កិច្ចការ ១៧:១–១៤
ការស្រាវជ្រាវបទគម្ពីរ
តើអ្នកធ្លាប់ឆ្ងល់ទេថាហេតុអ្វីបានជាការសិក្សាព្រះគម្ពីរសំខាន់ម៉្លេះ ? បទពិសោធន៍មួយចំនួនដែលប៉ុល និងដៃគូរបស់លោកមានក្នុងដំណើររបស់ប៉ុលទៅផ្សព្វផ្សាយសាសនាជាលើកទីពីរ បង្ហាញពីព្រះចេស្តាដែលព្រះបន្ទូលរបស់ព្រះអាចមានមកលើយើង ។ មេរៀននេះអាចជួយអ្នកឲ្យមានបំណងប្រាថ្នាដ៏ធំដើម្បីដកពិសោធន៍ពរជ័យនៃការសិក្សាព្រះគម្ពីរប្រចាំថ្ងៃ ។
ការយល់ដឹងពីការសិក្សាព្រះគម្ពីររបស់អ្នក
១. នៅក្នុងសៀវភៅកំណត់ហេតុការសិក្សារបស់អ្នក សូមឆ្លើយសំណួរខាងក្រោមនេះ ៖
-
តើការយល់ដឹងអ្វីខ្លះអំពីព្រះយេស៊ូវគ្រីស្ទ និងដំណឹងល្អរបស់ទ្រង់ដែលអ្នកបានទទួលពីការសិក្សាព្រះគម្ពីរនាពេលថ្មីៗនេះរបស់អ្នក ?
-
តើខគម្ពីរ ឬដំណើររឿងអ្វីខ្លះដែលអ្នកបានសិក្សានាពេលថ្មីៗនេះ ដែលមានអត្ថន័យចំពោះអ្នក ? ហេតុ ?
-
ប្រសិនបើមានមិត្តម្នាក់សួរអ្នកថា ហេតុអ្វីអ្នកមានអារម្មណ៍ថាវាសំខាន់ក្នុងការសិក្សាព្រះគម្ពីរឲ្យបានខ្ជាប់ខ្ជួន តើអ្នកនឹងឆ្លើយតបយ៉ាងណា ?
ឧទាហរណ៍អំពីតម្លៃនៃព្រះគម្ពីរ
បទពិសោធន៍ខ្លះដែលប៉ុលមានអំឡុងការធ្វើដំណើរទៅផ្សព្វផ្សាយសាសនាជាលើកទីពីររបស់លោក បង្ហាញពីតម្លៃនៃការសិក្សាព្រះគម្ពីរ ។ សូមសរសេរចំណងជើងដូចខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖ របៀបដែលការសិក្សាព្រះគម្ពីរអាចប្រទានពរដល់ជីវិតរបស់ខ្ញុំ ។ នៅពេលអ្នកសិក្សានៅថ្ងៃនេះ សូមរកមើលការយល់ដឹងដែលអ្នកអាចរាយបញ្ជីនៅក្រោមចំណងជើងនេះ ។
បើមាន សូមប្រើផែនទីព្រះគម្ពីរប៊ីបលេខ ១៣ « ការធ្វើដំណើររបស់សាវកប៉ុលទៅផ្សព្វផ្សាយសាសនា » ដើម្បីក្រុងថែស្សាឡូនីច និងកន្លែងផ្សេងទៀតដែលប៉ុលបានធ្វើដំណើរក្នុងអំឡុងពេលនៃការធ្វើដំណើរទៅផ្សព្វផ្សាយសាសនាជាលើកទីពីររបស់លោក ។
សូមអាន កិច្ចការ ១៧:១–៤ ហើយរកមើលអ្វីដែលប៉ុលបានធ្វើក្នុងចំណោមសាសន៍យូដានៅក្រុងថែស្សាឡូនីច ។
-
តើអ្នកគិតថាអ្វីដែលសំខាន់ចំពោះការខិតខំរបស់ប៉ុល ?
-
តើដំណើររឿងនេះជួយអ្នកឲ្យយល់យ៉ាងណាអំពីតម្លៃនៃព្រះគម្ពីរ ?
