Samtang naghulat sa iyang misyonaryong mga kauban sa pag-uban kaniya sa Atenas, si Apostol Pablo nabalaka pag-ayo nga ang mga tawo sa Atenas nagsimba og dios-dios [idolatrous] ug wala makasabot sa tinuod nga kinaiya sa Dios. Aron matabangan ang mga taga Atenas nga makasabot ug mahiduol sa Dios, si Pablo nagtudlo sa ebanghelyo ni Jesukristo diha sa mga sinagoga ug sa mga merkado. Ang mga pilosopo dayon midapit ni Pablo sa pagpasabot “niining bag-ong doktrina” (Mga Buhat 17:19) sa usa ka dapit nga gitawag og Mars’ Hill. Si Pablo nagtudlo sa mga pilosopo sa tinuod nga kinaiya sa Dios ug nagmatuod sa ilang diosnon nga relasyon Kaniya. Kini nga leksiyon makatabang kaninyo nga mabati ang importansiya sa inyong pagkatawo isip usa ka anak sa Dios.
Ako anak sa Dios
Paminawa ang himno nga “Ako Anak sa Dios” (Mga Himno, nu. 189) sa Gospel Library nga app o sa ChurchofJesusChrist.org. O Tan-awa ang bidyo nga “Child of God [Anak sa Dios]” (2:54), anaa sa ChurchofJesusChrist.org. Sa inyong pagpaminaw o pagkanta, pamalandongi ang kamahinungdanon sa mensahe niini nga himno.
Unsa nga mga pulong o mga hugpong sa mga pulong gikan niini nga himno ang inyong nakita nga mahinungdanon? Ngano man?
Si Elder Donald L. Hallstrom sa Seventy midapit kanato sa pagpamalandong sa mensahe nga “Ako Anak sa Dios”:
Imahe
Opisyal nga Litrato ni Elder Donald L. Hallstrom. Gilitratohan niadtong Marso 2017.
Kining pinalanggang himno usa sa kanunay gayod nga kantahon niini nga Simbahan. Apan ang importanteng pangutana mao, nasayod ba gayod kita niini? Nasayod ba gayod kita niini diha sa atong hunahuna ug sa atong kasingkasing ug sa atong kalag? Ang atong langitnong kagikan ba ang nag-una ug labing importante nga ilhanan sa atong kaugalingon?
(Donald L. Hallstrom, “Ako Anak sa Dios,” Liahona, Mayo 2016, 26)
Ang mosunod nga mga pangutana gipahiangay gikan sa pamahayag ni Elder Hallstrom ug mahimong matubag og “oo” o “dili” nga tubag. Sa inyong pagtubag niini nga mga pangutana, ipasabot nganong gitubag ninyo ang matag pangutana sa paagi nga inyong gihimo.
1. Tubaga ang mosunod nga mga pangutana diha sa inyong journal sa pagtuon:
Nasayod ba gayod kamo nga kamo anak sa Dios?
Nasayod ba kamo niini diha sa inyong hunahuna, kasingkasing, ug kalag?
Nakita ba ninyo ang inyong kaugalingon isip usa ka anak sa Dios sa dili pa ninyo ilhon ang inyong kaugalingon isip bisan unsa?
Sa kinatibuk-an niini nga leksiyon, hunahunaa ang inyong mga tubag sa miaging mga pangutana ug sa unsa nga paagi nga ang inyong mga tubag nagpasabot sa inyong mga pagbati ngadto sa Langitnong Amahan. Pangita og inspirasyon gikan sa inyong Langitnong Amahan, pinaagi sa Espiritu Santo, aron matabangan kamo nga mas makasabot sa inyong diosnon nga pagkatawo isip usa ka anak sa Dios ug makabati sa lawom nga paghigugma Niya alang kaninyo.
