ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú, pea mo e tupulaki kuó ke aʻusia lolotonga hoʻo ako ʻa e Fuakava Foʻoú.
Te ke maʻu ʻa e faingamālie ʻi he lēsoni ko ʻení ke siviʻi hoʻo akó mo e founga kuó ke fakaʻaongaʻi ai ʻa e ngaahi tefitoʻi moʻoni naʻe akoʻi ʻi he 1 Kolinitō 8–16 mo e 2 Kolinitō. ʻE lava ke tokoni hono siviʻi hoʻo akó ke ke ʻanalaiso e founga ʻoku tokoniʻi ai koe ʻe hono ako e folofolá ke ke hoko ʻo tatau ange mo e Fakamoʻuí.
Vakavakaiʻi hoʻo ngaahi taumuʻá
Mateʻi mai pe ko e ʻū lauʻi peesi ʻe fiha ʻo e folofolá ʻoku ʻi he Tohi Tapú, Tohi ʻa Molomoná, Tokāteline mo e Ngaahi Fuakavá, mo e Mataʻitofe Mahuʻingá fakakātoa.
ʻOkú ke pehē ko e hā kuo foaki mai ai ʻe he ʻEikí ha ʻū peesi lahi pehē ʻo e folofolá?
Te ke fakahaaʻi fēfē hoʻo loto-houngaʻia ʻi Heʻene folofola?
Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga kuo ʻomi ai ʻe he ʻEikí ha konga lahi ʻo ʻEne ngaahi leá ʻi he folofolá. Lau ʻa e fakamatala ko ʻení pe mamata ʻi he “Ko e Tāpuaki ʻo e Folofolá” (3:03), ʻoku maʻu ʻi he ChurchofJesusChrist.org.
ʻĪmisi
Laʻitā ʻo ʻEletā D. Todd Chirstofferson. Faitaaʻi ʻi Māʻasi 2020.
Fakakaukau ki he mafatukituki hotau tāpuaki ke maʻu … ha folofola māʻoniʻoní. Pea ʻikai ngata aí, ka ʻoku malava ke maʻu ʻe he tangata, fefine, mo e fānau kotoa pē ha tatau fakataautaha ʻo e ngaahi tohi toputapú ni ʻi heʻenau lea fakafonuá. … ʻOku hanga ʻe he tāpuaki ko ʻení ʻo fakahā mai ʻa e naʻinaʻi ʻa e ʻEikí ki hono mahuʻinga ʻo ʻetau toutou fakaʻaongaʻi e ngaahi folofolá ʻo lahi ange ʻi ha toe kuonga he kuohilí. ʻOfa ke tau keinanga hokohoko ʻi he folofola ʻa Kalaisí ʻa ia te ne tala mai ʻa e ngaahi meʻa kotoa ʻoku totonu ke tau faí (vakai, 2 Nīfai 32:3).
1. Tali ha fehuʻi ‘e taha pe tali fakatouʻosi ʻa e ongo fehuʻi ko ‘ení ‘i hoʻo tohinoa akó:
ʻOkú ke pehē ko e hā ʻoku lahi ange ai ʻetau fiemaʻu ke tafoki ki he “ngaahi folofolá [he taimí ni] ʻo lahi ange ʻi ha toe kuonga he kuohilí”?
Ko e hā ha ngaahi fiemaʻu fakataautaha ʻoku feau ʻe he folofolá ʻi hoʻo moʻuí, pe ko e hā ha ngaahi fiemaʻu te ne lava ʻo feau?
Tuku ha kiʻi taimi ke ke fakakaukau ai ki hoʻo ako folofola fakatāutahá. Fealeaʻaki mo e Tamai Hēvaní fekauʻaki mo e founga ʻoku hanga ai ʻe hoʻo ako folofolá ʻo fakaleleiʻi hoʻo ngaahi fiemaʻú pea kapau ʻoku fiemaʻu ke ke fai ha ngaahi liliu. Mahalo ʻoku fiemaʻu ke ke tuʻu maʻu ange ʻi hoʻo ako fakaʻaho e folofolá pe fakatupulaki e loloto ʻo e mahino ʻokú ke maʻu mei hoʻo akó. Hiki ha faʻahinga liliu pē ʻokú ke ongoʻi ʻoku totonu ke ke fai. Fakakaukau ke kole ki ho fāmilí, faiako seminelí, pe ko ha taki ʻo e Siasí ke tokoni atu ʻi hoʻo ngaahi taumuʻa ako folofolá.
Falala ki he Fakamoʻuí pea fekumi ki Heʻene tokoní
ʻĪmisi
Ko hono fakamolemoleʻi mo fakamoʻui ʻe Sīsū ha tangata.
ʻI he tohi ʻa Paula ki he Kāingalotu ʻi Kolinitoó, naʻá ne tokanga taha ki he ngaahi founga ʻoku tāpuakiʻi mo tokoniʻi ai kitautolu ʻe Sīsū Kalaisí. ʻOku kau ʻi he ngaahi sīpingá ʻa hono tokoniʻi kitautolu ke tau hao mei he ʻahiʻahí (vakai, 1 Kolinitō 10:13), tokoni ke tau fakatupulaki ʻa e ʻofa faka-Kalaisí (vakai, 1 Kolinitō 13), fokotuʻu hake kitautolu mei he maté ʻo fakafou ʻi he Toetuʻú (vakai, 1 Kolinitō 15), fakaafeʻi kitautolu ke tau fakalelei kiate Ia (vakai, 2 Kolinitō 5:16–21; 7:1–10), mo fakamālohia kitautolu ke tau kātekina faivelenga ʻa e ngaahi faingataʻá (vakai, 2 Kolinitō 11—12).
