Usa sa labing dako nga mga gasa nga gitanyag sa Langitnong Amahan ngadto sa mga disipulo sa pakigsaad ni Jesukristo mao ang gasa sa Espiritu Santo. Busa, si Pablo natingala sa dihang nakahimamat siya og mga disipulo sa Efeso kinsa miingon nga sila nabunyagan apan wala makadungog sa Espiritu Santo. Kini tungod diay kay, sila nabunyagan apan dili sa ngalan ni Jesukristo. Human sila nabunyagan sa “ngalan sa Ginoong Jesus,” si Pablo mipandong sa iyang mga kamot ngadto kanila ug mihatag kanila sa gasa sa Espiritu Santo (Mga Buhat 19:5). Kini nga leksiyon mahimong makatabang kaninyo nga makadawat sa mga panalangin nga gitinguha sa Langitnong Amahan ug ni Jesukristo nga mahatag diha kaninyo pinaagi sa gasa sa Espiritu Santo.
Ang tambag ni Joseph Smith sa Simbahan
Human sa pagkamartir ni Joseph Smith, si Brigham Young adunay daghang mga pangutana ug mga kabalaka isip mosunod nga propeta sa Simbahan. Sa usa ka okasyon, si Joseph Smith mipakita kang Brigham Young sa usa ka damgo ug mitanyag kaniya sa mosunod nga tambag: “Sultihi ang mga tawo sa pagsiguro sa ” (Mga Santos: Ang Istorya sa Simbahan ni Jesukristo sa Ulahing mga Adlaw, vol. 2, Walay Dili Balaan nga Kamot, 1846–1893 [2020], 49).
Unsa nga tambag sa inyong hunahuna ang lagmit gihatag ni Joseph Smith aron matabangan ang mga miyembro sa Simbahan?
Imahe
Si Brigham Young nga nakakita ni Joseph Smith diha sa usa ka panan-awon.
Si Joseph Smith mitambag kang Brigham Young nga “Sultihi ang mga tawo sa pagsiguro sa pagbaton sa Espiritu sa Ginoo ug sa pagsunod niini, ug kini mogiya gyod kanila sa katarong” (Mga Santos, 2:49).
Sa tanang tambag nga mahimong ikahatag ni Joseph ngadto kang Brigham Young, ngano kaha sa inyong hunahuna nga iyang gihatagan pag-ayo og gibug-aton ang pagpangita sa pakig-uban sa Espiritu Santo?
Irekord sa inyong journal ang mga rason nganong sa inyong hunahuna ang mensahe ni Joseph Smith ngadto sa Simbahan gikinahanglan gihapon sa atong panahon ug sa inyong kinabuhi. Samtang magtuon kamo niini nga leksiyon, hunahunaa kon sa unsang paagi ang Langitnong Amahan ug si Jesukristo makapanalangin sa inyong kinabuhi pinaagi sa gasa sa Espiritu Santo.
Ang gasa sa Espiritu Santo
Sa pagsugod ni Pablo sa iyang ikatulong misyonaryong panaw, siya mibiyahe sa tibuok Galacia ug Frigia. Siya dayon mibiyahe ngadto sa Efeso (tan-awa ang Mga Mapa sa Biblia, nu.13, “Ang Misyonaryo nga Mga Panaw ni Apostol Pablo”). Didto iyang nahimamat ug gitudloan ang mga disipulo nga wala pa gayod makadungog sa Espiritu Santo. Kining mga tawhana gibunyagan kaniadto sa usa ka tawo nga wala maghupot sa tukma nga awtoridad (tan-awa sa Joseph Smith, “Baptism,” Times and Seasons, Sept. 1, 1842, 904, josephsmithpapers.org).
Basaha ang Mga Buhat 19:1–7, pangitaa kon giunsa ni Pablo pagtabang niining mga disipulo.
Ngano kaha sa inyong hunahuna nga gipunting man ni Pablo ang iyang pagtudlo kang Jesukristo sa wala pa bunyagi og balik ang mga disipulo?
