“6. Pagpangulo sa Stake,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2020).
“6. Pagpangulo sa Stake,” Kinatibuk-ang Tamdanan nga Basahon.
Imahe
lider nga nakigsulti sa pamilya
6.
Pagpangulo sa Stake
6.1
Mga Katuyoan sa usa ka Stake
Si Isaias mihulagway sa Zion sa ulahing mga adlaw isip usa ka tolda o tabernakulo nga gipabarog sa mga istaka [stake] (tan-awa sa Isaias 33:20; 54:2). Karon ang Simbahan giorganisar ngadto sa mga stake. Ang matag stake gilangkoban og daghang ward ug gipangulohan sa usa ka presidente sa stake.
Ang Ginoo miestablisar og mga stake alang sa “panagpundok” sa Iyang katawhan ug “alang sa usa ka panalipod, ug … usa ka dangpanan” gikan sa kalibotan (Doktrina ug mga Pakigsaad 115:6). Ang mga miyembro ug mga lider diha sa usa ka stake magtambayayong sa pag-apil sa buhat sa Dios sa kaluwasan ug kahimayaan (tan-awa sa 1.2).
6.2
Kapangulohan sa Stake
Ang presidente sa stake naghupot sa mga yawe sa pagkapari aron sa pagdumala sa buhat sa Simbahan diha sa stake (tan-awa sa 3.4.1). Siya ug ang iyang mga magtatambag nagporma sa usa ka kapangulohan sa stake. Moatiman sila sa mga miyembro sa stake uban sa gugma, motabang kanila nga mahimong tinuod nga mga sumusunod ni Jesukristo.
Ang presidente sa stake adunay upat ka nag-unang mga responsibilidad:
Siya mao ang tigdumalang high priest diha sa stake.
Siya ang mangulo sa buhat sa Dios sa kaluwasan ug kahimayaan diha sa stake.
Siya ang maghuhukom sa kadaghanan [common judge].
Siya ang modumala sa mga rekord, mga panalapi, ug mga kabtangan.
Tungod kay ang presidente sa stake mao ang naghupot sa mga yawe sa pagkapari, ang pipila ka mga responsibilidad iyaha lamang. Kon dili siya makahimo niini, ang usa ka magtatambag mahimong molihok diha sa iyang dapit gawas kon gisulat dinhi nga tamdanan nga basahon. Ang presidente sa stake o iyang magtatambag mokonsulta sa Kapangulohan sa Area kon siya adunay mga pangutana mahitungod sa magtatambag nga molihok sa buluhaton sa presidente sa stake.
Ang presidente sa stake motugyan sa daghang mga buluhaton ngadto sa uban. Kini naglakip sa iyang mga magtatambag, mga high councilor, mga lider sa organisasyon sa stake, sa executive secretary sa stake, ug sa klerk sa stake ug sa mga kaabag nga mga klerk sa stake.
6.2.1
Tigdumalang High Priest
Ang presidente sa stake mao ang nag-unang espirituwal nga lider sa stake. Magpakita siya og ehemplo alang sa stake pinaagi sa paghimo sa buhat sa Ginoo “uban ang kabalaan sa kasingkasing” (Mosiah 18:12). Siya motudlo ug mobayaw.
Ang presidente sa stake usa ka matinud-anong disipulo ni Jesukristo. Matinuoron siya sa iyang mga pakigsaad. Siya maunongon sa iyang asawa ug pamilya. Magpakita siya og ehemplo sa pagkamatarong alang sa iyang pamilya, sa stake, ug sa komunidad. Ang iyang mga magtatambag mga tawo nga adunay samang kinaiya.
Ang presidente sa stake mohatag og giya ug tambag sa mga bishop ug sa ubang mga lider sa stake.
6.2.1.1
Melchizedek nga Pagkapari
Ang kapangulohan sa stake modumala sa tanang naghupot sa Melchizedek nga Pagkapari diha sa stake.
Korum sa mga High Priest sa Stake. Ang presidente sa stake mao ang presidente sa korum sa mga high priest sa stake. Siya ug ang iyang mga magtatambag mao ang kapangulohan niana nga korum. Ang korum sa mga high priest sa stake naglangkob sa mosunod nga dugang nga mga high priest:
Mga bishop ug ilang mga magtatambag
Mga high councilor
Nag-function nga mga patriyarka
Ang mga sakop sa korum sa mga high priest motambong sa mga miting sa korum sa mga elder sa ilang ward kon sila wala sangoni ngadto sa laing lugar. Tan-awa sa 29.3.5 alang sa impormasyon mahitungod sa miting sa korum sa mga high priest sa stake.
Korum sa mga Elder. Ang kapangulohan sa stake adunay responsibilidad sa korum sa mga elder (tan-awa sa 8.3.3.1).
Mga Ordinasyon sa Melchizedek nga Pagkapari. Ang presidente sa stake modumala sa pagtugyan sa Melchizedek nga Pagkapari. Siya usab modumala sa mga ordinasyon ngadto sa mga katungdanan sa elder ug high priest (tan-awa sa 18.10.4).
6.2.1.2
Mga bishopric
Ang presidente sa stake makigmiting uban sa bag-ong mga bishopric aron sa pagtudlo kanila human gayod dayon sa ilang pagkatawag. Siya mopadayon sa pagtudlo ug pag-awhag sa mga bishop diha sa regular nga mga interbiyo, mga miting, ug sa ubang mga sitwasyon.
Ang mga sakop sa kapangulohan sa stake motudlo sa mga bishopric sa ilang mga responsibilidad alang sa mga naghupot sa Aaronic nga Pagkapari ug sa mga batan-ong babaye.
6.2.1.3
Patriyarka sa Stake
Ang presidente sa stake ang modumala sa buhat sa patriyarka sa stake. Siya mopalambo og suod nga relasyon ngadto kaniya. Alang sa impormasyon mahitungod sa pagtawag ug pagdumala sa patriyarka sa stake, tan-awa sa 6.6.
6.2.1.4
Mga Konseho, mga Komitiba, ug mga Miting
Ang presidente sa stake mogiya sa high council ug sa konseho sa stake. Siya mogiya usab sa komitiba sa mga nangulo sa mga hamtong sa stake (tan-awa sa 29.3.9). Siya mosangon sa iyang mga magtatambag sa pagdumala sa mosunod:
Komitiba sa pagpangulo sa kabatan-onan diha sa stake (tan-awa sa 29.3.10)
Komitiba sa mga young single adult sa stake
Komitiba sa single adult sa stake (kon naorganisar)
Ang matag presidente sa stake usa ka sakop sa coordinating council (tan-awa sa 29.4).
