“Ho avy indray Izy hanapaka sy hanjaka” nataon’i Mary R. Sauer. Midina ety an-tany i Jesoa Kristy amin’ny Fiaviany Fanindroany. Misy lehilahy, vehivavy ary ankizy manodidina azy. Manao akanjo lava miloko mena Izy ary miondrika mijery an’ireo olona miangona.
Inona no fanontaniana na eritreritra tonga ao an-tsainao rehefa mieritreritra ny Fiavian’i Jesoa Kristy Fanindroany ianao? Ao amin’ny epistiliny voalohany ho an’ny Tesaloniana, toko 4–5, ny Apôstôly Paoly dia nampianatra ny antsipiriany manan-danja momba ny Fiavian’ny Mpamonjy Fanindroany sy ny fomba ahafahantsika miomana ho amin’izany. Ity lesona ity dia natao hanampiana anao hahatakatra ny zavatra hitranga sy ny fomba ahafahanao miomana amin’ny fotoana hiverenan’i Jesoa Kristy eto an-tany.
Fanomanana ny mpianatra: Angataho ny mpianatra haka sary an-tsaina hoe hanao ahoana izany rehefa ho avy indray ny Mpamonjy. Asao izy ireo hamaly ireto fanontaniana manaraka ireto ao anatin’ny diary fandalinany na amin’ny taratasy kely: Inona no maha-tsindrin-daona anao momba ny Fiaviana Fanindroany? Inona no mampitebiteby anao?
Sahanasa fianarana azo atao
Ireo fanontaniana momba ny Fiavian’i Jesoa Kristy Fanindroany
Asehoy ny sary iray maneho ny Fiavian’i Jesoa Kristy Fanindroany, toy ilay tany am-piandohan’ny lesona. Azo atao ny mampahatsiahy ny mpianatra ny sahanasa fanomanana ny mpianatra rehefa miresaka ireto fanontaniana manaraka ireto.
Ity ampahany amin’ny lesona ity dia tsy natao hiresahana ny zava-drehetra fantatry ny mpianatra na hamaliana ireo fanontaniana rehetra ananany momba ny Fiaviana Fanindroany. Fa natao kosa mba hanampiana azy ireo hifandray amin’ireo Olomasina Tesaloniana, izay nahatakatra momba ny zavatra sasany nefa nanana fanontaniana momba ny hafa.
Nanana fanontaniana momba ny Fiavian’ny Mpamonjy Fanindroany ihany koa ireo Olomasina Tesaloniana. Raha miainga avy amin’ny fampianaran’i Paoly ao amin’ireo toko ireo dia mety nanana fanontaniana toy izao izy ireo hoe: “Rahoviana no hitsangana amin’ny maty ireo olon-tiantsika efa nodimandry?,” “Rahoviana no hitranga ny Fiavian’i Jesoa Kristy Fanindroany?,” na “Ahoana no ahafahantsika miomana ho amin’ny Fiavian’i Jesoa Kristy Fanindroany?” Angamba efa nanana fanontaniana nitovy tamin’izany ianao. Mamaly ireo fanontaniana ireo ireto sahanasa fandalinana manaraka ireto.
Ity sahanasa fandalinana manaraka ity dia natao hanampiana ireo mpianatra handalina sy hanazava ny fampianaran’i Paoly tamin’ny Tesaloniana momba ny Fiaviana Fanindroany.
Ny fomba iray hanatanterahana izany dia ny mizara ny kilasy ho tsiroaroa na anaty vondrona kely ary manome ny iray amin’ireto taratasy zaraina manaraka ireto ho an’ny vondrona tsirairay hohalalinina sy hifanakalozana hevitra miaraka. Avy eo dia azo angatahina ny olona iray avy amin’ny vondrona tsirairay hizara amin’ny iray kilasy ny famintinana fohy ny zavatra nianaran’ilay vondrona avy amin’ny fandalinany.
Raha tsy izany, dia zarao ho vondron’olona telo ny mpianatra, ka omeo taratasy zaraina samy hafa ny mpianatra tsirairay mba hofenoiny manokana. Avy eo dia afaka mamintina ny zavatra nianarany ho an’ireo mpikambana hafa ao anatin’ilay vondrona misy azy ireo ny mpianatra tsirairay.
Azon’ny mpianatra hanoratana ny valinteniny ny ao ambadiky ny taratasy.
Sahanasa fandalinana 1: Inona no hitranga amin’ny velona sy ny maty amin’ny Fiavian’i Jesoa Kristy Fanindroany?
Vakio ny 1 Tesaloniana 4:13–18, ka tadiavo ireo hevi-baovao mikasika ny zavatra hitranga amin’ny marina rehefa ho avy indray i Jesoa. Mariho ny fahasamihafana misy eo amin’ny zavatra hitranga amin’ireo izay efa maty sy ireo izay mbola velona amin’ny Fiaviana Fanindroany. (Ny teny hoe “modimandry” sy “nodimandry” ao amin’ireo andininy ireo dia ilazana ireo izay efa maty.)
