, dia asaivo mieritreritra fomba hampiharan’ny olona iray an’ireo fitsipika ireo rehefa miatrika fakam-panahy.

Asao ny mpianatra hanoratra ny hevitr’izy ireo eny amin’ny solaitrabe, na azonao aseho azy ireo ny sasany amin’ireto hevitra manaraka ireto.

Fomba hampiharana izay nianarantsika tao amin’ny Mosesy 1:12–26:

Raketo ao anatin’ny diary fandalinanao ny fotoana nahatsapanao ny fitiavan’ny Tompo sy ny nahafantaranao fa zanak’ Andriamanitra ianao. Azonao averina jerena ity rehefa miatrika fakam-panahy ianao.
Tadidio sy averimbereno ny soratra masina manome aingam-panahy, na fihirana, na vavaky ny fanasan’ny Tompo rehefa tojo fakam-panahy ianao. (Io no paikady nampiasain’ny Mpamonjy ao amin’ny Matio 4:1–11.)
Mivavaha isan’andro mba hahazoana hery sy tanjaka avy amin’ny Tompo, mba handresena ilay fakam-panahy. Isaky ny hariva dia manaova tatitra amin’ny Ray any An-danitra ho fisaorana Azy, maneke ny fahalemena rehetra, mangataha famelan-keloka ary manomeza toky ny hiezaka hanohy hatrany (jereo ny 3 Nefia 18:15, 18).
Tsarovy ireo zavatra niainanao ara-panahy tany aloha ary soraty ao anaty diary izany. Avereno jerena izy ireo rehefa miseho ny fakam-panahy.
Mifanakaloza hevitra miaraka amin’ny ray aman-dreny na olon-dehibe azo itokisana na namana momba ny fomba nanampian’ireo fitsipika ireo azy ireo sy ny fomba nanomezany hevitra ho anao mba hampihatra izany.

Asao ny mpianatra hanao drafitra izay hanampy azy ireo amin’ny fandresena fakam-panahy hatrehany. Azonao atao izany amin’ny alalan’ny fanomezana ireto torolalana manaraka ireto:

Tadidio ireo fakam-panahy nosaintsaininao tany am-piandohan’ny lesona na fakam-panahy iray hafa izay nosedrainao.

Zarao ny fijoroana ho vavolombelona anananao momba ny hery sy tanjaky ny Tompo niainanao teo amin’ny fiainanao sy ny faniriany hanampy ny mpianatrao handresy ny fakam-panahin’izy ireo. Asehoy ny fatokisanao azy ireo sy ny fahafahany mandresy ny fakam-panahy miaraka amin’ny fanampian’ Andriamanitra.

Avy amin’ny alalan’ny fangataham-pitarihana amin’ny Ray any An-danitra dia fenoy ao amin’ny diary fandalinanao na ao an-tsainao ity teny manaraka ity: “Mba hanampiana ahy hiomana hiatrika io fakam-panahy io, izaho dia .”

Loharanom-pitaovana fanampiny

Ahoana no fomba hahafahan’ny fahatsiarovana ny fitiavan’ Andriamanitra ahy amin’ny maha-zanany ahy manampy ahy rehefa alaim-panahy aho?

Nilaza ny Filoha M. Russell Ballard (1928–2023) ao amin’ny Kôlejin’ny Apôstôly Roambinifolo hoe:

Aza hadinoinareo fa, voalohany indrindra, tia anareo ny Rainareo any An-danitra, ary ny faharoa manaraka izany dia tia anareo ny Mpamonjy, dia i Jesoa Kristy Tompo. Ampitoero ao an-tsainareo ireo fahamarinana ireo ary raketo lalina ao am-ponareo izany. Hanoro lalana anareo izy ireo ny amin’ny fomba tokony hataonareo sy ny fomba hitondranareo ny hafa, ary hanome anareo hery izy ireo handresena ny fakam-panahy sy hitoeranreo eo amin’ny lalan’ny fanekempihavanan’ny Fiangonana. (“Children of Heavenly Father” [Fampaherezam-panahy tao amin’ny Oniversite Brigham Young, 3 martsa 2020])

Ahoana no ahafahan’ny fahatsiarovantsika ny zavatra niainantsika ara-panahy tany aloha manampy antsika handresy ny fakam-panahy?

