Na molimau mai perofeta o le Feagaiga Tuai i le afio mai o le Faaola —o se tupuaga o le Tupu o Tavita o le a laveaiina Lona nuu. O Iesu Keriso o “le Ieova Silisili o le Feagaiga Tuai, le Mesia o le Feagaiga Fou” (“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 2). I lenei lesona, o le a sailiili ai e tamaiti aoga nisi o valoaga ia Iesu Keriso o le Feagaiga Tuai ma iloa ai pe na faapefea ona tali atu nisi tagata ina ua feagai ma le taliaina po o le teenaina o Iesu Keriso i le avea ai ma Mesia.
Faitauga Faaopoopo
G. Homer Durham, “Jesus the Christ: The Words and Their Meaning,” Ensign, May 1984, 14–16.
“O Le Misiona Paia a Iesu Keriso: Mesia,” Ensign po o le Liahona, Aok. 2014, 7.
Fesili i tamaiti aoga pe na latou aafia i se folafolaga na umi o faatalitali po o le vaai i le taunuu mai o se uo po o se tagata o le aiga na umi o faatalitali. Tau atu i tamaiti aoga o le lesona i le aso e sailiili ai i se aafiaga faapena i tagata Iutaia anamua. Valaaulia se tamaitiiti aoga e faitau leotele le Isaia 61:1–2. Ona fesili atu lea:
O ai e faatatau i ai lenei valoaga?
Faaali le vitio “Jesus Declares He Is the Messiah” (3:24) mai le The Life of Jesus Christ Bible Videos. (Sii mai ma muai matamata le vitio a o lei faia le vasega.) Valaaulia tamaiti aoga e mulimuli i le Luka 4:16–21 a o latou matamata.
A uma le vitio, fesili atu:
E faapefea ona e otootoina le savali a le Faaola i Nasareta i lena aso? (A o tali mai tamaiti aoga, ia mautinoa e taulai atu le talanoaga i le fuaiupu 18 ma le fuaiupu 21.)
O le a sou manatu i le taua o fuaitau “ua na faauu mai ia te au” ma “o le aso nei ua taunuu ai lenei tusi o outou ua faalogologo ai”? (Ina ia fesoasoani i tamaiti aoga e malamalama o le Mesia ma Keriso o o la uiga uma “ o Le ua Faauuina,” valaaulia i latou e faitau le tusiga mo le “Mesia” i le Taiala i Tusitusiga Paia (tagai i le scriptures.lds.org).
Na faapefea ona faataunuuina e Iesu le valoaga mai ia Isaia lea na Ia sii maia (tagai i fuaiupu 18–19)?
Faaali atu pe tusi seti nei o fuaitau o mau i le laupapa, ma valaaulia tamaiti aoga e filifili se tasi pe lua e suesue i ai. A o faatusatusa e tamaiti aoga ma iloilo eseesega o fuaitau na latou filifilia, fai atu ia i latou e mafaufau pe aisea ua tuufaatasi ai fuaitau ma po o a mea ua latou aoao mai e uiga ia Iesu Keriso.
Valaaulia tamaiti aoga e faasoa mai mea na latou aoaoina. (E ui atonu latou te faaaogaina ni upu eseese, e tatau i tamaiti aoga ona malamalama o Iesu Keriso na afio mai, soifua, ma maliu e faataunuu ai valoaga faamesia. Faamamafa atu o le meamoni lenei na faailoa atu e le Faaola i Nasareta. Faitau leotele le Luka 4:28–29. Ona fesili atu lea:
Na faapefea ona tali mai tagata i le sunako i Nasareta i le faaaliga a Iesu?
Tau atu i tamaiti aoga faapea i ni nai tausaga mulimuli ane, na maua ai e Iesu se tali e matuai ese lava mai nisi o tagata i Ierusalema. Valaaulia ni tamaiti aoga e feauauai e faitau leotele mai le Mataio 21:1–11. A o lei faitau tamaiti aoga, uunaia le vasega e vaai faalemafaufau o loo latou i ai i le tala ua faamatalaina i lenei fuaitau. Faamatala i tamaiti aoga faapea a o latou aoao e vaai faalemafaufau i mea o loo tutupu i mau, o le a latou tuuina atu i le Agaga Paia avanoa faaopoopo e aoaoina ai i latou.
Aisea na tali atu ai tagata i Ierusalema i lea auala? (Na latou iloaina o Iesu o le Mesia sa umi ona faatalitali i ai.)
O le a sou manatu o le a faapefea ona e tali atu?
Faasino atu le upu Osana i lefuaiupu 9; ona faasoa atu lea o le faamatalaga lenei:
“[Osana o se] upu mai Eperu o lona uiga ‘faamolemole faaola i matou’ ma o loo faaaogaina i viiviiga ma talosaga.
“… I le ulufale manumalo atu o le Alii i Ierusalema, na alalaga atu le motu o tagata ‘Osana’ ma fola lau o pama mo Iesu e tietie atu ai i luga, ua faaalia ai lo latou malamalama o Iesu o le Alii lava lea na laveaiina Isaraelu anamua (Sal. 118:25–26; Mata. 21:9, 15; Mareko 11:9–10; Ioane 12:13). O nei tagata na latou iloaina o Keriso o le Mesia na umi ona faatalitali i ai. O le upu Osana ua avea ma faailogaina o le Mesia i augatupulaga uma (1 Ni. 11:6; 3 Ni. 11:14–17). O le alaga o le osana na aofia ai i le faapaiaina o le Malumalu i Katelani (MF&F 109:79) ma ua avea nei o se vaega o le faapaiaga o malumalu i aso nei” (Taiala i Tusitusiga Paia, “Osana”; scriptures.lds.org).
