Jerbal in karejar kōn Kweilo̧k in Kwojkwoj

Kweilo̧k in kwojkwoj ej kwaļo̧k iien ko rem̧m̧an n̄an ekkeijļo̧k im jerbal in karejar n̄an ro jet.

Kweilo̧k in kwojkwoj ej juon iien n̄an kemourmour ilo jetōb im kōļmenļo̧kijeņ kōn mour eo an Rilo̧mo̧o̧r im Pinmuur eo An. Ilo ad bōk kwojkwoj eo kajjojo wiik, jej kajoorļo̧k ippān doon (lale Katak im Bujen Ko 84:110). Ak jet ilo ward ko ad im branch ko rej boktok eddodo ko aer ak rejjab kobatok.

Jet kein iien ko rem̧m̧an n̄an wāween ad maron̄ kōjerbal awa eo ekwojarjar n̄an kōm̧m̧ane jerbal in karejar n̄an ro jet im kōm̧m̧ane juon oktak ilo mour ko aer.

Jipan̄ Kōm̧m̧ane Kweiļo̧k in Kwojkwoj Em̧m̧anļo̧k n̄an ro Kwoj Jerbal in Karejar N̄an

Bun̄tōn eo jinoun ilo ekkatak wāween n̄an jerbal in karejar ej jino jeļā kajjien kajjojo armej ro ak baam̧le ko aer im aikuj ko aer. Emaron̄ lōn̄ wāween ko komaron̄ jipan̄ iien kabun̄ kweilo̧k in kwojkwoj eo aer em̧m̧anļo̧k ilo am̧ wōt ekkatak eļapļo̧k kōn er.

N̄an Mindy, juon m̧am̧a eo em̧m̧an dettan n̄an ruo ajri jiddik ro, kijejeto eo epidodo in jerbal in karejar eo an sister eo an ekar kōm̧m̧an juon oktak eļap ilo kweilo̧k in kwojkwoj eo an aolep wiik.

“Kōnke jikejuuļ in jerbal eo an ļāeo pāleeō, Ij bōk bo ro nejūm̧ro n̄an jar make iaaō aolep wiik,” Mindy ekar kōmeļeļe. “Elukkuun ļap jerbale n̄an kajjeon̄ kajem̧ļo̧k aolepen kweilo̧k in kwojkwoj eo ippān ro ajri jiddik ro eļap aer boub, ak sister in jerbal in karejar eo aō ekar bōk ioon e make n̄an jipan̄e n̄a.

“Ej jijōt ippemim im jipan̄ n̄a lale leddik ro nejū aolep wiik. Eļap meļeļein n̄an eō ilo an pād itūrū im eļap an kadikļo̧k aō inebata ilo iien kein aer me rejan̄jan̄ ak illulu. Ijjab tōmak enaaj jeļā eo jon̄an kōm̧m̧an ko an jelōt eō ilo tōrein ilo mour in aō. Ekar lo aikuj eo ao āinwōt juon m̧am̧a eo edik, obrak kōn inebata, im ekar jiban̄ kōm̧m̧an bwe jikin jar ej juon jikin aenōm̧m̧an im jikin m̧ōņōņō n̄an kōm aolep.”