Si Pablo nagsangyaw sa Atenas
Si Apostol Pablo nagsangyaw sa Atenas panahon sa iyang ikaduhang misyonaryong panaw. Ang mga tawo sa Atenas adunay daghang lainlaing mga opinyon, mga pilosopiya, ug mga tinuohan. Si Pablo nakakita nga ang mga tawo “nalukop sa mga diosdios” (Mga Buhat 17:16), pasabot nga sila nagdayeg sa mga butang gawas sa Dios. Maong si Pablo nagsangyaw matag adlaw mahitungod ni Jesukristo ug sa Iyang Pagkabanhaw. Dayon si Pablo gidala ngadto sa Mars’ Hill, diin siya gidapit sa pagsangyaw atubangan sa usa ka grupo sa mga pilosopo (tan-awa sa Mga Buhat 17:17–21).
Unsa ang kaha gisugyot sa kinulit diha sa altar nga gihisgotan ni Pablo kabahin sa pagtuo sa mga taga-Atenas mahitungod sa Dios?
Sa unsang paagi nga kini nga kinulit matandi sa unsa ang gitudlo sa mga kasulatan mahitungod sa Dios?
Ang karaang taga-Atenas nagtuo sa daghang mga dios-dios ug nagtukod og mga estatuwa ug mga templo alang sa pagpasidungog kanila. Ang altar “alang sa dios nga wala hiilhi” (Mga Buhat 17:23) mao ang pagsulay sa mga taga Atenas sa paghupay sa wala hiilhi nga dios o bisan kinsa nga dios kinsa wala mailhi pinaagi sa ngalan.
Unsa ang pipila sa komon nga mga sayop nga pagsabot nga inyong namatikdan sa kalibotan karon mahitungod sa Dios ug sa atong relasyon Kaniya?
Kon aduna kamoy kahigayonan sa pagtudlo sa usa ka tawo kinsa wala kaayo masayod mahitungod sa Langitnong Amahan, unsa ang inyong gustong masayran nila mahitungod Kaniya?
2. Kompletoha ang mosunod diha sa inyong journal sa pagtuon:
Basaha ang Mga Buhat 17:24–31 ug paghimo og lista sa mga kamatuoran nga gitudlo ni Apostol Pablo mahitungod sa tinuod nga kinaiya sa Dios ug sa inyong relasyon Kaniya. Ikonsiderar ang paghinganlan sa inyong lista og “Ang Tinuod ug Buhing Dios ug Akong Relasyon Kaniya.” Timan-i nga adunay Hubad ni Joseph Smith alang sa bersikulo 27 (tan-awa sa Mga Buhat 17:27, footnote b). Human mahimo ang inyong listahan, tubaga ang mosunod nga pangutana:
Unsa nga kamatuoran gikan sa inyong listahan ang labing mahinungdanon alang kaninyo, ug ngano?
Mga anak man kita sa Dios
Imahe
litrato sa seminary didto sa Mars Hill
Usa sa mga kamatuoran nga mahimo ninyong naila gikan sa mga pagtulon-an ni Pablo mao nga “mga anak man kita sa Dios” (bersikulo 29).
Sa unsa nga paagi nga ang pagkahimong usa ka anak sa Dios lahi gikan sa usa lang sa Iyang mga nilalang?
Si Presidente M.Russell Ballard sa Korum sa Napulog Duha ka Apostoles nagpamatuod sa kamahinungdanon sa kamatuoran nga “mga anak man kita sa Dios.”
Imahe
Opisyal nga litrato ni Presidente M. Russell Ballard sa Korum sa Napulog Duha ka Apostoles, 2004.
Ang lig-ong kamatuoran bahin sa langitnong ginikanan dili lamang akong kamatuoran o inyong kamatuoran. Kini mahangtorong kamatuoran. Nahisulat kini diha sa dako, pinabaga, kapital nga mga letra. Ang pagsabot niini nga kamatuoran—tinuoray nga pagsabot niini ug ang paghangop niini—makapausab sa kinabuhi. Makahatag kini kaninyo og talagsaong kailhanan nga wala gayoy tawo nga makakuha gikan kaninyo. Apan labaw pa niana, kinahanglang maghatag kini kaninyo og nindot nga pagbati nga bililhon ug pamati sa inyong walay kinutobang bili. Sa kataposan, makahatag kini kaninyo og usa ka balaanon, halangdon, ug takos nga katuyoan sa kinabuhi.