Fakaʻaongaʻi ha ngaahi miniti siʻi ke toe vakaiʻi ʻa e ngaahi potufolofola kuó ke fakaʻilongaʻi pe fakamatala kuó ke hiki ʻi he 1 Kolinitō 8–16 mo e 2 Kolinitō ʻa ia kuó ne tokoniʻi koe ke ke ako pe falala ki he Fakamoʻuí.
Teuteu ha pōpoaki miniti ʻe 3 ki he 5 fekauʻaki mo e founga ʻoku tokoniʻi ai koe ʻe Sīsū Kalaisí. Fakakau ai e ngaahi meʻa ko ʻení:
ko ha potufolofola ʻe taha pe lahi ange mei he 1 Kolinitō 8–16 pe 2 Kolinitō naʻe ʻuhingamālie kiate koé
ko ha fakamatala ʻo e meʻa ʻoku akoʻi ʻe he ngaahi potufolofola ko iá fekauʻaki mo e founga ʻoku tokoniʻi mo fakamālohia ai koe ʻe he Fakamoʻuí
ko ha aʻusia mei hoʻo moʻuí pe ko ha sīpinga ʻi he folofola ʻa Sīsū Kalaisí ʻoku tokoni ʻi he founga naʻe akoʻi ʻi he ngaahi potufolofola ko iá
founga te ke lava ai ʻo fakaafeʻi e niʻihi kehé ke nau maʻu e tokoni mo e mālohi ʻo e Fakamoʻuí
2. Hiki hoʻo pōpoakí ʻi hoʻo tohinoa akó. Kumi ha faingamālie ke vahevahe ai hoʻo pōpoakí mo ho fāmilí, ko hoʻo kalasi seminelí, pe ʻi ha kalasi ʻi he lotú.
Hisitōlia fakafāmilí mo e ngāue fakatemipalé pea mo e Toetuʻú
Fili ʻa e ʻekitivitī A pe E.
ʻĪmisi
Temipalé Hisitōlia Fakafāmilí
ʻEkitivitī A: Ko e ngaahi tāpuaki ʻo e kau atu ki he hisitōlia fakafāmilí mo e ngāue fakatemipalé
Mahalo kuo mou ako kimuʻa ʻa e 1 Kolinitō 15:29. Fakakaukau ki he founga ʻoku ʻaonga ai e Toetuʻu ʻa e Fakamoʻuí ki hoʻo ngaahi kuí. Mamata ʻi he vitiō ko ʻení lolotonga hoʻo fakakaukau ki aí.
ʻI hoʻo ako ʻa e 1 Kolinitō 15:29, mahalo kuó ke faʻu ha palani ke kau ʻi he hisitōlia fakafāmilí mo e ngāue fakatemipalé. Kapau naʻá ke fai ia, tuku ha kiʻi taimi ke toe vakaiʻi ai hoʻo palaní pea fakakaukau ki he ngaahi ngāue naʻá ke fai ke fakahoko ʻaki e palani ko iá. Kapau naʻe ʻikai, fakakaukau ke fokotuʻu ha palani he taimí ni ki he founga te ke lava ai ʻo tokoni ki hoʻo ngaahi kuí ke nau maʻu ʻa e ngaahi tāpuaki kotoa ʻo e ongoongolelei ʻo Sīsū Kalaisí.
Kapau naʻá ke faʻu ha palani, vahevahe ʻa e meʻa naʻe leleí mo e ngaahi faingataʻa naʻá ke fehangahangai mo iá. ʻOku ʻi ai nai ha ngaahi liliu ʻokú ke ongoʻi ʻe finangalo ʻa e Tamai Hēvaní ke ke fai? ʻE tokoniʻi fēfē koe ʻe he ngaahi liliu ko iá?
Kapau naʻe ʻikai ke ke faʻu ha palani, vahevahe ʻa e meʻa ʻokú ke loto ke faí pea mo hono ʻuhingá. ʻOkú ke pehē ʻe liliu fēfē koe mo e niʻihi kehé ʻe hoʻo palaní ʻi hoʻo fakahoko iá?
Tali ha taha ʻo e ngaahi fehuʻi ko ʻení:
ʻOku fakahaaʻi fēfē ʻe hoʻo kau ʻi he hisitōlia fakafāmilí mo e ngāue fakatemipalé ʻa hoʻo ʻamanaki lelei ki he Toetuʻú?
Kuo tokoniʻi fēfē koe ʻe he kau atu ki he hisitōlia fakafāmilí mo e ngāue fakatemipalé ke ke ongoʻi ofi ange ai ki he Tamai Hēvaní pea hoko ʻo tatau ange mo Sīsū Kalaisí?
ʻEkitivitī E: Fakamatalaʻi e tokāteline ʻo e Fakalelei ʻa e Fakamoʻuí
3. Kapau naʻá ke fili ʻeni, tali ha fehuʻi ʻe ua mei he ngaahi fehuʻi ko ʻení ʻi hoʻo tohinoa akó:
Ko e hā ʻoku hoko ai e Toetuʻu ʻa e Fakamoʻuí ko ha konga mahuʻinga ʻo ʻEne Fakaleleí?