Ang kinabuhi ni John mahimong lahi unta kaayo kon wala pa siya nagbaton og kaisog sa pagbiya sa usa ka party usa ka gabii didto sa Japan.
Nangandoy ka ba nga makalingkawas sa mga tintasyon nga imong giatubang? Si Apostol Pablo mitudlo og usa ka bililhon nga baroganan nga mahimong makatabang kanato kon kita mag-atubang sa tintasyon. Kini nga leksiyon gituyo aron matabangan ka nga mosalig kang Jesukristo aron mabuntog ang tintasyon.
Tintasyon
Imahe
Pilak nga mga Bolitas Gihigop Ngadto sa Pula nga Magnet sa Asul nga Palibot
Kon mahimo, pagkuha og usa ka magnet ug usa ka puthaw nga butang ug paghunahuna mahitungod kon unsaon nimo sila paggamit aron ipasabot ang konsepto sa pagsukol sa tintasyon.
Basaha ang mosunod nga pamahayag ni Elder Ulisses Soares sa Korum sa Napulog Duha ka Apostoles o tan-awa ang bidyo nga “Pagtinguha kang Kristo sa Matag Hunahuna” gikan sa time code nga 2:44 hangtod sa 3:23, nga anaa sa ChurchofJesusChrist.org.
Imahe
Elder Ulisses Soares, Korum sa Napulog Duha ka Apostoles opisyal nga hulagway.
Sa sambingay nga pagkasulti, ang pagtugyan ngadto sa tintasyon susama sa pagduol ngadto sa magnet nga may dala nga puthaw. Ang dili makita nga pwersa sa magnet mobira sa puthaw ug hugot nga motapot niini. Ang magnet mawad-an lamang og pwersa niana nga butang kon ang puthaw ipalayo gikan niini. Busa, sama nga ang magnet walay gahom sa pagpwersa sa puthaw nga layo ra niini, samtang atong suklan ang mga tintasyon, kini magkaluya og mawad-an og gahom diha sa atong pangisip ug kasingkasing ug, ingon man, sa atong mga buhat.
Sa imong pagtuon sa 1 Mga Taga-Corinto 10, paminaw sa mga pag-aghat gikan sa Espiritu Santo nga motabang kanimo nga makahibalo unsa ang imong mabuhat aron mabatokan ang mga tintasyon nga imong giatubang.
Usa sa mga katuyoan sa mga kasulatan mao ang pagtabang kanato nga makat-on gikan sa mga kinabuhi ug mga pagpanglimbasog niadtong mga nahauna (tan-awa ang 1 Mga Taga-Corinto 10:6, 11; Mormon 9:31). Sa natala sa 1 Mga Taga-Corinto 10, si Pablo migamit sa ehemplo sa mga Israelita nga milabang sa Pula nga Dagat ug mipanaw sa kamingawan samtang siya mipahinumdom sa Mga Taga-Corinto sa mga paagi nga ang Ginoo nag-uban sa mga Israelita diha sa ilang pagpanaw (tan-awa ang 1 Mga Taga-Corinto 10:1–4).
Matikdi unsa ang gibuhat sa Ginoo alang sa mga Israelita ug ang titulo nga gigamit sa paghulagway Kaniya sa bersikulo 4.
Unsa ang imong makat-onan mahitungod sa Manluluwas gikan sa titulo nga gigamit ni Pablo sa bersikulo 4?
Bisan pa sa milagrosong mga paagi sa pagsuporta sa Ginoo sa mga Israelita, may mga panahon nga sila nagpadala sa tintasyon. Basaha ang 1 Mga Taga-Corinto 10:5–11, nga mangita sa mga tintasyon nga maoy hinungdan nga ang mga Israelita mitalikod gikan sa ilang “espirituhanong Bato,” nga si Jesukristo.
Sa imong hunahuna sa unsa nga mga paagi nga ang atong mga kahimtang nahisama sa kadtong sa mga Israelita?
Unsa ang komon nga mga tintasyon nga giatubang sa kabatan-onan nga lagmit maoy hinungdan nga sila motalikod gikan sa Manluluwas?
Paghunahuna mahitungod sa mga tintasyon nga imong giatubang karon ug sa unsang paagi kini adunay potensyal aron ikaw motalikod gikan sa “Bato,” nga si Jesukristo. Pamalandongi kon sa unsang paagi maapektohan ang imong kinabuhi kon ikaw makabuntog niining mga tintasyon.
