38.

Mga Palisiya ug mga Lagda sa Simbahan

38.1

Pag-apil diha sa Simbahan

Ang atong Amahan sa Langit nahigugma sa tanan Niyang mga anak. “Ang tanan managsama ngadto sa Dios,” ug Siya nagdapit sa tanan “sa pagduol ngadto kaniya ug sa pag-ambit sa iyang kaayo” (2 Nephi 26:33).

Ang mga lider ug ang mga miyembro sa Simbahan kanunay nga gipangutana kinsa ang makatambong sa mga miting sa Ang Simbahan ni Jesukristo sa mga Santos sa Ulahing mga Adlaw, kinsa ang mahimong mga miyembro sa Simbahan, ug kinsa ang makatambong sa templo.

38.1.1

Pagtambong sa mga Miting sa Simbahan

Ang Manluluwas mitudlo nga ang Iyang mga disipulo kinahanglang mahigugma sa ilang mga silingan (tan-awa sa Mateo 22:39). Si Pablo midapit sa bag-ong mga kinabig nga “dili na mga langyaw ug mga dumuloong, kondili mga katagilungsod sa mga balaan” (Mga Taga-Efeso 2:19). Ang Manluluwas mitudlo usab nga ang mga miyembro sa Simbahan kinahanglang dili “[mo]salikway ni bisan kinsa gikan sa … mga tigom diha sa publiko, nga gihimo sa atubangan sa kalibotan” (Doktrina ug mga Pakigsaad 46:3).

Ang tanan mahimong motambong sa panagtigom alang sa sakramento, sa ubang mga miting sa Dominggo, ug sa sosyal nga mga kalihokan sa Ang Simbahan ni Jesukristo sa mga Santos sa Ulahing mga Adlaw. Ang tigdumalang opisyal maoy responsable sa pagseguro nga ang tanan nga motambong matinahuron sa sagrado nga kahimtang.

Kadtong kinsa motambong kinahanglan nga maglikay nga makasamok o makabalda nga supak sa pagsimba o sa ubang mga katuyoan sa miting. Ang tanang kinahanglanon sa edad ug batasan sa nagkalain-laing mga miting ug mga kalihokan sa Simbahan kinahanglang tahuron. Kana nagkinahanglan nga pugngan ang sobrang romantiko nga batasan ug sininaan o pamustura nga makapabalda. Kana usab nagpugong sa paghimo og politikanhong mga pamahayag o pagsulti kabahin sa sekswal nga hilig o ubang personal nga mga kinaiya sa paagi nga makabalda sa mga miting nga nakatutok sa Manluluwas.

Kon adunay dili maayo nga batasan, ang bishop o ang presidente sa stake mohatag og pribado nga tambag pinaagi sa diwa sa gugma. Moawhag siya niadtong kansang batasan dili maayo alang sa okasyon sa pagtutok sa pagtabang nga magpadayon ang sagrado nga kahimtang alang sa tanan nga anaa uban sa espesyal nga paghatag og gibug-aton sa pagsimba sa Langitnong Amahan ug sa Manluluwas.

Ang mga meetinghouse [balay tigomanan] sa Simbahan magpabilin nga pribado nga kabtangan nga ubos sa mga palisiya sa Simbahan. Ang mga tawo nga dili andam nga mosunod niini nga mga lagda hangyoon sa matinahuron nga paagi nga dili motambong sa mga miting ug mga kalihokan sa Simbahan.

38.1.2

Pagkahimong Miyembro sa Simbahan

Ang pagkamiyembro diha sa Ang Simbahan ni Jesukristo sa mga Santos sa Ulahing mga Adlaw alang sa mga tawo kinsa “moduol uban ang masulub-on nga mga kasingkasing ug mahinulsulon nga mga espiritu,” “andam sa pagdala diha kanila sa ngalan ni Jesukristo,” ug magtinguha sa paghimo ug pagtuman sa sagrado nga mga pakigsaad sa bunyag (Doktrina ug mga Pakigsaad 20:37).

Alang sa bunyag sa menor de edad nga mga bata nga nag-edad og 8 ug pataas, tan-awa sa 38.2.8.2.

38.1.3

Pagsimba diha sa Templo

Ang mga templo mao ang balaan nga mga dapit sa pagsimba diin ang importante nga mga ordinansa madawat ug ang sagrado nga mga pakigsaad himoon. Ngadto sa mga miyembro sa Simbahan, ang mga templo mao ang mga balay sa Dios. Tungod sa kasagrado niini ug sa mga pakigsaad nga gihimo, ang mga miyembro lamang sa Simbahan nga adunay balido nga rekomend sa templo ang mahimong mosimba diha sa templo. Ang mga miyembro mahimong modawat og rekomend sa templo kon sila matinud-anong nagtuman sa gikinahanglan nga mga sugo ug nagsunod sa ebanghelyo ni Jesukristo. (Tan-awa sa kapitulo 26.)

38.1.4

Pag-apil ug mga Panalangin sa Wala Maminyo nga Miyembro

Ang tanang miyembro, bisan kon sila wala gayod maminyo o walay pamilya diha sa Simbahan, kinahanglan nga maningkamot alang sa sulundon nga pagpakabuhi diha sa usa ka mahangturong pamilya. Nagpasabot kini sa pagpangandam nga maselyo isip takos nga bana o asawa ug mahimong mapinanggaong amahan o inahan. Alang sa pipila, kini nga mga panalangin dili matuman hangtod sa sunod nga kinabuhi, apan ang katapusang tumong pareha alang sa tanan.

Ang matinud-anong mga miyembro kansang mga sirkumstansiya wala motugot kanila sa pagdawat sa mga panalangin sa mahangtorong kaminyoon ug pagkaginikanan niining kinabuhia makadawat sa tanang gisaad nga mga panalangin didto sa kahangtoran, kon gituman nila ang mga pakigsaad nga ilang gihimo ngadto sa Dios (tan-awa sa Mosiah 2:41).

38.1.5

Wala Makasal nga mga Ginikanan ubos sa Edad nga 18

Ang wala makasal nga batan-ong lalaki nga ubos sa edad nga 18 kinsa mahimo nang usa ka amahan mahimong moapil sa iyang korum sa Aaronic nga Pagkapari o sa korum sa mga elder. Kini nga desisyon anaa ra sa mainampoong paghukom sa batan-ong lalaki, sa iyang mga ginikanan, ug sa bishop.

Ang wala makasal nga batan-ong babaye nga ubos sa edad nga 18 kinsa mahimo nang usa ka inahan mahimong moapil sa Young Women o sa Relief Society. Kini nga desisyon anaa ra sa mainampoong paghukom sa batan-ong babaye, sa iyang mga ginikanan, ug sa bishop.

Sa paghimo niini nga desisyon, ang batan-on, mga ginikanan, ug ang mga lider mokonsiderar sa mosunod:

• Kon ang batan-on moapil sa mga klase ug mga kalihokan sa kabatan-onan, ang bata kinahanglan nga dili mouban kaniya.

• Ang mas hingkod nga batan-on kinsa mopili sa pagpadako sa bata mahimong makabenepisyo nga dawaton ngadto sa korum sa mga elder isip umaabot nga mga elder o ngadto sa Relief Society.

38.2

Mga Palisiya alang sa mga Ordinansa ug mga Panalangin

Kining seksiyon naghatag sa mga palisiya alang sa mga ordinansa ug mga panalangin. Ang pipila niining mga palisiya naglangkob og mga espesyal nga mga sirkumstansiya. Ang kinatibuk-ang impormasyon mahitungod sa mga ordinansa ug mga panalangin gihatag diha sa kapitulo 18. Ang impormasyon kabahin sa mga ordinansa sa templo gihatag diha sa mga kapitulo 27 ug 28.

38.2.1

Paghubad sa mga Ordinansa ug mga Panalangin ngadto sa Laing Pinulongan

Kini importante nga ang usa ka tawo nga modawat og usa ka ordinansa o panalangin makasabot kon unsa ang gisulti. Kon gikinahanglan, ang tigdumalang lider mahimong mohangyo og usa ka tawo sa paghubad sa ordinansa o panalangin ngadto sa pinulongan nga masabtan sa modawat. Kini naglakip sa paghubad og sinyas nga pinulongan [sign language].

Kon ang usa ka tawo nga nagdawat og usa ka ordinansa o panalangin bungol o maglisod sa pagdungog, siya mahimong mogamit og usa ka voice-to-text nga aplikasyon. Ang tawo nga bungol o maglisod sa pagdungog mahimo usab nga mogamit og tighubad sa sinyas nga pinulongan o usa ka voice-to-text nga aplikasyon aron masabtan ang mga panalangin nga gihatag ngadto sa mga sakop sa pamilya.

Alang sa impormasyon mahitungod sa sinulat nga mga hubad sa patriyarkal nga mga panalangin, tan-awa sa 38.2.10.5. Alang sa impormasyon mahitungod sa paghubad sa sinyas nga pinulongan kabahin sa patriyarkal nga mga panalangin, tan-awa sa 38.2.10.6.

38.2.2

Mga Litrato, mga Pagrekord, ug mga Transkripsiyon sa mga Ordinansa ug mga Panalangin

Ang mga ordinansa ug mga panalangin sagrado. Tungod niini nga rason, kinahanglan nga walay usa nga molitrato o morekord pinaagi sa video sa mga ordinansa, mga panalangin, o mga tulumanon sa bunyag.

Usa ka pamilya tingali mohimo og usa ka audio nga pagrekord ug transkripsiyon sa mga panalangin sa amahan. Kini nga mga panalangin gihulagway diha sa 18.14.1.

Ang patriyarkal nga mga panalangin gisulat. Aron sa pagpahiluna niini, ang patriyarka o ang iyang eskriba mohimo og usa ka audio nga pagrekord sa panalangin.

Ang ubang mga ordinansa ug mga panalangin dili mahimong irekord o isulat.

Alang sa impormasyon mahitungod sa pag-stream sa mga ordinansa, tan-awa sa 38.2.3.

38.2.3

Pagsibya sa mga Ordinansa

Kon mahimo, kadtong gusto nga motan-aw sa usa ka ordinansa kinahanglan maningkamot nga personal nga makatambong. Kon ang mga miyembro ug mga higala magpundok alang sa usa ka ordinansa, sila mobati sa impluwensiya sa Espiritu ug moabi-abi sa usag usa.

Apan, kon ang usa ka suod nga sakop sa pamilya dili personal nga makatambong, ang bishop o presidente sa stake mahimong motugot sa pagsibya sa ordinansa ngadto niya. Ang pagsibya gitugotan, sama pananglit, kon ang suod nga sakop sa pamilya:

• Nagpuyo sa hilit nga dapit o limitado ang abilidad sa pagbiyahe.

• Adunay mga hagit sa pisikal, mental, o emosyonal nga kahimsog.

• Talandogon ang panglawas [immunocompromised] o anaa sa usa ka pasilidad sa pag-atiman o sa ospital.

• Nagkinahanglan og paghubad sa sinyas nga pinulongan.

• Nagserbisyo og full-time nga misyon. (Ang pagtugot sa presidente sa misyon gikinahanglan.)

Ang bishop mahimong motugot sa pagsibya sa mga pagpanalangin sa batang masuso, mga bunyag, mga pagkompirma, ug mga pag-orden sa Aaronic nga Pagkapari. Ang presidente sa stake mahimong motugot sa pagsibya sa mga ordinasyon sa Melchizedek nga Pagkapari ug sa pag-set-apart sa mga misyonaryo.

Ang ordinansa sa sakramento dili isibya. Kon ang usa ka miting sa sakramento buhi nga gisibya, ang pagsibya kinahanglan hunongon atol sa pagpangalagad sa sakramento. Ang bishop mahimong motugot sa usa ka priest o naghupot sa Melchizedek nga Pagkapari sa pagpangalagad sa sakramento sa personal nga paagi ngadto niadtong kinsa dili makatambong sa miting (tan-awa sa 18.9.1

Ang mga pagsibya sa mga ordinansa kinahanglan dili makabalda sa Espiritu. Sa kinatibuk-an, usa lang ka himan ang kinahanglan nga gamiton. Kini pagadumalaon sa espesyalista sa teknolohiya sa ward o sa stake. Ang himan ug ang tawo nga naggamit niini kinahanglan nga dili dayag.

Ang mga pagsibya sa mga ordinansa kinahanglan i-delete sulod sa usa ka adlaw human sa ordinansa.

38.2.4

Mga Ordinansa alang Niadtong Adunay Intelektuwal nga mga Kakulangan

Kon magkonsiderar sa pagpahigayon og mga ordinansa alang sa tawo nga adunay intelektuwal nga kakulangan, ang indibidwal, ang iyang mga ginikanan o mga tigbantay (kon aduna), ug ang mga lider magtinambagay. Sila mainampoon nga mokonsiderar sa tinguha sa tawo ug sa ang-ang sa panabot. Ang mga ordinansa kinahanglan dili pugngan kon ang tawo takos, gustong makadawat niini, ug magpakita og igong responsibilidad ug pagkamaytulubagon.

Ang bishop magpakitambag sa presidente sa stake kon siya adunay mga pangutana mahitungod sa piho nga mga tawo. Ang presidente sa stake mahimong mokontak sa Buhatan sa Unang Kapangulohan kon gikinahanglan.

Ang mga indibidwal kansang mga kakulangan dili makapahimo nila nga may tulubagon “maluwas diha sa celestial nga gingharian sa langit” (Doktrina ug mga Pakigsaad 137:10). Tungod niini nga rason, ang mga ordinansa wala kinahanglana o dili ipahigayon alang kanila. Ang bugtong nga eksepsiyon mao ang pagselyo ngadto sa mga ginikanan alang niadtong wala matawo diha sa pakigsaad.

Alang sa impormasyon mahitungod sa pagpahigayon og mga ordinansa alang niadtong adunay intelektuwal nga mga kakulangan, tan-awa ang mosunod:

• Alang sa bunyag ug kompirmasyon, 38.2.8.1

• Alang sa ordinasyon ngadto sa katungdanan sa pagkapari, 38.2.9.7

• Alang sa patriyarkal nga panalangin, 38.2.10.1

• Alang sa pagtuga ug pagselyo diha sa templo, 27.2.1.3 ug 27.3.1.2

38.2.5

Mga Ordinansa ug mga Pagpanalangin nga Ipahigayon pinaagi ug alang Niadtong Kinsa Adunay Pisikal nga mga Kakulangan

Ang mga tawo nga adunay pisikal nga mga kakulian, sama sa pagkawagtang sa mga kasway [limbs], paralisis, o pagkabungol o may kakulian sa pandungog, mahimong mopahigayon ug modawat sa mga ordinansa ug mga panalangin. Ang mga lider mohan-ay aron kini nga mga tawo makaapil kutob sa mahimo. Kon ang mga lider adunay mga pangutana nga dili nila masulbad, ang presidente sa stake mokontak ngadto sa Buhatan sa Unang Kapangulohan.

Ang mga tawo nga bungol o adunay kakulian sa pandungog mahimong makigsulti pinaagi sa pagsinyas kon magpahigayon o magdawat og usa ka ordinansa o panalangin. Ang lider sa pagkapari nga nagdumala sa usa ka ordinansa moseguro nga ang midawat makasabot niini pinaagi sa usa ka tighubad o sa laing mga paagi (tan-awa 38.2.1).

38.2.6

Pagpabalido o Pagmatuod sa mga Ordinansa

Ang impormasyon sa ubos naghatag og mga rason nga ang usa ka ordinansa dili mahimong balido. Gihulagway usab niini kon unsaon sa pagpabalido o pagmatuod sa ordinansa.

Sa uban nga mga sitwasyon, ang usa ka ordinansa kinahanglan ipahigayon pag-usab. Kon kini mahitabo, ang usa ka klerk morekord sa bag-ong petsa sa rekord sa pagkamiyembro, bisan kon kini wala nasunod sa mga petsa sa uban nga mga ordinansa.

38.2.6.1

Rekord sa Pagkamiyembro Wala Gihimo o Walay Tuig o Sayop ang Tuig

Alang sa katuyoan sa pagtipig og rekord, ang usa ka ordinansa gikonsiderar nga dili balido kon ang tuig sa pagpahigayon niini wala o dili husto diha sa rekord sa pagkamiyembro. Agi og dugang, ang usa ka bunyag dili balido kon ang rekord sa pagkamiyembro wala gihimo. Ang ordinansa mahimong ipabalido gamit ang orihinal nga sertipiko nga gi-isyu sa dihang ang ordinansa gipahigayon. Gamit niining sertipiko, ang bishop makahatag og pagtugot sa usa ka klerk sa pag-update sa rekord sa pagkamiyembro.

Kon ang sertipiko dili makit-an, ang ordinansa mahimong mapabalido gamit ang pagpamatuod sa duha ka tawo kinsa misaksi niini. Ang duha ka saksi kinahanglan nga:

• Nag-edad og 8 anyos o pataas sa dihang ang ordinansa gipahigayon.

• Nakit-an o nadungog ang ordinansa.

• Mga member of record na sa Simbahan sa panahon nga sila mihatag sa ilang testimonya.

• Mohatag sa ilang pagpamatuod pinaagi sa pagsulat niini, nga nagsaysay (1) sa kompleto nga petsa diin ang ordinansa gipahigayon o (2) sa tuig nga kini gipahigayon ug sa tawo nga mipahigayon niini.

• Mopirma sa ilang pagpamatuod diha sa atubangan sa sakop sa bishopric o sa kapangulohan sa stake.

Gamit niining pagpamatuod, ang bishop makahatag og pagtugot sa usa ka klerk sa paghimo o pag-update sa rekord sa pagkamiyembro. Ang sinulat nga testimonya mahimo na dayon nga sunugon.

Kon ang sertipiko o mga saksi dili makit-an, ang ordinansa kinahanglan nga ipahigayon pag-usab.

