Lēsoni 2

Talateu ki he Malanga ʻAki ʻEku Ongoongoleleí

Kau faifekau ʻoku nau ako ʻa e Malanga ʻAki ʻEku Ongoongoleleí

Ko e “Malanga ʻAki ʻEku Ongoongoleleí ko ha maʻuʻanga tokoni mahuʻinga ia, ʻo ʻikai ki he kau faifekaú pē, ka ki he kau mēmipa kātoa ʻo e Siasí” (Malanga ʻAki ʻEku Ongoongoleleí [2023], ix). ʻE lava ke tokoni ʻa e maʻuʻanga tokoni fakalaumālie ko ʻení ke fakahoko ʻe he kau faifekaú ʻenau taumuʻa ʻo e fakaafeʻi ha niʻihi kehe ke haʻu kia Kalaisí. ʻE toe lava foki ʻo tokoni ke tau ōmai ʻo ofi ange ki he Fakamoʻuí pea mo mahino lelei ange ʻa ʻEne tokāteliné.

Vakaiʻi mo Muimuiʻi

Taki fealēleaʻakí: Fakaafeʻi ʻa e kau akó ke nau fakakaukau ki haʻanau ngaahi feinga kimuí ni ke fakaʻaongaʻi ʻa e meʻa ʻoku nau ako ʻi he kalasi ko ʻení. Te ke ala fakaafeʻi kinautolu ke vahevahe ha niʻihi ʻo ʻenau ngaahi ngāué mo hanau hoa pe fakakātoa ko ha kalasi.

‘Ekitivitī Ako ʻOku Fokotuʻu Atú

ʻE tāpuekina fēfē ʻeku moʻuí ʻi hono ako e Malanga ʻAki ʻEku Ongoongoleleí?

Ako

Taki fealēleaʻakí: Fakaʻaliʻali ha fakatātā ʻo e Malanga ʻAki ʻEku Ongoongoleleí, pe hiki ki ʻolunga ha tatau moʻoni ke mamata ki ai ʻa e kalasí. Fakaafeʻi ha niʻihi tokosiʻi ʻo e kau mēmipa ʻo e kalasí ke nau vahevahe ʻa e meʻa ʻoku nau ʻilo fekauʻaki mo iá pe ko e hā ha ngaahi aʻusia kuo nau maʻu ʻi heʻenau ako iá.

Taki fealēleaʻakí: Fakamatalaʻi ange ʻe ako lahi ange ʻa e kau mēmipa ʻo e kalasí ʻi he lēsoni ko ʻení ki he Malanga ʻAki ʻEku Ongoongoleleí. Fakamatalaʻi ʻa e ngaahi fakahinohino ko ʻení.

Te ke lava ʻo huluʻi ʻa e foʻi vitiō “Ko e Fakafeʻiloaki ʻe Palesiteni Lāsolo M. Nalesoni ʻo e Tohi Fika Ua ʻo e Malanga ʻAki ʻEku Ongoongoleleí” (2:58) kae ʻoua ʻe fakaʻaongaʻi ʻa e fakamatala ʻa Palesiteni Nalesoní.

Ako ʻa e “Pōpoaki ʻa e Kau Palesitenisī ʻUluakí” (Malanga ʻAki ʻEku Ongoongoleleí, v) mo e fakamatala ko ʻeni meia Palesiteni Lāsolo M. Nalesoní. Tokanga ki he founga ʻe lava ke tāpuekina ai koe ʻi hono ako e Malanga ʻAki ʻEku Ongoongoleleí.

ʻOku ʻi he Malanga ʻAki ʻEku Ongoongoleleí ha niʻihi ʻo e ngaahi fakahinohino lelei taha kuo faifaiangé peá u mamata ai ke tokoni ke tali ʻe he kakaí ʻa e fakaafe ʻa e ʻEikí ke haʻu kiate Iá.