Ang kapangulohan sa stake moplano sa mga miting sa stake nga gilista diha sa 29.3. Ang presidente sa stake modumala sa mga miting sa stake gawas kon adunay usa ka Kinatibuk-ang Awtoridad o Area Seventy nga motambong. Ang iyang mga magtatambag mahimong mopahigayon niini nga mga miting. Sila usab mahimong modumala kon wala diha ang presidente sa stake.
6.2.1.5
Mga Calling ug mga Pag-release
Ang mga responsibilidad sa presidente sa stake alang sa mga calling ug mga pag-release gilatid diha sa kapitulo 30. Mahimo niyang sangonan ang iyang mga magtatambag ug mga high councilor sa paghatag og mga calling ug mga pag-release sumala sa gilatid diha sa 30.8. Ang presidente sa stake personal nga mohatag sa mosunod nga mga calling. Alang sa uban, kinahanglan nga makadawat una siya og pagtugot sumala sa gipahibalo.
Mga Magtatambag sa Kapangulohan sa Stake. Kon ang usa ka bag-ong presidente sa stake tawagon, ang tigdumalang Kinatibuk-ang Awtoridad o Area Seventy motawag ug mo-set apart sa iyang mga magtatambag, kinsa girekomendar sa bag-ong presidente sa stake. Kon ang usa ka magtatambag kinahanglan nga i-release o tawagon sa anaa na nga kapangulohan sa stake, ang presidente sa stake mosumiter og rekomendasyon pinaagi sa Leader and Clerk Resources (LCR). Siya mahimong mointerbiyo, motawag, ug mo-set apart og usa ka magtatambag—o mo-release og magtatambag—human makadawat og pagtugot gikan sa Unang Kapangulohan.
Patriyarka sa Stake. Ang presidente sa stake mahimong mointerbiyo, motawag, ug mo-orden og patriyarka human makadawat og pagtugot gikan sa Korum sa Napulog Duha ka Apostoles. Tan-awa sa 6.6.1.
Mga Bishop. Ang presidente sa stake morekomendar og mga lalaki nga tawagon isip mga bishop. Siya usab morekomendar sa ilang pag-release. Siya mosumiter og mga rekomendasyon pinaagi sa LCR. Siya mahimong motawag, mo-orden, ug mo-set apart og usa ka bishop—o mo-release og usa ka bishop—human makadawat og pagtugot gikan sa Unang Kapangulohan. Siya usab motugyan sa mga yawe sa pagkapari nga may kalabotan niini nga calling. Tan-awa sa 30.7.
Mga Presidente sa Korum sa mga Elder. Ang presidente sa stake motawag ug mo-set apart sa mga presidente sa korum sa mga elder. Siya mokonsulta una sa mga bishop. Siya usab motugyan sa mga yawe sa pagkapari nga may kalabotan niini nga calling. Tan-awa sa 8.3.3.1.
Presidente sa Relief Society sa Stake. Ang presidente sa stake motawag ug mo-set apart sa presidente sa Relief Society sa stake.
Ang mga presidente sa stake kinsa dili makahimo sa paggamit sa LCR kinahanglang mokontak sa buhatan sa area aron sa paghimo og mga rekomendasyon kon gikinahanglan.
6.2.1.6
Mga Organisasyon ug mga Programa sa Stake
Ang presidente sa stake adunay responsibilidad alang sa Relief Society sa stake. Siya mosangon og responsibilidad sa iyang mga magtatambag alang sa mga organisasyon sa Young Men, Young Women, Primary, ug Sunday School sa stake.
Ang mga sakop sa kapangulohan sa stake magmiting kanunay uban sa mga kapangulohan sa mga organisasyon nga gisangon ngadto kanila. Niini nga mga miting, sila:
Moseguro nga ang mga kapangulohan nakasabot sa ilang mga responsibilidad.
Magtinambagay mahitungod sa mga panginahanglan sa mga lider sa mga organisasyon.
Kon ang usa ka bag-ong organisasyon sa kapangulohan sa stake gitawag, ang kapangulohan sa stake mopaambit sa tambag ug panan-awon aron masinati sila sa ilang pagserbisyo.
Sa Estados Unidos ug Canada, ang bag-ong organisasyon sa kapangulohan mahimo usab nga makadawat og orientation gikan sa konseho sa kinatibuk-ang organisasyon (tan-awa sa 5.1.2). Sa ubang mga dapit, ang bag-ong kapangulohan mahimong makadawat usab og orientation gikan sa usa ka tigtambag sa organisasyon sa area (tan-awa sa 5.2.5.1). Kini nga orientation ubos sa direksyon sa kapangulohan sa stake. Usa ka sakop sa kapangulohan sa stake o usa ka gisangonan nga high councilor moapil.
Ang presidente sa stake mosangon usab sa iyang mga magtatambag sa pagdumala sa mga programa sa stake kon gikinahanglan. Kini mahimong maglakip sa:
Seminary ug Institute.
Mga programa alang sa mga young single adult ug mga single adult.
Mga kalihokan sa stake.
Musika.
Mga pasilidad sa meetinghouse.
Ang mga sakop sa kapangulohan sa stake magmiting kanunay uban sa mga komitiba, mga high councilor, ug mga espesyalista sa mga programa diin sila gisangonan.
Imahe
miting sa nangulo sa batan-ong babaye
6.2.1.7
Komunikasyon (Public Affairs)
Ang kapangulohan sa stake modumala sa mga komunikasyon nga mga paningkamot diha sa stake. Ang mga sakop sa kapangulohan sa stake adunay nag-unang responsibilidad alang sa maayong reputasyon sa Simbahan diha sa komunidad. Sila magtinguha sa pagtukod og maayong mga relasyon uban sa mga lider sa sibiko ug sa komunidad.
Ang presidente sa stake mao ang nag-unang tigpama-ba sa Simbahan ngadto sa news media bahin sa mga butang nga may kalabotan sa stake. Siya mahimong motugyan niini nga tahas kon gikinahanglan.
Ang presidente sa stake o ang usa ka gisangonan nga magtatambag mahimong moorganisar ug modumala sa konseho sa komunikasyon sa stake. Kini nga konseho motabang sa mga lider sa Simbahan sa pag-ugmad og mga relasyon uban sa mga lider sa sibiko ug komunidad. Motabang usab kini niini mga lider nga epektibong makig-istorya sa mga miyembro sa Simbahan ug sa publiko.
Ang konseho sa komunikasyon mahimong maglakip sa usa ka direktor sa komunikasyon sa stake, kaabag nga mga direktor, ug mga espesyalista kon gikinahanglan. Sila tawagon ug i-set apart sa presidente sa stake o sa gisangonan nga magtatambag o high councilor.
