Mataupu 7
Tuuina Atu o Sauniga o le Malumalu
Faatalitali i Faamanuiaga o le Talalelei
O lenei mataupu ua faamatalaina mai ai le auala e mafai ona maua ai e ou tuaa ia sauniga o le malumalu.
Ao mai ia Faamatalaga
Faamaumau ia Faamatalaga
Faatino ia Sauniga o le Malumalu
Mafaufau i le auala o le a taliaina ai le talalelei ae le mafai ona mauaina le papatisoga, le meaalofa o le Agaga Paia, ma sauniga o le malumalu. O Vincenzo di Francesca o se tasi na oo i lea aafiaga. I le 1910 na ia maua ai ma faitau se kopi o le Tusi a Mamona lea na masae ese le faavaa ma le itulau autu. Na faatalitonuina i le moni a’ia’i o le tusi, na ia sailia ai mo le tele o tausaga le tapuaiga e ana le tusi. Na ia maua mulimuli ane le Ekalesia ma papatiso ai i le 1951. Na ia faapea atu i le tagata sa papatisoina o ia, “Sa ou tatalo i aso taitasi mo le tele o tausaga mo lenei taimi. … Ou te iloa ua e taitai mai au i le faitotoa lea o le a mulimuli ane avatu ai au i lo’u Tama Faalelagi, pe afai ou te faamaoni” (“Ou te le Susunuina le Tusi!” Liahona, Iun. 1988, 15).
Ua ia te oe ia tuaa i le lalolagi o agaga o e, e pei o Vincenzo di Francesca, na taliaina le savali o le talalelei ma faatalitali mo le mauaina o sauniga o le faaolataga. A o e mafaufau pe o lagona faapefea e ou tuaa, atonu e mafai ona e amata i le malamalama i le manaomia vave o galuega o le malumalu ma talafaasolopito o aiga. Atonu o le a e iloa ai le mafuaaga na faamatala ai e Peresitene Iosefa F. Samita le galuega faafaifeautalai i le lalolagi o agaga e pei o le folafolaina o le “saolotoga i e ua faatagataotauaina” (MF&F 138:31).
Aiaiga Faavae mo le Sauniaina o Igoa mo Galuega o le Malumalu
E masani lava, e mafai ona e faatinoina ia sauniga o le malumalu mo tagata ua maliliu pe a mavae le tausaga pe sili atu foi talu le aso na maliu ai e aunoa ma le iloiloina o le agavaa o le tagata po o le mafuaaga o le maliu. Afai e i ai ni au fesili, faamolemole faafesootai lou epikopo po o le peresitene o le paranesi.
Ae e te lei faatinoina ia sauniga mo se tagata ua maliu na fanau i totonu o le 95 tausaga ua tuanai, ia aumai se faatagaga mai le tagata o le aiga o loo soifua e sili ona latalata i le ua maliu. Atonu e le mananao tagata o le aiga e faatinoina ia sauniga pe atonu foi e mananao e faatino e i latou lava. O tagata o le aiga e sili ona latalata i ai, i lenei faatulagaga: o se toalua, ona sosoo ai lea ma le fanau, sosoo ai ma matua, ona sosoo ai lea ma ona uso ma tuafafine po o tuagane.
Fuafuaina Pe o a Igoa e Tuuina Atu
E nafa oe ma le tuuina atu o igoa o tagata nei mo galuega o le malumalu (e tatau ona atoa ia le itiiti ifo ma le tausaga talu ona maliu le tagata):
-
Tagata patino o le aiga.
-
Laina tuusao o tuaa (matua, matua matutua, matua o matua matutua, ma faapena ai lava, ma o latou aiga).
E mafai foi ona e tuuina atu ia igoa o tagata nei ua maliliu ia le itiiti ifo ma le tausaga:
-
Gafa o aiga moni, vaetama, po o aiga tausi e fesootai i lou aiga.
-
Gafa o aiga lautele (uso o le tama po o tuagane o le tina, tuafafine o le tama po o uso o le tina, tausoga, ma o latou aiga).
