Faamalologa, saunia e J. Kirk Richards

4

Soifua Manuia Faaletino ma Faalelagona

4.0

Faatomuaga

O se misiona e mafai ona faafiafiaina ma faaatuatuvaleina. O tulaga faatonuina i lenei vaega ma i le Fetuunaiga i le Olaga Faafaifeautalai mo Auaunaga o le a fesoasoani e saunia ai lou mafaufau ma le tino e auauna atu ai ma le atoatoa i le Alii. Iloilo e le aunoa nei tulaga faatonuina i lau misiona atoa.

4.1

Soifua Manuia Faaletino

E taua lou soifua maloloina ma le saogalemu. Faatumau lou soifua maloloina lelei ina ia mafai ona e auauna atu ma lou loto, manatu, mafaufau, ma le malosi atoa.

O oe ma lou aiga e nafa ma pili mo togafitiga faafomai. O asiasiga i le fomai po o isi tagata tomai faapitoa faafomai e tatau ona faatulagaina mamao ma ou taitai.

4.1.1

Taiala Lautele o Taumafa Maloloina

Faamolemole ia faaaoga taiala lautele nei o taumafa maloloina, faatasi ai ma ni nai fetuunaiga faaletagata pe a manaomia:

• Inu ia lava vai i aso taitasi. Atonu o le a e manaomia le tele o le suavai ma le masima pe afai o le a e afu pea lava pea i le gasologa o le aso po o le taimi o faamalositino.

• Taumafa meaai paleni ia e aofia ai fualaau faisua, fualaau aina, fatu laau atoatoa, gao maloloina, ma polotini.

• Faatapulaa meaai e le maloloina, faguinu kaponeti, meaai gaosi, ma meaai mai faleaiga.

• Mulimuli i fautuaga mai lou fomai faapitoa e faatatau i meaai faapitoa, vailaau, po o isi auala maloloina faapitoa e fetaui ma ou manaoga.

4.2

Faamalositino

O le faamalositino e fesoasoani e faatumau ai lou malosi ma fesoasoani e aveesea ai le atuatuvale. Ia avea le faamalositino o se vaega o lou soifuaga pe a talafeagai ma ou tulaga.

4.3

Soifua Maloloina Faalelagona

O le galuega faafaifeautalai e mamafatu. O lagona atuatuvale mai lea taimi i lea taimi o se mea masani. E mafai ona e saunia lou tino ma le mafaufau ia sili atu ona lelei le taulimaina o le atuatuvale e ala i le faaaoga lelei o le lagolago a le aiga. E mafai foi ona e saunia e ala i le faataitaia o ni faiga masani o le taumafa i meaai maloloina, faamalositino e le aunoa, moe i le taimi tatau ai, malolo lelei, ma gaoioiga faaleagaga (e aofia ai le tatalo, mafaufau loloto, ma suesuega).

I lau misiona atoa, faaaoga le Fetuunaiga i le Olaga Faafaifeautalai mo Auaunaga e fesoasoani ia te oe e pulea ai lou atuatuvale. Afai e te lagona e faigata ona e taulimaina le atuatuvale, pe afai foi e faafuasei ona e maua i aafiaga o le mafaufau, faafesootai ou taitai misiona mo auaunaga.

Afai ua tusia atu ni au fualaau mo le popole po o se isi tulaga po o gasegase, mulimuli i le talavai ma faatonuga a lou fomai.

4.4

Tausiga Faafomai

Taulima ma le faaeteete lou soifua maloloina faaletino ma faalelagona. Ia mautinoa e te maua soo se lagolago e moomia mai ou matua po o tagata e vaaia oe mo soo se mataupu faafomai (e pei o fualaau o loo e inuina, afaina e afua i meaai ma le siosiomaga, po o gaoioiga e tatau ona e aloese ai). E mafai foi ona e faasoa atu faamatalaga faapitoa faafomai i ou taitai misiona mo auaunaga ma ou taitai o gaoioiga.

