Lēsoni 4

Fekumi ʻi he Ngaahi Folofolá pea Tui ʻa e Teunga Tau ʻo e ʻOtuá

Malanga ʻAki ʻEku Ongoongoleleí, Vahe 2

Siosefa Sāmita ʻokú ne ako ʻa e ngaahi folofolá

Ko hono ako mo fakaʻaongaʻi ʻa e ngaahi moʻoni ʻoku ʻi he folofola ʻa e ʻOtuá ʻoku mahuʻinga ia ki he uluí mo tokoniʻi ʻa e kakaí ke nau haʻu kia Sīsū Kalaisi. ʻE lava ke faitokonia ʻe he fakaʻaongaʻi totonu ʻo e tekinolosiá ʻa e tuʻunga lelei ʻo ʻetau akó mo tokoni ke tau maʻu ʻa e tali ki heʻetau ngaahi fehuʻi ʻi he ongoongoleleí. Ko e muimui ko ia ki he ngaahi founga maluʻí ʻi heʻetau fakaʻaongaʻi ʻa e tekinolosiá ko ha founga mahuʻinga ia ke “ʻai [ai kiate kitautolu] ʻa e mahafu tau kotoa ʻo e ʻOtuá” (ʻEfesō 6:11).

Vakaiʻi mo Muimuiʻi

Taki fealēleaʻakí: Fakaafeʻi ʻa e kau akó ke nau fakakaukau ki haʻanau ngaahi feinga kimuí ni ke fakaʻaongaʻi ʻa e meʻa ʻoku nau ako ʻi he kalasi ko ʻení. Te ke lava ʻo fakaafeʻi kinautolu ke vahevahe ha niʻihi ʻo ʻenau ngaahi ngāué mo hanau hoa pe ko ha kalasi.

Ngaahi ʻEkitivitī Ako ke Fili Mei Aí

Taki fealēleaʻakí: Fili ʻi he faʻa lotu ʻa e foungá ni pe ha ngaahi founga ako ʻe ʻaonga lahi taha ki hoʻo kalasí. Fakapapauʻi ʻokú ke tuku ha taimi lahi ki he akoako fakahokó mo hono fakaʻaongaʻí.

Fili A: Te u lava fēfē ke maʻu ha aʻusia mahuʻingamālie ange ʻi hono ako e folofolá?

Ako

Ko Hono Vakaiʻi ʻo ʻEku Ako Fakataautaha ʻa e Folofolá

Fakafuofuaʻi hoʻo aʻusia ʻi he folofolá ʻaki haʻo tali ʻa e ngaahi fakamatala ko ʻení ʻi he maaka ʻo e 1 (ʻikai ʻaupitó) ki he 5 (meimei maʻu ai peé).

ʻOku ou feinga maʻu pē ke ako ʻa e folofolá. ____

ʻI he taimi ʻoku ou ako ai ʻa e folofolá:
ʻOku ou tokanga taha ki he Tamai Hēvaní mo Sīsū Kalaisí. ____
ʻOku ou tuku ha taimi ke fakalaulauloto ki he meʻa ʻoku ou laú. ____
ʻOku ou fekumi ki ha fakahinohino mo ha mahino mei he Laumālie Māʻoniʻoní. ____
ʻOku ou kumi ha ngaahi tali ki heʻeku ngaahi fehuʻí. ____
ʻOku ou feinga ai ke moʻui ʻaki ʻa e meʻa ʻoku ou akó. ____

Taki fealēleaʻakí: Poupouʻi ʻa e kau mēmipa ʻo e kalasí ke nau tokanga he lolotonga ʻo e ʻekitivitī akó ki he ngaahi ongo fakalaumālie te nau ala maʻu fekauʻaki mo e founga ke fakatupulaki ai ʻenau aʻusia ʻi he ako folofolá.

Fakaʻaliʻali ʻa e ngaahi fakahinohino ko ʻení, pea ʻoange ha taimi ki he kau akó ke fakakakato ʻa e ʻekitivitī akó:

Fili ha tafaʻaki ʻe taha pe ua mei hoʻo siviʻi fakaekitá ʻa ia ʻokú ke fie ngāue ki ai. Ko e ngaahi fika ʻo e ngaahi maʻuʻanga tokoni ko ʻení ʻoku nau fekauʻaki mo e ngaahi fika ʻo e sivi fakaekitá. Te nau ʻave koe ki he ngaahi maʻuʻanga tokoni fekauʻaki mo ia ʻi he vahe 2 ʻo e Malanga ʻAki ʻEku Ongoongoleleí.