Kon ang miyembro nakadawat na sa ubang mga ordinansa human sa dili balido nga ordinansa, kinahanglan gayod kining paaprobahan sa Unang Kapangulohan. Sa paghangyo niini, ang presidente sa stake mopadala og sulat ngadto sa Buhatan sa Unang Kapangulohan.

38.2.6.2

Mga Ordinansa nga Nadawat sa Dili Husto nga Pagkahan-ay

Ang ordinansa dili balido kon ang tawo midawat niini sa dili husto nga pagkahan-ay. Sama pananglit, ang pagtuga sa usa ka lalaki dili balido kon siya nakadawat niini nga wala pa makadawat sa Melchizedek nga Pagkapari. Hinoon, ang Unang Kapangulohan mahimong moratipika [mouyon] sa maong ordinansa. Sa paghangyo niini, ang presidente sa stake mopadala og sulat ngadto sa Buhatan sa Unang Kapangulohan.

38.2.6.3

Ang Ordinansa Gipahigayon sa Wala Pa ang Hustong Edad

Ang ordinansa dili balido kon kini gipahigayon nga dili pa husto ang edad. Sama pananglit, ang bunyag dili balido kon kini gipahigayon nga ang tawo wala pa mag-edad og 8.

Kon walay laing mga ordinansa nga nadawat human sa dili balido nga ordinansa, kini kinahanglang ipahigayon pag-usab. Kon ang uban nga mga ordinansa nadawat na, kadto ug ang dili balido nga ordinansa kinahanglan gayod paaprobahan sa Unang Kapangulohan. Sa paghangyo niini, ang presidente sa stake mopadala og sulat ngadto sa Buhatan sa Unang Kapangulohan.

38.2.6.4

Ang Ordinansa Gipahigayon nga Walay Tukmang Awtoridad

Ang usa ka ordinansa dili balido kon kini gipahigayon pinaagi sa usa ka tawo nga walay tukma nga awtoridad sa pagkapari. Sama pananglit, ang kompirmasyon dili balido kon kini gipahigayon pinaagi sa usa ka tawo nga wala naghupot sa Melchizedek nga Pagkapari. Sa samang paagi, kini dili balido kon ang tawo nga nagpahigayon niini nakadawat sa Melchizedek nga Pagkapari sa dili husto nga pagkahan-ay ug walay tukma nga pagtugot (tan-awa sa 38.2.6.2; tan-awa usab sa 32.17).

Kon walay laing mga ordinansa nga nadawat human sa dili balido nga ordinansa, kini kinahanglang ipahigayon pag-usab pinaagi sa tawo nga adunay tukma nga awtoridad. Kon ang uban nga mga ordinansa nadawat na, kadto ug ang dili balido nga ordinansa kinahanglan gayod paaprobahan sa Unang Kapangulohan. Sa paghangyo niini, ang presidente sa stake mopadala og sulat ngadto sa Buhatan sa Unang Kapangulohan. Sa uban nga mga kahimtang, ang Unang Kapangulohan mahimong magsugo nga ang mga ordinansa ipahigayon pag-usab.

38.2.7

Paghatag og Ngalan ug Panalangin sa mga Bata

Alang sa kinatibuk-ang impormasyon mahitungod sa paghatag og ngalan ug panalangin sa mga bata, tan-awa sa 18.6.

38.2.7.1

Mga Masuso nga Grabe nga Nasakit

Kon ang bag-ong natawo nga masuso grabe nga nasakit, usa ka naghupot sa Melchizedek nga Pagkapari mahimong mopahigayon sa paghatag og ngalan ug panalangin diha sa ospital o sa panimalay. Siya dili magkinahanglan og pagtugot gikan sa bishop. Human sa paghatag sa panalangin, siya mopahibalo dayon sa bishop aron mahimoan og rekord sa pagkamiyembro ang bata.

38.2.7.2

Mga Anak Kansang mga Ginikanan Wala Maminyo (Lakip sa Nadeborsiyo)

Ang usa ka bata mahimong mapanalanginan kon ang bishop makakuha og berbal nga pagtugot gikan sa mga ginikanan o mga tigbantay. Ang pagtugot wala gikinahanglan gikan sa usa ka ginikanan o tigbantay nga walay legal nga basihanan alang sa pagsupak sa panalangin.

38.2.7.3

Mga Anak Kansang mga Ginikanan Dili Mga Miyembro sa Simbahan

Usahay ang usa ka ginikanan sa bata o mga tigbantay mohangyo nga ang bata mahimong mapanalanginan bisan og sila dili mga miyembro sa Simbahan. Kon kini mahitabo, ang bishop mokuha og berbal nga pagtugot gikan sa mga ginikanan o mga tigbantay. Ang pagtugot wala gikinahanglan gikan sa usa ka ginikanan o tigbantay nga walay legal nga basihanan alang sa pagsupak sa panalangin.

Ang bishop mopasabot nga:

• Usa ka rekord sa pagkamiyembro himoon alang sa bata.

• Ang mga miyembro sa ward mokontak kanila sa matag karon ug unya.

• Siya o uban nga mga lider sa ward mosugyot nga ang bata mag-andam nga mabunyagan kon siya hapit na moedad og 8.

38.2.8

Bunyag ug Pagkompirma

Alang sa kinatibuk-ang impormasyon mahitungod sa bunyag ug kompirmasyon, tan-awa sa 18.7 ug 18.8.

38.2.8.1

Mga Tawo nga Adunay Intelektuwal nga mga Kakulangan

Ang usa ka tawo nga adunay intelektuwal nga kakulangan mahimong mabunyagan ug makompirmahan kon siya makataronganong maisip nga adunay tulubagon. Siya kinahanglan nga makasabot ug makahupot sa mga pakigsaad sa bunyag.

Ang bishop ang naghupot sa mga yawe alang sa bunyag sa tawo kon siya:

• Usa ka miyembro diha sa rekord nga nag-edad og 8 pataas.

• Nag-edad og 8 ug adunay bisan usa nga ginikanan o tigbantay nga miyembro (tan-awa sa 18.7.1.1).

Ang tawo, iyang mga ginikanan o mga tigbantay (hain man ang magamit), ug ang bishop magtinambagay sa usag usa aron sa pagtino kon ang tawo kinahanglan ba nga bunyagan ug kompirmahan.

Kon ang tawo usa ka potensiyal nga kinabig, ang presidente sa misyon ang naghupot sa mga yawe alang sa iyang bunyag (tan-awa sa 18.7.1.2). Niining sitwasyon, ang misyonaryo mopahibalo sa presidente sa misyon. Siya makigtambag sa tawo ug sa iyang mga ginikanan o mga tigbantay (hain man ang magamit) aron sa pagtino kon siya angay ba nga mabunyagan o makompirmahan. Kon ang bishop nasinati og maayo sa tawo, ang presidente sa misyon mahimo usab nga mangayo sa iyang ikasulti.

Kadtong kinsa walay tulubagon dili kinahanglan nga bunyagan, bisan pila pa ang edad (tan-awa sa Doktrina ug mga Pakigsaad 29:46–50 ug 38.2.4 niining tamdanan nga basahon).

Alang sa impormasyon mahitungod sa mga rekord sa pagkamiyembro sa mga tawo nga posible nga walay tulubagon, tan-awa sa 33.6.10.

38.2.8.2

Mga Menor de Edad

Ang usa ka menor de edad, sigon sa gitino sa lokal nga mga balaod, mahimo lamang bunyagan kon ang duha sa mosunod nga mga kondisyon matuman:

1. Ang mga ginikanan o legal nga mga tigbantay mohatag og pagtugot. Ang pagtugot wala gikinahanglan gikan sa usa ka ginikanan o tigbantay nga walay legal nga basihanan alang sa pagsupak sa bunyag. Ang mga eksepsiyon magkinahanglan og pagtugot sa Unang Kapangulohan.

   Ang tawo nga mopahigayon sa interbiyo sa bunyag ug kompirmasyon mangayo alang niining pagtugot nga isulat kon siya mobati nga kini makatabang aron paglikay sa mga dili pagsinabtanay. Sa uban nga dapit, ang sinulat nga pagtugot gikinahanglan. Ang misyon ug ang mga lider sa area makahatag og giya.

   Ang mga ginikanan o mga tigbantay kinahanglang makasabot sa doktrina nga itudlo ngadto sa bata. Sila kinahanglan usab nga andam nga mosuporta sa bata diha sa paghimo ug pagtuman sa mga pakigsaad sa bunyag.

2. Ang tawo nga mopahigayon sa interbiyo mosabot nga ang bata nakasabot sa pakigsaad sa bunyag. Siya kinahanglan mobati og kamasaligon nga ang bata maningkamot sa pagtuman niining pakigsaad pinaagi sa pagsunod sa mga sugo, lakip sa pagtambong sa mga miting sa Simbahan.

Kon ang usa ka bata magdala sa apilyedo sa iyang ama-ama, ang bata mahimong mabunyagan ug makompirmahan niana nga ngalan. Tinuod kini bisan kon siya wala gisagop sa pormal nga paagi. Hinoon, ang legal nga ngalan sa bata, sumala sa gilatid sa lokal nga balaod o kustombre, kinahanglang irekord diha sa rekord sa pagkamiyembro ug sa sertipiko sa bunyag ug kompirmasyon.

38.2.8.3

Mga Tawo nga Minyo

Ang usa ka minyo nga tawo kinahanglan gayod nga uyonan sa iyang kapikas sa dili pa bunyagan ug kompirmahan.

38.2.8.4

Mga Tawo Nga Nagpuyo-puyo

Ang usa ka magtiayon nga nagtipon apan wala makasal gikinahanglan gayod nga mosunod sa balaod sa kaputli sa dili pa ang bisan hain nila mabunyagan. Naglakip kini sa pagpakita og hugot nga pagtuo ngadto sa paghinulsol sama sa gihulagway diha sa Doktrina ug mga Pagkigsaad 20:37. Naglakip usab kini sa pag-undang sa pagtipon o, sa sitwasyon sa usa ka lalaki ug usa ka babaye, magminyo.

38.2.8.5

Mga Tawo Kansang Pagkamiyembro sa Simbahan Gibakwi o Kinsa Miluwat sa Pagkamiyembro

Ang mga tawo kansang pagkamiyembro sa Simbahan gibakwi o kinsa ang pagkamiyembro giluwat mahimong dawaton pag-usab pinaagi sa bunyag ug kompirmasyon. Sila dili ikonsiderar nga mga kinabig. Ang mga misyonaryo dili na mointerbiyo nila alang sa bunyag. Alang sa mga instruksiyon, tan-awa sa 32.16.

38.2.8.6

Mga Sitwasyon Nga Nagkinahanglan og Pagtugot gikan sa Presidente sa Misyon o Unang Kapangulohan

Ang pagtugot gikan sa presidente sa misyon gikinahanglan sa dili pa ang usa ka tawo mahimong bunyagan kon siya kaniadto:

• Nakahimo og bug-at nga krimen (tan-awa sa 38.2.8.7).

• Miapil diha sa usa ka aborsiyon (tan-awa sa 38.6.1).

Niini nga mga sitwasyon, ang presidente sa misyon mointerbiyo sa tawo. Kon gikinahanglan, ang presidente sa misyon mahimong motugot sa usa sa iyang mga magtatambag nga mopahigayon sa interbiyo. Siya mohatag niini nga pagtugot sa managlahi nga paagi alang sa matag interbiyo. Ang magtatambag nga mopahigayon niini mo-report ngadto sa presidente sa misyon, kinsa nianang higayona mahimong mohatag og pagtugot sa bunyag o kompirmasyon o modumili niini.

Ang pagtugot gikan sa Unang Kapangulohan gikinahanglan sa dili pa ang usa ka tawo mahimong bunyagan ug kompirmahan kon siya:

• Nakahimo sa pagpatay (tan-awa sa 38.2.8.7).

• Nakombikto sa usa ka krimen nga naglambigit og sekswal nga kalapasan (tan-awa sa 38.2.8.7).

• Sa kasamtangan anaa sa legal nga temporaryong kagawasan [probation] o parole tungod sa usa ka bug-at nga krimen o kalapasan (kasagaran adunay silot nga usa ka tuig sa prisohan o mas dugay pa) o bisan unsa nga krimen nga naglambigit og sekswal nga kalapasan (tan-awa sa 38.2.8.7).

• Nalambigit sa dinaghan nga kaminyoon (tan-awa sa 38.2.8.8).

Alang sa giya mahitungod sa pagbunyag ug pagkompirma sa mga indibidwal nga mikonsiderar sa ilang kaugalingon isip transgender, tan-awa sa 38.2.8.9.

Kon ang tawo magtinguha nga magpabunyag sa unang higayon, ang presidente sa misyon ang mointerbiyo niya. Kon iyang makita ang tawo nga takos ug kon siya morekomendar nga bunyagan, siya mosumiter og hangyo alang sa pagtugot ngadto sa Unang Kapangulohan gamit ang LCR.

Kon ang tawo usa ka kanhi miyembro nga nagtinguha nga dawaton pag-usab, ang bishop ug presidente sa stake ang mointerbiyo niya. Sila mosunod sa mga instruksiyon diha sa 32.16. Kon ilang masuta nga ang tawo takos ug morekomendar og bunyag, ang presidente sa stake mosumiter og hangyo ngadto sa Unang Kapangulohan gamit ang LCR.

Ang bisan unsa nga hangyo ngadto sa Unang Kapangulohan kinahanglang maglakip sa tanang may kalabotan nga mga detalye sigon sa gitino sa mga interbiyo.

Tan-awa sa 6.2.3 mahitungod sa responsibilidad sa presidente sa stake (o misyon) kon magsumiter og mga aplikasyon ngadto sa Unang Kapangulohan.

38.2.8.7

Mga Tawo nga Nakombikto sa mga Krimen

Ang mga tawo kinsa nakombikto sa mga krimen dili mahimong bunyagan hangtod ilang makompleto ang ilang mga termino sa pagkabilanggo. Mao usab kini alang sa mga kinabig ug alang niadtong nagtinguha nga dawaton pag-usab.

Ang mga tawo nga nakombikto og mga salaod o bisan unsa nga mga krimen nga naglambigit og sekswal nga kalapasan dili mahimong bunyagan ug kompirmahan hangtod nga sila usab makakompleto sa ilang mga termino sa pagsulay o parole. Ang Unang Kapangulohan lamang ang mahimong mohatag og usa ka eksepsiyon (tan-awa sa 38.2.8.6). Kini nga mga tawo giawhag sa pakigtambayayong gayod uban sa lokal nga mga lider sa pagkapari. Sila maningkamot sa pagbuhat sa tanan nga ilang mahimo aron madawat ang tabang sa Manluluwas aron mamahimong takos sa bunyag ug kompirmasyon.

Ang full-time nga mga misyonaryo dili motudlo sa mga tawo nga anaa sa prisohan o bilanggoan.

Ang tawo kinsa nakombikto sa pagpatay o usa ka krimen nga naglambigit og sekswal nga kasaypasan dili mahimong bunyagan gawas kon ang Unang Kapangulohan mohatag og pagtugot (tan-awa sa 38.2.8.6). Ingon man usab ang tawo nga mikompisal nga nakapatay bisan kon pribado nga gihimo ang pagkompisal ngadto sa usa ka lider sa pagkapari. Sama sa gigamit dinhi, ang pagpatay wala maglakip sa aborsiyon o aksiyon diha sa linya sa katungdanan sa polisya o militar.

Kon ang tawo magtinguha nga magpabunyag sa unang higayon, ang presidente sa misyon mosunod sa mga instruksiyon diha sa 38.2.8.6. Kon ang tawo usa ka kanhi miyembro nga nagtinguha nga dawaton pag-usab, ang bishop ug presidente sa stake mosunod sa mga instruksiyon sa sama nga seksiyon (tan-awa sa 32.16

38.2.8.8

Mga Hamtong nga Nalambigit sa Dinaghan nga Kaminyoon

Ang usa ka hamtong nga kaniadto nag-awhag, nagtudlo, o nalambigit diha sa dinaghan nga kaminyoon kinahanglan gayod nga makadawat og pagtugot gikan sa Unang Kapangulohan sa dili pa siya bunyagan.

Kon ang tawo magtinguha nga magpabunyag sa unang higayon, ang presidente sa misyon mosunod sa mga instruksiyon diha sa 38.2.8.6. Kon ang tawo usa ka kanhi miyembro nga nagtinguha nga dawaton pag-usab, ang bishop ug presidente sa stake mosunod sa mga instruksiyon diha sa 38.2.8.6 (tan-awa usab sa 32.16).

Ang hangyo kinahanglan maghulagway sa kaagi nga kalambigitan sa tawo diha sa dinaghan nga kaminyoon. Kini kinahanglan usab nga maghulagway sa iyang paghinulsol ug sa kasamtangan nga sitwasyon sa pamilya.

38.2.8.9

Mga Indibidwal nga Mikonsiderar sa Ilang Kaugalingon isip Transgender

Ang mga bunyag ug kompirmasyon nadawat sumala sa biyolohikanhong natawhang sekso sa usa ka tawo. Ang takos nga mga indibidwal nga wala mopadayon sa pagpaopera, medikal, o sosyal nga kausaban sa ilang biyolohikanhong natawhang sekso mahimong mabunyagan ug makompirmahan. (Alang sa kahulogan sa sosyal nga kausaban, tan-awa sa 38.6.23.)

Bisan unsang mga eksepsiyon niini nga palisiya magkinahanglan og pagtugot sa Unang Kapangulohan. Sa pagpangayo og pagtugot, ang presidente sa misyon, o ang presidente sa stake alang sa usa ka otso anyos, mointerbiyo sa tawo. Kon iyang mahibaloan nga ang tawo takos ug kon siya morekomendar og bunyag ug kompirmasyon, siya mosumiter og hangyo alang sa pagtugot ngadto sa Unang Kapangulohan gamit ang LCR.

