“Jerbal in Karejar kōn Itok, Ļoor Eō,” Liaona, Jeptōm̧ba 2020
Pedped in Katak ko an Jerbal in Karejar, Jeptōm̧ba 2020
Jerbal in Karejar kōn Itok, Ļoor Eō
Ekōjkan an Itok, Ļoor Eō maron̄ jipan̄ eok kōm̧m̧an juon oktak ilo mour ko an ro jet?
Men̄e kwoj pād ippān baam̧le eo am̧, ilo juon kūlaaj ruum ilo Jabōt Jikuuļ āinwōt juon rūkaki ak rijikuuļ, ak ilo jikin jikuuļ, jikin jerbal, ak ijoko jabdewōt, ekkatak jeje ko rekwojarjar kōn Itok, Ļoor Eō ej lewaj eļap iien ko rem̧m̧an n̄an jerbal in karejar n̄an ro jet. Katakin, ālkin men otemjej, “eļapļo̧k jān tōl juon iien ekkōnono ilo Jabōt; ekoba jerbal in karejar kōn iakwe im kōjeraam̧m̧an ro jet kōn gospel eo.”1
Ekkeijel ippān Rijikuuļ ro
Ke Ofelia Trejo de Cárdenas ekar kūr n̄an katakin rūm̧man ded ro ilo ward eo an ilo Mexico City, liin ekar en̄jake bwe juon jem̧jerā epaak ippān rijikuuļ ro an ilo Jabōt Jikuuļ enaaj kar kōļapļo̧k maron̄ eo an n̄an katakin im kōkajoorļo̧k er.
“Eļan̄n̄e eban wōr juon aō jem̧jerā epaak ippān rijikuuļ ro aō im eļan̄n̄e rejjab en̄jake iakwe eo aō, remaron̄ jab tōmak n̄a ilo aō kwaļo̧k naan ko ilo kūlaaj ak kwaļo̧k naan in kam̧ool eo aō,” liin ekar ba. “Remaron̄ en̄jake ke ij juon rūkaki in Jabōt Jikuuļ.”
Bōtaab ekōjkan an Sister Cárdenas ejaake kain jem̧jerā eo eļan̄n̄e ekar katakin wōt juon alen ilo ālkin ruo wiik ko? Ekar loe uwaak eo an kōn technology. Kōjerbal juon app eo etan WhatsApp ilo cell eo an, liin im rijikuuļ ro an ekar jab to raar tōpar doon raan otemjej ilo aer text im voice message. Kiiō, aolep raan m̧okta jān katak eo ilo Jabōt Jikuuļ eo tok juon, juon rijikuuļ in kūlaaj eo ej baļantiōr ej jilkinļo̧k n̄an ro jet uwaan kūlaaj eo juon eoon jān jeje ko rekwojarjar jān katak eo tok juon ippānļo̧k juon an make ļōmņak eo ej iookļo̧k eoon eo. Ālkin riiti eoon eo im ļōmņak eo, ro uwaan kūlaaj eo rej uwaakeļo̧k kōn ļōmņak ko aer make.
“N̄e rej riiti eoon eo, rej jilikinļo̧k juon pija in turin mej eo elem̧ōņōņō bwe in jeļā ke em̧ōj aer riit ak ekkatak eoon im bwe em̧ōj aer ļōmņak kake,” Sister Cárdenas ej ba. N̄e ej jejjet iien eo n̄an katak eo an Jabōt eo tok juon, rijikuuļ ro rej pojak n̄an bōk koņaer.
Ekkeijel ippān doon raan otemjej ekar kōjeraam̧m̧an juon rūm̧man ded eo me ro jinen im jemān rejjab niknik ilo Kabun̄ in.
“Im̧ōņōņō n̄e ij loe an likao in itok n̄an jar kōnke ijeļā bwe n̄an tōbar ijeņ, ej aikuj in dibuk jet kapan̄pan̄ ko,” Sister Cárdenas ekar ba. “Ijeļā bwe eoon ko im ļōmņak ko an rijikuuļ ro m̧ōttan rekar jilikinļo̧k im eoon ko im ļōmņak ko me ekar jilikinļo̧k ke ekar itok n̄an iien eo an rekar kanooj ļap aer kōkajoor e.”
Sister Cárdenas ej ba jerbal in karejar kōn eoon ko ejjab kōbōjrak e ilo katak eo an ilo Jabōt im eoon ko an kūlaaj eo im an ekkeijel aolep raan kōn eoon ko.
“M̧aanjappopo ko aō ekitbuuj jar kōn rijikuuļ ro aō,” liin ej ba. “Ij ļōmņak kōn er ejjab ilo Jabōt wōt bōtaab kajjojo raan ilo wiik eo barāinwōt. Kajjojo iaer ewōr aikuj ko aer rein juon im oktak. Kajjojo iaer rej nejin Anij. Ij ļōmņak kōn er ilo iien aō kōpooj katak ko aō.”
Im n̄e liin ej katakin, liin ej ron̄jake—jim̧or n̄an rijikuuļ ro an im n̄an Jetōb Kwojarjar.
“Rūkaki eo ej Jetōb,” eo me liin emakijkij an ron̄ ilo ainikien ko an rijikuuļ ro an. “Ij aikuj leļo̧k aolepān aō kōnke ta eo rej ba ej revelesōn eo me Jetōb ej leļo̧k n̄an er.”