1. Ako ʻa e konga talateu ʻo e “Fekumi ʻi he Ngaahi Folofolá” (peesi 19–20).
2a. Ako ʻa e konga talateu ʻo e “Fekumi ʻi he Ngaahi Folofolá” (peesi 19–20).
2e. Fakakakato ʻa e ʻekitivitī ʻi he puha “Ako Fakafoʻituituí” ʻi he peesi 18.
2f. Ako ʻa e “Fekumi ki he Laumālié” (peesi 18), pea fakakakato ʻa e ʻekitivitī ʻi he puha “Ako Folofolá” ʻi he peesi 20–21.
2h. Ako ʻa e “Kumi ʻa e Tali ki he Ngaahi Fehuʻí” (peesi 21).
2i. Ako ʻa e “Moʻui ʻAki ʻa e Meʻa ʻOkú ke Akó” (peesi 21), pea fakakakato ʻa e ʻekitivitī ʻi he puha “Ako Fakafoʻituituí” ʻi he peesi 21.

Ako Fakahoko

Taki fealēleaʻakí: ʻOange ha faingamālie ki he kau akó ke vahevahe ʻa e meʻa ne nau ako mei he ʻekitivitī akó. Te ke ala fakaʻaliʻali ʻa e ngaahi fehuʻi ko ʻení, ke fakahoko ʻeni. ʻOange ha taimi ki he kau mēmipa ʻo e kalasí ke aleaʻi ha fehuʻi ʻe taha pe lahi ange mo ha hoa pe kiʻi kulupu.

Makatuʻunga ʻi he meʻa naʻá ke akó, te ke lava fēfē ke fakaleleiʻi hoʻo ako ʻa e folofolá?
Ko e hā ha potufolofola pe fakamatala mei he Malanga ʻAki ʻEku Ongoongoleleí ʻokú ke pehē naʻe mātuʻaki ʻaonga? Ko e hā naʻá ke ongoʻi ai naʻe mahuʻingá?
Ko e hā ha aʻusia lelei kuó ke maʻu ʻi hono ako ʻo e folofolá?

Taki fealēleaʻakí: Fakakaukau ke fakaʻosi ʻa e konga ko ʻeni ʻo e ʻekitivitī akó ʻaki hano lau ʻa e fakamatala meia ʻEletā D. Toti Kulisitofasoni ʻi he “Fakatotoloʻi ʻa e Ngaahi Folofolá” (Malanga ʻAki ʻEku Ongoongoleleí, 18). Fakaafeʻi ha kau ako ʻe niʻihi ke fakamatalaʻi ʻa e founga kuo fakaivia ai ʻenau tuí ʻe heʻenau ako folofolá pea mo ʻenau fakamoʻoni ki he Tamai Hēvaní mo Sīsū Kalaisí.

Te ke ala fakaʻaongaʻi ʻa e Ako Fakataukei Hono 2: “Fakaʻaongaʻi ʻa e Folofolá ʻi Hoʻo Faiakó,” ki ha akoako lahi ange.

Fokotuʻu ha taumuʻa

Taki fealēleaʻakí: ʻOange ha taimi ki he kau mēmipa ʻo e kalasí ke nau fakakaukau ai ki he meʻa kuo nau ako he ʻaho ní pea mo fokotuʻu ha ngaahi taumuʻa. Ko e founga ʻe taha te ke lava ai ʻo fai ʻení ko hano fakaafeʻi ke nau faʻu ha palani faingofua ke fakatupulaki ʻenau ako folofola fakatāutahá. Fakakaukau ke fakaʻaliʻali ʻa e meʻa ko ʻení ke ne tataki kinautolu. ʻOange ha taimi ʻi he kalasí ke nau lekooti ai ʻenau ngaahi palaní.

Ko ʻeku palani ako folofolá

Ko e fē ʻa e taimi te u ako aí?
Ko e hā hono fuoloa ʻeku akó?
Te u akó ʻi feʻia?
Ko e hā te u akó?
Ko e hā te u fai ke fakaleleiʻi ʻeku aʻusiá?

Fili E: ʻE tokoniʻi fēfē au ʻe hono fakaʻaongaʻi ʻo e Gospel Library ke u maʻu e tali ki heʻeku ngaahi fehuʻí?

