Ekōjkan Kōļapļo̧k Naan in Kam̧ool ilo Alikkar

Jerbal in Karejar ej kam̧ool. Ejjeļo̧k kōlaborbor an jerbal in karejar emaron̄ kōļapļo̧k iien ko ad rem̧m̧an n̄an kwaļo̧k naan in kam̧ool ilo wāween ko iminenen kaki im ko jab iminene kaki.

Em̧ōj ad kar kōm̧m̧an bujen n̄an “jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko” (Mosaia 18:9). Kwaļo̧k naan in kam̧ool ko ad ej m̧ōttan jutak āinwōt juon rikam̧ool im ej juon wāween ekajoor n̄an kūrtok Jetōb Kwojarjar eo n̄an un̄ur būruwōn juon im ukōt mour eo aer.

“Naan in Kam̧ool—m̧ool in naan in kam̧ool, ļotak jān Jetōb eo im kar kapene jān Jetōb Kwojarjar eo—ej ukōt mour ko,” Būreejtōn M. Russell Ballard Ripinej Jenkwan Būreejtōn an Doulul eo an Jon̄oulruo Rijilōk ro, ekar ba.¹

Bōtaab kwaļo̧k naan in kam̧ool eo ad emaron̄ in kaamijak ak jab em̧m̧an n̄an jet iaad. Bōlen kōnke jej ļōmņak kōn kwaļo̧k naan in kam̧ool eo ad āinwōt juon men jej kōm̧m̧ane ilo kweilo̧k in jitlo̧k im kwaļo̧k naan in kam̧ool eo ak n̄ej jej katakin juon katak. Ilo jekjek ko jeļā kaki emakijkij ad kōjerbal jet naan ko im eoon ko me rej āinwōt jab jejjet ilo bwebwenato.

Kwaļo̧k naan in kam̧ool ko ad maron̄ erom juon kōjeraam̧m̧an aolep raan ilo mour ko ad im mour ko an ro jet n̄e jej meļeļe ewi jon̄an an ļam waan erom in n̄an kwaļo̧k ta eo jej tōmak ilo jekjek ko aolep raan. Erkein rej jet ļōmņak ko n̄an jipan̄ eok ijjino.

Kapidodoiki

Juon naan in kam̧ool ejjab aikuj in ijjino kōn naan eo, “Ikōņaan kwaļo̧k naan in kam̧ool eo aō,” im ejjab aikuj in kōjjem̧ļo̧k kōn, “ilo etan Jisōs Kraist, amen.” Juon naan in kam̧ool ej juon en̄jake kōn ta eo jej tōmak im jeļā bwe em̧ool. Kōn menin n̄an ekōnono ippān eo iturūm̧ ioon iaļ eo kōn juon jorrāān ewōr ippān im n̄an ba, “Ijeļā bwe Anij ej uwaaki jar ko,” emaron̄ in an kajoor wōt jabdewōt naan in kam̧ool kar kwaļo̧k jān jikin ekōnono im̧aan ilo m̧ōnjar eo. Kajoor eo ejjab itok jān naan ko rem̧wilaļ, ej itok jān Jetōb Kwojarjar eo ej kapene m̧ool eo (lale Katak im Bujen ko 100:7–8).

Kajetjet n̄an Jiebtok eo an Bwebwenato Jeļā Kake

Eļan̄n̄e jej m̧ōņōņō in kwaļo̧ke, ewōr iien ko rem̧m̧an aolep ipeļaakid n̄an kajejet naan in kam̧ool eo n̄an bwebwenato ko aolep raan. N̄ān waanjon̄ok:

Juon ej kajjitōk ippam̧ kōn wiikān eo am̧. “Ekar em̧m̧an,” kwoj uwaak. “Kabun̄ eaar ta eo iaar aikuji.”
Juon ej kwaļo̧k meanwōd ālkin jeļā kōn juon apan̄ ilo mour eo am̧: “Ij lukkuun in būromōj.” Kwoj uwaak: “Kom̧ool kōn am̧ kea. Ijeļā bwe Anij enaaj rejtake eō ilo iien in eapan̄. Eaar bar pād ippa m̧oktaļo̧k.”
Juon ej kwaļo̧k: “Ij kōjatdikdik katu in enana ejjab eoktak,” ak “Baj eo em̧ool erum̧ij,” ak “Lale tūrāpik in.” Komaron̄ in uwaak: “Ij m̧ool Anij enaaj jipan̄ ilo aolep men bwe en em̧m̧an.”