Mafaufau e faaali atu faamoemoega nei o valoaga faalemesia (fetuunaia mai ia Bruce R. McConkie, The Promised Messiah: The First Coming of Christ [1978], 28–32):
O valoaga faalemesia na mafai ai e i latou na soifua a o lei fanau mai Iesu Keriso ia maua le faatuatua ia te Ia, lea na fesoasoani ia i latou e maua le faaolataga (tagai i le 1 Nifae 10:4–6; 2 Nifae 25:18–20, 26; Mosaea 3:13).
O valoaga faalemesia na mafai ai e i latou na soifua i le taimi o Keriso ona iloa o Ia o le e faataunuuina na valoaga, o lea, na fesoasoani ai ia i latou e maua le faaolataga (tagai i le Ioane 4:25, 29).
O valoaga faalemesia na fesoasoani ia i latou na soifua ina ua mavae le galuega faaletino a Iesu Keriso ia iloa ai o Ia ua faataunuu ai valoaga, o lea e fesoasoani ai ia i latou e maua le faaolataga (tagai i le Galuega. 3:12–18; 26:22–23).
A o e mafaufau i nei faamoemoega e tolu, e mafai faapefea ona faamanuiaina oe i le aoao e iloa valoaga faalemesia i tusitusiga paia ma vaai ia Keriso o le faataunuuina o na valoaga?
Toe tau atu faapea o tagata Iutaia i taimi o le Feagaiga Fou na talitonu o le Mesia o le a i ai se aso e afio mai ai i le gafa o Tavita e faaola Lona nuu. O le toatele sa talitonu o le a Ia laveaiina i latou mai le nofopologa ia Roma e pei ona laveaiina e Ieova tagata Isaraelu mai Aikupito.
Fai atu i tamaiti aoga e faitau faavave i le tala i le Ioane 6:5–15. Fesili atu:
O le a le vavega na faia e Iesu i lenei tala?
E faapefea ona e faamatalaina le tali mai o tagata i fuaiupu 14–15?
Aisea e te manatu ai na latou tali atu ai faapea?
Faasoa atu le malamalamaaga lenei a Elder Bruce R. McConkie (1915–85) o le Korama a Aposetolo e Toasefululua:
Ata
Elder Bruce R. McConkie
“Sa i ai se tu masani, na aoaoina e Taitai ma na mausali le mauaa i manatu o tagata lautele, faapea a afio mai le Mesia, o le a ia fafagaina i latou i le areto mai le lagi” (The Mortal Messiah, 4 vols. [1979–81], 2:367).
Faamatala atu faapea e pei lava ona fafagaina e Ieova le fanauga a Isaraelu i le manai (tagai i le Esoto 16, ina ua fafagaina e Iesu le motu o tagata i falaoa e lima ma ia e lua, e toatele na faaliliuina Lana vavega o se faailoga o Ia o le Mesia.
Valaaulia ni nai tamaiti aoga e feauauai i le faitauina leotele mai o le Ioane 6:31–32, 49–53, 60, 66. Fai atu i le vasega e mulimuli i ai ma vaai pe na faapefea ona tali atu tagata ia Iesu i le aso na sosoo ai ma le ala na Ia tali atu ai ia te i latou.
Aisea e te manatu ai na teena e le toatele Iesu i lena aso?
O le a le mea na latou le malamalama i ai? (O Iesu o le puna o le olaga faaleagaga; o Ia o le Areto o le Ola.)
Valaaulia se tamaitiiti aoga e faitau leotele le Ioane 6:67–69. Ona fesili lea i le vasega:
O le a le mea na faamaonia e le molimau a Peteru i le fuaiupu 69?
Na faapefea ona aafia le olaga o Peteru i lana molimau i le Faaola?
Tusi le fuaiupu e le atoa lenei i le laupapa, ma fesili atu i tamaiti aoga e faamatala mai pe faapefea ona latou faaumaina: Afai tatou te taliaina Iesu Keriso o le Mesia, ona_________________________ .
A uma ni nai tali, valaaulia se tamaitiiti aoga e faitau leotele le fuaitau lenei mai ia Peresitene Tavita O. Makei (1873–1970):
Ata
Peresitene Tavita O. MaKei
”O le mea foi e te mafaufau faamaoni i ai i lou loto e faatatau ia Keriso, o le a iloa ai foi iina le ituaiga tagata o le a e i ai. E leai se tagata e mafai ona ia suesue i lenei uiga paia, ma mafai ona taliaina ana aoaoga e aunoa ma lona iloaina o se aafiaga faagaeetia ma le lelei atoatoa i totonu ia te ia lava” (Aoaoga a Peresitene o le Ekalesia: Tavita O. Makei [2003], 9).
Tuu atu i tamaiti aoga le taimi e tusi ai i lalo o latou manatu e uiga ia Keriso. Valaaulia ni nai tamaiti aoga e faasoa mai mea na latou tusia.
Uunaia tamaiti aoga e mafaufau i mea e mafai ona latou faia i lenei vaiaso e faaalia ai lo latou talitonu ia Iesu Keriso.