Kon ang Unang Kapangulohan motugot sa bunyag ug kompirmasyon, ang tawo dili mahimong makadawat sa pagkapari, rekomend sa templo, o uban nga mga calling sa Simbahan samtang anaa niini nga kausaban. Hinuon, ang indibidwal mahimong moapil diha sa Simbahan sa ubang mga paagi.

Ang mga indibidwal nga naghimo og kausaban ug dayon mibalik ngadto sa ilang biyolohikanhong natawhang sekso ug takos ug mapasaligon sa pagtuman sa mga sugo sa Dios mahimong bunyagan ug kompirmahan.

Ang mga presidente sa misyon o mga presidente sa stake alang sa otso anyos, motabang sa indibidwal nga mga sitwasyon uban sa kasensitibo ug Kristohanong gugma. Mangayo sila og tambag gikan sa Kapangulohan sa Area.

Alang sa dugang nga impormasyon, tan-awa sa 38.6.23.

38.2.9

Pag-orden sa Pagkapari

Alang sa kinatibuk-an nga impormasyon mahitungod sa mga ordinasyon sa pagkapari, tan-awa sa 18.10.

38.2.9.1

Bag-ong mga Miyembro

Kon ang usa ka igsoong lalaki gibunyagan ug gikompirma, siya angayan nga maorden ngadto sa usa ka katungdanan diha sa Aaronic nga Pagkapari kon siya nag-edad og labing minus 12 anyos sa pagtapos sa tuig. Ang bishop mointerbiyo kaniya sa dili madugay human sa iyang kompirmasyon, kasagaran sulod sa usa ka semana. Ang usa sa sakop sa bishopric mopresentar kaniya diha sa miting sa sakramento aron ang mga miyembro sa ward makapaluyo sa iyang gisugyot nga ordinasyon (tan-awa sa 18.10.3). Siya mahimo na dayon nga i-orden ngadto sa tukma nga katungdanan:

• Deacon, kon siya mag-edad na og 12 o 13 sa kataposan sa tuig

• Teacher, kon siya mag-edad na og 14 o 15 sa kataposan sa tuig

• Priest, kon siya mag-edad og 16 o pataas sa kataposan sa tuig; kon siya 19 o pataas, siya ikonsiderar usab nga usa ka umaabot nga elder (tan-awa sa 38.2.9.3)

Ang usa ka bag-ong miyembro angayan aron modawat sa Melchizedek nga Pagkapari ug mahimong maorden nga usa ka elder kon siya:

• Nag-edad og 18 o pataas.

• Nagserbisyo isip usa ka priest (walay piho nga gidugayon nga gikinahanglan).

• Adunay igong pagsabot sa ebanghelyo.

• Nakapakita og katakos.

Ang bag-ong bunyag nga mga igsoong lalaki dili iorden sa adlaw nga sila gibunyagan o gikompirma. Sila una gikinahanglan nga mainterbiyo sa bishop ug paluyohan sa mga miyembro sa ward.

Ang mga bunyag sa mga sakop sa pamilya kinahanglang dili ilangay aron ang amahan makadawat sa pagkapari ug makapahigayon mismo sa mga bunyag.

38.2.9.2

Batan-ong Lalaki Kansang mga Ginikanan Wala Maminyo (Lakip sa Nadeborsiyo)

Usa ka batan-ong lalaki mahimong maorden ngadto sa mga katungdanan sa Aaronic nga Pagkapari kon ang bishop makakuha og berbal nga pagtugot gikan sa mga ginikanan o tigbantay. Ang pagtugot wala gikinahanglan gikan sa usa ka ginikanan o tigbantay nga walay legal nga basihanan alang sa pagsupak sa pag-orden.

Kon ang usa ka batan-ong lalaki naggamit sa apilyedo sa iyang ama-ama, siya mahimong iorden ngadto niana nga ngalan. Mahimo kini bisan kon siya wala gisagop sa pormal nga paagi. Hinoon, ang legal nga ngalan sa batan-on, sigun sa gitino sa lokal nga balaod o kustombre, kinahanglang irekord diha sa rekord sa sertipiko sa ordinasyon.

38.2.9.3

Umaabot nga mga Elder

Ang usa ka umaabot nga elder usa ka lalaki nga miyembro sa Simbahan nga nag-edad og 19 o pataas nga wala maghupot sa Melchizedek nga Pagkapari. Ang minyo nga mga lalaki nga mas bata sa 19 anyos ug wala maghupot sa Melchizedek nga Pagkapari umaabot usab nga mga elder.

Ubos sa direksiyon sa bishop, ang kapangulohan sa korum sa mga elder makigtambayayong gayod sa umaabot nga mga elder aron sa pagtabang kanila nga maandam sa pagdawat sa Melchizedek nga Pagkapari. Kon ang umaabot nga elder dili pa usa ka priest, kinahanglan siyang i-orden dayon nga priest kon siya takos. Dili na siya kinahanglang i-orden una nga deacon o teacher. Mahimo siyang i-orden nga elder kon nakapalambo na siya og igong panabot bahin sa ebanghelyo ug nakapakita sa iyang katakos. Ang bishop ug presidente sa stake mointerbiyo kaniya kon unsaon sa paghimo niini nga pagtino (tan-awa sa 31.2.6).

Alang sa dugang nga impormasyon mahitungod sa pagtabang sa umaabot nga mga elder nga maandam sa pagdawat sa Melchizedek nga Pagkapari, tan-awa sa 8.4.

38.2.9.4

Kaigsoonan nga mga Lalaki Kinsa Mibalhin og mga Ward sulod sa Milabay nga Tuig

Usahay ang usa ka igsoong lalaki nga nagpuyo sa usa ka ward nga wala pa moabot og usa ka tuig magkinahanglan o magtinguha nga maorden ngadto sa usa ka katungdanan sa Melchizedek nga Pagkapari. Niana nga sitwasyon, ang bishop o usa ka gisangonan nga magtatambag mokontak sa kanhi nga bishop aron sa pagpangutana kon aduna bay problema bahin sa katakos nga kinahanglang ikonsiderar. Kon ang usa ka magtatambag masayod nga adunay kompidensiyal nga impormasyon, iyang taposon ang panag-istoryahanay. Siya mopahibalo sa iyang bishop sa pagkontak sa kanhi bishop sa dili pa mopahigayon sa interbiyo.

38.2.9.5

Kalalakin-an diha sa Young Single Adult ug sa Single Adult nga mga Ward

Ang takos nga kalalakin-an nga nag-edad og 18 pataas diha sa mga ward sa mga young single adult ug mga ward sa single adult kinahanglang i-orden nga mga elder. Kadtong kinsa wala ma-orden nga mga elder kabahin sa korum sa mga elder isip umaabot nga mga elder.

38.2.9.6

Mga Sundalo diha sa Panggubatan o sa Hilit nga mga Dapit

Ang usa ka sundalo sa kasagaran interbiyohon ug ordinahan diha sa ward nga anaa ang iyang rekord sa pagkamiyembro. Hinoon, mahimong dili kini posible kon ang sundalo anaa sa dagat sulod sa dugay-dugay na nga panahon o nagserbisyo diha sa panggubatan o hilit nga dapit. Sa maong mga sitwasyon, ang sundalo makigkita sa iyang lider sa grupo sa mga miyembro nga sundalo. Kon ang lider sa grupo mobati nga ang sundalo andam na nga i-orden, mohatag siya og usa ka sinulat nga rekomendasyon ngadto sa tigdumalang lider sa yunit sa Simbahan nga nagdumala sa grupo sa mga miyembro nga sundalo. (Kon walay ingon niana nga usa ka yunit sa Simbahan, siya mohatag sa rekomendayon ngadto sa Kapangulohan sa Area.) Kana nga lider mokontak sa bishop sa kaugalingong ward sa sundalo sa pagmatuod sa katakos sa tawo.

Alang sa ordinasyon ngadto sa mga katungdanan sa Aaronic nga Pagkapari, ang tigdumalang lider mahimong motugot sa lider sa grupo o chaplain nga Santos sa Ulahing mga Adlaw sa pag-interbiyo sa tawo ug sa pagdumala sa ordinasyon. Alang sa ordinasyon ngadto sa katungdanan sa elder, ang presidente sa stake, ang presidente sa misyon, o ang Kapangulohan sa Area mahimong mohatag og pagtugot sa usa ka chaplain nga Santos sa Ulahing mga Adlaw sa pag-interbiyo sa tawo ug sa pagdumala sa ordinasyon. Ang tanang ordinasyon kinahanglang mapaluyohan o maaprobahan sama sa gipasabot diha sa 18.10.3.

38.2.9.7

Kalalakin-an nga Adunay Intelektuwal nga mga Kakulian

Ang usa ka lalaki nga miyembro sa Simbahan kinsa adunay intelektuwal nga kakulangan, ang iyang mga ginikanan (kon aduna), ug ang bishop magtinambagay mahitungod kon siya kinahanglan ba nga makadawat sa pagkapari. Sila motambag mahitungod sa iyang mga tinguha ug kon siya adunay sukaranang pagsabot sa pagkapari ug sa iyang mga responsibilidad.

Ang mga naghupot sa pagkapari nga adunay ingon nga mga kakulangan kinahanglang abagan aron sila makatuman sa hingpit sa mga katungdanan sa pagkapari kutob sa mahimo.

38.2.9.8

Kalalakin-an nga Gidawat Pag-usab pinaagi sa Bunyag ug Kompirmasyon

Kon ang usa ka lalaki kinsa wala matugahi kaniadto gidawat pag-usab ngadto sa bunyag ug kompirmasyon sa Simbahan, siya mahimong maorden dayon pagkahuman. Siya maorden ngadto sa katungdanan sa pagkapari nga iyang gihuptan sa dihang ang iyang pagkamiyembro gibakwi o giluwat.

Kon ang tawo kanhiay na nga natugahan, siya dili maorden ngadto sa usa ka katungdanan sa pagkapari. Hinoon, ang iyang kanhi katungdanan ipahiuli pinaagi sa ordinansa sa pagpahiuli sa mga panalangin.

Alang sa dugang nga impormasyon ug mga instruksiyon, tan-awa sa 32.17.

38.2.9.9

Mga Indibidwal nga Mikonsiderar sa Ilang Kaugalingon isip Transgender

Ang ordinasyon ngadto sa pagkapari dawaton sumala sa biyolohikanhong natawhang sekso sa usa ka tawo. Ang usa ka takos nga lalaki nga miyembro sa Simbahan nga wala mopadayon sa paghimo sa pagpaopera, medikal, o sosyal nga kausaban sa iyang biyolohikanhong natawhang sekso mahimong modawat ug mogamit sa pagkapari. (Alang sa kahulogan sa sosyal nga kausaban, tan-awa sa 38.6.23.)

Ang mga miyembro nga lalaki nga naghimo og kausaban ug dayon mibalik ngadto sa ilang biyolohikanhong natawhang sekso ug takos ug mapasaligon nga motuman sa mga sugo sa Dios mahimong makadawat ug mogamit sa pagkapari.

Ang mga bishop magpakitambag sa presidente sa stake sa pagtabang sa indibidwal nga mga sitwasyon uban sa kasensitibo ug Kristohanong gugma. Ang mga presidente sa stake ug misyon mangayo og tambag gikan sa Kapangulohan sa Area.

Alang sa dugang nga impormasyon, tan-awa sa 38.6.23.

38.2.10

Patriyarkal nga mga Panalangin

Alang sa kinatibuk-an nga impormasyon mahitungod sa mga patriyarkal nga mga panalangin, tan-awa sa:

• Seksiyon 18.17 niining tamdanan nga basahon.

• Impormasyon ug mga Sugyot alang sa mga Patriyarka.

• Tibuok Kalibotan nga Miting sa Pagbansay sa Pagpangulo: Ang Patriyarka.

38.2.10.1

Mga Miyembro Kinsa Adunay Intelektuwal nga Kakulangan

Ang usa ka miyembro kinsa adunay intelektuwal nga kakulangan , ang iyang mga ginikanan o mga tigbantay (kon aduna), ug ang bishop magtinambagay mahitungod kon siya kinahanglan ba makadawat og patriyarkal nga panalangin. Sila mokonsiderar sa mga gitinguha sa mga miyembro ug kon siya adunay sukaranang abilidad sa pagsabot sa panalangin. Kon mao, ang usa ka sakop sa bishopric mahimo usab nga moisyu og usa ka Rekomend sa Patriyarkal nga Panalangin. Ang mga instruksiyon anaa sa 18.17.

38.2.10.2

Mga Misyonaryo

Ang usa ka patriyarkal nga panalangin mahimong usa ka tinubdan sa espirituwal nga kalig-on alang sa usa ka misyonaryo. Kon mahimo, ang miyembro kinahanglan makadawat og usa ka patriyarkal nga panalangin sa dili pa magsugod ang misyonaryo nga pagserbisyo. Kon kini dili posible, siya mahimong makadawat og usa ka patriyarkal nga panalangin atol sa iyang misyon. Ang presidente sa misyon mointerbiyo sa misyonaryo ug moandam og usa ka Rekomend sa Patriyarkal nga Panalangin. Ang mga instruksiyon anaa sa 18.17.

Ang usa ka misyonaryo kinsa anaa sa missionary training center (MTC) mahimong modawat lamang og patriyarkal nga panalangin kon anaa ang tanan sa mosunod:

• Ang misyonaryo nagagikan sa usa ka dapit diin walay patriyarka nga makahimo sa paghatag og panalangin sa lumad nga pinulongan sa misyonaryo.

• Ang misyonaryo moserbisyo sa usa ka misyon nga walay patriyarka nga makahimo sa paghatag og panalangin sa lumad nga pinulongan sa misyonaryo.

• Ang usa ka patriyarka nga duol sa MTC makahatag og panalangin sa lumad nga pinulongan sa misyonaryo.

38.2.10.3

Mga Miyembro nga Mosulod sa Pagkamilitar

Ang usa ka patriyarkal nga panalangin mahimong usa ka tinubdan sa espirituwal nga kalig-on alang sa usa ka miyembro nga nagserbisyo diha sa militar. Kon mahimo, ang usa ka takos nga miyembro kinahanglan makadawat og usa ka patriyarkal nga panalangin sa dili pa moreport alang sa aktibo nga pagserbisyo.

Kon kini dili posible, ang miyembro mahimong makadawat og patriyarkal nga panalangin didto sa iyang permanenting estasyon sa pagserbisyo. Ang usa ka sakop sa bishopric didto mointerbiyo sa miyembro ug moandam sa Rekomend sa Patriyarkal nga Panalangin. Ang mga instruksiyon anaa sa 18.17.

Alang sa dugang impormasyon, ang presidente sa stake mahimong mokontak sa Buhatan sa Korum sa Napulog Duha ka Apostoles sa [e-mail].

38.2.10.4

Mga Miyembro Kinsa Nagpuyo gawas sa Stake sa Patriyarka

Ang usa ka miyembro kasagaran makadawat og usa ka patriyarkal nga panalangin gikan sa patriyarka sa iyang stake. Hinoon, ang usa ka miyembro mahimong makadawat og usa ka panalangin gikan sa usa ka patriyarka sa laing stake kon siya:

• Usa ka direkta nga kaliwat sa patriyarka (anak, apo, o apo sa tuhod) pinaagi sa paghimugso o pagsagop.

• Nagpuyo sa usa ka stake nga walay naglihok nga patriyarka.

• Nagpuyo sa usa ka district.

• Dili parehas ang sinultihan sama sa patriyarka sa stake, ug ang usa ka patriyarka sa duol nga stake managsama og pinulongan sa miyembro.

Sa matag usa niining sitwasyon, ang usa ka sakop sa bishopric o presidente sa branch mointerbiyo sa miyembro sama sa gihulagway diha sa 18.17. Usa ka sakop sa kapangulohan sa stake sa patriyarka ug ang kapangulohan sa stake o misyon sa modawat kinahanglan gayod nga moaprobar sa rekomend pinaagi sa Patriarchal Blessing System.

38.2.10.5

Paghubad sa Patriyarkal nga mga Panalangin

Ang inspirasyon ug kahulogan sa usa ka patriyarkal nga panalangin lisod ipahayag diha sa paghubad. Tungod niini nga rason, ang mga miyembro kinahanglan makadawat sa ilang mga panalangin diha sa pinulongan nga labing maayo nga ilang masabtan. Ang Simbahan dili mohatag og sinulat nga mga hubad sa patriyarkal nga mga panalangin.

Ang mga miyembro wala giawhag sa paghubad sa patriyarkal nga mga panalangin. Hinoon, usahay ang usa ka miyembro nagkinahanglan og usa ka panalangin nga gihubad ngadto sa usa ka pinulongan nga iyang masabtan. Ang miyembro mahimong makapangita og usa ka kasaligan ug takos nga miyembro sa Simbahan kinsa makahatag og hubad. Ang miyembro kinahanglan mopili og hanas nga tighubad nga makasabot sa espirituwal nga kinaiyahan ug sa pagkakompidensiyal sa panalangin. Ang hinubad nga mga kopya sa mga panalangin dili tipigan diha sa punoang buhatan sa Simbahan.

Ang presidente sa stake mahimong mohangyo og usa ka transkripsiyon sa braille sa patriyarkal nga panalangin. Siya mokontak sa Buhatan sa Korum sa Napulog Duha ka Apostoles [e-mail].

