“Ua toe faatuina mai [Iesu Keriso] i e ua oti, ua avea ma faapolopolo o e ua momoe’ (1 Korinito 15:20). I Lona tulaga o se Alii toetu, na Ia asiasi atu ai ia i latou na alofagia e Ia i le olaga nei”(“O Le Keriso Soifua: O Le Molimau a le Au Aposetolo,” Ensign po o le Liahona, Ape. 2000, 3). O lenei lesona o le a aoaoina ai le aoaoga faavae ma mea na tutupu e fesootai ma le Toetu o Iesu Keriso. A o faateleina lo latou malamalama ma le molimau i le Toetu, o le a latou maua le malamalama ma le faamoemoe a o latou feagai ma luitau o le olaga faaletino.
Faaali atu le saunoaga lenei a le Perofeta o Iosefa Samita (1805–1844), ma fai i se tamaitiiti aoga e faitau leotele:
Ata
Perofeta o Iosefa Samita
“O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai” (Aoaoga a Peresitene o le Ekalesia: Iosefa Samita [2007], 49).
Talanoaina ma tamaiti aoga le fesili nei:
Aisea i lou manatu ua avea ai isi mataupu faavae uma o ni “faaopoopoga” i le maliu, lagomau, ma le Toetu o Iesu Keriso?
Valaaulia tamaiti aoga e faitau le leoa le Isaia 25:8; Mosaea 16:7–8; ma le Alema 33:22, ma vaai mo mea na valoia e perofeta anamua e uiga i le Toetu o Iesu Keriso. Fai atu ia i latou e lipoti mai mea ua latou mauaina.
Valaaulia le afa o le vasega e suesue fuaitau o mau i le ituagavale o le siata, ma vaai mo faamanuiaga ua tatou maua ona o se taunuuga o le Toetu o Iesu Keriso. Valaaulia le isi afa o le vasega e suesue fuaitau o mau i le koluma taumatau, ma vaai mo mea e ono tutupu pe ana faapea e le toetu Iesu mai le oti. A uma se taimi talafeagai, fesili moni tagata e ofo mai e faamatala mea na latou aoaoina. Fesoasoani i tamaiti aoga e faamatala mai se aoaoga faavae na aoaoina e nei fuaitau i le fai atu o nei fesili:
E tusa ai ma le 1 Korinito 15:20, na saunoa le Aposetolo o Paulo e faapea o Iesu “ua avea ma faapolopolo o e ua momoe.” O le a le uiga o lena fuaitau? (O Iesu Keriso o le tagata muamua lea na toetu mai.)
Fai i tamaiti aoga e toe faitau le 1 Korinito 15:22. Ona fesili atu lea:
E faapefea ona e otootoina le faamanuiaga aoao tatou te maua ona o le toetu o Iesu Keriso? (E tatau i tamaiti aoga ona faaleo mai lenei aoaoga faavae: Ona o le Togiola ma le Toetu o Iesu Keriso, o i latou uma na fanaua i le lalolagi lenei o le a toetutu.
Valaaulia se tamaitiiti aoga e faitau leotele saunoaga nei a Howard W. Hunter (1907–1995) ma Peresitene Marion G. Romney (1897–1988) o le Au Peresitene Sili:
Ata
Peresitene Howard W. Hunter
“A aunoa ma le Toetu, o le a avea le talalelei a Iesu Keriso ma tatalo tauloto o faaupuga poto, ma avea e pei o ni vavega e foliga mai e le mafai ona faamatalaina—a o ni faaupuga ma ni vavega e leai sona iuga manumalo. E leai, o le manumalo sili, o le vavega moni lena: o se taimi muamua lea i le talafaasolopito o le tagata, ua toe faatuina mai ai e le na maliu o ia lava i se tino ola pea. O Ia o le Alo o le Atua, le Alo o lo tatou Tama tino ola pea o i le Lagi, ma o lona manumalo i le oti faaletino ma le faaleagaga o le talalelei lena e tatau ona tautala i ai laulaufaiva Kerisiano uma” (Howard W. Hunter, “O se Molimau a se Aposetolo e Uiga i le Toetu,” Liahona, Iulai 1986, 13).
Ata
Peresitene Marion G. Romney
“‘Ua toetu o ia; e leo iinei.’ (Mareko 16:6.) O nei upu, e manino ma faigofie, i ona uiga faaalia ua na tau mai le mea pito sili ona taua na tupu i le talafaasolopito na tusia” (Marion G. Romney, “O le Toetu o Iesu Keriso,” Liahona, Ape. 1982, 4).