-
O e tupuga mai ia te oe lava ia.
-
O ni ē atonu o ni tuaa, o lona uiga o tagata atonu e i ai se sootaga faaleaiga ae le o mafai ona faamaonia ona e le o lava ia faamaumauga, e pei o i latou e tutusa le faaiu ma sa nonofo foi i le mea lava e tasi sa i ai ou tuaa o loo iloa.
Aua nei tuuina atu ia igoa o tagata tou te le aiga, e aofia ai igoa o tagata lauiloa po o igoa na aoina mai i galuega faatino e le faamaoniaina o le sailiga o igoa, e pei o i latou na maliliu i le Fasiotiga Tele o Tagata Iutaia.
E mafai ona e tuuina atu ia igoa o tagata o ni a outou uo. O se faatagaga lenei i le tulafono aoao lea e le tatau ai i tagata o le ekalesia ona tuuina atu ia igoa o tagata latou te le aiga. A o le i faatinoina ia sauniga mo se uo ua maliu, e tatau ona e maua mai se faatagaga mai le tagata o loo soifua pea e sili ona latalata i le ua maliu.
Fuafuaina Pe o A Sauniga e Faatino
Faaaoga ia aiaiga faavae nei e fesoasoani ai ia te oe e iloa ai pe o a sauniga e manaomia ona faatino:
-
Pe a le manaomiaina ia sauniga. O le a faailoa atu e le saite o le Initoneti o le FamilySearch pe a le manaomiaina ni sauniga mo se tagata, e pei o tulaga nei:
-
O tamaiti e fananau mai pe a mavae ona faamauina lo latou tina i se tane, e fananau i totonu o le feagaiga. Latou te le manaomia ona maua le sauniga o le faamauga i matua.
-
O sauniga o le malumalu e le faatinoina mo tamaiti e fananau mai ua maliliu. Peitai, o se tamaitiiti e ola e tusa pe na o sina taimi talu ona fanau mai e tatau ona faamau i ona matua. I nisi atunuu, aemaise lava i Europa, o tamaiti e maliliu i se taimi puupuu talu ona fananau mai e masani lava ona faamaumauina o ni tamaiti e fananau mai ua maliliu. O tamaiti e lisiina e fananau mai ua maliliu i faamaumauga mai nei atunuu e mafai ona faamauina i o latou matua. O le a faailoa atu e le saite o le Initoneti o le FamilySearch ia te oe pe manaomia ona faatinoina se sauniga o le faamauga mo se tamaitiiti na faamaumauina o sē na fanau mai ua maliu. E tatau ona e faamaumauina uma ia tamaiti na fananau mai, ma faailoa soo se tamaitiiti na fanau mai ua maliu.
-
E le faatinoina se papatisoga po o se faaeega paia mo se tamaitiiti na maliu e le i atoa le valu tausaga. E na o faamauga i matua e faatinoina mo ia tamaiti. Afai sa faamauina le tamaitiiti i matua a o soifua o ia pe na fanau foi i le feagaiga, e leai ni sauniga suitulaga e faatinoina.
-
-
Faamauina o ulugalii e leai ni faamaumauga o faaipoipoga. E mafai ona e faamauina se ulugalii ua maliliu o le tasi i le isi pe afai na nonofo faatasi i la’ua o se tane ma se ava a o soifua, e tusa lava pe le o mafai ona maua faamaumauga o le faaipoipoga. E mafai ona e faaaogaina le saite o le Initoneti o le FamilySearch e saunia ai nei igoa mo sauniga o le malumalu e aunoa ma se isi lava faagasologa faamaoniaina.
-
O tamaitai ua maliliu e sili atu ma le faatasi ona faaipoipo. E mafai ona e faamauina se tamaitai ua maliu i alii uma sa ia faaipoipo i ai faaletulafono. Peitai, afai sa faamau o ia i se tane a o soifua, e tatau ona maliliu uma ana tane a o le i mafai ona faamauina o ia i se tane e le i faamau i ai a o soifua.
