Ղուկաս 22.28-34, 54-61

«Բայց ես աղաչեցի քեզ համար, որ քո հավատքը չպակասի»

Հիսուսը և Պետրոսը քայլում են և զրուցում

Հիսուս Քրիստոսը նոր էր ներկայացրել հաղորդությունը Իր աշակերտներին, երբ նրանք սկսեցին խոսել այն մասին, թե ով է մատնելու Տիրոջը, նաև թե ինչու է ավելի կարևոր ուրիշներին ծառայելը, քան, երբ քեզ են ծառայում: Այդ զրույցների ընթացքում Հիսուսն օգնեց Պետրոսին հասկանալ, թե ինչպիսի ընդդիմության է նա դիմակայելու կյանքի ընթացքում: Փրկիչն ուսուցանեց Պետրոսին, որ նա կկարողանա օգնել ուրիշներին միայն այն ժամանակ, երբ ամրապնդի իր սեփական հավատքը Հիսուս Քրիստոսի հանդեպ: Այս դասի նպատակն է օգնել ձեզ ճանաչել Հիսուս Քրիստոսին ապավինելու և Նրա հանդեպ հավատքը շարունակաբար ամրապնդելու ձեր կարիքը:

Ամրապնդեք ձեր ունակությունները

Թվարկեք այն հմտություններն ու ունակությունները, որոնք մարդը կարող է կորցնել, եթե շարունակաբար չօգտագործի կամ չամրապնդի դրանք (օրինակ՝ մարզական հմտությունները կամ ստեղծագործելու ունակությունները):

• Դա ի՞նչ առնչություն կարող է ունենալ Հիսուս Քրիստոսի հանդեպ հավատք ունենալու ձեր կարողության հետ:

Այսօրվա դասի ժամանակ դուք կսովորեք, թե Հիսուս Քրիստոսն ինչպես է ցանկանում ամրապնդել Իրեն հավատալու ձեր կարողությունը:

Մի պահ մտածեք, թե ինչ եք անում կամ կուզեիք անել՝ Հիսուս Քրիստոսի հանդեպ ձեր հավատքը մեծացնելու համար: Ձեր օրագրում կարող եք գրել, թե ինչ եք անում ամեն օր, ամեն շաբաթ կամ նույնիսկ ամեն ամիս: Այս գործողությունների թվում կարող են լինել ձեր ներկա նպատակները:

Այսօրվա դասի ընթացքում փորձեք հասկանալ, թե ինչ փոփոխություններ կամ բարելավումներ կարող եք կատարել, որպեսզի ամրապնդեք ձեր հավատքը Հիսուս Քրիստոսի հանդեպ և կարողանաք ապավինել Նրան կյանքի ցանկացած հանգամանքներում:

Հիսուս Քրիստոսը հասկանում է մեր կարիքները և կօգնի մեզ

Հիսուս Քրիստոսը Իր աշակերտներին պատմեց ապագա արքայության մասին, որը սպասվում էր նրանց` շնորհիվ այն բանի, որ նրանք միշտ «կենում էին» Իր հետ (տես Ղուկաս 22.28-30): Միևնույն ժամանակ, Տերը օգնեց Սիմոն Պետրոսին պատրաստվել իրեն սպասող դժվար հոգևոր ճամփորդությանը:

Կարդացեք Ղուկաս 22.31-34-ը՝ փնտրելով, թե Տերն ինչ էր ցանկանում, որ Պետրոսը հասկանա:

Որպեսզի ավելի լավ հասկանաք, թե ինչ է նշանակում, որ սատանան ցանկանում էր «մաղել [Պետրոսին] ցորենի պես» (հատված 31), կարդացեք դասի վերջում գտնվող «Ընտրովի. Ցանկանո՞ւմ եք ավելին իմանալ» բաժնի բացատրությունը:

• Ձեր կարծիքով, Փրկիչն ինչպես է ընկալում Պետրոսին: Որքանո՞վ է դա տարբերվում այն ձևից, որով Պետրոսը տեսնում էր իրեն:

• Հիսուս Քրիստոսի հետ Պետրոսի հարաբերությունների մասին սովորածն ինչպե՞ս է առնչվում Փրկչի հետ ձեր հարաբերությունների հետ:

