Tausiga mo e le Tagolima i o Tatou Aiga

2

Faatulagaga ma Gaoioiga a Faifeautalai mo Auaunaga

2.0

Faatomuaga

Ua fetalai mai le Alii, “Ia outou faatulaga outou lava ma tofi i tagata taitoatasi lana mea-tausi” (Mataupu Faavae ma Feagaiga 104:11). O le vaega lenei o le tulaga faatonuina faafaifeautalai o loo faamatala ai le faatulagaga o le misiona mo auaunaga O loo faamatala ai foi le auala sili e mafai ona e auauna ai i isi i le alofa mama o Keriso a o auai ai i tofiga ma gaoioiga faafaifeautalai mo auaunaga (tagai Moronae 7:44-47).

O le faaupuga taitai o faifeautalai e faasino lea i faifeautalai o i ai valaauga faaletaitai, e pei o taitai itu ma taitai tamaitai. O le faaupuga taitai o le misiona mo auaunaga e faasino i taitai ua i ai tiutetauave o aso taitasi mo oe ma isi faifeautalai i lau eria atofaina (tagai 2.1.1).

I lenei tusitaulima o faaupuga peresitene o le siteki, epikopo, siteki, ma le uarota e faatatau foi i peresitene o itu, peresitene o paranesi, itu, ma paranesi taitasi.

2.1

Taitaiga o le Misiona mo Auaunaga

O lau matafaioi sili ona taua, po o le a lava le valaauga faaletaitai, o le avea lea ma faifeautalai faamaoni ma tuuto. O le a faamanuiaina oe pe a e mulimuli i fautuaga mai ou taitai ma ao e atiaea ni sootaga alofa ma i latou.

2.1.1

Taitai Misiona mo Auaunaga

E faamanuia e le Alii Ana faifeautalai e ala i le valaauina o se ulugalii e faamisiona mo auaunaga e taitaia i latou. E auauna faatasi atu ou taitai misiona mo auaunaga ma isi ou taitai i lalo o le taitaiga a taitai perisitua i le lotoifale. Ua valaauina ma vaetofia i latou e le Atua e taitai faifeautalai mo auaunaga i lau eria atofaina. Latou te alolofa ia te oe, auauna ia te oe, ma fesoasoani ia te oe e faataunuu lou faamoemoega o se faifeautalai. O le galulue faatasi ai ma lou peresitene o le siteki, o le a latou fesoasoani e faailoa avanoa o auaunaga mo oe. Latou te fesoasoani e atiae ma fetuunai au faatulagaga faafaifeautalai ma ou tofiga. Latou te faia foi mea nei:

• Feiloai ma faatalatalanoa oe e le aunoa.

• Iloilo ma lagolago lou alualu i luma.

• Lagolago ma faamalosiau ia te oe.

• Faalogo atu i ou atugaluga, tali i au fesili, ma tuu atu ni fautuaga.

• Faaaoga musumusuga ma faaaliga e fesoasoani ia te oe ia manuia ao avea ai o se faifeautalai.

I le aotelega, ua ia i latou se tiutetauave o aso taitasi o le galulue faatasi ma oe ina ia mafai ona e maua se aafiaga o lau misiona e fai ai ae suiga tele o lou olaga.

A i ai sau faatalatalanoaga ma taitai misiona mo auaunaga, atonu e te valaaulia ou matua po o se isi faifeautalai lagolago o i ai e auai faatasi i le faatalanoaga. O lau filifiliga e valaaulia se tasi e faatasi ma oe o le a le faaitiitia ai le alofa, popole, po o le faamemelo o ou taitai misiona mo auaunaga ia te oe.

2.1.2

Peresitene o le Siteki

Ona o oe o se tagata o le siteki, ua i ai i le peresitene o le siteki le tiutetauave faaleperisitua mo oe. O le galulue vavalalata ma taitai misiona mo auaunaga, na te faatulagaina tulaga faamoemoeina faaleagaga ma faaleamio o lau misiona ma faamaonia se tu masani o aafiaga faafaifeautalai mo lau auaunaga.

O lou peresitene o le siteki e nafa ma faatalatalanoaga o tulaga o le agavaa. Na te faamautinoa ua e mulimuli i tulaga faatonuina o le misiona mo auaunaga. O le fefautuaai ma taitai misiona mo auaunaga, na te iloiloina ai ou taimi faatulagaina ma tofitofiga. I le mae’a ai o lau misiona, o le a ia faamalolo oe ma faafetai atu mo lau auaunaga faafaifeautalai.