-
Tagata sa i ai manaoga faapitoa faalemafaufau ua maliliu. O sauniga o le malumalu mo tagata ua maliliu sa i ai ni manaoga faapitoa faalemafaufau e tutusa lava le faatinoina e pei ona faia mo isi tagata ua maliliu.
-
Tagata ua manatu ua maliliu. E mafai ona e faatinoina ia sauniga o le malumalu mo se tagata ua manatu ua maliu pe a mavae le 10 tausaga talu le taimi na manatu ai ua maliu. O lenei aiaiga faavae e faatatau i le (1) tagata ua leiloa mai le taua pe na leiloa i le sami pe ua tautino faaletulafono mai ua maliu ma (2) tagata ua le maua ona o tulaga na manino ai le maliu ae leai se tino na maua. I isi tulaga uma o le leiloa o se tagata, e le mafai lava ona faatinoina ni sauniga o le malumalu seia atoa le 110 tausaga talu le taimi na fanau mai ai le tagata.
-
Isi aiaiga faavae. Faamolemole vaai lou epikopo mo faamatalaga e uiga i mea nei:
-
Sauniga o le malumalu e aafia ai tagata o soifua.
-
Sauniga o le malumalu e faamau ai e o ola i e ua maliliu.
-
Soo se aiaiga faavae e le o ta’ua i luga.
-
Tuuina atu o Igoa i le Malumalu
Pe a maea ona e mauaina faamatalaga uma e manaomia e uiga i se tuaa ma ua taina i totonu i le saite o le Initoneti o le FamilySearch (tagai mataupu 4 o le taiala lenei), ua e saunia e tapena se fomu o le Family Ordinance Request e ave i le malumalu. O lenei fomu o le a faafaigofie ai ona faatinoina ia sauniga o le malumalu mo le tagata. Mulimuli i nei laasaga e saunia ai le fomu:
-
Afai e i ai sau komepiuta ma se Initoneti, alu i le saite o le initoneti o le FamilySearch ma filifili ia sauniga o le malumalu e manaomia ona tuuina atu i ou tuaa. Filifili na o sauniga e mafai ona fai i totonu o se taimi talafeagai. Ona lolomi lea o se fomu o le Family Ordinance Request. E faatagaina oe e le saite o le Initoneti o le FamilySearch e talosagaina se tagata e ese nai lo oe e ave le Family Ordinance Request i le malumalu ma faatino ia sauniga mo ou tuaa. (Tagai i le Help Center i le new.familysearch.org mo faatonuga auiliili i le auala e faaaoga ai le saite o le Initoneti.)
-
Afai ua e faatumuina ia fomu, fesili atu i se faufautua o talafaasolopito o aiga e fesoasoani ia te oe ia maua se Family Ordinance Request mo sauniga o le malumalu lea e manaomia mo tuaa. O le a manaomia ona e tuuina atu le Helper Access Number (Numera Tatala mo se Fesoasoani). (O le numera lenei o fuainumera mulimuli e lima o lau numera o le pepa faamaumau o le Ekalesia. E mafai ona e maua mai lenei numera mai le failautusi o lau uarota.)
Tuu atu lau talafaamaumau o vaega faaleaiga i le faufautua o talafaasolopito o aiga, o le a ia faatulagaina e ta i totonu o le saite o le Initoneti o le FamilySearch ia faamatalaga o loo i ai i au fomu. A maea ona ta i totonu ia faamatalaga i le komepiuta, o le a tuu atu e le faufautua ia te oe se Family Ordinance Request, lea e mafai ona e aveina i le malumalu.
E mafai ona e faia na o galuega mo sauniga o tagata o lau itupa. O i latou e faia ia papatisoga ma faamauga o papatisoga i le malumalu e tatau ona le itiiti ifo ma le 12 tausaga le matutua, ua uma ona papatisoina ma faamauina, ma e tatau ona i ai se pepa faataga o loo aoga o le malumalu. E tatau i alii ona umiaina le perisitua. O i latou e faia isi sauniga o le malumalu e tatau ona maua ia faaeega paia ma ia i ai se pepa faataga o loo aoga o le malumalu.