Ako

Taki fealēleaʻakí: Fakakaukau ke aleaʻi ʻa e ngaahi fehuʻi ko ʻení pea hiki e tali ʻa e kau mēmipa ʻo e kalasí ʻi he palakipoé.

Ko e hā ha ngaahi fehuʻi kuo ʻosi fai atu fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?
Ko e hā ha ngaahi maʻuʻanga tokoni angamaheni ʻoku fakaʻaongaʻi ʻe he kakaí ke tali ʻenau ngaahi fehuʻi fekauʻaki mo e Siasí?

Taki fealēleaʻakí: Fakaafeʻi ʻa e kau akó ke nau fakalaulauloto ki he ngaahi fehuʻi ʻoku nau maʻu fakatāutahá. Poupouʻi kinautolu ke manatuʻi maʻu ʻa e ngaahi fehuʻi ko ʻení ʻi he lolotonga ʻo e ʻekitivitī ako ko ʻení. Fakamatalaʻi ange ʻe lava ke tataki kinautolu ʻe he Laumālie Māʻoniʻoní ʻi he kumi e tali ki heʻenau ngaahi fehuʻí.

Lau ʻa e “Kumi ʻa e Tali ki he Ngaahi Fehuʻí” ʻi he vahe 2 ʻo e Malanga ʻAki ʻEku Ongoongoleleí (peesi 21). Kumi ha faleʻi ʻe lava ʻo tokoni mai ʻi he taimi ʻoku ʻi ai ai haʻatau fehuʻi fekauʻaki mo e ongoongoleleí.

Ko e hā ʻa e meʻa naʻe mahuʻinga kiate koé?
Ko e hā ʻoku totonu ke hoko ko haʻatau tefitoʻi maʻuʻanga tokoni ʻi he fekumi ki he tali ʻo ʻetau ngaahi fehuʻi he ongoongoleleí? Ko e hā hono ʻuhingá?

Taki fealēleaʻakí: Fakakaukau ke fakaafeʻi ʻa e kau akó ke vahevahe ha ngaahi aʻusia ʻo ha taimi naʻe tali ai ʻe he Tamai Hēvaní haʻanau ngaahi fehuʻí ʻo fakafou ʻi he folofolá pe ha ngaahi maʻuʻanga tokoni falalaʻanga kehe. Te ke lava foki ʻo huluʻi ʻa e foʻi vitiō “How I #HearHim: Elder Ronald A. Rasband” (2:55; Gospel Library).

Ako Fakahoko

Taki fealēleaʻakí: Fakaʻaliʻali ʻa e ngaahi tūkunga mo e ngaahi fakahinohino ko ʻení, ke tokoni ke akoako kumi ʻe he kau akó ʻa e talí ʻi he Gospel Library. Fakamatalaʻi ange ko e taumuʻa ʻo e ʻekitivitī ko ʻení ke ʻiloʻi ʻa e ngaahi maʻuʻanga tokoni ʻoku ʻi he Gospel Library, kae ʻikai ko hano aleaʻi lōloa ʻo e ngaahi tefito kuo ʻoatú.

ʻOku fehuʻi ʻe ha taha, “ʻOku tui homou siasí ʻoku fiemaʻu ʻe he kakaí ʻa e ʻaloʻofá kae fakahaofi ʻa kinautolu?” ʻAlu ki he Fakahinohino ki he Ngaahi Folofolá, ʻo kumi ʻa e fakamatala ki he “ʻAloʻofá.” (Gospel Library > Ngaahi Folofolá > Ngaahi Tokoni Akó > Fakahinohino ki he Ngaahi Folofolá > ʻAloʻofá)
ʻI he ʻaho atú, naʻá ke fanongo ai ki ha taha ʻoku talanoa kau ki he Faʻē ʻi Hēvaní, pea ʻokú ke fifili ʻeni pe ko e hā ʻoku akoʻi ʻe he Siasí fekauʻaki mo iá. ʻAlu ki he Ngaahi Tefitó mo e Ngaahi Fehuʻí, pea kumi ʻa e fakamatala ko e “Mother in Heaven.” (Gospel Library > Ngaahi Tefitó mo e Ngaahi Fehuʻí > Mother in Heaven)
ʻOkú ke fiemaʻu ha tokoni ke maluʻi lelei ange koe mei he ponokalafí. ʻAlu ki he Tokoni ʻo e Moʻuí. Vakai pe ko e hā te ke lava ʻo ako ʻi he “Tokoni Maʻakú” ʻi he “Ponokalafí,” pea toe vakaiʻi ʻa e ngaahi fehuʻi ʻoku ʻoatú. (Gospel Library > Tokoni ʻo e Moʻuí > Ponokalafí > Tokoni Maʻakú)
ʻOku fehuʻi atu ho tuofefiné/tokouá, “ʻE founga fēfē ke u lava ʻo teuteu ke maʻu ha tāpuaki fakapēteliake?” Fakaʻaongaʻi ʻa e founga ʻi he Gospel Library, pea vakai pe ko ʻe hā te ke lava ʻo maʻú.
ʻOkú ke fiemaʻu ha ngaahi fakakaukau fekauʻaki mo e founga te ke lava ʻo vahevahe ai ʻa e ongoongoleleí mo e niʻihi kehé. ʻAlu ki he Gospel Library > Ko Hono Vahevahe ʻo e Ongoongoleleí pea kumi ki he ngaahi maʻuʻanga tokoni ʻaongá.

