Halina’t Basahin ang Lumang Tipan: Lesson 2

Ang Plano ng Kaligtasan

Ang Tagapagligtas ay Sentro sa Plano ng Ama

Sa ating premortal na buhay, tayo ay “nagsigawan sa tuwa” (Job 38:7) nang malaman natin ang plano ng Ama sa Langit para sa ating walang-hanggang pag-unlad. Si Jehova ang piniling maging Tagapagligtas at Manunubos natin, na nagbibigay ng daan para makabalik tayo sa Ama at maging katulad Niya. Ang lesson na ito ay makatutulong sa mga estudyante na maunawaan ang plano ng kaligtasan ng Ama sa Langit at ang mahalagang tungkuling ginagampanan ni Jesucristo.

Paghahanda ng estudyante: Sabihin sa mga estudyante na pag-isipan ang nalalaman nila tungkol sa plano ng kaligtasan ng Ama sa Langit at ang mahalagang tungkuling ginagampanan ng Tagapagligtas sa ating walang-hanggang pag-unlad. Maaaring isulat ng mga estudyante ang mga bahagi ng plano ng kaligtasan na alam nila at magsanay na ipaliwanag ang mga ito sa isang kapamilya o kaibigan.

Paghahanda ng estudyante: Sabihin sa mga estudyante na pag-isipan ang nalalaman nila tungkol sa plano ng kaligtasan ng Ama sa Langit at ang mahalagang tungkuling ginagampanan ng Tagapagligtas sa ating walang-hanggang pag-unlad. Maaaring isulat ng mga estudyante ang mga bahagi ng plano ng kaligtasan na alam nila at magsanay na ipaliwanag ang mga ito sa isang kapamilya o kaibigan.

Mga Posibleng Aktibidad sa Pag-aaral

Pagsagot sa mga tanong ng buhay

Para simulan ang klase, maaari mong ipakita at ibahagi ang sumusunod.

Nilapitan ka ng kaibigan mong si Jonathan at nagtanong:

• Saan tayo nagmula?

• Ano ang layunin ng buhay?

• Ano ang mangyayari pagkatapos nating mamatay?

Sabihin sa mga estudyante na pagnilayan ang nalalaman na nila tungkol sa plano ng kaligayahan ng Ama sa Langit. Ang sumusunod na aktibidad sa study journal ay isang paraan para magawa mo ito. Tiyakin na nauunawaan ng mga estudyante na magkakaroon sila ng pagkakataong magsanay sa pagsagot sa mga tanong ni Jonathan kalaunan sa lesson.

Sa inyong study journal, sagutin ang mga sumusunod na tanong para matulungan kayong pagnilayan kung ano na ang naunawaan ninyo tungkol sa plano ng kaligtasan ng Ama sa Langit.

• Gaano kalaki ang kumpiyansa mo sa iyong kakayahang sagutin ang mga tanong ni Jonathan?

• Ano ang mga tanong mo tungkol sa plano ng Ama sa Langit?

Sa inyong pag-aaral ngayon, hingin ang patnubay ng Espiritu Santo para matulungan kayong madagdagan ang inyong pag-unawa sa plano ng Ama sa Langit at sa mahalagang tungkuling ginagampanan ng Tagapagligtas.

Si Jesucristo ay sentro sa plano ng kaligayahan ng Ama sa Langit

Ang pagtulong sa mga estudyante na matukoy ang iba’t ibang titulo, tungkuling ginagampanan, at katangian ni Jesucristo ay maaaring magpalakas ng kanilang ugnayan sa Kanya. Upang matulungan ang mga estudyante na maunawaan ang mahalagang tungkuling ginagampanan ni Jesucristo sa bawat bahagi ng plano ng kaligtasan ng Ama sa Langit, maaari mong ipakita ang sumusunod na larawan. Maaari mong anyayahan ang mga estudyante na ibahagi ang kanilang mga naiisip sa kung ano ang itinuturo ng paglalarawang ito tungkol sa Tagapagligtas.

(Para sa karagdagang training ng titser tungkol sa pagtukoy sa mga titulo, ginagampanang tungkulin, at katangian ni Jesucristo, tingnan ang: “Bigyang-diin ang halimbawa ni Jesucristo” sa Mga Kasanayan para sa Pag-unlad ng Guro.)

Matapos ang sapat na oras para talakayin ng mga estudyante ang itinuturo ng larawan, maaari mong ipakita ang pahayag ni Pangulong Dallin H. Oaks.

