Ako Fakataukei Hono 5

Feinga ke Ako Maʻuloto ʻa e Folofolá

“ʻOku lava ke maʻu ha mālohi lahi mei hono ako maʻuloto ʻo e ngaahi potufolofolá” (Malanga ʻAki ʻEku Ongoongoleleí [2023], 31). ʻE lava ʻe hono ako maʻuloto ʻo e ngaahi potufolofolá ʻo fakaloloto ʻetau mahino ki he ongoongolelei ʻa e Fakamoʻuí mo fakalahi ʻetau malava ke akoʻi ia ki he niʻihi kehé.

Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.

Fakaʻuhingaʻí

Taki fealēleaʻakí: Tokoni ke kumi ʻe he kau mēmipa ʻo e kalasí ʻa e kiʻi puha “Ko e Fatongia ʻo e Ako Maʻulotó” ʻi he vahe 3 ʻo e Malanga ʻAki ʻEku Ongoongoleleí (peesi 31). Pea vahevahe ange leva ʻa e ngaahi fakahinohino ko ʻení:

Lau ʻa e palakalafi hono tolu ʻi he “Ko e Fatongia ʻo e Ako Maʻulotó” (Malanga ʻAki ʻEku Ongoongoleleí, 31). Kumi ʻa e founga ʻe lava ke tāpuekina ai koe mo e niʻihi kehé ʻi hono ako maʻuloto ʻo e ngaahi potufolofolá.

ʻE tokoniʻi fēfē koe ʻe he ako maʻulotó ʻi hoʻo hoko ko e faifekaú?
Kuo ʻaonga fēfē kiate koe hono ako maʻuloto ha potufolofola?

Taki fealēleaʻakí: Fakamatalaʻi ange ʻoku lahi ha ngaahi founga te tau lava ʻo fakaʻaongaʻi ke tokoni kiate kitautolu ke ako maʻuloto e folofolá. Te ke lava ʻo vahevahe ha niʻihi ʻo e ngaahi meʻá ni ko ha ngaahi sīpinga. Te ke lava foki ʻo fakaafeʻi ha kau ako ke vahevahe ha ngaahi fakakaukau lahi ange.

Toutou lau hokohoko ʻa e ngaahi foʻi leá. Pea fufuuʻi leva ʻa e ngaahi foʻi leá pea toutou lau ia ʻo ʻikai sio ki ai.
Vahevahe ʻa e potufolofolá ki ha ngaahi kupuʻi lea nounou. Ako maʻuloto ʻa e ngaahi kupuʻi leá, ʻo toe vakaiʻi ʻa e meʻa kuó ke ʻosi ako maʻulotó.
Hiki tuʻo lahi ʻa e ngaahi foʻi leá lolotonga hoʻo lau ʻa e vēsí. Hili iá pea hiki ʻa e potufolofolá ʻo ʻikai toe sio ki he vēsí.
Hiki ʻa e ʻuluaki mataʻitohi ʻo e foʻi lea kotoa pē ʻi he vēsí pea fakaʻaongaʻi ʻa e ngaahi mataʻitohi ko iá ke tataki koe ʻi hoʻo lau ʻa e vēsí.
Faʻu ha fanga kiʻi fakatātā faingofua ke tokoni ʻi hoʻo ako maʻuloto ʻa e potufolofolá.

Fakatātaaʻi

Taki fealēleaʻakí: Fakamatalaʻi ange ko ha potufolofola mahuʻinga ke ako maʻuloto ʻe he kau faifekaú ko e talanoa ki he ʻUluaki Mata Meʻa-Hā-Mai ʻa Siosefa Sāmitá ʻoku lekooti ʻi he Siosefa Sāmita—Hisitōlia 1:16–17.

ʻOku ʻoatu ʻi lalo ha founga ʻe taha te ke lava ai ʻo fakaʻaongaʻi ʻa e fakakaukau hono ua mei he lisi ʻi he konga kimuʻá ke tokoni ki he kau akó ke nau ako maʻuloto ʻa e talanoa kia Siosefa Sāmitá. Tokoniʻi e kau akó ke nau ako maʻuloto taha taha e ngaahi kupuʻi lea ko ʻení ʻaki hono toutou lau leʻolahi ia mo e kalasí.

“Naʻá ku mamata ki ha pou maama feʻunga tonu mo hoku ʻulú, naʻe lahi ange hono ngingilá ʻi he laʻaá, ʻa ia naʻe maliu māmālie hifo kae ʻoua kuo tō ia kiate au. …

“ʻI he nofo mai ʻa e māmá ʻiate aú, naʻá ku sio ki he Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi, ʻokú na tuʻu mai ʻi ʻolunga ʻiate au ʻi he ʻataá.

“Naʻe folofola mai ʻa e toko taha kiate au, ʻo ne ui au ʻaki hoku hingoá, ʻo ne tuhu ki he tokotahá ʻo pehē—Ko Hoku ʻAlo ʻOfaʻangá ʻEni. Fanongo kiate Ia!” (Siosefa Sāmita—Hisitōlia 1:16–17).

Akoako Fakahoko

Taki fealēleaʻakí: Fakaafeʻi e kau akó ke nau akoako lau maʻuloto e konga ko ʻeni ʻo e ʻUluaki Mata Meʻa-Hā-Mai ʻa Siosefa Sāmitá mo hanau hoa. Te nau lava ʻo fakaʻaongaʻi ʻa e founga tatau naʻá ke akoako fakahoko mo e kalasí pe te nau lava ʻo fili ha founga kehe.

Fakaʻaongaʻí

Taki fealēleaʻakí: Vahevahe ʻa e ngaahi fakahinohino ko ʻení ke tokoni ki he kau akó ke nau fakaʻaongaʻi ʻa e taukei ʻo hono ako maʻuloto e folofolá ʻi heʻenau moʻuí:

Fakapapauʻi e founga te ke hokohoko atu ai hono fakaʻaongaʻi e taukei ʻo e ako maʻuloto e folofolá. Ko ha ngaahi fakakaukau ʻeni:

Hokohoko atu hoʻo ako maʻuloto ʻa e ʻUluaki Mata Meʻa-Hā-Mai ʻa Siosefa Sāmitá. Akoako lau maʻuloto ia ki ha taha ʻokú ke ʻofa ai.
Fili ha potufolofola kehe ʻe taha pe lahi ange ʻokú ke loto ke ako maʻuloto pea feinga ke ako maʻuloto ia.