Ļōmņak ko n̄an Jipan̄ Ro Jet Ewōr Ippāer Aikuj ko

Ba ļo̧k n̄an doulul eo an elder ro im doulul eo an Kōrā ro kōn aikuj ko an membōr ro.
Ritōl ro rej karōk unin kōnono ko an kweilo̧k in kwojkwoj eo n̄an jipan̄ kōtōprak aikuj ko an membōr ro. N̄e ro kwoj jerbal in karejar n̄an er enaaj jeraam̧m̧an jān ron̄ juon enaan, kwaļo̧k ļōmņak eo am̧ ippān ritōl ro am̧.
N̄e kwojeļā bwe juon elōn̄ an nan̄inmej in utam̧we ippān ak ej kadōki m̧ōn̄ā ko me epinej er jān aer m̧ōņōņō ilo kōjeraam̧m̧an ko in kweilo̧k in kwojkwoj eo, kajjitōk ippāer kōn un dikdik ko im ta karōk ko remaron̄ kōm̧m̧an n̄an kōkm̧anm̧anļo̧k iien kabun̄ jar eo aer. Kwaļo̧k meļeļe in ippān ritōl ro am̧.
N̄e juon eo kwoj jerbal in karejar n̄ane ak eo kwojeļā ke ej pād wōt m̧weo, emaron̄ n̄an indeeo ak jidik wōt iien, kajjitōk ippān bisop eo eļan̄n̄e kwojkwoj eo emaron̄ leļo̧k n̄an er ilo m̧oko. Komaron̄ bar bōk kakeemejmej ko ilo iien kweilo̧k in kwojkwoj eo im kwaļo̧k n̄an er ilo taļboon, ilo email, ak ilo nememein armej.
N̄e juon eo kwoj jerbal in karejar elōn̄ nejin ajri ro reddik, komaron̄ jiban̄ er ilo iien kweilo̧k in kwojkwoj eo.
N̄e ro kwoj jerbal in karejar n̄an er rejjab ikutkut aer itok n̄an kweilo̧k in kwojkwoj eo, kajjieon̄ meļeļe im ļōmņak kōn wāween ko komaron̄ jipan̄. N̄e rej aikuj iaļ, komaron̄ jipan̄ n̄an bōk er. N̄e rejjab en̄jaake jipan̄ jān baam̧le eo aer, komaron̄ kūr er n̄an jijōt ippam̧. Komaron̄ kōm̧m̧an kūr ko reaurōk n̄an jipan̄ er en̄jaake ruwainene im kōņaan ilo kweilo̧k in kwojkwoj eo.

Keememej, Makūtkūt ko Reddik Aitok Kūttier

Ekōnono kōn jerbal in karejar, Sister Jean B. Bingham, Būreejtōn eo Eutiej an Doulul eo an Kōrā ro, kar ba, “Jet iien jej ļōmņak jej aikuj kōm̧m̧ani men ko reļļap im kabwilōn̄lōn̄ n̄an “watōke” āinwōt jipan̄ ro rūtūrir. Ak jipan̄ ko reddik remaron̄ kōm̧m̧an eļap oktak ilo mour an ro jet—barāinwōt kōj make.”¹

Ilo juon ward jidikdik ilo Belgium, Evita ekajoor jipan̄ n̄an ukook n̄an rilotok ro rej kajin Spanish im membōr ro ilo iien kweilo̧k ko an Kabun̄. Juon iien, Evita kar kwaļo̧k kadkadin n̄ane juon armej jān Dominican Republic eo ekar ekkatak kōn Kabun̄ in. Ekar jeļā jidik kajin pālle, ak Spanish ekar kajin eo an. Kōn menin Evita ekar nooje an ukook n̄an e ilo iien kweilo̧k in kwojkwoj eo im ekar ļapļok an em̧man an pād.

“Ukook emaron̄ jet iien kōm̧m̧an bwe Raan in Jabōt eo ao en ļapļo̧k jidik an boub,” Evita ej ba. “Ak ļoor im̧we ko n̄an kajjitōk ippān ro jet eļan̄n̄e rej aikuj juon rukook ej letok n̄an eō ilo ejjeļak pere juon en̄jaake in lan̄lōn̄ im okmeneen ilo jeļā bwe imaron̄ n̄an jipan̄ er en̄jaake Jetōb im m̧ōņōņō ilo kweilo̧k ko aer.”

