miting sa konseho sa ward

4.

Pagpangulo ug mga Konseho diha sa Simbahan ni Jesukristo

4.0

Pasiuna

Isip usa ka lider sa Simbahan, ikaw gitawag pinaagi sa inspirasyon nga nadawat sa gitugotan nga mga sulugoon sa Ginoo. Ikaw adunay pribilehiyo sa pagtabang diha sa buhat sa Langitnong Amahan sa “pagpahinabo sa pagka-imortal ug sa kinabuhi nga dayon sa tawo” (Moises 1:39). Ikaw mohimo niini pinaagi sa pag-awhag sa mga miyembro sa pag-apil sa buhat sa Dios sa kaluwasan ug kahimayaan alang sa ilang mga kaugalingon, sa ilang mga pamilya, ug sa uban (tan-awa sa kapitulo 1). Ikaw makakaplag sa kalipay samtang ikaw moserbisyo sa mga anak sa Dios.

Sa pagsunod sa ehemplo ni Jesukristo, sa kasagaran ikaw moserbisyo sa uban sa tagsa-tagsa. Ikaw usab adunay mga oportunidad nga mangulo sa mga miting ug mga kalihokan sa Simbahan. Agi og dugang, ikaw mahimong mohatag og importante nga pagserbisyo pinaagi sa mga konseho. Kini maglakip sa mga miting sa kapangulohan, mga miting sa konseho sa ward, ug uban pa.

Ang imong gipahinungod nga pagserbisyo nagkinahanglan og sakripisyo sa panahon, apan ayaw ibaliwala ang imong kaugalingong mga panginahanglan ug ang panginahanglan sa imong pamilya. Tinguhaa ang giya sa Espiritu Santo sa pagtabang nimo nga mabalanse ug matuman ang imong mga responsibilidad (tan-awa sa Mosiah 4:27).

4.1

Ang Katuyoan sa Pagpangulo diha sa Simbahan

Ang mga lider moawhag sa mga miyembro sa pag-apil sa buhat sa Dios pinaagi sa pagkahimong “tinuod nga mga sumusunod ni … Jesukristo” (Moroni 7:48). Sa pagbuhat niini, ang mga lider unang maningkamot nga mahimong matinud-anong mga disipulo sa Manluluwas. Dayon makatabang sila sa uban nga magpaduol ngadto Kaniya. Sa proseso sa pagtabang sa uban, sila mahimong mas maayo nga mga disipulo mismo (tan-awa sa Mosiah 18:26; Doktrina ug mga Pakigsaad 31:5).

4.2

Mga Baroganan sa Pagpangulo diha sa Simbahan

Atol sa Iyang yutan-ong pangalagad, ang Manluluwas mipakita sa ehemplo sa pagkapangulo alang sa Iyang Simbahan. Ang Iyang labing importante nga katuyoan mao ang paghimo sa kabubut-on sa Iyang Langitnong Amahan ug sa pagtabang sa uban nga makasabot ug magsunod sa Iyang ebanghelyo (tan-awa sa Juan 5:30; Mosiah 15:7). Siya nahigugma niadtong Iyang gigiyahan ug gipakita kana nga gugma pinaagi sa pagserbisyo kanila (tan-awa sa Juan 13:3–5).

Ang Manluluwas mipalambo sa kapasidad sa uban pinaagi sa paghatag kanila og responsibilidad ug mga oportunidad sa pagtubo (tan-awa sa Mateo 10:5–8; Juan 14:12). Siya miawhag ug mikorehir uban ang kaklaro ug gugma (tan-awa sa Juan 21:15–17).

Ang Ginoo miingon, “Himoa ang matag tawo nga makakat-on sa iyang katungdanan, ug sa pagbuhat sa buhatan diin siya natudlo, diha sa tanan nga kakugi” (Doktrina ug mga Pakigsaad 107:99). Kini nga mga pulong magamit sa tanan nga modawat og responsibilidad sa pagserbisyo ug paggiya diha sa Simbahan sa Manluluwas.

Ang paggamit sa mga baroganan niini nga kapitulo makatabang nimo sa paggiya sa mas epektibong paagi diha sa Simbahan sa Manluluwas.

