“32. Paghinulsol ug mga Konseho sa Pagkamiyembro diha sa Simbahan,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2020).
“32. Paghinulsol ug mga Konseho sa Pagkamiyembro diha sa Simbahan,” Kinatibuk-ang Tamdanan nga Basahon.
32.
Paghinulsol ug mga Konseho sa Pagkamiyembro diha sa Simbahan
32.0
Pasiuna
Kasagaran sa paghinulsol mahitabo tali sa usa ka indibidwal, sa Dios, ug niadtong kinsa naapektohan sa mga sala sa usa ka tawo. Hinoon, usahay ang bishop o ang presidente sa stake kinahanglan nga motabang sa mga miyembro sa Simbahan sa ilang mga paningkamot sa paghinulsol.
Kon magtabang sa mga miyembro nga maghinulsol, ang mga bishop ug ang mga presidente sa stake mahigugmaon ug maamumahon. Sila mosunod sa ehemplo sa Manluluwas, kinsa mibayaw sa mga indibidwal ug mitabang nila nga makapalayo sa sala ug mopaduol ngadto sa Dios (tan-awa sa Mateo 9:10–13; Juan 8:3–11).
Sumala sa gilatid sa ubos, kini nga kapitulo gi-organisar aron mogiya sa mga lider pinaagi sa importante nga mga desisyon ug mga aksiyon nga gikinahanglan sa pagtabang og usa ka tawo nga maghinulsol sa usa ka seryoso nga sala ug sa pagtabang sa pagpanalipod sa uban.
-
Ang Tahas sa Simbahan sa Pagtabang sa usa ka Tawo nga Maghinulsol. Ang mga seksiyon 32.1–32.4 nagpasabot sa doktrina sa Ginoo sa paghinulsol ug pagpasaylo. Kini nga mga seksiyon nagpasabot usab sa tulo ka katuyoan sa mga restriksiyon o pagbakwi sa pagkamiyembro diha sa Simbahan. Dugang pa, kini nagpasabot sa tahas sa mga bishop ug sa mga presidente sa stake sa pagtabang sa paghinulsol.
-
Pagtino sa Sitwasyon alang sa Pagtabang sa usa ka Tawo nga Maghinulsol. Ang mga seksiyon 32.5–32.7 naghatag og mga lagda alang sa paghukom kon ang konseho sa pagkamiyembro o personal nga pagtambag mao ba ang angay nga sitwasyon alang sa pagtabang sa usa ka tawo nga maghinulsol.
-
Pagpahigayon sa Personal nga Pagtambag. Ang seksiyon 32.8 naghatag og mga lagda alang sa bishop o sa presidente sa stake bahin sa personal nga pagtambag. Nagpasabot usab kini sa dili pormal nga mga restriksiyon sa pagkamiyembro diha sa Simbahan.
-
Pagpahigayon sa Konseho sa Pagkamiyembro diha sa Simbahan. Ang mga seksiyon 32.9–32.14 nagpasabot kon kinsa ang adunay responsibilidad alang sa mga konseho sa pagkamiyembro, kon unsaon sa pagpahigayon niini, ug sa posible nga mga desisyon. Ang mga resulta niadto nga mga desisyon gipasabot usab.
-
Pag-uli sa mga Pribilehiyo sa Pagkamiyembro diha sa Simbahan. Ang mga seksiyon 32.15–32.17 nagpasabot sa unsa nga paagi nga mapahiuli ngadto sa usa ka tawo ang mga pribilehiyo sa pagkamiyembro diha sa Simbahan pinaagi sa paghinulsol.
Gawas kon gipahibalo, ang mga pulong nga mga presidente sa stake nagpasabot usab sa mga presidente sa misyon. Ang mga pulong nga mga bishop nagpasabot usab sa mga presidente sa branch.
Ang Unang Kapangulohan mopiho sa mga palisiya ug mga proseso alang sa paghinulsol sa bug-at nga sala. Ang Unang Kapangulohan gisuportahan sa Church’s Confidential Records Office [Buhatan sa Kompidensiyal nga mga Rekord sa Simbahan]. Ang presidente sa stake o bishop mahimong mokontak niana nga buhatan uban sa mga pangutana sa administratiba o palisiya. Kana nga buhatan makahatag usab og mga instruksiyon kon unsaon sa pagsumiter og mga hangyo ngadto sa Buhatan sa Unang Kapangulohan. Ang impormasyon sa pagkontak gipakita sa ubos:
Telepono: 1-801-240-2053 o 1-800-453-3860, ekstensiyon 2-2053
Toll free (GSD phone): 855-537-4357
ANG TAHAS SA SIMBAHAN SA PAGTABANG SA USA KA TAWO NGA MAGHINULSOL
32.1
Paghinulsol ug Pagpasaylo
Ang Ginoo miingon nga “walay hugaw nga butang nga makapanunod sa gingharian sa langit” (Alma 11:37; tan-awa usab sa 3 Nephi 27:19). Ang atong mga sala makahimo kanato nga hugaw—dili takos nga mopuyo sa presensya sa atong Langitnong Amahan. Kini usab naghatag kanato og kasakit niini nga kinabuhi.
Ang balaod sa Dios sa kaangayan nagkinahanglan og sangpotanan kon kita makasala (tan-awa sa Alma 42:14, 17–18). Hinoon, ang Iyang mahinungdanon nga plano sa kaluoy “motagbaw sa mga gipangayo sa kaangayan, ug gakson [kita] diha sa mga bukton sa kaluwasan” (Alma 34:16; tan-awa usab sa Mosiah 15:9).
Aron mahitabo ang Iyang plano sa kaluoy, ang Langitnong Amahan mipadala sa Iyang Bugtong Anak, si Jesukristo, aron moula alang sa atong mga sala (tan-awa sa Alma 42:15). Miantos si Jesus sa silot nga gipangayo sa balaod sa kaangayan alang sa atong mga sala (tan-awa sa Doktrina ug mga Pakigsaad 19:15–19; tan-awa usab sa Alma 42:24–25). Pinaagi niini nga sakripisyo, ang Amahan ug ang Anak mipakita sa Ilang walay kinutoban nga gugma alang kanato (tan-awa sa Juan 3:16).
Kon kita mopakita og “hugot nga pagtuo ngadto sa paghinulsol,” ang Langitnong Amahan mopasaylo kanato, mohatag og kaluoy pinaagi sa Pag-ula ni Jesukristo (Alma 34:15; tan-awa usab sa Alma 42:13). Kon kita nalimpyohan ug napasaylo, kita sa kataposan makapanunod sa gingharian sa Dios (tan-awa sa Isaias 1:18; Doktrina ug mga Pakigsaad 58:42).
Ang paghinulsol mas labaw pa kay sa pag-usab og binuhatan. Kini mao ang pagpahilayo gikan sa sala ug pagpadulong ngadto sa Langitnong Amahan ug ni Jesukristo. Mosangput kini ngadto sa kausaban sa kasingkasing ug hunahuna (tan-awa sa Mosiah 5:2; Alma 5:12–14; Helaman 15:7). Pinaagi sa paghinulsol, mahimo kitang bag-ong mga nilalang, napasig-uli ngadto sa Dios (tan-awa sa 2 Mga Taga-Corinto 5:17–18; Mosiah 27:25–26).
Ang oportunidad nga maghinulsol mao ang usa sa labing mahinungdanon nga mga panalangin nga gihatag kanato sa Langitnong Amahan pinaagi sa gasa sa Iyang Anak.
32.2
Mga Katuyoan sa mga Restriksiyon o Pagbakwi sa Pagkamiyembro diha sa Simbahan
Kon ang usa ka tawo nabunyagan, siya nahimong kabahin sa “panimalay sa Dios” (Mga Taga-Efeso 2:19). Ang pakigsaad sa bunyag naglakip sa saad nga maningkamot nga magpuyo sumala sa mga pagtulon-an ug mga sugo ni Kristo. Kon ang usa ka tawo makasala, siya magpakita og hugot nga pagtuo diha ni Jesukristo ug maghinulsol, mosalig sa Iyang kaluoy sa paglig-on ug pagpasaylo.
Kon ang usa ka miyembro makabuhat og seryoso nga sala, ang bishop o ang presidente sa stake motabang niya nga maghinulsol. Isip kabahin niini nga proseso, siya mahimong mohatag og restriksiyon sa pipila ka pribilehiyo sa pagkamiyembro diha sa Simbahan sulod sa usa ka panahon. Sa pipila ka sitwasyon, tingali kinahanglan nga iyang bakwion ang pagkamiyembro sa tawo sulod sa usa ka panahon.
Ang paghatag og restriksiyon o pagbakwi sa pagkamiyembro sa usa ka tawo wala gituyo aron sa pagsilot. Hinoon, kini nga mga aksiyon usahay gikinahanglan aron sa pagtabang sa tawo nga maghinulsol ug makasinati og kausaban sa kasingkasing. Makahatag usab kini sa tawo og panahon nga mangandam sa espirituwal nga paagi sa pagbag-o ug pagtuman pag-usab sa iyang mga pakigsaad.
Ang bishop o ang presidente sa stake modumala sa mga restriksiyon o pagbakwi sa pagkamiyembro sumala sa gilatid diha sa 32.5–32.14. Kini nga mga aksiyon giubanan sa mga kondisyon sa paghinulsol. Samtang ang usa ka tawo sinsero nga maghinulsol, mahimong mapahiuli kaniya ang mga pribilehiyo sa pagkamiyembro diha sa Simbahan.
Kon gikinahanglan ang mga restriksiyon o pagbakwi sa pagkamiyembro, ang bishop o ang presidente sa stake mosunod sa giya sa Espiritu Santo ug sa mga instruksiyon niini nga kapitulo. Siya molihok pinaagi sa diwa sa gugma (tan-awa sa 32.3).
Ang restriksiyon sa pagkamiyembro diha sa Simbahan eklesyastikal, dili sibil o kriminal. Makaapekto lamang kini sa kahimtang sa tawo diha sa Simbahan. (Tan-awa sa Doktrina ug mga Pakigsaad 134:10.)
Ang tulo ka katuyoan sa mga restriksiyon o pagbakwi sa pagkamiyembro mao ang mosunod.
32.2.1
Pagtabang sa Pagpanalipod sa Uban
Ang unang katuyoan mao ang pagtabang sa pagpanalipod sa uban. Usahay ang usa ka tawo mahimong hulga sa pisikal o espirituwal. Ang mga binuhatan nga motuyo sa pagpasakit, pisikal nga pagdagmal, sekswal nga pag-abuso, makadaot nga paggamit sa droga ug ubang butang, pagpanglimbong, ug apostasiya mao ang pipila ka paagi nga kini mahitabo. Uban sa inspirasyon, ang bishop o ang presidente sa stake molihok aron sa pagpanalipod sa uban kon adunay tawo nga naghulga sa ingon niini ug sa ubang seryoso nga mga paagi (tan-awa sa Alma 5:59–60).
32.2.2
Pagtabang sa usa ka Tawo nga Makagamit sa Matubsanong Gahom ni Jesukristo pinaagi sa Paghinulsol
Ang ikaduha nga katuyoan mao ang pagtabang sa usa ka tawo nga makagamit sa matubsanong gahom ni Jesukristo pinaagi sa paghinulsol. Pinaagi niini nga proseso, siya mahimong malimpyo pag-usab ug takos nga modawat sa tanang panalangin sa Dios.
Ang Manluluwas mitudlo nga ang “usa ka masulub-on nga kasingkasing ug usa ka mahinulsolon nga espiritu” mao ang sakripisyo nga Iyang gikinahanglan alang sa kapasayloan sa sala (3 Nephi 9:20). Naglakip kini og sinsero nga pagbasol alang sa sala ug sa mga sangpotanan niini (tan-awa sa 2 Mga Taga-Corinto 7:9–10).
Kon ang usa ka tawo nakahimo og grabe nga sala, ang mga restriksiyon o pagbakwi sa pagkamiyembro makatabang nga mapasiugdahan ang usa ka masulub-on nga kasingkasing ug usa ka mahinulsolon nga espiritu nga gikinahanglan aron maghinulsol, tinuoray nga mosalikway sa sala, ug masabtan ang mga sangpotanan sa sala. Kini nga pagsabot makatabang sa mga tawo nga mahatagan og bili ang ilang mga pakigsaad uban sa Dios sa mas lawom nga paagi ug magtinguha nga tumanon kadto nga mga pakigsaad sa umaabot.
32.2.3
Pagpanalipod sa Integridad sa Simbahan
Ang ikatulo nga katuyoan mao ang pagpanalipod sa integridad sa Simbahan. Ang paghatag og restriksiyon o pagbakwi sa pagkamiyembro sa usa ka tawo diha sa Simbahan mahimong kinahanglanon kon ang iyang pamatasan makadaot og dako sa Simbahan (tan-awa sa Alma 39:11). Ang integridad sa Simbahan dili mapanalipdan pinaagi sa pagtago o pagpagamay sa seryoso nga mga sala—apan pinaagi sa pag-asikaso niini.
32.3
Ang Tahas sa mga Maghuhukom sa Israel
Ang mga bishop ug ang mga presidente sa stake gitawag ug gi-set apart aron mahimo nga mga maghuhukom sa Israel (tan-awa sa Doktrina ug mga Pakigsaad 107:72–74). Sila naghupot sa mga yawe sa pagkapari sa pagrepresentar sa Ginoo sa pagtabang sa mga miyembro sa Simbahan nga maghinulsol (tan-awa sa Doktrina ug mga Pakigsaad 13:1; 107:16–18).
Kasagaran ang mga bishop ug ang mga presidente sa stake motabang sa paghinulsol pinaagi sa personal nga pagtambag. Kini nga pagtabang mahimong maglakip sa paghatag og dili pormal nga restriksiyon sa pipila ka pribilehiyo sa pagkamiyembro diha sa Simbahan sulod sa usa ka panahon. (Tan-awa sa 32.8.)
Alang sa pipila ka seryoso nga sala, ang mga lider motabang sa paghinulsol pinaagi sa pagpahigayon og konseho sa pagkamiyembro (tan-awa sa 32.6 ug 32.9–32.14). Kini nga pagtabang mahimong maglakip sa paghatag og pormal nga restriksiyon sa pipila ka pribilehiyo sa pagkamiyembro diha sa Simbahan o pagbakwi sa pagkamiyembro sa usa ka tawo sulod sa usa ka panahon (tan-awa sa 32.11.3 ug 32.11.4).
Ang mga bishop ug ang mga presidente sa stake motabang sa mga miyembro sa Simbahan nga makasabot nga ang Dios nahigugma sa Iyang mga anak. Tungod kay gusto Niya nga sila magmalipayon ug makadawat sa mga panalangin, Siya usab nagpakabana pag-ayo sa ilang pagkamasulundon ug paghinulsol.
Ang mga bishop ug ang mga presidente sa stake mahigugmaon ug maamumahon samtang sila motabang sa mga miyembro nga maghinulsol. Ang inter-aksiyon sa Manluluwas sa babaye nga gidakop tungod sa pagpanapaw maoy usa ka giya (tan-awa sa Juan 8:3–11). Bisan og wala Siya mosulti nga gipasaylo ang iyang mga sala, Siya wala mopanghimaraot kaniya. Hinoon, Siya misulti kaniya nga “ayaw na pagpakasala”—sa paghinulsol ug pag-usab sa iyang kinabuhi.
Kini nga mga lider motudlo nga adunay “kalipay … didto sa langit tungod sa usa ka makasasala nga magahinulsol” (Lucas 15:7). Sila mapailobon, mosuporta, ug positibo. Sila modasig og paglaom. Sila motudlo ug mopamatuod nga tungod sa maulaong sakripisyo sa Manluluwas, ang tanan makahinulsol ug mahimong limpyo.
Ang mga bishop ug ang mga presidente sa stake magtinguha og giya gikan sa Espiritu aron makahibalo unsaon sa pagtabang ang matag tawo nga maghinulsol. Ang Simbahan adunay gitakda nga sumbanan sa labing seryoso lamang nga mga sala kon unsay himoon nga mga aksiyon sa mga lider (tan-awa sa 32.6 ug 32.11). Walay duha ka sitwasyon nga pareha. Ang pagtambag nga ihatag sa mga lider ug ang proseso sa paghinulsol nga ilang ipahigayon kinahanglan nga dinasig ug tingali lahi alang sa matag tawo.
Ang Ginoo nasayod sa mga sirkumstansiya, kapasidad, ug espirituwal nga kahingkod sa matag tawo. Ang Espiritu Santo motabang sa mga lider nga makahibalo unsaon sa pagtabang ang mga miyembro nga mohimo sa gikinahanglan nga mga kausaban aron sila mamaayo ug makabatok sa tintasyon sa pagsubli sa sala.
Ang pagtabang sa usa ka tawo nga mohinulsol, mobalik ngadto sa Dios, ug mamaayo pinaagi sa Pag-ula ni Jesukristo mao ang usa sa labing makalipay nga mga kasinatian nga masinati sa usa ka tawo. Ang Doktrina ug mga Pakigsaad 18:10–13 mipasabot:
“Hinumd[o]mi ang bili sa mga kalag mahinungdanon sa panan-aw sa Dios;
“Kay, tan-awa, ang Ginoo nga imong Manunubos nag-ant[o]s sa kamatayon diha sa unod; busa siya nag-ant[o]s sa kasakit sa tanan nga mga tawo, nga unta ang tanan nga mga tawo maghinulsol ug moduol ngadto kaniya.
“Ug siya nabanhaw pag-usab gikan sa patay, nga siya unta modala sa tanan nga mga tawo ngadto kaniya, sa mga kondisyon sa paghinulsol.
“Ug unsa ka dako ang iyang hingpit nga kalipay diha sa kalag nga naghinulsol!”
32.4
Pagkompisal, Pagkakompidensiyal, ug Pag-report ngadto sa mga Awtoridad sa Gobyerno
32.4.1
Pagkompisal
Ang paghinulsol nagkinahanglan nga ang mga sala ikompisal ngadto sa Langitnong Amahan. Si Jesukristo miingon, “Pinaagi niini kamo masay[o]d kon ang usa ka tawo naghinulsol sa iyang mga sala—tan-awa, siya mok[o]mpisal kanila ug mobiya kanila” (Doktrina ug mga Pakigsaad 58:43; tan-awa usab sa Mosiah 26:29).
Kon ang mga miyembro sa Simbahan makahimo og seryoso nga mga sala, ang ilang paghinulsol maglakip usab og pagkumpisal ngadto sa ilang bishop o sa presidente sa stake. Dayon siya makahimo sa paggamit sa mga yawe sa ebanghelyo sa paghinulsol alang kanila (tan-awa sa Doktrina ug mga Pakigsaad 13:1; 84:26–27; 107:18, 20). Kini makatabang nila nga mamaayo ug mobalik ngadto sa dalan sa ebanghelyo pinaagi sa gahum sa Pag-ula sa Manluluwas.
Ang katuyoan sa pagkumpisal mao ang pag-awhag sa mga miyembro nga tangtangan sa palas-anon ang ilang kaugalingon aron sila hingpit nga magtinguha sa tabang sa Ginoo sa pag-usab ug pagkaayo. Ang pagpalambo og “masulub-on nga kasingkasing ug mahinulsulon nga espiritu” giabagan sa pagkumpisal (2 Nephi 2:7). Ang boluntaryo nga pagkumpisal nagpakita nga ang usa ka tawo nagtinguha nga maghinulsol.