38.2.10.6

Interpretasyon sa Patriyarkal nga mga Panalangin gamit ang Sign Language

Kon ang usa ka miyembro bungol o maglisod sa pagdungog, ang iyang patriyarkal nga panalangin mahimong mahubad diha sa sinyas nga pinulongan. Ang miyembro moila sa usa ka tighubad. Labing maayo kon kini nga tawo usa ka masaligan ug takos nga miyembro sa Simbahan nga makasabot sa doktrinal nga kahulogan sa patriyarkal nga mga panalangin. Hinoon, kon ang usa ka miyembro sa Simbahan dili makit-an, laing angayan nga tawo ang makahatag sa paghubad.

38.2.10.7

Ikaduhang Patriyarkal nga mga Panalangin

Sa talagsaon kaayo nga mga sirkumstansiya, ang usa ka takos nga miyembro mahimong mohangyo og ikaduha nga patriyarkal nga panalangin. Hinoon, kini wala giawhag, ug ang hangyo lagmit nga dili aprobahan. Kon ang miyembro adunay importante nga rason sa mao nga hangyo, siya mohisgot niini sa bishop. Kon ang bishop mobati nga ang ikaduha nga panalangin gikinahanglan, siya moandam og usa ka Rekomend sa Patriyarkal nga Panalangin. Ang mga instruksiyon anaa sa 18.17.

Dayon ang presidente sa stake mointerbiyo sa miyembro ug mobasa sa orihinal nga panalangin ngadto kaniya. Kon siya mobati nga ang ikaduha nga panalangin gikinahanglan, mangayo siya og pagtugot gikan sa Buhatan sa Korum sa Napulog Duha ka Apostoles sa [e-mail].

Ang presidente sa stake mopahibalo sa modawat ug sa patriyarka kabahin sa desisyon sa Buhatan sa Korum sa Napulog Duha ka Apostoles. Kon ang hangyo giaprobahan, ang presidente sa stake moaprobar sa rekomend diha sa Patriarchal Blessing System. Ang presidente sa stake mosulti sa modawat nga ang ikaduha nga panalangin mopuli sa orihinal nga panalangin. Ang patriyarka makahatag dayon sa ikaduha nga patriyarkal nga panalangin.

38.3

Sibil nga Kaminyoon

Ang mga lider sa Simbahan moawhag sa mga miyembro nga mahimong kwalipikado alang sa kaminyoon sa templo ug nga magminyo ug maselyo diha sa templo. Kon gitugot sa lokal nga mga balaod, ang mga lider sa Simbahan mahimong mopahigayon og sibil nga mga kaminyoon sa mga sirkumstansiya sama sa mosunod:

• Usa ka magtiayon nga nagplano nga maminyo diha sa templo, apan ang mga kaminyoon sa templo wala giila sa legal nga paagi.

• Usa ka magtiayon mahimong maminyo diha sa templo, apan ang sibil nga kaminyoon makatabang sa mga ginikanan o labing duol nga mga sakop sa pamilya nga mobati nga makaapil.

• Ang pagsulod sa templo dili mahimo sulod sa taas nga panahon.

• Ang magtiayon wala magplano nga maminyo diha sa templo.

Ang sibil nga kaminyoon balido hangtod nga ang magtiayon mga buhi pa. Dili kini molahutay lapas sa mortal nga kinabuhi.

Ang sibil nga mga kaminyoon kinahanglang ipahigayon pinasikad sa mga balaod diha sa dapit diin ang kaminyoon gipahigayon.

Ang sibil nga mga kaminyoon ug ang may kalabotan nga relihiyoso nga mga seremonya kinahanglang dili ipahigayon sa Igpapahulay. Dili usab kini ipahigayon sa dili kasagaran nga mga takna.

Ang bishop mokonsulta sa iyang presidente sa stake kon siya adunay mga pangutana kalabot sa sibil nga kaminyoon nga wala matubag niini nga seksiyon. Ang presidente sa stake mahimong mopadangat sa mga pangutana ngadto sa Buhatan sa Unang Kapangulohan.

38.3.1

Kinsa ang Mahimong Mopahigayon sa Sibil nga Kaminyoon

Kon gitugotan sa lokal nga balaod, ang mosunod nga kasamtangang nagserbisyo nga mga opisyal sa Simbahan mahimong molihok diha sa ilang calling sa pagpahigayon og seremonya sa sibil nga kaminyoon:

• Presidente sa misyon

• Presidente sa stake

• Presidente sa district

• Bishop

• Presidente sa branch

Kini nga mga opisyal mahimo lamang mopahigayon og sibil nga kaminyoon tali sa usa ka lalaki ug sa usa ka babaye. Ang tanan nga mosunod nga mga kondisyon kinahanglan gayod gamiton:

• Ang pangasaw-onon o ang pamanhonon usa ka miyembro sa Simbahan o aduna nay petsa sa bunyag.

• Mahimong ang rekord sa pagkamiyembro sa pangasaw-onon o sa pamanhonon anaa, o maanaa human sa bunyag, diha sa yunit sa Simbahan nga gidumala sa opisyal.

• Ang opisyal sa Simbahan legal nga gitugotan nga mopahigayon sa usa ka sibil nga kaminyoon sa hurisdiksyon diin ang kaminyoon pagahimoon.

Ang mga chaplain nga Santos sa Ulahing mga Adlaw nga aktibong nagserbisyo sa militar mahimong mopahigayon sa sibil nga mga kaminyoon nga walay pagtugot daan.

Ang mga chaplain nga gisangonan ngadto sa mga yunit sa Reserve o National Guard kinahanglang makadawat una og pagtugot gikan sa Military Relations and Chaplain Services Division sa Simbahan aron mopahigayon og sibil nga kaminyoon. Tan-awa ang impormasyon sa pagkontak sa 38.9.10.

Ang dili pangmilitar nga mga chaplain kinsa nagserbisyo diha sa mosunod nga mga organisasyon kinahanglan gayod makadawat og pasiunang pagtugot gikan sa Military Relations and Chaplain Services Division sa Simbahan aron makapahigayon og sibil nga kaminyoon:

• Ospital, mga

• Balay-pahulayanan [Hospice] nga mga organisasyon, mga

• Sentro sa Inabagan nga pagpuyo, mga

• Prisohan, mga

• Bantay sa utlanan

• Pulis o mga departamento sa bombero

Ang retiradong mga chaplain wala tugoti nga mopahigayon og sibil nga mga kaminyoon sa ilang kapasidad isip mga chaplain.

Kadtong kinsa mopahigayon og mga kaminyoon nga nagtuman sa ilang mga calling isip mga lider sa Simbahan o mga chaplain kinahanglang mogamit sa mga lagda niini nga seksiyon. Sila usab mosunod sa tanan nga legal nga mga gikinahanglan.

Ang mga chaplain nga Santos sa Ulahing mga Adlaw wala gikonsiderar nga tigdumalang mga opisyal sa Simbahan gawas kon sila nagserbisyo isip usa ka presidente sa stake, bishop, o presidente sa branch. Kon ang usa ka chaplain kinsa dilli usa ka tigdumalang opisyal sa Simbahan mopahigayon og sibil nga kaminyoon, siya naglihok isip usa ka ahente sa gobyerno o sa sibilyan nga organisasyon nga iyang giserbisyohan. Sa ingon, ang pulong sa seremonya sa sibil nga kaminyoon giusab og diyutay alang niining mga chaplain sama sa gipakita sa 38.3.6.

Ang mga chaplain nga Santos sa Ulahing mga adlaw mahimo lamang mopahigayon og sibil nga kaminyoon tali sa usa ka lalaki ug babaye.

Ang mga opisyal sa Simbahan ug mga chaplain kinsa mopahigayon og sibil nga mga kaminyoon alang sa mga miyembro sa Simbahan kinahanglan nga mohatag sa gikinahanglan nga impormasyon sa kaminyoon ngadto sa klerk sa ward o branch. Ang klerk mo-update sa mga rekord sa pagkamiyembro.

Ang opisyal sa Simbahan o chaplain kinsa mopahigayon sa sibil nga mga kaminyoon sa iyang kapasidad diha sa Simbahan dili mahimong modawat og bayad.

38.3.2

Sibil nga Kaminyoon alang sa mga Miyembro gikan sa Ubang mga Yunit

Ang usa ka opisyal sa Simbahan dili mahimong mopahigayon og kaminyoon alang sa mga miyembro sa Simbahan kon wala ang rekord sa pagkamiyembro sa pangasaw-onon ni sa pamanhonon diha sa yunit sa Simbahan nga gidumala sa opisyal (tan-awa sa 38.3.1). Usa ka eksepsiyon gihimo alang sa mga chaplain nga Santos sa Ulahing mga Adlaw ug mga opisyal sa Simbahan kinsa mga opisyal sa gobyerno.

38.3.3

Sibil nga Kaminyoon alang Niadtong Kinsa Dili mga Miyembro sa Simbahan

Ang usa ka opisyal sa Simbahan dili mahimong mopahigayon og kaminyoon kon ang pangasaw-onon ni ang pamanhonon dili usa ka miyembro sa Simbahan gawas kon ang usa nila aduna nay petsa sa bunyag. Usa ka eksepsiyon gihimo alang sa mga chaplain nga Santos sa Ulahing mga Adlaw ug mga opisyal sa Simbahan kinsa mga opisyal sa gobyerno.

38.3.4

Sibil nga mga Kaminyoon nga Gipahigayon sa mga Gambalay sa Simbahan

Ang seremonya sa kasal mahimong ipahigayon diha sa usa ka gambalay sa Simbahan kon kini dili makabalda sa iskedyul sa regular nga mga kalihokan sa Simbahan. Ang mga kasal kinahanglan dili ipahigayon sa Adlawng Igpapahulay o sa Lunes sa gabii. Ang mga kasal nga ipahigayon diha sa mga gambalay sa Simbahan kinahanglan yano ug dungganon. Ang musika kinahanglan sagrado, may balaan nga pagtahod, ug malipayon.

Ang mga kaminyoon mahimong ipahigayon diha sa chapel, sa cultural hall, o sa ubang angay nga lawak. Ang mga salo-salo dili ipahigayon diha sa chapel gawas kon kini usa ka dapit nga alang sa daghang katuyoan [multipurpose chapel]. Ang mga kaminyoon kinahanglan mosunod sa mga lagda alang sa tukma nga paggamit sa meetinghouse (tan-awa sa 35.5.3).

Ang Simbahan wala magtugot sa mga meetinghouse o mga kabtangan niini nga gamiton alang sa bisan unsa nga katuyoan nga may kalabotan sa samang sekso, poligamiya, supak sa balaod, o laing kaminyoon nga wala mahiuyon sa doktrina o palisiya sa Simbahan.

Sa panagsa kaayo nga mga sirkumstansiya, ang bishop mahimong motugot sa paggamit sa gambalay sa Simbahan alang sa mga kaminyoon nga ipahigayon pinaagi sa usa ka tawo kinsa dili opisyal sa Simbahan o alang niadtong dili mga miyembro sa Simbahan. Siya makigtambag una sa presidente sa stake. Siya makigtambag sa tawo kinsa modumala sa pagseguro nga siya makasabot sa mga lagda niining seksiyon. Usa ka miyembro sa stake o konseho sa ward motambong aron sa pagseguro sa tukma nga paggamit ug pag-atiman sa gambalay.

Ang bishop mahimong mohatag og pagtugot sa buhi nga pagsibya sa kasal nga gipahigayon diha sa mga gambalay sa Simbahan (tan-awa sa 29.7).

38.3.5

Sibil nga mga Kaminyoon Nga Kinahanglan Gayod nga Ipahigayon sa usa ka Opisyal sa Publiko o diha sa Publiko nga Dapit

Sa ubang mga dapit, ang mga balaod nagkinahanglan nga ang usa ka seremonya sa kaminyoon ipahigayon pinaagi sa usa ka opisyal sa publiko. Ang uban nagkinahanglan nga ang seremonya ipahigayon sa publiko nga building o sa laing publiko nga dapit. Niini nga mga kahimtang, ang usa ka awtorisadong opisyal sa pagkapari mahimong mopahigayon og usa ka mubo nga relihiyoso nga panagtigom human sa sibil nga kaminyoon. Niining panagtigom siya mohatag og tambag ngadto sa magtiayon.

38.3.6

Seremonya sa Sibil nga Kaminyoon

Ang kaminyoon sagrado ug sa ingon kinahanglan dungganon ug halangdon. Ang mga kaminyoon alang sa mga miyembro sa Simbahan nga ipahigayon gawas sa templo kinahanglang magpakita og diwa sa pasalig ug hingpit nga kalipay.

Gawas kon gipahibalo, ang impormasyon niini nga seksiyon magamit ngadto sa mga chaplain nga Santos sa Ulahing mga Adlaw ingon man sa mga opisyal sa Simbahan.

Sa dili pa mopahigayon og sibil nga kaminyoon, ang usa ka opisyal sa Simbahan mahimong motambag sa magtiayon bahin sa sagrado nga kinaiya sa mga pakigsaad sa kaminyoon. Mahimo siyang modugang og ubang tambag sumala sa giya sa Espiritu.

Sa pagpahigayon og sibil nga kaminyoon, ang opisyal sa Simbahan motawag sa magtiayon ug moingon, “Palihog paggunitay kamo sa tuong kamot.” Moingon dayon siya, “[Tibuok ngalan sa pamanhonon] ug [tibuok ngalan sa pangasaw-onon], naggunitay kamo sa inyong tuong kamot agi og timaan sa mga pakigsaad nga inyong sudlan karon sa atubangan sa Dios ug niining mga saksi.” (Ang magtiayon mahimong mopili o mohingalan daan niini nga mga saksi.)

Ang opisyal mamulong dayon ngadto sa pamanhonon ug mangutana, “[Tibuok ngalan sa pamanhonon], imo bang dawaton si [tibuok ngalan sa pangasaw-onon] isip imong gipakaslan nga asawa sumala sa balaod, ug ikaw ba sa imong kaugalingong kabubut-on ug pagpili makigsaad isip iyang kauban ug gipakaslan nga bana sumala sa balaod nga ikaw mounong ngadto kaniya ug wala nay lain; nga ikaw mosunod sa tanang balaod, mga responsibilidad, ug mga obligasyon kalabot sa balaan nga matang sa matrimonya; ug nga ikaw mohigugma, motahod, ug mopangga kaniya samtang kamong duha buhi?”

Ang pamanhonon motubag, “Oo” o “Ako mohimo.”

Ang opisyal sa Simbahan dayon mamulong ngadto sa pangasaw-onon ug mangutana, “[Tibuok ngalan sa pangasaw-onon], imo bang dawaton si [tibuok ngalan sa pamanhonon] isip imong gipakaslan nga bana sumala sa balaod, ug ikaw ba sa imong kaugalingong kabubut-on ug pagpili makigsaad isip iyang kauban ug gipakaslan nga asawa sumala sa balaod nga ikaw mounong ngadto kaniya ug wala nay lain; nga ikaw motuman sa tanang balaod, mga responsibilidad, ug mga obligasyon nga may kalabotan sa balaan nga matang sa matrimonya, ug nga ikaw mohigugma, motahod, ug mopangga kaniya samtang kamong duha buhi?”

Ang pangasaw-onon motubag, “Oo” o “Ako mohimo.”

Ang opisyal sa Simbahan mosulti dayon sa magtiayon ug moingon, “Pinaagi sa gahom sa legal nga awtoridad nga gihatag kanako isip usa ka elder sa Ang Simbahan ni Jesukristo sa mga Santos sa Ulahing mga Adlaw, ako mopahayag kaninyo, [ngalan sa pamanhonon] ug [ngalan sa pangasaw-onon] nga bana ug asawa, sa legal nga paagi ug subay sa balaod gikasal sulod sa panahon sa inyong mortal nga kinabuhi.”

(Ang ibanos nga pulong nga isulti alang sa chaplain nga wala magserbisyo isip tigdumalang opisyal sa Simbahan: “Pinaagi sa legal nga awtoridad nga gihatag kanako isip usa ka chaplain sa [branch sa militar o sibilyan nga organisasyon], ako modeklarar kaninyo [ngalan sa pamanhonon] ug [ngalan sa pangasaw-onon], nga bana ug asawa, sa legal nga paagi ug subay sa balaod gikasal sulod sa panahon sa inyong mortal nga kinabuhi.”)

“Hinaut nga ang Dios manalangin sa inyong panagtipon uban sa kalipay diha sa inyong kaliwatan ug taas nga kinabuhi nga malipayong magkauban, ug hinaut nga Siya mopanalangin kaninyo sa pagtuman sa sagradong mga pakigsaad nga inyong gihimo. Kini nga mga panalangin akong ipangaliya diha kaninyo sa ngalan ni Ginoong Jesukristo, amen.”

Ang imbitasyon sa paghalok sa usag usa isip bana ug asawa opsiyonal, base sa naandan sa kultura.

38.4

Mga Palisiya sa Pagselyo

Ang mga miyembro sa Simbahan mohimo og sagrado nga mga pakigsaad uban sa Dios samtang sila modawat sa mga ordinansa sa templo. Ang mga ordinansa sa pagselyo diha sa templo mohiusa sa mga pamilya alang sa kahangtoran kon ang mga miyembro maningkamot sa pagtahod sa mga pakigsaad nga ilang gihimo sa dihang nadawat nila ang ordinansa. Ang mga ordinansa sa pagselyo naglakip sa:

• Pagselyo sa bana ug asawa.

• Pagselyo sa mga anak ngadto sa mga ginikanan.

38.4.1

Pagselyo sa Bana ug Asawa

Ang mosunod nga talaan nagpasabot asa pangitaa ang mga palisiya alang sa pagselyo sa bana ug asawa.