I nisi tulaga, e faafaigata ai ona feiloai e le aunoa le peresitene o le siteki ia te oe ona o le vavamamao o nofoaga. Pe afai o lea, e mafai ona ia tofia se tagata tomai faapitoa i le siteki po o isi taitai perisitua e galulue vavalalata ma taitai misiona mo auaunaga e lagolago oe ma fesoasoani e faamautinoa ua i ai sou aafiaga e suia ai le olaga i lau misiona.

2.1.3

Faatulagaga o le Taitaiga o Misiona mo Auaunaga

E faaaoga e ou taitai misiona mo auaunaga ia musumusuga ma faaaliga e faatulaga ai le galuega. E mafai ona latou tofia ni faifeautalai e avea ma taitai i le eria a faifeautalai mo auaunaga (e pei o taitai itu po o taitai tamaitai). E mafai foi ona talosagaina oe e taitai pe tuuina atu ni aoaoga faamasani i lau vaega po o tofiga i alalafaga.

2.1.4

Tiutetauave o Taitai Faifeautalai

O taitai faifeautalai, e faapei o faifeautalai uma, e mulimuli i le fautuaga a Iesu Keriso e “auauna atu i le [Atua] ma o [latou] loto atoa, mafaufau atoa, manatu atoa, ma le malosi atoa” ma ia “manatua le faatuatua, amiomama, poto, faautauta, onosai, agalelei faaleuso, amio-atua, alofa mama, lotomaulalo, filiga” (Mataupu Faavae ma Feagaiga 4:2, 6). O tofiga faaletaitai e le faailoa ai ni aloaia faapitoa po o le maoae, pe faailoa mai ai le agavaa o se faifeautalai.

O taitai faifeautalai e i ai la latou matafaioi e:

• Fai se faataitaiga o tulaga faatonuina mo amioga a faifeautalai (tagai mataupu 3).

• E pei ona faatonuina e taitai misiona mo auaunaga, fesoasoani e aoao faamasani isi faifeautalai.

• Alofa ma faauo i isi faifeautalai.

• Fesoasoani i isi faifeautalai ia iloa le taua o a latou taumafaiga.

• Faalogo atu i atugaluga o isi faifeautalai ma fefaasoaai ma taitai misiona mo auaunaga ia manaoga.

• Lipoti atu a latou matafaioi faaletaitai i taitai misiona mo auaunaga.

• I lalo o le taitaiga a taitai misiona mo auaunaga, fesoasoani e faatulaga ma taitai konafesi, fonotaga, ma gaoioiga.

E faapei o faifeautalai uma, e ao i alii ma tamaitai faifeautalai o i ai valaauga faaletaitai ona faataitai i le taitaiga faaKeriso. Afai o amioga a se tasi o faifeautalai, e aofia ai taitai faifeautalai, e le talafeagai ma poloaiga ma tulaga faatonuina mo faifeautalai, faatalanoa le mataupu ma na o ou taitai misiona mo auaunaga ae le o isi faifeautalai, matua, po o uo.

2.1.5

Tiutetauave Patino

“Faalautele [lou] tofiga i le Alii” (Iakopo 1:19), ia ola tutoatasi faaleagaga, ma “faia mo [oe lava]” (2 Nifae 2:16) e ala i le faatuatua i le Alii ma le mulimuli i le Agaga.

Afai e i ai ni au fesili po o atugaluga:

• Faaaoga le aoaoga e “suesue i ai i lou mafaufau; ona … ao lea ona e ole mai ia te a’u pe ua sa’o” (Mataupu Faavae ma Feagaiga 9:8).

• Saili le taitaiga e ala i faaaliga patino, tatalo, ma suesuega o tusitusiga paia (aemaise le Tusi a Mamona), aoaoga a perofeta soifua, ma tulaga faatonuina faafaifeautalai mo auaunaga.

Talanoa ma lou epikopo po o le peresitene o le siteki e uiga i tulaga o le agavaa. Talanoa ma ou taitai misiona mo auaunaga e uiga i atugaluga o le saogalemu mo le taimi nei, e aofia ai le faasaua, faatautala, po o isi faafitauli.

Atonu e i ai ni taimi o lau misiona o le a faigata ai ona e taulai i lau galuega auauna ona o luitau o i ai nei, mataupu patino pe faaleaiga, pe o ni aafiaga foi mai taimi ua tuanai. Aua nei faatuai le faasoa atu o ou popolega i ou taitai misiona mo auaunaga.