4.2.1

Mangandam sa Espirituwal nga Paagi

Giandam ni Jesus ang Iyang Kaugalingon sa espirituwal nga paagi alang sa Iyang yutan-on nga misyon (tan-awa sa Lucas 4:1–2). Ikaw usab makaandam sa espirituwal nga paagi pinaagi sa pagpaduol ngadto sa Langitnong Amahan pinaagi sa pag-ampo, pagtuon sa kasulatan, ug pagsunod sa Iyang mga sugo. Ang pagsunod usab sa Iyang mga propeta makatabang nimo nga makaandam sa espirituwal nga paagi (tan-awa sa Doktrina ug mga Pakigsaad 21:4–6).

Tinguhaa ang pagpadayag aron makasabot sa mga panginahanglan niadtong imong gigiyahan ug unsaon sa pagtuman sa buhat nga gitawag ka sa Dios nga imong himoon.

Ang Ginoo misaad usab sa pagtugyan sa espirituwal nga mga gasa niadtong nagtinguha niini (tan-awa sa Doktrina ug mga Pakigsaad 46:8). Kon ikaw mapainubsanong motawag sa Langitnong Amahan aron makadawat niini nga mga gasa, Siya modugang sa imong abilidad sa paggiya ug pagbayaw niadtong imong giserbisyohan.

4.2.2

Mangalagad sa Tanang mga Anak sa Dios

Si Jesus personal nga nangalagad sa katawhan, nagtabang sa pagbayaw ug pagtudlo niadtong mibati nga nag-inusara, walay paglaom, o nahisalaag. Siya nakahibalo sa balaan nga kinaiya ug mahangturong bili sa matag tawo.

Higugmaa ang mga tawo nga imong giserbisyohan sama sa gibuhat ni Jesus. Pag-ampo “uban sa tibuok kusog sa kasingkasing” aron mapuno sa Iyang gugma (Moroni 7:48). Pag-establisar og sinsero nga panaghigalaay. Tabangi kadtong nag-inusara, nagkinahanglan og kahupayan, o adunay laing mga panginahanglan. Ang imong gugma mopanalangin sa ilang kinabuhi ug motabang sa mga tawo nga magtinguha nga moduol ngadto ni Kristo.

Tabangi ang mga indibidwal nga makapalig-on sa ilang pagkakabig ug mapalig-on ang ilang hugot nga pagtuo sa Langitnong Amahan ug ni Jesukristo. Tabangi sila nga makaandam sa paghimo og mga pakigsaad samtang sila modawat sa ilang sunod nga ordinansa. Awhaga sila sa pagtuman sa mga pakigsaad nga ilang nahimo ug pag-ambit sa mga panalangin sa paghinulsol. Tabangi sila nga makahibalo nga sila mahimong mouswag ngadto sa pagtuman sa ilang balaang potensiyal bisan pa sa mga hagit nga ilang giatubang.

4.2.3

Magtudlo sa Ebanghelyo ni Jesukristo

Ang tanang mga lider mga magtutudlo. Paningkamot sa pagsunod sa ehemplo sa Manluluwas isip usa ka magtutudlo (tan-awa sa kapitulo 17; Pagtudlo sumala sa Pamaagi sa Manluluwas). Pinaagi sa imong mga pulong ug mga aksiyon, itudlo ang doktrina ni Jesukristo ug ang mga baroganan sa Iyang ebanghelyo (tan-awa sa 3 Nephi 11:32–33; Doktrina ug mga Pakigsaad 42:12–14). Ang epektibo nga pagtudlo makadasig sa mga tawo sa paglig-on sa ilang relasyon sa Dios ug pagpuyo sa ebanghelyo, mag-uswag ngadto sa kinabuhing dayon.

Ang pagtudlo sumala sa pamaagi sa Manluluwas labaw pa kay sa pagkigsulti lang; kini naglakip sa pagpaminaw ug mga pagpangutana sa paagi sa Iyang paghimo niini (tan-awa sa Mateo 16:13–17).

Ang epektibo nga mga magtutudlo mga kugihan usab nga mga tigkat-on. Himoa nga ang pagtuon sa pulong sa Dios nga taas og prayoridad sa imong kinabuhi. Ang pagkat-on sa ebanghelyo usa ka tibuok kinabuhi nga proseso.