សារលិខិតរបស់ប៉ុលទៅកាន់សាសន៍យូដានៅក្រុងថែស្សាឡូនីចរំឭកយើងថា ព្រះគម្ពីរថ្លែងទីបន្ទាល់អំពីព្រះយេស៊ូវគ្រីស្ទ និងបេសកកម្មដ៏ទេវភាពរបស់ទ្រង់ ( សូមមើល យ៉ូហាន ៥:៣៩ ) ។ សូមពិចារណាបន្ថែមសេចក្តីពិតនេះទៅនឹងបញ្ជីក្នុងសៀវភៅកំណត់ហេតុការសិក្សារបស់អ្នក ៖
អែលឌើ ឌី.ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានបង្រៀនដូចខាងក្រោមនេះអំពីគោលបំណងនៃព្រះគម្ពីរ ។ អ្នកប្រហែលជាចង់មើលវីដេអូ « The Blessings of Scripture » ចាប់ពីនាទីទី ១០:៤៩–១១:២១ ឬអានសេចក្តីថ្លែងការណ៍ដូចខាងក្រោម ។
នៅទីបញ្ចប់នេះ គោលបំណងដ៏សំខាន់បំផុតរបស់ព្រះគម្ពីរទាំងអស់គឺដើម្បីបំពេញព្រលឹងយើងដោយសេចក្ដីជំនឿលើព្រះ ជាព្រះវរបិតា និងលើព្រះរាជបុត្រាទ្រង់ គឺព្រះយេស៊ូវគ្រីស្ទ—សេចក្ដីជំនឿដែលថា គឺពិតជាមានទ្រង់ទាំងទ្វេ ជាសេចក្ដីជំនឿលើផែនការរបស់ព្រះវរបិតាសម្រាប់ជីវិតអមត និងជីវិតដ៏នៅអស់កល្បជានិច្ចរបស់យើង ជាសេចក្ដីជំនឿលើដង្វាយធួន និងការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ដែលធ្វើឲ្យផែនការនៃសុភមង្គលអាចកើតឡើង ជាសេចក្ដីជំនឿដើម្បីធ្វើឲ្យដំណឹងល្អរបស់ព្រះយេស៊ូវគ្រីស្ទក្លាយជាផ្លូវនៃជីវិតរបស់យើង និងជាសេចក្ដីជំនឿដើម្បីមកស្គាល់ « ដ៏ជាព្រះពិតតែមួយ នឹងព្រះយេស៊ូវគ្រីស្ទ ដែល [ ទ្រង់បាន ] ចាត់ឲ្យមកផង ( យ៉ូហាន ១៧:៣ ) » ។
( ឌី ថត គ្រីស្តូហ្វឺសិន « The Blessing of Scripture » Liahona ខែ ឧសភា ឆ្នាំ ២០១០ ទំព័រ ៣៤ )
-
តើពរជ័យមួយណាដែលបានលើកឡើងដោយអែលឌើរ គ្រីស្តូហ្វឺសិន ដែលអ្នកទទួលបទពិសោធន៍តាមរយៈការសិក្សាព្រះគម្ពីររបស់អ្នក ?
-
តើខគម្ពីរអ្វីខ្លះដែលបានបង្កើនសេចក្តីជំនឿរបស់អ្នកទៅលើព្រះវរបិតាសួគ៌ និងព្រះយេស៊ូវគ្រីស្ទ ? តើសេចក្ដីពិតដែលបានបង្រៀននៅក្នុងខគម្ពីរទាំងនេះបានជួយអ្នកបង្កើនសេចក្ដីជំនឿរបស់អ្នកយ៉ាងដូចម្ដេច ?
ខណៈស្ត្រី និងបុរសជាច្រើននៅក្រុងថែស្សាឡូនីចបានជឿ ហើយបានប្រែចិត្តជឿតាមរយៈការបង្រៀនរបស់ប៉ុល ក៏មានអ្នកផ្សេងទៀតបានបង្កើតក្រុមមនុស្សអាក្រក់ដើម្បីប៉ុនប៉ងចាប់ប៉ុល និងស៊ីឡាសដែរ ( សូមមើល កិច្ចការ ១៧:៤–៥ ) ។ ប៉ុល និងស៊ីឡាសអាចរត់គេចពីក្រុមមនុស្សអាក្រក់ ហើយទៅក្រុងបេរា ដែលនៅជិតនោះ ជាកន្លែងដែលពួកលោកបន្តផ្សព្វផ្សាយ ។
សូមអាន កិច្ចការ ១៧:១០–១២ ដោយរកមើលរបៀបដែលប្រជាជននៅបេរាបានទទួលប៉ុល និងស៊ីឡាស ។ សូមពិចារណាគូសចំណាំពាក្យ ឬឃ្លានានាដែលអ្នកមានអារម្មណ៍ថាសំខាន់ ។
-
តើការសិក្សាព្រះគម្ពីរប្រចាំថ្ងៃបានជួយប្រជាជនទាំងនេះដោយរបៀបណា ?