Ipinaliwanag ni Pangulong Dallin H. Oaks ng Unang Panguluhan ang tungkuling ginagampanan ng Tagapagligtas sa plano ng kaligtasan ng Ama sa Langit:

Ano ang nagawa ni Jesucristo para sa bawat isa sa atin? Ginawa Niya ang lahat ng mahalaga para sa ating paglalakbay sa mortalidad patungo sa tadhanang nakabalangkas sa plano ng ating Ama sa Langit. … [A]ng Kanyang Bugtong na Anak na si Jesucristo ang nasa sentro. (“Ano ang Nagawa ng Ating Tagapagligtas para sa Atin?,” Liahona, Mayo 2021, 75)

• Paano ninyo ibubuod ang turo ni Pangulong Oaks bilang pahayag ng katotohanan?

Tulungan ang mga estudyante na tumukoy ng katotohanang tulad ng si Jesucristo ang sentro sa plano ng kaligtasan ng Ama sa Langit at sa ating walang-hanggang pag-unlad. Maaaring makatulong na isulat sa pisara ang katotohanang ito.

Ang plano ng Ama sa Langit at ang mahalagang tungkuling ginagampanan ng Tagapagligtas

Layunin ng sumusunod na aktibidad na tulungan ang mga estudyante na mapalalim ang kanilang pag-unawa sa plano ng kaligtasan ng Ama sa Langit at sa tungkuling ginagampanan ng Tagapagligtas dito. Maaaring anyayahan ang mga estudyanteng lubos na pamilyar sa plano ng kaligtasan na gamitin ang kanilang mga tool sa pag-aaral ng banal na kasulatan para maghanap ng mga scripture passage at pahayag mula sa mga lider ng Simbahan para sagutin ang tatlong tanong ni Jonathan sa pisara.

Kung kailangan ng mga estudyante ng karagdagang patnubay, maaari mo silang bigyan ng kopya ng handout na may pamagat na “Plano ng Kaligtasan ng Ama sa Langit.” Maaari silang anyayahang pag-aralan ang handout nang mag-isa o sa maliliit na grupo. Ang isang paraan para magawa ito ay hatiin ang handout sa tatlong bahagi at ilagay ang mga bahagi sa paligid ng silid. Maaaring umikot ang mga estudyante sa bawat lokasyon sa silid nang mag-isa o kasama ang kanilang mga grupo habang pinag-aaralan nila ang plano ng kaligtasan.

Ipakita ang mga sumusunod na tagubilin upang makatulong sa paggabay sa mga estudyante sa kanilang pag-aaral.

Habang pinag-aaralan ninyo ang tungkol sa plano ng kaligtasan ng Ama sa Langit, hanapin ang mga sumusunod:

1. Kung paanong may mahalagang tungkuling ginagampanan si Jesucristo sa plano ng kaligtasan ng Ama sa Langit.

2. Mga katotohanang maibabahagi ninyo kay Jonathan para makatulong sa pagsagot sa kanyang mga tanong.

Isulat ang mga nalaman ninyo sa inyong study journal.

Matapos mag-aral ang mga estudyante, bigyan sila ng pagkakataong ibahagi ang kanilang mga nalaman at naunawaan. Maaaring sanayin ang mga estudyante na ibahagi ang natutuhan nila sa pamamagitan ng pagsasadula sa kung paano nila sasagutin ang bawat isa sa tatlong tanong ni Jonathan. Maaari mo rin silang anyayahang talakayin ang mga sumusunod na tanong kasama ang kapartner o ang klase.

• Ano ang natutuhan ninyo tungkol sa mahalagang tungkuling ginagampanan ni Jesucristo sa plano ng kaligtasan ng Ama sa Langit?

• Anong mga katotohanan o turo ang maibabahagi ninyo kay Jonathan na makatutulong na sagutin ang kanyang mga tanong?

Pag-isipan ang natutuhan ninyo

Maaari mong tapusin ang lesson sa pamamagitan ng pag-anyaya sa mga estudyante na pagnilayan nang tahimik ang nadama nila tungkol sa Ama sa Langit, kay Jesucristo, at sa plano ng kaligtasan. Sabihin sa kanila na isipin ang anumang pagkilos na nadama nila na dapat nilang gawin. Maaari nilang isulat sa kanilang study journal ang nalaman nila at ang mga espirituwal na impresyon nila.

Karagdagang Resources

Paano ko ipinakita ang aking pananampalataya kay Jesucristo bago ako isinilang?

