Siviʻi Hono 10 Hoʻo Akó
Kalētia–2 Tesalonika
ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú pea mo e tupulaki fakataautaha kuó ke aʻusia lolotonga hoʻo ako ʻa e Fuakava Foʻoú.
Ko hoʻo fakalakalaka fakalaumālié
Fakakaukau ki ha meʻa te ke malava, talēniti, pe ʻulungaanga ʻokú ke fakatupulaki ʻa ia ʻoku fiemaʻu ki ai ha feinga hokohoko maʻu pē.
-
Ko e hā ʻokú ne fakaʻaiʻai koe ke ke fakaʻaongaʻi e taimi mo e ngāue ʻoku fiemaʻu ke ke fakalakalaka aí?
-
ʻI hoʻo ngāue mālohi ke fakalakalaká, ko e hā ʻokú ke ʻamanaki ʻe hoko ʻe tokoni ke ke ʻiloʻi ʻoku ʻaonga hoʻo ngaahi feingá?
ʻOku tau maʻu ha ngaahi faingamālie lahi lolotonga hotau taimi ʻi he māmaní ke ngāue ke hoko ʻo hangē ko e Fakamoʻuí, ʻa ia ʻokú ne teuteuʻi kitautolu ke toe foki ʻo nofo mo Ia mo ʻetau Tamai Hēvaní. ʻE lava ke ʻaonga ke toutou vakaiʻi ʻetau fakalakalaká mo fai ha ngaahi liliu pē ʻe fiemaʻú.
Ko e taumuʻa ʻo e lēsoni ko ʻení ke ke maʻu ai ha ngaahi faingamālie ke vakaiʻi hoʻo fakalakalaka fakalaumālié. Te ke maʻu e faingamālie ke vakaiʻi e meʻa kuó ke ako mai ʻi he Fuakava Foʻoú pea vakaiʻi hoʻo fakalakalaka fekauʻaki mo e ngaahi taumuʻa kuó ke fokotuʻu koeʻuhí ko e meʻa kuó ke akó.
Toʻo ha kiʻi taimi ke ke fakakaukau ai ki hoʻo ako kimuí ni ʻa e Fuakava Foʻoú mo e ngaahi ngāue kuó ke fai koeʻuhí ko e meʻa kuó ke akó. Mahalo te ke fie fakamanatu ʻa e meʻa kuó ke hiki ʻi hoʻo tohinoá pe ko e meʻa kuó ke fakaʻilongaʻi kimuí ni ʻi hoʻo folofolá ke ʻiloʻi ʻa e ngaahi taumuʻa kuó ke fokotuʻú mo e ngaahi ongo kuó ke maʻú.
-
Ko e hā kuó ke ako mei he Fuakava Foʻoú kuó ne tokoniʻi koe ke ke toe ofi ange kia Sīsū Kalaisí?
-
Ko e hā kuó ke ako fekauʻaki mo Ia mei he Fuakava Foʻoú ʻa ia kuo makehe kiate koé?
1. Fili pea fakakakato ha ʻekitivitī ʻe ua ʻo e ngaahi ʻekitivitī ko ʻení ʻi hoʻo tohinoa akó ke ke fakahū ki he lēsoni ko ʻení.
ʻEkitivitī A: Ko Hono Fakamatalaʻi ʻo e Hē Fakaʻaufuli mei he Moʻoní mo hono Fakafoki Mai ʻo e Ongoongoleleí
Sio ki he ongo fakatātā ko ʻení, pea fakakaukau ki he ʻuhinga ʻo e fakafoki mai ha meʻá.
-
Ko e hā ka fiemaʻu ai ke toe fakafoki mai ha meʻa?
-
ʻE lava fēfē ke fakafehoanaki ʻa e ngaahi ʻīmisi ko ʻení ki he Hē mei he Moʻoní mo Hono Fakafoki Mai ʻo e Ongoongoleleí?
Ke toe vakaiʻi ʻa e fehokotaki ʻi he Vahaʻa ʻo e Hē mei he Moʻoní mo hono Fakafoki Mai ʻo e Ongoongoleleí, fakakakato ʻa e ʻekitivitī ko ʻení:
Fakakaukauloto ʻoku akoʻi ʻe he kau faifekaú ha taha ʻo ho ngaahi kaungāmeʻá ʻi homou ʻapí. ʻOku nau kole atu ke ke akoʻi ha konga ʻo e lēsoni hokó ʻi he Hē mei he Moʻoní mo hono Fakafoki Mai ʻo e Ongoongoleleí. ʻOkú ke ʻiloʻi ʻoku maheni ho kaungāmeʻá mo e Tohi Tapú, ko ia ʻoku hangē ha fakakaukau lelei ke fakaʻaongaʻi ha ngaahi veesi mei he Fuakava Foʻoú lolotonga e lēsoní.