Kon ang usa ka miyembro mokompisal, ang bishop o ang presidente sa stake mosunod sa mga lagda alang sa pagtambag diha sa 32.8. Mainampoon siyang magtinguha og giya mahitungod sa angay nga sitwasyon alang sa pagtabang sa miyembro nga maghinulsol (tan-awa sa 32.5). Siya mokonsiderar kon ang konseho sa pagkamiyembro makatabang ba. Kon ang palisiya sa Simbahan nagkinahanglan sa konseho sa pagkamiyembro, siya mopasabot niini (tan-awa sa 32.6 ug 32.10).
Usahay ang usa ka miyembro nakasala sa kapikas o sa laing hamtong. Isip kabahin sa paghinulsol, siya kinahanglan sa kasagaran mokompisal ngadto niana nga tawo ug mangayo og pasaylo. Ang usa ka batan-on nga makahimo og seryoso nga sala sa kasagaran awhagon nga magpakitambag sa iyang mga ginikanan.
32.4.2
Seryoso nga mga Sala Nga Wala Ikompisal o Gilimod
Ang bishop o ang presidente sa stake kasagaran makahibalo mahitungod sa usa ka seryoso nga sala pinaagi sa pagkompisal o gikan sa laing tawo. Siya usab mahimong makadawat og mga pag-aghat mahitungod sa potensyal nga seryoso nga sala pinaagi sa Espiritu Santo. Kon siya mobati nga giaghat sa Espiritu nga ang usa ka tawo tingali nakigbisog sa sala, siya mahimong moeskedyul og interbiyo. Atol sa interbiyo, siya mopaambit sa iyang mga kabalaka pinaagi sa mabination, matinahoron nga paagi. Maglikay siya sa bisan unsa nga tono nga pag-akusar.
Kon ang usa ka miyembro molimod nga nakahimo og seryoso nga sala nga ang bishop o ang presidente sa stake adunay impormasyon nga ikasuporta, ang konseho sa pagkamiyembro mahimo gihapon nga ipahigayon. Hinoon, ang usa ka espirituwal nga impresyon lamang dili igo nga mopahigayon og konseho (tan-awa sa Doktrina ug mga Pakigsaad 10:37). Ang lider mahimong mangolekta og dugang nga impormasyon kon gikinahanglan. Siya mosunod sa mga lagda diha sa 32.4.3 ug 32.10.2.
32.4.3
Pagpangolekta og Impormasyon
Sa dili pa mopahigayon og konseho sa pagkamiyembro, ang bishop o ang presidente sa stake mangolekta og daghang impormasyon sumala sa iyang gikinahanglan. Ang impormasyon gikan sa pagkompisal sa usa ka miyembro sa kasagaran igo na. Ang impormasyon mahimong magagikan usab sa usa ka sakop sa pamilya, sa laing lider sa Simbahan, sa biktima, o sa partisipante sa sala.
Kon mangolekta og impormasyon, ang bishop o ang presidente sa stake kinahanglang mogamit lamang og mga paagi nga angay alang sa usa ka lider sa pagkapari. Kinahanglang dili siya magbantay sa panimalay sa usa ka tawo o morekord kaniya nga walay pagtugot. Ni siya mogamit sa bisan unsa nga mga binuhatan nga supak sa balaod.
Ang bakak nga mga akusasyon talagsa ra apan mahimong mahitabo. Ang mga lider sa pagkapari kinahanglang magmabinantayon kon dunay limitado nga impormasyon gawas sa istorya sa usa ka tawo. Pananglitan, ang usa ka miyembro nga giakusaran og panapaw mahimong molimod sa pasangil. Ang mga kasulatan nagpasabot nga ang “matag pulong ipahamtang batok kanila pinaagi sa duha ka mga saksi sa simbahan” (Doktrina ug mga Pakigsaad 42:80). Ang “duha ka mga saksi” nagpasabot sa duha ka managlahi nga mga tinubdan sa impormasyon. Kini mahimong maglakip sa kahibalo sa usa ka partisipante ug sa lain pa nga kasaligan nga tinubdan. Usahay ang lider sa pagkapari kinahanglang maghulat nga molihok hangtod adunay dugang nga impormasyon.
Kon ang usa ka lider sa Simbahan nangolekta og impormasyon alang sa usa ka konseho sa pagkamiyembro, kinahanglan nga siya mohunong dayon kon siya makahibalo nga ang tigpatuman sa balaod aktibong nag-imbestigar sa miyembro. Kini himoon aron sa paglikay sa posible nga mga pasangil nga ang lider mibabag sa hustisya. Alang sa legal nga tambag mahitungod niini nga mga sitwasyon sa Estados Unidos ug Canada, ang presidente sa stake mokontak sa Church’s Office of General Counsel:
1-800-453-3860, ekstensiyon 2-6301
1-801-240-6301
Sa gawas sa Estados Unidos ug Canada, ang presidente sa stake mokontak sa legal counsel sa area diha sa buhatan sa area.
Sa kasagaran ang konseho sa pagkamiyembro dili ipahigayon aron sa pagkonsiderar og binuhatan nga gisusi pa sa korte pinaagi sa sibil o kriminal nga husay hangtod ang korte makakab-ot sa kataposan nga paghukom. Sa ubang mga kaso angay ra usab nga ilangan ang pagpahigayon og konseho sa pagkamiyembro hangtod nga ang tagal sa pag-apelar natapos na o ang pag-apelar gisalikway.
32.4.4
Pagkakompidensiyal
Ang mga bishop, mga presidente sa stake, ug ang ilang mga magtatambag adunay sagradong katungdanan sa pagpanalipod sa tanang kompidensiyal nga impormasyon nga gipaambit kanila. Kini nga impormasyon mahimong moabot pinaagi sa mga interbiyo, pagtambag, ug mga pagkompisal. Ang sama nga katungdanan sa pagkakompidensiyal buhaton sa tanan nga moapil sa mga konseho sa pagkamiyembro. Ang pagkakompidensiyal importante tungod kay ang mga miyembro mahimong dili mokompisal sa mga sala o magtinguha og giya kon ang ilang gipaambit dili mahimong kompidensiyal. Ang paglapas sa pagsalig nagbudhi sa pagsalig sa miyembro ug maoy makaingon nga mawala ang ilang pagsalig sa ilang mga lider.
Subay sa ilang katungdanan sa pagkakompidensiyal, ang usa ka bishop, presidente sa stake, o ang ilang mga magtatambag mahimong mopaambit lamang sa maong impormasyon sumala sa mosunod:
-
Kinahanglang makigsulti sila sa presidente sa stake, presidente sa misyon, o bishop sa miyembro mahitungod sa pagpahigayon og konseho sa pagkamiyembro o sa mga butang nga may kalabotan. Ang presidente sa stake mahimo usab nga makigsulti sa gisangonan nga Area Seventy. Kon gikinahanglan, ang Area Seventy moduso sa presidente sa stake ngadto sa Kapangulohan sa Area. Ang presidente sa stake lamang ang mohukom kon ang usa ka konseho ipahigayon ba o ang mga sangpotanan niini.
-
Ang tawo mibalhin ngadto sa usa ka bag-ong ward (o ang lider sa pagkapari na-release) samtang ang aksiyon sa pagkamiyembro o ubang seryoso nga mga problema wala pa masulbad. Niini nga mga kaso, ang lider mopahibalo sa bag-ong bishop o presidente sa stake mahitungod sa mga problema o sa wala pa masulbad nga mga aksiyon (tan-awa sa 32.14.7). Siya usab mopahibalo sa lider kon ang miyembro mahimong hulga ngadto sa uban.
-
Ang bishop o ang presidente sa stake nakahibalo nga ang usa ka miyembro sa Simbahan nga nagpuyo sa gawas sa ward o stake nalambigit sa usa ka seryoso nga sala. Niana nga sitwasyon, siya kompidensiyal nga mokontak sa bishop niana nga miyembro.
-
Gikinahanglan nga ibutyag ang impormasyon atol sa konseho sa pagkamiyembro. Ang tanang impormasyon nga nakolekta ug napaambit isip kabahin sa konseho sa pagkamiyembro kompidensiyal.
-
Ang usa ka miyembro mopili sa paghatag og pagtugot alang sa lider nga mopaambit sa impormasyon sa piho nga mga tawo. Kini maglakip sa mga ginikanan, mga lider sa Simbahan, o sa uban kinsa mohatag og suporta. Ang lider dili mopaambit og impormasyon lapas sa gihatag nga pagtugot sa miyembro.
-
Gikinahanglan tingali ang pagpaambit og limitado nga impormasyon mahitungod sa desisyon sa konseho sa pagkamiyembro (tan-awa sa 32.12.2).
Sa uban pang sitwasyon, ang lider kinahanglan nga moadto sa 32.4.5. Kini nga mga kaso maglakip kon ang balaod momando nga ang usa ka krimen, sama sa pag-abuso sa bata, i-report ngadto sa mga awtoridad sa gobyerno.
Aron sa pagtabang sa mga lider sa pagpanalipod sa uban ug sa pagsunod sa balaod, ang Simbahan naghatag og tabang gikan sa nabansay nga mga propesyonal. Aron makadawat niini nga giya, ang mga lider motawag dayon sa help line sa pang-abuso diha sa Simbahan kon kini anaa (tan-awa sa 32.4.5 ug 38.6.2.1). Kon kini wala, ang presidente sa stake mokontak sa legal counsel sa area diha sa buhatan sa area.
Sa usa lang ka sitwasyon nga ang bishop o ang presidente sa stake mobutyag sa kompidensiyal nga impormasyon nga dili una mangayo sa maong giya. Kana kon ang pagbutyag gikinahanglan aron mapugngan ang makahulga sa kinabuhi nga kadaot o seryoso nga kadaot ug wala nay panahon sa pagpangayo og giya. Sa mao nga mga sitwasyon, ang katungdanan sa pagpanalipod sa uban mas importante kay sa katungdanan sa pagkakompidensiyal. Ang mga lider kinahanglang mokontak dayon sa sibil nga mga awtoridad.
Kon ang mga lider nagtipig og mga sulat o nagpahibalo sa usag usa pinaagi sa elektronik, bantayan nila magamit kini nga impormasyon. Wagtangon o gision usab nila ang impormasyon kon kini wala na kinahanglana. Dili sila mopaambit og personal nga impormasyon nga wala kinahanglana.
Ang sibil nga mga awtoridad mahimong mohagit sa pagkakompidensiyal nga gikinahanglan sa usa ka lider sa pagkapari. Kon kini mahitabo diha sa Estados Unidos ug Canada, ang presidente sa stake mangayo og legal nga tambag gikan sa Church’s Office of General Counsel:
1-800-453-3860, ekstensiyon 2-6301
1-801-240-6301
Sa gawas sa Estados Unidos ug Canada, ang presidente sa stake mokontak sa legal counsel sa area diha sa buhatan sa area.
32.4.5
Pag-report ngadto sa mga Awtoridad sa Gobyerno
Ang ubang mga tawo kinsa naghinulsol nakalapas og sibil o kriminal nga mga balaod. Sa uban nga mga sitwasyon, ang mga awtoridad sa gobyerno wala masayod niini. Ang mga bishop ug ang mga presidente sa stake moawhag sa mga miyembro sa pagsunod sa balaod ug moreport sa maong mga butang kon gikinahanglan. Ang mga lider motambag usab sa mga miyembro sa pagbaton og sarang nga legal nga tambag kon magreport. Ang palisiya sa Simbahan mao ang pagsunod sa balaod.
Sa daghang dapit, ang mga lider sa pagkapari gimandoan sa balaod sa pag-report sa ubang dili legal nga mga binuhatan nga ilang nahibaloan. Pananglitan, ang pipila ka estado ug mga nasod nagmando nga ang pag-abuso sa bata kinahanglang i-report ngadto sa mga awtoridad nga tigpatuman sa balaod.
Sa ubang nasod, ang Simbahan naka-establisar og kompidensyal nga help line sa pang-abuso aron sa pagtabang sa mga bishop ug sa mga presidente sa stake. Kining mga lider kinahanglang motawag dayon sa help line mahitungod sa matag sitwasyon diin ang usa ka tawo tingali giabusohan—o anaa sa kakuyaw nga maabusohan (tan-awa sa 38.6.2.1). Anaa kini 24 oras kada adlaw, 7 ka adlaw kada semana.
Sa mga nasod nga walay help line, ang usa ka bishop nga nakahibalo sa pang-abuso kinahanglang mokontak sa iyang presidente sa stake, nga mangayo og giya sa legal counsel sa area sa buhatan sa area.
Alang sa dugang nga impormasyon mahitungod sa pag-report sa abuso, tan-awa sa 38.6.2.1 ug 38.6.2.7.
PAGTINO SA SITWASYON ALANG SA PAGTABANG SA USA KA TAWO NGA MAGHINULSOL
32.5
Mga Sitwasyon alang sa Pagtabang sa usa ka Tawo nga Maghinulsol
Human makahibalo nga ang usa ka miyembro nakahimo og seryoso nga sala, ang bishop o ang presidente sa stake mohimo og mga lakang sa pagpanalipod sa uban. Siya usab magtinguha sa giya sa Espiritu Santo sa pagtino sa sitwasyon alang sa pagtabang sa tawo nga maghinulsol ug magpaduol ngadto sa Manluluwas.
32.5.1
Kinatibuk-ang Pagpasabot sa mga Sitwasyon
Ang mosunod nga talaan naglista sa tulo ka sitwasyon alang sa pagtabang sa usa ka tawo nga maghinulsol. Kini nag-summarize usab sa pipila sa mga konsiderasyon alang sa mga lider kon mohukom unsa nga sitwasyon ang gamiton.
Mga Sitwasyon alang sa Pagtabang sa usa ka Tawo nga Maghinulsol
|
Sitwasyon |
Pipila ka Konsiderasyon (tan-awa usab sa 32.7) |
|---|---|
Sitwasyon Konseho sa Pagkamiyembro diha sa Stake | Pipila ka Konsiderasyon (tan-awa usab sa 32.7) |
Sitwasyon Konseho sa Pagkamiyembro diha sa Ward | Pipila ka Konsiderasyon (tan-awa usab sa 32.7)
|
Sitwasyon Personal nga Pagtambag (tan-awa sa 32.8) | Pipila ka Konsiderasyon (tan-awa usab sa 32.7)
|
Ang personal nga pagtambag ug dili pormal nga mga restriksiyon sa bishop o sa presidente sa stake usahay dili igo sa pagtabang sa usa ka tawo nga maghinulsol sa seryoso nga mga sala. Ang Ginoo naghatag og mga konseho sa pagkamiyembro aron sa pagtabang sa maghuhukom sa Israel niini nga mga sitwasyon. (Tan-awa sa Exodo 18:12–27; Mosiah 26:29–36; Doktrina ug mga Pakigsaad 42:80–83; 102.) Alang sa ubang seryoso nga mga sala, ang konseho gikinahanglan subay sa palisiya sa Simbahan (tan-awa sa 32.6.1). Ang paglapas sa mga pakigsaad sa templo makapadugang sa kalagmitan nga gikinahanglan ang konseho sa pagkamiyembro (tan-awa sa 32.7.4).
Sa usa ka ward, ang mga magtatambag sa bishop motabang sa mga konseho sa pagkamiyembro. Sa usa ka stake, ang mga magtatambag sa presidente sa stake motabang. Sa pipila ka mga konseho sa pagkamiyembro diha sa stake, ang high council moapil usab (tan-awa sa 32.9.2). Diha sa usa ka konseho sa pagkamiyembro, ang bishopric o ang kapangulohan sa stake makigkita sa tawo pinaagi sa diwa sa gugma.
32.5.2
Pagtino sa Sitwasyon ug Tukma sa Panahon
Kon maghukom hain niini nga mga sitwasyon ang labing makatabang sa usa ka tawo nga maghinulsol, ang mga lider magtinguha sa giya sa Espiritu Santo. Sila usab mokonsiderar sa mosunod nga mga isyu:
-
Ang kagrabe sa sala ug ang palisiya sa Simbahan mahitungod kon gikinahanglan ba ang konseho (tan-awa sa 32.6)
-
Ang mga sirkumstansiya sa tawo (tan-awa sa 32.7)
Ang bishop magpakitambag sa presidente sa stake mahitungod sa piho nga mga sitwasyon. Kinahanglang makadawat siya og pagtugot gikan sa presidente sa stake sa dili pa mopahigayon og konseho sa pagkamiyembro.
Sa malisod nga mga butang, ang presidente sa stake mahimong mangayo og tambag gikan sa gisangonan nga Area Seventy. Ang presidente sa stake kinahanglang magpakitambag sa Kapangulohan sa Area bahin sa mga butang nga gilatid diha sa 32.6.3. Hinoon, ang presidente sa stake lamang ang mohukom kon ipahigayon ba ang usa ka konseho aron sa paghisgot sa binuhatan. Kon ang usa ka konseho ipahigayon, ang presidente sa stake o ang bishop mohukom sa mga sangpotanan.
Kon ang bishop o ang presidente sa stake motino nga ang personal nga pagtambag igo na, siya mosunod sa mga lagda diha sa 32.8. Kon siya motino nga ang konseho sa pagkamiyembro gikinahanglan, o kon ang palisiya sa Simbahan nagkinahanglan og konseho, ang tawo nga mopahigayon mosunod sa mga pamaagi diha sa 32.9–32.14.
Sa dili pa mopahigayon sa konseho, ang bishop o presidente sa stake mahimong motino nga ang dili pormal nga mga restriksiyon sa pagkamiyembro mao ang labing maayo sulod sa usa ka panahon. Siya mopahigayon sa konseho kon kini ang labing makaawhag sa sinsero nga paghinulsol sa miyembro. Hinoon, kinahanglang dili niya langayon ang konseho kon kini gikinahanglan aron sa pagpanalipod sa uban.
32.6
Kagrabe sa Sala ug Palisiya sa Simbahan
Ang kagrabe sa usa ka sala mao ang usa ka importante nga konsiderasyon sa pagtino sa sitwasyon nga (1) motabang sa pagpanalipod sa uban ug (2) motabang sa tawo nga maghinulsol. Ang Ginoo miingon nga Siya “dili makatan-aw diha sa sala uban sa labing gamay nga matang sa pagtugot” (Doktrina ug mga Pakigsaad 1:31; tan-awa usab sa Mosiah 26:29). Ang iyang mga sulugoon kinahanglang dili gayod mobaliwala sa ebidensya sa seryoso nga sala.
Ang seryoso nga mga sala mao ang tinuyo ug dakong kalapasan batok sa mga balaod sa Dios. Ang mga kategoriya sa seryoso nga mga sala gilista sa ubos.
Ang mosunod nga mga seksiyon naghulagway kon kanus-a ang konseho sa pagkamiyembro gikinahanglan, kanus-a kini mahimo nga kinahanglanon, ug kanus-a kini dili kinahanglanon.
32.6.1
Kon ang Konseho sa Pagkamiyembro Gikinahanglan
Ang bishop o ang presidente sa stake kinahanglan gayod nga mopahigayon og konseho sa pagkamiyembro kon ang impormasyon nagpakita nga ang usa ka miyembro nakahimo og bisan unsang mga sala nga gihulagway niini nga seksiyon. Alang niini nga mga sala, ang konseho gikinahanglan bisan unsa pa ang lebel sa espirituwal nga kahingkod ug pagsabot sa ebanghelyo sa miyembro.