Afai e faafuasei ona e maua i ni aafiaga faalesoifua maloloina, ia vave ona fai ni gaoioiga masani e faaaoga lelei i ai le mafaufau mo lou saogalemu po o se tausiga lelei. Valaau le auaunaga o faalavelave faafuasei o le lotoifale (e pei o le 911 i le Iunaite Setete o Amerika) sei vagana na tuuina atu ia te oe nisi o faatonuga. I se vave e mafai ai, faafesootai ou taitai o le misiona mo auaunaga.

Afai e te manaomia tausiga faalesoifua maloloina e le o se faalavelave faafuasei, vave valaau ou matua po o tagata e vaaia oe. O le a latou tau atu ia oe le mea e fai. Taumafai ia faatulaga mamao taimi o isi tausiga faafomai e le o se faalavelave faafuasei ina ia le faalavelaveina ai ou tofiga ma taimi faatulagaina faafaifeautalai.

4.5

Tulaga Matautia ma Lamatia

E tele tulaga matautia e mafai ona aloese mai ai e ala i le faaaoga o le faautautaga lelei ma le usitaia lelei o tulaga faatonuina faafaifeautalai. Ae peitai, e ono taumafai tagata e osofai oe e tusa lava po o le a lou taumafai ina ia saogalemu lelei. Afai o i ai se faafitauli, lipoti vave loa i se tasi o ou taitai misiona mo auaunaga.

Vave aluese pe afai e te lagona le le mautonu e uiga i se nofoaga, tagata, po o se tulaga. Faalogo i musumusuga faaleagaga.

4.6

Fale

Fesoasoani e tausia le fale o lou aiga ma fai au feau masani. Tausia ia mama ma manaia lou potu. Tausia au meatotino patino, e aofia ai masini faaeletonika, i se tulaga lelei.

4.7

Femalagaaiga

Ia mulimulitaia e le aunoa tulafono o le alatele i le lotoifale, tulafono, ma tiute pe a e femalagaai. Pe a e aveina se taavale, ia alu ma le saogalemu.

O femalagaaiga lautele e masani lava ona taugofie atu nai lo o le malaga i taavale. Ia mafaufau e faaaoga auala o femalagaaiga lautele mo le malaga atu ma le toe foi mai au galuega i le misiona.

Faaaoga le faautautaga lelei, ia nofouta i lou siosiomaga, ma ia faamasani i lau eria. Mulimuli i tulaga faatonuina lautele o le saogalemu o loo i totonu o lenei tusitaulima.

4.7.1

Aveina o Taavale

Pe a faatagaina i tulaga i le aiga, e mafai ona e aveina lau lava taavale po o le taavale a le aiga i le agai atu i ou tofiga ma gaoioiga i le misiona. O faifeautalai mo auaunaga e nafa ma le totogiina uma o tau o femalagaaiga, e aofia ai le penisini, tausia o taavale, ma le inisiua.

O le matafaioi a faifeautalai auauna atu ma o latou aiga le taulimaina o ni lamatiaga faaletagata lava ia pe a faafoeina taavale. E le aveina e faifeautalai mo auaunaga ia taavale e patino i le Ekalesia ao auauna atu i le misiona. O fuafuaga mo aoaoga faamasani e manaomia pe afai e te aveina ni taavale a faalapotopotoga ma auaunaga alofa i taimi o ou tofiga i le auaunaga.

4.8

Tupe Po o Teugatupe a le Tagata Lava Ia

E fautuaina oe ina ia faasoasoa ma le faautauta au tupe patino. Ia manatua pea aoaoga faavae o le totogiina o le sefuluai ma taulaga ma au faaputuga tupe patino.

O tupe e te faaaluina i le taimi o lau misiona o se faailoga o osigataulaga a oe, lou aiga, ma isi. Aua le faatauanauina tupe mo ou lava manaoga tautupe pe mo faalapotopotoga o loo e tautua ai.