Itinuro ni Pangulong Dallin H. Oaks ng Unang Panguluhan:

Sa Kapulungan sa Langit, ipinaalam sa lahat ng espiritung anak ng Diyos ang plano ng Ama, pati na ang mga ibubunga at pagsubok nito, ang mga tulong ng langit, at ang maluwalhating tadhana nito. Nakita natin ang katapusan mula sa simula. Lahat ng napakaraming mortal na isinilang sa mundong ito ay pinili ang plano ng Ama at ipinaglaban ito sa sumunod na digmaan sa langit. Marami rin ang nakipagtipan sa Ama hinggil sa gagawin nila sa mortalidad. (“Ang Dakilang Plano,” Liahona, Mayo 2020, 93)

Ano ang kalagayan sa daigdig ng mga espiritu?

Ipinaliwanag ni Pangulong Dallin H. Oaks:

Mangyari pa, alam natin mula sa mga banal na kasulatan na pagkatapos mamatay ang ating mga katawan ay patuloy tayong mabubuhay bilang mga espiritu sa daigdig ng mga espiritu. Itinuturo din ng mga banal na kasulatan na ang daigdig ng mga espiritu ay nahahati sa pagitan ng mga yaong naging “mabuti” o “matwid” noong nabubuhay sila at ng mga naging masama. Inilalarawan din ng mga ito ang ilang matatapat na espiritu na itinuturo ang ebanghelyo sa masasama o rebelde (tingnan sa 1 Pedro 3:19; Doktrina at mga Tipan 138:19–20, 29, 32, 37). Higit sa lahat, inilalahad ng makabagong paghahayag na ang gawain ng kaligtasan ay nagpapatuloy sa daigdig ng mga espiritu (tingnan sa Doktrina at mga Tipan 138:30–34, 58), at bagama’t tayo ay hinihimok na huwag ipagpaliban ang ating pagsisisi habang nasa mortalidad (tingnan sa Alma 13:27), itinuturo sa atin na maaari pa ring magsisi doon (tingnan sa Doktrina at mga Tipan 138:58). (“Magtiwala sa Panginoon,” Liahona, Nob. 2019, 26)

Posible bang matanggap ko ang mga pagpapala ng kadakilaan?

Pinatotohanan ni Elder J. Devn Cornish ng Pitumpu:

Nagpapatotoo ako sa inyo na kung kayo ay talagang magsisikap at hindi pangangatwiranan ang mali o maghihimagsik—patuloy na magsisisi at sasamo ng biyaya, o tulong, ni Cristo—tiyak na magiging “sapat ang kabutihan” ninyo, ibig sabihin, katanggap-tanggap sa Panginoon; magiging karapat-dapat kayo sa kahariang selestiyal dahil sa pagiging ganap kay Cristo; at matatanggap ninyo ang mga pagpapala at kaluwalhatian at galak na nais ng Diyos para sa bawat isa sa Kanyang minamahal na mga anak—na kabilang kayo at ako. (“Sapat na ba ang Kabutihan Ko? Magiging Karapat-dapat ba Ako?,” Liahona, Nob. 2016, 32)

Saan ko malalaman pa ang tungkol sa plano ng kaligtasan?

Para malaman pa ang tungkol sa plano ng kaligtasan, maaari mong pag-aralan ang “Kabanata 3: Lesson 2—Ang Plano ng Kaligtasan ng Ama sa Langit” mula sa Mangaral ng Aking Ebanghelyo: Gabay sa Pagbabahagi ng Ebanghelyo ni Jesucristo (2023).

Mga Karagdagang Aktibidad sa Pag-aaral

Opsiyon sa alternatibong simula

Upang matulungan ang mga estudyante na makita kung paano nagbibigay ng direksyon sa ating buhay ang plano ng kaligtasan ng Ama sa Langit, maaari kang magpakita ng larawan ng isang landas o daan na may blangkong signpost na nakaturo sa iba’t ibang direksyon.

Sabihin sa mga estudyante na kunwari ay nasa isang paglalakbay sila at nakakita sila ng blankong signpost na nakaturo sa iba’t ibang direksyon. Maaaring talakayin ng mga estudyante kung ano ang maaaring magpahirap sa sitwasyong ito at anong impormasyon ang magpapadali sa paglalakbay. Maaari kang magtanong sa talakayan tulad ng:

• Paano magiging analohiya ang sitwasyong ito para sa isang taong hindi alam ang plano ng kaligayahan ng Ama sa Langit? Ano ang mga maaaring itanong ng taong iyon?