Fakaʻaongaʻi ʻa e Ngāue 3:21; ʻEfesō 1:10; ʻEfesō 2:19–22; mo e 2 Tesalonika 2:1–3 (pe ngaahi veesi kehe te ke filí), hiki e meʻa te ke ala lea ʻaki lolotonga e lēsoní ke tokoni ke mahino ki ho kaungāmeʻá e ʻuhinga ʻe fiemaʻu ai ke fakafoki mai ʻe he Fakamoʻuí ʻEne ongoongoleleí ki he māmaní.
Kapau naʻá ke fili ke fakakakato ʻa e ʻekitivitī ko ʻení, lekooti ʻa e meʻa te ke lea ʻaki ki ho kaungāmeʻá.
ʻEkitivitī E: Fakatupulaki hoʻo ʻofa kia Sīsū Kalaisí mo hoʻo holi ke tauhi kiate Iá
ʻI he lēsoni “Filipai 3,” naʻe ʻoatu kiate koe ʻa e faingamālie ke fai ha tohi kiate koe ʻi he kahaʻú ʻa ia naʻá ke ʻiloʻi ai ʻa e ngaahi feilaulau te ke lava ʻo fai ʻe tokoni ke ke ʻiloʻi lelei ange ai ʻa Sīsū Kalaisi mo teuteu ki he moʻui taʻengatá.
Kapau naʻá ke fakaʻaongaʻi ʻa e faingamālie ko ʻení, vakai ki he tohi naʻá ke fakahokó. Fakafehoanaki e ngaahi ongo ʻokú ke lolotonga maʻu kau kia Sīsū Kalaisí pe ko hoʻo ngaahi holi ke tauhi kiate Iá mo e ngaahi ongo mo e ngaahi holi naʻá ke maʻu ʻi hoʻo fai e tohi ko iá. Kapau ʻoku ʻi ai ha meʻa ʻokú ke fie tānaki ki he tohí ʻo makatuʻunga ʻi hoʻo ngaahi aʻusia kimuí ni maí, ongoʻi tauʻatāina ke fai ia he taimí ni.
Kapau naʻá ke fili ke fakakakato ʻa e ʻekitivitī ko ʻení, tali ha fehuʻi ʻe ua mei he ngaahi fehuʻi ko ʻení:
-
ʻI hoʻo toe vakaiʻi hoʻo tohí, naʻá ke fakatokangaʻi nai ha liliu fekauʻaki mo hoʻo ʻofa kia Sīsū Kalaisí? Kapau ko ia, ʻokú ke pehē ko e hā naʻe liliu aí?
-
Ko e hā ha ngaahi aʻusia kimuí ni kuó ne fakatupulaki hoʻo ʻofa ki he ʻOtuá mo hoʻo loto fiemālie ke tauhi kiate Iá?
-
ʻOkú ke ongoʻi ko e hā ha niʻihi ʻo e ngaahi sitepu hoko te ke lava ʻo fakahoko ke tokoniʻi koe ke fakatupulaki hoʻo ʻofa ki he ʻOtuá?
‘Ekitiviti F: ʻOku totonu ke tui ʻe he Kāingalotú e teunga tau kakato ʻo e ʻOtuá
-
Ko e hā ʻokú ke manatuʻi fekauʻaki mo e teunga tau ʻo e ʻOtuá? Ko e hā ʻokú ke manatuʻi fekauʻaki mo e ʻuhinga ʻo e konga takitaha? Kapau ʻokú ke fiemaʻu tokoni, vakai ki he ʻEfesō 6:14–18 ki he ngaahi talí.
-
Te ke fakamatalaʻi fakanounou fēfē ʻa e ʻuhinga ʻo e “ʻai kiate kimoutolu ʻa e [teunga] tau kotoa ʻo e ʻOtuá”? (ʻEfesō 6:11).
Kapau naʻá ke fili ke fakakakato ʻa e ʻekitivitī ko ʻení, fai ʻa e ʻekitivitī ko ʻení pea tali ʻa e ngaahi fehuʻi ʻoku ʻoatu fakataha mo iá:
Tā ha fakatātā ʻo ha kiʻi tangata vaʻakau (stick figure) ʻi hoʻo tohinoá.
-
ʻOku ʻuhinga ki he hā ke tui ʻa e [teunga] tau ʻo e ʻOtuá?
Tā ha konga pe kongokonga ʻo e [teunga] taú ʻokú ne fakafofongaʻi e ngaahi ngāue ko iá.
-
Kuó ke aʻusia nai ha ngaahi ola mei hoʻo ngaahi feingá? Kapau ko ia, ko e hā kuó ke aʻusiá? Kapau ʻoku ʻikai, ko e hā ha ngaahi ola ʻokú ke pehē ʻe lava ke maʻu ʻi he hokohoko atu hoʻo feingá?