Ako Fakataukei Hono 2
Fakaʻaongaʻi ʻa e Folofolá ʻi Hoʻo Faiakó
ʻOku ʻi he folofolá ʻa e ngaahi folofola ʻa e ʻOtuá pea ʻe lava ke ne tākiekina mālohi ʻa e niʻihi ʻoku nau lau iá. Ko hono fakaʻaongaʻi ʻo e folofolá ʻi heʻetau faiakó ko ha founga lelei ia ke tokoniʻi ai e niʻihi kehé ke nau haʻu kia Sīsū Kalaisi.
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Ke fakafeʻiloaki ʻa e tefito ki he ako fakataukei ko ʻení, fakaafeʻi e kau akó ke nau kumi ʻa e vahe 10 ʻo e Malanga ʻAki ʻEku Ongoongoleleí (2023) pea kumi ʻa e ʻuluʻi tohi “Fakaʻaongaʻi ʻa e Folofolá” ʻi he peesi 207. Pea vahevahe ange leva ʻa e ngaahi fakahinohino ko ʻení:
Lau ʻa e palakalafi ʻuluakí mo e fanga foʻi poini ʻoku lisi ʻi he “Fakaʻaongaʻi ʻa e Folofolá” (Malanga ʻAki ʻEku Ongoongoleleí, 207). Kumi ha ngaahi ʻuhinga ʻoku mahuʻinga ai ke fakaʻaongaʻi ʻa e folofolá ʻi heʻetau akoʻi e ongoongolelei ʻo Sīsū Kalaisí.
-
Ko e hā e meʻa naʻá ke akó?
Taki fealēleaʻakí: Fakamatalaʻi ange ʻe lava ke tokoniʻi kitautolu ʻe he ngaahi sitepu ko ʻení ke tau fakaʻaongaʻi lelei e folofolá ʻi heʻetau akoʻí. Fakaʻaliʻali e ngaahi sitepu ko ʻení ke lava ʻa e kau akó ʻo vakai ki ai lolotonga e ʻekitivitī akoakó.
-
Fakafeʻiloaki ʻa e folofolá (kau ai ʻa e puipuituʻá mo e kanotohí).
-
Lau ʻa e veesi folofolá (tokoni ke fakamatalaʻi hono ʻuhingá mo fakaʻuhingaʻi ʻa e ngaahi foʻi lea faingataʻá).
-
Fakaʻaongaʻi ʻa e ngaahi folofolá.
Taki fealēleaʻakí: ʻOku hiki atu ʻa e ngaahi sitepu takitaha ʻe tolú ko ha ʻuluʻi tohi ʻi he vahe 10 ʻo e Malanga ʻAki ʻEku Ongoongoleleí (peesi 207–8). Ako fakataha ʻa e ngaahi konga ko ʻeni ʻo e Malanga ʻAki ʻEku Ongoongoleleí ke tokoni ke mahino ki he kau akó ʻa e founga te nau lava ai ʻo fakaʻaongaʻi lelei ʻa e folofolá ʻi heʻenau akoʻí. Tokanga taha ki he founga ʻe tokoni ai ʻa e muimui ki he ngaahi tefitoʻi moʻoni ko ʻení ke ofi ange ʻa e kakai ʻoku nau akoʻí ki he Fakamoʻuí.
Fakatātaaʻi
Taki fealēleaʻakí: ʻAi ke vakai e kalasí ki he puha “Ako Fakatāutahá pe Ako mo e Hoá” ʻi he peesi 209 ʻo e Malanga ʻAki ʻEku Ongoongoleleí. Fili ha taha ʻo e ngaahi potufolofola mei he ʻekitivitií pea fakaʻaongaʻi ia ke fakatātaaʻi ʻaki e ngaahi sitepu kuó ke ako ki aí.
Ako Fakahoko
Taki fealēleaʻakí: Vahevahe ʻa e ngaahi fakahinohino ko ʻení. ʻOange ha taimi ki he kau mēmipa ʻo e kalasí ke nau teuteu fakafoʻituitui mo akoako fakahoko ia mo hanau hoa.
Fakakakato ʻa e ʻekitivitī “Ako Fakatāutahá pe Ako mo e Hoá” ʻoku maʻu ʻi he fakaʻosinga ʻo e konga “Fakaʻaongaʻi ʻa e Ngaahi Folofolá” ʻi he vahe 10 (Malanga ʻAki ʻEku Ongoongoleleí, 209).
Taki fealēleaʻakí: ʻI he ʻosi e ako ʻa e kau akó, fakaafeʻi ke nau akoako fakafeʻiloaki e folofola ne nau filí mo hanau hoa. Hili hono akoako fakahoko ʻe he kau mēmipa ʻo e kalasí, te ke lava ʻo vahe ki he tokotaha takitaha ke ngāue mo ha hoa ʻe taha pea fakaafeʻi ke na toe akoako fakahoko pē.
Fakaʻaongaʻí
Taki fealēleaʻakí: Vahevahe ha fakaafe hangē ko ʻení ke tokoni ki he kau akó ke nau fakaʻaongaʻi ʻa e taukei ko ʻení:
ʻI he uike ka hoko maí, kumi ha faingamālie ke muimui ki he ngaahi sitepu kuó ke ako ki hono fakaʻaongaʻi lelei ʻo e folofolá. Te ke lava ʻo fai ʻeni ʻi he ako folofola fakafāmilí, efiafi fakafāmili ʻi ʻapí, mo haʻo kaungāmeʻa, ʻi he lotú, pe ko ha konga hoʻo feinga ke ngāue fakaetauhi ki he niʻihi kehé.