Manaraka izany dia vakio ny Fotopampianarana sy Fanekempihavanana 88:96–98, ka tadiavo ireo hevi-baovao fanampiny momba ireo zava-nitranga ireo. (Afaka mamaky ny andininy 99–101) mba hianarana mikasika ny zavatra hitranga amin’ireo izay tsy nanaiky an’i Jesoa Kristy teto amin’ity fiainana ity ianao.)
Inona no hevi-baovao fanampiny azonao?
Fahamarinana iray mety ho hitanao ny hoe hitsangana amin’ny maty ireo Olomasina nahatoky izay maty mialoha ny Fiaviana Fanindroany rehefa ho tonga indray i Kristy.
Ny teny hoe “nakarina” (1 Tesaloniana 4:17) dia entina ilazana ireo marina hiara-dia mba hihaona amin’ny Mpamonjy amin’ny fiaviany.
Ny Loholona Neil L. Andersen ao amin’ny Kôlejin’ny Apôstôly Roambinifolo dia nizara izao manaraka izao momba io fotoana masina io:
Sary
Sary ôfisialin’ny Loholona Neil L. Andersen ao amin’ny Kôlejin’ny Apôstôly Roambinifolo, aogositra 2010.
Tsy misy zavatra manosika ahy hiresaka an’i Kristy mihoatra noho ny fakana sary an-tsaina ny fiverenany. Na dia tsy fantatsika aza hoe rahoviana Izy no ho tonga, dia ho mahavariana tokoa ny zavatra hitranga amin’ny fiverenany! Ho avy eo amin’ny rahon’ny lanitra amin’ny halehibeny sy ny voninahitra Izy miaraka amin’ny anjeliny masina rehetra. Tsy anjely vitsy fotsiny fa ny anjeliny masina rehetra. Tsy ireo kerobima mena takolaka nataon’i Raphael sary hosodoko hita amin’ireny karatra firarian-tsoa amin’ny fetin’ny mpifankatia ireny no resahina eto. Ireo no anjelin’ny taonjato maro, ny anjely nalefa hanakombona ny vavan’ny liona, hamoha ny varavaran’ny trano-maizina, hanambara ny fahaterahany izay efa nandrasana hatry ny ela, hampahery Azy tao Getsemane, hanome toky ireo mpianatra tamin’ny fiakarany tany an-danitra, ary hanokatra ilay Famerenana amin’ny laoniny tamim-boninahitra ny filazantsara.
Azonareo sary an-tsaina ve ny hoe hakarina hitsena Azy, na eto amin’ity lafiny ity na any amin’ny lafiny ilan’ny voaly? Izany no fampanantenany ho an’ny olo-marina. Izany traikefa mahatalanjona izany dia hanamarika ny fanahintsika mandrakizay.
Makà fotoana kely hieritreretana hoe mety ho toy ny ahoana ny ho anisan’ireo marina amin’ny fiavian’ny Mpamonjy.
Inona no eritreritra na fahatsapana mety hanananao amin’io andro io? Inona no zavatra tsapanao rehefa mahafantatra fa tian’ny Mpamonjy ianao hiara-dia Aminy rehefa ho avy Izy? Inona no fiantraikan’ny fakana sary an-tsaina io andro ho avy io aminao ankehitriny?
Ao amin’ny 1 Tesaloniana 4:18, i Paoly dia namporisika ny Olomasina mba “hifampionona amin’ireo teny ireo.”
Ahoana no anomezan’ny fampianaran’i Paoly fampiononana anao? Ahoana no ahafahan’izany manome fampiononana amin’ny toe-javatra ho avy mety hatrehinao?
Sahanasa fandalinana 2: Rahoviana no hitranga ny Fiavian’i Jesoa Kristy Fanindroany?
Efa nanontany tena ve ianao hoe rahoviana no hitranga ny Fiavian’i Jesoa Kristy Fanindroany na raha ho vonona ianao? Azo inoana fa nanana ireo fanontaniana ireo ihany koa ireo Olomasina Tesaloniana.
Vakio ny 1 Tesaloniana 5:1–3 ary tadiavo ireo fanoharana nampiasain’i Paoly mba hamaritana ny fotoana hiverenan’i Jesoa eto an-tany.
Inona no hitanao?
Inona no ampianarin’ny fanoharana nataon’i Paoly momba ny mpangalatra amin’ny alina sy ny vehivavy mihetsi-jaza mikasika ny Fiavian’ny Mpamonjy Fanindroany?
Fahamarinana iray azontsika ianarana avy amin’ny fampianaran’i Paoly ny hoe raha miezaka ny ho “zanaky ny mazava” isika amin’ny alalan’ny fanarahana an’i Jesoa Kristy dia ho vonona isika rehefa ho avy indray Izy.
Raha te hianatra bebe kokoa momba ireo fomba samihafa hanasan’ny Tompo antsika ho tonga zanaky ny mazava dia vakio ny 3 Nefia 18:24; Fotopampianarana sy Fanekempihavanana 50:23–25; 88:67–68. Tanisao ao anatin’ny diary fandalinanao ny zavatra hitanao izay manampy anao hahatakatra ny fomba hahatongavana ho zanaky ny mazava.