Tan-awa sa 32.11 alang sa potensyal nga mga sangpotanan sa mga konseho nga ipahigayon alang sa mga sala nga gilista niini nga seksiyon. Ang dili pormal nga mga restriksiyon sa pagkamiyembro dili opsiyon alang niini nga mga konseho.
32.6.1.1
Bayolente nga mga Buhat ug Abuso
Pagpatay. Ang konseho sa pagkamiyembro gikinahanglan kon ang usa ka miyembro nakapatay og usa ka tawo. Sumala sa paggamit dinhi, ang pagpatay mao ang tinuyo ug dili makataronganong paghunos sa kinabuhi sa tawo. Ang pagbakwi sa pagkamiyembro sa tawo diha sa Simbahan gikinahanglan.
Ang pagpatay wala maglakip sa binuhatan sa pulis o kasundalohan nga nagsunod sa ilang katungdanan. Ang aborsyon wala giisip nga pagpatay niini nga konteksto. Kon ang kamatayon nahitabo tungod sa aksidente o sa pagpanalipod sa kaugalingon o sa uban, ang paghunos sa kinabuhi sa tawo mahimong dili isipon nga pagpatay. Tingali ingon usab niini diha sa ubang mga sitwasyon, sama kon ang usa ka tawo adunay limitado nga kapasidad sa pangisip.
Paglugos. Ang konseho sa pagkamiyembro gikinahanglan alang sa paglugos. Sumala sa paggamit dinhi, ang paglugos mao ang pagpugos sa sekswal nga pakighilawas o pakighilawas sa usa ka tawo nga dili legal nga makahatag og pag-uyon tungod sa kakulian sa pangisip o pisikal nga kapasidad. Sumala sa paggamit dinhi, ang paglugos wala maglakip sa inuyonan nga sekswal nga pakighilawas tali sa duha ka menor de edad nga magdug-ol ra og edad.
Pagkakombikto sa Sekswal nga Pag-ataki. Ang konseho sa pagkamiyembro gikinahanglan kon ang usa ka miyembro nakombikto sa sekswal nga pag-ataki.
Pag-abuso sa Bata o Batan-on. Ang konseho sa pagkamiyembro gikinahanglan kon ang usa ka tawo nga miabuso sa usa ka bata o batan-on sumala sa gipasabot diha sa 38.6.2.3.
Pag-abuso sa Kapikas o Laing Hamtong. Magkalain-lain ang kagrabe sa binuhatan nga abusado. Tan-awa sa 38.6.2.4 kon ang konseho sa pagkamiyembro gikinahanglan alang sa pag-abuso sa usa ka kapikas o laing hamtong.
Binuhatan nga Motuyo sa Pagpasakit sa Bayolenting Paagi. Ang konseho sa pagkamiyembro gikinahanglan kon ang usa ka hamtong nagsige og pagpasakit sa pisikal nga paagi sa mga tawo pinaagi sa bayolenting binuhatan ug mahimong hulga ngadto sa uban.
32.6.1.2
Sekswal nga Imoralidad
Pakighilawas sa duol nga kabanay [Incest]. Ang konseho sa pagkamiyembro gikinahanglan alang sa pakighilawas sa duol nga kabanay [incest] sumala sa gipasabot diha sa 38.6.10. Ang pagbakwi sa pagkamiyembro sa tawo diha sa Simbahan hapit gikinahanglan kanunay.
Pornograpiya nga Naggamit og Bata. Ang konseho sa pagkamiyembro gikinahanglan kon ang usa ka tawo nahilambigit sa pornograpiya nga naggamit og bata sumala sa gilatid diha sa 38.6.6.
Dinaghan nga Kaminyoon. Ang konseho sa pagkamiyembro gikinahanglan kon ang usa ka tawo motuyo sa pagsulod sa dinaghan nga kaminyoon. Ang pipila ka dinaghan nga kaminyoon mahimong sekreto nga nahitabo, nga ang sa usa ka kapikas wala makahibalo mahitungod sa usa o uban pang mga kapikas. Ang pagbakwi sa pagkamiyembro sa tawo diha sa Simbahan gikinahanglan kon ang usa ka tawo mituyo sa pagsulod ngadto sa dinaghan nga kaminyoon.
Binuhatan nga Motuyo sa Pagpasakit sa Sekswal nga Paagi. Ang konseho sa pagkamiyembro gikinahanglan kon ang usa ka hamtong balik-balik nga modaot og tawo sa sekswal nga paagi ug mahimong hulga ngadto sa uban.
32.6.1.3
Malimbongon nga mga Buhat
Binuhatan nga Motuyo sa Pagpasakit sa Pinansyal nga Paagi. Ang konseho sa pagkamiyembro gikinahanglan kon ang usa ka hamtong adunay kaagi nga motuyo ug mobalik-balik sa pagdaot sa mga tawo sa pinansyal nga paagi ug mahimong hulga ngadto sa uban (tan-awa sa 38.6.2.4). Kini naglakip sa pagpanglimbong sa puhonan [investment fraud] ug susama nga mga kalihokan. Ang wala tuyoa nga pinansyal nga problema tungod sa ekonomikanhong mga kondisyon dili maisip nga panglimbong. Kon dunay kinihaay nga mahitabo, ang mga lider sa pagkapari mahimong mohukom nga maghulat hangtod ang hukom sa korte dili na mausab. Tan-awa sa 32.6.3.3 kon ang usa ka miyembro nalambigit sa pagpangawkaw sa pundo sa Simbahan o kabtangan.
32.6.1.4
Mga Kalapasan sa Pagsalig
Seryoso nga Kalapasan Samtang Naghupot og Prominente nga Katungdanan sa Simbahan. Ang konseho sa pagkamiyembro gikinahanglan kon ang usa ka miyembro nakahimo og seryoso nga sala samtang naghupot og prominente nga katungdanan. Kini naglakip sa Kinatibuk-ang Awtoridad, Kinatibuk-ang Opisyal sa Simbahan, Area Seventy, presidente o matron sa templo, presidente sa misyon o sa iyang kompanyon, presidente sa stake, patriyarka, o bishop. Dili apil niini ang mga presidente sa branch. Hinoon, ang mga pribilehiyo sa pagkamiyembro sa presidente sa branch diha sa Simbahan mahimong dunay restriksiyon o bakwion sama sa ubang mga miyembro.
32.6.1.5
Ubang mga Buhat
Nakombikto og Bug-at nga Krimen. Ang konseho sa pagkamiyembro gikinahanglan sa kadaghanan nga mga kaso kon ang usa ka tawo nakombikto og usa ka bug-at nga krimen.
32.6.2
Kanus-a ang usa ka Konseho sa Pagkamiyembro Mahimong Kinahanglanon
Ang konseho sa pagkamiyembro mahimong kinahanglanon sa mosunod nga mga hitabo.
32.6.2.1
Bayolente nga mga Buhat ug Abuso
Ang Ginoo misugo, “Dili kamo … magpatay, ni magbuhat sa bisan unsa nga butang nga sama niini” (Doktrina ug mga Pakigsaad 59:6; mga italic gidugang). Ang bayolente nga mga buhat ug abuso diin ang konseho sa pagkamiyembro mahimong kinahanglanon nga maglakip sa (apan dili limitado) nianang gilista sa ubos.
Pagsulay sa Pagpatay. Tinuyo nga pagsulay sa pagpatay og usa ka tawo.
Sekswal nga Pag-abuso, Lakip sa Pangataki ug Pagsamok-samok. Ang sekswal nga pag-abuso naglangkob og lapad nga matang sa mga aksiyon (tan-awa sa 38.6.18). Ang konseho sa pagkamiyembro mahimong gikinahanglan alang sa tawo kinsa sekswal nga nangataki o miabuso og usa ka tawo. Ang usa ka konseho mas lagmit nga kinahanglanon aron matabangan ang usa ka miyembro sa paghinulsol kon siya nakalapas sa mga pakigsaad sa templo o kon ang sala balik-balik na. Tan-awa sa 38.6.18.3 kon kanus-a gikinahanglan ang usa ka konseho.
Pag-abuso sa Kapikas o Laing Hamtong. Magkalain-lain ang kagrabe sa binuhatan nga abusado (tan-awa sa 38.6.2.4). Ang konseho sa pagkamiyembro mahimong gikinahanglan alang sa tawo kinsa miabuso sa usa ka kapikas o laing hamtong. Ang usa ka konseho mas lagmit nga kinahanglanon aron matabangan ang usa ka miyembro sa paghinulsol kon siya nakalapas sa mga pakigsaad sa templo o kon ang sala balik-balik na. Tan-awa sa 38.6.2.4 kon kanus-a gikinahanglan ang usa ka konseho.
32.6.2.2
Sekswal nga Imoralidad
Ang balaod sa Ginoo bahin sa kaputli mao ang pagpugong gikan sa sekswal nga mga relasyon nga gawas sa legal nga kaminyoon tali sa usa ka lalaki ug usa ka babaye (tan-awa sa Exodo 20:14; Doktrina ug mga Pakigsaad 63:16). Ang konseho sa pagkamiyembro mahimong kinahanglanon alang sa sekswal nga imoralidad sumala sa gihulagway diha sa 38.6.5 Niini nga mga sitwasyon, ang usa ka konseho mas lagmit nga kinahanglanon aron matabangan ang usa ka miyembro sa paghinulsol kon siya nakalapas sa mga pakigsaad sa templo o kon ang sala balik-balik na. Tan-awa sa 32.6.1.2 kon kanus-a gikinahanglan ang usa ka konseho.
32.6.2.3
Malimbongon nga mga Buhat
Ang Napulo ka Sugo nagtudlo, “Ayaw kamo pangawat” o “pagbutangbutang” (Exodo 20:15–16). Ang konseho sa pagkamiyembro posible nga gikinahanglan alang sa mga buhat sama sa pagpanulis, pagpanglungkab, pagpangawat, pagpanghilabot sa dili niya kwarta, pagpamakak ug pagpangilad. Niini nga mga sitwasyon, ang usa ka konseho mas lagmit nga kinahanglanon aron matabangan ang usa ka miyembro sa paghinulsol kon siya nakalapas sa mga pakigsaad sa templo o kon ang sala balik-balik na.
Tan-awa sa 32.6.1.3 kon kanus-a gikinahanglan ang usa ka konseho alang sa malimbongon nga mga buhat. Tan-awa sa 32.6.3.3 kon ang usa ka miyembro nalambigit sa pagpangawkaw sa pundo sa Simbahan o kabtangan. Tan-awa sa 38.8.2 alang sa pagpangilad sa kauban.
32.6.2.4
Mga Kalapasan sa Pagsalig
Ang konseho sa pagkamiyembro mahimong kinahanglanon kon ang usa ka miyembro:
-
Nakabuhat og seryoso nga sala samtang naghupot og katungdanan nga may awtoridad o gisaligan diha sa Simbahan o komunidad.
-
Nakabuhat og seryoso nga sala nga nahibaloan sa kadaghanan.
Niini nga mga sitwasyon, ang usa ka konseho mas lagmit nga kinahanglanon aron matabangan ang usa ka miyembro sa paghinulsol kon siya nakalapas sa mga pakigsaad sa templo o kon ang sala balik-balik na.
Tan-awa sa 32.6.1.4 kon kanus-a gikinahanglan ang usa ka konseho. Tan-awa sa 32.6.3.3 kon ang usa ka miyembro nalambigit sa pagpangawkaw sa pundo sa Simbahan o kabtangan.
32.6.2.5
Ubang mga Buhat
Si Hari Benjamin mitudlo, “Ako dili makasulti kaninyo sa tanan nga mga butang diin kamo mahimo nga makabuhat og sala; kay adunay daghan nga mga paagi ug mga hinungdan, gani hilabihan kadaghan nga ako dili na makaihap kanila” (Mosiah 4:29). Ang konseho mahimong kinahanglanon kon ang usa ka tawo:
-
Nagpakita og pabalik-balik nga paghimo og seryoso nga mga sala (tan-awa sa Doktrina ug mga Pakigsaad 82:7).
-
Mituyo pagbiya sa mga responsibilidad sa pamilya, lakip sa wala pagbayad sa suporta sa bata ug panggasto sa kapikas [alimony].
-
Mohulga og pisikal nga kabayolente, sa atubangan sa tawo o online (tan-awa sa 32.2.1).
-
Namaligya og ilegal nga mga droga.
-
Nakahimo og ubang seryoso nga kriminal nga mga buhat.
Niini nga mga sitwasyon, ang usa ka konseho mas lagmit nga kinahanglanon aron matabangan ang usa ka miyembro sa paghinulsol kon siya nakalapas sa mga pakigsaad sa templo o kon ang sala balik-balik na.
Ang konseho sa pagkamiyembro mahimong kinahanglanon kon ang usa ka miyembro mopaubos ngadto sa, mopahigayon sa, mobayad alang sa, o moawhag og usa ka aborsyon. Tan-awa sa 38.6.1 alang sa mga lagda.
Kon ang Konseho sa Pagkamiyembro Gikinahanglan o Mahimong Kinahanglanon
|
Matang sa Sala |
Konseho sa Pagkamiyembro Gikinahanglan (tan-awa sa 32.6.1) |
Konseho sa Pagkamiyembro Mahimong Kinahanglanon (tan-awa sa 32.6.2) |
|---|---|---|
Matang sa Sala Bayolente nga mga Buhat ug Abuso | Konseho sa Pagkamiyembro Gikinahanglan (tan-awa sa 32.6.1)
| Konseho sa Pagkamiyembro Mahimong Kinahanglanon (tan-awa sa 32.6.2) |
Matang sa Sala Sekswal nga Imoralidad | Konseho sa Pagkamiyembro Gikinahanglan (tan-awa sa 32.6.1)
| Konseho sa Pagkamiyembro Mahimong Kinahanglanon (tan-awa sa 32.6.2)
|
Matang sa Sala Malimbongon nga mga Buhat | Konseho sa Pagkamiyembro Gikinahanglan (tan-awa sa 32.6.1)
| Konseho sa Pagkamiyembro Mahimong Kinahanglanon (tan-awa sa 32.6.2)
|
Matang sa Sala Mga Kalapasan sa Pagsalig | Konseho sa Pagkamiyembro Gikinahanglan (tan-awa sa 32.6.1)
| Konseho sa Pagkamiyembro Mahimong Kinahanglanon (tan-awa sa 32.6.2)
|
Matang sa Sala Ubang mga Buhat | Konseho sa Pagkamiyembro Gikinahanglan (tan-awa sa 32.6.1)
| Konseho sa Pagkamiyembro Mahimong Kinahanglanon (tan-awa sa 32.6.2)
|
32.6.3
Kanus-a ang Presidente sa Stake Magpakitambag sa Kapangulohan sa Area mahitungod Kon ang Konseho sa Pagkamiyembro o Ubang Aksiyon Gikinahanglan Ba
Ang pipila ka butang magkinahanglan og dugang nga pagkasensitibo ug giya. Aron makahibalo unsaon nga labing makatabang, ang presidente sa stake kinahanglan nga magpakitambag sa Kapangulohan sa Area mahitungod sa mga sitwasyon niini nga seksiyon. Hinoon, ang presidente sa stake lamang ang mohukom kon ipahigayon ba ang usa ka konseho aron sa paghisgot sa binuhatan. Kon ang usa ka konseho ipahigayon, ang presidente sa stake o ang bishop mohukom sa mga sangpotanan.
Kon ang usa ka konseho sa pagkamiyembro gihimo alang sa mga butang nga gilatid niini nga seksiyon, ang desisyon sa konseho kinahanglan gayod nga “nagpabilin nga maayo og reputasyon,” “pormal nga mga restriksiyon sa pagkamiyembro,” o “pagbakwi sa pagkamiyembro.” Ang pagtugot sa Unang Kapangulohan gikinahanglan sa pagtangtang sa pormal nga mga restriksiyon o pagdawat pag-usab sa tawo ngadto sa Simbahan (tan-awa sa 32.16.1, numero 9).
32.6.3.1
Ubang Aksiyon
Kon ang konseho sa pagkamiyembro wala ipahigayon, ang ubang aksiyon maglakip sa:
-
Dili pormal nga mga restriksiyon sa pagkamiyembro (tan-awa sa 32.8.3).
-
Annotation [sulat pagpasabot] sa rekord sa pagkamiyembro (tan-awa sa 32.14.5).
-
Ang mga restriksiyon sa ordinansa, nga nagdili sa tawo sa pagdawat o paggamit sa pagkapari o pagdawat o paggamit sa rekomend sa templo.
Ang presidente sa stake magpakitambag sa Kapangulohan sa Area sa dili pa himoon ang usa niini nga mga aksiyon.
32.6.3.2
Apostasiya
Ang mga isyu sa apostasiya sa kasagaran adunay epekto lapas sa mga utlanan sa usa ka ward o stake. Kinahanglang asikasohon dayon kini aron sa pagpanalipod sa uban.
Ang bishop magpakitambag sa presidente sa stake kon siya mobati nga ang aksiyon sa usa ka miyembro nagpakita og apostasiya. Ang bishop o ang presidente sa stake mahimong mobutang sa dili pormal nga mga restriksiyon sa pagkamiyembro diha sa miyembro (tan-awa sa 32.8.3). Ang presidente sa stake magpakitambag dayon sa Kapangulohan sa Area. Hinoon, ang presidente sa stake lamang ang mohukom kon ang konseho sa pagkamiyembro o ubang aksiyon gikinahanglan ba.
Sumala sa gigamit dinhi, ang apostasiya nagpasabot sa usa ka miyembro nga naghimo sa bisan unsa sa mosunod:
-
Nagsige og buhat sa klaro ug tinuyo nga oposisyon sa Simbahan, sa doktrina niini, sa mga palisiya niini, o sa mga lider niini diha sa publiko
-
Nagpadayon sa pagtudlo isip doktrina sa Simbahan sa unsay dili doktrina sa Simbahan human korihii sa bishop o presidente sa stake
-
Nagpakita og pabalik-balik nga tinuyo nga paningkamot sa pagpahuyang sa hugot nga pagtuo ug kalihokan sa mga miyembro sa Simbahan
-
Nagpadayon sa pagsunod sa mga pagtulon-an sa sekta sa mga mi-apostasiya human makorihii sa bishop o presidente sa stake
-
Pormal nga miapil sa laing simbahan ug nag-awhag sa mga pagtulon-an niini (Ang hingpit nga pagkadili aktibo sa Simbahan o pagtambong og laing simbahan kon kini lang wala maglangkob og apostasiya. Hinoon, kon ang usa ka miyembro pormal nga mipasakop sa laing simbahan ug mitudlo sa mga pagtulon-an niini, ang pagbakwi sa iyang pagkamiyembro mahimong kinahanglanon.)
Ang Manluluwas mitudlo sa mga Nephite nga sila kinahanglang mopadayon sa pagpangalagad ngadto sa tawo kinsa nakasala. “Apan kon siya dili maghinulsol dili siya pagaiphon taliwala sa akong mga katawhan, nga aron siya dili makaangin sa akong mga katawhan” (3 Nephi 18:31).
32.6.3.3
Pagpanghilabot sa mga Pundo sa Simbahan
Kon ang usa ka tawo mangawkaw sa mga pundo sa Simbahan o mokawat sa bililhong kabtangan sa Simbahan, ang presidente sa stake magpakitambag sa Kapangulohan sa Area mahitungod kon ang konseho sa pagkamiyembro o ubang aksyon gikinahanglan ba. Ang mga lider mokonsiderar:
-
Sa kantidad nga gihilabtan o gikawat.
