Mataupu 3

Aoina o Faamatalaga mai le Fale

E mafai ona e aoina mai ia faamatalaga o talafaasolopito o aiga mai le tele o punavai. O nisi e faigofie ona maua nai lo isi. E mafai ona sili atu ona faaalu aoga lou taimi e ala i le aoina o faamatalaga mai punavai ia e latalata atu ia te oe ae e te le i alu i punavai ia e faigata ona maua. Mo se faataitaiga, o lou lava mafaufau e manatua ai mea o se punavai silisili lea o faamatalaga o talafaasolopito o aiga. E mafai foi ona e mauaina ia faamatalaga taua o aiga i faamaumauga o loo maua i lou fale. Mulimuli i uunaiga a le Agaga Paia a o e filifili pe o fea e amata ai le aoina o faamatalaga.

Faaaoga le Saite o le Initoneti o le FamilySearch

O le saite o le Initoneti o le FamilySearch, o loo maua i le new.familysearch.org, atonu ua i ai lava nisi faamatalaga e uiga i ou tuaa. Toe iloilo lenei faamatalaga i le amataga o lau sailiga e aloese ai mai le toe faia o galuega atonu ua maea ona faia.

Faamaumau ia Faamatalaga mai lou Mafaufau

O lou mafaufau o le punavai sili lea o faamatalaga ua maua e uiga i lou aiga. Faamaumau ia igoa e mafai ona e manatuaina ma aso ma nofoaga na fanau ai, faaipoipo ai, maliu ai, ma isi mea taua na tutupu i olaga o ou tuaa. E mafai ona e tusia i lalo lenei faamatalaga i talafaamaumau o vaega faaleaiga ma pepa o le faasologa o gafa po o totonu o se api o sailiiliga, pe mafai foi ona e faamaumauina i le saite o le Initoneti o le FamilySearch (tagai mataupu 4 o lenei taiala).

Aoina o Faamatalaga mai Punavai o le Aiga

O lou aiga o se punavai taua o faamatalaga o talafaasolopito o aiga. Faaalu se taimi e tagai ai mo ni faamaumauga ua i ai i lou aiga. Atonu e te maua ai:

Talafaamaumau o vaega faaleaiga, pepa o le faasologa o gafa, tusi faamanatu, po o maatusi o augatuaa.
Tusi Paia a le Aiga.
Api talaaga, tusi faasoloaso, ma tusi.
Talaaga ma otootoga o le olaga o le tagata lava ia.
Talaaga o le aiga.
Atapue tuai.
Faasilasilaga o maliu ma otiotiga mai nusipepa.
Pepa fanau, pepa faaipoipo, ma pepa maliu.
Pepa resitala o le aiga ma pepa resitala o le tupuaga o le aiga.

Na fautua mai e Peresitene Boyd K. Packer o le Korama a Aposetolo e Toasefululua se ala faigofie se tasi e ao mai ai ia aitema:

“Ia aumai se pusa pepa malo. Soo se atigi pusa lava e leai se afaina. Ia tuu i se mea e faalavelave ai i le auala, … soo se mea lava ia iloagofie ai. I isi vaiaso o le a sosoo ai, ia ao ma tuu i totonu o le pusa ia faamaumauga uma o lou olaga, e pei o lou pepa fanau, tusi faamaonia o lou faamanuiaga, tusi faamaonia o lou papatisoga, tusi faamaonia o lou faauuga i le perisitua, ma tusi faamaonia o lou faauuga i le aoga. Ia ao mai ia tipiloma, o atapue uma, faailoga, po o taui, se tusi faasoloaso pe afai o i ai, o mea uma lava e mafai ona e maua e faatatau i lou olaga; soo se mea ua tusia, pe ua resitalaina, pe ua faamaumauina e molimau ai o loo e soifua ma mea sa e faia” (“O Lau Talafaasolopito Faaleaiga: O Le Amataina,” Liahona, Aok. 2003, 15).

E mafai ona mulimulitaia lea lava faagasologa e tasi mo le aoina o faamatalaga e uiga i ou tuaa. A o e mauaina ia faamaumauga ia e ono i ai ia faamatalaga faaleaiga, ia tuu mea uma e mafai ona e mauaina e uiga ia te oe i se pusa se tasi, faaputuga, po o se faila. Tuu uma mea e uiga i aiga o ou matua po o matua matutua i se isi pusa, faaputuga, po o ni faila e ese mai ai.

I totonu o vaega faaleaiga, e mafai ona e faatulagaina ia faamatalaga e faatatau i tagata taitoatasi i le vaega faaleaiga. Mo tagata taitoatasi, e mafai ona e faatulagaina ia faamatalaga i le faasologa o mea na tutupu, tuu ia faamatalaga i ni vaega se tolu—tamaitiiti, talavou, tagata matua. Atonu e i ai i le faufautua o talafaasolopito o aiga o lau uarota po o le paranesi ni manatu faaopoopo e uiga i le auala e faatulaga ai ia faamatalaga o le talafaasolopito o lou aiga.

A o e aoina mai ia faamatalaga mai faamaumauga e te mauaina i lou aiga, ia faamaumau i le saite o le Initoneti o le FamilySearch po o luga o fomu talafeagai (tagai mataupu 4 o lenei taiala).