Kūlaaj Eo Am Ej “Āinwōt Nokon in Jota”
Carla Gutiérrez Ortega Córdoba ej en̄jake an jeraam̧m̧an n̄an erom̧ juon uwaan kūlaaj in Jabōt Jikuuļ eo an Sister Cárdenas kōnke kōn mejatoto in naajdik ilo jetōb im jerbal in karejar. Carla ej ba bwe mejatoto in ej ejaak kōn jet un ko, ekoba:
-
M̧aanjappopo: Kwaļo̧k eoon ko im ļōmņak ko ejipan̄ rijikuuļ ro kōppopo n̄an kūlaaj eo tok juon. “Riiti jeje ko rekwojarjar raan otemjej ej naajdik kōm im kōdepakpakļo̧k jeļā eo am” liin ej kōmeļeļeik.
-
Bōk Koņaam̧: “Kōmij aolep ekkōnono. Menin ekōm̧m̧an bwe en m̧wūlaļļok aō jeļā kōn rijikuuļ ro m̧ōtta, āinwōt ro m̧ōtta ak ro jeiū im jatū.”
-
Iakwe: “Sister Cárdenas ej tōl eok ilo iakwe. Kūlaaj eo am ej āinwōt nokon in jota, ippān jejjo ro jeid im jatid. Ej juon men eaorōk.”
-
Jetōb Kwojarjar eo: “Ewōr juon jetōb eo ekam̧ōņōņō, eineem̧m̧an ilo kūlaaj eo am̧ kōnke kōmij juon wōt ippān Jetōb eo.”
-
Naan in Kam̧ool: “Itok, Ļoor Eō ekar jipan̄ kōpooj eō n̄an kwaļo̧k naan in kam̧ool eo aō. Ewōr juon Aō jeļā em̧wūlaļ kōn Bok in Mormon im Baibōļ eo. Ekōm̧m̧an bwe in maron̄ kwaļo̧k ta eo ij ekkatak ippān rijikuuļ ro m̧ōtta ilo jikin jikuuļ im armej ro ilo jikin jerbal.”
Jerbal in Karejar n̄an Aikuj ko ilo Jetōb
Ke Greg im Nicky Christensen, jān Kentucky, USA, raar riit kōn bujen eo an Ebream ilo jeje ko rekwojarjar ippān ļaddik ro nejier jilu, rekar lo an pen n̄an kōmeļeļeik n̄an er. Raar kāālet āinwōt juon baam̧le bwe kajjojo iaer renaaj kar ekkatak bujen eo an Ebream ippāer make innem kwaļo̧k ta eo rekar loe.
“Kōm kar bōk jet kakobaba ko rekaitoktok limo” Greg ej ba. “Ļaddik eo nejim ruwalitōk iiō dettan ekar ekkatak bwe kar etan Ebream eo m̧okta kar Ebrem. Etan ekar oktak n̄an Ebream kōnke ekar kōm̧m̧an juon kallim̧ur ippān Irooj n̄an oktakļo̧k jān jerawiwi im n̄an mour juon mour ejim̧we. Ikar lukkuun ilbōk bwe ļein ekar maron̄ wanlōn̄tak kōn men jab in.”
Aolepāer rekar ekkatak juon men ekāāl im kar wōr juon iien ekkōnono em̧m̧an kōn ta bujen eo an Ebream im ta meļeļe in n̄an Armej ro Rekwojarjar ilo Raan Ko Āliktata.
“Kōm kijon̄ etal n̄an ruum eo im kajjojo bōk koņaam riiti eoon ko ilo jeje ko rekwojarjar n̄an ekkatak jeje ko rekwojarjar an baam̧le eo am,” Nicky ej ba. “Itok, Ļoor Eō ej pedped ioon eļap tata n̄an katakin jān Jetōb. Kiiō n̄e kōmij ekkatak ippān doon, ij en̄jake im̧we ko jān Jetōb eo n̄an bōkļo̧k n̄an iien ekōnono ko am ilo juon jekjek eoktak pedped ioon aikuj ko an baam̧le eo am.”
Kōjerbal Itok, Ļoor Eō ekar jab jipan̄ wōt baam̧le eo aer bwe en ļapļo̧k aer bōk koņaer im itok limo ilo ekkatak gospel eo an baam̧le, bōtaab ekar barāinwōt jipan̄ Greg im Nicky jerbal in karejar n̄an aikuj ko ilo jetōb an ajri ro nejier.
“Itok, Ļoor Eō ej jipan̄ eō katakin ajri ro nejū,” Nicky ej ba. “Ej barāinwōt jipan̄ eō ņa mejļan elōn̄ kain apan̄ ko jet iien ij jelm̧aeiki kōn ajri ro nejū. Ij en̄jake an ļapļo̧k aō ekkeijel ippān Jetōb, ij ron̄jake epaakeļo̧k, im em̧ōj Aō bōk im̧we ko kōn ewi wāween aō naaj jipan̄ kajjojo ajri.”
Greg ej m̧ōņōņō kōn an aitok iien ekkōnono ko an gospel eo me Itok, Ļoor Eō ej jipan̄ bwe en ejaak ilo baam̧le eo. “Ļaddik ro nejim rej aolep oktak kōn jon̄an eo repād ie kōn jeļā ko aer kōn gospel in,” ļein ej ba. “Itok, Ļoor Eō ekar letok juon wāween n̄an kōm n̄an jipan̄ kajjojo iaer ekkatak pedped ioon aikuj ko aer. Loe aer eddōkļo̧k ilo aer iakwe gospel eo im lale aer make pukōt kilen ekōjkan aer maron̄ kōjerbal jeļā eo kōn gospel eo ilo mour ko aer ekar juon kōjeraam̧m̧an aiboojoj.”
© 2020 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin Pālle: 6/19. Kōmālim an ukook: 6/19. Ukook eo an Ministering Principles, September 2020. Marshallese. 16724 874