Faatinoina o Sauniga o le Malumalu
Faatulagaina o se Asiasiga i le Malumalu
I nisi malumalu o le a manaomia ona e faatulagaina se taimi e fai ai ia sauniga. I isi, e mafai lava ona e alu i soo se taimi e tatala ai le malumalu. Afai e i ai soo sau fesili, faafesootai le malumalu a o e fuafuaina lau malaga. E mafai ona ta’u atu e lou epikopo po o le peresitene o le paranesi pe faapefea ona faafesootai le malumalu.
O sauniga o le malumalu e tatau ona faia i lenei faatulagaga:
-
Papatisoga ma le faamauga.
-
Faauuga o le perisitua mo alii ma sauniga amata.
-
Faaeega Paia.
-
Faamauga. (O le faamauga o le faaipoipoga e tatau ona faia pe a maea ona maua uma e le tane ma le ava ia faaeega paia. E mafai ona faamauina ia fanau i matua pe a maea ona faamauina ia matua.)
I le Malumalu
Ia e aveina le fomu o le Family Ordinance Request i le malumalu. O iina, o le a lolomi ai e se tagata faigaluega o le malumalu ia kata o sauniga mo oe, ma mafai ai ona e faaaogaina ia kata e fai ai sauniga.
Soo se taimi lava e mafai ai, e tatau ona e taina i totonu au faamatalaga o le talafaasolopito o aiga i le saite o le Initoneti o le FamilySearch a o le i auai atu i le malumalu, pe fai mai le fale po o se nofoaga autu o talafaasolopito o aiga. Afai e le mafai ona e faia lenei mea, atonu e mafai ona fesoasoani atu tagata faigaluega i nisi malumalu ia te oe e ta i totonu ia faamatalaga ma lolomi ia kata o sauniga pe a e aumaia ia talafaamaumau o vaega faaleaiga ua uma ona e sauniaina. Faafesootai muamua le malumalu ae e te le i alu ia iloa ai pe o maua ai lea auaunaga.
Pe a Maea ona Auai atu i le Malumalu
Pe a maea ona e faia ia sauniga o le malumalu mo se tagata, e mafai ona e faamaoniaina ua uma ona faamaumau le galuega. Tau lava o le saili o le igoa o le tagata lea i le saite o le Initoneti o le FamilySearch.
-
Afai e i ai sau komepiuta e mafai ona maua ai le Initoneti, alu i le saite o le Initoneti o le FamilySearch ma saini i totonu i le masini. Toe iloilo le faamatalaga e uiga ia te oe ma ou tuaa, ma faamaonia ua faamaumau sa’o ia sauniga.
-
Afai e te le maua se Initoneti, fai atu i se faufautua o talafaasolopito o aiga e lolomi se talafaamaumau o vaega faaleaiga mai le saite o le Initoneti o le FamilySearch ua faaalia ai ua maea ona faia ia sauniga mo tagata o lou aiga.
Faamanuiaga o Galuega o le Malumalu
O loo faamamafa mai pea e perofeta o aso e gata ai le taua o le faatinoina o galuega o le malumalu mo o tatou tuaa. Na aoao mai Peresitene Thomas S. Monson:
“O le galuega o le sailia o o tatou tagata ua maliliu ma faamautinoaina ua faatinoina ia sauniga o le faaeaga mo i latou o se aveai mai lo tatou Tama Faalelagi ma lona Alo Pele. La te le tuua i tatou e tauivi na o i tatou, ae peitai, i auala ia e tulaga ese i nisi taimi, ua La saunia ai le ala ma tali mai i a tatou tatalo” (“O Mea Faavaatuia, Faatuatua ma Vavega,” Liahona, Iun. 1996, 19).