-
Kon ang pagpangawkaw kausa ra nahitabo o gibalik-balik.
-
Kon duna bay nahitabo nga pagbayad.
-
Ang lebel sa pagmahay sa tawo.
-
Ang posisyon nga gihuptan sa miyembro (tan-awa sa 32.6.1.4 alang sa mga miyembro nga naghupot og usa ka prominenting posisyon sa Simbahan).
Ang presidente sa stake moreport sa usa sa mosunod sa Leader and Clerk Resources:
-
Ang mga resulta sa usa ka konseho sa pagkamiyembro
-
Nga siya nakigtambag sa Kapangulohan sa Area ug gitino nga ang usa ka konseho sa pagkamiyembro wala na gikinahanglan
Kon ang Church Auditing Department [Departamento sa Pag-awdit sa Simbahan] nagtumbok nga ang usa ka lider o empleyado sa Simbahan nakapangawkaw sa mga pundo sa Simbahan o kabtangan, ang Unang Kapangulohan sa kinatibuk-an ang mosugo nga ang iyang rekord sa pagkamiyembro mabutangan og anotasyon. Ang “lider” gihulagway isip usa ka tawo nga naghupot og usa ka prominente nga posisyon sa Simbahan, ingon man ang mga magtatambag, mga klerk, ug mga kapangulohan sa branch. Kon nakompleto na ang paghinulsol, ang presidente sa stake mahimong mohangyo nga tangtangon ang anotasyon (tan-awa sa 32.14.5 ug 34.7.5). Ang usa ka anotasyon wala nagpasabot nga ang usa ka konseho sa pagkamiyembro o ubang aksiyon nahitabo.
32.6.3.4
Transgender nga mga Indibidwal
Ang mga bishop ug ang mga presidente sa stake nga nagtabang og mga tawo nga nagpaila nga transgender kinahanglang mosunod sa mga lagda diha sa 38.6.23.
32.6.4
Kanus-a ang Konseho sa Pagkamiyembro sa Kasagaran Wala Kinahanglana
Ang konseho sa pagkamiyembro sa kasagaran wala kinahanglana sa mosunod nga mga sitwasyon.
32.6.4.1
Pagkapakyas sa Pagtuman sa Ubang mga Sumbanan sa Simbahan
Ang konseho sa pagkamiyembro dili ipahigayon alang sa mga aksiyon nga gilista sa ubos. Hinoon, timan-i ang eksepsiyon sa kataposang aytem.
-
Pagkadili aktibo diha sa Simbahan
-
Wala magtuman sa mga katungdanan sa Simbahan
-
Wala magbayad sa ikapulo
-
Mga sala sa wala pagbuhat sa angay buhaton
-
Pag-masturbate
-
Wala pagsunod sa Pulong sa Kaalam
-
Paggamit og pornograpiya, gawas sa pornograpiya nga naggamit og bata (sumala sa gilatid diha sa 38.6.6) o grabe o dili mapugngan nga paggamit sa pornograpiya nga nakaingon og dakong kadaot sa kaminyoon o pamilya sa usa ka miyembro (sumala sa gilatid diha sa 38.6.13).
32.6.4.2
Mga Kapakyas sa Negosyo o Wala Pagbayad sa mga Utang
Kinahanglan nga ang mga lider dili mogamit sa konseho sa pagkamiyembro sa paghusay sa mga kasungian sa negosyo. Ang mga kapakyas sa negosyo ug wala pagbayad sa mga utang dili mga rason aron mopahigayon og konseho sa pagkamiyembro. Hinoon, ang konseho kinahanglang ipahigayon alang sa seryoso nga mga kalihokan sa pagpanglimbong o sa ubang bug-at nga mga binuhatan sa pinansyal nga pagpanlimbong (tan-awa sa 32.6.1.3).
32.6.4.3
Sibil nga mga Kasungian
Ang mga konseho sa pagkamiyembro dili ipahigayon aron sa pagsulbad sa sibil nga mga kasungian (tan-awa sa Doktrina ug mga Pakigsaad 134:11).
32.7
Mga Sirkumstansya sa Tawo
Ang Ginoo miingon, “Ang akong bukton sa kalooy gitunol nganha kaninyo, ug kinsa kadto nga moduol Ako modawat kaniya; ug bulahan kadto kinsa moduol ngari kanako” (3 Nephi 9:14). Ang mga sirkumstansya sa tawo importante nga konsiderasyon sa pagtino:
-
Sa angay nga kahimtang alang sa pagtabang kaniya nga maghinulsol sa seryoso nga mga sala (tan-awa sa 32.5 ug 32.6).
-
Sa mga desisyon nga gihimo diha sa personal nga pagtambag o sa mga konseho sa pagkamiyembro (tan-awa sa 32.8 ug 32.11).
Ang mga bishop ug ang mga presidente sa stake magtinguha sa hunahuna ug kabubut-on sa Ginoo alang sa matag sitwasyon. Sila mokonsiderar sa mosunod nga mga bahin sa pagtino unsa nga sitwasyon ang gamiton ug unsa ang sangpotanan. Kini nga mga bahin dili modiktar sa usa ka piho nga desisyon. Hinoon, kini mga abag sa usa ka desisyon nga kinahanglang mainampoon nga himoon sa mga lider ug sumala sa paggiya sa Espiritu.
32.7.1
Gidak-on sa Sala
Ang ka seryoso sa usa ka sala gisukod pinaagi sa gidak-on. Kini maglakip sa gidaghanon ug kasagad sa mga sala nga nahimo, sa kagrabe sa kadaot nga miresulta gikan niini, ug sa gidaghanon sa tawo nga nasakitan niini.
32.7.2
Mga Tinguha sa Biktima
Ang mga lider mokonsiderar sa mga tinguha sa mga biktima ug sa uban. Kini maglakip sa kapikas sa tawo ug sa ubang mga sakop sa pamilya. Ang mga lider mokonsiderar usab sa ka grabe sa kadaot.
32.7.3
Ebidensya sa Paghinulsol
Ang espirituwal nga giya gikinahanglan sa pag-ila kon ang usa ka tawo sinsero ba nga naghinulsol. Ang tinuod nga paghinulsol mas mapakita pinaagi sa matarong nga mga lihok sulod sa usa ka panahon kay sa hilabihang kaguol sa panahon sa usa lang ka interbiyo. Mga bahin nga ikonsiderar maglakip:
-
Sa kalig-on sa hugot nga pagtuo diha ni Jesukristo.
-
Sa matang sa pagkompisal.
-
Sa giladmon sa kasubo alang sa sala.
-
Sa pagpahiuli ngadto sa nasakitan nga mga tawo.
-
Sa pagtuman sa legal nga mga kinahanglanon.
-
Sa kalamposan sa pagsalikway sa sala.
-
Sa kamatinud-anon sa pagsunod sa mga sugo sukad gihinulsolan ang sala.
-
Sa kamatinuoron ngadto sa mga lider sa Simbahan ug sa uban.
-
Sa pagkaandam sa pagsunod sa tambag sa mga lider sa Simbahan.
32.7.4
Kalapasan sa mga Pakigsaad sa Templo
Ang Ginoo mipahayag, “Alang kaniya ngadto kinsa daghan ang gihatag daghan ang gikinahanglan” (Doktrina ug mga Pakigsaad 82:3). Ang usa ka tawo kinsa nakadawat sa pagtuga sa templo nakahimo og mga pakigsaad sa pagpuyo sa mas taas nga sumbanan. Ang paglapas niining mga pakigsaad makapadugang sa ka seryoso sa sala. Kini nakapadugang sa kalagmitan nga ang konseho sa pagkamiyembro kinahanglanon.
32.7.5
Katungdanan nga anaa ang Pagsalig o Awtoridad
Ang kaseryoso sa usa ka sala mas madugangan kon ang usa ka tawo nakahimo niini samtang anaa sa katungdanan nga gisaligan o awtoridad, sama sa usa ka ginikanan, lider, o magtutudlo.
32.7.6
Pagbalik-balik
Ang pabalik-balik sa paghimo sa samang seryoso nga sala mahimong timailhan sa nakagamot na pag-ayo nga batasan o adiksyon nga makapugong sa kauswagan ngadto sa tinuod nga paghinulsol. Agi og dugang sa mga restriksiyon sa pagkamiyembro nga mahimong kinahanglanon, ang mga programa aron mamaayo gikan sa adiksyon ug propesyonal nga pagpatambag tingali makatabang (tan-awa sa 32.8.2).
32.7.7
Edad, Kahingkod, ug Kasinatian
Ang mga lider mokonsiderar sa edad, kahingkod, ug kasinatian kon motambag og usa ka miyembro o mohukom sa sangpotanan sa usa ka konseho sa pagkamiyembro. Ang kaluoy kasagaran angay alang niadtong kinsa dili pa hingkod sa ebanghelyo. Pananglitan, ang kaluoy mahimong angay usab alang sa batan-ong mga miyembro nga nalambigit sa imoral nga binuhatan kon sila mosalikway sa sala ug magpakita og sinsero nga paghinulsol. Hinoon, ang mas seryoso nga aksiyon tingali gikinahanglan kon sila magpadayon sa maong pamatasan.
32.7.8
Kapasidad sa Pangisip
Ang kakulian sa pangisip, adiksyon, o limitado nga kapasidad sa pangisip dili ikapangatarongan sa tawo kinsa nakahimo og seryoso nga sala. Hinoon, kini mao ang mga bahin nga ikonsiderar. Isip kabahin sa pagtabang sa tawo nga maghinulsol, ang mga lider magtinguha sa giya sa Ginoo mahitungod sa pagsabot sa tawo sa mga baroganan sa ebanghelyo ug lebel sa pagkamay-tulubagon.
32.7.9
Boluntaryo nga Pagkompisal
Ang boluntaryo nga pagkompisal ug diosnong kasubo alang sa mga aksiyon sa usa ka tawo nagpakita og tinguha sa paghinulsol.
32.7.10
Panahon tali sa Sala ug sa Pagkompisal
Ang pagkompisal kabahin sa paghinulsol ug kinahanglang dili langay-langayon. Usahay ang usa ka sala sundan sa taas nga panahon sa pagpahiuli ug matinud-anong pagpuyo. Kon ang usa ka miyembro mokompisal sa usa ka sala ug wala na kini usba, kana nagpakita nga siya misalikway niini. Niana nga sitwasyon, ang pagkompisal mohingpit kay sa mosugod pa sa proseso sa paghinulsol.
32.7.11
Mga Sala nga Naglambigit sa mga Miyembro Nga Nagpuyo sa Lahi nga mga Ward o Stake
Usahay ang mga miyembro kinsa nakahimo og usa ka bug-at nga sala nagpuyo diha sa managlahi nga mga ward o mga stake. Niining sitwasyon, ang mga presidente sa stake magtinambagay mahitungod sa panginahanglan alang sa mga restriksiyon o mga konseho sa pagkamiyembro. Sila maghisgot usab kon aduna bay merito ngadto sa mga restriksiyon o mga desisyon sa konseho isip parehas o kon adunay laing mga butang nga tingali nagpakita og usa ka panginahanglan alang sa lainlaing mga sangpotanan.
PAGPAHIGAYON SA PERSONAL NGA PAGTAMBAG
32.8
Personal nga Pagtambag ug Dili Pormal nga mga Restriksiyon sa Pagkamiyembro
Ang personal nga pagtambag sa kasagaran igo na sa pagtabang sa pagpanalipod sa uban ug sa pagtabang sa usa ka tawo nga makagamit sa matubsanong gugma ni Jesukristo pinaagi sa paghinulsol. Ang maong pagtambag makatabang usab sa mga miyembro nga makabantay batok sa mas seryoso nga mga sala. Sa personal nga pagtambag, ang mga lider makahatag usab og dili pormal nga mga restriksiyon sa pagkamiyembro aron sa pagtabang sa miyembro nga maghinulsol sa mas seryoso nga mga sala (tan-awa sa 32.8.3).
Ang seryoso nga mga sala dili angayan nga itratar nga gamay ra (tan-awa sa Doktrina ug mga Pakigsaad 1:31). Ang paglapas sa mga pakigsaad sa templo makapadugang sa kalagmitan nga gikinahanglan ang konseho sa pagkamiyembro (tan-awa sa 32.7.4).
Ang mga lagda sa pagtabang sa mga lider nga makahibalo kanus-a nga igo na ang pagtambag ug dili pormal nga mga restriksiyon gilista sa ubos (tan-awa usab sa 32.7):
-
Ang usa ka tawo wala makahimo og sala nga magkinahanglan og konseho sa pagkamiyembro (tan-awa sa 32.6.1).
-
Ang usa ka tawo boluntaryong mikompisal ug tinud-anay nga naghinulsol.
-
Ang usa ka tawo naghinulsol sa usa ka seryoso nga sala nga wala niya mahimo kaniadto.
-
Ang sala sa usa ka tawo wala makalapas sa mga pakigsaad sa templo.
-
Ang usa ka tawo adunay importante nga mga sirkumstansiya nga makapagaan sa sala.
32.8.1
Personal nga Pagtambag
Ang mosunod nga mga lagda magamit kon ang usa ka bishop o presidente sa stake nagtambag og usa ka miyembro aron matabangan siya nga maghinulsol.
-
Pangutana lamang og igo nga impormasyon sa pagtino (1) sa kinaiya sa miyembro ngadto sa makasasala nga binuhatan ug (2) sa matang, sa kasagad, ug sa gidugayon sa binuhatan. Ayaw pangutana og mga detalye lapas sa unsay gikinahanglan sa pagsabut sa sitwasyon. Ayaw pangutana og mga pangutana nga gikan sa personal nga pagkakuryoso.
-
Pangutana kon sa unsa nga paagi nga ang binuhatan nakaapekto sa uban.
-
Tutoki ang positibo nga mga kondisyon nga makapalig-on sa pagkakabig ug pasalig sa miyembro ngadto sa Ginoo. Awhaga ang miyembro sa paghimo og piho nga mga aksiyon aron mahitabo ang kausaban sa binuhatan ug kausaban sa kasingkasing nga maghinulsol. Dapita siya sa pagpaduol ngadto sa Manluluwas, pagtinguha sa Iyang kalig-on ug sa pagbati sa Iyang matubsanong gugma.
-
I-awhag ang makabayaw nga mga kalihokan sama sa pag-ampo, pagtuon sa mga kasulatan, ug pagtambong sa mga miting sa Simbahan. Itudlo nga ang buhat sa family history ug sa templo makapakunhod sa impluwensya sa kaaway. I-awhag ang pagserbisyo sa uban ug ang pagpaambit sa ebanghelyo.
-
I-awhag ang paghimo og pagpahiuli niadtong nasakitan tungod sa mga sala ug pagpangayo og pasaylo
-
I-awhag ang pagbiya gikan sa dili maayong mga impluwensya. Tabangi ang mga miyembro nga mohimo og mga aksiyon sa pagpanalipod aron sa pagpakigbatok sa piho nga mga tintasyon.
-
Timan-i nga ikaw usa ka eklesyastikanhon nga lider, dili usa ka propesyonal nga magtatambag. Agig dugang sa pagtambag nga imong ihatag, ang pipila ka miyembro makabenepisyo gikan sa pagtambag bahin sa binuhatan. Ang uban nag-antos gikan sa kakulian sa pangisip. Kon gikinahanglan, tambagi ang mga miyembro nga magtinguha og tabang gikan sa kwalipikado nga mga propesyonal alang sa medikal ug sa kahimsog sa pangisip (tan-awa sa 31.3.6).
-
Pagmainampoon ug tinguhaa ang giya gikan sa Espiritu sa dili pa mohatag sa dili pormal nga mga restriksiyon sa pagkamiyembro. Ang pipila ka miyembro makabenepisyo sa aktibong paggamit sa mga pribilehiyo sa pagkamiyembro diha sa Simbahan kay sa paghatag kanila og mga restriksiyon.
-
Pag-follow up aron mohatag og pag-awhag, pagpanalipod sa espirituwal nga kalig-on, ug sa pagtan-aw sa kauswagan.
Human makakompisal ang usa ka miyembro ngadto sa bishop o sa presidente sa stake, ang follow-up nga pagtambag mahimong mahitabo sa pipila ka paagi. Ang lider mismo makahatag niini. O, uban sa pagtugot sa miyembro, siya mahimong mosangon sa usa sa iyang mga magtatambag sa paghatag niini.
Kon mouyon ang miyembro, ang usa ka bishop o ang presidente sa stake mahimong mosangon sa mga sakop sa korum sa mga elder o sa Relief Society sa pagtabang sa piho nga mga paagi. Alang sa kabatan-onan, siya mahimong mosangon sa kapangulohan sa Young Women o mga tigtambag sa korum sa Aaronic nga Pagkapari sa pagtabang. Kadtong kinsa gisangonan sa pagtabang adunay katungod sa inspirasyon sa pagtuman niana nga buluhaton (tan-awa sa 4.2.6).
Kon mosangon og usa ka tawo sa pag-abag sa follow-up nga pagtambag, ang lider mohatag lamang sa igong impormasyon nga gikinahanglan sa pagtabang sa miyembro. Ang gisangonan nga tawo kinahanglan nga momintenar sa pagkakompidensiyal. Siya mopahibalo usab sa bishop sa kauswagan ug sa mga panginahanglan sa miyembro.
32.8.2
Pagtabang sa mga Tawo nga Matubag ang mga Pagkaadik ug Paggamit sa Pornograpiya
Ang personal nga pagtambag usahay naglakip sa pagtabang sa mga miyembro nga maghinulsol sa mga sala nga may kalabotan o tungod sa pagkaadik. Kini nga mga adiksyon mahimong maglakip sa mga butang o nagkadaiyang matang sa mga binuhatan. Ang adiksyon makadaot sa mga indibidwal, mga kaminyoon, ug mga pamilya. Ang mga bishop mahimong motambag sa mga miyembro sa pagpangayo og tabang gikan sa mga programa sa Simbahan aron mamaayo gikan sa adiksyon ug gikan sa kwalipikado nga medikal nga mga propesyonal sa kahimsog sa panglawas ug pangisip.
Ang pornograpiya nag-anam ka komon. Bisan kon ang paggamit sa pornograpiya kanunay man o panagsa ra, makadaot kini. Makapapahawa kini sa Espiritu. Makapahuyang kini sa abilidad sa pag-angkon og gahom nga moabot gikan sa pagtuman sa mga pakigsaad. Makadaot usab kini sa bililhong mga relasyon.
Ang personal nga pagtambag ug dili pormal nga mga restriksiyon sa pagkamiyembro sa kasagaran igo na alang sa pagtabang sa usa ka tawo nga maghinulsol sa paggamit og pornograpiya. Ang mga konseho sa pagkamiyembro sa kasagaran dili ipahigayon. Alang sa mga eksepsiyon, tan-awa sa 38.6.6 ug 38.6.13. Ang propesyonal nga pagtambag tingali makatabang.
Ang mga presidente sa stake ug ang mga bishop mosuporta sa mga sakop sa pamilya kon gikinahanglan. Ang mga ginikanan mahimong ilakip kon magtambag og batan-on mahitungod sa pornograpiya. Ang kapikas mahimong ilakip kon magtambag og usa ka minyo nga tawo.
Alang sa dugang nga impormasyon mahitungod sa pagtambag sa mga miyembro kinsa nalambigit sa pornograpiya, tan-awa sa 38.6.13.