Sa unsang paagi ninyo mahulagway ngadto niining mga tawhana ang importansiya sa pagdawat sa gasa sa Espiritu Santo human sa bunyag?
Unsa nga mga kamatuoran gikan niini nga asoy ang lagmit ninyong mapakigbahin sa usa ka tawo nga gibunyagan kaniadto sa lahi nga relihiyon?
Usa sa mga kamatuoran nga atong makat-onan gikan niini nga asoy mao nga aron makompleto ang pagbunyag, kini gikinahanglang ubanan og pagkompirma ug pagdawat sa Espiritu Santo.
Paggahin og pipila ka minuto sa pagpamalandong kon ngano kaha sa inyong hunahuna nga ang Langitnong Amahan ug si Jesukristo gusto nga maangkon ninyo ang Espiritu Santo isip inyong kauban. Pamalandongi kini samtang magbasa kamo sa mosunod nga mga kasulatan:
1. Tubaga ang mosunod nga mga pangutana diha sa inyong journal sa pagtuon:
Ngano kaha sa inyong hunahuna nga ang Langitnong Amahan ug si Jesukristo gusto nga ang Espiritu Santo mahimo ninyong kanunay nga kauban?
Sa unsang mga paagi nga ang Espiritu Santo dako og gikatabang sa inyong kinabuhi? Ngano man?
Aron matabangan kamo nga mahanduraw ug masabtan ang panginahanglan sa pag-andam sa inyong kaugalingon sa pagdawat sa giya gikan sa Espiritu Santo, kompletoha o handurawa ang mosunod nga kalihokan.
Pagbutang og tulo ka walay sulod nga mga tasa sa usa ka lababo o sa usa ka tray nga kasudlan og tubig. Hingpit nga taboni ang ibabaw sa usa ka tasa og papel o taklob. Pagbutang og butang (sama sa usa ka bato) sa lahi nga tasa nga makaokupar sa halos tibuok sulod sa tasa. Dayon sulayi pagpuno ang kada tasa og tubig.
Kon ang mga tasa nagrepresentar kanato ug ang tubig nagrepresentar sa Espiritu Santo, unsa kaha ang girepresentar sa piraso sa papel (o tabon) ug sa bato (o ubang butang) sa kinabuhi sa usa ka tawo?
Basaha kining duha ka pamahayag ni Elder David A. Bednar sa Korum sa Napulog Duha ka Apostoles mahitungod sa Espiritu Santo:
Imahe
Elder David A. Bednar, Korum sa Napulog Duha ka Apostoles opisyal nga hulagway. 2020.
Ang Espiritu Santo wala himoa nga kanunayng maglihok sa atong kinabuhi tungod lamang kay gipandongan na kita sa mga kamot sa atong ulo ug gipamulong na kadtong [upat ka] importanting mga pulong [“dawata ang Espiritu Santo”].
Elder David A. Bednar, Korum sa Napulog Duha ka Apostoles opisyal nga hulagway. 2020.
Kon adunay butang nga atong mahunahuna, makita, madungog, o mabuhat nato nga makapalayo sa Espiritu Santo, nan moundang kita sa paghunahuna, pagtan-aw, pagpaminaw, o pagbuhat sa mao nga butang. Kon kanang butang gituyo aron sa paglingaw, pananglitan, makapabulag kanato sa Balaang Espiritu, nan sigurado kana nga kalingawan dili para kanato. Tungod kay ang Espiritu dili makapuyo nianang bulgar, mahugaw, o dili ligdong, nan klaro nga ang ingon nga mga butang dili gayod para kanato.
(David A. Bednar, “Nga Kita Unta sa Kanunay Makabaton sa Iyang Espiritu Uban Kanato,” Liahona, Mayo 2006, 30)
2. Tubaga ang bisan usa lamang sa mosunod nga mga pangutana diha sa inyong journal sa pagtuon:
Unsa ang gitudlo ni Elder Bednar nga sa inyong hunahuna labing importanteng masabtan sa kabatan-onan karon? Ngano man?
Unsaon ninyo pag-ila ang pagpakig-uban sa Espiritu Santo sa inyong kinabuhi? Kanus-a ang labing bag-ong higayon nga inyong naila ang Iyang impluwensiya?