Ang Manluluwas motabang kanato nga mabuntog ang tintasyon
Hinumdomi nga ang matintal dili usa ka sala apan ang pagpadala sa tintasyon mao ang sala. Basaha ang 1 Mga Taga-Corinto 10:12–14, nga mangita sa mga baroganan nga makatabang kanimo sa pagbuntog sa tintasyon.
1. Tubaga ang mosunod nga mga pangutana diha sa imong journal sa pagtuon:
Unsa ang gisaad sa Dios nga Iyang buhaton aron matabangan ka nga mabuntog ang tintasyon?
Unsa nga mga pulong ug hugpong sa mga pulong niini nga mga bersikulo ang naghulagway unsa ang gilaoman sa Dios nga atong buhaton kon kita mag-atubang sa tintasyon?
Unsa nga mga baroganan ang imong nakit-an?
Ikaw lagmit makaila og usa ka baroganan sama sa ang Dios maghatag og usa ka paagi alang kanato aron makalingkawas sa tintasyon, apan kita gikinahanglang mopili nga ipalayo ang atoang kaugalingon gikan sa tintasyon.
Sa tibuok nga mga kasulatan ug pinaagi sa Iyang modernong mga propeta, ang Manluluwas nagtudlo kanato unsaon pagbuntog sa tintasyon. Basaha ang mosunod nga mga kasulatan ug propetekanhong pamahayag, nga mangita sa unsa ang imong mabuhat aron moduol sa Manluluwas ug molingkawas sa tintasyon. Mahimo nimo silang i-link ngadto sa 1 Mga Taga-Corinto 10:12–14.
Mga Hebreo 4:15–16 (Hinumdomi: ang pangulong pari nga gihisgotan niini nga mga bersikulo mao si Jesukristo)
Si Presidente Henry B. Eyring sa Unang Kapangulohan:
Imahe
Opisyal nga Litrato ni Presidente Henry B. Eyring nga gikuha niadtong Marso 2018.
Ang atong hugot nga pagtuo ni Jesukristo modala nato ngadto sa paghinulsol ug ngadto sa pagsunod sa Iyang kasugoan. Magmasulundon kita ug mohiklin sa mga tintasyon pinaagi sa pagsunod sa mga pag-aghat sa Espiritu Santo. Moabot ang panahon nga ang atong kinaiya mausab. Kita mahisama sa usa ka gamayng bata, masulundon sa Dios ug labaw ka mahigugmaon. Kana nga kausaban, kon buhaton nato ang tanan sa paghupot niini, angay sa pagdawat sa mga gasa nga moabot pinaagi sa Espiritu Santo. Unya, kita mahimong luwas diha sa bugtong nga tinuod nga sukaranan.
(Henry B. Eyring, “Sama sa usa ka Gamayng Bata,” Liahona, Mayo 2006, 16)
Unsa ang imong nakat-onan gikan niini nga mga kasulatan ug niini nga pamahayag nga nakapadasig kanimo sa pagduol ngadto sa Manluluwas aron makalingkawas sa tintasyon?
Unsa ang pipila sa mga paagi nga ang Dios maghatag og usa ka paagi sa paglingkawas sa tintasyon?
Unsa ang atong mabuhat aron maila ug magamit ang mga paglingkawas nga giandam sa Dios?
Kompletoha ang duha o labaw pa sa mosunod:
Isulat og balik ang 1 Mga Taga-Corinto 10:14, nga isal-ot ang imong ngalan human sa “akong hinigugma,” ug pulihi og usa ka tintasyon nga imong giatubang ang “pagsimba og mga dios-dios.”
Pagrekord og usa ka kasinatian diin ang Manluluwas nakatabang kanimo nga makalingkawas sa tintasyon. Sa unsang paagi nga kini nga kasinatian makatabang kanimo sa paglingkawas sa imong kasamtangan nga mga tintasyon?
Pagrekord og piho nga mga lakang nga imong buhaton aron mosalig kang Jesukristo ug pakigbatokan ang tintasyon nga imong giatubang.
Tubaga ang mosunod nga mga pangutana. Dili nimo kinahanglang ipakigbahin ang imong piho nga mga tintasyon.
2. Tubaga ang mosunod nga mga pangutana diha sa imong journal sa pagtuon. Dili nimo kinahanglang ipakigbahin ang imong piho nga mga tintasyon.
Unsa ang imong nakat-onan o nabati mahitungod sa Manluluwas diha sa imong pagtuon sa 1 Mga Taga-Corinto 10?