Pagtudlo gikan sa mga kasulatan ug sa mga pulong sa mga propeta sa ulahing mga adlaw (tan-awa sa Doktrina ug mga Pakigsaad 52:9). Hinumdomi nga “ang pagsangyaw sa pulong [adunay] labaw nga gamhanan nga sangputanan diha sa mga hunahuna sa mga katawhan kay … sa bisan unsa pa” (Alma 31:5).

Tinguhaa ang impluwensya sa Espiritu samtang ikaw mag-andam ug magtudlo. Ang Espiritu Santo modala sa kamatuoran ngadto sa mga kasingkasing ug mga hunahuna niadtong imong gitudloan (tan-awa sa 2 Nephi 33:1).

Kon ikaw gitawag o gisangonan sa pagdumala sa usa ka miting o kalihokan sa Simbahan, seguroha nga ang pagtulon-an makaayo ug sakto ang doktrina (tan-awa sa Doktrina ug mga Pakigsaad 50:21–23).

4.2.4

Magdumala diha sa Pagkamatarong

Ang Ginoo mipadayag nga “gikinahanglan nga adunay mga presidente, o mga opisyal nga tigdumala” sa Iyang Simbahan (Doktrina ug mga Pakigsaad 107:21). Kadtong naghupot sa mga yawe sa pagkapari modumala sa ilang mga bahin sa responsibilidad, sama sa usa ka korum o ward.

Ang ubang mga organisasyon sa Simbahan, lakip sa Relief Society, Young Women, Primary, ug Sunday School, gipangulohan usab sa usa ka tigdumalang opisyal. Kini nga mga lider gitawag, gi-set apart, ug gitugyanan og awtoridad sa usa nga naghupot sa mga yawe sa pagkapari o sa usa ka tawo nga iyang gitugotan (tan-awa sa 3.4.3).

Ang matag tigdumalang opisyal nagserbisyo ubos sa direksyon sa usa ka tawo kinsa naghupot sa mga yawe sa pagkapari (tan-awa sa 3.4.1). Kini nga estraktura naghatag og hapsay ug klaro nga linya sa responsibilidad ug pagkamay-tulubagon sa paghimo sa buhat sa Ginoo.

Ang usa ka tigdumalang opisyal motugyan ngadto sa laing tawo og temporaryong buluhaton sa pagdumala. Pananglitan, kon ang usa ka presidente sa Relief Society wala diha sa miting sa Relief Society sa Dominggo, iyang sangonan ang iyang unang magtatambag sa pagdumala sa miting.

Ang usa ka lider nga modumala sa organisasyon, miting, o kalihokan sa Simbahan moseguro nga ang mga katuyoan sa Ginoo matuman. Sa paghimo niini, ang lider mosunod sa mga baroganan sa ebanghelyo, mga palisiya sa Simbahan, ug sa direksyon sa Espiritu Santo.

Kadtong kinsa magdumala mosunod sa ehemplo ni Jesukristo sa pagserbisyo uban ang kalumo, kaaghop, ug putli nga gugma, (tan-awa sa Juan 13:13–15). Ang calling o buluhaton sa pagdumala dili makapahimo sa tawo nga nakadawat niini nga mas importante o bililhon kay sa uban (tan-awa sa Doktrina ug mga Pakigsaad 84:109–10).

Kon ikaw gitawag o gisangonan nga modumala, sunda ang pagtulon-an sa Manluluwas nga “bisan kinsay gustong maghawod kaninyo, kinahanglan ma-inyo siyang ulipon” (Mateo 20:27; tan-awa sa mga bersikulo 26–28). Pagpakitambag sa uban ug tinguhaa ang panaghiusa sa pagsabot sa kabubut-on sa Ginoo ug paghimo sa Iyang buhat (tan-awa sa Doktrina ug mga Pakigsaad 41:2; tan-awa usab sa 4.4 niini nga tamdanan nga basahon).