Taki fealēleaʻakí: Kapau ʻe fie ako fakahoko lahi ange ʻa e kau mēmipa ʻo e kalasí, te ke ala fakahinohino kinautolu ki he ngaahi fehuʻi ʻi he ngaahi puha “ʻE Ala Fifili ʻa e Kakaí” ʻi he konga ki ʻolunga ʻo e lēsoni 1, 2, pe 3 ʻo e Malanga ʻAki ʻEku Ongoongoleleí (peesi 36, 53, 70). Te nau ala fili ha fehuʻi pea ako kumi ʻa e ngaahi maʻuʻanga fakamatala te ne fakamatalaʻi ia ʻi he Gospel Library.

Hili hono ako fakahokó, fakakaukau ke fakaafeʻi kinautolu ke nau fakamatalaʻi ʻa e meʻa ne nau akó.

Fokotuʻu ha taumuʻa

Taki fealēleaʻakí: ʻOange ha taimi ki he kau mēmipa ʻo e kalasí ke nau fakakaukau ki he meʻa kuo nau ako he ʻaho ní pea mo fokotuʻu ha ngaahi taumuʻa. Te ke lava ʻo fakaʻaliʻali ʻa e ngaahi meʻa ko ʻení ke tokoni kiate kinautolu:

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení, pe fakakaukau pē ʻaʻau.

Tuku ha taimi ke vakaiʻi ai ha niʻihi ʻo e ngaahi fakamatala ʻi he Fakahinohino ki he Ngaahi Folofolá pe Ngaahi Tefitó mo e Ngaahi Fehuʻí ʻi he Gospel Library.
Fakaafeʻi e ngaahi kaungāmeʻá mo e kau mēmipa ʻo e fāmilí ke nau fai atu ha ngaahi fehuʻi koeʻuhí ke ke lava ʻo ako kumi e ngaahi talí ʻi he Gospel Library.

Ko ʻeku taumuʻá

Te u … (ngāue te ke faí).
Te u lavaʻi ʻeku taumuʻá ʻaki … (ha kiʻi palani faingofua).

Fili F: Te u lava fēfē ke fakaʻaongaʻi ʻa e tekinolosiá ʻi he angatonu?

Ako

Taki fealēleaʻakí: Hiki ki ʻolunga ha telefoni toʻotoʻo [smartphone] pe fakaʻaliʻali hano tā, pea fakaafeʻi leva e kau mēmipa ʻo e kalasí ke aleaʻi e fehuʻi ko ʻení:

Ko e hā ha fatongia ʻoku fakahoko ʻe he ngaahi meʻangāue fakaʻilekitulōnika hangē ko e smartphones mo e komipiutá ʻi hono paotoloaki e ngāue ʻa e ʻEikí?

Taki fealēleaʻakí: Fakamatalaʻi ange ʻoku ʻi he vahe 2 ʻo e Malanga ʻAki ʻEku Ongoongoleleí ha ngaahi fakahinohino fekauʻaki mo hono fakaʻaongaʻi ʻo e tekinolosiá ʻi he māʻoniʻoní. Te mou ala lau fakataha ʻa e “Fakaʻaongaʻi ʻa e Tekinolosiá ʻi he Māʻoniʻoni” (peesi 22) ke fakafeʻiloaki ʻa e tefito ko ʻení.