Manatua le valaaulia a le Faaola: “Vaai mai ia te a’u i mafaufauga uma; aua le masalosalo, aua le fefefe. Matau i manuʼa ua tuia ai loʼu itu, ma tulaga fao foi i oʼu lima ma oʼu vae; ia faamaoni, tausi i aʼu poloaiga, ma o le a oulua mautofi ai i le malo o le lagi. Amene” (Mataupu Faavae ma Feagaiga 6:36–37).

2.2

Auauna Atu Faatasi

Mai lea taimi i lea taimi, atonu o le a tofia faatasi oe ma nisi faifeautalai i se nofoaga se tasi. I le avea ai o ni faifeautalai e auauna atu faatasi, e tatau ona outou:

• Lotogatasi i le galuega ma auauna atu e faapei ona faia e le Faaola.

• Lagolago le tasi i le isi i le soifua manuia faaleagaga, faalelagona, ma le faaletino.

• Ia nofouta i le saogalemu o le tasi ma le isi ao galulue faatasi ai.

• Ia tali atu le tasi i le isi i le tausia o tulaga faatonuina o le misiona mo auaunaga.

2.2.1

Soa

O taitai misiona mo auaunaga e mafai ona atofaina ni soa ia faaleleia atili faatulagaga o suesuega o le talalelei ma sootaga lautele i le taimi o lou aafiaga i le misiona. E mafai ona tofia ni soa i nofoaga o galuega faamisiona, i nofoaga e galulue ai, pe mo gaoioiga o auaunaga faapitoa.

Ia manatua mea nei ao e fegalegaleai faatasi ma isi faifeautalai auauna atu:

• Alofa, faaaloalo, ma faamalosiau i isi faifeautalai.

• Ia lotomaualalo ma iloa le malosiaga o le tasi ma le isi.

• Tausi le tasi i le isi e faapei ona e manao e tausia ai oe.

• Aloese mai faitioga ma finauga, ma ia aloaia le lelei i isi faifeautalai.

• Aloese mai le tautala e faaleaga ai isi i isi faifeautalai mo auaunaga, tagata o le Ekalesia, po o aiga ma uo .

Afai e te matauina ni tulaga po o uiga le talafeagai, talanoa i ou taitai misiona mo auaunaga.

2.3

Fonotaga, Konafesi, ma Aufono

I le avea ai o ni faiefautalai, tou te fefautuaai faatasi ao e mauaina ma tuuina atu aoaoga faamasani ma ao e fuafua ma faatulaga lau auaunaga. O fonotaga, konafesi ma aufono e tatau ona valaaulia ai le Agaga o le Alii ma e tatau ona avea o se taimi mo musumusuga ma faaaliga (tagai Mataupu Faavae ma Feagaiga 6:32). O le faapotopoto ai o ni faifeautalai o le a tuuina atu ai foi ia oe se avanoa e lagolago ai le tasi ma le isi ma olioli faatasi ai (tagai Mataupu Faavae ma Feagaiga 43:8; 50:22).

O fonotaga e faatulagaina e taitai faifeautalai, i lalo o le taitaiga a taitai misiona mo auaunaga, e aofia ai:

• Fonotaga masani a le itu

• Fonotaga faalevaiaso pe faalemasina

• O Konafesi

• Fonotaga faaletaitai

2.4

Galuega Atofaina ma Taimi Faatulagaina

Ia faamaoni ma filiga i le mulimuli i ou tofiga ma faatulagaga o lau misiona.

2.4.1

Tofiga Faapitoa

Ua valaauina oe e le Alii o se faifeautalai. Ua tofia oe e auauna i se misiona ua filifilia faapitoa mo au taleni, tomai ma meaalofa. I le taimi o lau misiona, e mafai ona e auauna i tofiga eseese, e aofia ai i faalapotopotoga o auaunaga alofa ua faamaonia, faalapotopotoga, faatinoga a le Ekalesia, malumalu, ma avanoa ua atofa mai e siteki mo auaunaga.

E mafai ona e auauna atu i le silia ma le tasi le nofoaga i le aluga o le vaiaso. I nofoaga taitasi, o le a e lipoti atu i se taitai o lē o le a saunia le aoaoga faamasani, meafaigaluega, ma lagolago oe i mea e manaomia e faataunuu ai ou tiutetauave. Ia taunuu i lou tofiga i le taimi e tatau ai ma ia saunia lelei e auauna atu. Ia faatuatuaina ma faamoemoeina. Ia mulimuli ma le faaeteete ma le atoatoa i taitaiga mai ou taitai. Faia le mea sili e te mafaia e saofaga ai i le galuega i auala anoa. Avea o se faatosinaga lelei ma uunaia i latou e te auauna i ai ma fefaasoaai. Galue saogalemu, ma taumafai ia alualu i luma i taimi uma.

