Fakamatala Fakalahi 2
Fakahinohino ki Hono Faʻu ʻo ha Ngaahi Ako Fakataukei Lahi Ange
ʻI hoʻo fakakaukau ki he ngaahi fiemaʻu ʻa e niʻihi ʻi hoʻo kalasí, te ke lava ʻo ʻiloʻi ha taukei ʻokú ke ongoʻi ʻoku mahuʻinga ka ʻoku ʻikai aleaʻi ia ʻi he ʻū naunau ko ʻeni ʻo e kalasí. ʻOku ʻoatu ʻe he tohi fakahinohino ko ʻení ha sīpinga te ke lava ʻo fakaʻaongaʻi ke faʻu ʻaki ha ngaahi ako fakataukei lahi ange maʻa hoʻo kalasí.
Ngaahi Konga Mahuʻinga ki he Ako Fakataukeí
ʻOku ʻi ai ha konga ʻe fā ʻo e fokotuʻutuʻu ki he ako fakataukei takitaha: (1) fakaʻuhingaʻi, (2) fakatātaaʻi, (3) ako fakahoko, mo e (4) fakaʻaongaʻi. ʻE lava ke tokoni atu ʻa e ngaahi fakahinohino ko ʻení ke ke fakakau ʻa e ngaahi konga mahuʻinga ko ʻení ki ha ngaahi ako fakataukei kehe ʻokú ke faʻu maʻa hoʻo kalasí.
Fakaʻuhingaʻí
Fakafeʻiloaki e taukeí ki hoʻo kalasí. Ke fai ʻení, te ke lava ʻo:
-
Fakaafeʻi e kau akó ke nau laukonga fekauʻaki mo e taukeí ʻi hono fakamatalaʻi ʻi he Malanga ʻAki ʻEku Ongoongoleleí pe Ko e Fakaangaanga ki he Moʻui Fakafaifekaú.
-
Fakanounouʻi ‘a e taukeí ‘i hoʻo lea pē ‘aʻau.
Fakapapauʻi ke ʻoua naʻa fakaʻaongaʻi ha taimi lahi ʻi he konga ko ʻeni ʻo e ako fakataukeí. ʻE fakapapauʻi heni ʻoku maʻu ʻe he kau akó ha taimi feʻunga ke akoako ai.
Fakatātaaʻi
Hili hono fakaʻuhingaʻi ʻo e taukeí, fakaʻaliʻali ki he kau akó ʻa e founga ke fakaʻaongaʻi ʻa e taukeí. Ke fai ʻení, te ke lava ʻo:
-
Fakatātaaʻi ʻa e taukeí ʻi muʻa ʻi he kalasí.
-
Fakaafeʻi ha tokotaha ako ke mateuteu kimuʻa ke fakatātaaʻi ʻa e taukeí ki he kalasí.
-
Fakaʻaongaʻi ha foʻi vitiō ʻoku ʻasi ai ha sīpinga ʻo ha taha ʻokú ne fakatātaaʻi ʻa e taukeí.
Ako Fakahoko
ʻOange ki he kau akó ha taimi ke akoako ai ʻa e taukeí. ʻE lava ke nau fakahoko ʻeni mo hanau hoa pe ʻi ha fanga kiʻi kulupu iiki. Kapau ʻe lava, fakaafeʻi ke nau akoako tuʻo lahi. Te ke lava ʻo fakaafeʻi ke nau akoako mo ha hoa kehe pe kulupu kehe ʻi he taimi kotoa pē.
Fakaʻaongaʻí
Fakaafeʻi e kau akó ke nau faʻu ha palani fekauʻaki mo e founga te nau akoako fakahoko ai e taukei ko ʻení ʻi tuʻa mei he kalasí. Fakakaukau ke toe vakaiʻi ia ʻi he ngaahi lēsoni he kahaʻú.