32.8.3
Dili Pormal nga mga Restriksiyon sa Pagkamiyembro
Agi og dugang sa pag-awhag og positibo nga mga aksiyon kon magtambag, ang usa ka bishop o ang presidente sa stake mahimong mohatag og dili pormal nga restriksiyon sa pipila ka pribilehiyo sa pagkamiyembro sa Simbahan sulod sa usa ka panahon. Maalamon nga gipangalagad, kini nga mga restriksiyon makatabang sa paghinulsol ug espirituwal nga kauswagan. Kini giisip nga dili pormal tungod kay kini wala ibutang diha sa rekord sa pagkamiyembro.
Ang dili pormal nga mga restriksiyon mahimong molungtad og pipila ka semana, pipila ka bulan, o mas taas pa kon gikinahanglan aron ang tawo hingpit nga makahinulsol. Sa dili kasagaran nga mga sirkumstansiya, ang panahon mahimong mas taas pa kay sa usa ka tuig.
Ang mga lider magtinguha og giya sa Espiritu mahitungod sa unsa nga mga restriksiyon ang labing maayong makatabang sa tawo nga maghinulsol. Kini mahimong maglakip sa (apan dili limitado sa) pagsuspende sa pribilehiyo sa pagserbisyo sa usa ka calling sa Simbahan, paggamit sa pagkapari, o pagsulod sa templo. Ang lider kinahanglan usab nga mohatag og restriksiyon sa tawo sa paghatag og pakigpulong, leksiyon, o pag-ampo diha sa Simbahan. Kon ang lider mosuspende sa katungod sa pagsulod sa templo, siya mokanselar sa rekomend sa templo diha sa Leader and Clerk Resources (LCR).
Ang pag-ambit sa sakramento usa ka importante nga bahin sa paghinulsol. Kinahanglang dili kini ang unang restriksiyon nga ihatag ngadto sa usa ka mahinulsulon nga tawo kinsa adunay masulub-on nga kasingkasing ug mahinulsulon nga espiritu. Hinoon, kon ang usa ka tawo nakahimo og seryoso nga mga sala, ang usa ka lider mahimong mosuspende niini nga pribilehiyo sulod sa usa ka panahon.
Ang mga lider sa kasagaran dili mosulti ni bisan kinsa mahitungod sa dili pormal nga mga restriksiyon gawas kon adunay panginahanglan nga makahibalo (tan-awa sa 32.12.2).
Ang bishop o ang presidente sa stake mahimong motangtang sa dili pormal nga mga restriksiyon kon gigiyahan sa Espiritu kon ang tawo nakahimo sa gipiho nga kauswagan pinaagi sa tinud-anay nga paghinulsol. Kon ang miyembro nagpadayon sa pabalik-balik nga sala, tingali makatabang o kinahanglan nga magpahigayon og konseho sa pagkamiyembro.
PAGPAHIGAYON SA MGA KONSEHO SA PAGKAMIYEMBRO DIHA SA SIMBAHAN
Ang mga konseho sa pagkamiyembro diha sa Simbahan ipahigayon kon ang bishop o ang presidente sa stake nakatino nga kini makatabang o kon kini gikinahanglan tungod sa palisiya sa Simbahan (tan-awa sa 32.6). Kini ipahigayon sa lebel sa ward, stake, branch, district, o sa misyon. Kini nga seksiyon naghatag og impormasyon mahitungod kon unsaon sa pagpahigayon niini.
32.9
Pag-apil ug Responsibilidad
Ang mosunod nga talaan nagpakita kinsa sa kasagaran ang moapil diha sa konseho sa pagkamiyembro.
|
Mga Partisipante diha sa mga Konseho sa Pagkamiyembro | |
|---|---|
|
Konseho sa Pagkamiyembro diha sa Ward | Mga Partisipante diha sa mga Konseho sa Pagkamiyembro
|
|
Konseho sa Pagkamiyembro diha sa Stake | Mga Partisipante diha sa mga Konseho sa Pagkamiyembro
|
32.9.1
Presidente sa Stake
Ang presidente sa stake:
-
Adunay awtoridad sa mga konseho sa pagkamiyembro diha sa stake; hinoon, kadaghanan niini nga mga konseho ipahigayon sa mga bishop.
-
Kinahanglang mohatag og pagtugot sa dili pa ang usa ka bishop mopahigayon og konseho sa pagkamiyembro.
-
Mopahigayon og konseho sa pagkamiyembro diha sa stake kon ang usa ka lalaki o babaye kinsa nakadawat og pagtuga sa templo adunay kalagmitan nga mabakwian sa iyang pagkamiyembro diha sa Simbahan.
-
Mahimong mopahigayon og konseho kon ang usa ka miyembro moapelar sa desisyon sa konseho sa pagkamiyembro diha sa ward.
-
Kinahanglang mohatag og pagtugot sa dili pa madesisyonan ang rekomendasyon sa konseho sa pagkamiyembro diha sa ward nga bakwion ang pagkamiyembro sa wala matugahi nga tawo.
32.9.2
High Council
Ang mga sakop sa high council dili kasagaran moapil sa mga konseho sa pagkamiyembro diha sa stake. Hinoon, ang high council mahimong moapil sa malisod nga mga sitwasyon (tan-awa sa Doktrina ug mga Pakigsaad 102:2). Pananglitan, ang kapangulohan sa stake mahimong modapit sa high council sa pag-apil kon:
-
Adunay gilalisan nga mga pamahayag.
-
Sila makahatag og bililhon ug balanse nga ideya.
-
Ang miyembro mihangyo sa ilang pag-apil.
-
Usa ka sakop sa kapangulohan sa stake o ang iyang pamilya nalambigit (tan-awa sa 32.9.7).
32.9.3
Bishop (o Presidente sa Branch diha sa usa ka Stake)
Ang bishop:
-
Adunay awtoridad sa mga konseho sa pagkamiyembro diha sa ward.
-
Makigsulti sa presidente sa stake ug mangayo sa iyang pagtugot sa dili pa mopahigayon og usa ka konseho.
-
Mahimong dili mopahigayon og usa ka konseho kon ang usa ka lalaki ug babaye kinsa nakadawat og pagtuga sa templo adunay kalagmitan nga mabakwian sa iyang pagkamiyembro sa Simbahan. Ang usa ka konseho sa pagkamiyembro diha sa stake ang kinahanglan gayod nga ipahigayon niadto nga mga sitwasyon.
-
Mahimong dapiton sa pagtambong sa usa ka konseho sa pagkamiyembro diha sa stake alang sa usa ka miyembro sa ward kansang pagkamiyembro girebyo. Ang iyang pagtambong kinahanglang aprobahan sa presidente sa stake ug sa tawo.
Ang usa ka konseho sa pagkamiyembro diha sa ward o branch mahimong morekomendar sa pagbakwi sa pagkamiyembro sa tawo diha sa Simbahan kon siya wala matugahi. Hinoon, ang pagtugot sa presidente sa stake gikinahanglan sa dili pa ang kataposang desisyon.
Usahay ang konseho sa pagkamiyembro diha sa ward ipahigayon alang sa usa ka natugahan nga miyembro ug ang mga kahimoan nagpakita nga adunay kalagmitan nga ang miyembro mabakwian sa iyang pagkamiyembro. Niini nga mga sitwasyon, ang bishop moduso niini ngadto sa presidente sa stake.
32.9.4
Presidente sa Misyon
Ang presidente sa misyon:
-
Adunay awtoridad sa mga konseho sa pagkamiyembro diha sa mga branch ug mga district sa misyon.
-
Kinahanglang mohatag og pagtugot sa dili pa ang presidente sa district o branch mopahigayon og konseho sa pagkamiyembro.
-
Mopahigayon og konseho sa pagkamiyembro kon ang usa ka lalaki o babaye kinsa nakadawat og pagtuga sa templo adunay kalagmitan nga mabakwian sa iyang pagkamiyembro diha sa Simbahan. Kon ang panahon o gilay-on makapugong niini, siya mahimong mosangon sa usa sa iyang mga magtatambag sa pagdumala sa konseho. Siya motudlo og laing duha ka mga tighupot sa Melchizedek nga Pagkapari sa pag-apil.
-
Kon posible, mopahigayon og mga konseho sa pagkamiyembro alang niadtong kinsa wala pa matugahi. Kon ang panahon ug gilay-on makapugong niini, siya mahimong motugot og tulo ka mga tighupot sa Melchizedek nga Pagkapari sa pagpahigayon niini. Niini nga sitwasyon, ang presidente sa district o presidente sa branch sa miyembro sa kasagaran mopahigayon sa konseho.
-
Mahimong mopahigayon og usa ka konseho kon ang usa ka miyembro moapelar sa desisyon sa konseho sa pagkamiyembro diha sa district o branch.
-
Uban sa pagtugot sa usa ka Kinatibuk-ang Awtoridad gikan sa Departamento sa Misyonaryo, mopahigayon og konseho sa pagkamiyembro kon ang usa ka misyonaryo nakahimo og seryoso nga sala diha sa natad sa misyon (tan-awa sa 32.9.8). Siya usab morebyo sa maong butang uban sa usa ka sakop sa Kapangulohan sa Area ug magpakitambag sa presidente sa stake sa misyonaryo.
-
Kinahanglang mohatag og pagtugot sa dili pa madesisyonan ang rekomendasyon sa konseho sa pagkamiyembro diha sa branch o district nga bakwion ang pagkamiyembro sa wala matugahi nga tawo.
Kon ang misyonaryo mokompisal sa usa ka seryoso nga sala nga iyang nahimo sa wala pa moserbisyo og misyon, ang presidente sa misyon mokontak sa iyang representante diha sa Departamento sa Misyonaryo alang sa direksyon.
Kon ang usa ka presidente sa misyon mopahigayon og konseho sa pagkamiyembro, siya motudlo og duha ka tighupot sa Melchizedek nga Pagkapari sa pagtabang kaniya. Sa dili kasagaran nga mga sirkumstansiya lamang nga siya motudlo og batan-ong mga misyonaryo sa pagtabang. Siya mosunod sa samang mga pamaagi sa konseho sa pagkamiyembro diha sa stake (tan-awa sa 32.10). Hinoon, ang high council o konseho sa district dili moapil.
32.9.5
Presidente sa District o Branch diha sa usa ka Misyon
Ang presidente sa district o sa branch sa usa ka misyon mahimong mopahigayon og konseho sa pagkamiyembro kon gitugotan sa presidente sa misyon. Ang konseho sa district dili moapil.
Ang konseho sa pagkamiyembro diha sa district o branch mahimong morekomendar sa pagbakwi sa pagkamiyembro sa usa ka tawo diha sa Simbahan kon siya wala makadawat og pagtuga sa templo. Hinoon, ang pagtugot sa presidente sa misyon gikinahanglan sa dili pa ang kataposang desisyon.
32.9.6
Klerk sa Stake o Ward
Ang klerk sa stake o ward:
-
Motipig lamang og mugbong mga sulat sa konseho kon gikinahanglan ang pagsumiter sa porma sa Report sa Konseho sa Pagkamiyembro diha sa Simbahan.
-
Moandam sa porma kon hangyoon sa lider kinsa nagdumala sa konseho.
-
Dili moapil sa panaghisgot o desisyon diha sa konseho.
32.9.7
Pag-apil sa Dili Kasagaran nga mga Sirkumstansiya
Kon ang usa ka magtatambag sa kapangulohan sa stake dili makaapil sa konseho sa pagkamiyembro, ang presidente sa stake mohangyo sa usa ka sakop sa high council o laing high priest nga mopuli sa iyang dapit. Kon ang presidente sa stake dili makaapil, ang Unang Kapangulohan mahimong mohatag og awtoridad sa usa sa iyang mga magtatambag sa pagdumala puli niya.
Kon ang magtatambag sa bishopric dili makaapil sa konseho sa pagkamiyembro, ang bishop makahangyo og high priest sa ward nga mopuli sa iyang dapit. Kon ang bishop dili makaapil, iyang ipadangat ang kaso ngadto sa presidente sa stake, nga maoy mopahigayon og konseho sa pagkamiyembro sa stake. Ang bishop dili mahimong mosangon sa usa ka magtatambag aron mopahigayon og konseho sa pagkamiyembro.
Kon ang konseho sa pagkamiyembro gipahigayon alang sa usa ka sakop sa pamilya sa bishop o sa usa sa iyang mga magtatambag, kini ipahigayon sa lebel sa stake. Kon kini ipahigayon alang sa usa ka sakop sa pamilya sa usa sa mga magtatambag sa presidente sa stake, ang presidente sa stake mosangon og laing high priest sa pagpuli sa dapit sa magtatambag. Kon ang konseho ipahigayon alang sa usa ka sakop sa pamilya sa presidente sa stake, siya mokonsulta sa Buhatan sa Unang Kapangulohan.
Kon ang usa ka miyembro mosupak sa pag-apil sa bishop o sa iyang mga magtatambag, ang konseho sa pagkamiyembro ipahigayon sa lebel sa stake. Kon ang usa ka miyembro mosupak nga moapil ang usa sa mga magtatambag sa presidente sa stake, ang presidente sa stake mosangon og laing high priest sa pagpuli sa dapit sa magtatambag. Kon ang miyembro mosupak nga moapil ang presidente sa stake, o kon ang presidente sa stake mobati nga siya dili mahimong dili patas, mokonsulta siya sa Buhatan sa Unang Kapangulohan.
32.9.8
Pagtino Kon Kinsa nga Lider ang Mopahigayon og Konseho sa Espesyal nga mga Sirkumstansiya
Ang mga konseho sa pagkamiyembro hapit kanunay nga ipahigayon diha sa hiyograpikanhong yunit sa Simbahan nga anaa ang rekord sa pagkamiyembro sa tawo.
Usahay ang usa ka konseho sa pagkamiyembro gikinahanglan alang sa usa ka tawo nga mibalhin. Kon ang pagbalhin anaa sa sulod sa samang stake, ang presidente sa stake makigsabot sa mga bishop sa duha ka ward ug mohukom asa kini himoon.
Kon ang miyembro mobalhin sa gawas sa stake, ang mga presidente sa duha ka stake magsabot ug mohukom asa himoon ang konseho. Kon sila mohukom nga kini ipahigayon sa kanhi ward o stake, ang rekord sa pagkamiyembro ipabilin niana nga ward hangtod makompleto ang konseho. Kon dili, ang rekord ibalhin ngadto sa bag-ong ward. Ang bishop o presidente sa stake sa kompidensiyal nga paagi mopahibalo sa bag-ong bishop o presidente sa stake sa miyembro kon ngano nga ang usa ka konseho gikinahanglan.
Usahay ang konseho sa pagkamiyembro kinahanglanon alang sa usa ka miyembro kinsa temporaryong nagpuyo nga layo sa panimalay. Pananglitan, ang konseho tingali gikinahanglan alang sa usa ka estudyante o usa ka miyembro nga anaa sa militar. Ang bishop diin temporaryo nga nagpuyo ang miyembro makahatag og tambag ug suporta. Hinoon, kinahanglang dili siya mopahigayon og konseho sa pagkamiyembro gawas kon ang rekord sa pagkamiyembro anaa sa iyang yunit ug siya nagkatinambagay uban sa bishop sa kaugalingong ward sa miyembro.
Usahay ang usa ka misyonaryo nakahimo og seryoso nga sala diha sa natad sa misyon nga wala itug-an hangtod nga siya na-release. Ang bishop ug ang presidente sa stake magsabot kinsa nila ang mopahigayon sa konseho sa pagkamiyembro. Usa nila makigsulti sa kanhi presidente sa misyon sa dili pa mopahigayon niini.
32.10
Mga Pamaagi alang sa mga Konseho sa Pagkamiyembro
32.10.1
Mohatag og Pahibalo ug Mag-andam alang sa Konseho
Ang bishop o ang presidente sa stake mohatag sa miyembro og sinulat nga pahibalo sa konseho sa pagkamiyembro nga pagahimoon alang kaniya. Siya mopirma sa sulat. Kini naglakip sa mosunod nga impormasyon:
“Ang [bishopric o kapangulohan sa stake] magpahigayon og konseho sa pagkamiyembro alang kanimo. Ang konseho pagahimoon karong [petsa ug oras] sa [dapit].
“Kini nga konseho mokonsiderar [i-summarize ang kalapasan sa kinatibuk-ang mga termino, apan ayaw ihatag ang mga detalye o ebidensya].
“Gidapit ka sa pagtambong sa konseho aron mohatag sa imong tubag. Mahimong mohatag ka og sinulat nga mga pamahayag gikan sa mga tawo kinsa makahatag og importante nga impormasyon. Mahimong imong dapiton ang maong mga tawo sa pagsulti ngadto sa konseho alang kanimo kon maaprobahan daan sa presidente sa stake o sa bishop. Mahimong imong dapiton [ang presidente sa Relief Society o presidente sa korum sa mga elder sa ward] nga motambong ug mohatag og suporta.
“Si bisan kinsa nga motambong kinahanglang andam nga mosunod sa matinahoron nga matang sa konseho, lakip sa mga pamaagi niini ug sa pagkakompidensiyal. Ang legal nga magtatambag ug mga tigsuporta nga wala hisgoti sa ibabaw mahimong dili motambong.”
Ang katapusan nga parapo mahimong maglakip sa pagpadayag og gugma, paglaum, ug pagpakabana.
Ang mga lagda mahitungod kinsa ang mahimong dapiton sa tawo sa pagsulti ngadto sa konseho gihatag diha sa 32.10.3, numero 4.
Kon ang sulat dili mahatud pinaagi sa tawo, mahimo kini ipadala sa rehistrado o lisensyado nga tigpadala og sulat, nga dunay dokumento nga mobalik nga nagmatuod nga nadawat ang sulat.
Ang bishop o ang presidente sa stake mo-eskedyul og konseho sa pagkamiyembro sa oras nga sayon alang sa tawo. Siya usab moseguro nga adunay panahon sa pagkuha og mga pamahayag gikan sa mga biktima sa kalapasan kon sila nagtinguha nga mohatag niini (tan-awa sa 32.10.2).
Ang bishop o ang presidente sa stake moandam sa miyembro alang sa konseho pinaagi sa pagpasabot sa katuyoan ug mga pamaagi niini. Siya usab mopasabot sa mga desisyon nga makab-ot sa konseho ug sa mga resulta niini. Kon ang usa ka miyembro mikompisal, ang lider mopasabot nga ang pagkompisal gamiton diha sa konseho sa pagkamiyembro.
32.10.2
Pagkuha og mga Pamahayag gikan sa mga Biktima
Kon ang usa ka miyembro sa Simbahan usa ka biktima (sama sa pakighilawas sa duol nga kabanay [incest], pag-abuso sa bata, pag-abuso sa kapikas o pagpanglimbong), ang bishop o ang presidente sa stake mokontak sa kasamtangan nga bishop o presidente sa stake niana nga tawo. Kini nga mga lider motino kon makatabang ba sa paghatag sa biktima og oportunidad nga mohatag og sinulat nga pamahayag mahitungod sa kalapasan ug sa mga epekto niini. Kini nga mga pamahayag mahimong basahon diha sa konseho sa pagkamiyembro (tan-awa sa 32.10.3, numero 3). Ang mga lider sa Simbahan walay awtoridad sa pagpasiugda og pagkontak sa mga biktima kinsa dili mga miyembro sa Simbahan.