Ahoana no hanasanao ny fahazavan’ny Tompo eo amin’ny fiainanao? Ahoana no ahafahanao manasa bebe kokoa ny fahazavany ho eo amin’ny fiainanao?
Nofaranan’i Paoly ny epistiliny voalohany ho an’ny Tesaloniana tamin’ny alalan’ny fizarana torohevitra momba ny fomba ahafahan’ny Olomasina miomana tsara kokoa hihaona amin’ny Mpamonjy amin’ny Fiaviany Fanindroany.
Vakio ny 1 Tesaloniana 5:14–22 ary jereo hoe inona no hevi-baovao azonao momba ny fiomanana. Misokafa amin’ny hevitra mety hanampy anao manokana momba ny fampianarana.
Inona amin’ireo fampianarana ireo no tena manan-danja indrindra aminao? Nahoana?
Mitadiava soratra masina iray na roa izay manampy amin’ny fanamafisana ny fahatakaranao ny fampianarana nosafidinao. (Azonao atao ny mampiasa fanamarihana ambany pejy na mikaroka lohahevitra iray ao amin’ny Torolalana ho an’ny Soratra Masina na ny Torolalana araka ny Lohahevitra mba hanampiana anao hahita soratra masina mifandray amin’izany.)
Ahoana no nanampian’i Jesoa Kristy anao, na ahoana no hanampiany anao ho vonona amin’ny Fiaviany Fanindroany? Inona no azontsika hianarana momba Azy avy amin’izany?
Saintsaino ireo fahamarinana nianaranao androany sy ireo zavatra nataonao izay tsapanao fa nitaona anao ka hanampy anao ho vonona sy ho tsindrin-daona kokoa hihaona amin’ny Mpamonjy indray. Raketo ao amin’ny diary fandalinanao ny eritreritrao.
Mijoroa ho vavolombelona momba ireo fitahiana izay tonga rehefa manao dingana tsotra nefa manan-danja isika mba hiomanana amin’ny fahatongavan’i Kristy eto an-tany indray.
Fanazavana sy fampahalalana avy amin’ny zava-miseho
1 Tesaloniana 5:2. Ahoana no azo ampitahaina amin’ny mpangalatra amin’ny alina ny fotoana Fiavian’ny Mpamonjy Fanindroany?
Ny Loholona Bruce R. McConkie (1915–85) tao amin’ny Kôlejin’ny Apôstôly Roambinifolo dia nanazava fa matetika no tonga “tampoka sy tsy misy fampandrenesana” ny mpangalatra amin’ny alina (Doctrinal New Testament Commentary [1973], 3:54). Milaza ity fanoharana ity fa ho tonga tsy ho ampoizin’ny olona sasany ny Fiavian’ny Mpamonjy Fanindroany.
1 Tesaloniana 5:21. Inona no tian’i Paoly holazaina amin’ny hoe “fantaro ny zavatra rehetra; hazony mafy izay tsara”?
Nanasa ny Olomasina Tesaloniana i Paoly mba “hamantatra ny zavatra rehetra”—izay midika hoe mandinika na mizaha toetra izany mba hahatakarana raha tsara izy ireo na ratsy—ary “hihazona mafy izay tsara.” Amin’ny maha-mpikamban’ny Fiangonana antsika dia tsy ampianarina fotsiny mba hianatra ny filazantsara isika, fa hisaintsaina sy hivavaka ary hahatakatra momba izany amin’ny farany (jereo ny 3 Nefia 17:1–3; Fotopampianarana sy Fanekempihavanana 68:25–26). Mila mihazona mafy sy mahatoky amin’ny tsara izay vao tonga amin’ny fahatakarantsika isika avy eo.
Raha toa ka mahazo tombony amin’ny fifanakalozan-kevitra momba ny maha-zava-dehibe ny asa ny mpianatra dia ataovy izao manaraka izao:
Angataho ny mpianatra mba hilazalaza ny asa sarotra indrindra nataon’izy ireo. Nahoana izany no sarotra? Inona no zava-tsoa vokatry ny fanaovana izany?
Asao ny mpianatra hamaky ny 1 Tesaloniana 4:11–12 sy ny 2 Tesaloniana 3:10–11, ka hitady ny zavatra nampianarin’i Paoly momba ny asa. Avelao ireo mpianatra hizara ny hevi-baovaony. Asao ny mpianatra hizara ny fomba nahatonga azy ireo hankasitraka ny lanjan’ny asa.
Azo asaina mamaky sy mifanakalo hevitra momba ny fizarana “Asa sy fizakan-tena” ao amin’ny kiboky Jeunes, soyez forts [Ho zatovo mahery!] ([2011], 40–41) ny mpianatra.
Anontanio ny mpianatra hoe amin’ny fomba ahoana no hoe manampy azy ireo ho tonga tahaka ny Mpamonjy ny miasa mafy.