2.4.2

Fesiitaiga o Tofiga

I le galulue vavalalata ai, e mafai e lou peresitene o le siteki ma taitai misiona mo auaunaga ona fetuunai ou tofiga auauna atu i le aluga o lau misiona.

2.4.3

Taimi Faatulagaina o Aso Taitasi

I le galulue vavalalata ai, o ou taitai misiona mo auaunaga, faatasi ai ma ou manatu faaalia, o le a fatuina ai taimi faatulagaina o aso taitasi a faifeautalai. O lou peresitene o le siteki o le a faamaonia taimi faatulagaina. O lenei taimi faatulagaina e mafai ona aofia ai galuega ma gaoioiga ia e i lalo o vaega o atinaega:

• Faaleagaga

• Faaleagafesootai

• Faaletino

• Faaleatamai

Ia tumau ai ma faatuatuaina i le mulimuli ai i ou taimi faatulagaina faafaifeautalai. O le a aumaia ia te oe e lenei mea le tuputupu ae atili, olioli, ma faamanuiaga faaleagaga i le taimi o lau auaunaga faafaifeautalai.

O au taimi faatulagaina o aso taitasi e mafai ona aofia ai:

• Faatuina ma iloiloina o au sini o auaunaga faafaifeautalai.

• Saunia lelei ma ia faamaeaina ou tofiga i aso taitasi.

• O le suesueina o tusitusiga paia (aemaise lava le Tusi a Mamona), aoaoga a perofeta soifua ma aposetolo, Fetuunai i le Olaga Faafaifeautalai Auauna Atu, vaega talafeagai o le Tala’i La’u Talalelei, ma isi punaoa faamaoniaina. (Tagai i le 2.4.5.)

2.4.4

Faataitaiga o Taimi Faatulagaina o Aso Taitasi

Faatasi ai ma ou taitai ma matua po o tagata o loo vaaia oe, fai se faatulagaga lautele tusitusia o taimi. Faaaofia lou taimi i tofiga ma taimi e te faaaogaina ai lou faitalia e fuafua pe faapefea ona e auauna atu, faaleleia, ma le tuputupu ae (e ta’ua “itula o le faitalia”). Iloilo ma mulimuli i lau fuafuaga i aso taitasi.

O le taimi faatulagaina o aso taitasi mo lau misiona e ono foliga faapenei.

Taeao:
[taimi amata]	Ala i luga ma tatalo.
[taimi amata]	Faamalositino mo le 30 minute. (Talatalanoa ma lau fomai faapitoa o le soifua maloloina i mea e sili ona lelei mo lou soifua maloloina faaletino ma tulaga o i ai.)
[taimi amata]	Faamālū, taumafataga o le taeao, ma faamae’a tapenaga mo le aso.
[taimi amata]	Auai i faigalotu po o suesuega o tusitusiga paia.
[taimi amata]	Ia taunuu i lou tofiga i le taimi e tatau ai. (Auai i se sauniga tatalo po o se faigalotu ao lei faia lau auaunaga pe afai na i ai se auaunaga na faatulagaina.)
Aoauli:
[taimi amata]	Taumafataga o le aoauli.
[taimi amata]	Auauna atu seia mae’a le taimi atofaina o lou tofiga.
Afiafi:
[taimi amata]	Taumafataga o le afiafi.
[taimi amata]	Mulimuli i lau fuafuaga o gaoioiga patino mai lau fuafuaga faatulagaina o aso taitasi. E tatau ona aofia ai ma se itula o suesuega o le talalelei faaletagata lava ia. E tatau foi ona aofia ai ma taimi e alu ai i le malumalu, vasega inisitituti, gaoioiga a le YSA, ma feau a le aiga.
[taimi amata]	Ia tusia i lau api o talaaga ou lagona ma aafiaga taua.
[taimi amata]	Sauni e moe. Tatalo ma alu loa e moe.

E tusa lava pe e te le o auauna atu i lau eria na atofaina, o oe lava o se faifeautalai. O au amioga, ou mafaufauga, ma faatinoga e tatau lava ona atagia ai lou tulaga o se faifeautalai.

