Vahe 9
1 Oku ne fakaha hono uhiga o ene tomua fekaua a Taitusi moe kaiga, ka kuo ne ilo e nau fie fai. 6 Bea oku ne ue‘i akinautolu ki he gaahi foaki lahi, he koe tūtūi oe tega lelei, 10 aia te nau toe ma‘u mo hono tubu o lahi, 13 bea tubu ai ae feilaulau lahi oe gaahi fakafetai ki he Otua.
¶ 1 BEA koe mea i he tokoni ki he kaiga maonioni, oku taeaoga eku tohi kiate kimoutolu.
2 He oku ou ilo ho mou loto lelei, aia naaku bolebole ai iate kimoutolu kiate kinautolu i Masitonia, koeuhi oku talu ae ta‘u e taha moe teu ki ai a Akeia; bea ko hoo mou fai feiga kuo lagaki ae toko lahi.
3 Ka kuou fekau ae kaiga, telia naa taeaoga ae mau bolebole iate kimoutolu i he mea ni; kae hage ko eku tala, ke mou teuteu be:
4 Telia naa iloage, te mau alu atu mo ha niihi o Masitonia, bea ilo akimoutolu oku teeki ai teuteu, bea ma ai akimautolu (oku ikai teu behe akimoutolu) i he bolebole lahi ni.
5 Koia naaku behe ai oku aoga eku eginaki ae kaiga, koeuhi ke nau alu muomua kiate kimoutolu, o tomua fakamaoboobo hoo mou mea ofa, aia nae tomua lea ki ai, koeuhi ke teu be ia, o gali moe mea foaki, kae ikai hage oku i he manumanu.
6 Ka koeni, Ko ia oku tūtūi fakajiijii e utu fakajiijii foki; bea ko ia oku tūtūi lahi, e utu lahi foki.
7 Ke foaki e he tagata taki taha o hage koia kuo bau hono loto ki ai, kae ikai i he mamahi, be i hono bule‘i: he oku ofa ae Otua ki ha foaki fiefia.
8 Bea oku mafai e he Otua ke faka-tubulekina ae gaahi mea lelei kotoabe kiate kimoutolu; koeuhi i he mahu lahi mau ai be akimoutolu i he mea kotoabe, ke mou faa fai ae gaue lelei kotoabe:
9 (Hage koia kuo tohi, Kuo tufaki atu eia; kuo foaki eia ki he majiva: bea e tuu mau ene maonioni o taegata.
10 Bea koeni, ko ia oku ne foaki ae tega‘i akau ki he tūtūi, ofa ke ne foaki ae ma ke mou kai, bea fakatubu hoo mou tega kuo tūtūi, bea fakalahi ae gaahi fua o hoo mou maonioni;)
11 Koeuhi ke fakama‘umea‘i akimoutolu i he mea kotoabe ki he faa foaki lahi, aia oku tubu ai ae fakafetai ki he Otua iate kimautolu.
12 He koe tauhi atu oe gaue ni, oku ikai gata i he tokoni ki he majiva oe kaiga maonioni, ka oku tubulekina ia i he gaahi fakafetai lahi ki he Otua;
13 Bea i he fakamooni oe tokoni ni, oku nau fakamalo ki he Otua i hoo mou talagofua oku fakaha ni ki he ogoogolelei a Kalaisi, bea i hoo mou tufaki lahi kiate kinautolu, bea ki he kakai kotoabe;
14 Bea i he e nau lotua akimoutolu, moe holi lahi kiate kimoutolu, koeuhi koe ofa lahi ae Otua oku iate kimoutolu.
15 Fakafetai ki he Otua, koeuhi ko ene foaki oku taefaalaua.