Adunay konseho sa komunikasyon usab diha sa lebel sa coordinating council (tan-awa sa 29.4). Kini naglihok ubos sa direksyon sa usa ka Area Seventy ug giyahan sa direktor sa komunikasyon. Kining konseho sa komunikasyon motabang sa pagpakigsabot og mga relasyon, mga kalihokan, ug mga isyu nga motabok og mga utlanan sa stake. Ang direktor niini nga konseho motanyag og suporta ug pagbansay sa mga konseho sa komunikasyon sa stake.
Ang estraktura sa konseho sa komunikasyon lahi didto sa Area sa Utah. Ang mga Area Seventy sa Area sa Utah makahatag sa mga presidente sa stake sa mga detalye mahitungod niini nga estraktura.
Paggiya sa Buhat sa Dios sa Kaluwasan ug Kahimayaan diha sa Stake
Ang presidente sa stake mao ang modumala sa buhat sa Dios sa kaluwasan ug kahimayaan diha sa stake (tan-awa sa kapitulo 1). Siya motudlo ug moawhag sa mga lider sa stake ug sa mga miyembro niini nga buhat. Ang iyang mga magtatambag ug ang ubang mga lider moabag kaniya.
Siya motabang sa mga miyembro nga mosunod sa ebanghelyo ug mopalambo sa ilang espirituwal nga kalig-on. Siya motudlo kanila sa pag-ampo ug pagtuon sa mga kasulatan. Siya usab motudlo kanila mahitungod sa mga pakigsaad nga ilang himoon kon sila modawat sa mga ordinansa sa kaluwasan ug kahimayaan. Siya moawhag kanila sa pagtahod sa ilang mga pakigsaad.
Ang presidente sa stake molig-on sa mga pamilya. Siya moawhag kanila sa dungan nga pag-ampo ug pagkat-on sa ebanghelyo, lakip na diha sa home evening. Siya motudlo pinaagi sa pulong ug ehemplo nga ang mga calling sa Simbahan mahimong matuman nga dili makabalda sa mga responsibilidad sa pamilya. Siya usab moseguro nga ang mga kalihokan sa Simbahan mosuporta sa mga paningkamot sa mga ginikanan sa pagpadako sa mga anak diha sa pagkamatarong.
Agig dugang sa pagtabang sa mga miyembro nga mosunod sa ebanghelyo, ang presidente sa stake ang modumala sa ubang mga aspeto sa buhat sa Dios sa kaluwasan ug kahimayaan. Pananglitan, siya:
Motabang sa kaigsoonang mga lalaki aron maandam sa pagdawat sa Melchizedek nga Pagkapari (tan-awa sa 18.10.1).
Mogiya sa mga paningkamot sa pag-atiman niadtong nanginahanglan diha sa stake (tan-awa sa 22.9.1
Modumala sa misyonaryo nga buhat diha sa stake ug moawhag sa mga miyembro nga mopaambit sa ebanghelyo (tan-awa 23.4).
Modumala sa mga paningkamot sa pagpalig-on sa bag-ong mga miyembro diha sa stake (tan-awa sa 23.4).
Mointerbiyo sa mga kandidato alang sa misyonaryo nga pagserbisyo (tan-awa sa 24.4.2).
Modumala sa buhat sa templo ug family history diha sa stake (tan-awa sa 25.3.1).
Motabang sa mga miyembro sa pag-andam sa pagdawat sa mga ordinansa sa templo (tan-awa sa 27.1).
Uban sa kapangulohan sa Relief Society sa stake, motudlo ug mosuporta sa mga kapangulohan sa elders quorum ug Relief Society sa ward sa ilang mga responsibilidad alang sa misyonaryo nga buhat (tan-awa sa 23.5.2) ug sa buhat sa templo ug family history (tan-awa sa 25.2.2).
6.2.3
Maghuhukom sa Kadaghanan [Common Judge]
Ang presidente sa stake mao ang maghuhukom sa kadaghanan diha sa stake (tan-awa sa Doktrina ug mga Pakigsaad 107:71–74). Naghupot siya og mga yawe sa pagkapari sa pagdawat og inspirasyon ug paghimo og mga desisyon kalabot sa espirituwal ug temporal nga kaayohan sa mga miyembro sa stake. Niini nga tahas, siya aduna sa mosunod nga mga responsibilidad:
Mopahigayon og mga interbiyo sumala sa gilatid diha sa 31.2. Mahimo usab niyang tugotan ang iyang mga magtatambag sa pagpahigayon og piho nga mga interbiyo (tan-awa sa 31.2.2).
Makigkita sa mga sakop sa stake kinsa nagtinguha og espirituhanong giya, kinsa adunay bug-at nga personal nga mga problema, o kinsa nakahimo og seryosong mga sala. Alang sa mga lagda, tan-awa sa 31.1.
Mopahigayon og mga konseho sa pagkamiyembro kon ang mga miyembro nakahimo og seryosong mga sala (tan-awa sa kapitulo 32
Sa mga butang nga magkinahanglan og pagtugot sa Unang Kapangulohan, ang presidente sa stake mainampingon sa pagkonsiderar sa hangyo. Interbiyohon niya ang tawo aron matino ang iyang katakos.
Human sa interbiyo, ang presidente sa stake mosumiter lamang sa aplikasyon ngadto sa Unang Kapangulohan kon siya makarekomendar niini alang sa pagtugot. Iyang ihulagway ang mga rason sa iyang pagsuporta.
Ang presidente sa stake modumala sa mga rekord, mga panalapi, ug mga kabtangan diha sa stake. Siya mahimong mosangon sa kadaghanan sa trabaho bahin sa mga rekord ug mga panalapi ngadto sa iyang mga magtatambag ug mga klerk. Siya mosangon og usa ka high councilor nga moserbisyo isip representante sa gambalay sa stake ug aron motabang sa pagdumala sa mga kabtangan.
Tan-awa ang mosunod nga mga kapitulo alang sa dugang nga impormasyon:
Mga Kalainan tali sa Awtoridad sa mga Presidente sa District ug sa mga Presidente sa Stake
Sa matag sakop nga district, ang usa ka naghupot sa Melchizedek nga Pagkapari tawagon isip presidente sa district. Siya naghupot sa mga yawe sa pagkapari nga gikinahanglan sa pagdumala (tan-awa sa 3.4.1.1). Siya nagserbisyo sama sa usa ka presidente sa stake apan uban sa mosunod nga mga kalainan:
Siya tawagon ug i-set apart sa presidente sa misyon, human maaprobahi sa Kapangulohan sa Area (tan-awa sa 30.8.4). Ang usa ka presidente sa stake tawagon ug i-set apart sa gisangonan nga Kinatibuk-ang Awtoridad o Area Seventy (tan-awa sa 30.8.3).
Siya mahimong usa ka elder o usa ka high priest. Ang usa ka presidente sa stake kinahanglan nga usa gayod ka high priest.
Siya dili ang presidente sa korum sa mga high priest. Ang mao nga mga korum i-organisar lang diha sa mga stake.