ʻOku ou fakaafeʻi koe ke ke fiefia ʻi he faitokonia hoʻo fakamoʻoní ʻoku lava ke fai ʻe he tohi fakamuimui taha ʻo e Malanga ʻAki ʻEku Ongoongoleleí. Te ke ongoʻi ʻa e faingamālie ke tokoni ki heʻetau Tamai Hēvaní ʻi Heʻene ngāue māʻoniʻoní. ʻI hoʻo ako mo fakaʻaongaʻi e ngaahi akonaki mei he pulusinga hono ua ʻo e Malanga ʻAki ʻEku Ongoongoleleí, mei he folofolá, pea mei he kau palōfita moʻuí, ʻe tāpuekina koe. ʻE fakatupulaki hoʻo fakamoʻoní. ʻE tupulekina hoʻo malava ko ia ke vahevahe e ongoongolelei ʻa e Fakamoʻuí.” (ʻI he D. Todd Christofferson, Fakaʻaongaʻi ʻa e Mālohi ʻo e Tohi ʻa Molomoná. [lea naʻe fai ʻi he seminā ki he kau taki fakamisiona foʻoú, 23 Sune 2023], Gospel Library)

Ko e hā ha ngaahi tāpuaki kuo palōmesi naʻe mahuʻinga kiate koe? Ko e hā hono ʻuhingá?

Ako Fakahoko

Ko e Hā ʻoku ʻi he Malanga ʻAki ʻEku Ongoongoleleí?

Tau pehē ʻoku fiemaʻu ʻe he kau taki ʻo homou uōtí ke tokoniʻi ʻa e toʻu tupú ke nau kamata ako mei he Malanga ʻAki ʻEku Ongoongoleleí. Naʻa nau fanongo ʻokú ke kau ʻi ha kalasi teuteu ngāue fakafaifekau, pea kuo nau fakaafeʻi koe ke ke teuteu ha vakai fakalūkufua miniti ʻe tolu ke vahevahe mo e toʻu tupú.

Teuteuʻi ʻa e vakai fakalūkufua ko ʻení ʻaki hano lekooti hoʻo tali ki he ngaahi fehuʻí ni mo fakakakato ʻa e ʻekitivitī ko ʻení. Fakaʻilongaʻi ʻa e ngaahi fakamatala mei he Malanga ʻAki ʻEku Ongoongoleleí ʻoku tokoni ke tali ʻa e ngaahi fehuʻi ko ʻení.

Ko e hā ʻa e Malanga ʻAki ʻEku Ongoongoleleí? (vakai, “Pōpoaki ʻa e Kau Palesitenisī ʻUluakí” [Malanga ʻAki ʻEku Ongoongoleleí, v]; “Talateu ki he Malanga ʻAki ʻEku Ongoongoleleí” [Malanga ʻAki ʻEku Ongoongoleleí, vii–ix]).
ʻE lava fēfē ʻe he ako ʻo e Malanga ʻAki ʻEku Ongoongoleleí ʻo tokoniʻi koe mo e niʻihi kehé ke mou haʻu ʻo ofi ange ki he Tamai Hēvaní mo Sīsū Kalaisi? (vakai, “Fakaʻaongaʻi ʻo e Malanga ʻAki ʻEku Ongoongoleleí ʻe he Kāingalotu ʻo e Siasí” Malanga ʻAki ʻEku Ongoongoleleí, ix).

