“O Le Keriso Soifua: O Le Molimau a le Au Aposetolo”ua aoao mai “[o Iesu] ‘sa femaliuai ma agalelei’ (Galuega 10:38), ae na le amanaiaina o ia” (Ensign po o le Liahona, Ape. 2000, 2). I le avea ai ma soo o Iesu Keriso, e tatau ona tatou mulimuli i Lana faataitaiga o le faia o mea lelei e ui lava e i ai sauaga. I lenei lesona, o le a talanoaina ai e tamaiti aoga pe aisea e tatau ai ona tatou faaalia le alofa lava lea ma le faaaloalo na faaalia e Iesu i e na sauaina o Ia ia i latou e agaleaga ia i tatou ona o o tatou talitonuga. A o tatou mulimuli i le faataitaiga a le Faaola, o le a faamanuiaina i tatou i le lototele e ola ma puipuia lo tatou faatuatua ma o le a mafai ona tatou fesoasoani i isi e faalatalata atili i le Alii.
Amata le vasega i le fesiligia o tamaiti aoga i fesili nei:
Pe a e mafaufau i le olaga o faataitaiga lelei a le Faaola, o le a se mea mai mea uma na Ia faia i le olaga nei e tulaga ese ia te oe?
A uma ona tali mai tamaiti aoga, faitau (pe faasoa atu i au lava upu) le tala lenei na tau mai e Elder Jeffrey R. Holland o le Korama a Aposetolo e Toasefululua e uiga i tamaitai faifeautalai e toalua:
Ata
Elder Jeffrey R. Holland
“Faatasi ai ma se faamemelo ma le faamalosiauga mo tagata uma o e o le a manaomia ona tutu mausali i nei aso e gata ai, ou te fai atu i tagata uma aemaise lava i le autalavou o le Ekalesia pe afai tou te lei faia, o le a e oo lava i se tulaga o le a manaomia ai ona e puipuia lou faatuatua pe atonu foi o le onosaia o nisi o sauaga faaletagata ona o oe o se tasi o Le Ekalesia a Iesu Keriso o le Au Paia o Aso e Gata Ai. O ia taimi faapea o le a manaomia uma ai le lototele ma le amio solia mai ia te outou.
“Mo se faataitaiga, sa tusi mai ia te au talu ai nei se tamaitai faifeautalai: Sa ma vaaia ma lau soa se alii o saofai i luga o se nofoa umi i totonu o le taulaga ma tausami lana aiga o le aoauli. A o ma latalata atu, sa ia tilotilo mai i luga ma iloa mai ma pine faifeautalai. Faatasi ai ma se foliga pāū, sa ia oso i luga ma sii lona lima e po au. Sa fetaui lelei lava ma lau alo, o lea sa ia luai mai ai ana meaai ma leaga uma ai ofu ma amata ona palauvale i upu sili ona mataga. Sa ma savavali ese e aunoa ma se upu. Sa ou taumafai e soloese meaai mai ou mata, ae lagona ai le tau o le potoi pateta i tua o lou ulu. O nisi taimi e faigata le avea ma se faifeautalai aua sa ou manao e toe foi i ai i lena taimi, uu lena alii, ma fai i ai, “O LE A LAU TALA!” Ae ou te lei faia”’(“O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6).
Fai i tamaiti aoga e faitau le leoa le Mataio 5:43–47 ma vaai mo se mataupu faavae na aoao mai e Iesu i Lana Lauga i le Mauga lea na faataitai e nei tamaitai faifeautalai. (Atonu e te manao e fautua atu, a o faitau tamaiti aoga, latou te faataitai le tomai tau suesueina o mau o le suia o le igoa e fesoasoani ai e avea le savali a nei fuaiupu o se savali patino. Ina ia faataitaia lenei tomai, e tatau i tamaiti aoga ona suia i o latou lava igoa upu e te ma le oe.)
O le a se mataupu faavae o loo aoaoina mai e Iesu i nei fuaiupu? (Atonu e faaaoga e tamaiti aoga ni upu eseese, ae tatau ona latou faailoa mai le mataupu faavae lenei: afai o le a tatou mulimuli i aoaoga a Iesu Keriso, e tatau ona tatou aoao e alolofa i o tatou fili ma agalelei i e sauaina i tatou.
O le a le mea e faigata ai ona usiusitai i lenei mataupu faavae o le talalelei?
Faaali atu le faamatalaga lenei i luga o le laupapa:
Faamatala atu e ui lava na taliaina le Faaola e le tele o tagata i Kalilaia ma Iutaia, ma e toatele na vaai i Ana galuega lelei o se molimau o Lona paia, o isi na inoino ma sauaina o Ia ona o Ana galuega lelei.
