“Talateu ki he Malanga ʻAki ʻEku Ongoongoleleí,” Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí (2023)
“Talateú,” Malanga ʻAki ʻEku Ongoongoleleí
Talateu ki he Malanga ʻAki ʻEku Ongoongoleleí
ʻOku fakahinohinoʻi ʻe he ʻEikí ʻEne kau tamaioʻeikí “ke malanga ʻaki ʻeku ongoongoleleí ʻi he Laumālié, ʻio ʻa e Fakafiemālie ʻa ia naʻe fekauʻi atu ke akoʻi ʻa e moʻoní” (Tokāteline mo e Ngaahi Fuakava 50:14).
ʻOku fokotuʻutuʻu ʻa e Malanga ʻAki ʻEku Ongoongoleleí ke tokoni atu ʻi he fakahoko hoʻo ngaahi taumuʻa ko e faifekaú. ʻOku nofo taha ki he ngaahi ngaahi meʻa ʻoku fiemaʻu ʻi he ngāue fakafaifekaú. ʻOku ʻikai ke ne tali ʻa e fehuʻi kotoa pē pe ʻoatu ha fakahinohino ki he tūkunga kotoa ʻokú ke fepaki mo iá. Ka, ʻoku hoko ia ko ha maʻuʻanga tokoni mahuʻinga ke tupulaki ho ivi fakalaumālié mo e meʻa te ke lavá. Ako mo fakaʻaongaʻi ʻa e tokāteline mo e ngaahi tefitoʻi moʻoni ‘o e ongoongoleleí ʻoku maʻu ʻi he folofolá pea ʻi he tohi ko ʻení.
ʻOku fokotuʻutuʻu ʻa e Malanga ʻAki ʻEku Ongoongoleleí ke tokoni atu ʻi he ngaahi founga ko ʻení:
-
ʻAi ke mahino hoʻo taumuʻa ko e faifekaú
-
ʻIlo mo akoʻi ʻa e tokāteliné
-
Tupulekina ʻi hoʻo fakalakalaka fakalaumālié mo e ului fakafoʻituituí
-
Fakatupulaki hoʻo malava ke fakaafeʻi mo faitokonia ʻa e kakaí ke nau maʻu ʻa e ongoongolelei kuo fakafoki maí.
Toutou ako maʻu pē ʻa e ngaahi vahé ʻi hoʻo ngāue fakafaifekaú. Vakavakaiʻi hoʻo ngāué. Fokotuʻu ha ngaahi taumuʻa pea faʻu ha ngaahi palani ke fakahoko ai kinautolu. Ko e kau faifekau ʻoku nau teuteu fakaʻaho mo fakalakalaka maʻu peé te nau tāpuekina e moʻui ʻa kinautolu ʻoku nau akoʻi mo tokoniʻí. Te nau toe maʻu foki mo ha ngaahi tāpuaki ʻi heʻenau moʻuí.
Ngaahi Faingamālie ke Ako mo Moʻui ʻAkí
ʻE tokoni hoʻo ako fakalelei ʻi hoʻo ngāue fakafaifekaú ke ke fakaivia hoʻo fakamoʻoni ki he ongoongoleleí mo hoko ko ha ākonga faivelenga ange ʻa Sīsū Kalaisi.
ʻE tokoni hono ako ʻa e folofolá mo e Malanga ʻAki ʻEku Ongoongoleleí ke ke faiako ʻaki e mālohi fakalaumālie. ʻE tokoni atu foki ke ke fakafenāpasi hoʻo faiakó ki he ngaahi fiemaʻu ʻa e fakafoʻituituí.
Ko e ako ʻoku mahuʻingá mo e faingamālie akó ʻoku kau ai ʻa e:
-
Ako fakafoʻituituí.
-
Ako faka-hoá.
-
Ngaahi vilo hoá.
-
Ngaahi fakataha alēlea fakavahé.
-
Ngaahi konifelenisi fakasouní.
-
Fakataha alēlea ʻa e kau taki ʻo e misioná (ki he kau taki faifekau tāutahá).