Dili maayo nga mangandoy sa pagdumala sa bisan unsa nga organisasyon sa Simbahan sa Ginoo (tan-awa sa Doktrina ug mga Pakigsaad 121:34–37). Hinoon, pagmapainubsanon ug pagmatinud-anon sa pagserbisyo sa katungdanan nga ikaw gitawag. Paningkamot sa paghimo sa buhat sa Ginoo uban ang bug-os nga tinguha ngadto sa Iyang himaya (tan-awa sa Doktrina ug mga Pakigsaad 4:5).

miting sa ward

4.2.5

Modelegar sa Responsibilidad ug Moseguro sa Pagkamay-tulubagon

Ang Manluluwas mihatag sa Iyang mga disipulo og makahuluganong mga buluhaton ug mga responsibilidad (tan-awa sa Lucas 10:1). Mihatag usab siya kanila og oportunidad sa paghatag og subay sa buhat nga gihatag ngadto kanila (tan-awa sa Lucas 9:10).

Isip usa ka lider ikaw makatabang sa uban nga molambo pinaagi sa pagdelegar sa mga buluhaton ngadto kanila. Niining paagiha ikaw motabang usab kanila nga makadawat og mga panalangin nga moabot tungod sa pagserbisyo. Paningkamot sa pagpaapil sa tanang mga miyembro sa paghimo sa buhat sa Dios.

Ang pagdelegar makapahimo sa imong pagserbisyo nga mas epektibo. Kon ikaw mosulay sa pagbuhat og daghan kaayo, seguradong “abuton ka og kaluya” (Exodo 18:18). Tinguhaa ang giya sa Espiritu mahitungod kon unsay idelegar aron ikaw makatutok sa imong labing taas nga mga prayoridad.

Ang pagdelegar labaw pa kay sa paghatag og buluhaton. Kini naglakip usab sa pagtudlo ug pagsalig sa laing tawo sa pagtuman sa buluhaton. Kini sa kasagaran naglakip sa mosunod nga mga elemento:

• Pakigkita sa tawo aron dapiton siya nga moserbisyo sa Ginoo sa usa ka buluhaton. Pagtabang sa tawo nga makasabot sa buluhaton ug sa mga katuyoan niini.

• Pagtinambagay mahitungod sa buluhaton, kinsa pa ang angay paapilon, ug kon kanus-a kini mahuman. Pagseguro nga ang tawo nakasabot ug andam nga modawat sa buluhaton. Pagpadayag sa pagsalig sa iyang mga abilidad.

• Pag-awhag sa tawo nga magtinguha og inspirasyon kon unsaon sa pagtuman ang buluhaton. Pagpakita sa imong pagsalig ug tabangi ang tawo nga magmalampuson. Paghatag og direksyon ug suporta kon gikinahanglan.

• Matag karon ug unya hangyoa ang tawo nga moreport bahin sa buluhaton. Pagdawat sa labing maayong mga paningkamot sa tawo, ug ipadayag ang pasalamat sa unsay iyang nahimo.

Ang mga lagda alang sa paghatag og calling diha sa 30.1.1 kinahanglan usab nga sundon kon magdelegar, kon gikinahanglan.

4.2.6

Moandam sa Uban nga Mahimong mga Lider ug mga Magtutudlo

Ang Manluluwas miandam sa Iyang mga Apostoles nga mahimong mga lider sa Iyang Simbahan. Ikaw usab makatabang sa uban nga makaandam nga mahimong mga lider ug mga magtutudlo. Ang buhat sa Ginoo nagtutok sa pagtabang sa mga tawo, dili lang sa pagpangalagad sa mga programa sa Simbahan. Kini nga mga programa dili mao ang katuyoan sa Simbahan. Anaa kini aron sa pagtabang sa mga tawo nga molambo.

Kon maghunahuna kinsa ang moserbisyo sa mga calling sa Simbahan o sa mga buluhaton, pagmainampoon. Hinumdomi nga ang Ginoo mohimong kwalipikado niadtong kinsa Iyang gitawag. Unsa ang labing importante mao nga sila andam nga moserbisyo, mapainubsanong magtinguha sa tabang sa Ginoo, ug maningkamot nga mahimong takos. Ang mga calling ug mga buluhaton makatabang nila nga motubo pinaagi sa paghatag og mga oportunidad sa paggamit sa ilang hugot nga pagtuo, sa pagtrabaho og maayo, ug mobati nga ang Dios nagpalambo sa ilang mga paningkamot. Paghatag og giya ug tabang sa kabatan-onan, bag-ong mga miyembro ug sa uban kinsa magkinahanglan og dugang nga suporta sa pagtuman sa ilang mga calling.