2.4.5

O Vasega o Suesuega ma Isi Faifeautalai mo Auaunaga

Pe a talafeagai ai, suesue faatasi ma se isi faifeautalai mo auaunaga. E mafai e ou taitai misiona mo auaunaga ona tofia se tasi e te lua toalua. O lenei paga suesue e mafai ona faia faafesagai pe i luga o le initoneti.

Taulai atu i tusitusiga paia (aemaise lava le Tusi a Mamona), aoaoga a perofeta soifua, Fetuunai i le Olaga Faafaifeautalai Auauna Atu, vaega talafeagai o le Tala’i La’u Talalelei, ma le tulaga faatulagaina o auaunaga faamisiona. O nei punaoa ua faamaonia e mafai ona faamalosia ai lou malamalama ma le molimau o le talalelei toefuataiina a Iesu Keriso ma fesoasoani ai ia te oe e saunia e faamalieina manaoga o i latou e te auauna atu i ai.

2.5

O Mea e Tutupu, Gaoioiga, ma Sauniuniga i fafo atu o Tofiga o Auaunaga

O ou taimi faatulagaina faafaifeautalai e mafai ona aofia ai se taimi o le vaiaso e taulai atu ai i ou manaoga patino ma sauniuniga, e pei o feau i le fale, avanoa e vaai ai le fomai, taimi ma le aiga, ma mea faafiafia. E mafai ona aso atoa po o se vaega o le aso. “Ia faatulaga tatau outou lava, ia saunia mea manaomia uma, ma faatu se fale, o … se fale o le faatulagaga tatau” (Mataupu Faavae ma Feagaiga 109:8).

Faamolemole ia manatua lapataiga fetaui tonu lava nei a le Alii: “Aua le momo’e televave atu pe galue sili atu nai lo le malosi ua ia te oe” (Mataupu Faavae ma Feagaiga 10:4), ma “vave momoe, ina ia outou le vaivai; alapo a’e, ina ia olaola o outou tino ma o outou mafaufau” (Mataupu Faavae ma Feagaiga 88:124). O le faaaoga o ni nai minute e malolo lelei ai ma saunia oe lava, o le a fesoasoani e faamalosia ai lou gafatia e auauna ai i isi.

2.6

Gaoioiga o le Aso Sapati

Fuafua gaoioiga o le Sapati e fesoasoani ia te oe e faataunuu ai le faamoemoega o lau misiona e fesoasoani i isi ia o mai ia Keriso e ala i le auauna atu ia i latou e pei ona faia e le Faaola. Ia manatua le aoaoga a le Alii e uiga i le aso Sapati i le Mataupu Faavae ma Feagaiga 59:13-19.

O le galulue faatasi ai ma ou taitai misiona mo auaunaga, e mafai ai e ou taitai perisitua i le lotoifale ona tuuina atu ia oe se tofiga i le uarota po o le siteki lea e le faalavelavea ai ou taimi faatulagaina o le misiona po o tofiga. E mafai foi ona e galue o se uso po o se tuafafine mo auaunaga.

2.7

Auaunaga i le Alalafaga

O se tasi o auala e aoao ai e avea o se soo o Iesu Keriso o le auauna atu lea e faapei ona sa Ia faia. O le a fesoasoani ou taitai misiona mo auaunaga e faailoa avanoa mo oe e auauna atu ai i isi ma le alalafaga, “ina ia mafai ona outou aoaoina, pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17).

E ao ona e auauna atu ma le manao faamaoni e fesoasoani atu i isi, e aunoa ma le manatu i se taui. Ia manatua, e lei valaauina oe e aoao le talalelei i au upu. E ala i au faataitaiga o auaunaga faaKeriso, e faaalia ai lou alofa mo le Atua. Aua nei faia ni talaiga ao e auauna atu i ni faalapotopotoga o auaunaga alofa.

O tofiga faapitoa e manaomia ai ni aoaoga faaopoopo po o le vaavaaia. Sei vagana ua tuuina atu e le faalapotopotoga o auaunaga alofa se fuafuaga o aoaoga faamasani faapitoa i ou taitai misiona mo auaunaga, e le tatau ona e auai i soo se gaoioiga e le faatagaina mea nei:

• Fegalegaleai ma tamaiti po o tagata talavou matutua e afaina gofie.

• Faaaogaina o masini, meafaigaluega, po o taavale

• Taulimaina o soo se tupe po o meatotino

• Tuuina atu o se manatu faaalia faapolofesa