Ang bisan unsa nga komunikasyon ngadto sa usa ka biktima alang niini nga katuyoan pagahimoon sa iyang kasamtangan nga bishop o presidente sa stake. Kon ang usa ka biktima mohatag og pamahayag, kini nga lider mohatag niini ngadto sa bishop o sa presidente sa stake kinsa nagpahigayon sa konseho sa pagkamiyembro. Ang mga lider kinahanglang mag-amping pag-ayo aron malikayan nga mapun-an ang truma. Tan-awa sa 32.4.3 alang sa ubang mga pasidaan.
Ang bisan unsa nga pakisusi mahitungod sa biktima nga ubos sa 18 ang edad pagahimoon pinaagi sa mga ginikanan sa bata o legal nga mga magbalantay, gawas kon ang paghimo sa ingon makahatag og kapiligro sa biktima.
Alang sa impormasyon mahitungod sa mga bishop ug mga presidente sa stake nga nakadawat og giya sa mga kaso sa pag-abuso, tan-awa sa 32.4.5 ug 38.6.2.1.
32.10.3
Pagdumala sa Konseho
Sa dayon na nga pagsugod sa konseho, ang bishop o presidente sa stake mosulti sa mga partisipante kon alang kang kinsa ang maong konseho ug unsa ang gika-report nga kalapasan. Kon gikinahanglan, siya mopasabot sa mga pamaagi sa konseho.
Ang tawo, kon anaa, pasudlon dayon ngadto sa kwarto. Kon ang bishop gidapit nga motambong og konseho sa pagkamiyembro diha sa stake, dapiton usab siya sa pagsulod sa kwarto niining higayona. Kon ang tawo midapit sa presidente sa Relief Society o sa presidente sa korum sa mga elder sa ward nga motambong ug mohatag og suporta, siya pasudlon usab sa kwarto.
Ang bishop o ang presidente sa stake mopahigayon sa konseho pinaagi sa diwa sa gugma sumala sa gilatid sa ubos.
-
Siya modapit og usa ka tawo nga mohalad sa pangbukas nga pag-ampo.
-
Siya mosulti sa gi-report nga kalapasan. Siya mohatag sa tawo (kon anaa) og oportunidad sa pagmatuod, paglimud, o pagklaro niini nga pamahayag.
-
Kon ang miyembro moangkon sa kalapasan, ang bishop o presidente sa stake mopadayon ngadto sa numero 5 sa ubos. Kon ang miyembro molimud niini, ang bishop o ang presidente sa stake mopresentar og impormasyon mahitungod niini. Kini mahimong maglakip sa pagpresentar sa kasaligan nga mga dokumento ug sa pagbasa og kusog sa bisan unsa nga sinulat nga mga pamahayag gikan sa mga biktima (tan-awa sa 32.10.2). Kon siya mobasa og usa ka pamahayag, siya manalipod sa pagkatawo sa biktima.
-
Kon ang miyembro molimod sa kalapasan, siya mahimong mopresentar og impormasyon ngadto sa konseho. Mahimo nga kini sinulat. O ang miyembro mahimong mohangyo og mga tawo kinsa makahatag sa importante nga impormasyon nga mosulti ngadto sa konseho, tagsa-tagsa. Ang mao nga mga tawo kinahanglan nga mga miyembro sa Simbahan gawas kon ang bishop o ang presidente sa stake mitino sa sayo pa nga ang usa ka dili miyembro mahimong motambong. Sila maghulat sa lahi nga kwarto hangtod sila hangyoon sa pagsulti. Ang matag tawo mobiya sa kwarto sa konseho kon siya mahuman na. Sila kinahanglang andam nga mosunod sa matinahoron nga matang sa konseho, lakip sa mga pamaagi niini ug sa pagkakompidensiyal. Ang miyembro mahimong dili magpatambong og abogado. Ni mopatambong sa mga tigsuporta nga walay labot niadtong gihinganlan sa ikaduhang parapo niini nga seksiyon.
-
Ang bishop o ang presidente sa stake mangutana sa miyembro sa matinahoron nga paagi. Siya usab mahimong mangutana sa ubang mga tawo nga gihangyo sa miyembro nga mohatag og impormasyon. Ang mga magtatambag sa bishopric o kapangulohan sa stake mahimo usab nga mangutana. Ang bisan unsa nga mga pangutana kinahanglan nga mubo ug kutob lang sa importante nga mga detalye.
-
Human mapresentar ang tanang importante nga impormasyon, ang bishop o ang presidente sa stake mopagawas sa miyembro gikan sa kwarto. Ang klerk mogawas usab, gawas kon ang high council miapil sa usa ka konseho sa pagkamiyembro diha sa stake. Kon ang bishop sa miyembro anaa alang sa usa ka konseho sa pagkamiyembro diha sa stake, siya mogawas. Kon ang presidente sa Relief Society o presidente sa korum sa mga elder mitambong aron sa paghatag og suporta, siya usab mogawas.
-
Ang bishop o ang presidente sa stake mangayo sa mga komentaryo o mga pagpasabot gikan sa iyang mga magtatambag. Kon ang high council miapil sa usa ka konseho sa pagkamiyembro diha sa stake, mangayo siya sa ilang mga komentaryo ug mga pagpasabot.
-
Uban sa iyang mga magtatambag, ang bishop o ang presidente sa stake mainampoong magtinguha sa kabubut-on sa Ginoo mahitungod niining butanga. Ang presidente sa stake ug ang iyang mga magtatambag o ang bishop ug ang iyang mga magtatambag lamang ang kinahanglan nga anaa sa kwarto niining higayona. Kon ang konseho sa pagkamiyembro diha sa stake naglakip sa high council, ang kapangulohan sa stake sa kasagaran moadto sa opisina sa presidente sa stake.
-
Ang bishop o ang presidente sa stake mosulti sa iyang mga magtatambag sa iyang desisyon ug mohangyo kanila sa pagpaluyo niini. Kon ang usa ka konseho sa pagkamiyembro diha sa stake naglakip sa high council, ang kapangulohan sa stake mobalik ngadto sa kwarto ug mohangyo sa high council sa pagpaluyo niini. Kon ang usa ka magtatambag o high councilor adunay lahi nga opinyon, ang bishop o ang presidente sa stake maminaw ug maningkamot sa pagsulbad sa mga kalainan. Ang responsibilidad alang sa desisyon anaa sa tigdumalang opisyal.
-
Siya modapit sa tawo balik ngadto sa kwarto. Kon ang klerk gipagawas, siya usab dapiton ngadto sa kwarto. Kon ang bishop sa miyembro anaa alang sa konseho sa pagkamiyembro diha sa stake, siya usab dapiton ngadto sa kwarto. Kon ang presidente sa Relief Society o ang presidente sa korum sa mga elder mitambong aron sa paghatag og suporta, siya usab pabalikon.
-
Ang bishop o ang presidente sa stake mopaambit sa desisyon sa konseho pinaagi sa diwa sa gugma. Kon ang desisyon mao ang paghatag og pormal nga restriksiyon sa mga pribiliheyo sa pagkamiyembro sa tawo diha sa Simbahan o pagbakwi sa pagkamiyembro, siya mopasabot sa mga kondisyon (tan-awa sa 32.11.3 ug 32.11.4). Siya usab mopasabot unsaon sa pagbuntog sa mga restriksiyon ug mohatag sa ubang instruksiyon ug tambag. Ang bishop o ang presidente sa stake mahimong moundang sa konseho sulod sa usa ka panahon aron magtinguha og dugang nga giya o impormasyon sa dili pa mohimo og desisyon. Niana nga sitwasyon, siya mopasabot niini.
-
Siya mopasabot sa katungod sa tawo sa pag-apelar (tan-awa sa 32.13).
-
Siya modapit og usa ka tawo sa paghalad sa panapos nga pag-ampo.
Bisan kon ang tawo mitambong o wala, ang bishop o ang presidente sa stake mopahibalo kaniya sa desisyon sumala sa gipasabot diha sa 32.12.1.
Walay partisipante diha sa usa ka konseho sa pagkamiyembro ang gitugotan nga maghimo og rekording sa audio, video, o pagsulat. Ang klerk mohimo og mubo nga mga sulat alang sa katuyoan sa pag-andam sa Report sa Konseho sa Pagkamiyembro diha sa Simbahan. Hinoon, ang mubo nga mga sulat kinahanglang dili usa ka pagrekord o paghulad sa matag pulong. Human maandam ang report, siya mogisi o mowagtang dayon sa bisan unsa nga mubo nga mga sulat.
32.11
Mga Desisyon gikan sa mga Konseho sa Pagkamiyembro
Ang mga desisyon gikan sa mga konseho sa pagkamiyembro kinahanglan nga gigiyahan sa Espiritu. Kini kinahanglang magpakita sa gugma ug paglaom nga gitanyag sa Manluluwas niadtong kinsa maghinulsol. Ang posible nga mga desisyon gihulagway sa ubos. Kon maghimo niini nga mga desisyon, ang mga lider mokonsiderar sa mga sirkumstansiya nga gilatid diha sa 32.7.
Human sa bisan unsa nga konseho sa pagkamiyembro, ang bishop o ang presidente sa stake mosumiter dayon sa porma sa Report sa Konseho sa Pagkamiyembro diha sa Simbahan pinaagi sa LCR (tan-awa sa 32.14.1).
Ang posible nga mga desisyon gikan sa mga konseho sa pagkamiyembro gilatid sa mosunod nga mga seksiyon.
32.11.1
Nagpabilin nga Maayo og Reputasyon
Sa pipila ka hitabo, ang usa ka tawo tingali inosente ug nagpabilin nga maayo og reputasyon. Sa pipila ka hitabo, ang usa ka tawo tingali nakahimo og sala, sinserong naghinulsol, ug nahimong maayo ang reputasyon. Ang bishop o ang presidente sa stake mahimong mohatag og tambag ug pasidaan mahitungod sa umaabot nga mga aksiyon. Human sa konseho, siya mopadayon sa paghatag og suporta kon gikinahanglan.
32.11.2
Personal nga Pagtambag uban sa Bishop o Presidente sa Stake
Sa pipila ka konseho sa pagkamiyembro, ang mga lider mahimong motino nga ang miyembro dili maayo og reputasyon—apan kanang pormal nga mga restriksiyon sa pagkamiyembro dili makiangayon. Niini nga mga hitabo, ang konseho mahimong mohukom nga ang tawo kinahanglang modawat og personal nga pagtambag ug koreksyon gikan sa bishop o presidente sa stake. Kini nga pagtambag mahimong maglakip sa dili pormal nga mga restriksiyon sa pagkamiyembro sumala sa gilatid diha sa 32.8.3.
Ang personal nga pagtambag ug dili pormal nga mga restriksiyon sa pagkamiyembro dili usa ka opsiyon kon ang konseho gihimo alang sa mga sala nga gilista diha sa 32.6.1.
32.11.3
Pormal nga mga Restriksiyon sa Pagkamiyembro
Sa pipila ka konseho sa pagkamiyembro, ang mga lider mahimong motino nga labing maayo ang pormal nga restriksiyon sa mga pribilehiyo sa pagkamiyembro sa tawo diha sa Simbahan sulod sa usa ka panahon. Ang pormal nga mga restriksiyon mahimong igo alang sa tanan gawas sa labing seryoso nga mga sala o mga sitwasyon, diin ang pagkamiyembro bakwion (tan-awa sa 32.11.4).
Kadtong kinsa adunay pormal nga mga restriksiyon sa pagkamiyembro mga miyembro pa gihapon sa Simbahan. Hinoon, ang ilang mga pribilehiyo sa pagkamiyembro sa Simbahan gibutangan og restriksiyon sumala sa mosunod:
-
Sila dili makasulod sa templo. Hinoon, sila mahimong magpadayon sa pagsul-ob sa garment sa templo kon natugahan. Kon ang miyembro adunay rekomend sa templo, ang lider mokanselar niini diha sa LCR.
-
Sila dili mahimong mogamit sa pagkapari.
-
Sila dili mahimong moambit sa sakramento o moapil sa pagpaluyo sa opisyales sa Simbahan.
-
Sila dili mahimong mohatag og pakigpulong, leksiyon, o pag-ampo diha sa Simbahan. Ni sila moserbisyo sa usa ka calling sa Simbahan.
Sila giawhag sa pagtambong sa mga miting ug mga kalihokan sa Simbahan kon maayo ang ilang pamatasan. Sila usab giawhag sa pagbayad sa ikapulo ug mga halad.
Ang bishop o ang presidente sa stake mahimong modugang og ubang mga kondisyon, sama sa pagpalayo gikan sa pornograpiya nga mga materyal ug sa ubang daotan nga mga impluwensya. Sa kasagaran siya modugang og positibo nga mga kondisyon. Kini maglakip sa kanunay nga pagtambong sa Simbahan, kanunay nga pag-ampo, ug pagbasa sa mga kasulatan ug sa ubang mga materyal sa Simbahan.
Kon ang mga pribilehiyo sa tawo diha sa Simbahan pormal nga gibutangan og restriksiyon, kana gibutang sa rekord sa pagkamiyembro.
Ang panahon sa pormal nga restriksiyon sa kasagaran dili mominos sa usa ka tuig ug tingali mas taas pa. Kon ang miyembro mohimo og piho nga kauswagan sa tinud-anay nga paghinulsol, ang bishop o ang presidente sa stake mopahigayon og laing konseho aron sa pagkonsiderar sa pagtangtang sa mga restriksiyon (tan-awa sa 32.16.1). Kon ang miyembro nagpadayon sa pabalik-balik sa pagpakasala, ang lider makapahigayon og laing konseho sa pagkonsiderar sa ubang mga aksiyon.
32.11.4
Pagbakwi sa Pagkamiyembro
Sa pipila ka konseho sa pagkamiyembro, ang mga lider mahimong motino nga labing maayo ang pagbakwi sa pagkamiyembro sa tawo diha sa Simbahan sulod sa usa ka panahon (tan-awa sa Mosiah 26:36; Alma 6:3; Moroni 6:7; Doktrina ug mga Pakigsaad 20:83).
Ang pagbakwi sa pagkamiyembro sa tawo diha sa Simbahan gikinahanglan tungod sa pagpatay (sumala sa gipasabot diha 32.6.1.1) ug sa dinaghan nga kaminyoon (sumala sa gipasabot diha sa 32.6.1.2). Hapit kanunay gikinahanglan kini alang sa pakighilawas sa duol nga kabanay [incest] sumala sa gipasabot diha sa 32.6.1.2 ug 38.6.10.
Ingon nga gigiyahan sa Espiritu, ang pagbakwi sa pagkamiyembro sa tawo mahimo usab nga kinahanglanon sumala sa mosunod:
-
Alang niadtong kansang binuhatan nakapahimo kanila nga usa ka seryoso nga hulga ngadto sa uban.
-
Alang niadtong kinsa nakahimo og grabe kaayo nga mga sala.
-
Alang niadtong kinsa wala magpakita og paghinulsol sa seryoso nga mga sala (tan-awa ang mga konsiderasyon diha sa 32.7).
-
Alang niadtong kinsa nakahimo og seryoso nga mga sala nga makadaot sa Simbahan.
Ang usa ka konseho sa pagkamiyembro diha sa ward, branch, o district mahimong morekomendar sa pagbakwi sa pagkamiyembro diha sa Simbahan gikan sa usa ka tawo kinsa wala makadawat og pagtuga sa templo. Hinoon, ang pagtugot sa presidente sa stake o misyon gikinahanglan sa dili pa ang kataposang desisyon.
Kadtong kansang pagkamiyembro diha sa Simbahan gibakwi mahimong dili na makatagamtam sa mga pribilehiyo sa pagkamiyembro.
-
Sila dili makasulod sa templo o makasul-ob sa garment sa templo. Kon ang tawo adunay rekomend sa templo, ang lider mokanselar niini diha sa LCR.
-
Sila dili mahimong mogamit sa pagkapari.
-
Sila dili mahimong moambit sa sakramento o moapil sa pagpaluyo sa opisyales sa Simbahan.
-
Sila dili mohatag og pakigpulong, leksiyon, o pag-ampo diha sa Simbahan o mangulo og kalihokan sa Simbahan. Ni sila moserbisyo sa usa ka calling sa Simbahan.
-
Sila dili mobayad sa mga ikapulo ug mga halad.
Sila giawhag sa pagtambong sa mga miting ug mga kalihokan sa Simbahan kon maayo ang ilang pamatasan.
Kadtong kansang pagkamiyembro sa Simbahan gibakwi mahimong makonsiderar nga dawaton pag-usab pinaagi sa bunyag ug kompirmasyon. Sa kasagaran, sila kinahanglan mopakita una og tinud-anay nga paghinulsol sulod sa dili mominos sa usa ka tuig. Ang bishop o ang presidente sa stake mopahigayon og laing konseho sa pagkamiyembro aron ikonsiderar ang pagdawat pag-usab (tan-awa sa 32.16.1).
Mga Desisyon ug mga Resulta sa Konseho sa Pagkamiyembro
|
Desisyon |
Mga Resulta |
|---|---|
Desisyon Nagpabilin nga Maayo og Reputasyon (tan-awa sa 32.11.1) | Mga Resulta
|
Desisyon Personal nga Pagtambag uban sa Bishop o sa Presidente sa Stake (tan-awa sa 32.11.2) | Mga Resulta
|
Desisyon Pormal nga mga Restriksiyon sa Pagkamiyembro (tan-awa sa 32.11.3) | Mga Resulta
|
Desisyon Pagbakwi sa Pagkamiyembro (tan-awa sa 32.11.4) | Mga Resulta
|
32.11.5
Mga Pangutana mahitungod sa Paghukom sa Malisod nga mga Butang
Ang mga bishop modirekta sa mga pangutana mahitungod sa mga lagda sa tamdanan nga basahon alang sa mga konseho sa pagkamiyembro ngadto sa presidente sa stake.
Sa malisod nga mga butang, ang presidente sa stake mahimong mangayo og tambag gikan sa gisangonan nga Area Seventy. Ang presidente sa stake kinahanglang magpakitambag sa Kapangulohan sa Area bahin sa mga butang nga gilatid diha sa 32.6.3. Hinoon, ang presidente sa stake kinahanglang dili mangutana sa Area Seventy o Kinatibuk-ang Awtoridad unsaon sa paghukom sa malisod nga mga butang. Ang presidente sa stake mohukom kon ang usa ka konseho kinahanglan bang ipahigayon aron sa pag-asikaso sa binuhatan. Kon ang usa ka konseho ipahigayon, ang presidente sa stake o ang bishop mohukom sa mga sangpotanan.
32.11.6
Awtoridad sa Unang Kapangulohan
Ang Unang Kapangulohan adunay kataposan nga awtoridad sa tanang restriksiyon ug pagbakwi sa pagkamiyembro diha sa Simbahan.
32.12
Mga Pahibalo
Ang desisyon sa konseho sa pagkamiyembro ipahibalo ngadto sa tawo—ug sa uban kon gikinahanglan—sumala sa gipasabot sa ubos.
32.12.1
Pagpahibalo sa Tawo bahin sa Desisyon
Ang bishop o presidente sa stake sa kasagaran mosulti sa tawo sa sangpotanan sa konseho kon kini mahuman. Hinoon, siya mahimong mopaundang sa konseho sulod sa usa ka panahon aron mangita og dugang giya o impormasyon sa dili pa mohimo og desisyon.
Ang usa ka konseho sa pagkamiyembro diha sa ward, branch, o district mahimong morekomendar sa pagbakwi sa pagkamiyembro diha sa Simbahan gikan sa usa ka tawo kinsa wala makadawat og pagtuga sa templo. Hinoon, ang pagtugot sa presidente sa stake o misyon gikinahanglan sa dili pa ang kataposang desisyon.