Gikinahanglan	Seksyon
Gikinahanglan Ako naminyo sa sibil nga paagi ug gusto nga magpaselyo ngadto sa akong kapikas.	Seksyon 38.4.1.1
Gikinahanglan Ako nadiborsiyo gikan sa kanhi kapikas ug gusto nga maselyo ngadto sa akong kasamtangan nga kapikas.	Seksyon 38.4.1.2
Gikinahanglan Ang akong kapikas kansa ako naselyo namatay. Ngadto kang kinsa ako karon mahimong maselyo?	Seksyon 38.4.1.3
Gikinahanglan Mahimo ba akong maselyo ngadto sa namatay na nga indibidwal nga akong gikapuyo-puyo nga wala maminyo sa legal nga paagi?	Seksyon 38.4.1.4
Gikinahanglan Ako kinahanglan nga mo-apply alang sa usa ka pagkanselar sa pagselyo o usa ka pagtugot nga maselyo.	Seksyon 38.4.1.5
Gikinahanglan Ako nagkinahanglan nga matangtang ang usa ka restriksiyon batok sa pagselyo sa templo.	Seksyon 38.4.1.6
Gikinahanglan Ang akong kapikas ug ako naminyo alang sa panahon lang diha sa templo. Mahimo ba kami nga maselyo sa usag usa?	Seksyon 38.4.1.7
Gikinahanglan Ngadto kang kinsa kaha ang akong namatay nga mga sakop sa pamilya maselyo?	Seksyon 38.4.1.8
Gikinahanglan Sa unsang paagi ang diborsiyo makaapekto sa akong pagselyo?	Seksyon 38.4.1.9
Gikinahanglan Unsa ang mga epekto sa pagkanselar sa usa ka pagselyo?	Seksyon 38.4.1.10
Gikinahanglan Sa unsang paagi ang pagluwat o pagbakwi sa pagkamiyembro sa Simbahan nakaapekto sa akong pagselyo?	Seksyon 38.4.1.11

Ang mga miyembro kinahanglan makigtambag uban sa ilang bishop kon sila adunay mga pangutana mahitungod sa mga palisiya sa pagselyo nga wala matubag dinhi niini nga seksiyon. Ang bishop mokontak sa presidente sa stake kon siya adunay mga pangutana. Ang presidente sa stake mokontak sa Buhatan sa Unang Kapangulohan kon siya adunay mga pangutana.

Ang mga miyembro nga adunay mga problema mahitungod sa mahangtoron nga kinaiyahan sa ordinansa sa pagselyo ug sa ilang may kalabotan nga mga relasyon sa pamilya ug kapikas giawhag sa pagsalig sa Ginoo ug magtinguha sa Iyang kahupay. Ang Langitnong Amahan moseguro nga ang matag tawo makadawat sa matag panalangin sumala sa iyang mga tinguha ug mga pagpili.

38.4.1.1

Pagselyo sa Buhi nga mga Miyembro human sa Sibil nga Kaminyoon

Ang usa ka lalaki ug babaye kinsa sibil nga naminyo mahimong maselyo sa templo dayon kon gitugot sa mga sirkumstansiya kon ang mosunod nga mga kondisyon masunod:

• Silang duha nahimong miyembro sa Simbahan sulod sa labing ubos usa ka tuig (tan-awa sa 27.3.1 ug 27.2.1).

• Sila andam na ug takos.

Kon mag-isyu og mga ka rekomend sa templo alang sa usa ka magtiayon nga magpaselyo, ang mga lider sa pagkapari moseguro nga ang sibil nga kaminyoon balido sa legal nga paagi. Tan-awa sa 26.3 ug 27.3.

38.4.1.2

Pagselyo sa Buhi nga mga Miyembro human sa Diborsyo

Mga Babaye. Ang buhi nga babaye mahimong maselyo lamang ngadto sa usa ka bana sa usa ka panahon. Kon siya ug usa ka bana naselyo ug sa kaulahian nadiborsiyo, siya kinahanglan gayod nga makadawat og pagkanselar niana nga pagselyo sa dili pa maselyo ngadto sa laing lalaki atol sa iyang kinabuhi (tan-awa sa 38.4.1.5).

Ang buhi nga babaye kinsa dili minyo sa kasamtangan o naselyo ngadto sa laing lalaki mahimong maselyo ngadto sa usa ka bana nga namatay na nga siya nadiborsiyo sa kinabuhi. Siya kinahanglan gayod makadawat una og pinirmahan nga pagtugot gikan sa balo (kon adunay usa) sa iyang kanhi bana.

Tan-awa sa kapitulo 28 alang sa impormasyon mahitungod sa pagpahigayon og mga ordinansa alang sa namatay nga kapikas.

Mga Lalaki. Kon ang usa ka lalaki ug babaye naselyo ug unya nagdiborsiyo, ang lalaki kinahanglang makadawat gayod og usa ka pagtugot nga maselyo [sealing clearance] sa dili pa maselyo ngadto sa laing babaye (tan-awa sa 38.4.1.5). Ang pagtugot nga maselyo gikinahanglan bisan kon (1) ang kanhi pagselyo nakanselar o (2) ang kanhi asawa namatay na karon.

Ang pagtugot nga maselyo gikinahanglan lang kon ang usa ka lalaki nadiborsyo sa babaye kinsa labing bag-o nga naselyo ngadto kaniya. Pananglitan, kon ang usa ka lalaki nakadawat og patugot nga maselyo aron maselyo ngadto sa ikaduha nga asawa human sa usa ka diborsyo, ug unya ang iyang ikaduhang asawa namatay, siya dili na magkinahanglan og pagtugot nga maselyo pag-usab.

Ang buhi nga lalaki mahimong maselyo ngadto sa namatay nga asawa nga siya nadiborsiyo atol sa kinabuhi. Siya kinahanglan gayod makadawat una og pinirmahan nga pagtugot gikan sa kanhi biyudo sa asawa (kon adunay usa). Kon siya minyo, kinahanglan nga makadawat usab siya og sinulat nga pagtugot gikan sa iyang kasamtangan nga asawa kon siya buhi pa.

Tan-awa sa kapitulo 28 alang sa impormasyon mahitungod sa pagpahigayon og mga ordinansa alang sa namatay nga kapikas.

38.4.1.3

Pagselyo sa Buhi nga mga Miyembro human sa Kamatayon sa Kapikas

Mga Babaye. Kon ang bana ug asawa naselyo ug ang bana mamatay, ang babaye dili mahimong maselyo ngadto sa lain nga lalaki hangtod nga siya makadawat og pagkanselar sa unang pagselyo (tan-awa sa 38.4.1.5).

Ang buhi nga babaye kinsa sa kasamtangan wala maminyo o maselyo ngadto sa laing lalaki mahimong maselyo ngadto sa usa ka bana nga namatay na (tan-awa sa 38.4.1.8). Kon ang kaminyoon natapos sa pagdiborsiyo, tan-awa sa 38.4.1.2.

Ang buhi nga babaye kinsa minyo sa kasamtangan dili mahimong maselyo ngadto sa usa ka patay nga bana nga walay pagtugot sa Unang Kapangulohan.

Tan-awa sa kapitulo 28 alang sa impormasyon mahitungod sa pagpahigayon og mga ordinansa alang sa namatay nga kapikas.

Mga Lalaki. Kon ang bana ug asawa naselyo na ug ang asawa mamatay, ang lalaki mahimong maselyo ngadto sa laing babaye kon ang babaye wala pa naselyo ngadto sa laing lalaki. Niining sirkumstansiya, ang lalaki wala magkinahanglan og pagtugot nga maselyo gikan sa Unang Kapangulohan gawas kon siya nadiborsyo gikan sa iyang kanhi asawa sa wala pa mamatay ang asawa (tan-awa sa 38.4.1.2).

Ang buhi nga lalaki mahimong maselyo ngadto sa namatay na nga asawa kon siya [asawa] wala pa maselyo ngadto sa laing bana sa buhi pa. Kon siya [asawa] naselyo ngadto sa laing bana sa buhi pa, ang tanang lalaki nga iyang naminyoan kinahanglan nga namatay na sa dili pa si bisan kinsa nga laing lalaki ang mahimong maselyo ngadto kaniya (tan-awa sa 38.4.1.8). Kon ang kaminyoon natapos sa pagdiborsiyo, tan-awa sa 38.4.1.2

Sa dili pa iselyo ngadto sa namatay na nga asawa, ang minyo nga lalaki kinahanglan gayod nga makadawat og sinulat nga pagtugot gikan sa iyang kasamtangan nga asawa kon siya buhi pa.

Tan-awa sa kapitulo 28 alang sa impormasyon mahitungod sa pagpahigayon og mga ordinansa alang sa namatay nga kapikas.

38.4.1.4

Pagselyo sa usa ka Buhi nga Miyembro ngadto sa Namatay na nga Indibidwal nga Iyang Gikapuyo-puyo

Mga Babaye. Isip usa ka eksepsiyon, ang usa ka buhi nga babaye nga wala pa maminyo o maselyo ngadto sa laing lalaki mahimong maselyo ngadto sa namatay na nga lalaki nga iyang gikapuyo-puyo. Kining eksepsiyon mahimong ikonsiderar lamang kon ang ilang relasyon mao ang usa sa matang ug sa gidugayon nga mopakita og determinasyon nga mobuhat sa tanan nga mosunod:

• Magmatinud-anon ngadto sa usag usa sa permanente nga relasyon.

• Motuman sa tanang responsibilidad sa kaminyoon ngadto sa usag usa.

• Motuman sa tanang responsibilidad sa pagkaginikanan ngadto sa ilang bisan kinsa nga anak.

Kon ang presidente sa stake sa miyembro mobati nga ang mao nga eksepsiyon may kaseguroan, mosumiter siya og hangyo ngadto sa Buhatan sa Unang Kapangulohan.

Mga Lalaki. Isip usa ka eksepsiyon, ang usa ka buhi nga lalaki mahimong maselyo ngadto sa usa ka namatay nga babaye nga iyang gikapuyo-puyo kon ang babaye wala maselyo ngadto sa laing lalaki sa iyang kinabuhi. Kining eksepsiyon mahimong ikonsiderar lamang kon ang ilang relasyon mao ang usa sa matang ug sa gidugayon nga mopakita og determinasyon nga mobuhat sa tanan nga mosunod:

• Magmatinud-anon ngadto sa usag usa sa permanente nga relasyon.

• Motuman sa tanang responsibilidad sa kaminyoon ngadto sa usag usa.

• Motuman sa tanang responsibilidad sa pagkaginikanan ngadto sa ilang bisan kinsa nga anak.

Sa dili pa iselyo ngadto sa namatay na nga babaye, ang lalaki nga minyo kinahanglan gayod nga makadawat og sinulat nga pagtugot gikan sa iyang kasamtangan nga asawa kon siya buhi pa.

Kon ang presidente sa stake sa miyembro mobati nga ang mao nga eksepsiyon may kaseguroan, mosumiter siya og hangyo ngadto sa Buhatan sa Unang Kapangulohan.

38.4.1.5

Pag-apply alang sa Pagkanselar sa Pagselyo o usa ka Pagtugot nga Maselyo

Tan-awa sa 38.4.1.2 alang sa impormasyon mahitungod sa pagselyo sa buhi nga mga miyembro human sa diborsiyo. Tan-awa sa 38.4.1.3 alang sa impormasyon mahitungod sa pagselyo sa buhi nga mga miyembro human sa kamatayon sa kapikas.

Ang mga miyembro sa bisan hain nga sekso mahimong magtinguha og usa ka pagkanselar sa pagselyo bisan kon sila wala nag-andam sa pagpaselyo ngadto sa laing kapikas. Ang lalaki nga miyembro sa Simbahan kinahanglan gayod makadawat og usa ka pagtugot nga maselyo ngadto sa laing babaye human sa usa ka diborsiyo.

Ang proseso alang sa pagpangita og usa ka pagkanselar sa pagselyo o pagtugot nga maselyo gilatid sa ubos.

1. Ang miyembro makig-istorya uban sa iyang bishop mahitungod sa hangyo.

2. Ang bishop mosegurado nga:

   1. Ang diborsiyo nakompleto na.

   2. Ang miyembro nakatuman sa tanang legal nga mga kinahanglanon alang sa suporta sa bata ug sa kapikas nga may kalabotan ngadto sa diborsyo.

3. Kon ang bishop morekomendar nga ang pagkanselar sa pagselyo o pagtugot nga maselyo mahimong tugotan, siya:

   1. Mosulat siya og usa ka Aplikasyon ngadto sa Unang Kapangulohan alang sa miyembro gamit ang Leader and Clerk Resources (LCR). Ang mga lider kinsa dili makasulod ngadto sa LCR makagamit hinoon og pisikal nga kopya sa porma sa Aplikasyon ngadto sa Unang Kapangulohan. Kini nga porma makuha gikan sa Confidential Records Office didto sa punoang buhatan sa Simbahan.

   2. Isumiter ang aplikasyon ngadto sa presidente sa stake.

4. Ang presidente sa stake makigkita sa miyembro. Ang presidente sa stake momatuod nga:

   1. Ang diborsiyo nakompleto na.

   2. Ang miyembro nakatuman sa tanang legal nga mga kinahanglanon alang sa suporta sa bata ug sa kapikas nga may kalabotan ngadto sa diborsyo.

5. Kon ang presidente sa stake morekomendar nga itugot ang pagkanselar sa pagselyo o pagtugot nga maselyo, siya mosumiter sa aplikasyon ngadto sa punoang buhatan sa Simbahan gamit ang LCR. Tan-awa sa 6.2.3 mahitungod sa responsibilidad sa presidente sa stake kon magsumiter og aplikasyon ngadto sa Unang Kapangulohan.

6. Kon ang hangyo giaprobahan, ang Unang Kapangulohan mohatag og usa ka sulat nga namahayag nga ang pagkanselar sa pagselyo o ang pagtugot nga maselyo gitugotan.

7. Human nga madawat ang sulat, ang miyembro mahimong magtakda og petsa alang sa pagselyo sa templo. Ang miyembro mopresentar sa sulat diha sa templo.

Tan-awa sa 38.4.1.9.

38.4.1.6

Pagtangtang sa Restriksiyon batok sa Pagselyo sa Templo

Kon ang usa ka tawo nakapanapaw samtang minyo ngadto sa usa ka kapikas diin siya naselyo, dili siya mahimong maselyo ngadto sa kapares diha sa pagpanapaw kon walay pagtugot sa Unang Kapangulohan.

Usa ka magtiayon mahimong magtinguha og pagtugot human sila naminyo sulod sa dili mominos sa lima ka tuig. Ang proseso sa paghimo og hangyo sa pagtangtang og usa ka restriksiyon batok sa pagselyo sa templo gilatid sa ubos.

1. Ang magtiayon makigkita sa ilang bishop ug presidente sa stake.

2. Kon kining mga lider mobati nga ang restriksiyon kinahanglan tangtangon, sila mosulat ngadto sa Unang Kapangulohan uban sa ilang mga rekomendasyon. Ang ilang mga sulat kinahanglan maghulagway sa katakos sa aplikante sa templo ug ang pagkatunhay sa ilang kaminyoon sulod sa dili mominos lima ka tuig. Tan-awa sa 6.2.3 mahitungod sa responsibilidad sa presidente sa stake kon magsumiter og aplikasyon ngadto sa Unang Kapangulohan.

3. Ang magtiayon mosulat usab og hangyo ngadto sa Unang Kapangulohan.

4. Ang presidente sa stake kinahanglang mosumiter niining tanang sulat ngadto sa Unang Kapangulohan. Mahimo niyang isumiter ang hangyo uban sa usa ka aplikasyon alang sa pagkanselar sa pagselyo o pagtugot nga maselyo (tan-awa sa 38.4.1.5).

5. Kon ang hangyo giaprobahan, ang Unang Kapangulohan mohatag og usa ka sulat nga namahayag nga ang restriksiyon batok sa pagselyo sa templo gitangtang na.

6. Human sa pagdawat sa sulat, ang magtiayon mahimong magtakda og appointment aron maselyo. Sila mopakita sa sulat ngadto sa templo.

38.4.1.7

Pagselyo human sa Kaminyoon diha sa Templo alang Niining Kinabuhia Lamang

Ang mga magtiayon nga naminyo diha sa templo alang niining kinabuhia lamang dili kasagaran maselyo sa kaulahian. Aron mahitabo ang maong pagselyo, ang babaye kinahanglang makadawat gayod una og pagkanselar sa iyang miaging pagselyo gikan sa Unang Kapangulohan. Kon ang bishop ug ang presidente sa stake mobati nga ang pagkanselar makatarunganon, ang presidente sa stake mosumiter og aplikasyon ngadto sa Unang Kapangulohan gamit ang LCR. Tan-awa sa 6.2.3 mahitungod sa responsibilidad sa presidente sa stake kon magsumiter og aplikasyon ngadto sa Unang Kapangulohan.

Ang mga kaminyoon nga alang niining kinabuhia lamang diha sa templo dili na ipahigayon (tan-awa sa 27.3.3

38.4.1.8

Pagselyo sa Namatay na nga mga Tawo

Patay na nga mga Babaye. Ang patay na nga babaye mahimong iselyo ngadto sa tanang lalaki diin siya legal nga naminyo sa panahon sa iyang kinabuhi. Ang mosunod nga tsart mopakita kon kanus-a mahitabo kini nga mga pagselyo.

Wala siya maselyo ngadto sa usa ka bana niini nga kinabuhi	Siya mahimong iselyo ngadto sa tanang buhi o namatay na nga mga lalaki nga iyang naminyoan niini nga kinabuhi. Kon ang lalaki buhi pa, ang iyang asawa (kon siya minyo) kinahanglan gayod nga mohatag og sinulat nga pagtugot (tan-awa sa 38.4.1.3). Kon ang lalaki namatay na, ang iyang nabiyuda (kon aduna) kinahanglan gayod nga mohatag og sinulat nga pagtugot.
Naselyo siya ngadto sa usa ka bana niini nga kinabuhi	Ang tanan niyang mga bana kinahanglang patay na sa dili pa siya iselyo ngadto sa ubang mga lalaki nga iyang naminyoan. Naglakip kini sa kanhi mga bana diin siya nadiborsyo. Matag usa sa mga nabiyuda sa mga lalaki (kon aduna) kinahanglan gayod nga mohatag og sinulat nga pagtugot.