Unsa nga mga desisyon ang inyong nabuhat nga nakatabang kaninyo nga kanunayng ikauban ang Espiritu Santo? Sa unsang paagi nga ang Langitnong Amahan nakapanalangin kaninyo pinaagi niini nga gasa?
Paghimo og plano sa pagdawat sa impluwensiya sa Espiritu Santo nga mas bug-os ug mas makanunayon sa inyong kinabuhi. Pangayoa ang tabang sa Langitnong Amahan sa inyong plano ug aron panalanginan kamo nga maila ang Iyang impluwensiya pinaagi sa Espiritu Santo samtang maningkamot kamo sa katumanan niini.
Opsiyonal: Gustong Makakat-on pa og Dugang?
Nganong importante man nga dawaton nako ang impluwensiya sa Espiritu Santo sa akong kinabuhi?
Si President Russell M. Nelson mitanyag sa mosunod nga imbitasyon alang sa matag usa kanato.
Imahe
Opisyal nga litrato ni Presidente Russell M. Nelson nga gikuha niadtong Enero 2018
Sa umaabot nga mga adlaw, dili na posible ang espirituhanong pagsugakod kon wala ang giya, direksiyon, ug makahupay nga impluwensiya sa Espiritu Santo.
Akong minahal nga mga kaigsoonan, mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag. Himoa kining [adlawa] nga higayon nga makapausab gayod sa inyong kinabuhi. Pilia ang paghimo sa espiritwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu.
Sa bidyo nga “Enemy Territory [Teritoryo sa Kaaway]” (3:38), si Presidente Boyd K. Packer (1924–2015) sa Korum sa Napulog Duha ka Apostoles mipakigbahin og usa ka kasinatian gikan sa iyang kabatan-on nga mas naghulagway pa sa kaimportante sa pagpaminaw sa Espiritu. Kini nga bidyo anaa sa ChurchofJesusChrist.org.
Sa unsa nga paagi nga ako mas duol nga makabaton sa makanunayong pakig-uban sa Espiritu Santo?
Si Presidente Henry B. Eyring sa Unang Kapangulohan miingon:
Imahe
Opisyal nga Litrato ni Presidente Henry B. Eyring nga gikuha niadtong Marso 2018.
Alang sa daghang mga rason, gikinahanglan nato ang kanunay nga pakig-uban sa Espiritu Santo. Kita nagtinguha niini, apan nasayod kita gikan sa kasinatian nga dili sayon ang pagmentinar niini. Matag usa nato makahunahuna, makasulti, ug makabuhat og mga butang sa atong inadlaw nga pagpakabuhi nga makapasilo sa Espiritu. Ang Ginoo mitudlo nato nga ang Espiritu Santo makauban nato sa kanunay kon ang atong mga kasingkasing puno sa gugma nga putli ug kon ang hiyas modayan-dayan sa atong mga hunahuna nga walay paghunong [tan-awa sa Doktrina ug Mga Pakigsaad 121:45]. …
… Ang [labing] bililhong inspirasyon mao nga kamo mahibalo sa unsay gustong ipabuhat kaninyo sa Dios. Kon pabayaron mo og ikapulo o pabisitahon og nagsubo nga higala, kinahanglang buhaton ninyo kini. Bisan unsa pa man, buhata kini. Kon inyong gipakita ang inyong kaandam sa pagsunod, ang Espiritu mopadala ninyo og dugang nga mga pag-aghat kon unsay ipabuhat sa Dios kaninyo.
Kon mosunod kamo, ang mga pag-aghat sa Espiritu mas kanunayng moabot, mas magkaduol ngadto sa kanunay nga pagpakig-uban.
Sa iyang pakigpulong nga “Dawata ang Espiritu Santo” (Liahona, Nob. 2010, 95–97), si Elder David A. Bednar sa Korum sa Napulog Duha ka Apostoles mipakigbahin usab sa iyang mga panabot kon unsaon nato pagdapit ang pakig-uban sa Espiritu Santo.