Aisea e te manatu ai o le Toetu o Iesu Keriso o se “mea ua sili ona maoae na faamaumauina i le talafaasolopito”?
O a manatu ma lagona ua e maua i le iloaina faapea ona o le Toetu o Iesu Keriso, o fanau uma a le Tama Faalelagi na fanaua i le lalolagi o le a toetutu?
Faamatala atu o le Toetu ua faaolaina ai i tatou uma e le gata mai le oti faaletino ae faapea foi mai le oti faaleagaga. Ana faapea e leai se toetu, semanu o tagata uma o le a iu lava ina avea e pei o le tiapolo (tagai i le 2 Nifae 9:6–9).
Molimau atu o le Toetu o Iesu Keriso ua faaatoatoaina ai le Togiola ma mafai ai e fanau a le Atua ona toe foi atu i Lona afioaga.
Tuu atu i tamaiti aoga taitasi se atulaina se tasi pe lua o le siata. Fai ia i latou e suesue fuaitau o mau ia latou atulaina atofaina ma faailoa mai po o ai na asia e le Faaola toetu. A maea se taimi talafeagai, tuu atu i tamaiti aoga e lipoti mai mea na latou mauaina. Ona o le le lava o le taimi, uunaia tamaiti aoga e faapuupuu a latou lipoti. Ona talanoaina lea o fesili nei:
I lenei gaoioiga, o le a se mea na e aoaoina e uiga i le tele o faailoaga o le Faaola toetu ma mea na oo i ai tagata taitoatasi?
E ese mai nei fuaitau, o a nisi molimau o Iesu Keriso toetu o loo maua i tusitusiga paia? (Atonu e tau mai e tamaiti aoga molimau a sa Nifae po o le Perofeta o Iosefa Samita.)
Aisea e taua ai le iloa e faapea na tele molimau o le Faaola toetu? (Ia mautinoa e malamalama tamaiti aoga i le upumoni lenei: Ona e tele tagata na molimauina Iesu Keriso toetu, tatou te maua le lagolelei o loo soifua o Ia ma o i tatou, fo’i, o le a toe feola pe a mavae ona tatou feoti.)
Ina ia fesoasoani i tamaiti aoga ia malamalama atili i aoga faaleaoaoga faavae o le Toetu o le Faaola ma aisea, e pei ona aoao mai Iosefa Samita, o isi mataupu faavae uma o ni faaopoopoga i le maliu ma le Toetu o Iesu Keriso, tuu atu i tamaiti aoga taitasi se kopi o le saunoaga lenei a Elder D. Todd Christofferson o le Korama a Aposetolo e Toasefululua. Fai atu i se tamaitiiti aoga e faitau leotele le saunoaga.
Ata
Elder D. Todd Christofferson
“Afai e moni lava na toetu Iesu, o lona uiga e mautinoa lava o Ia o se tagata paia. E leai se tagata ola ua i ai se mana e toe ola mai ai pe a mavae le oti. Ona sa toetu o Ia, e le mafai ai la ona faapea o Iesu ua na o se kamuta, se faiaoga, se aoao, po o se perofeta. Ona sa toetu o Ia, e ao la ona avea Iesu ma se Atua, o le Alo e Toatasi na Fanaua o le Tama.
“O lea, o mea sa Ia aoaoina e moni; e le mafai ona pepelo le Atua [tagai i le Enosa 1:6].
“O lea, o Ia o le foafoa o le lalolagi, e pei ona Ia fetalai mai [tagai, mo se faataitaiga i le 3 Nifae 9:15].
“O lea, e moni le lagi ma seoli, e pei ona Ia aoao mai [tagai, mo se faataitaiga, i le MF&F 76].
“O lea, e i ai se lalolagi o agaga, lea sa Ia asiasi i ai ina ua mavae Lona maliu [tagai i le MF&F 138].
“O lea, o le a Ia toe afio mai, e pei ona fetalaia e agelu [tagai i le Galuega 1:10–11], ma ‘nofotupu patino i luga o le lalolagi’ [Mataupu Faavae o le Faatuatua 1:10; tagai foi i le Taiala i Tusitusiga Paia, “Iesu Keriso, O le Nofotupu o Keriso i le Meleniuma”].
“O lea, o le a i ai se toetutu ma se faamasinoga mulimuli mo tagata uma [tagai, mo se faataitaiga, 2 Nifae 9:15].