Lisi fuaitau o mau nei, i le laupapa i lalo o “sa femaliuai Iesu ma agalelei”:
Vaevae le vasega i ni vaega toalaiti, ma tuu atu i vaega taitasi e suesue se tasi o fuaitau o loo lisiina i le laupapa. Fai i tamaiti aoga e faailoa mai i fuaitau taitasi le galuega lelei na faia e Iesu ma le ala na tali mai ai tagata. A maea se taimi talafeagai, fai i tamaiti aoga e lipoti mai mea na latou mauaina. Faasino atu o nei faasologa o fuaitau o loo faaalia ai se mamanu i le soifuaga o le Alii e mafai ona tatou aoao mai ai. Fai atu le fesili lenei:
O le a se mea na e matauina e uiga i tali a le Faaola i sauaga na Ia oo i ai?
Uunaia tamaiti aoga e vaai faalemafaufau i le mea na tupu o loo faamatalaina i le fuaitau na latou suesueina. Ona fesili atu lea:
O a mafaufauga po o lagona e te ono maua pe ana faapea e te molimauina Iesu i lena mea na tupu?
O le a sou manatu i le mea o le a finagalo Iesu e te aoao mai i Ana upu ma amioga i lena taimi? (O se tasi lenei o mataupu faavae e ono faailoa mai e tamaiti aoga: A o tatou saili e mulimuli i le faataitaiga a le Faaola i le agalelei, o le a i ai taimi e tatau ona tatou onosaia ai sauaga.
Tau i tamaiti aoga i Lana Lauga i le Mauga, na fautuaina ai e Iesu Keriso Ona soo i le ala e tali atu ai pe a sauaina i latou. Kopi le fuaitau ma mau fesootai nei i le laupapa, ma tuu atu i tamaiti aoga taitasi e faitau ia le itiiti ifo i le tasi le fuaitau. Fai i tamaiti aoga e faailoa mai se mataupu faavae na aoao mai e Iesu i le fuaitau na latou faitauina e mafai ona taitaia i latou i a latou fegalegaleaiga ma isi.
A maea se taimi talafeagai, fai i tamaiti aoga e faamatala mai mataupu faavae na latou maua ma faaaoga i a latou fegalegaleaiga ma isi tagata. A o faasoa mai e tamaiti aoga mataupu faavae na latou maua i le Mataio 5:21–24, atonu e te manao e faasino atu le 3 Nifae 12:22 ma le Faaliliuga a Iosefa Samita o le Mataio 5 aveese le upu “fua” (Mataio 5:22; tagai foi i le Faaliliuga a Iosefa Samita, Mataio 5:24 [i le Mataio 5:22, vae faamatalaga e]). (A o tali mai tamaiti aoga, faamamafa atu le upumoni lenei:Ua faamoemoe le Tama Faalelagi tatou te mulimuli i le faataitaiga a Iesu Keriso pe a sauaina i tatou mo o tatou talitonuga.)
Faaali atu saunoaga nei a Elder Jeffrey R. Holland ma Dallin H. Oaks o le Korama a Aposetolo e Toasefululua:
Ata
Elder Jeffrey R. Holland
“Puipui o outou talitonuga ma le amio solia ma le agaalofa, ae ia puipuia i latou” (Jeffrey R. Holland, “O le Tau—ma Faamanuiaga—o le Avea ma Soo,” Ensign po o le Liahona, Me 2014, 9).
Ata
Elder Dallin H. Oaks
“O soo o Keriso e tatau ona avea ma faataitaiga o le amiosolia. E tatau ona tatou alolofa atu i tagata uma, avea ma tagata e faalogo lelei, ma faaalia le popole mo o latou talitonuga faamaoni. E ui lava atonu tatou te le ioe [i nisi manatu], ae e le tatau ona tatou le fiafia. O o tatou tulaga ma talanoaga e uiga i ni autu feteenai e le tatau ona tupu ai ni finauga. E tatau ona tatou atamamai i le faamalamalamaina ma le tuliloaina o o tatou tulaga ma le faatosinaina mai o isi tagata. …
“Pe a faasagatau mai le lalolagi i o tatou tulaga, e tatau ona tatou taliaina ni taunuuga le lelei ma le faaaloalo, ma faatino pea le amiosolia i o tatou fili” (Dallin H. Oaks, “Ola Faatasi ma Alolofa i Isi e Eseese o Tatou Talitonuga,” Ensign po o le Liahona, Nov. 2014, 27).
Talanoaina ma tamaiti aoga luitau ma faamanuiaga o le mulimuli i fautuaga a Elder Holland ma Elder Oaks. Ona valaaulia lea o se tamaitiiti aoga e faitau leotele le Mataio 5:9–12.
E tusa ai ma nei fuaiupu, o a folafolaga na faia e Iesu e faigofie ai ona tali atu i auala faaKerisiano pe a sauaina i tatou mo o tatou talitonuga faalelotu?