Patay na nga mga Lalaki. Ang namatay na nga lalaki mahimong maselyo ngadto sa tanang babaye kinsa iyang naminyoan sa legal nga paagi panahon sa iyang kinabuhi kon (1) sila namatay na o (2) sila buhi pa, ug sa kasamtangan wala maminyo ug wala maselyo ngadto sa lain nga lalaki (tan-awa sa 38.4.1.3).

Sa dili pa iselyo ang usa ka namatay na nga lalaki ngadto sa namatay na nga babaye nga iyang giminyoan niini nga kinabuhi, ang nabiyudo sa babaye (kon aduna) kinahanglan gayod nga mohatag og sinulat nga pagtugot.

Patay na nga mga Magtiayon nga Nagdiborsyo. Ang namatay na nga mga magtiayon kinsa nadiborsiyo mahimong maselyo pinaagi sa proxy aron ang ilang mga anak maselyo ngadto kanila. Tan-awa sa 28.3.5 kon ang bana o asawa gibakwian sa pagkamiyembro diha sa Simbahan o miluwat sa pagkamiyembro.

Ang pagtugot sa Unang Kapangulohan gikinahanglan sa dili pa ang pagselyo sa patay na nga magtiayon kinsa nakabaton og pagpakanselar sa ilang pagselyo sa dihang buhi pa.

38.4.1.9

Mga Epekto sa Pagdiborsyo

Kon ang magtiayon naselyo ug sa kaulahian nadiborsiyo, ang mga panalangin niana nga pagselyo magpabilin nga moepekto alang sa mga indibidwal nga takos (tan-awa sa 38.4.1.5 ug 38.4.1.10). Ang usa ka miyembro nga nagpabilin nga matinud-anon sa mga pakigsaad sa templo makadawat sa personal nga mga panalangin nga gisaad diha sa templo, bisan kon ang kapikas sa tawo nakalapas sa mga pakigsaad o mibakwi gikan sa kaminyoon. Gisaaran sa Dios ang Iyang matinud-anong mga anak nga lalaki ug mga anak nga babaye og kalinaw ug kalig-on niini nga kinabuhi ug kinabuhing dayon sa kalibotan nga moabot.

Tan-awa sa 38.4.2.1 alang sa impormasyon mahitungod sa mga anak nga natawo human sa diborsiyo.

38.4.1.10

Mga Epekto sa Pagkanselar sa Pagselyo

Samtang ang pagselyo magpabilin nga epektibo, ang usa ka miyembro nga matinud-anon sa mga pakigsaad sa templo makadawat sa personal nga mga panalangin nga gisaad diha sa templo. Tinuod kini bisan kon ang kapikas sa tawo nakalapas sa mga pakigsaad o misibog gikan sa kaminyoon. Dugang pa, ang Dios dili magkinahanglan ni bisan kinsa nga magpabilin diha sa usa ka selyado nga relasyon sa tibuok kahangtoran nga supak sa iyang kabubut-on. Ang Langitnong Amahan moseguro nga ang matag tawo makadawat sa matag panalangin sumala sa iyang mga tinguha ug mga pagpili.

Sa higayon nga ang usa ka pagkanselar sa pagselyo giaprobahan sa Unang Kapangulohan, ang mga panalangin kalabot niana nga pagselyo wala nay epekto.

Si bisan kinsa nga natawo nga anak ngadto sa usa ka babaye human makanselar ang iyang pagkaselyo sa kanhi bana wala matawo diha sa pakigsaad gawas kon siya naselyo ngadto sa laing lalaki sa wala pa matawo ang bata.

Ang mga lider sa pagkapari motambag sa mga miyembro nga nagtinguha og pagkanselar sa usa ka pagselyo aron sa pagtabang kanila nga makasabot niini nga mga baroganan. Ang lokal nga mga lider motahod sa kabubut-on sa mga miyembro niini nga mga desisyon.

38.4.1.11

Mga Epekto sa Pagluwat o Pagbakwi sa Pagkamiyembro sa Simbahan

Human maselyo ang magtiayon diha sa templo, kon ang usa nila moluwat sa pagkamiyembro sa Simbahan o gibakwi ang iyang pagkamiyembro, ang iyang mga panalangin sa templo bakwion usab. Hinoon, ang personal nga mga panalangin sa ordinansa sa pagselyo alang sa kapikas ug mga anak sa tawo magpabilin nga epektibo kon sila magpabilin nga takos.

Ang si bisan kinsa nga mga anak nga matawo sa magtiayon human nga ang usa o silang duha miluwat sa ilang pagkamiyembro o gibakwi ang ilang pagkamiyembro sa Simbahan dili na matawo sa pakigsaad. Tan-awa sa 38.4.2.8.

38.4.2

Pagselyo sa mga Anak ngadto sa mga Ginikanan

Ang mga ginikanan kinahanglang maselyo sa usag usa sa dili pa ang mga anak maselyo ngadto kanila (tan-awa sa 38.4.1).

Ang mga miyembro kinahanglan makigtambag uban sa ilang bishop kon sila adunay mga pangutana mahitungod sa mga palisiya sa pagselyo nga wala matubag dinhi niini nga seksiyon. Ang bishop mokontak sa presidente sa stake kon siya adunay mga pangutana. Ang presidente sa stake mokontak sa Buhatan sa Unang Kapangulohan kon siya adunay mga pangutana.

Ang mga miyembro nga adunay mga problema mahitungod sa mahangtoron nga kinaiyahan sa ordinansa sa pagselyo ug sa ilang may kalabotan nga mga relasyon sa pamilya giawhag sa pagsalig sa Ginoo ug magtinguha sa Iyang paghupay. Ang Langitnong Amahan moseguro nga ang matag tawo makadawat sa matag panalangin sumala sa iyang mga tinguha ug mga pagpili.

38.4.2.1

Mga Anak nga Natawo diha sa Pakigsaad

Ang mga anak nga natawo human naselyo ang ilang inahan ngadto sa usa ka bana diha sa templo natawo sa pakigsaad niana nga pagselyo. Dili sila kinahanglan nga modawat pa sa ordinansa sa pagselyo ngadto sa mga ginikanan.

Usahay ang usa ka babaye kinsa naselyo ngadto sa usa ka lalaki sa kaulahian makabaton og mga anak uban sa laing lalaki. Kon kini mahitabo, kini nga mga anak matawo sa pakigsaad ngadto sa labing bag-o nga pagselyo sa babaye gawas kon sila natawo (1) human ang pagselyo gikanselar o (2) human nga kini gibakwi tungod sa pagluwat o pagbakwi sa pagkamiyembro sa Simbahan.

38.4.2.2

Mga Anak nga Wala Matawo diha sa Pakigsaad

Ang mga anak nga wala matawo diha sa pakigsaad mamahimong kabahin sa mahangturong pamilya pinaagi sa pagpaselyo ngadto:

• Sa ilang natural nga mga ginikanan.

• Sa ilang nagsagop nga ginikanan.

• Usa ka natural o nagsagop nga ginikanan ug ama-ama o ina-ina (tan-awa 38.4.2.5).

Kining mga anak makadawat sa samang mga panalangin ingon nga sila natawo diha sa pakigsaad.

Pagselyo sa buhi nga mga anak ngadto sa buhi nga mga ginikanan. Ang usa ka buhi nga anak maselyo ngadto lang sa duha ka ginikanan—bana ug asawa. Kon ang duha ka ginikanan buhi, sila kinahanglan gayod nga minyo ug naselyo ngadto sa usag usa.

Tan-awa sa 27.4.1 alang sa impormasyon mahitungod sa pag-isyu og mga rekomend sa templo alang sa mga anak nga giselyo ngadto sa ilang mga ginikanan.

Ang mga miyembro nga nag-edad og 21 pataas kinahanglang natugahan aron maselyo ngadto sa ilang mga ginikanan (tan-awa sa 26.4.4).

Pagselyo sa buhi nga mga anak ngadto sa patay na nga mga ginikanan. Ang usa ka buhi nga anak maselyo ngadto lang sa usa ka hugpong sa ginikanan. Ang mga ginikanan kinahanglang maselyo sa usag usa sa dili pa ang mga anak maselyo ngadto kanila.

Ang usa ka miyembro nga usa ka hamtong sa panahon nga namatay ang iyang mga ginikanan sa kasagaran maselyo ngadto niadto nga mga ginikanan. Sumala sa gigamit dinhi, ang pulong mga ginikanan nagpasabot nga tinuod nga mga ginikanan, nagsagop nga mga ginikanan, o tinuod nga ginikanan ug ama-ama o ina-ina.

Ang mosunod nga talaan nagpakita sa mga opsiyon sa pagselyo nga magamit sa tawo kansang mga ginikanan namatay sa dihang siya usa pa ka menor de edad o kinsa walay tulubagon tungod sa intelektuwal nga mga kakulangan.

Sirkumstansiya	Mga Opsiyon
Menor de edad nga bata	Mahimong maselyo ngadto sa nagsagop nga mga ginikanan o legal nga mga tigbantay nga nagpadako kaniya Hulata hangtod nga siya mahimo na nga hamtong ug dayon mopili nga maselyo (1) sa namatay nga mga ginikanan o (2) sa nagsagop nga mga ginikanan nga nagpadako kaniya
Tawo nga walay tulubagon tungod sa intelektuwal nga mga kakulangan	Mahimong maselyo ngadto sa nagsagop nga mga ginikanan o legal nga mga tigbantay nga nagpadako niya

Tan-awa sa 27.4.1 alang sa impormasyon mahitungod sa pag-isyu og mga rekomend sa templo alang sa mga anak nga giselyo ngadto sa ilang mga ginikanan.

Ang mga miyembro nga nag-edad og 21 pataas kinahanglang natugahan aron maselyo ngadto sa ilang mga ginikanan (tan-awa sa 26.4.4).

Pagselyo sa namatay na nga mga anak ngadto sa mga ginikanan (buhi o namatay na). Ang namatay nga tawo kasagaran iselyo ngadto sa iyang naghimugso o nagsagop nga mga ginikanan. Hinuon, ang usa ka patay nga bata mahimo usab nga maselyo ngadto sa:

• Inahan nga naghimugso kaniya ug sa ama-ama.

• Tinuod nga amahan ug sa ina-ina.

• Temporaryong mga tig-amuma [foster parents] o mga apohan kinsa nagpadako sa bata (tan-awa sa 38.4.2.4).

• Usa ka magtiayon kinsa nagtinguha sa pagsagop sa bata apan wala makakompleto sa pagsagop sa wala pa namatay ang bata (tan-awa sa 38.4.2.4).

Kini nga mga pagselyo mahimong buhaton bisan kon ang usa ka patay nga bata naselyo na ngadto sa iyang mga ginikanan nga naghimugso kaniya o sa nagsagop nga mga ginikanan. Ang mga pagselyo ngadto sa dili biyolohikanhon o wala magsagop nga mga ginikanan sa mga sirkumstansiya nga lahi niadtong nalista sa ibabaw nagkinahanglan og pagtugot sa Unang Kapangulohan.

38.4.2.3

Sinagop o Anak-anak nga mga Buhi

Ang buhi nga mga anak nga natawo diha sa pakigsaad o naselyo ngadto sa mga ginikanan dili mahimong maselyo ngadto ni bisan kinsa pa nga mga ginikanan nga walay pagtugot sa Unang Kapangulohan.

Ang buhi nga mga anak kinsa legal nga gisagop ug wala matawo diha sa pakigsaad ug wala usab maselyo ngadto sa kanhi mga ginikanan mahimong maselyo ngadto sa ilang nagsagop nila nga mga ginikanan human nga ang pagsagop nahingpit. Usa ka kopya sa kataposan nga pamahayag sa pagsagop kinahanglan ipresentar didto sa templo. Ang mando sa korte nga naghatag og legal nga kustodiya dili igo nga kalig-onan alang sa usa ka pagselyo. Walay obligasyon sa pag-ila sa tinuod nga mga ginikanan niining mga anak.

Gikinahanglan ang pagtugot sa Unang Kapangulohan alang sa usa ka buhi nga miyembro nga maselyo ngadto sa nangamahan o nanginahan. Kini nga kinahanglanon magamit bisan kon ang tinuod nga mga ginikanan sa giamuma nga anak [foster child] wala mailhi. Ang maong mga paghangyo himoon sa presidente sa stake gamit ang LCR (tan-awa sa 6.2.3).

38.4.2.4

Sinagop o Anak-anak nga Patay Na

Ang namatay nga sinagop nga tawo sa kasagaran iselyo ngadto sa nagsagop niyang mga ginikanan.

Ang namatay nga temporaryong giamuma nga anak [foster child] sa kasagaran iselyo ngadto sa iyang tinuod nga mga ginikanan.

38.4.2.5

Pagselyo sa Buhi nga mga Anak ngadto sa Usa ka Tinuod nga Ginikanan ug sa Ama-ama o Ina-ina

Menor de edad nga mga anak nga walay tulubagon. Ang buhi nga mga anak nga menor de edad ug ang mga anak kinsa walay tulubagon tungod sa kakulangan sa pangisip mahimong maselyo ngadto sa usa ka tinuod nga ginikanan ug sa usa ka mibarog nga ginikanan [stepparent] lang kon ang tanan sa mosunod nga mga kondisyon matuman:

• Ang anak wala matawo diha sa pakigsaad o kanhi nga naselyo.

• Ang anak wala gisagop sa lain nga ginikanan.

• Ang laing tinuod nga ginikanan mihatag og pinirmahan nga sulat sa pagtugot alang sa pagselyo nga mahitabo. Ang mando sa korte nga naghatag og legal nga kustodiya dili igo nga kalig-onan alang sa usa ka pagselyo. Ang sulat sa pagtugot kinahanglan nga mogamit sa pulong nga susama sa mosunod:

  “Ako [ngalan sa tinuod nga ginikanan], mohatag og pagtugot alang ni [ngalan sa bata o mga bata] nga iselyo diha sa templo ngadto nila ni [ngalan sa mga ginikanan]. Ako nakasabot nga ang pagselyo usa ka relihiyoso nga seremonya ug walay legal nga mga implikasyon.”

  Kini nga sulat ipresentar diha sa templo sa dili pa ang pagselyo.

Kon ang laing tinuod nga ginikanan namatay na o kon ang mga katungod sa iyang pagkaginikanan hingpit nga natapos pinaagi sa legal nga proseso, wala na kinahanglana ang pagtugot. Ingon man usab, wala kinahanglana ang pagtugot kon ang anak gikonsiderar nga usa ka hamtong diha sa hurisdiksiyon diin siya nagpuyo.

Kon ang laing tinuod nga ginikanan dili na matultolan human sa tumang pagpaningkamot sa pagpangita kaniya, wala na kinahanglana ang pagtugot. Niini nga sitwasyon, ang bishop o ang presidente sa stake momatuod diha sa beripikasyon nga proseso nga ang tumang mga paningkamot sa pagpangita sa nawala nga ginikanan napakyas. Kon ang laing tinuod nga ginikanan motumaw sa kaulahian nga petsa, ang pagselyo ipaubos sa pagrebyo.

Hamtong nga mga anak. Ang usa ka buhi nga hamtong nga miyembro mahimong maselyo ngadto sa usa ka tinuod nga ginikanan ug sa usa ka mibarog nga ginikanan [stepparent] kon ang miyembro wala matawo diha sa pakigsaad o kanhi naselyo ngadto sa mga ginikanan.

Ang mga miyembro nga nag-edad og 21 pataas kinahanglang matugahan sa dili pa iselyo ngadto sa usa ka tinuod nga ginikanan ug usa ka amaama o inaina.

Ang minyo nga mga miyembro nga nag-edad og ubos sa 21 dili kinahanglan matugahan aron iselyo ngadto sa usa ka tinuod nga ginikanan ug usa ka mibarog nga ginikanan. Hinoon, sila kinahanglan gayod nga adunay balido nga rekomend sa templo aron maselyo ngadto sa mga ginikanan (tan-awa sa 26.4.4).

Tan-awa sa 27.4.1 alang sa impormasyon mahitungod sa pag-isyu og mga rekomend sa templo alang sa mga anak nga giselyo ngadto sa ilang mga ginikanan.

38.4.2.6

Mga Bata nga Gisabak pinaagi sa Artipisyal nga Pagpamabdos o pinaagi sa In Vitro Fertilization

Ang mga anak nga gisabak pinaagi sa artipisyal nga pagpasulod sa binhi o sa in vitro fertilization natawo diha sa pakigsaad kon ang ilang mga ginikanan naselyo na. Kon ang mga bata natawo sa wala pa maselyo ang ilang mga ginikanan, sila mahimong maselyo ngadto sa ilang mga ginikanan human maselyo ang ilang mga ginikanan sa usag usa.

38.4.2.7

Mga Bata nga Natawo sa Puli [Surrogate] nga mga Inahan

Kon ang bata natawo sa puli [surrogate] nga inahan, ang presidente sa stake moduso sa maong butang ngadto sa Buhatan sa Unang Kapangulohan (tan-awa sa 38.6.22).

38.4.2.8

Estado sa mga Anak Kon ang usa ka Pagselyo Gikanselar o Gibakwi

Ang matinud-anong mga anak nga natawo diha sa pakigsaad o naselyo ngadto sa mga ginikanan makapabilin sa panalangin sa mahangtorong pagkaginikanan. Tinuod kini bisan kon:

• Ang pagselyo sa ilang mga ginikanan nakanselar sa kaulahian.

• Ang pagkamiyembro diha sa Simbahan sa bisan hain nga ginikanan sa kaulahian giluwat o gibakwi.

