Mataupu 6

Aoina o Faamatalaga mai Faamaumauga Lautele

Sili Atu ma Lou Lava Malosi

A uma loa ona e aoina mai ia faamatalaga ma faamaumau ia faamatalaga o le talafaasolopito o le aiga ua uma ona maua mai lou fale ma le aiga, atonu e te manaomia ona saili ia faamaumauga lautele e sue ai nisi faamatalaga. A o faasolo ina faigata au sailiiliga, manatua ia upu a Peresitene Henry B. Eyring o le Au Peresitene Sili:

“A uma ona e mauaina ni nai augatupulaga muamua, o le a faigata teisi atu le auala. … O le a tofotofoina oe e taofi, ma tuu le galuega faigata o le sailiga i isi ua sili atu lo latou atamamai, pe tuu foi e fai i se isi taimi o lou olaga. Ae o le a e lagonaina foi se uunaiga i lou loto e faaauau le galuega, tusa po o le a le faigata.

“A o e filifili ai, ia manatua o igoa o le a faigata tele ona maua, o tagata moni lava na, o loo e nofo aitalafu ai i lou ola ai i lenei lalolagi, ma o le a e toe feiloai i ai i le lalolagi o agaga. … Ua fusia o latou loto ia te oe. Ua i ou lima lo latou faamoemoe. O le a tele atu lou malosi nai lo le mea o i ai, pe a e filifili e galue i le sailia o i latou” (i le Lipoti o le Konafesi, Ape. 2005, 82; po o le Liahona, Me 2005, 79–80).

Faamaumauga Lautele e Sailia

O loo tele ituaiga o faamaumauga lautele e mafai ona e sailia. E masani ona tausia e le malo ma ekalesia ia faamaumauga o mea patino na tutupu i le olaga. Atonu na faamaumauina i nei faamaumauga ia mea na tutupu i le selau tausaga talu ai. I le tele o tulaga na tausia ai ma le faaeteete tele ia faamaumauga. O faataitaiga e aofia ai:

Faamaumauga taua. O faamaumauga taua e masani ona i ai ia aso ma nofoaga na fanau ai, faaipoipo ai, ma maliu ai, ia e taua mo sauniga o le malumalu. O faamaumauga taua e masani lava ona maua i ofisa o le malo ma ekalesia e latalata i nofoaga na soifua ai ia tuaa. I nisi atunuu, o faamaumauga taua e ta’ua foi o faamaumauga o le resitalaga faalemalo.
Faamaumauga o le faitau aofai o tagata. O faamaumauga o le faitau aofai o tagata o se punavai oa o faamatalaga e uiga i tagata taitoatasi ma aiga. E masani lava ona lisiina i nei faamaumauga ia igoa, tausaga, sootaga ma nofoaga na fanau ai, ma galuega. E faitau afe ia faamaumauga o le faitau aofai o tagata ua uma ona pueina i ata ma ua avanoa mo le faafaigofieina ona faaaoga i le Initoneti ma i nofoaga autu o talafaasolopito o aiga i le lalolagi atoa.
Faamaumauga o le malaga mai i totonu o se atunuu. O faamaumauga o le malaga mai i totonu o se atunuu na fatuina ina ua taunuu se tagata po o se aiga i se atunuu fou. E aoga tele nei faamaumauga i le sueina o igoa ma nofoaga na fananau ai tagata o le aiga ma aso na taunuu ai i le atunuu fou. E mafai ona maua le tele o faaputuga o faamaumauga o le malaga mai i le Initoneti ma i nofoaga autu o talafaasolopito o aiga i le lalolagi atoa.
Nusipepa. E mafai ona aofia i nusipepa ia tusiga e uiga i ou tuaa, ma e masani ona aofia ai ia faasalalauga o maliu o tagatanuu o le lotoifale. O faasalalauga o maliu e masani lava ona i ai ni auiliiliga taua e uiga i se tagata, e aofia ai faamatalaga e uiga i le nofoaga na fanau ai, aso fanau, tagata o le aiga, tapuaiga, ma le nofoaga na falelauasi ai.
Faamaumauga a ekalesia. E mafai ona maua i faamaumauga a ekalesia ni faamatalaga e le o maua i isi ituaiga o faamaumauga. E masani lava ona tausia e ekalesia ia faamaumauga o aso fanau, faaipoipoga, ma maliu pe afai e le i faamaumauina e le faigamalo i le lotoifale. E mafai ona i ai se matafaioi taua a nei faamaumauga i au sailiiliga mo faamatalaga faaleaiga.
Faamaumauga o fanua maliu. O faamaumauga o fanua maliu, e pei o maafaamanatu ma faamaumauga a le tagata e tausia ia falelotu, e ono tuuina atu ai aso fanau ma aso maliu, le matua na maliu ai, igoa o le toalua, igoa o le fanau, ma igoa a o le i faaipoipo. E seasea lava ona ta’ua igoa o nofoaga na fanau ai. Atonu e i ai i maafaamanatu ia faailoga po o faailoga faaleaiga o ta’u mai ai ni auaunaga faamiliteli ma ni sootaga faaagafesootai, faaleuo pe faalelotu.