Valaaulia tamaiti aoga e mafaufau loloto pe faapefea ona latou faaaogaina se tasi po o le sili atu o aoaoga a le Faaola i le Lauga i le Mauga i se sootaga o i ai pe faapefea ona mafai foi ona latou faaaogaina i se aafiaga ua tuanai. Fesili i tamaiti aoga pe i ai nisi e fia faasoa mai o latou manatu i le vasega.
Tuu atu i tamaiti aoga taitasi se kopi o le saunoaga lenei a Elder Robert D. Hales o le Korama a Aposetolo e Toasefululua:
Ata
Elder Robert D. Hales
“E i ai nisi tagata e mafaufau sese faapea o tali e pei o le le gagana, agamalu faamagalo atu, ma le tuuina atu faamaualalo o se molimau e le tinoa pe vaivai foi. Peitai, o le ‘alofa i e ita mai ia [te i tatou], ia faamanuia atu i e ua fetuu mai ia [te i tatou], ia agalelei atu i e ua inoino mai ia [te i tatou]’ (Mataio 5:44 )e manaomia ai le faatuatua, malosi, ao le mea sili o le lototele faaKerisiano. …
“Pe a tatou le taui ma sui—pe a tatou liliu atu le isi alafau ma teena ia lagona o le ita—ua tatou tutu faatasi foi ma le Faaola. Tatou te faaali atu Lona alofa, lea ua na o le pau lena o le mana e taofia ai le fili ma tali atu i e agaleaga mai, e aunoa ma le toe agaleaga atu ia i latou. E le o se vaivaiga lena mea. O Le Lototele Faakerisiano lena. …
“A tatou tali atu i isi, o le a eseese uma lava tulaga. O le mea e lelei ai, ua silafia e le Alii loto o e tuuaia i tatou, ma le ala e mafai ona tatou tali lelei atu ai ia te i latou. A o saili e soo moni le taitaiga mai le Agaga, latou te mauaina musumusuga e talafeagai lelei ma mea taitasi latou te feagai. Ma o mea uma lava tou te fetaiai, o soo moni e tali atu i auala e valaaulia ai le Agaga o le Alii. …
“I le avea ai ma soo moni, e tatau ona avea ma o tatou popolega aupito taua le soifua sololelei o isi, ae le o le sa’o o le tagata lava ia. O fesili ma faitioga tatou te maua ai se avanoa e aapa atu ai i isi, ma faaali atu ai e taua i latou i lo tatou Tama Faalelagi ma i tatou. O lo tatou faamoemoe o le fesoasoani lea ia latou malamalama i le upumoni, ae le o le taupunipuni o o tatou manatu po o le tau faamaonia e sa’o o tatou manatu ae sese isi i se felafolafoaiga faatofamanino. O a tatou molimau faamaoni o tali sili ia ona mamana e mafai ona tatou tuuina atu i e agaleaga mai ia i tatou”(“Lototele FaaKerisiano: O le Tulaga Manaomia o se Soo,” Ensign po o leLiahona, Nov. 2008, 72, 73–74).
Tuu atu i tamaiti aoga se taimi e faitau ma maka mataupu faavae na aoao mai e Elder Hales. Valaaulia i latou e faasoa mai mea na latou maua. A manaomia, talanoaina nisi po o fesili uma nei:
E mafai faapefea e a tatou amioga e faaalia i isi tagata ona aafia lo latou sootaga ma le Atua? (Fesoasoani i tamaiti aoga e faailoa mai le mataupu faavae lenei: A o tatou mulimuli i le faataitaiga a Keriso o le tali atu ma le alofa ma le agalelei i e teena i tatou, e mafai ona tatou faamalosia la tatou sootaga ma le Atua faapea foi ma i tatou lava.
E faapefea ona avea le auala tatou te faia ai isi ma se vaega o le feagaiga o le papatisoga na tatou faia ma le Tama Faalelagi? (O se tasi o auala taua o le tu atu e avea ma molimau i le Atua i taimi uma, i mea uma, ma i nofoaga uma [tagai i le Mosaea 18:9].)
Fesili i tamaiti aoga pe na i ai ni o latou aafiaga na latou mulimuli ai i le faataitaiga ma aoaoga a le Faaola na faatagaina ai i latou e fesoasoani i se tasi e faalatalata atili atu i le Alii. Valaaulia ni nai tamaiti aoga e faasoa mai ni a latou aafiaga.
Uunaia tamaiti aoga e iloilo a latou sootaga ma isi, faailoa mai se tasi e mafai ona faaleleia atili, ma tusi i lalo pe faapefea ona latou faaaogaina nei mataupu faavae i le aso i lena sootaga.