Ang mga anak nga natawo human ang pagselyo sa ilang mga ginikanan gikanselar o gibakwi dili mga natawo diha sa pagkigsaad. Kini nga mga anak mahimong iselyo ngadto sa ilang mga ginikanan human gipahiuli ang mga panalangin sa templo ngadto sa ilang mga ginikanan (kon magamit) ug ang bisan unsa pa nga mga babag gitangtang.

38.5

Sinina ug mga Garment sa Templo

38.5.1

Sinina sa Templo

Atol sa mga ordinansa sa tuga ug pagselyo diha sa templo, ang mga miyembro sa Simbahan magsul-ob og puti nga sinina. Ang mga babaye magsul-ob sa mosunod nga puti nga mga sapot: usa ka taas og bukton [long-sleeve] o three-quarter-sleeve nga sinina (o usa ka sayal ug taas og bukton o three-quarter-sleeve nga blouse), mga medyas o hosiery, ug mga sapatos o mga tsinelas.

Ang mga lalaki magsul-ob sa mosunod nga puti nga mga sapot: taas og bukton nga polo, kurbata o bow tie, mga karsones, mga medyas, ug mga sapatos o mga tsinelas.

Atol sa mga ordinansa sa tuga ug pagselyo, ang mga miyembro mosul-ob og dugang sinina nga pangseremonya sapaw sa ilang puti nga sinina.

38.5.2

Pag-angkon og Sinina ug mga Garment sa Templo

Ang mga lider sa ward ug stake moawhag sa mga miyembro nga natugahan na sa pagbaton sa ilang kaugalingong sinina sa templo. Ang sinina sa templo ug mga garment mahimong mapalit gikan sa tindahan sa Church Distribution o sa store.ChurchofJesusChrist.org. Ang mga klerk sa stake ug ward mahimong motabang sa mga miyembro sa pag-order sa sinina.

Ang bishop mahimong mogamit sa mga pundo sa halad sa puasa sa pagtabang sa mga miyembro nga kinahanglan nga mopalit og sinina ug mga garment sa templo (tan-awa sa kapitulo 22).

Ang pipila ka templo adunay maabangan nga sinina. Kon ang usa ka templo walay maabangan nga sinina, ang mga miyembro kinahanglan nga magdala og sinina sa templo. Tan-awa sa temples.ChurchofJesusChrist.org aron makahibalo kon ang partikular nga templo aduna bay paabangan nga sinina.

Ang mga templo adunay gimintenar nga limitado nga suplay sa sinina sa templo nga mahimong magamit sa mga misyonaryo. Walay bayad sa abang samtang sila anaa sa mga sentro sa pagbansay sa misyonaryo ug kon sila gitugotan nga moapil sa mga ordinansa sa templo samtang nagserbisyo diha sa misyon. Kon gikinahanglan, kini nga sinina mahimong gamiton sa mga misyonaryo nga nagdawat sa ilang kaugalingong tuga.

Ang garment adunay nagkalain-lain nga mga panapton ug mga estilo, lakip ang alang sa mga babaye nga nagmabdos o nagpatotoy (store.ChurchofJesusChrist.org).

Ang mga miyembro nga nagkinahanglan og mga garment nga wala ang iyang sukod mahimong mokontak sa konsultant sa sinina aron mohimo og espesyal nga pag-order. Ang impormasyon sa pagkontak anaa sa store.ChurchofJesusChrist.org/contactus.

Alang sa impormasyon mahitungod sa pagsukod sa mga garment sa dili pa mopalit niini, tan-awa sa store.ChurchofJesusChrist.org.

38.5.3

Mga Garment ug Sinina sa Templo alang sa mga Miyembro nga Adunay mga Kakulangan o mga Pagpangatol sa Lawas [Allergy]

Ang espesyal nga gi-order nga mga garment mahimong paliton alang sa mga miyembro kinsa naglubog na, adunay grabe nga pisikal nga mga kakulangan, o adunay mga allergy sa ubang panapton o mga garment (tan-awa sa “Garments and Sacred Clothing,” store.ChurchofJesusChrist.org).

Ang mas mubo nga mga kupo sa templo anaa alang sa mga miyembro kinsa anaa sa mga wheelchair o kinsa adunay ubang mga panginahanglan (tan-awa sa store.ChurchofJesusChrist.org).

38.5.4

Paghimo og Sinina alang sa Templo

Ang mga miyembro kinahanglang dili mohimo og sinina alang sa seremonya sa templo o mga garment sa templo.

38.5.5

Pagsul-ob sa Garment

Ang Unang Kapangulohan mihatag sa mosunod nga giya bahin sa pagsul-ob sa garment:

“Ang garment sa balaan nga pagkapari nagpahinumdom kanato sa tabil diha sa templo, ug kana nga tabil nagsimbolo ni Jesukristo. Sa higayon nga imong isul-ob ang imong garment, imong gisul-ob ang usa ka sagrado nga simbolo ni Jesukristo. Ang pagsul-ob niini usa ka panggawas nga pagpahayag sa imong kinahiladman nga pasalig sa pagsunod Kaniya. Ang garment usa usab ka pahinumdom sa imong mga pakigsaad sa templo. Kinahanglan nimong isul-ob ang garment matag adlaw ug gabii sa tibuok nimong kinabuhi. Kon gikinahanglan kining huboon alang sa mga kalihokan nga dili makataronganon nga mabuhat samtang nagsul-ob sa garment, paninguha sa pagsul-ob og balik niini sa labing daling panahon. Samtang ikaw maghupot sa imong mga pakigsaad, lakip ang sagrado nga pribilihiyo sa pagsul-ob sa garment sigon sa gitudlo diha sa mga ordinansa sa initiatory, ikaw adunay mas dako nga akses sa kaluoy, proteksiyon, kalig-on, ug gahom sa Manluluwas.”

Ang garment kinahanglang isul-ob ilawom sa sinina. Usa ka personal nga butang ang kagustohan kon magsul-ob og laing pang-ilawom nga mga sapot nga isapaw o sa ilawom sa garment sa templo.

Ang mga miyembro kinahanglang dili mousab sa garment aron ipaangay sa nagkalainlaing mga estilo sa mga sinina.

Ang mga miyembro kinahanglan nga dili mopakita sa garment sa dili angay nga paagi ngadto sa wala makasabot sa kahulogan niini.

Tan-awa sa 26.3.3.

38.5.6

Pag-atiman sa Garment

Ang garment usa ka sagrado nga simbolo ni Jesukristo. Ang paagi sa atong pag-atiman sa atong mga garment kinahanglan nga mopakita nianang sagrado nga simbolismo.

Ang mga miyembro mahimong motahi sa mga gisi sa garment basta ang orihinal nga disenyo dili usbon. Pero, kon ang timaan natangkas o nawala na, kinahanglang ilisdan sa mga miyembro ang garment.

38.5.7

Pagsul-ob sa Garment sa Militar, Bombero nga Serbisyo, Pagpatuman sa Balaod, o sa Susama nga Ahensya

Ang mga lagda niini nga seksiyon magamit ngadto sa natugahan nga mga miyembro nga adunay piho nga gikinahanglang uniporme samtang nagserbisyo:

• Sa militar.

• Isip mga bombero.

• Isip mga opisyal sa pagpatuman sa balaod.

• Isip mga ahente alang sa seguridad sa gobyerno.

Kon mahimo, kini nga mga miyembro kinahanglang magsul-ob sa garment sama sa ubang miyembro. Pero, kinahanglang likayan nila ang dili angay nga pagpakita sa garment ngadto sa wala makasabot sa kahulogan niini. Ang mga miyembro kinahanglan magtinguha sa giya sa Espiritu ug mogamit og delikadesa [tact], diskresyon, ug kaalam. Sa pipila ka sitwasyon, tingali labing maayo nga temporaryong hiposon ang garment ug sul-obon kini pag-usab kon itugot na sa mga kahigayonan. Hinoon, ang pagkadili lang kombenyente sa pagsul-ob sa garment dili ikapangatarungan nga hiposan lang una kini.

Usahay ang mga regulasyon sa serbisyo makapugong sa usa ka miyembro sa pagsul-ob sa garment. Niini nga mga sitwasyon, ang relihiyoso nga kahimtang sa miyembro dili maapektohan. Ang Ginoo nagtutok sa kasingkasing ug andam nga hunahuna (tan-awa sa Doktrina ug mga Pakigsaad 64:34). Basta ang mga miyembro magpabilin nga takos, siya makadawat gihapon sa mga panalangin nga may kalabotan sa pagsul-ob sa garment. Kon ang mga miyembro dili makahimo sa pagsul-ob og garment, sila kinahanglang mosul-ob dayon niini pag-usab kutob sa gitugot sa panahon.

Ang mga miyembro nga anaa niini nga mga organisasyon kinahanglang mokonsulta sa ilang indibidwal nga mga giserbisyohan bahin sa piho nga mga kinahanglanon nga angayng tumanon alang sa mga pang-ilawom nga garment, sama sa kolor o estilo sa liogan. Kini nga mga miyembro mahimong mopadala og giaprobahan sa organisasyon nga sinina nga nagtuman sa mga lagda sa garment ngadto sa Beehive Clothing aron markahan isip gitugotan nga mga garment. Ang mga lagda ug dugang nga mga instruksiyon gihatag diha sa Lagda sa Pag-sul-ob sa Garment alang sa Militar, Nagpatuman sa Balaod, ug mga Bombero.

38.5.8

Medikal nga mga Kondisyon Nga Makapugong sa mga Miyembro sa Pagsul-ob sa Garment

Kon posible, ang mga miyembro nga adunay medikal nga mga kondisyon kinahanglang magsul-ob sa garment sama sa ubang miyembro.

Ang espesyal nga gi-order nga mga garment mahimong paliton alang sa mga miyembro nga adunay medikal nga mga kondisyon o naggamit og medikal nga mga himan. Ang mga miyembro nga magkinahanglan og espesyal nga gi-order nga mga garment mahimong mokontak sa konsultant sa sinina aron ihatag ang order. Ang impormasyon sa pagkontak anaa sa store.ChurchofJesusChrist.org/contactus.

Ang pipila ka medikal nga mga kondisyon o medikal nga mga himan tingali makapalisod sa mga miyembro sa pagsul-ob sa usa o sa duha ka piraso sa garment. Ang mga miyembro kinahanglang magtinguha sa giya sa Espiritu sa maong mga sitwasyon. Sa pipila ka sitwasyon, tingali labing maayo nga temporaryong hiposon ang garment ug sul-obon kini pag-usab kon itugot na sa mga kahigayonan.

Kon ang usa ka miyembro dili makasul-ob sa garment tungod sa medikal nga kondisyon o himan, ang iyang relihiyoso nga kahimtang dili maapektohan. Ang Ginoo nagtutok sa kasingkasing ug andam nga hunahuna (tan-awa sa Doktrina ug mga Pakigsaad 64:34). Basta ang miyembro magpabilin nga takos, siya makadawat sa mga panalangin nga may kalabotan sa pagsul-ob sa garment.

38.5.9

Pagdispatsar sa mga Garment ug Sinina alang sa Seremonya sa Templo

Sa paglabay sa gision na nga mga garment sa templo, ang mga miyembro kinahanglan nga mogunting ug molabay sa mga timaan. Dayon ang mga miyembro mogunting sa nahibilin nga panapton aron dili na kini mailhan nga usa ka garment. Ang nahibilin nga panapton mahimo nang ilabay.

Sa pagdispatsar sa gision na nga sinina alang sa seremonya sa templo, ang mga miyembro kinahanglan nga mogunting-gunting niini aron ang orihinal nga gamit dili na mailhan. Ang panapton dayon kinahanglan nga ilabay.

Ang mga miyembro mahimong mohatag og mga garment ug sinina sa templo nga maayo pa og kondisyon ngadto sa ubang takos nga natugahan nga mga miyembro. Ang mga miyembro kinahanglang dili mohatag sa mga garment o sinina alang sa seremonya sa templo ngadto sa mga thrift store, mga bishop storehouse, mga templo, o mga charity.

38.5.10

Sinina sa Templo alang sa Lubong

Kon posible, ang namatay nga mga miyembro kinsa natugahan kinahanglan nga ilubong o sunugon [cremate] nga gisul-oban sa sinina sa templo. Kon ang mga tradisyon sa kultura o naandan nga mga pamaagi sa paglubong makahimo niini nga dili angay o lisod, ang sinina mahimong pil-on ug ibutang tupad sa lawas.

Ang mga miyembro lamang nga natugahan sa dihang buhi pa ang mahimong ilubong o sunugon nga magsul-ob sa sinina sa templo. Ang natugahan nga tawo kinsa mihunong sa pagsul-ob sa garment sa wala pa ang iyang kamatayon mahimong ilubong o sunugon nga magsul-ob sa sinina sa templo kon ang pamilya mohangyo.

Ang usa ka tawo kansang mga panalangin wala pa mapahiuli human sa pagbakwi o pagluwat sa pagkamiyembro diha sa Simbahan dili mahimong ilubong o sunugon nga magsul-ob sa sinina sa templo.

Ang natugahan nga tawo sa dihang buhi pa ug kinsa namatay tungod sa paghikog mahimong ilubong o sunugon nga magsul-ob sa sinina sa templo.

Ang sinina sa templo nga gamiton alang sa paglubong o pagsunog sa patay nga lawas dili kinahanglang bag-o, apan kinahanglan nga maayo ang kondisyon ug limpyo. Ang kaugalingong sinina sa templo sa miyembro mahimong gamiton.

Ang usa ka miyembro kinsa ilubong o sunugon nga magsul-ob sa sinina sa templo mahimong sininaan sa natugahan nga sakop sa pamilya nga sama ang sekso o sa iyang kapikas. Kon walay makahimo nga sakop sa pamilya o dili gustong mopasul-ob sa sinina ngadto sa lawas sa natugahan nga lalaki, ang bishop mahimong mohangyo sa presidente sa korum sa mga elder sa pagdapit sa usa ka natugahan nga lalaki sa pagsinina sa lawas o sa pagdumala sa eksakto nga pagsul-ob sa sinina. Kon walay makahimo nga sakop sa pamilya o dili gustong mopasul-ob sa sinina ngadto sa lawas sa usa ka natugahan nga babaye, ang bishop mahimong mohangyo sa presidente sa Relief Society sa pagdapit sa usa ka natugahan nga babaye sa pagsinina sa lawas o pagdumala sa eksakto nga pagsul-ob sa sinina. Segurohon sa mga lider nga kining buluhaton mahatag ngadto sa usa ka tawo nga dili mosupak niini.

Ang lawas sa usa ka lalaki sininaan sa mga garment sa templo ug sa mosunod nga puti nga mga sapot: usa ka taas og bukton nga polo, kurbata o bow tie, karsones, medyas, ug sapatos o tsinelas. Ang lawas sa usa ka babaye sininaan sa mga garment sa templo ug sa mosunod nga puti nga mga sapot: usa ka taas og bukton nga sinina (o usa ka sayal ug taas og bukton o three-quarter-sleeve nga blouse), medyas o hosiery, ug sapatos o tsinelas.

Ang sinina alang sa seremonya sa templo isul-ob sa lawas sumala sa gisulti sa tuga. Ang kupo ibutang sa tuong abaga ug ihigot ang drawstring sa wala nga hawak. Ang apron ihigot libot sa hawak. Ang sash ibaligtos libot sa hawak ug ihigot nga mag-bow sa wala nga bat-ang. Ang kalo sa lalaki sa kasagaran ibutang tupad sa iyang lawas hangtod oras na nga sirhan ang lungon o sudlanan. Ang kalo ibutang dayon nga ang bow anaa sa ibabaw sa walang dunggan. Ang belo sa babaye mahimong ibutang diha sa unlan sa luyo sa iyang ulo. Ang pagtabon sa nawong sa usa ka babaye sa dili pa ang paglubong o pagsunog sa patay nga lawas opsiyonal, sumala sa pagtino sa pamilya.

Sa ubang mga dapit ang lisensyado lamang nga direktor sa paglubong o empleyado sa direktor ang tugutan sa pagdumala sa patay nga lawas. Niining mga kahimtang, ang usa ka natugahan nga sakop sa pamilya o natugahan nga tawo nga gisangonan sa bishop o presidente sa Relief Society moseguro nga ang sinina tukma nga pagkahimutang diha sa lawas.

Ang ubang mga nasod magkinahanglan nga ang namatay sul-oban og sinina nga madunot [biodegradable] kon ilubong na sila. Ang biodegradable nga sinina sa templo anaa sa store.ChurchofJesusChrist.org.

Sa mga dapit diin ang sinina sa templo tingali lisod nga makuha sa panahon sa paglubong, ang mga presidente sa stake kinahanglang magtipig og dili mominos sa duha ka kompleto nga mga sinina sa templo nga medyum ang gidak-on, usa alang sa lalaki ug usa alang sa babaye.

Kon walay magamit nga sinina sa templo, ang namatay nga natugahan nga miyembro sininaan alang sa lubong nga magsul-ob og garment ug laing angay nga sinina.

38.6

Mga Palisiya sa Moral nga mga Isyu

Ang pipila ka palisiya niini nga seksiyon mao ang mahitungod sa mga butang nga “wala iawhag” sa Simbahan.” Ang mga miyembro sa Simbahan sa kasagaran dili makasinati og mga restriksiyon sa pagkamiyembro tungod sa ilang mga desisyon mahitungod niini nga mga butang. Hinoon, ang tanang mga tawo sa kataposan manubag ngadto sa Dios alang sa ilang mga desisyon.