Ļōmņak ko n̄an Jipan̄ kōn Makūtkūt ko Reddik

Kōnono n̄an ritōl ro am̧ n̄an lale wōn emaron̄ aikuj jidik jerbal in jipan̄ ro jet ilo iien kweilo̧k in kwojkwoj eo. Ak eļan̄n̄e kwojeļā juon armej eo aikuj, kōm̧m̧an bwe ritōl ro am̧ rejeļā kōn er.
Jijōt jab keroro ilo am̧ kōttar an iien kweilo̧k eo ijjinoe. Menin enaaj jipan̄ “ro jet erūb buruweer im jetōb ko aer reburom̧ōj me rej kapooļe kōj”² ko rej aikuj aenōm̧m̧an me emaron̄ itok kōn kautiej ilo juon jikin ekwojarjar.
Ilo Jabōt in Jitlo̧k, ļōmņak in leļo̧k jitlo̧k im jar ko n̄an juon eo kwoj jerbal in karejar n̄ane eo emaron̄ aikuj jidik kaenōm̧m̧an.
Jar n̄an jeļa eļān̄n̄e ewōr juon eo emaron̄ jeram̧m̧an jān am̧ jijōt tūrin ak jijōt ipaakeļo̧k er ilo iien kweilo̧k in kwojkwoj eo ak eļan̄n̄e ewōr juon bar wāween komaron̄ jipan̄.

Kweiļo̧k in Kwojkwoj eo Emaron̄ in juon Jikin Ekaruwainene n̄an Aolep

Būreejtōn Joseph Fielding Smith (1876–1972) kar katakin, “Kweilo̧k in kwojkwoj eo ej men eo eļap an ekwojarjartata, eo eļap an ekwojarjar, iaan aolep kweilo̧k ko ilo Kabun̄ in.”³ Kōn un in, eļap an aurōk n̄an kōm̧m̧an bwe aolep ro rej pād ilo iien kweilo̧k in kwojkwoj eo rej en̄jaake ruwainene im mat ilo jetōb—eļaptata membōr ro rekāāl ak membōr ro rejjan̄in kar bar koba tok.

Merania jān New South Wales, Australia, ekar jemjerā ippān juon kōrā eo ekar ekkatak kōn Kabun̄ in ilo ward eo an. “Em̧ōj an erom̧ juon iaan ro jera rejitōnbōro kiō,” Merania ej ba. “Ij iakwe jijōt ippān ilo iien kweilo̧k in kwojkwoj ko aoelp wiik, im aolep iien ij kajjitōk ejet an pād im elōn̄ ke jabdewōt men imaron̄ kom̧m̧ane n̄an jipan̄e.” Ālikinļo̧k jidik iien, eo m̧ōttan Merania ekar peptaij. Kijejeto ko an membōr ro ilo ward, barāinwōt mejatoto in karuwainene eo ilo kweilo̧k in kwojkwoj eo, ekar kōm̧m̧an eļap oktak ilo kālet eo an.

Ļōmņak ko n̄an Jerbal in Karejar n̄an ro rej Jepļaaktok ak Membōr ro Rekāāl

N̄e kwoj tōn kōnono ilo kweilo̧k in kwojkwoj eo, komaron̄ kūr ro m̧ōttam̧, baam̧le, im ro jet n̄an itok n̄an ron̄jake katak eo am.
Komaron̄ kappukot im karuwaineneik ro rej ajimakeke ak ro rej aikuj jipan̄. Kajjitōk eļan̄n̄e komaron̄ jijōt tūrier ak kūr er n̄an jijōt ippam̧.
N̄e kweilo̧k eo ej jem̧ļo̧k, komaron̄ kūr ro kwoj jerbal in karejar n̄an er im ro jet n̄an m̧akūtkūt ko rej itok an Kabun̄ in, n̄an tampeļ eo, ak n̄an juon iien bwebwenato.
N̄e juon eo kwoj jerbal in karejar n̄ane ej pād ilo iien kweilo̧k in kwojkwoj ak ejjan̄in kar ilo juon iien aitok, komaron̄ kajjitōk ippāer eļan̄n̄e elōn̄ aer kajjitōk kōn ta eo kwar kwaļo̧k kake. Ba n̄an er ke rej ruwainene aolep iien n̄an kepaake eok eļan̄n̄e ewōr juon naan, bwebwenato, ak m̧ōttan katak rejjab meļeļe. Kwomaron̄ kappukot uwaak ko ippān doon eļan̄n̄e emaron̄.

© 2020 jān Intellectual Reserve, Inc. Aolep jim̧we ko rej pād ippān. Kar būriin ilo USA. Kōmālim ilo kajin Pālle: 6/19. Kōmālim an ukook: 6/19. Ukook eo an Ministering Principles, June 2020. Marshallese. 16988 874