• Երբ Պետրոսը հռչակեց իր հավատքը և հավատարմությունը Հիսուս Քրիստոսի հանդեպ, Փրկիչն ի՞նչ բացահայտեց այն մասին, թե Պետրոսն ինչ էր անելու:

Պետրոսը ուրանում է Հիսուս Քրիստոսին

Ավելի ուշ՝ այդ գիշեր, երբ Հիսուս Քրիստոսին ձերբակալեցին և տարան քահանայապետի տուն՝ հարցաքննության, Պետրոսը ամենին հեռվից էր հետևում (տես Ղուկաս 22.54):

ԿարդացեքՂուկաս 22.55-62-ը՝ իմանալու համար, թե ինչպես իրականացավ Հիսուսի մարգարեությունը Պետրոսի մասին:

• Ի՞նչ եք սովորել Փրկչի մասին Պետրոսի հետ Նրա հարաբերություններից, որը ձեզ հավատք է ներշնչում Նրա հանդեպ:

Ամրապնդենք մեր հավատքը Հիսուս Քրիստոսի հանդեպ

Ինչպես Փրկիչն օգնեց Պետրոսին հասկանալ սատանայի ցանկությունները (տես Ղուկաս 22.31), նախագահ Ռասսել Մ. Նելսոնը ևս զգուշացրել է մեզ, որ «Հակառակորդը մեծ արագությամբ ավելացնում է հարձակումները հավատքի վրա, մեզ վրա և ընտանիքների վրա» (Ռասսել Մ. Նելսոն, «Ներածական ելույթ», Լիահոնա, նոյեմբեր 2018, 7): Նա նաև ուսուցանել է, որ «Հակառակորդը քառապատկում է իր ջանքերը, որպեսզի քայքայի վկայությունները և խոչընդոտի Տիրոջ աշխատանքը» (Ռասսել Մ. Նելսոն, «Մենք կարող ենք ավելի լավ գործել և ավելի լավը լինել», Լիահոնա, մայիս 2019, 68):

• Ինչպիսի՞ միջոցներով է սատանան այսօր փորձում կործանել մեր հավատքը Հիսուս Քրիստոսի հանդեպ:

• Ձեզ ի՞նչն է օգնել ամրապնդել ձեզ հավատքը Հիսուս Քրիստոսի հանդեպ:

Երեց Նիլ Լ․ Անդերսենը կիսվել է, թե մենք ինչպես կարող ենք ամրապնդել մեր հավատքը Հիսուս Քրիստոսի հանդեպ:

Երեց Նիլ Լ. Անդերսեն

Ձեր հավատքը կաճի ոչ թե պատահականությամբ, այլ ընտրությամբ:

Մեր ապրած կյանքը զորացնում կամ թուլացնում է մեր հավատքը: Աղոթքը, հնազանդությունը, ազնվությունը, մտքերի ու գործերի մաքրությունն ու անշահախնդիր վարմունքը զորացնում են հավատքը: Առանց դրանց հավատքը թուլանում է: Ինչո՞ւ Փրկիչն ասաց Պետրոսին. «Աղոթեցի, որ հավատքդ չնվազի» (Ղուկաս 22.32)։ Պատճառն այն է, որ կա հակառակորդ, որն ուրախանում է, երբ կործանում է մեր հավատքը: Ձեր հավատքը պաշտպանելիս անհողդողդ եղեք:

(Նիլ Լ Անդերսեն, «Հավատքը պատահականության արդյունք չէ, այլ՝ ընտրության», Լիահոնա, նոյեմբեր 2015, 66)

1. Ձեր օրագրում պատասխանեք հետևյալ հարցերին.

• Ի՞նչ սովորեցինք այսօր այն մասին, թե Հիսուս Քրիստոսն ինչ է ցանկանում ձեզ համար:

• Ի՞նչ եք սկսելու կամ շարունակելու անել, որպեսզի ամրապնդեք ձեր հավատքը Հիսուս Քրիստոսի հանդեպ:

• Ձեր կարծիքով, Հիսուս Քրիստոսի հանդեպ ավելի մեծ հավատքն ինչպե՞ս կօրհնի ձեզ:

Ընտրովի. ցանկանո՞ւմ եք ավելին իմանալ

Ղուկաս 22․31 Փրկիչն ի՞նչ է նկատի ունեցել, երբ ասել է Պետրոսին, որ սատանան ցանկանում է «մաղել [նրան] ցորենի պես»