Usahay ang samang mga tawo ang balik-balik nga gitawag ngadto sa mga katungdanan sa pagpangulo. Kini makapabug-at nila pag-ayo ug sa ilang mga pamilya ug mokuha sa mga oportunidad gikan sa uban. Tinguhaa ang paghatag sa tanang mga miyembro og mga oportunidad sa pagserbisyo ug pagtubo.

Alang sa dugang nga impormasyon mahitungod sa mga calling sa Simbahan, tan-awa sa kapitulo 30.

4.2.7

Magplano og mga Miting, mga Leksiyon, ug mga Kalihokan uban ang Klaro nga mga Katuyoan

Tinguhaa ang inspirasyon gikan sa Ginoo diha sa pagplano og mga miting, mga leksiyon, ug mga kalihokan nga adunay klaro nga mga katuyoan. Kini nga mga katuyoan kinahanglan makapalig-on sa mga indibidwal ug mga pamilya, makapaduol kanila ngadto ni Kristo, ug makatabang nga matuman ang buhat sa Dios sa kaluwasan ug kahimayaan (tan-awa sa mga kapitulo 1 ug 2). Kon magplano, sunda ang mga baroganan diha sa 4.4.2 ug sa mga kapitulo 20 ug 29.

4.2.8

Pagtimbang-timbang sa Imong mga Paningkamot

Rebyoha kanunay ang imong mga responsibilidad ug espirituwal nga paglambo isip usa ka lider. Ikonsiderar usab ang paglambo niadtong imong gipangulohan.

Ang imong kalamposan isip usa ka lider unang masukod sa imong pasalig sa pagtabang sa mga anak sa Dios nga mahimong matinud-anong mga disipulo ni Jesukristo. Tungod kay ang tanang tawo adunay kabubut-on, ang pipila mopili sa pagbiya gikan sa dalan sa pakigsaad. Usahay kini makapawala sa imong kadasig, apan kon ikaw modangop ngadto sa Ginoo, Siya mobayaw ug mohupay kanimo (tan-awa sa Alma 26:27). Ikaw makahibalo nga ang Ginoo nahimuot sa imong mga paningkamot sa imong pagbati sa Espiritu nga naglihok diha kanimo.

4.3

Mga Konseho diha sa Simbahan

Ang Langitnong Amahan miestablisar og mga konseho isip usa ka importante nga bahin sa pagdawat og inspirasyon, paghimo og mga desisyon, ug pagtuman sa Iyang buhat. Ang mga konseho anaa na sa wala pa malalang ang kalibotan. Ang matag usa kanato miapil niini nga mga konseho sa wala pa moanhi sa yuta. (Tan-awa sa Doktrina ug mga Pakigsaad 121:32; Abraham 3:22–28.)

Sa pagsunod niini nga sumbanan, ang Simbahan ni Jesukristo gidumala sa mga konseho sa matag lebel. Pananglitan, ang Konseho sa Unang Kapangulohan ug sa Korum sa Napulog Duha ka Apostoles (tan-awa sa 5.1.1.1), Mga Kapangulohan sa Area (tan-awa sa 5.2.1), mga kapangulohan sa stake, ug mga bishopric ang tanan mga konseho. Agi og dugang sa mga konseho sa stake ug ward, ang matag kapangulohan sa organisasyon, korum, o klase sa Simbahan usa usab ka konseho.

Ang Ginoo mitudlo sa mga lider sa Iyang Simbahan sa pagtinambagay sa paghimo sa Iyang buhat (tan-awa sa Doktrina ug mga Pakigsaad 41:2–3). Ang mga konseho mohatag og mga oportunidad alang sa mga sakop sa konseho sa pagdawat og pagpadayag samtang sila magtinguha sa pagsabot sa mga panginahanglan sa mga anak sa Dios ug magplano unsaon sa pagtabang nga kini matubag.

duha ka lalaki nga nag-istoryahanay

4.4

Mga Baroganan sa Epektibo nga mga Konseho

Ang pipila ka epektibo nga mga konseho gilatid niini nga seksiyon.