Ang presidente sa district modumala sa tanang naghupot sa pagkapari diha sa district. Hinoon, ang presidente sa misyon mao ang tigdumalang high priest.
Gamit ang pagtugot gikan sa presidente sa misyon, ang usa ka presidente sa district mahimong mointerbiyo sa usa ka igsoong lalaki aron maorden nga usa ka elder. Kini nga pagtugot kinahanglan gayod mahatag alang sa matag sitwasyon. Ang presidente sa district o usa ka tawo ubos sa iyang direksiyon mahimo usab nga (1) mopresentar sa usa ka igsoong lalaki alang sa pagpaluyo ug (2) sa pagpahigayon sa ordinasyon (tan-awa sa 18.10.1.3, 18.10.3, ug 18.10.4). Hinoon, ang presidente sa district dili makaorden og mga patriyarka, mga high priest, o mga bishop.
Gamit ang pagtugot sa presidente sa misyon, ang presidente sa district maka-set apart og mga presidente sa branch (tan-awa sa 18.11). Kini nga pagtugot kinahanglan gayod mahatag alang sa matag sitwasyon.
Siya dili mo-release sa full-time nga mga misyonaryo. Hinoon, siya mahimong moapil uban sa sakop sa kapangulohan sa misyon sa interbiyo sa pag-release. Kon ang mga kakulian sa pagbiyahe o panahon makapalisod pag-ayo sa usa ka sakop sa kapangulohan sa misyon sa pag-release sa piho nga misyonaryo, ang presidente sa misyon mahimong motugot sa presidente sa district sa pagbuhat sa ingon (tan-awa sa 24.8.2).
Siya dili mopahigayon og mga interbiyo sa rekomend sa templo o mopirma og mga rekomend sa templo (tan-awa sa 26.3.1).
Siya dili mopahigayon og konseho sa pagkamiyembro gawas kon gitugotan sa presidente sa misyon (tan-awa sa 32.9.5).
Siya sa kasagaran dili direktang mokontak sa Kapangulohan sa Area. Hinoon, siya motrabaho pinaagi sa kapangulohan sa misyon.
Sa espesyal nga mga sirkumstansiya, ang usa ka presidente sa district mahimong tugotan sa pagrekomend, pag-set apart, ug pag-release og mga misyonaryo. Siya mahimo usab nga tugotan sa pagpahigayon og mga interbiyo sa rekomend sa templo ug mopirma sa mga rekomend. Siya mahimo usab nga tugotan sa pag-set apart sa iyang mga magtatambag. Kon ang Kapangulohan sa Area mobati nga ang presidente sa district kinahanglang aduna niining gipalapdan nga awtoridad, sila morekomendar kaniya ngadto sa Unang Kapangulohan. Kon ang pagtugot ihatag, alang kini niana nga tawo, dili sa posisyon. Kon ang usa ka bag-ong presidente sa district tawagon, kining gipalapdan nga awtoridad dili mabalhin ngadto kaniya.
6.4
Executive Secretary sa Stake, Kaabag nga mga Executive Secretary sa Stake, Klerk sa Stake, ug Kaabag nga mga Klerk sa Stake
6.4.1
Executive Secretary sa Stake, Kaabag nga mga Executive Secretary sa Stake
Ang presidente sa stake o usa ka gisangonan nga magtatambag motawag ug mo-set apart og executive secretary sa stake. Siya kinahanglang naghupot og Melchizedek nga Pagkapari ug adunay balido nga rekomend sa templo.
Ang executive secretary aduna sa mosunod nga mga responsibilidad:
Makigmiting sa kapangulohan sa stake ug moandam sa mga agenda kon gisangonan.
Moserbisyo isip usa ka sakop sa konseho sa stake ug motambong sa mga miting sa high council. Kon suguon sa kapangulohan sa stake, mo-follow up sa mga buluhaton nga gihimo niini nga mga miting.
Mokoordinar sa gimbuhaton sa stake tali sa kapangulohan sa stake, high council, ug sa ubang mga lider sa stake.
Mo-eskedyul usab sa mga appointment alang sa kapangulohan sa stake.
Mopahibalo sa kapangulohan sa stake bahin sa mga miyembro nga mosulod sa militar o anaa na sa serbisyo sa militar. Ubos sa direksyon sa kapangulohan sa stake, mahimong motabang sa pagkoordinar sa oryentasyon sa Simbahan alang sa mga miyembro sa stake nga mosulod sa militar (tan-awa sa 38.9.3).
Mobansay sa bag-ong mga executive secretary sa ward human dayon sa ilang pagkatawag. Mohatag og padayon nga instruksiyon kon gikinahanglan.
Ipadangat ang mga mensahe nga nadawat gikan sa mga empleyado ug mga boluntaryo sa Simbahan ngadto sa tukma nga mga lider sa stake ug sa ward, sama sa gimando sa presidente sa stake (tan-awa sa 38.8.9).
Usa o duha pa nga kaabag nga mga executive secretary sa stake ang mahimong tawagon kon gikinahanglan. Siya tawagon ug i-set apart sa usa ka sakop sa kapangulohan sa stake. Kini nga kaigsoonan kinahanglang adunay balido nga rekomend sa templo.
6.4.2
Klerk sa Stake ug Kaabag nga mga Klerk sa Stake
Ang klerk sa stake tawagon ug i-set apart sa presidente sa stake o sa gisangonan nga magtatambag. Siya usa ka sakop sa konseho sa stake. Ang kaabag nga mga klerk sa stake mahimo usab nga tawagon. Ang presidente sa stake o ang gisangonan nga magtatambag motawag ug mo-set apart kanila. Ang mga responsibilidad sa klerk sa stake ug sa kaabag nga mga klerk sa stake gihulagway diha sa 33.3.2 ug 33.3.3.
6.5
High Council
Ang kapangulohan sa stake motawag og 12 ka high priest aron maporma ang high council sa stake (tan-awa sa Doktrina ug mga Pakigsaad 102:1; 124:131). Kon ang usa ka elder gitawag nga moalagad sa high council, siya ordinahan nga usa ka high priest sa dili pa siya i-set apart.
Ubos sa direksyon sa kapangulohan sa stake, ang mga high councilor motabang sa buhat sa Dios sa kaluwasan ug kahimayaan diha sa stake. Ang ilang mga responsibilidad gihulagway sa mosunod nga mga seksiyon.
Ang high council dili magmiting isip usa ka grupo gawas kon anaay usa ka sakop sa kapangulohan sa stake nga modumala.
6.5.1
Morepresentar sa Kapangulohan sa Stake
Ang kapangulohan sa stake mosangon og usa ka high councilor ngadto sa matag ward diha sa stake.