Երբ մաղում ենք ցորենը արժեքավոր հատիկները առանձնացվում են բույսի չօգտագործվող մասերից: Հիսուսն օգտագործեց այս համանմանությունը, որպեսզի օգնի Պետրոսին (և մեզ բոլորիս) ճանաչել սատանայի ջանքերը՝ կործանել մեր հավատքը և խանգարել մեզ դառնալ Աստծո արքայության կարևոր մասը:

Ի՞նչը կարող է ամրացնել իմ հավատքն առ Հիսուս Քրիստոս

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Երեց Նիլ Լ. Անդերսեն

Մեր հավատքը կենտրոնացած է մեր Հայր Աստծո և Նրա Որդի՝ Հիսուս Քրիստոսի, մեր Փրկչի և Քավիչի շուրջ: Այն ամրապնդվում է մեր գիտելիքով այն մասին, որ ավետարանի լրիվությունը վերականգնվել է երկրի վրա, որ Մորմոնի Գիրքը Աստծո խոսքն է, և մարգարեներն ու առաքյալները այսօր կրում են քահանայության բանալիները: Մենք փայփայում ենք մեր հավատքը, աշխատում ամրացնել այն, աղոթում ենք ավելի մեծ հավատքի համար և մեր ուժերի սահմաններում անում ենք ամեն ինչ, որ պաշտպանենք և պահպանենք մեր հավատքը: ․․․

․․․ Դուք ընկղմվում եք այն ամենի խորքը, ինչն օգնել է ձեզ կառուցել ձեր հավատքի առանցքը. դուք գործադրում եք հավատք առ Քրիստոս, դուք աղոթում եք, դուք խորհում եք սուրբ գրքերի մասին, դուք ապաշխարում եք, դուք պահում եք պատվիրանները և դուք ծառայում եք մյուսներին:

(Նիլ Լ․ Անդերսեն, «Ձեր հավատքի փորձությունը»,, Լիահոն, նոյ. 2012, 39-40)

Ի՞նչը կարող է ոչնչացնել իմ հավատքն առ Հիսուս Քրիստոս

Ահմադ Ս․ Քորբիտը՝ Երիտասարդ տղամարդկանց գերագույն նախագահության առաջին խորհրդականը, ուսուցանել է.

Ահմադ Ս․ Քորբիտ

Իմ ընկերներ, միտումնավոր պատկերացնելով կամ դիտելով այնպիսի բաներ, որոնք հակասում են ձեր էությանը, հատկապես պոռնոգրաֆիան, թուլացնում է ձեր հավատը Քրիստոսի հանդեպ և առանց ապաշխարության կարող է ոչնչացնել այն:

(Ահմադ Ս. Քորբիտ, «Դուք կարող եք հավաքել Իսրայելը», Լիահոնա, մայիս 2021, 62)

Ղուկաս 22.32 Ի՞նչ կարող ենք սովորել դարձի մասին՝ հասկանալով Փրկչի հայտարարությունը, որ Պետրոսը լիովին դարձի չէր եկել

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Երեց Դեյվիդ Ա. Բեդնար

Հետաքրքիրն այն է, որ այդ զորավոր առաքյալը զրուցում և քայլում էր Վարդապետի հետ, ականատեսն էր բազում հրաշքների և Փրկիչի աստվածության մասին ամուր վկայություն ուներ: Սակայն նույնիսկ Պետրոսն ուներ Հիսուսի կողմից լրացուցիչ հրահանգավորման կարիք՝ Սուրբ Հոգու դարձի բերող ու սրբագործող զորության և հավատարիմ ծառայելու իր պարտավորության վերաբերյալ:

Հիսուս Քրիստոսի ավետարանը հիմնարար և հարատև փոփոխություն է առաջացնում մեր բուն էության մեջ, որը հնարավոր է դառնում Փրկչի Քավությամբ: Ճշմարիտ դարձը փոփոխություն է առաջացնում այն մարդու համոզմունքներում, սրտում և կյանքում, որն ընդունում և ենթարկվում է Աստծո կամքին (տես Գործք 3.19, 3 Նեփի 9.20) և ներառում է մի գիտակցական պարտավորվածություն` դառնալ Քրիստոսի աշակերտը:

(Դեյվիդ Ա․ Բեդնար, «Դարձ դեպի Տերը», Լիահոնա, նոյեմբեր 2012, 106-7)