jerbal in karejar

Pija in ļotak eo an Kraist jen Niltza Beatriz Santillan Castillo; pija in menin letok jān Getty Image ko

Pedped ko an Jerbal in Karejar, Tijem̧ba 2020

Kōmeramļo̧k Meram eo an Rilo̧mo̧o̧r ilo Kūrijm̧ōj

Ļōmņak kōn ro kwoj jerbal in karejar n̄an er. Ekōjkan am̧ jipan̄ er epaakeļo̧k Kraist ilo Kūrijm̧ōj in?

Ilo ad keememej Rilo̧mo̧o̧r Jisōs Kraist aolepān iiō in, Kūrijm̧ōj ej iien eo jej m̧ōņōņō kōn menin letok eo eļaptata kar letok: “Bwe kōn an Anij yokwe laļ, ear letok juon wōt Nejin Ear keotak” (Jon 3:16). Ilo ad jerbal in karejar ilo Kūrijm̧ōj in, jemaron̄ bar leļo̧k menin leļo̧k ko n̄an jipan̄ ro jet epaakeļo̧k Rilo̧mo̧o̧r. Ej menin lem̧ōņōņō ilo ad lōmņak kōn kōj make ilo ad ialaleļo̧k menin letok eo jān Jemedwōj Ilan̄.

Ij Kaorōk Menin Letok in

Susan Hardy, California, USA

Ke ekar 11 aō iiō, rūkaki in Jabōt Jikuuļ eo aō, Brother Deets, ekar ba n̄an kūlaaj eo amian̄ ke eļan̄n̄e kōm naaj kakilōklōke Laajrak in Tōmak ko im kōmeļeļeiki n̄an e ta meļeļeier, enaaj wia am bok in jeje ko rekwojarjar.

Brother im Sister Deets rekar ripālele ro rem̧m̧an dettaer, rej kab jinoe. Ikar jab lukkuun jeļā n̄e Brother Deets emaron̄ kar wia menin letok n̄an kajjojo. Bōtaab ikar kālet bwe elan̄n̄e ej ļōmņak bwe Laajrak in Tōmak ko eļap aer aorōk, inaaj jelm̧ae menin.

Ālkin aō kar kam̧ōj aolep 13 laajrak in tōmak, ekar m̧ootļo̧k iien eo im ikar meļo̧kļo̧k kallim̧ur eo an.

Innem, ilo Raan in Kūrijm̧ōj eo, ikar bōk juon pakij me ewor eta ie. Ikar kōpeļļo̧ke im loe bok in jeje ko rekwojarjar eo n̄an n̄a, im juon ennaan ej kōketak eō bwe en emakijkij aō riiti naan kein. Kar ilo 1972, im tok n̄an rainin ej pād wōt ippa bok in jeje kein rekwojarjar. Rej menin aorōk n̄an n̄a.

Ejjab kar wōņeen menin letok in ak jouj eo ekar kwaļo̧k n̄an n̄a im kaarmejete eo ekar maron̄ kōm̧m̧ane n̄an n̄a im ej kōm̧m̧an bwe in ikdeleel n̄an ekkatak naan ko an Anij. Eļan̄n̄e inaaj kajjieon̄ ļoor waanjon̄ak eo an Brother Deets kōn jerbal in karejar ilo an leļo̧k menin leļo̧k ko eļap meļeļeier n̄an ro ipeļaakū, kōjatdikdik bwe imaron̄ kōjeraam̧m̧an mour ko an ro jet āinwōt an kar kōjeraam̧m̧an mour e aō.

Juon Karuwainene eo Eļap Tokjen

Richard M. Romney, Utah, USA

Ilo iien eo im ro rej karōk iien Kūrijmōj eo an ward kar kōjjeļāik iō bwe in loļo̧k jet iaan ro im rejjab kobatok im karuwaineneik er n̄an bōk koņaer ilo būrokūraam̧ in, Ij aikuj kar kwaļo̧k m̧ool ke ikar lukkuun mijak. Em̧ōj aō kar ioon Darren m̧oktaļo̧k, ilo iien eo ekar bōk koņaan ilo iien m̧akūtkūt eo an ward m̧oktaļo̧k. Ekar kōņak juōn at in wōtbai me epinej ioļapān dōm̧an. Kooļ mouj ko ibōran im raetok kar lukōjeer kōn boniteeļ, ekar lukkuun mouj kodāāk ko an, im pein ekar obrak kōn eo̧.

Kiiō, kar itok ippān juon membōr in kamiti eo, ikar jutak im̧aan kōjam eo an Darren, lōmņak ta Darren emaron̄ kar ba. Ekar kajjitōk ippam bwe kōmin deļo̧n̄, im kōm kar ba n̄an e unin am kar pād ijo. Eaar ba, “O, Ij m̧ōņōņō in kōm̧m̧ane menin!”

Ekar lukkuun juon jerbal eo em̧m̧an, jipan̄ kōm̧m̧an bwe iien m̧akūtkūt eo en ļap meļeļe n̄an ro kajjojo. Jidik iien tokālik, rijerbal in karejar eo m̧ōtta im n̄a kar kajjitok bwe en emakijkij am̧ro loļo̧k Darren. Aolep iien ej m̧ōņōņō in lo kōm, im ekar wōr jet iien em̧m̧an n̄an am kōnono. Ij m̧ōņōņō kōn im̧we eo kōn am kar karuwaineneki e n̄an bōk koņaan ilo būrokūraam̧ eo an ward im menin ekar tōlļo̧k n̄an juon jemjerā eo elem̧ōņōņō.