សេចក្តីពិតមួយដែលអាចស្វែងរកចេញពីដំណើររឿងនេះគឺ ៖ ការសិក្សាព្រះគម្ពីរជាទៀងទាត់ អាចរៀបចំយើងឲ្យស្គាល់ និងជឿលើសេចក្តីពិត ។ សូមពិចារណាបន្ថែមសេចក្តីពិតនេះទៅក្នុងបញ្ជីក្នុងសៀវភៅកំណត់ហេតុការសិក្សារបស់អ្នក ៖
សូមគិតអំពីរបៀបដែលការសិក្សាព្រះគម្ពីរជាទៀងទាត់អាចជួយអ្នកក្នុងស្ថានភាពដូចខាងក្រោមនេះ ៖
-
គ្រូរបស់អ្នកម្នាក់នៅសាលាពន្យល់អំពីគោលគំនិតដែលផ្ទុយនឹងជំនឿរបស់អ្នក ។
-
មិត្តភក្តិរបស់អ្នកមួយចំនួនលើកទឹកចិត្តអ្នកឲ្យមានអាក្បកិរិយាដែលផ្ទុយនឹងបទដ្ឋានរបស់អ្នក ដោយការនិយាយថា « គ្រាន់តែធ្វើម្តងនោះវាមិនអីទេ » ។
-
នៅក្នុងសន្និសីទទូទៅ សាវកបង្រៀនអ្វីមួយដែលប្រឆាំងនឹងនិន្នាការបច្ចុប្បន្ននៃពិភពលោកនេះ ។
ពរជ័យផ្សេងទៀតពីការសិក្សាព្រះគម្ពីរ
សេចក្តីពិតដែលអ្នកបានរកឃើញក្នុង កិច្ចការ ១៧ បង្ហាញតែពរជ័យមួយចំនួនដែលយើងអាចទទួលបានតាមរយៈការសិក្សាព្រះគម្ពីរប៉ុណ្ណោះ ។
សូមចំណាយពេលពីរបីនាទីដើម្បីសិក្សាវគ្គបទគម្ពីរមួយចំនួន ឬទាំងអស់ដូចខាងក្រោម ដោយរកមើលពរជ័យផ្សេងទៀតដែលយើងអាចទទួលបានពីព្រះ ដោយការសិក្សាព្រះបន្ទូលរបស់ទ្រង់ និងពាក្យសម្ដីរបស់ព្យាការីរបស់ទ្រង់ដូចដែលមាននៅក្នុងព្រះគម្ពីរ ។ សូមបន្ថែមការយល់ដឹងរបស់អ្នកទៅនឹងបញ្ជីក្នុងសៀវភៅកំណត់ហេតុការសិក្សារបស់អ្នក ។
២. នៅក្នុងសៀវភៅកំណត់ហេតុការសិក្សារបស់អ្នក សូមឆ្លើយសំណួរខាងក្រោមនេះ ៖
-
តើអ្វីដែលលេចធ្លោសម្រាប់អ្នកពីបញ្ជីដែលអ្នកបានបង្កើត ?
-
តើពរជ័យមួយណាចេញពីបញ្ជីរបស់អ្នក ដែលអ្នកចង់ទទួលបានបទពិសោធន៍ច្រើនជាងគេនៅពេលនេះ ? ហេតុ ?
-
តើអ្នកអាចធ្វើអ្វីខ្លះ ដើម្បីធ្វើឲ្យការសិក្សាព្រះគម្ពីររបស់អ្នកក្លាយជាបទពិសោធន៍កាន់តែមានតម្លៃ និងកាន់តែពិសិដ្ឋ ?
-
តើពរជ័យអ្វីខ្លះដែលអ្នកបានដកបទពិសោធន៍តាមរយៈការសិក្សាព្រះបន្ទូលរបស់ព្រះជាទៀងទាត់នៅក្នុងព្រះគម្ពីរ ?
ដាក់ផែនការ
ជាផ្នែកមួយនៃការចូលរួមរបស់អ្នកនៅក្នុងថ្នាក់សិក្ខាសាលា នោះអ្នកត្រូវបានអញ្ជើញឲ្យបង្កើតគោលដៅដែលទាក់ទងនឹងការសិក្សាព្រះគម្ពីរប្រចាំថ្ងៃរបស់អ្នក ។ សូមចំណាយពេលបន្តិចដើម្បីវាយតម្លៃការរីកចម្រើនរបស់អ្នកទាក់ទងនឹងគោលដៅនេះ ហើយធ្វើការកែសម្រួលតាមតម្រូវការ ដើម្បីជួយអ្នកឲ្យកាន់តែជោគជ័យនៅពេលអ្នកឆ្ពោះទៅមុខ ។
៣. ដើម្បីជួយអ្នកវាយតម្លៃពីការរីកចម្រើនរបស់អ្នក សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្វីទៅជាគោលដៅសិក្សាព្រះគម្ពីរដែលអ្នកបានបង្កើតសម្រាប់ខ្លួនអ្នក ?