Sa unsang paagi kini makatabang kanimo nga makalingkawas sa mga tintasyon nga imong giatubang?
Opsiyonal: Gustong Makakat-on Pa og Dugang?
Sa unsang paagi nga si Jesukristo ug ang Espiritu Santo makatabang kanako sa pagbuntog sa tintasyon?
Si Elder Ulisses Soares sa Korum sa Napulog Duha ka Apostoles mitudlo:
Imahe
Elder Ulisses Soares, Korum sa Napulog Duha ka Apostoles opisyal nga hulagway.
Ang pagpakigbatok sa tintasyon nagkinahanglan og tibuok kinabuhi nga kakugi ug kamatinud-anon. Apan palihog sayri nga ang Ginoo andam nga moabag kanato sa atong personal nga mga paningkamot ug nagsaad og maanindot nga mga panalangin kon kita molahutay hangtod sa kataposan. …
Hinigugma kong mga kaigsoonan, ako mopamatuod nga kon kita mosalig sa lig-on nga sukaranan sa kaluwasan, ang Manluluwas sa atong mga kalag, … ang atong abilidad sa pagkontrol sa atong mga hunahuna madugangan pag-ayo. Ako mopaniguro kaninyo nga ang atong espiritwal nga kahamtong molambo sa magkadugang nga gikusgon, mousab sa atong mga kasingkasing, mohimo kanato nga mas sama ni Jesukristo. Dugang pa, ang impluwensiya sa Espiritu Santo mahimong mas hugot ug makanunayon diha sa atong kinabuhi. Dayon ang mga tintasyon sa kaaway, sa hinayhinay, mawad-an og gahom [batok] kanato, moresulta sa usa ka mas malipayon ug mas putli ug mapahinungoron nga kinabuhi.
Alang niadtong kinsa, sa bisan unsa nga rason, nadala sa tintasyon ug nagpuyo sa dili matarong nga mga buhat, ako mopasalig kaninyo nga adunay paagi aron makabalik, ug adunay paglaom diha ni Kristo.
Si Elder Quentin L. Cook sa Napulog Duha ka Apostoles mitudlo:
Imahe
Opisyal nga litrato ni Elder Quentin L. Cook. Gitawag ngadto sa Korum sa Napulog Duha ka Apostoles niadtong 6 sa Oktubre 2007.
Ang baroganan sa mahangtorong pag-uswag mao nga ang pagpugong sa kaugalingon ug ang pagpuyo nga matarong makapalig-on sa atong abilidad sa pagbatok sa tintasyon. Tinuod kini sa espiritwal o sa temporal nga mga butang. …
Isip kabahin sa balaang plano sa Dios, gipanalanginan kita og gasa sa Espiritu Santo. … Siya usab ang tingog nga mopasidaan batok sa daotan ug tingog nga manalipod batok sa peligro. Kon magsuhid kita sa kadagatan sa kinabuhi, ang pagsunod sa mga pag-aghat sa Espiritu Santo mahinungdanon. Ang Espiritu motabang nato nga malikay sa mga tintasyon ug mga peligro, ug mohupay ug mogiya kanato latas sa mga hagit.
Unsaon nako pagpangandam daan aron makalingkawas sa tintasyon?
Si Presidente Spencer W. Kimball (1895–1985) mitudlo:
Imahe
Gipintura nga hulagway ni Presidente Spencer W. Kimball.
Ang husto nga mga desisyon maoy pinakasayon nga himoon kon gipangandaman na natong daan, uban sa pinakamahinungdanong mga tumong sa hunahuna, makapawala kini sa daghang kabalaka sa panahon sa pagdesisyon, kon kapuyon ug gitintal kita og maayo. …
Palamboa ang pagdisiplina sa kaugalingon aron, [magkadugay], dili ka na mag-usab-usab sa desisyon nga imong pagabuhaton kon mag-atubang ikaw sa mao gihapon nga pagtintal [sa matag-karon ug unya]. Kinahanglan nga kausa ra ikaw modesisyon sa usa ka butang! …
Ang panahon sa pag-undang sa daotang mga buhat mao ang sa wala pa [kini] magsugod. Ang sekreto sa maayong kinabuhi anaa diha sa pagpanalipod ug pagpugong. Kadtong kinsa misunod sa daotan sa kasagaran mao kadtong mibutang sa ilang mga kaugalingon sa makuyaw nga kahimtang.
(Mga Pagtulon-an sa mga Presidente sa Simbahan: Spencer W. Kimball [2006], 137–138)