Takimamataʻi ʻi he Malanga ʻAki ʻEku Ongoongoleleí ʻaki haʻo fai ʻa e ngaahi meʻa ko ʻeni:

Kumi ʻa e “Talateu ki he Malanga ʻAki ʻEku Ongoongoleleí,” pea vakai ki he ngaahi meʻa mahuʻinga ʻoku fakaʻilongaʻi ʻoku nau fakamatalaʻi ʻa e founga ʻoku fokotuʻutuʻu ai ʻa e Malanga ʻAki ʻEku Ongoongoleleí (vakai, peesi vii.
Vakaiʻi ʻa e vahe 3 ke ʻiloʻi ʻa e meʻa ʻoku akoʻi ʻe he kau faifekaú. Lau ʻa e ʻuluaki palakalafi ʻe nimá (ʻi he peesi 25), pea vakaiʻi vave leva ʻa e ngaahi lēsoni ʻe fā ʻi he toenga ʻo e vahé.
Fili ha taha ʻo e ngaahi vahe ko ʻení ke vakaiʻi: 1, 2, 4, 5, pe 6. Lau ʻa e ngaahi ʻuluʻi tohi fakaʻilongaʻi mataʻāʻā ʻo e vahé.
Makatuʻunga ʻi he meʻa naʻá ke maʻu ʻi he Malanga ʻAki ʻEku Ongoongoleleí, ko e hā ʻokú ke ongoʻi ʻoku ʻaonga taha ke vahevahe ʻi hoʻo vakai fakalūkufuá?

Taki fealēleaʻakí: Ka hili ʻa e taimi ki he teuteú, fakaafeʻi ʻa e kau mēmipa ʻo e kalasí ke vahevahe ʻenau vakai fakalūkufuá mo ha hoa. Ka hili e vahevahe ʻenau ngaahi vakai fakalūkufuá, te ke ala fai ange ha fehuʻi hangē ko ʻení:

ʻE lava fēfē ke tokoniʻi koe ʻe he ako faivelenga ʻo e Malanga ʻAki ʻEku Ongoongoleleí fakataha mo e folofolá ke ke ʻunu ʻo ofi ange ki he Tamai Hēvaní mo Sīsū Kalaisi?

Fokotuʻu ha taumuʻa

Taki fealēleaʻakí: ʻOange ha taimi ki he kau mēmipa ʻo e kalasí ke fakakaukau ai ki he meʻa kuo nau akó pea mo fokotuʻu ha ngaahi taumuʻa. Te ke lava ʻo fakaʻaliʻali ʻa e ngaahi meʻa ko ʻení ke tokoni kiate kinautolu:

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha niʻihi ʻo e ngaahi fakakaukau ko ʻení, pe ko ha fakakaukau pē ʻaʻau.

Fakapapauʻi ʻa e founga te ke fakaʻaongaʻi ai ʻa e Malanga ʻAki ʻEku Ongoongoleleí ko ha konga ʻo hoʻo ako ʻa e ongoongoleleí.
Ako ha lēsoni ʻe taha pe lahi ange ʻoku akoʻi ʻe he kau faifekaú ʻi he vahe 3 ʻo e Malanga ʻAki ʻEku Ongoongoleleí.

Ko ʻeku taumuʻá

Te u … (ngāue te ke faí).
Te u lavaʻi ʻeku taumuʻá ʻaki … (ha kiʻi palani faingofua).

Taki fealēleaʻakí: Kapau ʻoku ʻi ai ha kulupu ʻa e kau akó ke vahevahe mo kinautolu ʻenau ngaahi taumuʻá, ʻoange ha taimi ke nau vahevahe ai ʻa e founga te nau fepoupouaki pe fefakamanatuʻaki aí kimuʻa ʻi he kalasi hokó.

Taimi Hono Hokó

Taki fealēleaʻakí: Kapau ʻokú ke mateuteu ke akoʻi ʻa e lēsoni 3 ʻi he taimi ka hokó, fakakaukau ke fakaafeʻi ʻa e kau mēmipa ʻo e kalasí ke nau ako ʻa e vahe 1 ʻo e Malanga ʻAki ʻEku Ongoongoleleí ʻi heʻenau teuteú. Mahalo te ke fie ʻave foki ha fakamanatu kiate kinautolu.

Ko e Hā ʻOku ʻI he Malanga ʻAki ʻEku Ongoongoleleí?