Aoina o Faamatalaga mai Faamaumauga Lautele

Ina ia amata ona faaaogaina ia faamatalaga lautele, mulimuli i laasaga nei:

Tatalo mo le taitaiga. O le a tele ni filifiliga e te faia, e aofia ai ni filifiliga po o ai ia tuaa e taulai atu i ai, o a faamatalaga e sueina, o a faamaumauga e sailia, ma pe o fea e maua ai na faamaumauga. Ole atu i le Alii e taiala oe ma fesoasoani ia te oe e fai ia faaiuga tonu.
Filifili se tuaa. O le a sili atu lou mataalia pe a e taulai atu i le aoina o faamatalaga e uiga i se tuaa po o se aiga se tasi. Atonu foi e te manao e faailoa ia mea patino na tutupu—e pei o le fanau mai, maliu, po o le faaipoipoga—lea e te manao e saili ia faamatalaga.
Faaaoga le Siata e Filifili ai Faamaumauga. Pe a uma ona e filifili pe o a faamatalaga e te manao e sue, faaaoga le Siata e Filifili ai Faamaumauga o loo i le faaopoopoga I e fesoasoani ai ia te oe e filifili pe o a faamaumauga e tatau ona e sailia. Pe a talafeagai ai, fesili atu i lou faufautua o talafaasolopito o aiga mo se fesoasoani.
Sue le faamaumauga. Asiasi atu pe faafesootai le nofoaga o loo tausia ai ia faamaumauga. E mafai ona e asiasi i ai, pe tusi atu i ai, i-meli, pe faaaoga le initoneti e saili ai faamaumauga. O faamaumauga aoga e mafai ona teumaluina i nofoaga autu o talafaasolopito o aiga, potutusi, nofoaga e teu ai faamaumauga ua au tausāgā, lotu, falefaamasino, ma luga o saite o le initoneti. O loo faamatala atu i lalo nisi o nei nofoaga:

Nofoaga autu o talafaasolopito o aiga. Ua i ai i le Ekalesia ia faamaumauga lautele o ata mataninii mai le lalolagi atoa. O ata faafuainumera o le tele o nei faamaumauga e mafai ona maimoaina i luga o le initoneti i le www.familysearch.org>. O nisi o nei faamaumauga ua na o ata mataninii e maua ai. E mafai ona e okaina ia kopi o nei ata mataninii i se nofoaga autu o talafaasolopito o aiga mo sina tau itiiti, ona faaaoga lea o ata i le nofoaga autu mo ni nai vaiaso. O le okaina o ata mataninii mai se nofoaga autu o talafaasolopito o aiga o se ala faigofie toe taugofie e saili ai i faaputuga o faamaumauga e aunoa ma le tau malaga mamao.

Saite o le Initoneti. Atonu e mafai e lou faufautua o talafaasolopito o aiga ona fautua atu ni saite o le Initoneti mo oe e saili i ai. O ofisa o le malo, setete, nuu i tua, ma itumalo i le lalolagi e faasalalauina a latou faaputuga o faamaumauga i luga o le Initoneti. E mafai ona e siakia nei saite o le Initoneti mo faaputuga o faamaumauga taua, nusipepa, faamaumauga o le talafaasolopito o le lotoifale, ma faamaumauga faale-ekalesia. E faatagaina e nisi o nei saite ia tagata e maimoa i a latou faaputuga o faamaumauga e aunoa ma se tau. O le tele o saite o talafaasolopito o aiga i le Initoneti ua maua i lo outou nofoaga autu o talafaasolopito o aiga i le lotoifale e aunoa ma se tau.

Nofoaga e teu ai faamaumauga ua tausāgā ma faletusi. O nofoaga e teu ai faamaumauga ua tausāgā faalemalo, setete, nuu i tua, ma itumalo e teuina ia faamaumauga ua fatuina e faalapotopotoga a le malo. Ua teuina foi i faletusi lautele le tele o faamaumauga taua, e pei o nusipepa ma faasalalauga o maliu. Afai e te le mafai ona mauaina ni faamaumauga o ou tuaa i le Initoneti, atonu e te manao e asiasi atu i nofoaga e teu ai faamaumauga ua tausāgā a le malo po o faletusi i le lotoifale i nofoaga sa soifua ai ou tuaa. Talosaga atu i lou faufautua o talafaasolopito o aiga e fesoasoani atu ia te oe e fuafua au asiasiga i nei faalapotopotoga.

Tausiaina o Faamatalaga i Mea ua E Maua

O se faamaumauga o sailiiliga o se faamaumauga lea o nofoaga sa e sue i ai mo faamatalaga o talafaasolopito o aiga ma mea na e mauaina. O se faataitaiga o se faamaumauga o sailiiliga o loo aofia ai i le faaopoopoga A. E fesoasoani faamaumauga o sailiiliga ia te oe e faatulaga au galuega ma taofia oe ma isi mai le toe faia o sailiiliga lava e tasi ua uma ona fai. Faamaumau ia faamatalaga nei i lau faamaumauga o sailiiliga:

O Ai? Tusi le igoa o le tagata o loo e sailiina ma le faamatalaga fesootai mo tagata e mafai ona fesoasoani i lau sailiga.
O le a. Faamaumau ou faamoemoega o sailiga, o ituaiga o punavai e te faaaogaina, ma mea ua e mauaina, e tusa lava pe o mea uma ua e maua o le mutaaga lea.

Ata
faamaumauga o sailiiliga ua faatumuina
O fea. Faamaumau le nofoaga po o le numera e faailoa ai le nofoaga o loo i ai se faamaumauga mo punavai taitasi ma nofoaga na tutupu ai mea i olaga o ou tuaa.
O anafea. Tuu i ai ma le aso pe a e faaaogaina se punavai patino, ma faamaumau ia aso o mea taua na tutupu i olaga o ou tuaa.