Ang kapangulohan sa stake mosangon usab og usa ka high councilor ngadto sa matag korum sa mga elder diha sa stake. Niini nga tahas, ang mga high councilor motudlo sa bag-ong natawag nga mga kapangulohan sa korum sa mga elder. Kini naglakip sa paghatag og instruksiyon gikan sa mga kapitulo 1–4 ug 8 niini nga tamdanan nga basahon.
Ang mga high councilor kinsa gisangonan ngadto sa mga korum sa mga elder magmiting kanunay uban sa mga lider sa korum sa pagbuhat sa mosunod:
Makahibalo sa ilang mga panginahanglan.
Motanyag og suporta.
Motudlo nila sa ilang mga responsibilidad, lakip niadtong alang sa misyonaryo nga buhat (tan-awa sa 23.5.2) ug sa buhat sa templo ug family history (tan-awa sa 25.2.2).
Mopahibalo sa impormasyon gikan sa kapangulohan sa stake.
Mohisgot unsaon sa pagtabang ang mga miyembro sa korum kinsa nagkinahanglan sa ilang sunod nga ordinansa. Kini nga impormasyon anaa alang sa mga lider sa korum sa mga elder diha sa LCR.
Kon gikinahanglan o gidapit, sila motambong sa mga miting sa korum sa mga elder ug sa mga miting sa kapangulohan sa korum. Sa panagsa, ang kapangulohan sa korum modapit sa high councilor sa pagkuyog kanila sa ilang pagpangalagad ngadto sa mga miyembro sa ward.
Kon gidapit o gisangonan, ang mga high councilor motambong sa mga miting sa bishopric ug konseho sa ward.
Ang kapangulohan sa stake mahimong mosangon og mga high councilor sa pagtudlo sa mosunod nga mga tawo sa ilang mga responsibilidad alang sa buhat sa templo ug family history ug misyonaryo nga buhat:
Mga kapangulohan sa korum sa mga elder
Mga lider sa misyon sa ward
Mga lider sa ward alang sa templo ug family history
Usa o daghang high councilor mahimong sangonan sa paggiya niini nga mga paningkamot diha sa stake. Hinoon, ang tanang high councilor aduna niini nga mga responsibilidad alang sa mga ward ug mga korum sa mga elder diin sila gisangonan.
Ang mga high councilor magtinambagay uban sa kapangulohan sa stake ug mopaluyo sa ilang mga desisyon sa pag-orden sa kaigsoonang mga lalaki ngadto sa mga katungdanan sa elder ug high priest. Ang presidente sa stake mahimong motugot sa mga high councilor nga morepresentar kaniya kon ang mga lalaki i-orden ngadto niini nga mga katungdanan. Kini nga mga high councilor moseguro nga ang ordinansa gipahigayon sa tukmang paagi.
Ang mga high councilor magtinambagay usab uban sa kapangulohan sa stake ug mopaluyo sa ilang mga desisyon sa pag-isyu og mga calling ngadto sa mga miyembro. Ang kapangulohan sa stake mahimong motugot sa mga high councilor sa pag-isyu og mga calling, mopresentar sa pipila ka miyembro nga paluyohan, ug mo-set apart sa pipila ka miyembro. (Tan-awa sa 30.8.)
Ang kapangulohan sa stake mosangon og mga high councilor nga makigtambayayong sa mga organisasyon sa Young Women ug Primary sa stake. Kon ang usa ka sakop sa kapangulohan sa stake makigmiting sa usa niini nga mga kapangulohan, ang high councilor motambong usab. Ang gisangonan nga mga high councilor motambong usab sa mga miting sa mga nangulo sa stake alang niini nga mga organisasyon.
Ang kapangulohan sa stake mahimong mosangon og mga high councilor sa pag-abag sa mga programa nga gilista diha sa 6.2.1.6. Mahimo usab sila nga mosangon og usa ka high councilor nga motabang sa mga panginahanglan sa mga miyembro nga adunay mga kakulangan sa panglawas (tan-awa sa 38.8.27).
Ang kapangulohan sa stake mahimong mosangon og mga high councilor sa pagrepresentar kanila pinaagi sa pagpamulong diha sa mga panagtigom alang sa sakramento ug sa ubang mga sitwasyon. Ang kapangulohan sa stake motino kon makapila himoon kining mga buluhaton sa pagpamulong. Dili kinahanglan nga ang mga high councilor mamulong sa panagtigom alang sa sakramento matag bulan. Ang presidente sa stake mahimong mosangon usab sa mga sakop sa kapangulohan sa organisasyon sa stake nga mamulong niini nga mga sitwasyon (tan-awa sa 6.7.1 ug 6.7.2).
Imahe
mga lalaki nga nagsultihanay
6.5.2
Moserbisyo sa mga Konseho ug mga Komitiba sa Stake
Ang tanang high councilor moalagad sa konseho sa stake.
Sa limitado nga mga sitwasyon, ang mga high councilor moapil sa mga konseho sa pagkamiyembro diha sa stake (tan-awa sa 32.9.2).
Ang kapangulohan sa stake mosangon og mga high councilor sa pagserbisyo sa ubang mga komitiba. Pananglitan, ang mga high councilor kinsa gisangonan nga makigtambayayong sa mga korum sa mga elder moalagad diha sa komitiba sa mga nangulo sa mga hamtong sa stake (tan-awa sa 29.3.9).
6.5.3
Moserbisyo isip mga Lider sa Organisasyon sa Stake
Ang kapangulohan sa stake motawag ug mo-set apart og usa ka high councilor aron mahimong presidente sa Young Men sa stake (tan-awa sa 6.7.2). Sila motawag ug mo-set apart og laing high councilor nga mahimong presidente sa Sunday School sa stake (tan-awa sa 6.7.1).
6.6
Patriyarka sa Stake
Ang usa ka patriyarka mao ang usa ka katungdanan diha sa Melchizedek nga Pagkapari. Ang mga patriyarka tawagon ug ordinahan aron mohatag og patriyarkal nga mga panalangin ngadto sa takos nga mga miyembro sa Simbahan. Kini nga seksiyon naglatid sa mga responsibilidad sa presidente sa stake alang sa patriyarka sa stake. Alang sa impormasyon mahitungod sa patriyarkal nga mga panalangin, tan-awa sa mosunod nga mga tinubdan:
Mga seksiyon 18.17 ug 38.2.10 niini nga tamdanan nga basahon
Impormasyon ug mga Sugyot alang sa mga Patriyarka
Worldwide Leadership Training Meeting: The Patriarch
Tan-awa sa Impormasyon ug mga Sugyot alang sa mga Patriyarka alang sa impormasyon mahitungod sa:
Mga patriyarka nga gihatagan og nonfunctioning status.
Mga patriyarka kinsa mobalhin ngadto sa laing stake.
