¶ 1 KOE mooni oku taegali mo au ke bolebole. Ka teu lea ki he gaahi mea ha mai moe gaahi fakaha oe Eiki.

2 I he ta‘u e hogofulu ma fa nai kuo hili, neu ilo ha tagata nae ia Kalaisi, (be nae i he jino ia, oku ikai teu ilo; be nae ikai i he jino, oku ikai teu ilo: oku ilo e he Otua;) nae o hake ia ki hono tolu oe lagi.

3 Bea neu ilo ae tagata koia, (be nae i he jino, be nae ikai i he jino, oku ikai teu ilo: oku ilo e he Otua;)

4 Koeuhi nae o hake ia ki Balataisi, o ne fanogo ki he gaahi lea tae faa lea aki, aia oku ikai gofua ke lea aki e ha tagata.

5 Koe toko taha koia teu bolebole ai: ka e ikai teu bolebole iate au, ka i he eku gaahi vaivai.

6 He ka neu holi ke bolebole, e ikai ai teu vale; he teu lea mooni be: ka oku ou tukuā, telia naa ai ha taha e mahalo lelei lahi hake iate au i he mea oku ne mamata iate au, be i he mea oku ne fanogo iate au.

7 Bea telia naaku fielahi fau au i hono lahi oe gaahi mea nae fakaha, nae tuku kiate au ae tolounua i he kakano, koe mea fekau a Setani, ke tuki‘i au, telia naaku fielahi fau.

8 Bea i he mea ni, nae liuga tolu eku kole lahi ki he Eiki, koeuhi ke mahui ia iate au.

9 Bea behe mai eia kiate au, Ko eku tokoni e lahi maau: he kuo fakaka-kato eku malohi i hoo vaivai. Koia teu fiefia lahi mo bolebole ai mu‘a i he eku gaahi vaivai, koeuhi ke nofoia au e he malohi o Kalaisi.

10 Koia oku ou fiemalie ai i he gaahi vaivai, i he gaahi manuki, moe gaahi majiva, moe gaahi fakataga, moe gaahi mamahi, koeuhi ko Kalaisi: he kau ka vaivai oku ou toki malohi.

11 Ko eni, kuou vale i he bolebole; ka kuo mou fakalaga ia iate au: he nae totonu hoo mou fakaogolelei au: he oku ikai ha mea e taha oku ou tomui ai i he fugani abosetolo lahi, ka oku ikai ko ha mea au.

12 Koe mooni koe gaahi fakailoga oe abosetolo nae fai iate kimoutolu, i he faa kataki kotoabe, moe gaahi fakailoga, moe gaahi mana, moe gaahi gaue malohi.

13 He koeha ha mea ne mou jii hifo ai i he gaahi jiaji kehe, ka koeuhi abe ko eku taefakamāfajia‘i akimoutolu? fakamolemolea eku kovi ni.

14 Vakai, ko hono liuga tolu eni o eku teu ke alu atu kiate kimoutolu; bea e ikai teu fakamāfajia‘i akimoutolu: he oku ikai teu kumi hoo mou mea, ka ko kimoutolu: he oku ikai gali ke tokonaki e he fānau ma ae mātua, ka koe mātua ma ae fānau.

15 Bea teu loto fiefia lahi ke gaue, bea atu mo eku moui koeuhi ko ho mou laumalie; ne ogo ae fakajiijii ae ofa kiate au, i he tubulekina o lahi aubito eku ofa kiate kimoutolu.

16 Bea koia nae ikai teu fakamāfajia akimoutolu: ka i he aga fakabotoboto, neu ma‘u akimoutolu i he fakaoloolo.

17 He naaku ma‘umea meiate kimoutolu i ha taha o kinautolu naaku fekau atu kiate kimoutolu?

18 Naaku kole kia Taitusi, beau fekau mo ia ha kaiga  kiate kimoutolu. Nae ma‘umea a Taitusi meiate kimoutolu? ikai naa ma aeva i he laumalie be taha? bea ma tobuva‘e taha be?

19 Oku mou mahalo oku mau toe fakaogolelei akimautolu kiate kimoutolu? oku mau lea i he ao oe Otua ia Kalaisi: ka  oku mau fai ae mea kotoabe, e kaiga ofeina, ke laga hake ai akimoutolu.

20 He oku ou manavahe, telia i he eku hoko atu, e ikai teu ilo akimoutolu o tāu mo hoku loto, bea te mou ilo‘i au o taetāu mo ho mou loto: telia naa oku ai ae fakakikihi, ae femehekaaki, ae feiteitani, ae fekeikei, ae felauiaki, ae fefanafanahi, ae fakamofutofuta, ae maveuveu:

21 Bea telia naa i he eku toe hoko atu e fakavaivai‘i au e hoku Otua iate kimoutolu, bea teu tagilaulau i he toko lahi kuo nau fai agahala bea oku teeki ai ke nau fakatomala i he gaue uli moe feauaki moe agafakalielia aia kuo nau fai.