“Ona o le moni o le Toetu o Keriso, o masalosaloga la e uiga i le mana silisiliese, malamalama atoatoa, ma le agalelei o le Atua le Tama—o le sa tuuina mai Lona Alo e Toatasi na Fanaua mo le togiolaina o le lalolagi—ua le moni ia. O masalosaloga e faatatau i le uiga ma le faamoemoega o le olaga e le faamaoniaina. E moni lava ua na o Iesu Keriso le suafa po o le ala lea e oo mai ai le olataga i tagata. E moni le alofa tunoa o Keriso, ua maua uma ai le faamagaloina ma le faamamaina o le tagata agasala ua salamo. E moni e sili atu le faatuatua i lo mea e mafaufauina po o se mea e fatuina e le mafaufau. O loo i ai le upumoni silisili ma le atoatoa, ma e i ai ni tulaga faatonuina lē faaituau ma lēmasuia e pei ona Ia aoaoina.
“Ona o le moni o le Toetu o Keriso, o le salamo mai la i soo se soliga o Lana tulafono ma poloaiga o se mea e mafai ona fai ma ia vave ona faia. E moni vavega a le Faaola, e pei lava o Lana folafolaga i Ona soo ina ia latou faia foi lea lava mea e tasi, e oo lava i galuega sili atu [tagai i le Ioane 14:12]. … Ona o le moni o le Toetu o Keriso, o le oti la e le o lo tatou mutaaga lea, ma e ui foi e ‘faatamaia e ilo o [tatou tino], ae [tatou] te iloa atu le Atua i o [tatou] tino[Iopu 19:26]” (“O le Toetu o Iesu Keriso,” Ensign po o le Liahona, Me 2014, 113, 114).
Ua faapefea ona faaalia e le saunoaga a Elder Christofferson le totonugalemu o le Toetu o le Faaola i le aoaoga faavae o le talalelei toefuataiina?
Ina ia fesoasoani i tamaiti aoga ia malamalama atili i le ala e aafia patino ai i latou i le moni o le Toetu, faaali atu le saunoaga lenei a Elder Dallin H. Oaks o le Korama a Aposetolo e Toasefululua ma fai i se tamaitiiti aoga e faitau leotele:
Ata
Elder Dallin H. Oaks
“O le ‘faamoemoe ua ola’ ua tatou maua i le toetu, o lo tatou talitonuga maumaututu lea o le oti e le o le mutaaga lea o lo tatou faasinomaga, ae ua na o se laasaga e tatau ai i le suiga o le faagasologa mai le olaga nei i le tino ola pea. O lenei faamoemoe ua suia ai le vaaiga atoa lava i le olaga i la le tino. …
“O le mautinoa o le toetu tatou te maua ai le malosi ma le faamoemoe e onosaia ai luitau o le olaga o loo feagai ma i tatou taitoatasi, ma i latou tatou te alolofa i ai, o mea e pei o tulaga le atoatoa faaletino, mafaufau, po o lagona ia tatou te o mai ma i tatou ina ua fananau mai pe oo mai foi i le gasologa o le olaga. Ona o le toetu, ua tatou iloa ai o nei faaletonu faaletino ua na o se taimi le tumau!
“O le mautinoa o le toetu tatou te maua ai se lagona malosi e tausia ai poloaiga a le Atua i le olaga nei” (“Toetu,” Liahona, Iulai 2000, 18).
Aisea e taua ai mo i tatou taitoatasi le atiina ae o se molimau i le moni o le Toetu? (E tatau i tamaiti aoga ona faailoa mai le mataupu faavae lenei: Ona o le toetu o Iesu Keriso, e mafai ona tatou maua le faamoemoe ma se vaaiga faavavau a o tatou feagai ma luitau ma faigata o le olaga.)
O a auala ua aumaia ai e le malamalama o le Toetu le faamoemoe ma le fiafia ia te oe po o se isi e te iloa?
Faasoa atu le saunoaga lenei a Tavita O. Makei (1873–1970):
Ata
Peresitene Tavita O. MaKei
“E lua ma le afa tausaga o lagolagoina ma musuia [le au Aposetolo] i le i ai o Keriso. A o lenei ua leai o ia. Ua tuua na o i latou, ma ua foliga mai ua fenumiai ma ua le mautonu i latou. …
“O le a le mea na faafuaseia ai lava ona suia nei soo ma avea ma ni tagata mautinoa, e le fefefe, o ni failauga totoa o le Talalelei a Iesu Keriso? O se faaaliga e faapea ua toetu mai Keriso mai le tuugamau” (Aoaoga a Peresitene o le Ekalesia: Tavita O. Makei [2003], 62).
Valaaulia tamaiti aoga e mafaufau loloto i se tagata latou te iloa e mafai ona faamalosia e ala i le faalogo i le savali o le Toetu. Uunaia tamaiti aoga e sue se taimi o lata mai e talanoaina ai o latou lagona ma molimau ma lena tagata.