Ko hoʻo taimi-tēpile fakafaifekaú, ʻi he meimei ʻaho kotoa, ʻoku kau ai ha taimi ako fakataautaha mo e ako mo e hoá. Vakai, Ngaahi Tuʻunga Moʻui Fakafaifekau ki he Kau Ākonga ʻa Sīsū Kalaisí, 2.4, ki ha fakamatala ki hoʻo taimi-tēpile fakaʻahó.
Ko e meʻa te ke ʻilo ʻi hoʻo ako fakafoʻituituí ʻe tokoni ia ʻi he ako fakahoá pea mo e ngaahi faingamālie ako kehe ʻoku lisi atu ʻi ʻolungá. ʻI he ngaahi tūkunga ko ʻení “mou feakoʻiʻaki ʻa e tokāteline ʻo e puleʻangá” (Tokāteline mo e Ngaahi Fuakava 88:77).
Ngaahi Fakakaukau ke Fakatupulaki Hoʻo Ako ʻo e Malanga ʻAki ʻEku Ongoongoleleí
ʻOku lalanga fakataha ʻe he Malanga ʻAki ʻEku Ongoongoleleí ʻa e folofolá mo e ngaahi tefitoʻi moʻoni ʻo e ongoongoleleí ke tokoni ke ke ʻilo ʻa e Fakamoʻuí mo ʻEne ongoongoleleí. ʻOku fakataumuʻa ia ke tohoakiʻi mai koe ki he folofolá mo fakaleleiʻi hoʻo ako kinautolú. Ako ʻa e ngaahi fakamoʻoni folofola ʻi he ngaahi vahé takitaha, ʻi hoʻo ngāue fakafaifekaú kakato.
ʻOku ʻi he vahe kotoa ʻi he Malanga ʻAki ʻEku Ongoongoleleí ha ngaahi fakakaukau mo ha ngaahi ʻekitivitī ke tokoni ke ke ako pea mo fakaʻaongaʻi ʻa e meʻa ʻokú ke akó. Fakaʻaongaʻi ʻa e ngaahi meʻá ni ʻi hoʻo ako fakafoʻituituí mo e fakahoá (vakai, Ngaahi Tuʻunga Moʻui Fakafaifekaú, 2.4). Te ke toe lava foki ʻo fakaʻaongaʻi kinautolu ʻi he lolotonga ʻo e ngaahi fakataha alēlea fakavahé mo e ngaahi konifelenisi fakasouní. ʻE toe ola lelei ange hoʻo akó ʻi he taimi te ke maʻu ai ha ngaahi founga ke fakaʻaongaʻi ʻa e meʻa kuó ke ʻiló.
ʻOku ʻaonga lahi ke ʻi ai ha palani ki hoʻo ako fakafoʻituituí. Te ke lava ʻo faʻu haʻo palani pē ʻaʻau ʻe fakamuʻomuʻa taha ai ʻa e ngaahi tefitoʻi moʻoni ʻo e ongoongoleleí ʻa ē te ke loto ke mahino lelei angé. Te ke toe lava foki ʻo fokotuʻutuʻu hoʻo akó fakatatau ki he ngaahi vahe ʻi he Malanga ʻAki ʻEku Ongoongoleleí. Hangē ko ʻení, te ke lava ʻo fakaʻaongaʻi ʻa e ngaahi lēsoni ʻi he vahe 3 ke tataki hoʻo ako ʻo e tokāteline mo e ngaahi tefitoʻi moʻoni te ke akoʻí. ʻE fiemaʻu ke ke ʻiloʻi lelei ʻa e ngaahi lēsoni ko ʻení ka ke lava ʻo faiako ʻaki ʻa e Laumālié ʻaki hoʻo lea pē ʻaʻau.
Hiki ha fanga kiʻi meʻa ʻi hoʻo akó. Fakaʻaongaʻi ha pepa pe tohinoa fakaʻilekitulōnika (hangē ko e Gospel Library) ke tokoni atu ke mahino, fakamaama, mo ke manatuʻi ʻa e meʻa ʻokú ke akó.
Kamata ʻaki hoʻo akó ha lotu ke tokoni atu ʻa e Laumālie Māʻoniʻoní ke ke ʻilo. Te ne ʻomai ʻa e ʻilo mo e mahino, mo ha fakamoʻoni ʻa ia te ne tāpuakiʻi hoʻo moʻuí mo fakaʻatā ke ke tāpuakiʻi ha niʻihi kehe. Fakaʻataʻatā hoʻo fakakaukaú mo ho lotó ki he ngaahi ueʻi mo e ngaahi poto te ke maʻu meiate Iá. Fakakau ʻa e ngaahi ʻilo ko ʻení ʻi hoʻo ngaahi meʻa ʻe hikí.