Nanentana toy izao ny Filoha Jeffrey R. Holland ao amin’ny Kôlejin’ny Apôstôly Roambinifolo:

Amin’ny fotoan’ny tahotra na ny ahiahy na ny tebiteby dia, hazony ilay finoana izay efa anananao, na dia voafetra ihany aza izany. … Rehefa tonga ireny fotoana ireny ka mitranga ny olana dia tsy ho tonga avy hatrany ny vahaolana, hazony mafy izay efa fantatrao ary mahatanjaha hatrany mandra-pahazoanao fahalalana misimisy kokoa. … Tsy ny halehiben’ny finoanao na ny halalin’ny fahalalanao no zava-dehibe—fa ny fahamarinan-toetra asehonao mikasika ny finoana anananao sy ny fahamarinana izay efa fantatrao. (“Tompo ô, mino aho,” Liahona, Mey 2013, 93–94)

Nahoana no tonga matetika amiko ny fakam-panahy rehefa miezaka mandroso ara-panahy aho na rehefa avy nandalo traikefa ara-panahy?

Nampianatra ny Mpaminany Joseph Smith (1805–44) hoe:

Arakaraky ny hanatonan’ny olona iray ny Tompo no hanehoan’ny fahavalo hery lehibe mba hanakanana ny fahatanterahan’ny fikasany. (ao amin’ny Orson F. Whitney, Life of Heber C. Kimball [Salt Lake City: Bookcraft, 1967], 132)

Nanazava toy izao ny Filoha Jeffrey R. Holland:

Maniry ny hamporisika anareo tsirairay avy aho androany manoloana ny fanoherana izay matetika miseho rehefa nanao fanapahan-kevitra avy tamim-pahalalana, sy aorian’ny fotoam-panambarana na fotoam-pandresen-dahatra nitondra fiadanana sy antoka izay noeritreretintsika tsy ho very na oviana na oviana …

Tsy ekentsika ny fotoana manan-danja mandrakizay sy mitarika vokany tsy misy fiafarany toy izany raha tsy fantatsika fa ho ady izany, ady tsara sady ady hitondra fandresena, kanefa ady na dia izany aza. (“Cast Not Away Therefore Your Confidence” [fampaherezam-panahy tao amin’ny Oniversite Brigham Young, martsa 1999], 2–3)

Ahoana no fomba hanoherantsika ny herin’i Satana?

Nizara izao manaraka izao ny Loholona Ulisses Soares ao amin’ny Kôlejin’ny Apôstôly Roambinifolo mikasika ny fandresena fakam-panahy:

14:47

Ny fiadiana amin’ny fakam-panahy dia mitaky fahazotoana sy fahatokiana mandritra ny fiainana manontolo. Saingy fantaro fa ny Tompo dia vonona hanampy antsika amin’ireo ezaka manokana ataontsika ary mampanantena fitahiana mahatalanjona raha maharitra hatramin’ny farany isika. (“Mikatsaka an’i Kristy amin’ny eritreritra rehetra,” Liahona, nôv 2020, 83)