Ko e hā ha ngaahi faingataʻa pe ʻahiʻahi fekauʻaki mo hono fakaʻaongaʻi ʻo e tekinolosiá?

Taki fealēleaʻakí: Ko ha konga hoʻomou alēleá, fakakaukau ke mou mamata ʻi he “Taking Charge of Technology: The Challenge” (3:18; Gospel Library).
Fakamatalaʻi ange ʻoku fakamatalaʻi ʻe he Malanga ʻAki ʻEku Ongoongoleleí ha founga maluʻi ʻe fā ki hono fakaʻaongaʻi ʻo e tekinolosiá. Fakaʻaliʻali ʻa e ngaahi fakahinohino ko ʻení, ke tokoniʻi ʻa e kau mēmipa ʻo e kalasí ke nau ako ʻa e ngaahi fakahinohino ko ʻení. Te ke ala vahe ki he kau akó ke nau takitaha ako ha taha ʻo e ngaahi founga maluʻí pea teuteu ke lipooti ʻa e meʻa ʻoku nau akó ʻi ha fanga kiʻi kulupu. (ʻE lava ke ako ʻe ha mēmipa ʻe taha ʻo e kulupú ʻa e ngaahi founga maluʻi 1–2 koeʻuhí ke lahi tatau e meʻa ʻoku lau ʻe he mēmipa takitaha ʻo e kulupú.)

Ako ki ha founga maluʻi ʻe fā ki hono fakaʻaongaʻi ʻo e tekinolosiá ʻi he māʻonʻoní ʻaki hano ako ʻa e ngaahi ʻuluʻi tohi ko ʻeni ʻi he vahe 2 ʻo e Malanga ʻAki ʻEku Ongoongoleleí:

Founga Maluʻi 1: “Moʻui Taau ke Maʻu e Ngaahi Ueʻi Fakalaumālié” (peesi 22)

Founga Maluʻi 2: “Tukutaha Hoʻo Tokangá ki he Taumuʻa Hoʻo Ngāue Fakafaifekaú” (peesi 23)

Founga Maluʻi 3: “Mapuleʻi Koe” (peesi 23)

Founga Maluʻi 4: “Hoko ʻo Taha” (peesi 23)

Mateuteu ke vahevahe ʻa e ngaahi meʻa ko ʻení:

Kiʻi fakamatala nounou ʻo e meʻa naʻá ke akó, kau ai ʻa e meʻa ʻoku akoʻi ʻe hoʻo kongá fekauʻaki mo e ʻEikí
Founga hoʻo fakakaukau ki he fekauʻaki ʻa e ngaahi akonaki ko ʻení mo ha taha, kae ʻikai ko e kau faifekau taimi kakató pē
Meʻa kuó ne tokoniʻi koe ke ke fakaʻaongaʻi ʻa e tekinolosiá ʻi ha ngaahi founga māʻoniʻoní

Ako Fakahoko

Taki fealēleaʻakí: Fakaafeʻi ʻa e kau akó ke nau taufetongi ʻi hono vahevahe mo ʻenau kulupú ʻa e meʻa ne nau ako mei he ʻekitivitī akó.

Ke ako fakahoko lahi ange, te ke ala fakaʻaongaʻi ʻa e Ako Fakataukei fika 9: “Fakaʻaongaʻi ʻa e Tekinolosiá ʻi he Māʻoniʻoní.”

Fokotuʻu ha taumuʻa

Ko Hono Fakaʻaongaʻi ʻa e Ngaahi Founga Maluʻí ʻi Hono Fakaʻaongaʻi ʻa e Tekinolosiá

Fakakaukau ki ha ngaahi faingataʻa lolotonga ʻokú ke fehangahangai mo ia fekauʻaki mo hono fakaʻaongaʻi ʻo e tekinolosiá. Fakakaukau ki he founga ʻe lava ke tokoniʻi ai koe ʻe he ngaahi founga maluʻi ko ʻeni mei he Malanga ʻAki ʻEku Ongoongoleleí ʻi ho ngaahi tūkungá.

Founga Maluʻi 1: Moʻui Taau ke Maʻu e Ngaahi Ueʻi Fakalaumālié

Ngaahi fakakaukaú:

Lotua ha fakahinohino ki hono fakaʻaongaʻi ʻo e tekinolosiá ʻi he māʻoniʻoní.
Hiki ʻi hoʻo tohinoá ʻa e ngaahi ongo ʻokú ke maʻu fekauʻaki mo hoʻo ngaahi meʻangāue fakakomipiutá.
Fakamuʻomuʻa ʻa e ngaahi tōʻonga moʻui ʻokú ne fakaafeʻi mai ʻa e Laumālié, hangē ko e ako folofolá, lotú, mo e ngāue fakatemipalé.