Toutou vakaiʻi maʻu pē hoʻo tohinoa akó ke manatuʻi ʻa e ngaahi aʻusia fakalaumālié, fakatokangaʻi ha ngaahi ʻilo foʻou, pea mo fakatokangaʻi hoʻo tupulakí.
Polokalama Malanga ʻAki ʻEku Ongoongoleleí
Fakaʻaongaʻi ʻa e polokalama Malanga ʻAki ʻEku Ongoongoleleí ke tokoni atu ʻi hoʻo fakaʻaongaʻi ʻa e ngaahi tefitoʻi moʻoni ʻokú ke akó. ʻOku maʻu ʻa e polokalama ko ʻení ʻi hoʻo telefoni toʻotoʻó. ʻOku ʻi ai hano ngaahi konga (features) ke tokoni atu ke ke fakahoko lelei ange hoʻo taumuʻa fakafaifekaú. ʻOku kau ʻi he ngaahi konga ko ʻení ʻa e:
-
Fakamatala fekauʻaki mo e ngaahi fiemaʻu pea mo e fakalakalaka ʻa e kakai ʻokú ke akoʻí.
-
Ha feituʻu ke lekooti ai hoʻo fakalakalaká ʻi he ngaahi meʻafua ki hoʻomo taumuʻá.
-
Ha tohi māhina ke lekooti ai hoo ngaahi palaní mo fakataimi-tēpileʻi ʻa e ngaahi ʻekitivitií.
-
Ha mape homou feituʻú mo ha fakamatala mahuʻinga kehe ke tokoni atu ke ke lavaʻi hoʻo ngaahi taumuʻá.
ʻOku ʻi he Malanga ʻAki ʻEku Ongoongoleleí ha ngaahi fakakaukau lahi ki hono fakaʻaongaʻi ʻo e polokalamá ke tokoni ke ke kumi, akoʻi, mo papitaiso ʻa e kakaí.
Fakaʻaongaʻi ʻo e Malanga ʻAki ʻEku Ongoongoleleí ʻe he Kāingalotu ʻo e Siasí
Ko e Malanga ʻAki ʻEku Ongoongoleleí ko ha maʻuʻanga tokoni mahuʻinga ia, ʻo ʻikai ki he kau faifekaú pē, ka ki he kau mēmipa kātoa ʻo e Siasí. Hangē ko ʻení, ko hono akó ʻe tokoni ia ki he kau mēmipá:
-
Ako mo akoʻi ʻa e ongoongolelei ʻo Sīsū Kalaisí (ako ʻa e vahe 1, 2, 3, mo e 10).
-
Tali ʻa e ngaahi fehuʻi fekauʻaki mo e ongoongoleleí (ako ʻa e vahe 3 mo e 5).
-
Mahino lahi ange fekauʻaki mo e fekumi mo e falala ki he Laumālie Māʻoniʻoní (ako ʻa e vahe 4).
-
Mahino ʻa e mālohi ʻo e Tohi ʻa Molomoná (ako ʻa e vahe 5).
-
Kumi ʻa e Ngaahi ʻUlungaanga Faka-Kalaisí (ako ʻa e vahe 6).
-
Fakahoko honau fatongia fuakava ke vahevahe ʻa e ongoongoleleí ʻaki hono moʻui ʻaki ʻa e tefitoʻi moʻoni ʻo e ʻofá, vahevahé, mo e fakaafé (ako ʻa e vahe 9 mo e 13).
-
Fakatupulaki ha uouangataha mo e kau faifekau taimi kakató (ako ʻa e vahe 13).
Ko hono ako ʻo e Malanga ʻAki ʻEku Ongoongoleleí—tautautefito ki he vahe 3—ʻe mātuʻaki ʻaonga lahi fakatouʻosi ia ki he toʻu tupú mo e kakai matuʻotuʻa ʻoku teuteu ke ngāue fakafaifekaú.