Ipinaliwanag ni Elder David A. Bednar ng Korum ng Labindalawang Apostol:

Ang plano ng kaligayahan ng ating Ama sa Langit ay ginawa upang patnubayan ang Kanyang mga anak, upang tulungan silang maranasan ang patuloy na kaligayahan, at ibalik sila nang ligtas sa Kanya taglay ang nabuhay na mag-uli at dinakilang katawan. (“Maging Alisto at Patuloy na Manalangin,” Liahona, Nob. 2019, 33–34)

Maaaring sanayin ang mga estudyante na magpaliwanag kung paano nagbibigay ng patnubay at layunin sa ating buhay ang plano ng kaligtasan ng Ama sa Langit.

Ang tungkuling ginagampanan ni Jesucristo sa plano ng Ama sa Langit

Upang matulungan ang mga estudyante na maunawaan ang tungkuling ginagampanan ng Tagapagligtas sa bawat bahagi ng plano ng Ama, maaari mo silang anyayahang kopyahin ang sumusunod na chart sa kanilang study journal. Maaaring pag-aralan ng mga estudyante ang mga banal na kasulatan ng bawat bahagi, at alamin ang mga katotohanan tungkol sa tungkuling ginagampanan ng ating Tagapagligtas sa bawat bahagi ng plano. Maaari mong anyayahan ang mga estudyante na magsulat ng pahayag ng katotohanan sa ilalim ng bawat heading sa chart.

Ang plano ng Ama sa Langit at ang tungkuling ginagampanan ni Jesucristo
Ang plano ng Ama sa Langit at ang tungkuling ginagampanan ni Jesucristo Ang Tungkulin ni Cristo Bago Siya Isinilang	Juan 1:3; Moises 4:1–2; Abraham 3:24-27
Ang plano ng Ama sa Langit at ang tungkuling ginagampanan ni Jesucristo Ang Tungkulin ni Cristo sa Mortalidad	Isaias 53:3–5; Juan 13:15; Alma 7:11–13
Ang plano ng Ama sa Langit at ang tungkuling ginagampanan ni Jesucristo Ang Tungkulin ni Cristo sa Daigdig ng mga Espiritu at sa Walang-Hanggang Kaluwalhatian	1 Corinto 15:22; Mormon 3:20; Doktrina at mga Tipan 138:57–58

Maaaring matukoy ng mga estudyante ang mga katotohanang tulad ng si Jesucristo ang Tagapaglikha. Si Jesucristo ay nagpakita ng perpektong huwaran para sa atin. Si Jesucristo ay nagbayad-sala para sa ating mga kasalanan. Nadaig ni Jesucristo ang kamatayan para sa buong sangkatauhan sa pamamagitan ng pagkabuhay na mag-uli.

Sabihin sa mga estudyante na pumili ng isa sa mga katotohanang natuklasan nila at ibahagi sa ka-partner o sa klase kung paano makatutulong ang katotohanang iyon sa isang young adult na may mga hamon sa buhay.

Mga opsiyon sa video ng plano ng kaligtasan

Para sa isang buod, maaari mong sabihin sa mga estudyante na ilarawan o isulat ang mga bahaging naaalala nila tungkol sa plano ng kaligtasan ng Ama sa Langit. Pagkatapos ay maaaring panoorin ng mga estudyante ang video na “What is the Purpose and Meaning of Life? Now You Know” (7:43). Maaari mong anyayahan ang mga estudyante na ibahagi ang napansin nilang nakaligtaan nila habang isinusulat o inilalarawan nila ang mga bahagi ng plano.

Upang mapag-aralan ang bawat bahagi ng plano ng kaligtasan, maaari mong ibahagi ang mga sumusunod na video.

Premortal na Buhay: Upang matulungan ang mga estudyante na maunawaan ang plano ng Ama sa Langit at mailarawan ang tungkuling ginampanan ng Tagapagligtas sa plano bago Siya isinilang, maaari mong ipanood ang video na “Pambungad: Ang Plano ng Ating Ama sa Langit” mula sa time code na 0:00 hanggang 2:16.

Buhay sa Mundo: Upang matulungan ang mga estudyante na maunawaan na matutulungan tayo ni Jesucristo sa anumang sitwasyon sa ating buhay, maaari mong ipanood ang video na “Why We Need a Savior” (2:15).

Kabilang-buhay: Upang matulungan ang mga estudyante na maunawaan kung ano ang mangyayari kapag namatay tayo at kung paano tayo tinutulungan ng Tagapagligtas na madaig ang kamatayan, maaari mong ipanood ang video na “Ano ang Mangyayari Pagkamatay Natin?” (1:40).