Ang bishop o ang presidente sa stake mopasabot sa mga epekto sa desisyon sumala sa gilatid diha sa 32.11. Sa kasagaran siya mohatag usab og tambag bahin sa mga kondisyon sa paghinulsol aron ang mga restriksiyon matangtang o ang tawo mahimong dawaton pag-usab ngadto sa Simbahan.
Ang bishop o ang presidente sa stake mohatag dayon sa tawo sa sinulat nga pahibalo sa desisyon ug sa mga epekto niini. Kini nga pahibalo maglangkob sa kinatibuk-ang pamahayag nga ang aksiyon gihimo agi og tubag sa binuhatan nga supak sa mga balaod ug kahusay sa Simbahan. Maglakip usab kini sa tambag mahitungod sa pagtangtang sa mga restriksiyon sa pagkamiyembro o pagdawat pag-usab ngadto sa Simbahan. Kinahanglang mopahibalo kini sa tawo nga siya mahimong moapelar sa desisyon (tan-awa sa 32.13).
Kon ang tawo dili motambong sa konseho, ang sinulat nga pahibalo tingali igo na sa pagpahibalo kaniya sa desisyon. Ang bishop o ang presidente sa stake mahimong makigkita sa tawo.
Ang bishop o presidente sa stake dili mohatag sa tawo sa kopya sa porma sa Report sa Konseho sa Pagkamiyembro sa Simbahan.
32.12.2
Pagpahibalo sa Uban mahitungod sa Desisyon
Kon ang bishop o ang presidente sa stake mohatag og dili pormal nga restriksiyon sa mga pribilehiyo sa pagkamiyembro sa tawo diha sa personal nga pagtambag, siya sa kasagaran dili mopahibalo ni bisan kinsa pa (tan-awa sa 32.8.3). Hinoon, kini nga mga lider mopahibalo sa usag usa mahitungod sa dili pormal nga mga restriksiyon samtang sila motabang sa mga miyembro.
Kon ang mga pribilehiyo sa pagkamiyembro sa tawo gibutangan og restriksiyon o gibakwi pinaagi sa konseho sa pagkamiyembro, ang bishop o ang presidente sa stake mopahibalo sa desisyon ngadto lamang niadtong kinsa kinahanglan nga masayod. Ang mosunod nga mga lagda magamit.
-
Siya mokonsiderar sa mga panginahanglan sa mga biktima ug sa potensyal nga mga biktima ug sa mga pagbati sa pamilya sa tawo.
-
Siya dili mopahibalo sa desisyon kon ang tawo miapelar niini. Hinoon, siya mahimong mopahibalo nga kini giapelar kon gibati niya nga gikinahanglan ang pagpanalipod sa potensyal nga mga biktima. Siya mahimo usab nga mopahibalo niini aron sa pagsuporta nga mamaayo ang mga biktima (bisan og dili siya mohatag sa mga ngalan sa mga biktima) o sa pagpanalipod sa integridad sa Simbahan.
-
Kon gikinahanglan, ang bishop kompidensiyal nga mopahibalo sa desisyon ngadto sa mga sakop sa konseho sa ward. Pagpahibalo kini sa mga lider kinsa mokonsiderar unya sa tawo nga mahimong hatagan og mga calling, magtudlo og mga leksiyon, o maghatag og mga pag-ampo o mga pakigpulong. Pag-awhag usab kini sa mga lider sa pagtanyag og pag-amuma ug pagsuporta ngadto sa miyembro ug sa iyang pamilya.
-
Uban sa pagtugot gikan sa presidente sa stake, ang bishop mahimong mopahibalo sa desisyon diha sa iyang mga miting sa korum sa mga elder ug sa Relief Society sa ward kon ang sitwasyon maglakip sa:
-
Binuhatan nga motuyo sa pagpasakit nga mahimong makahulga sa uban.
-
Pagtudlo og bakak nga doktrina o ubang mga matang sa apostasiya.
-
Klaro nga mga sala sama sa paghimo og dinaghan nga kaminyoon o paggamit og mga pagtulon-an sa kulto aron sa pagdani og sumusunod.
-
Pagsupak sa mga aksiyon o mga pagtulon-an sa kinatibuk-an o lokal nga mga lider sa Simbahan diha sa publiko.
-
-
Sa maong mga sitwasyon, ang presidente sa stake kinahanglang motugot usab sa pagpakigsulti ngadto sa mga miyembro sa laing mga ward diha stake.
-
Sa ubang mga sitwasyon, ang bishop o ang presidente sa stake mobati nga makatabang ang pagpahibalo sa pipila o sa tanang biktima ug sa ilang pamilya nga ang konseho sa pagkamiyembro gipahigayon alang sa tawo. Buhaton niya kini pinaagi sa ilang bishop o presidente sa stake.
-
Kon ang kalagmitan sa usa ka tawo nga motuyo sa pagpasakit makahatag og peligro sa uban, ang bishop o presidente sa stake mahimong mohatag og pasidaan aron sa pagtabang sa pagpanalipod sa uban. Dili niya ibutyag ang kompidensiyal nga impormasyon ug dili magbana-bana.
-
Sa uban pang mga sitwasyon, ang bishop o presidente sa stake mohimo og limitasyon sa bisan unsa nga komunikasyon ngadto sa kinatibuk-ang pamahayag. Yano niyang ipahayag nga ang mga pribilehiyo sa pagkamiyembro sa tawo diha sa Simbahan adunay mga restriksiyon o gibakwi tungod sa binuhatan nga supak sa mga balaod ug kahusay sa Simbahan. Siya mohangyo niadtong anaa sa dili paghisgot niini. Dili siya mangutana kon sila mopaluyo ba o mosupak sa aksiyon.
-
Kon ang usa ka miyembro maayo og reputasyon human sa usa ka konseho sa pagkamiyembro (tan-awa sa 32.11.1), ang bishop o ang presidente sa stake mahimong mopahibalo niini aron mawala ang tabi-tabi.
32.12.3
Pagpahibalo sa Pagluwat sa Pagkamiyembro
Sa ubang mga sitwasyon, ang bishop kinahanglang mopahibalo nga ang usa ka tawo miluwat sa iyang pagkamiyembro diha sa Simbahan (tan-awa sa 32.14.9). Ang bishop dili mohatag og bisan unsa pang laing detalye.
32.13
Pag-apelar sa Desisyon
Ang usa ka miyembro mahimong moapelar sa desisyon sa konseho sa pagkamiyembro diha sa ward ngadto sa presidente sa stake sulod sa 30 ka adlaw. Ang presidente sa stake mopahigayon sa konseho sa pagkamiyembro diha sa stake aron sa pagkonsiderar sa pag-apelar. Mahimo usab nga iyang hangyoon ang usa ka bishop sa pagpahigayon pag-usab sa konseho ug ikonsiderar ang desisyon, ilabi na kon adunay bag-ong impormasyon.
Ang usa ka miyembro mahimong moapelar sa desisyon sa konseho sa pagkamiyembro diha sa stake pinaagi sa pagsulat ngadto sa Unang Kapangulohan sulod sa 30 ka adlaw. Ang miyembro mohatag sa sulat ngadto sa presidente sa stake aron isumiter ngadto sa Unang Kapangulohan.
Sa usa ka misyon, ang usa ka miyembro mahimong moapelar sa desisyon sa usa ka konseho sa pagkamiyembro diha sa branch o district ngadto sa presidente sa misyon sulod sa 30 ka adlaw. Ang presidente sa misyon mopahigayon og konseho sa pagkamiyembro aron sa pagkonsiderar sa pag-apelar. Kon ang panahon o gilay-on makapugong kaniya sa paghimo niini, siya mosunod sa mga intruksyon diha sa 32.9.4.
Kon ang presidente sa misyon mipahigayon sa konseho, ang miyembro mahimong moapelar sa desisyon pinaagi sa pagsulat ngadto sa Unang Kapangulohan sulod sa 30 ka adlaw. Ang miyembro mohatag sa sulat ngadto sa presidente sa misyon aron isumiter ngadto sa Unang Kapangulohan.
Ang usa ka tawo nga moapelar sa desisyon mopiho pinaagi sa pagsulat sa giingong mga sayop o pagkadili makiangayon sa pamaagi o desisyon.
Kon ang konseho sa pagkamiyembro ipahigayon aron sa pagkonsiderar sa pag-apelar, usa sa duha ka desisyon ang posible:
-
Ipadayon ang inisyal nga desisyon.
-
Usbon ang inisyal nga desisyon.
Ang mga desisyon sa Unang Kapangulohan mao na ang kataposan ug dili na maapelar pag-usab.
32.14
Mga Report ug mga Rekord sa Pagkamiyembro
32.14.1
Report sa Konseho sa Pagkamiyembro diha sa Simbahan
Human ang bisan unsa nga konseho sa pagkamiyembro, ang bishop o ang presidente sa stake mosumiter dayon sa porma sa Report sa Konseho sa Pagkamiyembro diha sa Simbahan pinaagi sa LCR. Siya mahimong mohangyo sa klerk sa pag-andam sa report. Siya moseguro nga walay hard copy o electronic copy sa porma ang nahabilin sa lokal. Siya moseguro usab nga ang bisan unsa nga mubo nga mga sulat nga gigamit sa pag-andam sa report gision o wagtangon dayon.
32.14.2
Pormal nga mga Restriksiyon sa Pagkamiyembro diha sa Simbahan
Ang pormal nga mga restriksiyon sa pagkamiyembro diha sa Simbahan ibutang diha sa rekord sa pagkamiyembro sa tawo. Ang punoang buhatan sa Simbahan mohimo niini nga sulat human madawat ang Report sa Konseho sa Pagkamiyembro diha sa Simbahan. Kon ang usa ka miyembro maghinulsol, ang lider kinahanglang magpahigayon og laing konseho sa pagkonsiderar sa pagkuha niini nga mga restriksiyon (tan-awa sa 32.16.1).
32.14.3
Mga Rekord human ang Pagkamiyembro diha sa Simbahan sa usa ka Tawo Gibakwi
Kon ang usa ka tawo bakwian sa pagkamiyembro diha sa Simbahan, ang punoang buhatan sa Simbahan motangtang sa rekord sa pagkamiyembro human madawat ang Report sa Konseho sa Pagkamiyembro diha sa Simbahan. Kon ang usa ka tawo magtinguha, ang mga lider motabang kaniya sa pag-andam nga madawat pag-usab ngadto sa Simbahan pinaagi sa bunyag ug kompirmasyon (tan-awa sa 32.16.1).
32.14.4
Mga Rekord human sa Pagdawat Pag-usab ngadto sa Simbahan
Human ang usa ka tawo madawat pag-usab ngadto sa Simbahan, ang bishop mosumiter sa porma sa Report sa Konseho sa Pagkamiyembro diha sa Simbahan. Ang Sertipiko sa Bunyag ug Kompirmasyon dili himoon. Hinoon, ang bunyag ug kompirmasyon i-rekord diha sa porma sa Report sa Konseho sa Pagkamiyembro diha sa Simbahan.
Kon ang miyembro wala pa matugahi, ang punoang buhatan sa Simbahan maghimo og rekord sa pagkamiyembro nga magpakita sa mga petsa sa iyang orihinal nga bunyag ug ubang mga ordinansa. Ang rekord dili maghisgot sa pagkawala sa pagkamiyembro diha sa Simbahan.
Kon ang miyembro natugahan, ang punoang buhatan sa Simbahan mobag-o sa rekord sa pagkamiyembro aron makita ang mga petsa sa bag-ong bunyag ug kompirmasyon. Kini nga rekord maglakip usab sa mensahe nga “Ang Pagpahiuli sa mga Panalangin Gikinahanglan.” Human mapahiuli ang mga panalangin sa miyembro (tan-awa sa 32.17.2), ang rekord sa pagkamiyembro bag-ohon aron makita ang mga petsa sa orihinal nga bunyag ug ubang mga ordinansa. Kini dili magpakita sa pagkawala sa pagkamiyembro sa Simbahan.
32.14.5
Mga Rekord sa Pagkamiyembro nga adunay mga Annotation
Kon gitugotan sa Unang Kapangulohan, ang punoang buhatan sa Simbahan mobutang og annotation sa rekord sa pagkamiyembro sa tawo sa bisan unsa nga mga sitwasyon nga gilista sa ubos.
-
Ang bishop o ang presidente sa stake mosumiter sa porma sa Report sa Konseho sa Pagkamiyembro diha sa Simbahan nga magpakita nga ang pagkamiyembro sa tawo pormal nga gibutangan og restriksiyon o gibakwi tungod sa bisan unsa nga mosunod nga binuhatan:
-
Pakighilawas sa duol nga kabanay [Incest]
-
Sekswal nga pag-abuso sa usa ka bata o batan-on, sekswal nga pagpahimulos sa usa ka bata o batan-on, o seryoso nga pisikal o emosyonal nga pag-abuso sa usa ka bata o batan-on
-
Pagkahilambigit sa pornograpiya nga naggamit og bata sumala sa gilatid diha sa 38.6.6
-
Dinaghan nga kaminyoon
-
Binuhatan sa hamtong nga motuyo sa pagpasakit sa sekswal nga paagi
-
Transgender—mga aksiyon sa pag-usab sa sekso nga natawhan sa tawo ngadto sa katugbang nga sekso (tan-awa sa 38.6.23)
-
Pagpangawkaw sa mga pundo sa Simbahan o pagpangawat sa kabtangan sa Simbahan (tan-awa sa 32.6.3.3)
-
Pag-abuso sa welfare sa Simbahan
-
Mahulgaon nga batasan (sama sa sekswal, bayolente, o pinansyal) o binuhatan nga makadaot sa Simbahan
-
-
Ang bishop ug ang presidente sa stake mosumiter og sinulat nga pahibalo nga ang tawo:
-
Miangkon o nakombikto sa usa ka krimen nga naglakip sa usa sa mga aksiyon nga gilista sa ibabaw.
-
Nakita nga responsable sa usa ka sibil nga aksiyon sa panglimbong o ubang dili legal nga mga buhat nga naglakip sa usa sa mga aksiyon nga gilista sa ibabaw.
-
Kon ang bishop makadawat sa rekord sa pagkamiyembro nga adunay annotation, iyang sundon ang mga instruksiyon diha sa annotation.
Ang Unang Kapangulohan lamang ang mahimong motugot sa pagtangtang sa annotation gikan sa rekord sa pagkamiyembro. Kon ang presidente sa stake morekomendar nga tangtangon ang annotation, gamiton niya ang LCR (tan-awa sa 6.2.3). Ang Buhatan sa Unang Kapangulohan mopahibalo kaniya kon ang mga rekomendasyon naaprobahan ba o wala.
32.14.6
Pag-report sa Pagpangawkaw sa mga Pundo sa Simbahan
Kon ang pagkamiyembro sa usa ka tawo adunay restriksyon o gibakwi tungod sa pagpangawkaw sa mga pundo sa Simbahan, ang bishop o ang presidente sa stake mo-report niini sumala sa gilatid diha sa 34.7.5.
32.14.7
Mga Restriksiyon sa Pagbalhin sa mga Rekord sa Pagkamiyembro
Usahay ang miyembro sa Simbahan mobalhin samtang ang aksiyon sa pagkamiyembro o ubang seryoso nga mga problema wala pa masulbad. Usahay ang bishop kinahanglang mopaambit og impormasyon ngadto sa bag-ong bishop sa dili pa ibalhin ang rekord sa pagkamiyembro ngadto sa bag-ong yunit. Niini nga mga sitwasyon, ang bishop (o klerk kon gitugotan) mahimong mobutang og restriksiyon sa pagbalhin diha sa rekord sa pagkamiyembro. Ang rekord magpabilin diha sa yunit hangtod ang bishop (o klerk kon gitugotan) motangtang sa restriksiyon. Kini makahatag og oportunidad alang sa bishop sa pagpahibalo sa mga problema ug impormasyon.
32.14.8
Mga Rekord Niadtong Kinsa Napriso
Ang ubang mga miyembro nakombikto sa usa ka krimen ug napriso. Ang bishop o ang presidente sa stake sa yunit diin magpuyo ang tawo sa dihang nahimo ang krimen mohimo sa bisan unsa nga gikinahanglan nga aksiyon alang sa pormal nga mga restriksiyon o pagbakwi sa pagkamiyembro. Kon ang mga pribilehiyo sa pagkamiyembro gibutangan og restriksiyon, ang lider (o klerk kon gitugotan) mopadala sa rekord sa pagkamiyembro ngadto sa yunit nga responsable alang sa dapit diin ang tawo napriso. Kon ang pagkamiyembro gibakwi, ang bishop o ang presidente sa stake mokontak sa lider niana nga yunit. (Tan-awa sa 32.15.)
32.14.9
Mga Hangyo nga Moluwat sa Pagkamiyembro
Kon ang usa ka miyembro mohangyo nga moluwat sa iyang pagkamiyembro diha sa Simbahan, ang bishop mosusi aron mahibaloan kon siya andam ba nga hisgotan ang mga problema ug paningkamotan nga masulbad kini. Ang bishop ug ang miyembro mahimo usab nga magpakitambag sa presidente sa stake. Ang lider moseguro nga ang miyembro nakasabot sa mosunod nga mga resulta sa pagluwat sa pagkamiyembro diha sa Simbahan:
-
Nagrebokar kini sa tanang mga ordinasa.
-
Nagkuha kini sa tanang mga pribilehiyo sa pagkamiyembro.
-
Ang pagdawat pag-usab pinaagi sa bunyag ug kompirmasyon mahitabo lamang human sa usa ka detalyado nga interbiyo ug, sa daghang mga sitwasyon, sa usa ka konseho sa pagkamiyembro (tan-awa sa 32.16.2).
-
Ang natugahan kaniadto nga tawo makadawat lamang sa pagpahiuli sa pagkapari ug mga panalangin sa templo uban sa pagtugot sa Unang Kapangulohan ug human sa dili mominos usa ka tibuok tuig gikan sa pagkadawat pag-usab (tan-awa sa 32.17.2).
Kon ang miyembro gusto gihapon nga moluwat sa pagkamiyembro diha sa Simbahan, siya mohatag sa bishop sa sinulat, pinirmahan nga hangyo. Ang bishop mosumiter sa hangyo ngadto sa presidente sa stake pinaagi sa LCR. Ang presidente sa stake morebyo dayon ug mosumiter sa hangyo pinaagi niana nga sistema. Ang mga lider kinahanglang molihok dayon sa mga hangyo.
Ang usa ka tawo mahimo usab nga moluwat sa pagkamiyembro pinaagi sa pagpadala og pinirmahan, gi-notarize nga hangyo ngadto sa punoang buhatan sa Simbahan.
Ang usa ka menor de edad kinsa nagtinguha nga moluwat sa pagkamiyembro diha sa Simbahan mosunod sa samang paagi sama sa hamtong, uban sa usa ka eksepsiyon: ang hangyo kinahanglang pirmahan sa menor de edad (kon labaw sa edad nga 8) ug sa (mga) ginikanan o (mga) magbalantay kinsa adunay legal nga kustodiya sa menor de edad.
Kon ang usa ka miyembro nga moluwat sa pagkamiyembro mohulga og legal nga aksiyon batok sa Simbahan o sa mga lider niini, ang presidente sa stake mosunod sa mga instruksiyon diha sa 38.8.23.