Unsa nga kalainan ang mahimo niini sa inyong kinabuhi ug sa mga desisyon nga inyong himoon nga nakahibalo nga kamo literal nga “mga anak … sa Dios”?
Unsa nga mga kasinatian ang nakatabang kaninyo nga mas makasabot sa inyong diosnong pagkatawo isip usa ka anak sa Dios?
Aron makakita og usa ka ehemplo kon sa unsang paagi ang pagsabot sa iyang diosnong pagkatawo nakaapekto sa usa ka babaye, tan-awa ang bidyo nga “Ako Ba Anak sa Dios?” (10:24), anaa sa ChurchofJesusChrist.org, gikan sa time code 3:24 hangtod 5:23.
3. Tubaga ang bisan usa lamang sa mosunod nga mga pangutana diha sa inyong journal sa pagtuon:
Unsa ang inyong nakat-onan o nabati karon mahitungod sa inyong diosnon nga kinaiya nga gusto ninyong mahinumdoman?
Unsa nga mga aksiyon ang inyong gibati nga nadasig nga buhaton base sa unsay inyong nakat-onan?
Unsa ang inyong mahimo aron makakita og mga tubag sa mga pangutana nga anaa pa kaninyo mahitungod sa inyong relasyon sa Dios?
Opsiyonal: Gustong Makakat-on pa og Dugang?
Sa unsang paagi ang Basahon ni Mormon makapalig-on sa akong relasyon sa Dios?
Si Presidente Russell M. Nelson mipahayag:
Imahe
Opisyal nga litrato ni Presidente Russell M. Nelson nga gikuha niadtong Enero 2018
Adunay impluwensyal kaayong panghitabo kon ang usa ka anak sa Dios magtinguha og dugang nga kahibalo bahin Kaniya ug sa Iyang Pinalangga nga Anak. Walay laing dapit diin kana nga mga kamatuoran mas tin-aw nga gitudlo ug sa impluwensyal nga paagi kay sa diha sa Basahon ni Mormon.
Nganong importante man kaayo nga masabtan ang akong tinuod nga kinaiya isip usa ka anak sa Dios?
Si Elder Brian K. Taylor sa Kapitoan mitudlo sa mosunod:
Imahe
Opisyal nga Litrato ni Elder Brian K. Taylor. Gilitratohan niadtong Marso 2017.
Nakat-onan ni Moises ang balaan niyang panulundon pinaagi sa atubang nga pagpakig-istorya sa Ginoo. Human niana nga kasinatian, “miabot si Satanas nga nanintal,” uban sa igmat, apan sa binagis nga tuyo sa pagtuis sa pagkatawo ni Moises, “nag-ingon: Moises, anak sa tawo, simba kanako. Ug … si Moises mitan-aw diha kang Satanas ug miingon: Kinsa ikaw? [Kay] tan-awa, ako mao ang usa ka anak sa Dios” [Moises 1:12–13].
Kining dako nga gubat batok sa balaang pagkatawo pintas nga miulbo isip nagkamaayong paagi ni Satanas sa pagguba sa atong gituohan ug kahibalo sa atong relasyon sa Dios. Maayo na lang, kay napanalanginan kita og tin-awng [panan-awon ug] panabot sa atong tinuod nga pagkatawo gikan sa sinugdanan. …
Ang atong pagkaila sa Amahan makausab sa tanan, ilabi na sa atong kasingkasing, samtang ang Iyang maaghop nga Espiritu momatuod sa atong tinuod nga pagkatawo ug talagsaong bili sa Iyang panan-aw. Ang Dios magauban kanato sa pagsubay sa dalan sa pakigsaad kon pangitaon nato Siya pinaagi sa maninampoong pagpangamuyo, pagsiksik sa kasulatan ug masulundong pagpaningkamot.
Si Presidente Dieter F. Uchtdorf sa Unang Kapangulohan mipamatuod sa atong tinuod nga pagkatawo isip mga anak nga babaye ug mga anak nga lalaki sa Dios diha sa bidyo nga “Our True Identity [Atong Tinuod nga Pagkatawo]” (3:38), anaa sa ChurchofJesusChrist.org.
