Le Auala i Emau, saunia e J. Kirk Richards

6

Faamae’aina o Lau Misiona

6.0

Faatomuaga

Saunia nei loa oe lava e faaauau ona ola lou olaga o se soo o Iesu Keriso ma o se tagata faatuatua o Le Ekalesia a Iesu Keriso o le Au Paia o Aso e Gata Ai pe a faamaloloina oe. E ui ua faamae’aina lau auaunaga faamisiona, o le a faaauau lava ona e faataunuina le misiona o lou olaga.

6.1

Fesootai Pea Lava Pea

Faaauau ona fesootai ma i latou sa e auauna atu i ai ma galulue faatasi i lau misiona, e aofia ai ou taitai o le misiona mo auaunaga. Lagolago ma faamalosia i latou e ala i au upu ma faataitaiga. Patipatia mea taua na tutupu i o latou olaga.

6.2

Faaiuina o Lau Misiona

Talu ai o loo avea pea oe o se faifeautalai seia faamaloloina oe e lou peresitene o le siteki, ua faamoemoeina oe e mulimuli i tulaga uma faafaifeautalai seia oo i lena taimi.

6.3

Auaunaga ma le Soifua Tuputupu Ae ina ua Mae’a Lau Misiona

Pe a mae’a lau misiona, faaauau ona ola ai pea i tulaga faatonuina o le talalelei. Ia mautinoa e te:

• Tatalo ma suesue i le talalelei i aso uma.

• Auai ma faatasi atu i lau uarota masani po o se uarota a talavou matutua nofofua.

• Sailia avanoa e auauna atu ai i le malumalu.

• Faaauau ona saili avanoa e auauna atu ai i isi.

• Auai i le inisitituti po o isi vasega o aoaoga faalelotu.

• Saili avanoa mo aoaoga, aoaoga faamasani, ma galuega.

Ola ina ia e maua le aafiaga o le ituaiga olioli o loo faamatalaina i le Tusi a Mamona ina ua feiloai Alema le Itiiti ma uso a faifeautalai mulimuli ane i le olaga:

“Ma o lenei sa oo ina aʼo malaga atu Alema mai le laueleele o Kitiona agai i le itu i saute, e alu ese atu i le laueleele o Maneti, faauta, sa ofo o ia, i lona feiloai ma atalii o Mosaea, o malaga atu agai i le laueleele o Saraʼemila. …

“O lea sa olioli tele Alema i le vaai atu i ona uso; ma o le mea na faatele atili ai lona olioli, ona sa avea pea i latou ma ona uso i le Alii; ioe, ma sa latou matua malolosi i le malamalama o le upumoni; ona o i latou o ni alii mafaufau lelei ma sa latou suesue i tusitusiga paia ma le filiga, ina ia latou iloa le afioga a le Atua.

“Ae sa le ona pau lea; sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o valoaga, ma le agaga o faaaliga, ma a latou aoao atu, sa latou aoao atu ma le mana ma le pule mai le Atua” (Alema 17:1–3).