Sahanasa fianarana fanampiny

Ohatra iray nisy teo amin’ny fiainana momba ny fandresena fakam-panahy

Mba hanampiana ny mpianatra izay efa nilefitra tamin’ny fakam-panahy na nitolona tamin’ny fiankinan-doha amin-javatra, dia alefaso ilay horonantsary “Let God Guide You: From Weakness to Strength” (6:07), tantaran’ny lehilahy iray izay nahazo hery sy tanjaka avy amin’ny Tompo mba handresena ny fakam-panahy nahazo azy sy ny fiankinan-doha tamin’ny pôrnôgrafia. Mety hanampy manokana ny mpianatra izay efa nilefitra tamin’ny fakam-panahy io horonantsary io. Aorian’io horonantsary io dia, anontanio ny mpianatra ny hevi-baovao azon’izy ireo momba ny fandresena ny fakam-panahy sy ny anjara asan’ Andriamanitra amin’ny fahaizantsika mandresy izany. Asehoy ity horonantsary ity mialoha ny fizaràna “Mandresy ireo fakam-panahy manokana” ao amin’ny lesona.

6:7

Mosesy 1 ao amin’ny Voahangy Lafo Vidy fa tsy ao amin’ny bokin’ny Genesisy

Raha heverinao fa afaka mahazo tombontsoa ny mpianatra rehefa mifanakalo hevitra momba ny hoe nahoana ny Mosesy 1 no tsy ao amin’ny bokin’ny Genesisy, dia asao izy ireo hamaky ny Mosesy 1:23, ka hitady ny antony tsy nampidirana izany ao anatiny. Hevero ny hametraka ireto fanontaniana manaraka ireto:

Araka ny eritreritrao, nahoana no tsy tian’i Satana ho “tsy nahalala [io tantara io] ny zanak’olombelona” (Mosesy 1:23)?
Inona no antony mahafaly anao tamin’ny famerenan’ny Tompo ity fizarana ity tamin’ny alalan’i Joseph Smith?

Fampitahana ny zavatra niainan’i Mosesy sy ny zavatra niainan’i Joseph Smith

Hanampiana ny mpianatra hahatakatra tsaratsara kokoa ny fomba hanoherana ny fakam-panahy ataon’i Satana sy ny fitahiana amin’ny fanaovana izany, dia asao ny mpianatra hampitaha ny zavatra niainan’ Mosesy sy i Joseph Smith.

Ao amin’ny diary fandalinan’izy ireo dia azon’ny mpianatra atao ny manao sarin’olona asiana anarana ho Mosesy sy sarin’olona iray hafa asiana anarana ho Joseph Smith. Azon’izy ireo ampitahaina avy eo ny Mosesy 1:12–22 sy ny Joseph Smith,Tantara 1:13–16, hitadiavana ireo antsipiriany manan-danja isaky ny fihaonana tamin’i Satana, sy ny zavatra nataon’i Mosesy sy i Joseph Smith mba handresena azy. Azon’izy ireo tanisaina eo ambanin’ny sary tsirairay ireo antsipiriany ireo.

Raha mila fanampiana ny mpianatra, dia asehoy ny fanontaniana toy ny hoe:

Inona no traikefa ara-panahy tsaroanao fa niainan’ny mpaminany mialohan’ny fihaonany tamin’i Satana?
Ahoana no tena nandresen’ilay Mpaminany an’i Satana tamin’ny farany?
Inona no nitranga vokatry ny fandresen’ny Mpaminany an’i Satana (jereo ny Mosesy 1:24-25; Joseph Smith,Tantara 1:17)?

Mihalefy ny fakam-panahy rehefa mikatsaka an’i Kristy amin’ny eritreritra manontolo isika

Mba hanampiana ny mpianatra hahita ny maha-zava-dehibe ny fifantohana amin’i Kristy mandritra ny fakam-panahy, dia ampio izy ireo hahita fa nifantoka tamin’i Jesoa Kristy i Mosesy nandritra ny fihaonany tamin’i Satana (jereo ny Mosesy 1:13, 16–18). Alefaso ity horonantsary ity “Temptation Fades as We Seek Christ in Every Thought” (2:57), ary angataho ny mpianatra mba hizara ireo hevi-baovao fanampiny azon’izy ireo momba ny fandresena fakam-panahy.

2:58