Ang hangyo sa pagluwat sa pagkamiyembro kinahanglan nga lihokon bisan kon ang mga lider sa pagkapari adunay impormasyon mahitungod sa usa ka seryoso nga sala. Ang bisan unsa nga impormasyon mahitungod sa wala masulbad nga mga sala ibutang kon ang hangyo isumiter pinaagi sa LCR. Kini makapahimo sa mga lider sa pagkapari sa pagsulbad sa maong mga butang sa umaabot kon ang tawo mo-aplay nga dawaton pag-usab ngadto sa Simbahan (tan-awa sa 32.16.2).
Ang usa ka lider sa pagkapari kinahanglang dili morekomendar nga moluwat sa pagkamiyembro diha sa Simbahan aron makalikay sa pagpahigayon og konseho sa pagkamiyembro.
Ang mga lider mopadayon sa pagpangalagad niadtong kinsa moluwat sa ilang pagkamiyembro gawas kon sila mohangyo nga dili magpakontak.
PAGBALIK SA MGA PRIBILEHIYO SA PAGKAMIYEMBRO DIHA SA SIMBAHAN
Kon ang mga pribilehiyo sa pagkamiyembro sa usa ka tawo diha sa Simbahan nabutangan og restriksiyon o gibakwi, ang mga lider makigdait, motambag, ug mosuporta sa tawo kon siya motugot. Kini nga seksiyon nagpasabot kon sa unsang paagi kadto nga mga pribilehiyo mahibalik.
32.15
Padayon sa Pagpangalagad
Ang tahas sa bishop o sa presidente sa stake isip maghuhukom sa tanan dili mohunong kon ang usa ka miyembro nakadawat og mga restriksiyon sa pagkamiyembro o gibakwian sa iyang pagkamiyembro diha sa Simbahan. Siya mopadayon sa pagpangalagad kon motugot ang tawo, aron siya makatagamtam pag-usab sa mga panalangin sa pagkamiyembro diha sa Simbahan. Ang bishop kanunay nga makigkita sa tawo ug, kon makatabang ug mahimo, sa iyang kapikas. Ang Manluluwas mitudlo sa mga Nephite:
“Kamo dili mosalikway kaniya gikan sa … inyong mga dapit alampoan, kay ngadto kanila kamo magpadayon sa pag-alagad; kay kamo wala masayud kanus-a sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug Ako moayo kanila; ug kamo mao ang hinungdan sa pagdala og kaluwasan ngadto kanila” (3 Nephi 18:32).
Ang panahon nga human mabutangi dayon og restriksiyon ang pagkamiyembro sa tawo o gibakwi malisod ug kritikal alang sa iyang pamilya. Ang mga lider kinahanglang sensitibo niini nga mga panginahanglan ug moawhag ug motabang sa mga sakop sa pamilya.
Ang bishop moseguro nga ang maamumahon nga mga miyembro sangonan sa pagpangalagad ngadto sa usa ka tawo kansang pagkamiyembro diha sa Simbahan gibutangan og restriksiyon o gibakwi, kon ang tawo motugot. Sila usab mangalagad ngadto sa ubang mga sakop sa pamilya. Ang mga indibidwal nga anaa ubos sa mga restriksiyon sa pagkamiyembro makabenepisyo sa pag-apil sa indexing (tan-awa sa 25.4.3).
Kon ang tawo mobalhin gikan sa ward, ang bishop mopahibalo sa bag-ong bishop ug mopasabot unsa pay kinahanglan nga mahitabo sa dili pa matangtang ang mga restriksiyon sa pagkamiyembro diha sa Simbahan. Kon ang pagkamiyembro sa tawo gibakwi gikan sa Simbahan o ang tawo miluwat sa pagkamiyembro, ang bishop mohimo sa samang pagkontak kon ang tawo miuyon nga tabangan sa mga lider sa Simbahan.
32.16
Pagkuha sa Pormal nga mga Restriksiyon o Pagdawat Pag-usab ngadto sa Simbahan
32.16.1
Mga Konseho sa Pagkamiyembro Motangtang sa Pormal nga mga Restriksiyon o Modawat Pag-usab sa Tawo
Kon ang mga pribilehiyo sa pagkamiyembro gibutangan og restriksiyon o gibakwi diha sa usa ka konseho sa pagkamiyembro, laing konseho ang kinahanglang ipahigayon aron sa pagkonsiderar sa pagtangtang sa mga restriksiyon o pagdawat pag-usab sa tawo ngadto sa Simbahan. Kini nga konseho kinahanglan usab nga adunay sama nga lebel sa awtoridad (o mas taas pa) sa inisyal nga konseho. Pananglitan, kon ang presidente sa stake o misyon midumala sa inisyal nga konseho, ang presidente sa stake o misyon modumala sa konseho aron sa pagkonsiderar sa pagkuha sa mga restriksiyon o pagdawat pag-usab sa tawo.
Ang kasamtangan nga bishop o presidente sa stake mopahigayon sa konseho. Segurohon niya pag-una nga ang tawo nakahinulsol ug andam ug takos nga makatagamtam sa mga panalangin sa pagkamiyembro sa Simbahan.
Kadtong kinsa pormal nga gibutangan og restriksiyon ang ilang pagkamiyembro sa Simbahan kasagaran kinahanglang magpakita og tinuod nga paghinulsol sulod sa dili mominos usa ka tuig sa dili pa ihatag ang konsiderasyon sa pagtangtang sa mga restriksiyon. Kadtong kinsa gibakwian sa ilang pagkamiyembro diha sa Simbahan tingali magkinahanglan kanunay nga magpakita og tinuod nga paghinulsol sulod sa dili mominos usa ka tuig sa dili pa sila makonsiderar nga dawaton pag-usab. Alang sa usa ka miyembro nga naghupot og prominente nga katungdanan sa Simbahan sa panahon sa seryoso nga sala, ang tagal sa kinatibuk-an mas taas pa (tan-awa sa 32.6.1.4).
Ang konseho nga mokonsiderar sa pagkuha sa mga restriksiyon o pagdawat pag-usab sa usa ka tawo ngadto sa Simbahan mosunod sa samang mga lagda sa ubang mga konseho sa pagkamiyembro. Ang bishop magkinahanglan og pagtugot gikan sa presidente sa stake sa pagpahigayon og konseho. Sa usa ka misyon, ang presidente sa branch o district magkinahanglan og pagtugot gikan sa presidente sa misyon.
Ang mosunod nga mga lagda magamit kon magpahigayon og konseho sa pagkamiyembro sa pagkonsiderar sa pagtangtang sa mga restriksiyon sa pagkamiyembro diha sa Simbahan o pagdawat pag-usab sa usa ka tawo nganha sa Simbahan. Dili tanan niini nga mga lagda mahimong gamiton sa matag sitwasyon.
-
Morebyo sa inisyal nga konseho sa pagkamiyembro. Ang bishop o ang presidente sa stake morebyo sa porma sa Report sa Konseho sa Pagkamiyembro diha sa Simbahan. Siya mangayo og kopya pinaagi sa LCR. Human marebyo ang porma, siya mahimong mokontak sa bishop o sa presidente sa stake diin ang inisyal nga konseho gipahigayon aron mangayo og pagpasabot.
-
Mointerbiyo sa tawo. Ang bishop o ang presidente sa stake mointerbiyo sa tawo pag-ayo aron mahibaloan ang kalig-on sa iyang hugot nga pagtuo diha ni Jesukristo ug sa gidak-on sa paghinulsol. Siya usab motino kon ang tawo nakatuman ba sa mga kondisyon nga gilatid sa inisyal nga aksiyon.
-
Motino sa kahimtang sa kriminal o sibil nga aksiyon sa korte. Usahay ang usa ka tawo miangkon o nakombikto sa usa ka krimen. Usahay ang usa ka tawo nakita nga responsable sa usa ka sibil nga aksiyon sa pagpanglimbong o ubang dili legal nga mga binuhatan. Niini nga mga sitwasyon, ang lider sa kinatibuk-an dili mopahigayon og konseho hangtod ang tawo nakatuman sa tanang kondisyon sa bisan unsa nga sentensya, mando, o paghukom nga gihimo sa legal nga mga awtoridad. Kini nga mga kondisyon mahimong maglakip sa pagkabilanggo, probation [pinanid-an nga pagpuyo gawas sa bilanggoan], parol ug mga multa o pakighiuli. Ang mga eksepsiyon magkinahanglan og pagtugot sa Unang Kapangulohan sa dili pa mopahigayon og konseho sa pagkamiyembro. Kini nga mga eksepsiyon maglakip sa usa ka tawo nga nakakompleto sa legal nga mga panginahanglan ug nagpakita og tinud-anay nga paghinulsol apan anaa sa tibuok kinabuhi nga probation o adunay dako-dakong multa.
-
Mokontak sa mga lider sa pagkapari sa mga biktima. Ang bishop o ang presidente sa stake mokontak sa kasamtangan nga bishop o presidente sa stake ni bisan kinsa nga mga biktima (tan-awa sa 32.10.2).
-
Mohatag og pahibalo bahin sa konseho. Mopahibalo siya sa tawo bahin sa petsa, oras, ug dapit sa konseho.
-
Mopahigayon sa konseho. Mopahigayon siya sa konseho sumala sa mga lagda diha sa 32.10.3. Mangutana siya sa tawo unsay iyang nahimo sa paghinulsol. Mangutana usab siya mahitungod sa iyang pasalig ngadto ni Jesukristo ug sa Simbahan. Kon ang tanang importante nga mga butang napresentar na, iyang pagawason ang miyembro. Uban sa iyang magtatambag, siya mag-ampo aron sa pagkonsiderar unsa nga aksiyon ang himoon. Ang tulo ka posible nga mga desisyon mao ang:
-
Pagpadayon sa mga restriksiyon o pagbakwi sa pagkamiyembro.
-
Pagtangtang sa mga restriksiyon o motugot nga dawaton pag-usab.
-
Pagrekomendar ngadto sa Unang Kapangulohan nga ang pagtangtang sa mga restriksiyon o pagdawat pag-usab tugotan (kon gikinahanglan sumala sa “Pag-aplay alang sa pagtugot sa Unang Kapangulohan” sa ubos).
-
-
Mopaambit sa desisyon. Human makahimo ang konseho og desisyon, ang tigdumalang opisyal mopaambit niini ngadto sa tawo. Kon gikinahanglan ang pagtugot sa Unang Kapangulohan, mopasabot siya nga ang desisyon usa ka rekomendasyon ngadto sa Unang Kapangulohan.
-
Mosumiter sa report. Ang bishop o ang presidente sa stake mosumiter sa porma sa Report sa Konseho sa Pagkamiyembro diha sa Simbahan pinaagi sa LCR. Mahimong mohangyo siya sa klerk sa pag-andam niini nga report. Siya moseguro nga walay hard copy o electronic copy ang ibilin diha sa lokal. Siya usab moseguro nga ang bisan unsa nga mubo nga mga sulat nga gigamit sa pag-andam sa report gision o wagtangon dayon.
-
Mo-aplay alang sa pagtugot sa Unang Kapangulohan (kon gikinahanglan). Sa mosunod nga mga sirkumstansiya, ang pagtugot sa Unang Kapangulohan gikinahanglan aron sa pagtangtang sa pormal nga mga restriksiyon sa pagkamiyembro o pagdawat pag-usab sa tawo ngadto sa Simbahan. Kini nga pagtugot gikinahanglan bisan kon ang binuhatan nahitabo human gibutangan og pormal nga restriksiyon o gibakwi ang pagkamiyembro diha sa Simbahan.
Ang presidente sa stake mosumiter lamang sa aplikasyon ngadto sa Unang Kapangulohan kon morekomendar siya og pagtugot (tan-awa sa 6.2.3).
-
Pagpatay
-
Pakighilawas sa duol nga kabanay [Incest]
-
Sekswal nga pag-abuso sa usa ka bata o batan-on, sekswal nga pagpahimulos sa usa ka bata o batan-on, o seryoso nga pisikal o emosyonal nga pag-abuso sa usa ka bata o batan-on sa usa ka hamtong o batan-on nga mas magulang pa kay sa bata
-
Pagkalambigit sa pornograpiya nga naggamit og bata diin adunay legal nga pagkakombikto
-
Apostasiya
-
Dinaghan nga kaminyoon
-
Nakabuhat og seryoso nga sala samtang naghupot og prominente nga katungdanan sa Simbahan
-
Transgender—mga aksiyon sa pag-usab sa sekso nga natawhan sa tawo ngadto sa katugbang nga sekso (tan-awa sa 38.6.23)
-
Pagpanghilabot sa mga pundo o kabtangan sa Simbahan
-
-
Mohatag og sinulat nga pahibalo bahin sa desisyon. Ang bishop o ang presidente sa stake moseguro nga ang tawo makadawat dayon sa sinulat nga pahibalo sa desisyon ug sa mga epekto niini.
-
Mobunyag ug mokompirma. Kon ang pagkamiyembro sa tawo diha sa Simbahan gibakwi sa inisyal nga konseho, siya kinahanglang bunyagan ug kompirmahan pag-usab. Kon ang pagtugot sa Unang Kapangulohan gikinahanglan, kini nga mga ordinansa mahimong ipahigayon lamang human madawat kini nga pagtugot. Ang Sertipiko sa Bunyag ug Kompirmasyon dili himoon (tan-awa sa 32.14.4).
32.16.2
Ang Pagdawat Pag-usab human Moluwat sa Pagkamiyembro diha sa Simbahan
Kon ang tawo pormal nga miluwat sa pagkamiyembro diha sa Simbahan, siya kinahanglan gayod nga bunyagan ug kompirmahan aron madawat pag-usab nganha sa Simbahan. Alang sa mga hamtong, ang pagdawat pag-usab dili kasagaran nga ikonsiderar hangtod sa dili mominos usa ka tuig human moluwat sa pagkamiyembro.
Kon ang tawo mohangyo nga dawaton pag-usab, ang bishop o ang presidente sa stake mangayo og kopya sa porma sa Report sa Aksiyong Administratiba nga gipauban sa hangyo alang sa pagluwat. Makuha niya kini pinaagi sa LCR.
Ang bishop o ang presidente sa stake mointerbiyo pag-ayo sa tawo. Siya mangutana mahitungod sa mga rason sa orihinal nga hangyo ug sa tinguha alang sa pagdawat pag-usab. Pinaagi sa diwa sa gugma, mangutana siya mahitungod sa seryoso nga mga sala nga nahimo sa tawo sa wala pa o human moluwat sa pagkamiyembro. Ang lider dili mopadayon sa pagdawat pag-usab hangtod masaligon siya nga ang tawo nakahinulsol ug andam ug takos nga motagamtam sa mga panalangin sa pagkamiyembro diha sa Simbahan.
Ang mga lagda sa pagdawat pag-usab human sa pagluwat mosunod:
-
Ang konseho sa pagkamiyembro ipahigayon kon ang pagkamiyembro sa tawo pormal nga gibutangan og restriksiyon sa panahon sa pagluwat.
-
Ang konseho sa pagkamiyembro ipahigayon kon ang tawo nakahimo og seryoso nga sala, lakip sa apostasiya, sa wala pa moluwat sa pagkamiyembro.
Sa ubang mga sirkumstansiya, ang konseho sa pagkamiyembro dili ipahigayon gawas kon ang bishop o ang presidente sa stake motino nga kini gikinahanglan.
Kon ang konseho sa pagkamiyembro gikinahanglan alang sa usa ka tawo kinsa nakadawat og pagtuga sa templo, ang presidente sa stake mopahigayon niini. Kon ang konseho gikinahanglan alang sa usa ka tawo kinsa wala matugahi, ang bishop mopahigayon niini, uban sa pagtugot gikan sa presidente sa stake.
Kon ang tawo nagbuhat sa bisan unsa nga binuhatan diha sa 32.16.1, numero 9, sa wala pa o human moluwat sa pagkamiyembro diha sa Simbahan, ang pagtugot sa Unang Kapangulohan gikinahanglan alang sa pagdawat pag-usab. Kon ang tawo nagbuhat sa bisan unsa sa binuhatan diha sa 32.14.5, numero 1, sa wala pa o human moluwat sa pagkamiyembro, butangan og annotation ang rekord sa pagkamiyembro.
Ang tawo kinsa naghangyo nga dawaton pag-usab kinahanglang makahimo sa samang mga kwalipikasyon sama sa uban nga bunyagan. Kon ang bishop o ang presidente sa stake masaligon nga ang tawo takos ug sinsero nga dawaton pag-usab, ang tawo mahimong bunyagan ug kompirmahan. Ang Sertipiko sa Bunyag ug Kompirmasyon dili himoon (tan-awa sa 32.14.4).
32.17
Kalihokan sa Simbahan, Ordinasyon, ug Pagpahiuli sa mga Panalangin human sa Pagdawat Pag-usab
32.17.1
Kalihokan ug Ordinasyon diha sa Simbahan
Ang mosunod nga tsart nagpakita sa angay nga lebel sa kalihokan diha sa Simbahan alang sa usa ka tawo kinsa gidawat pag-usab pinaagi sa bunyag ug kompirmasyon.
|
Wala Matugahi Kaniadto |
Natugahan Kaniadto | |
|---|---|---|
|
Mga Tighupot sa Pagkapari Kaniadto | Wala Matugahi Kaniadto
| Natugahan Kaniadto
|
|
Ubang mga Miyembro | Wala Matugahi Kaniadto
| Natugahan Kaniadto
|
32.17.2
Pagpahiuli sa mga Panalangin
Ang mga tawo kinsa nakadawat kaniadto sa pagtuga sa templo ug gidawat pag-usab pinaagi sa bunyag ug kompirmasyon makadawat lamang sa ilang pagkapari ug sa mga panalangin sa templo pinaagi sa ordinansa sa pagpahiuli sa mga panalangin (tan-awa sa Doktrina ug mga Pakigsaad 109:21). Dili sila i-orden ngadto sa mga katungdanan sa pagkapari o tugahan pag-usab. Kini nga mga panalangin ipahiuli pinaagi sa ordinansa. Ang mga kaigsoonan ipahiuli sa ilang kanhi nga katungdanan sa pagkapari, gawas sa katungdanan sa Seventy, bishop, o patriyarka.
Ang Unang Kapangulohan lamang ang makatugot sa pagpahigayon sa ordinansa sa pagpahiuli sa mga panalangin. Dili sila mokonsiderar sa aplikasyon alang niini nga ordinansa nga mas sayo pa kay sa usa ka tuig human ang tawo gidawat pag-usab pinaagi sa bunyag ug kompirmasyon.
Ang bishop ug ang presidente sa stake mointerbiyo sa tawo aron sa pagtino sa iyang katakos ug kaandam. Kon ang presidente sa stake mobati nga ang tawo andam na, siya moaplay alang sa pagpahiuli sa mga panalangin gamit ang LCR. Tan-awa sa 6.2.3 mahitungod sa responsibilidad sa presidente sa stake kon magsumiter og aplikasyon ngadto sa Unang Kapangulohan.
Kon ang Unang Kapangulohan motugot sa pagpahiuli sa mga panalangin, sangonan nila ang usa ka Kinatibuk-ang Awtoridad o ang presidente sa stake sa pag-interbiyo sa tawo. Kon ang tawo takos, kini nga lider mopahigayon sa ordinansa sa pagpahiuli sa mga panalangin sa tawo.
Alang sa impormasyon mahitungod sa mga rekord ug sa pagpahiuli sa mga panalangin, tan-awa sa 32.14.4.