4.4.1

Mga Katuyoan sa mga Konseho

Ang unang katuyoan sa mga konseho mao ang pagtabang sa mga miyembro nga magtambayayong sa pagtinguha og balaanong giya mahitungod sa mga butang nga mopanalangin sa mga indibidwal ug mga pamilya (tan-awa sa Doktrina ug mga Pakigsaad 43:8–9). Ang mga konseho mohatag og espesyal nga gibug-aton sa pagtabang sa mga miyembro nga modawat og mga ordinansa ug motuman sa nag-uban nga mga pakigsaad. Ang mga sakop sa konseho magtinguha usab og inspirasyon mahitungod sa pagplano ug pagpakigsabot sa buhat sa Ginoo sa ilang bahin sa responsibilidad.

Ang pipila ka administratiba nga atimanonon, sama sa pagplano sa pagkalendaryo sa mga kalihokan, tingali wala magkinahanglan nga hisgotan diha sa konseho. Kadaghanan niini mahimong istoryahan sa dili pa o human sa mga miting.

Ang mga sakop sa konseho mohatag og piho nga pag-atiman sa mga indibidwal ug mga pamilya nga adunay dinalian nga mga panginahanglan. Ang mga konseho motabang sa pagpakigsabot sa paghatag og tabang. Alang sa impormasyon mahitungod sa pipila niini nga mga panginahanglan, uban sa mga kapanguhaan alang sa pagsabot ug pagtabang, tan-awa sa Life Help diha sa Gospel Library.

4.4.2

Pagpangandam alang sa mga Miting sa Konseho

Ang mga kapangulohan ug mga konseho gilaoman nga magmiting kanunay. Ang mga lider magtinguha sa giya sa Ginoo sa pagplano og mga miting sa konseho. Sila usab magtinguha sa mga hunahuna sa mga sakop sa konseho sa paghukom unsay angayng hisgotan.

Ang mga lider mopahibalo og sayo sa mga sakop sa konseho kabahin sa mga butang nga hisgotan. Ang mga sakop sa konseho moandam sa pagpaambit og mga ideya mahitungod niini nga mga butang. Alang sa mga konseho sa ward ug stake, kadaghanan niini nga pagpangandam mahitabo diha sa mga miting sa kapangulohan.

Ang mga sakop sa konseho moandam sa ilang mga kaugalingon sa espirituwal nga paagi sa pag-apil sa mga miting sa konseho.

4.4.3

Panaghisgotan ug mga Desisyon

Ang Ginoo miingon, “Apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag tawo makabaton og managsama nga kahigay[o]nan” (Doktrina ug mga Pakigsaad 88:122). Kini nga baroganan magamit sa mga konseho sa Simbahan.

Atol sa usa ka miting sa konseho, ang lider (o usa ka tawo nga gisangonan sa lider) mopasabot sa butang nga gikonsiderar. Ang lider dayon moawhag og panaghisgotan sa tanan nga sakop sa konseho, mangutana ug mangayo og mga ideya.

Ang lider moawhag sa mga sakop nga mosulti sa dayag ug sa matinuorong paagi. Ang nagkalain-lain nga mga kaagi, mga edad, mga kasinatian, ug mga panglantaw sa mga sakop sa konseho makasangkap sa konseho. Ang mga sakop mosugyot ug maminaw sa usag usa sa matinahuron nga paagi. Samtang sila magtinguha nga makahibalo sa kabubut-on sa Ginoo, ang espiritu sa inspirasyon ug panaghiusa mopatigbabaw.

Sa usa ka konseho nga naglakip og mga babaye ug mga lalaki, ang lider magtinguha og mga panabot ug mga ideya gikan kanila. Ang mga babaye ug mga lalaki kanunay nga adunay lain-laing mga panglantaw nga makahatag sa gikinahanglan nga balanse. Ang mga lalaki ug mga babaye makakab-ot og mas maayo nga mga desisyon ug adunay mas dakong kalamposan diha sa pagserbisyo sa Ginoo samtang sila mohatag og bili sa mga kontribusyon sa usag usa ug magtambayayong.