6.6.1
Pagtawag, Pagpaluyo, ug Pag-orden og usa ka Patriyarka sa Stake
Ang usa ka patriyarka kinahanglan nga usa ka takos nga naghupot sa Melchizedek nga Pagkapari. Siya kinahanglan nga usa ka hingkod sa iyang pagsabot sa ebanghelyo ug sensitibo sa Espiritu. Siya kinahanglang nakadawat sa iyang kaugalingong patriyarkal nga panalangin. Sa kasagaran kinahanglan nga siya nag-edad og 55 o pataas. Kinahanglan gayod nga minyo siya kon siya tawagon.
Ang Korum sa Napulog Duha ka Apostoles mao ang modumala sa pagtawag sa mga patriyarka sa stake (tan-awa sa Doktrina ug mga Pakigsaad 107:39). Ang presidente sa stake mahimong morekomendar kon kinsa ang tawagon. Siya mosumiter og mga rekomendasyon pinaagi sa LCR. Sa paghimo og rekomendasyon, ang presidente sa stake kinahanglan nga magpuasa ug mag-ampo aron ang Espiritu mogiya kaniya. Ang iyang mga magtatambag kinahanglan mouyon sa rekomendasyon.
Kon ang Korum sa Napulog Duha ka Apostoles motugot sa rekomendasyon, ang presidente sa stake mahimong tugotan sa pag-interbiyo ug pagtawag sa patriyarka. Dayon iyang ipresentar ang ngalan sa patriyarka alang sa pagpaluyo diha sa kinatibuk-ang sesyon sa sunod nga komperensiya sa stake.
Ang presidente sa stake ang moorden sa patriyarka. Siya dili motugyan niini nga responsibilidad ngadto sa usa ka magtatambag. Walay laing mobarog uban niya atol sa ordinasyon. Ang usa ka bag-ong patriyarka unang ordinahan niana nga katungdanan ug dayon i-set apart aron moalagad sa piho nga stake. Ang naordinahan nga patriyarka kinsa gipabalik ngadto sa functioning status dili na ordinahan pag-usab. Hinoon, siya i-set apart.
Ang ordinasyon kinahanglan i-rekord diha sa LCR sa dili pa ang patriyarka makagamit sa mga himan sa online alang sa mga patriyarka.
Ang functioning nga patriyarka usa ka sakop sa korum sa mga high priest ug moapil sa mga miting sa korum (tan-awa sa 29.3.5
6.6.2
Pagtawag og Ikaduhang Patriyarka sa Stake
Ang Korum sa Napulog Duha sa kasagaran dili motugot nga motawag og ikaduhang patriyarka alang sa stake gawas kon ang usa ka patriyarka dili makahatag sa gidaghanon sa mga panalangin nga gikinahanglan. Ni ang Korum sa Napulog Duha normal nga motugot og dugang nga patriyarka tungod kay ang usa ka stake:
Dako kaayo ang hiyograpiya.
Naglakip sa mga miyiembro kinsa dili makasulti sa pinulongan sa kadaghanan.
Kon ang stake maglakip og mga miyembro nga lahi og mga pinulongan, ang mga bishop ug mga kapangulohan sa stake mahimong motugot nga moadto sila sa patriyarka sa duol nga stake kinsa makahatag sa panalangin sa kaugalingong pinulongan sa miyembro.
Imahe
batan-ong babaye nga nagdawat og panalangin
6.6.3
Pagtudlo sa Bag-ong Natawag nga Patriyarka sa Stake
Ang presidente sa stake motudlo sa bag-ong natawag nga patriyarka sa dili pa siya magsugod sa paghatag og mga panalangin. Siya motudlo sa patriyarka mahitungod sa sagrado, mapadayagon nga matang sa iyang katungdanan. Siya mainampingon nga morebyo uban sa patriyarka sa mga instruksiyon diha sa mosunod nga mga tinubdan:
Impormasyon ug mga Sugyot alang sa mga Patriyarka
Worldwide Leadership Training Meeting: The Patriarch
6.6.4
Pagdumala sa Buhat sa Patriyarka sa Stake
Ang presidente sa stake modumala sa buhat sa patriyarka sumala sa gilatid diha sa Impormasyon ug mga Sugyot alang sa mga Patriyarka. Kinahanglan nga dili niya idelegar kini nga responsibilidad ngadto sa usa sa iyang mga magtatambag. Makabenepisyo ang usa ka patriyarka pinaagi sa suod nga pakigrelasyon sa iyang presidente sa stake.
Ang presidente sa stake makigkita sa patriyarka sa labing ubos makaduha sa usa ka tuig. Sila maghisgot sa mga pagbati sa patriyarka mahitungod sa buluhaton, sa kahimsog ug kaayohan sa iyang pamilya, ug sa bisan unsang butang diin nagkinahanglan siya og tambag.
Dili mominos kaduha sa usa ka tuig, ang presidente sa stake morebyo sa mga panalangin nga gihatag sa patriyarka. Kon gikinahanglan, siya mohimo og kinatibuk-ang mga sugyot mahitungod sa sulod sa mga panalangin sa patriyarka.
Ang presidente sa stake moseguro nga ang mga kopya sa nasulat na nga mga panalangin mahatag dayon sa mga gipanalanginan. Siya usab moseguro nga ang tanang mga panalangin gisumiter ngadto sa punoang buhatan sa Simbahan. Ang mga panalangin kinahanglang isumiter pinaagi sa Patriarchal Blessing System sa ChurchofJesusChrist.org. Kon ang sistema dili magamit, ang mga panalangin kinahanglang ipadala ngadto sa mosunod nga address dili mominos kada unom ka bulan:
Church History Library
Attn: Mga Panalangin sa Patriyarka
15 East North Temple Street
Salt Lake City, UT 84150-1600
6.6.5
Pagkakompidensyal sa Patriyarkal nga mga Panalangin
Ang presidente sa stake moseguro nga human makahatag ang patriyarka og kopya sa patriyarkal nga panalangin ngadto sa nangayo ug misumiter niini ngadto sa punoang buhatan sa Simbahan, ang uban pa nga mga papel ug mga kopya nga elektronik kinahanglang gub-on o papason. Ang patriyarka moseguro nga ang mga panalangin nga napapas gikan sa iyang computer dili na makuha pagbalik.
6.6.6
Mga Patriyarka nga Gitawag ngadto sa Laing Katungdanan sa Simbahan
Ang patriyarka dili mahimong tawagon ngadto sa katungdanan nga pang-administratiba sa Simbahan gawas kon ang Korum sa Napulog Duha ka Apostoles motugot na daan sa tawag. Ang ingon nga mga katungdanan naglakip sa usa ka sakop sa bishopric; high council; o kapangulohan sa stake, sa misyon, o sa templo. Kon ang pagtugot gihatag, ang patriyarka hatagan og nonfunctioning status.