Ua saunoa mai Peresitene Gordon B. Hinckley:
“I lea lava agaga o le alofa ma le agaga foai, e ao ona tatou faalauteleina ai i tatou lava i le galuega o le faaolataga o e ua maliliu e ala i galuega i totonu o malumalu o le Alii. O lenei galuega ua sili ona latalata atu i le galuega paia a le Alo o le Atua, o le na tuuina atu lona ola mo isi nai lo soo se isi lava galuega ua ou iloa” (i le Lipoti o le Konafesi, Ape. 1983, 8; po o le Liahona, Iul. 1983, 8).
Na saunoa mai Peresitene Boyd K. Packer o le Korama a Aposetolo e Toasefululua e uiga i faamanuiaga e oo mai ia i latou e punouai i lenei galuega:
“O le galuega o talafaasolopito o aiga o loo i ai le mana e faia ai se mea mo e ua maliliu. E i ai foi se mana tutusa e faia ai se mea i e o loo soifua. O galuega o talafaasolopito o aiga a tagata o le Ekalesia e i ai sona aafiaga lelei, faaleagaga ma fiafia ai i latou o e o loo aafia ai. …
“O le galuega o talafaasolopito o aiga i se tasi lagona o le a faamaoniaina o ia lava pe afai e le faamanuiaina se tasi i le mauaina o le faatagaga mo igoa mo galuega faalemalumalu. O le faagasologa o le sailiga mo le tulitulia o na igoa, o le a aoga uma lava taumafaiga e te taumafai i ai. O le mafuaaga: E le mafai ona e mauaina ni igoa e aunoa ma le iloaina o loo fai ma sui o tagata. O le a amata ona e mauaina mea e uiga i tagata. Pe a tatou sailia o tatou lava gafa, ua amata ona tatou fiafia i le tele o isi mea nai lo na o igoa po o le aofaiga o igoa ua ave i le malumalu. O lo tatou fiafia i ai, o le a liliu atu ai o tatou loto i o tatou tama—tatou te saili ina ia maua i latou ma iloa i latou ma auauna atu ia i latou. O le faia o lea mea ua tatou teu ai oa i le lagi” (“O Lau Talafaasolopito Faaleaiga: O Le Amataina,” Liahona, Aok. 2003, 17).
Faaauauina o Au Taumafaiga
Na aoao mai e le Perofeta o Iosefa Samita ia taunuuga e faavavau o galuega faalemalumalu. I le 1842 sa ia tusia ai se tusi e uunaia ai le Au Paia e faia ia papatisoga mo o latou tuaa ua maliliu:
“Uso e, tatou te le o atu pea ea i lenei savali sili? O atu i luma ae le o le solomuli. Lototetele, uso e; o atu pea, o atu pea i le manumalo! Ia olioli o outou loto, ma ia fiafia tele. … Tuu atu i e ua oti e tautala mai i viiga e faavavau i le Tupu o Emanuelu, o le na faauuina, ae lei i ai le lalolagi, le mea e mafai ai e i tatou ona togiolaina i latou i fafo mai lo latou falepuipui; aua o le a faasaolotoina pagota” (MF&F 128:22).
Ua fesoasoani lenei taiala ia te oe ia e masani ai i galuega o le malumalu ma talafaasolopito o aiga. Ua e aoaoina ia aoaoga faavae ia e faatatau i le togiolaina o e ua maliliu. Ua e aoaoina le auala e ao mai ai ma faamaumau ia faamatalaga o talafaasolopito o aiga. Ua e aoaoina le auala e maua ai ia oa o faamanuiaga o le malumalu mo lou aiga.
Tagai i lenei taiala i le tele o taimi e manaomia ai. E mafai ona e fesili atu i se faufautua o talafaasolopito o aiga mo se fesoasoani pe a e manaomiaina. Faaauau pea au taumafaiga e sue ma togiola ou tuaa. Alu atu i luma ma le folafolaga e faapea o au taumafaiga o le a “faasaolotoina ai [i latou]” (MF&F 128:22).