Ang usa ka lider mogiya sa mga panaghisgotan sa konseho. Hinoon, siya kinahanglan nga maminaw pag-ayo kay sa mosulti. Kon ang usa ka lider sa konseho mopaambit sa iyang panglantaw diha-diha dayon, kini makapugong sa mga kontribusyon sa uban. Kon gikinahanglan, ang lider sa konseho sa malumong paagi mogiya pag-usab ug mousab sa panaghisgotan.

Human sa panaghisgotan, ang lider mahimong mohukom unsa ang angay nga buhaton o molangan sa desisyon samtang nangita og dugang nga impormasyon ug giya. Ang desisyon kinahanglan nga naimpluwensya sa panaghisgotan ug gikompirmar sa Espiritu. Ang proseso sa konseho magtabang sa paghimo og dinasig nga mga desisyon nga lapas pa sa labing maayong kaugalingong paghukom sa lider. Ang lider mahimo usab nga modala sa gihisgotan ngadto sa lahi nga konseho.

Usahay ang mga sakop sa konseho adunay dili komportable nga mga pagbati mahitungod sa usa ka importante nga desisyon. Kon kini mahitabo, ang lider mahimong maghulat alang sa laing miting sa pagkonsiderar pa og dugang sa gihisgotan ug magtinguha og espirituwal nga kompirmasyon ug panaghiusa. Sa pipila ka sitwasyon, ang usa ka sakop sa konseho mahimong makigkita sa lider tagsa-tagsa aron hisgotan ang iyang mga kabalaka.

4.4.4

Panaghiusa

Ang Ginoo mitudlo sa Iyang mga disipulo nga “maghiusa” (Doktrina ug mga Pakigsaad 38:27). Ang mga sakop sa konseho magtinguha nga magkahiusa diha sa tinguha ug katuyoan uban sa Langitnong Amahan ug ni Jesukristo. Sila maningkamot nga magkahiusa diha sa ilang mga panaghisgotan ug mga desisyon.

Ang mga sakop sa konseho kinahanglan nga maglikay og panagbingkil, dili matarong nga paghukom, ug panglibak (tan-awa sa 3 Nephi 11:28–30). Samtang sila molihok pinaagi sa panaghiusa, ang Langitnong Amahan mopanalangin sa ilang mga paningkamot.

4.4.5

Aksiyon ug Pagkamay-tulubagon

Ang mga sakop sa konseho mohimo sa kadaghanan sa ilang trabaho sa dili pa o human sa mga miting sa konseho. Atol sa mga miting, magtinguha sila og inspirasyon sa paghimo og mga plano sa pag-implementar og mga desisyon. Ang lider sa konseho modapit sa mga sakop sa pagtuman sa ilang mga buluhaton kalabot niini nga mga plano. Ang mga sakop sa konseho sa kasagaran modapit sa uban sa ilang organisasyon sa pagtabang. Ang mga indibidwal kinahanglan nga dili mabug-atan sa ilang mga buluhaton.

Ang mga sakop sa konseho moreport sa ilang mga buluhaton. Ang kauswagan sa kasagaran magkinahanglan og kanunay nga pagtagad ug pag-follow-up sa mga buluhaton.

4.4.6

Pagkakompidensiyal

Ang mga lider kinahanglan magmabinantayon kon mopaambit og personal nga impormasyon uban sa konseho. Sila sa kasagaran mangayo og pagtugot sa miyembro nga mopaambit og impormasyon.

Ang konseho motahod sa mga tinguha ni bisan kinsa nga mohangyo nga kini himoon nga kompidensiyal. Ang mga sakop sa konseho kinahanglan nga dili mopaambit og personal nga impormasyon sa gawas sa konseho gawas kon gikinahanglan aron sa pagtuman sa usa ka buluhaton gikan sa lider sa konseho.

Ang pipila ka butang sensitibo ra kaayo nga hisgotan diha sa tibuok konseho. Kon angay, ang mga lider morebyo niini nga mga butang uban sa indibidwal nga mga miyembro sa konseho. O mahimo sila modala niini nga mga butang ngadto sa lahi nga konseho.