Jerbal in karejar n̄an ro Jet ilo iien Kūrijm̧ōj

En̄in ej jet iaan men ko kwomaron̄ kōm̧m̧ani n̄an kōm̧m̧an bwe ro im kwoj jerbal in karejar n̄an er ren jeļā bwe kwoj ļōmņak kōn er, eļaptata iien in ilo juon iiō.

1. Jet iien taļboon kooļ ak ennaan ilo text rekabwilōn̄lōn̄. Jino juon iien kōnono kōn juon men epidodo “Iakwe, ejet am̧ pād?” emaron̄ kōm̧m̧an oktak.

2. Pād ilo iien kam̧ōņōņō ko aer n̄e ekkar. Kūrijm̧ōj emaron̄ juon iien em̧m̧an n̄an ekkatak kōn tōmak ko ad im rej juon wōt. Eļan̄n̄e kwoj kwaļo̧k am̧ tōmak im ron̄jake ro jet, kwoj kōpeļļo̧k kōjam in n̄an eļapļo̧k meļeļe.

3. Jar kōn kajjojo kōn etaer. Kajjitōk ippān Jemedwōj Ilan̄ n̄an jipan̄ eok ļōmņak kōn jōkjōk ko im rej kepaak er n̄an eo Nejin.

4. Menin leļo̧k ko reddik eiten aolep iien rem̧m̧an tata n̄an emmeļo̧ki. Menin leļo̧k ko rejjab aikuj ļap n̄an kōm̧m̧an bwe en lukkuun aorōk. Menin leļo̧k ko kōn iien, menin leļo̧k eo kōn ron̄jake, kwaļo̧k pija ko ak kakeememej iien ko—aolep men kein remaron̄ menin leļo̧k ilo bōro.

5. Leļo̧k menin leļo̧k eo an naan in kam̧ool. Kajjitōk ippāer n̄an kwaļo̧k iakwe eo aer n̄an Rilo̧mo̧o̧r n̄an kwe, im kajjitōk ippāer n̄an am̧ kwaļo̧k iakwe eo am̧ n̄an E ippāer.

6. Karuwaineneik ro jet n̄an pād ilo juon iien jar in Kūrijm̧ōj. Jet armej rej kōņaan kabun̄jar ak rejjab jeļā ia eo rej ilo̧k ieļo̧k. Karuwaineneik er n̄an itok im kabun̄jar ippam̧.

7. Kobrak im̧weeo im̧weer kōn aenōm̧m̧an. Ba ļo̧k n̄an er ke ewōr an mijenede ro ennaan eaorōk im em̧m̧an kōn Kūrijm̧ōj me remaron̄ kwaļo̧k n̄an er, juon eo me enaaj bōktok kōjatdikdik im iakwe n̄an būruwer.

Jerbal in karejar n̄an er Aolep āinwōt juon Jarlepju in Rijar

Aolep jarlepju in rijar rej aikuj men ejeņoļo̧k. Jet jeraam̧m̧an im em̧m̧an ko me rej itok jān kōm̧m̧ane ak karōke juon m̧akūtkūt eļap. Jarlepju in rijar ko jet rej jeraam̧m̧an im em̧m̧an ko me rej itok jān jet men ko reddik im reļam waan. Ro im rej pād ilo karōk im kōlaajrak iien m̧akūtkūt rej lukkuun jar kōn wāween kakke aikuj ko me rej waļo̧k.

• Membōr ro ilo jilu stake ko ilo Paris, France, rekar jipan̄ Kōmeramļo̧k Laļ in soirée me ekoba juon taļōn show im juon pājen show. Rekar kōpooj aitōm ko im kar liļo̧k n̄an rijipo̧kwe ro im armej ro me ejjeļo̧k jikin aer jokwe.

• The Charlotte North Carolina Central Stare rekar kōm̧m̧ane juon “Kūrijm̧ōj ipeļaakin Laļin” m̧akūtkūt n̄an jukjukin pād eo, kōn juon iiaio n̄an kam̧ōņōņōik iien eo an Kraist kōn m̧ōn̄ā, kein kalojooj an kajjojo manit me rej kwaļo̧k kōn Kūrijm̧ōj, al, būrajāāk ikkijeen jerbal in jipan̄, im juon nativity an ajri ro.

• Membōr ro ilo Vero Beach Florida Stake raar ippān doon āinwōt juōn jukjukin pād n̄an kakeememej etke jej kam̧ōņōņō im kaorōk Kūrijm̧ōj. Kein ikkure ko an an ajri kar liļo̧k n̄an jukjukin pād ko. Juon kuwaer an Būraimere ro rekar al, im elōn̄ mōnjar ko ekar wōr jikin aer displayik ak kwaļo̧k meļeļe ko.

• The Jacksonville Florida South Stake rekar kwaļo̧k Savior of the World juon pijaan alooj n̄an jukjukin pād eo.

© 2020 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin English: 6/19. Kōmālim an ukook: 6/19. Ukook eo an Ministering Principles, December 2020. Language. 16727 874

Kepaakļo̧k Rilo̧mo̧o̧r eo

“Eļan̄n̄e jej pukot kilen iaļļad make n̄an ijubon̄ ijuraan ilo Bethlem “ijo Anij ilo bon̄ eaar babu ie,” emaron̄ em̧m̧anļo̧k ad kile Rilo̧mo̧o̧r āinwōt juon menin letok jān juon Jemedwōj Ilan̄ eo ej, iakwe.”

Elder Dale G. Renlund jān Doulul eo an Jon̄oulruo Rijilōk ro, ““Bwe In Maron̄ Kan̄ōltok Aolep Armej n̄an Eō,” Liahona, Māe 2016, 40.