Ang usa ka patriyarka mahimong tawagon nga moalagad sa ubang mga calling nga walay pagtugot gikan sa Korum sa Napulog Duha. Siya usab mahimong moalagad isip usa ka tigsilyo o worker sa ordinansa sa templo.
6.6.7
Mga Tigsulat alang sa mga Panalangin sa Patriyarka
Ang presidente sa stake o usa sa iyang mga magtatambag mahimong motawag o mo-set apart og usa ka takos, hanas nga miyembro sa stake sa pagsulat sa mga panalangin sa patriyarka, gawas kon ang patriyarka makasulat niini sa iyang kaugalingon ug mas gusto nga mohimo niini. Labaw sa usa ka tigsulat ang mahimong tawagon kon gikinahanglan.
Ang tigsulat kinahanglan nga pahimangnoan nga ang matag panalangin sagrado ug kompidensiyal. Walay kopya sa bisan unsa nga panalangin ang ipabilin sa tigsulat o patriyarka. (Tan-awa sa 6.6.5.)
6.7
Mga Organisasyon sa Stake
Ang mga organisasyon sa Relief Society, Young Women, Primary, Sunday School, ug Young Men sa stake gipangulohan sa usa ka presidente ang matag usa. Kini nga mga presidente nag-alagad ubos sa direksyon sa kapangulohan sa stake. Sa dagko nga mga stake, ang presidente sa organisasyon mahimong morekomendar og usa o duha ka mga magtatambag ug usa ka secretary nga moalagad uban kaniya. Ang kapangulohan sa stake mokonsiderar niini nga mga rekomendasyon.
Ang labing importanteng mga responsibilidad niini nga mga lider mao ang pag-abag sa kapangulohan sa stake ug sa pagtudlo ug pagsuporta sa mga kapangulohan sa organisasyon sa ward. Sila dili mohimo sa mga buluhaton nga kinahanglan nga himoon sa lebel sa ward o sa pamilya. Sila usab dili mohimo og dugang nga mga responsibilidad alang sa mga kapangulohan sa organisasyon sa ward.
6.7.1
Mga Kapangulohan sa Relief Society, Young Women, Primary, ug Sunday School sa Stake
Ang presidente sa stake motawag ug mo-set apart og usa ka igsoong babaye nga mahimong presidente sa Relief Society sa stake. Siya o ang gisangonan nga magtatambag motawag ug mo-set apart og igsoong mga babaye nga mahimong mga presidente sa Young Women ug Primary. Kon ang mga magtatambag ug mga secretary gitawag, ang usa ka sakop sa kapangulohan sa stake o ang gisangonan nga high councilor motawag ug mo-set apart kanila.
Ang presidente sa stake motawag ug mo-set apart og usa ka high councilor nga mamahimong presidente sa Sunday School sa stake.
Ang mga sakop niini nga mga kapangulohan aduna sa mosunod nga mga responsibilidad:
Moalagad sa konseho sa stake (mga presidente lamang). Moapil sa mga paningkamot sa pag-ugmad og hugot nga pagtuo ug paglig-on sa mga indibidwal ug mga pamilya diha sa stake.
Motudlo sa bag-ong natawag nga mga kapangulohan sa organisasyon sa ward. Kini naglakip sa paghatag og instruksiyon gikan sa mga kapitulo 1–4 niini nga tamdanan nga basahon ug sa kapitulo alang sa ilang organisayon.
Motanyag og padayon nga suporta ug instruksiyon. Makigsulti sa mga kapangulohan sa organisasyon sa ward kanunay aron makahibalo sa ilang mga panginahanglan, maghisgot sa mga panginahanglan sa mga miyembro nga ilang gialagaran, ug mohatag og impormasyon gikan sa kapangulohan sa stake. Makigsabot sa mga lider sa ward sa pagbisita sa ilang mga miting ug mga klase matag karon ug unya.
Motudlo sa mga kapangulohan sa organisasyon sa ward atol sa mga miting sa mga nangulo sa stake (tan-awa sa 29.3.4). Kini sa kasagaran himoon makausa sa usa ka tuig. Ang kapangulohan sa stake mahimong motugot og ikaduha nga miting kon kini dili makahatag og kabug-at alang sa mga partisipante. Ang mga bishop mahimong mohangyo og dugang nga instruksiyon alang sa mga kapangulohan sa organisasyon sa ward.
Magtinambagay kanunay sa ilang kaugalingong mga miting sa kapangulohan (kon ang mga magtatambag gitawag). Makigsulti kanunay uban sa sakop sa kapangulohan sa stake nga responsable alang sa ilang pagserbisyo.
Motambong sa mga miting sa coordinating council kon gidapit sa Area Seventy (tan-awa sa 29.4).
Mamulong sa mga panagtigom alang sa sakramento ug sa ubang mga sitwasyon kon gidapit sa kapangulohan sa stake.
Sa dagko nga mga stake, mosumiter og mga rekomendasyon ngadto sa kapangulohan sa stake alang sa mga magtatambag ug sa uban aron tawagon nga moalagad sa ilang mga organisasyon kon gikinahanglan. Alang sa mga lagda, tan-awa sa 30.1.1 ug 30.1.5.
Ang mga kapangulohan sa Relief Society, Young Women, ug Primary sa stake mahimong magplano panagsa og hiniusa nga mga kalihokan alang sa ilang mga organisasyon. Kini nga mga kalihokan mahimong maglakip sa tanang babaye, mga batan-ong babaye, ug mga batang babaye nga 8 anyos ug pataas diha sa stake. Ang mao nga mga kalihokan mahimo usab nga himoon sa daghang mga stake. Ang mga kapangulohan magtinambagay sa pagrekomendar og hiniusa nga mga kalihokan ngadto sa kapangulohan sa stake (tan-awa sa 20.3.1). Ang mao nga mga kalihokan ipahimutang diha sa usa sa mga kalihokan sa Relief Society sa stake (tan-awa sa 6.7.1.1).
6.7.1.1
Dugang nga mga Responsibilidad sa Kapangulohan sa Relief Society sa Stake
Ang kapangulohan sa Relief Society sa stake aduna sa mosunod nga dugang nga mga responsibilidad:
Siya moalagad sa komitiba sa mga nangulo sa mga hamtong sa stake (tan-awa sa 29.3.9). Kon dunay secretary nga gitawag, siya usab dapiton.
Motudlo sa mga presidente sa Relief Society sa ward sa mga baroganan sa pagpangalagad ug pag-atiman niadtong nanginahanglan. Motabang nila nga makasabot sa ilang tahas sa pagtabang sa mga bishop bahin sa mga butang nga temporal ug pagbarog pinaagi sa kinaugalingong paningkamot.