Kwaļo̧k En̄jake ko Am̧

Emakijkij ad kōnono ippān doon kōn apan̄ ko ad. N̄e juon ej jiron̄ eok kōn ta eo rej jelm̧ae, komaron̄ kwaļo̧k juon iien ke Anij eaar jipan̄ eok ilo mālijjon̄ ko am̧ im kam̧ool bwe kwojeļā Emaron̄ jipan̄ er barāinwōt. Irooj eaar ba Ej kōkajoorļo̧k kōj ilo mālijjon̄ ko ad “bwe kom̧in maron̄ jutak āinwōt rikam̧ool ro n̄an eō tokālik, im bwe kom̧in maron̄ jeļā kōn m̧ool in bwe N̄a, Irooj Anij, ij loļo̧k armej ro Aō ilo en̄taan ko aer” (Mosaia 24:14). Jemaron̄ jutak āinwōt rikam̧ool ro kōn E n̄e jej kam̧ool kōn ekōjkan An kar jipan̄ kōj ilo mālijjon̄ ko ad.

M̧aanjabpopo

N̄an jet iaad, rej kwaļo̧k naan in kam̧ool eo ilo ejjeļo̧k kōtmāne emaron̄ in kaamijak. Ewōr wāween ko jemaron̄ in karōki im̧aanļo̧k im “pojak iien otemjej bwe [jen] uwaak n̄an jabdewōt armej ej kajjitōk [ippād] kōn unin kōjatdikdik eo ej [ilowaad]” (1 Pter 3:15).

M̧oktata, m̧aanjabpopo emaron̄ meļeļe in lale ekōjkan ad mour. Jej ke karuwaineneik tok Jetōb Kwojarjar eo n̄an mour ko ad im kōkajoorļo̧k naan in kam̧ool ko ad make kajjojo raan kōn mour jm̧we? Jej ke leļo̧k n̄an Jetōb eo iien ko rem̧m̧an n̄an kōnono n̄an kōj im letok n̄an kōj naan ko jej aikuji kōn jar im ekkatak jeje ko rekwojarjar? Āinwōt an Irooj kar kapilōk Hyram Smith, “Kappukot jaab n̄an kwaļo̧k naan eo Aō, ak m̧okta kappukot n̄an bōk naan eo Aō, innām naaj kōtļo̧k loōm̧” (Katak im Bujen ko 11:21).

Ruo, m̧aanjabpopo emaron̄ meļeļe in reim̧aanļo̧k im ļōmņak kōn iien ko rem̧m̧an emaron̄ wōt ippam̧ ilo raan jab eo ak wiik jab eo n̄an kwaļo̧k naan in kam̧ool eo am̧. Komaron̄ pojak n̄an iien kein rem̧m̧an kōn ļōmņak kōn ekōjkan aer maron̄ lewaj n̄an eok juon iien n̄an kwaļo̧k ta eo kwoj tōmake.