4.9

Faalavelave

Afai e te aafia i se faalavelave faafuasei tautaavale ao e agai atu po o le toe foi mai ou tofiga faafaifeautalai, fonotaga, po o konafesi, valaau leoleo po o auaunaga o faalavelave faafuasei pe a manaomia. I se vave e mafai ai, ia faafesootai foi lou aiga. Ona faafesootai lea o ou taitai misiona mo auaunaga ma taitai o tofiga.

Afai e te aafia i se faalavelave faafuasei tautaavale ao e auauna atu i ou tofiga faafaifeautalai, talanoa i lou taitai mo auaunaga o le nofoaga. O lena tagata o le a ia faafesootaia leoleo po o auaunaga o faalavelave faafuasei pe a manaomia. I se vave e mafai ai, faafesootai foi ou taitai o le misiona mo auaunaga ma lou aiga. O le a faafesootai foi e lou peresitene o le siteki lou aiga.

4.10

Foliga Vaaia o Faifeautalai mo Auaunaga

O le auala e te faailoa atu ai oe lava o se faifeautalai e aafia ai le auala e mafaufau ai tagata e uiga ia te oe ma le Ekalesia a le Alii ma atonu o le a fesoasoani e puipuia ai oe mai le faamanualia. O ou foliga vaaia e masani lava ona tuuina atu ai se savali muamua lava i isi e uiga ia te oe, ma e tatau ona lagolagoina ai mea e te tautala ai ma faia.

O le faaaogaina o laei ma teuga talafeagai o se tomai taua lea i le olaga o le a fesoasoani foi ia oe pe a maea lau misiona. Laei lavalava e talafeagai ma ou tofiga o auaunaga ma fetaui ma lou valaauga paia.

4.10.1

Mo Faifeautalai Uma

Tausisia lou lava mama ma le tumama. Taele ma faamalū i aso taitasi. Fufulu e le aunoa ou nifo. Faaaoga fagumanogi. Fufulu mama ou lima i taimi uma, ae maise lava i taimi e uma ai ona faaaoga le faleui. Tausia le mamā o ou lavalava, ia fonofono lelei, ma ia tumama. Aua lava nei faatagaina ou foliga vaaia po o amio e tosina ese ai lou mafaufau mai lou valaauga.

Ia faatumauina se tulaga faatonuina maualuga o le tauagafau. Aloese mai lavalava:

• E fufusi tele pe ‘ō‘ō tele foi

• E valavala i soo se itu

• E tosina atu ai le vaai i soo se itutino

• E maanuminumi, palapalā, pe ua matafi

Faaali le faaaloalo i le Alii ma oe lava ia i le laeiina o laei talafeagai mo fonotaga a le Ekalesia ma gaoioiga, ae maise lava i sauniga faamanatuga.

4.10.2

Mo Alii Faifeautalai

• Lauulu. Tofu lou lauulu e le aunoa. Ia tausia ma ia talafeagai le pupuu. O isi faiga po o sitaili, e pei o le faatutu i luga o lauulu, faamigimigi, po o le valiina o le lauulu, e le talafeagai. O kalafa e le tatau ona maualalo ifo ma le ogatotonu o le taliga. E tatau ona sele mamā lau ava e aunoa ma ni lauulu i foliga i aso taitasi sei vagana o ni aiaiga faapitoa mai fomai.

• Teuga Feilafi. Aua nei faia ni tautaliga po o ni asoa. E le faatagaina ni tautaliga tui i isu ma le tino. Afai e i ai ni au pe’a, e tatau lava ona ufiiufi i tulaga e mafai ai.

4.10.3

Mo Tuafafine

• Lauulu. Tofu lou lauulu e le aunoa. O sitaili, vali, ma le uumi o lou lauulu e le tatau ona tosina i ai.

• Teuga. O teuteu feilafi ma isi teuga e tatau ona faatauvaa ma tauagafau. Aua nei faia le sili atu ma le tasi le tautaliga i taliga taitasi. E le faatagaina ni tautaliga tui i isu ma le tino. Afai e i ai ni au pe’a, e tatau lava ona ufiiufi i tulaga e mafai ai. O vali i foliga, mea teu i lauulu, ma vali atigilima ma atigivae e tatau ona talafeagai.