Founga Maluʻi 2: Tukutaha Hoʻo Tokangá ki Hoʻo Taumuʻá

Ngaahi fakakaukaú:

Fakaʻehiʻehi mei hono fakaʻaongaʻi hoʻo meʻangāue fakatekinolosiá ʻi he taimi ʻoku ʻikai ke ʻi ai ai haʻo taumuʻa paú.
Kimuʻa peá ke fakaʻaongaʻi ʻa e tekinolosiá, fehuʻi hifo pe ʻe fakaafeʻi pe fakafeʻātungiaʻi ʻe hono fakaʻaongaʻí ʻa e tākaua ʻa e Laumālie Māʻoniʻoní.
Kapau ʻokú ke fakaʻaongaʻi ʻa e mītia fakasōsialé, muimui pē ki he kakai ʻoku tokoni atu ke ke nofo ofi ki he ʻEikí.

Maluʻi 3: Mapuleʻi Koe

Ngaahi fakakaukaú:

ʻI he taimi ʻokú ke feohi ai mo ha kakaí, tuku hoʻo meʻangāuē ka ke fakafemoʻuekinaʻi koe ʻi he kakai ʻoku mou feohí.
Fokotuʻu hao taimi fakangatangata fakaʻaho ki hono taimi fakaʻaongaʻí.
Fokotuʻu ha ngaahi feituʻu ʻe ʻikai fakaʻaongaʻi ai ʻa e meʻangāué, hangē ko ho lokimohé pe falekaukaú.
ʻI he taimi ʻokú ke ongoʻi vaivai mo fakataueleʻi koé, tāmateʻi hoʻo meʻangāué fakatekinolosiá ka ke ʻalu ʻo luelue.

Founga Maluʻi 4: Hoko ʻo Taha

Ngaahi fakakaukaú:

Kole tokoni ki ha taha ʻokú ke ʻofa ai ʻi he taimi ʻokú ke ongoʻi vaivai pe fakataueleʻi ai koé.
Vahevahe hoʻo palani ke fakaʻaongaʻi totonu ʻa e tekinolosiá mo ha taha ʻokú ke falala ki ai.
Fakakaukau ki ha founga te ke lava ai ʻo hoko ko ha kaungāmeʻa falalaʻanga ki he niʻihi kehé.

Hiki hoʻo palaní ʻi lalo.

Taki fealēleaʻakí: Kapau ʻoku ʻi ai ha kulupu ʻa e kau akó ke vahevahe mo kinautolu ʻenau ngaahi taumuʻá, ʻoange ha taimi ke nau vahevahe ai ʻa e founga te nau fepoupouaki pe fefakamanatuʻaki aí kimuʻa ʻi he kalasi hokó. Te ke lava ʻo huluʻi e foʻi vitiō “Texting Truth” (2:22; ChurchofJesusChrist.org) ke tokoni ki he kau mēmipa ʻo e kalasí ke nau fakatokangaʻi ha sīpinga ʻo ha toʻu taʻu-hongofulu tupu ʻoku nau fakaʻaongaʻi ʻa e tekinolosiá ke fetokoniʻaki mo felangakihakeʻaki.

Taimi Hono Hokó

Taki fealēleaʻakí: Kapau ʻokú ke mateuteu ke akoʻi ʻa e lēsoni 5 ʻi he kalasi hokó, fakakaukau ke fakaafeʻi ʻa e kau akó ke nau lau ʻa e ʻuluaki peesi ʻe tolu ʻo e “Ako mo Akoʻi e Ongoongolelei ʻo Sīsū Kalaisí” mei he vahe 3 ʻo e Malanga ʻAki ʻEku Ongoongoleleí (peesi 29–32) ʻi he teuteú. Mahalo te ke fie ʻave foki ha fakamanatu kiate kinautolu.

Ko Hono Vakaiʻi ʻEku Ako Folofola Fakatāutahá

Ko Hono Fakaʻaongaʻi ʻo e Ngaahi Founga Maluʻí ʻi he Fakaʻaongaʻi ʻo e Tekinolosiá