Kalimjōk Wōt Rilo̧mo̧o̧r eo im Katak ko An

Būreejtōn Ballard ekar katakin, “Men̄e emaron̄ wōr ad naan in kam̧ool ko kōn elōn̄ men ko āinwōt ro uwaan Kabun̄ in, ewōr m̧ool ko im̧aan tata jej aikuj jokkun wōt juon ilo katakin doon im kwaļo̧ki.” Āinwōt waanjon̄ak ko, eaar kōllaajraki: “Anij ej Jemed im Jisōs ej Kraist eo. Karōk in lo̧mo̧o̧r eo ej pedped ioon Pinmuur eo an Rilo̧mo̧o̧r eo. Josep Smith eaar kōjepļaaktok tarlep eo an gospel eo indeeo an Jisōs Kraist, im Bok in Mormon ej kein kam̧ool bwe naan in kam̧ool eo ad ej m̧ool.” Ilo ad kwaļo̧k m̧ool ko jān tum̧wilaļ in bōro, jej karuwaineneiktok Jetōb eo n̄an kwaļo̧k kam̧ool bwe ta eo jaar ba ej m̧ool. Būreejtōn Ballard kar kōmejajaik bwe “Jetōb eo jab maron̄ kōjbwebweiki n̄e naan in kam̧ool eo erreo kōn Kraist ej kwaļo̧ke.”²

Waanjon̄ak eo an Rilo̧mo̧o̧r eo

An m̧ōk jān juon iaļ ilo Samaria, Rilo̧mo̧o̧r eo eaar bōjrak n̄an kakkije ilo juon aibōj laļ im kar ioon juon kōrā ijo. Eaar jino bwebwenato kōn itōk aibōj jān aibōj laļ eo. Kōjerbal jerbal in an aolep raan me kōrā eo eaar kōm̧m̧ane ekar leļo̧k n̄an Jisōs iien eo em̧m̧an n̄an kam̧ool kōn dān in mour eo im mour indeeo epād n̄an aolep ro rej tōmak ilo E (lale Jon 4:13–15, 25–26).

Juon Naan in Kam̧ool Eļem Waan Emaron̄ Ukōt Mour ko

Būreejtōn Russell M. Nelson eaar jiron̄ juon nōōj eo eaar kajjitōk ippān Dr. Nelson juon kajjitōk ālkin juon iien m̧wijm̧wij eo epen. “Etke kwojjab āinwōt rim̧wijm̧wij ro jet?” Jet rim̧wijm̧wij liin eaar jeļā remaron̄ in jidimkij aer illu im nana kobba lon̄ier ilo aer kōm̧m̧an kain iien m̧wijm̧wij rōt ko reppen.

Dr. Nelson emaron̄ in kar uwaak ilo elōn̄ wāween ko. Bōtaab eaar uwaak, “Kōnke ijeļā Bok in Mormon ej m̧ool.”

Uwaak eo an eaar im̧we nōōj eo im ļeo pāleen n̄an ekkatak Bok in Mormon. Būreejtōn Nelson tokālik ekar peptaiji nōōj eo. N̄oul iiō ko tokālik, ke eaar tōl ilo juon kweilo̧k an stake ilo Tennessee, USA, āinwōt juon Rijilōk ekāāl kar kapiti, Būreejtōn Nelson eaar lem̧ōņōņō kōn juon bar koba ippān doon kar jab kōtmāne ippān ejjab nōōj eo wōt. Liin eaar ba bwe oktak eo an, ekar kōm̧m̧an jān naan in kam̧ool eo an eļem waan im kareel eo an Bok in Mormon, kar jipan̄ tōlļo̧k n̄an oktak eo an bar jet 80 armej ro.³

Juon Kūr n̄an Jerbal

Jab mijak n̄an kwaļo̧k naan in kam̧ool eo am̧. Emaron̄ kōjeraam̧m̧an ro me kwoj jerbal in karejar n̄an er. Ekōjkan am naaj kōjerbal ļōmņak kein ak eo am̧ make n̄an kwaļo̧k naan in kam̧ool eo am̧ rainin?

© 2019 jān Intellectual Reserve, Inc. All rights reserved. Kar jeje ilo USA. Kōmālim ilo kajin English: 6/18. Kōmālim an ukook: 6/18. Ukook eo an Ministering Principles, March 2019. Marshallese. 15764 874