-
តើគោលដៅនេះជួយអ្នកឲ្យមានបទពិសោធន៍កាន់តែមានន័យជាមួយនឹងការសិក្សាព្រះគម្ពីរផ្ទាល់ខ្លួនដោយរបៀបណា ?
-
តើអ្នកត្រូវការកែតម្រូវអ្វីខ្លះ ?
ជម្រើស ៖ តើចង់រៀនសូត្របន្ថែមទៀតទេ ?
តើការសិក្សាព្រះគម្ពីរប្រចាំថ្ងៃ នឹងទទួលបានពរជ័យអ្វីផ្សេងទៀតឬទេ ?
និយាយអំពីការអានព្រះគម្ពីរមរមនប្រចាំថ្ងៃ ប្រធាន រ័សុល អិមណិលសុនបានសន្យាដូចតទៅ ៖
បងប្អូនប្រុសស្រីជាទីស្រឡាញ់របស់ខ្ញុំអើយ ខ្ញុំសូមសន្យាថា ពេលបងប្អូនសិក្សាព្រះគម្ពីរមរមន រាល់ថ្ងៃ ប្រកបដោយការអធិស្ឋាន នោះបងប្អូននឹងធ្វើការសម្រេចចិត្តដែលប្រសើរ—រៀងរាល់ថ្ងៃ ។ ខ្ញុំសូមសន្យាថា ពេលអ្នកសញ្ជឹងគិតនូវអ្វីដែលអ្នកសិក្សា នោះបង្អួចស្ថានសួគ៌នឹងបើកឡើង ហើយអ្នកនឹងទទួលចម្លើយចំពោះសំណួរផ្ទាល់ខ្លួន និងការដឹកនាំសម្រាប់ជីវិតអ្នកផ្ទាល់ ។ ខ្ញុំសូមសន្យាថា ពេលអ្នកសិក្សាព្រះគម្ពីរមរមនរាល់ថ្ងៃ អ្នកអាចត្រូវបានការពារឲ្យផុតពីអំពើអាក្រក់នៃថ្ងៃនោះ ជំងឺដ៏ធំនៃរូបអាសគ្រាម និងការញៀនផ្សេងទៀតដែលធ្វើឲ្យគំនិតស្ពឹក ។
( ប្រធាន រ័សុល អិម ណិលសុន « The Book of Mormon: What Would Your Life Be Like without It? » Liahona ខែ វិច្ឆិកា ឆ្នាំ ២០១៧ ទំព័រ ៦២–៦៣ )
ប្រធាន ដាល្លិន អេក អូកបានប្រៀបធៀបព្រះគម្ពីរទៅនឹង យូរីម និង ធូមីម ដែលយើងអាចប្រើដើម្បីទទួលវិវរណៈពីព្រះអម្ចាស់ ៖
យើងមិននិយាយហួសហេតុពេកនោះទេ នៅពេលយើងនិយាយថាព្រះគម្ពីរអាចជា យូរីម និង ធូមីម ដើម្បីជួយយើងម្នាក់ៗឲ្យទទួលបានវិវរណៈផ្ទាល់ខ្លួននោះ ។
ដោយសារយើងជឿថា ការអានព្រះគម្ពីរអាចជួយយើងឲ្យទទួលបានវិវរណៈ នោះយើងត្រូវបានលើកទឹកចិត្តឲ្យអានព្រះគម្ពីរម្ដងហើយម្ដងទៀត ។ ដោយមធ្យោបាយនេះ យើងមានសិទ្ធិទទួលបាននូវអ្វីដែលព្រះវរបិតាសួគ៌របស់យើងសព្វព្រះហឫទ័យឲ្យយើងដឹង និងធ្វើនៅក្នុងជីវិតរបស់យើងសព្វថ្ងៃនេះ ។ នោះគឺជាហេតុផលមួយដែលពួកបរិសុទ្ធថ្ងៃចុងក្រោយជឿលើការសិក្សាព្រះគម្ពីរ ប្រចាំថ្ងៃ ។
( ដាល្លិន អេក អូក « Scripture Reading and Revelation » Ensign ខែ មករា ឆ្នាំ ១៩៩៥ ទំព័រ ៨ )