Motudlo sa mga kapangulohan sa Relief Society sa ward mahitungod sa ilang mga responsibilidad alang sa misyonaryo nga buhat (tan-awa sa 23.5.2) ug sa buhat sa templo ug family history (tan-awa sa 25.2.2).
Molig-on sa mga igsoong babaye nga mga single adult diha sa stake. Kon ang stake adunay komite sa mga young single adult, usa ka sakop sa kapangulohan moserbisyo diha sa komite. Ingon usab niana kon ang stake adunay komite sa single adult. (Tan-awa sa 14.1.1.2.)
Makigsabot sa mga paningkamot sa Relief Society sa stake panahon sa mga emerhensiya.
Ang kapangulohan sa Relief Society sa stake mahimong magplano ug magpahigayon og usa o duha ka mga miting matag tuig alang sa tanang igsoong babaye sa Relief Society diha sa stake. Kini nga mga miting pagahimoon ubos sa direksyon sa kapangulohan sa stake. Kini mahimong maglakip sa pagserbisyo, mga klase, mga proyekto, mga komperensiya, ug mga workshop. Ang kapangulohan sa Relief Society sa stake mahimong moporma og mga komitiba sa pagtabang kon gikinahanglan.
6.7.1.2
Dugang nga mga Responsibilidad sa Kapangulohan sa Young Women sa Stake
Ang kapangulohan sa Young Women sa stake aduna sa mosunod nga dugang nga mga responsibilidad:
Moserbisyo diha sa komitiba sa pagpangulo sa kabatan-onan diha sa stake (tan-awa sa 29.3.10). Kon dunay secretary nga gitawag, siya usab dapiton.
Ubos sa direksyon sa kapangulohan sa stake, magplano ug magsabot og mga kalihokan ug mga pagkamping sa Young Women.
6.7.1.3
Dugang nga mga Responsibilidad sa Kapangulohan sa Primary sa Stake
Ang kapangulohan sa Primary sa stake magplano panagsa og mga kalihokan sa stake alang sa mga bata nga nag-edad og 8 hangtod 11. Kini nga mga kalihokan mahimong alang sa mga batang babaye, mga batang lalaki, o sa duha. Sila mosunod sa mga lagda diha sa 12.2.1.3.
Imahe
babaye nga nagtrabaho uban sa mga bata
6.7.1.4
Dugang nga mga Responsibilidad sa Kapangulohan sa Sunday School sa Stake
Ang kapangulohan sa Sunday School sa stake aduna sa mosunod nga dugang nga mga responsibilidad:
Moserbisyo isip espesyalista sa mga paningkamot sa stake sa pagpalambo sa pagkat-on ug pagtudlo sa ebanghelyo.
Makigsabot sa mga sentro sa kapanguhaan diha sa stake kon aduna (tan-awa sa 13.7.2).
6.7.2
Kapangulohan sa Young Men sa Stake
Ang kapangulohan sa stake motawag ug mo-set apart og usa ka high councilor aron mamahimong presidente sa Young Men sa stake. Ang mga sakop sa high council nga gisangonan sa Young Women ug Primary mahimong tawagon ug i-set apart aron moserbisyo isip iyang mga magtatambag.
Sa usa ka dako nga stake, usa o duha ka laing mga naghupot sa Melchizedek nga Pagkapari gikan sa stake mahimong tawagon isip mga magtatambag. Ang usa ka naghupot sa pagkapari mahimong tawagon isip usa ka secretary (tan-awa sa 6.7.3). Ang presidente sa Young Men sa stake morekomendar kinsa ang tawagon. Alang sa mga lagda, tan-awa sa 30.1.1 ug 30.1.5. Ang mga magtatambag ug secretary tawagon ug i-set apart sa usa ka sakop sa kapangulohan sa stake o sa usa ka gisangonan nga high councilor.
Ang kapangulohan sa Young Men sa stake aduna sa mosunod nga mga responsibilidad:
Moserbisyo diha sa konseho sa stake (presidente lamang, gawas kon ang iyang mga magtatambag mga high councilor). Moapil sa mga paningkamot sa pag-ugmad og hugot nga pagtuo ug paglig-on sa mga indibidwal ug mga pamilya diha sa stake.
Moserbisyo isip usa ka kapanguhaan ngadto sa mga bishopric sa ilang mga responsibilidad alang sa kaigsoonan nga mga lalaki sa Aaronic nga Pagkapari. Kini maglakip sa pagtabang kanila nga makasabot sa ilang mga katungdanan alang sa mga korum sa Aaronic nga Pagkapari, sumala sa paggiya sa presidente sa stake.
Magtinambagay kanunay diha sa ilang kaugalingong mga miting sa kapangulohan. Makigsulti kanunay uban sa sakop sa kapangulohan sa stake kinsa adunay responsibilidad alang sa ilang pagserbisyo.
Moserbisyo diha sa komitiba sa pagpangulo sa kabatan-onan diha sa stake (tan-awa sa 29.3.10). Kon dunay gitawag nga secretary, siya dapiton usab.
Ubos sa direksyon sa kapangulohan sa stake, magplano ug makigsabot og mga kalihokan ug mga pagkampo sa Aaronic nga Pagkapari sa stake.
Mamulong sa mga panagtigom alang sa sakramento ug sa ubang mga sitwasyon kon gidapit sa kapangulohan sa stake.
Motambong sa mga miting sa coordinating council kon gidapit sa Area Seventy (tan-awa sa 29.4).
Ang kapangulohan sa Young Men sa stake dili mopahigayon og miting sa pagpangulo sa stake. Instruksiyon alang niadtong kinsa adunay mga responsibilidad alang sa mga korum sa Aaronic nga Pagkapari ihatag diha sa mga miting sa mga nangulo sa pagkapari diha sa stake (tan-awa sa 29.3.3).
Ang mga secretary sa organisasyon sa stake sa kasagaran tawagon lamang diha sa dagko nga mga stake. Usa ka sakop sa kapangulohan sa stake o usa ka gisangonan nga high councilor ang motawag ug mo-set apart kanila. Ubos sa direksyon sa mga presidente sa organisasyon sa stake, sila aduna sa mosunod nga mga responsibilidad:
Mag-andam sa mga agenda alang sa mga miting sa kapangulohan.
Mosulat sa gihisgotan diha sa mga miting ug mosubay sa mga buluhaton.
Motipig og ubang mga rekord ug mag-andam og mga report sumala sa hangyo sa kapangulohan.
Motabang sa kapangulohan sa pag-andam sa tinuig nga badyet alang sa ilang organisasyon. Mosubay sa mga nagasto.
Mohatag og pagbansay sa mga secretary sa organisasyon sa ward kon gisangonan. Kini mahimong maglakip sa instruksiyon sa pagrekord ug pagreport sa nanambong.