38.6.1

Aborsyon

Ang Ginoo misugo, “Dili kamo … magpatay, ni magbuhat sa bisan unsa nga butang nga sama niini” (Doktrina ug mga Pakigsaad 59:6). Ang Simbahan supak sa pinili nga aborsyon alang sa personal o sosyal nga kasayon. Ang mga miyembro kinahanglan nga dili mopaubos, mopahigayon, makigsabot, mobayad, mouyon, o moawhag og aborsyon. Ang bugtong posible nga eksepsiyon mao kon:

• Ang pagmabdos miresulta tungod sa paglugos o pakighilawas sa duol nga kabanay [incest].

• Ang usa ka takos nga doktor motino nga ang kinabuhi o panglawas sa inahan seryoso nga nameligro.

• Ang usa ka takos nga doktor motino nga ang puya adunay grabe nga mga depekto nga ang bata dili mabuhi human sa pagkatawo.

Bisan pa niini nga mga eksepsiyon dili awtomatik nga makatarunganon ang aborsyon. Ang aborsyon usa ka seryoso kaayo nga butang. Kinahanglan nga ikonsiderar lamang kini human nga ang mga tawo nga responsable nakadawat og kompirmasyon pinaagi sa pag-ampo. Ang mga miyembro makigtambag sa ilang mga bishop isip kabahin niini nga proseso.

Ang tigdumalang mga opisyal mabinantayong morebyo sa mga sirkumstansiya kon ang usa ka miyembro sa Simbahan nalambigit ba og aborsyon. Ang konseho sa pagkamiyembro [membership council] posible nga gikinahanglan kon ang usa ka miyembro mosumiter, mopahigayon, mobayad, o moawhag og usa ka aborsyon (tan-awa sa 32.6.2.5). Hinoon, ang konseho sa pagkamiyembro dili kinahanglan nga ikonsiderar kon ang usa ka miyembro nalambigit sa usa ka aborsyon sa wala pa ang bunyag. Ni adunay mga konseho sa pagkamiyembro o mga restriksiyon nga ikonsiderar alang sa mga miyembro kinsa nalambigit sa usa ka aborsyon alang sa bisan unsa sa tulo ka rason nga gilatid daan niini nga seksiyon.

Ang mga bishop mopadangat sa mga pangutana bahin sa piho nga mga kaso ngadto sa presidente sa stake. Ang presidente sa stake mahimong mopadangat sa mga pangutana ngadto sa Buhatan sa Unang Kapangulohan kon gikinahanglan.

Sumala sa gipadayag na, ang usa ka tawo mahimong maghinulsol ug mapasaylo alang sa sala sa aborsyon.

38.6.2

Abuso

Ang pag-abuso mao ang pagdaugdaog o pagpasagad sa uban sa paagi nga makahimo og pisikal, sekswal, emosyonal, o pinansyal nga kadaot. Ang baroganan sa Simbahan mao nga ang pag-abuso sa bisan unsa nga matang dili angay nga pasagdan. Kadtong moabuso sa ilang mga kapikas, mga anak, ubang mga sakop sa pamilya, o ni bisan kinsa nakasupak sa mga balaod sa Dios ug sa tawo.

Ang tanang miyembro, ilabi na ang mga ginikanan ug mga lider, giawhag nga magmabinantayon ug magmakugihon ug mobuhat sa tanan kutob sa ilang mahimo aron sa pagpanalipod sa mga anak ug sa uban batok sa pag-abuso. Kon ang mga miyembro makahibalo og mga sitwasyon sa pag-abuso, sila mo-report niini ngadto sa sibil nga mga awtoridad ug magpakitambag sa bishop. Kinahanglang seryosohon sa mga lider sa Simbahan ang mga report sa pag-abuso ug dili gayod mobaliwala niini.

Ang tanang hamtong kinsa naglihok uban sa kabataan o kabatan-onan kinahanglan nga mokompleto sa pagbansay sa pagpanalipod sa kabataan ug kabatan-onan sulod sa usa ka bulan human mapaluyohi (tan-awa sa ProtectingChildren.ChurchofJesusChrist.org). Sila mosubli sa pagbansay matag tulo ka tuig.

Kon mahitabo ang pag-abuso, ang una ug diha-diha nga responsibilidad sa mga lider sa Simbahan mao ang pagtabang niadtong giabusohan ug sa pagpanalipod sa mga tawo nga daling mabiktima gikan sa umaabot nga pag-abuso. Ang mga lider kinahanglang dili gayod moawhag sa usa ka tawo nga magpabilin diha sa panimalay o sitwasyon nga anaa ang pag-abuso o dili luwas.

38.6.2.1

Help Line kalabot sa Pag-abuso

Sa ubang nasod, ang Simbahan naka-establisar og kompidensiyal nga help line sa pag-abuso aron sa pagtabang sa mga presidente sa stake ug mga bishop. Kining mga lider kinahanglang motawag dayon sa help line mahitungod sa matag sitwasyon diin ang usa ka tawo tingali giabusohan—o anaa sa kakuyaw nga maabusohan. Sila kinahanglan usab motawag niini kon sila makahibalo sa usa ka miyembro nga nagtan-aw, namalit, o nag-apud-apod og pornograpiya nga naggamit og bata.

Ang help line anaa alang sa mga bishop ug mga presidente sa stake nga matawagan 24 oras sa usa ka adlaw, 7 ka adlaw sa usa ka semana. Ang impormasyon sa pagkontak gipakita sa ubos.

• Estados Unidos ug Canada: 1-801-240-1911 o 1-800-453-3860, ekstensiyon 2-1911

• United Kingdom: 0800 970 6757

• Ireland: 1800 937 546

• Mga nasod sa Europe Central Area: [phone] o [e-mail]

• Australia: 02 9841 5454 (gikan sa sulod sa nasod)

• New Zealand: 09 488 5592 (gikan sa sulod sa nasod)

Ang mga bishop ug ang mga presidente sa stake kinahanglang motawag sa help line kon motubag sa mga sitwasyon nga naglakip sa bisan unsa nga matang sa pag-abuso. Ang legal ug klinikal nga mga propesyonal motubag sa ilang mga pangutana. Kini nga mga propesyonal mohatag usab og mga instruksiyon mahitungod kon unsaon sa:

• Pagtabang sa mga biktima ug pagtabang sa pagpanalipod kanila gikan sa dugang nga pag-abuso.

• Pagtabang sa pagpanalipod sa potensyal nga mga biktima.

• Pagtuman sa legal nga mga kinahanglanon alang sa pagreport sa pag-abuso.

Ang Simbahan mapasaligon sa pagtuman sa balaod sa pag-report sa pag-abuso (tan-awa sa 38.6.2.7). Ang mga balaod managlahi sa matag lugar, ug kadaghanan sa mga lider sa Simbahan dili mga eksperto kalabot sa balaod. Ang pagtawag sa help line importante alang sa mga bishop ug sa mga presidente sa stake sa pagtuman sa ilang mga responsibilidad sa pagsumbong sa pag-abuso.

Ang bishop kinahanglan usab nga mopahibalo sa iyang presidente sa stake bahin sa mga panghitabo sa pag-abuso.

Sa mga nasod nga walay help line, ang usa ka bishop nga nakahibalo sa pag-abuso kinahanglang mokontak sa iyang presidente sa stake. Ang presidente sa stake kinahanglang mangayo og giya gikan sa legal counsel sa area sa buhatan sa area. Siya usab giawhag nga magpakitambag sa kawani sa Mga Serbisyo sa Pamilya [Family Services] o sa manedyer sa welfare ug pagbarog pinaagi sa kinaugalingong paningkamot sa buhatan sa area.

38.6.2.2

Pagtambag sa mga Kaso sa Pag-abuso

Ang mga biktima sa pag-abuso kasagaran mag-antos og grabe nga truma. Ang mga presidente sa stake ug mga bishop motubag uban ang kinasingkasing nga kapuangod ug empatiya. Sila mohatag og espirituwal nga pagtambag ug pagsuporta aron sa pagtabang sa mga biktima nga makabuntog sa makadaot nga mga epekto sa pag-abuso.

Usahay ang mga biktima mobati nga naulaw o sad-an. Ang mga biktima dili sad-an. Ang mga lider makatabang nila ug sa ilang mga pamilya nga makasabot sa gugma sa Dios ug sa pagkaayo nga magagikan pinaagi ni Jesukristo ug sa Iyang Pag-ula (tan-awa sa Alma 15:8; 3 Nephi 17:9).

Ang mga presidente sa stake ug ang mga bishop kinahanglang motabang niadtong nakahimo sa pag-abuso nga maghinulsol ug mohunong sa ilang abusado nga batasan. Kon ang usa ka hamtong nakahimo og sekswal nga kalapasan batok sa usa ka bata, ang batasan tingali lisod kaayo usbon. Ang proseso sa paghinulsol mahimong molungtad og dugay. Tan-awa sa 38.6.2.3.

Ang mga presidente sa stake ug ang mga bishop kinahanglang magmainampingon ug sensitibo kon makigtambayayong sa mga pamilya sa mga biktima ug sa mga nakahimo sa pag-abuso.

Ang giya alang sa pagtambag sa mga biktima ug sa mga malapason anaa sa Abuse: How to Help.

Agi og dugang sa pagdawat og dinasig nga tabang sa mga lider sa Simbahan, ang mga biktima, mga nakahimo sa pag-abuso, ug ang ilang mga pamilya mahimong magkinahanglan og propesyonal nga pagtambag. Alang sa impormasyon, tan-awa sa 31.3.6.

Alang sa impormasyon mahitungod kon unsay buhaton sa mga bishop ug sa mga presidente sa stake kon makahibalo sa bisan unsa nga matang sa pag-abuso, tan-awa sa 38.6.2.1. Alang sa impormasyon mahitungod sa pagtambag sa mga kaso sa sekswal nga pag-abuso, paglugos, o sa ubang mga matang sa sekswal nga pag-ataki, tan-awa sa 38.6.18.2.

Tan-awa usab sa FamilyServices.ChurchofJesusChrist.org.

38.6.2.3

Pag-abuso sa Bata o Batan-on

Ang pag-abuso sa usa ka bata o batan-on usa ka seryoso kaayo nga sala (tan-awa sa Lucas 17:2). Sumala sa paggamit dinhi, ang pag-abuso sa bata o batan-on naglakip sa mosunod:

• Pisikal nga pag-abuso: Pagpahamtang og seryoso nga kadaot sa lawas pinaagi sa pisikal nga kapintas. Ang pipila ka kadaot mahimong dili makita.

• Sekswal nga pag-abuso o pagpahimulos: Ang paghimo og bisan unsa nga sekswal nga kalihokan uban sa usa ka bata o batan-on o tinuyo nga pagtugot o pagtabang sa uban sa paghimo sa maong kalihokan. Sumala sa paggamit dinhi, ang sekswal nga pag-abuso wala maglakip sa inuyunan nga sekswal nga kalihokan tali sa duha ka menor de edad kinsa magdug-ol ra og pangidaron.

• Emosyonal nga pag-abuso: Gamit ang mga aksiyon ug mga pulong nga seryosong makadaot sa pagbati sa usa ka bata o batan-on sa pagtahud sa kaugalingon o bili sa kaugalingon. Kini sa kasagaran naglakip sa pabalik-balik ug nagpadayon nga mga panginsulto, manipulasyon, ug pagpanaway nga makapahiubos ug makapabati nga dili importante. Kini usab mahimong maglakip sa grabe nga pagpasagad.

• Pornograpiya nga naggamit og bata: Tan-awa sa 38.6.6.

Kon ang bishop o ang presidente sa stake makahibalo o makasuspetsa nga dunay pag-abuso sa bata o batan-on, siya mosunod dayon sa mga instruksiyon diha sa 38.6.2.1. Siya usab molihok sa pagtabang sa pagpanalipod batok sa dugang nga pag-abuso.

Ang konseho sa pagkamiyembro ug pagbutang og annotation gikinahanglan kon ang usa ka hamtong nga miyembro miabuso sa usa ka bata o batan-on sumala sa gipasabot niini nga seksiyon. Tan-awa usab sa 32.6.1.1 ug sa 38.6.2.5.

Ang pisikal o emosyonal nga pangdaog-daog tali sa kabataan o kabatan-onan sa susama og pangidaron kinahanglang atimanon sa mga lider sa ward. Usa ka konseho sa pagkamiyembro dili ipahigayon.

38.6.2.4

Ang Pag-abuso sa usa ka Kapikas o Laing Hamtong

Ang pag-abuso sa usa ka kapikas o laing hamtong mahimong mahitabo sa daghang mga paagi. Kini naglakip sa pisikal, sekswal, emosyonal, ug pinansyal nga pag-abuso. Ang mga hamtong nga tigulang, daling mabiktima, o ang adunay kakulangan usahay taas og risgo sa pag-abuso.

Kanunay walay usa lang ka kahulogan sa pag-abuso nga magamit sa tanang sitwasyon. Hinoon, magkalain-lain ang kagrabe sa abusado nga kinaiya. Kining nagkalain-lain nga kinaiya magsugod sa panagsa nga paggamit og mahait nga mga pulong ngadto sa pagpahamtang og seryoso nga kadaot.

Kon ang usa ka bishop o ang presidente sa stake makahibalo sa pag-abuso sa kapikas o laing hamtong, sundon dayon niya ang mga instruksiyon diha sa 38.6.2.1. Siya usab molihok sa pagtabang sa pagpanalipod batok sa dugang nga pag-abuso.

Ang mga lider magtinguha og giya sa Espiritu aron sa pagtino kon ang personal nga pagtambag o usa ka konseho sa pagkamiyembro mao ba ang labing angay nga sitwasyon sa pagtubag sa pag-abuso. Sila usab mahimong magpakitambag sa ilang direkta nga lider sa pagkapari mahitungod sa sitwasyon. Hinoon, ang bisan unsa nga pag-abuso sa usa ka kapikas o laing hamtong nga moabot ngadto sa mga lebel nga gihulagway sa ubos nagkinahanglan sa pagpahigayon og konseho sa pagkamiyembro.

• Pisikal nga pag-abuso: Pagpahamtang og seryoso nga kadaot sa lawas pinaagi sa pisikal nga kapintas. Ang pipila ka kadaot mahimong dili makita.

• Sekswal nga pag-abuso: Tan-awa ang mga sitwasyon nga gihisgotan diha sa 38.6.18.3.

• Emosyonal nga pag-abuso: Gamit ang mga aksiyon ug mga pulong nga seryosong makadaot sa pagbati sa usa ka tawo sa pagtahud sa kaugalingon o bili sa kaugalingon. Kini sa kasagaran naglakip sa pabalik-balik ug nagpadayon nga mga panginsulto, manipulasyon, ug pagpanaway nga makapahiubos ug makapabati nga dili importante.

• Pinansyal nga pag-abuso: Pagpahimulos sa usa ka tawo sa pinansyal nga paagi. Kini maglakip sa dili legal o walay pagtugot nga paggamit sa kabtangan, kwarta, o ubang mga bahandi sa usa ka tawo. Kini usab maglakip sa malimbungon nga pag-angkon og gahom sa pagdumala sa panalapi sa usa ka tawo. Kini maglakip sa paggamit sa gahom sa panalapi aron sa pagpugos sa kinaiya. Tan-awa usab sa 32.6.1.3.

38.6.2.5

Mga Calling sa Simbahan, Mga Rekomend sa Templo, ug Pagbutang og Annotation sa Rekord sa Pagkamiyembro

Ang mga miyembro kinsa miabuso sa uban kinahanglang dili hatagan og mga calling sa Simbahan ug dili mahimong maghupot og rekomend sa templo hangtod nga nakahinulsol sila ug ang mga restriksiyon sa pagkamiyembro natangtang na.

Kon ang usa ka tawo sekswal nga miabuso og bata o batan-on o seryoso nga miabuso og bata o batan-on sa pisikal o emosyonal nga paagi, ang iyang rekord sa pagkamiyembro butangan og annotation. Siya kinahanglang dili hatagan og bisan unsang calling o buluhaton nga naglambigit og mga bata o mga batan-on. Kini naglakip sa dili paghatag og buluhaton sa pagpangalagad ngadto sa usa ka pamilya nga adunay mga batan-on o mga bata diha sa panimalay. Kini naglakip usab sa dili paghatag og batan-on isip usa ka kauban sa pagpangalagad. Kining mga restriksiyon kinahanglang ipabilin gawas kon motugot ang Unang Kapangulohan nga tangtangon ang annotation. Tan-awa sa 32.14.5 alang sa impormasyon mahitungod sa mga annotation.

38.6.2.6

Mga Konseho sa Stake ug sa Ward

Sa mga miting sa konseho sa stake ug sa ward, ang mga kapangulohan sa stake ug mga bishopric kanunay nga morebyo sa mga palisiya ug mga lagda sa Simbahan bahin sa pagpugong ug pagtubag sa pag-abuso. Sila magtudlo sa importanteng mga mensahe diha sa seksiyon nga Abuso sa Tabang sa Kinabuhi diha sa Gospel Library. Sila modapit og panaghisgotan gikan sa mga sakop sa konseho. Ang mga lider ug mga sakop sa konseho kinahanglang magtinguha og giya sa Espiritu samtang magtudlo ug maghisgot sila niining sensitibo nga hilisgotan.

Ang mga sakop sa konseho kinahanglan usab nga mokompleto sa pagbansay sa pagpanalipod sa kabataan ug kabatan-onan (tan-awa sa 38.6.2).

38.6.2.7

Legal nga mga Isyu Kalabot sa Pag-abuso

Kon ang abusado nga mga kalihokan sa usa ka miyembro nakalapas og balaod, ang bishop o ang presidente sa stake kinahanglang moawhag sa miyembro sa pag-report niining mga kalihokan ngadto sa mga tinugyanan sa balaod o sa ubang angay nga mga awtoridad sa gobyerno. Ang bishop o ang presidente sa stake makakuha og impormasyon mahitungod sa mga kinahanglanon alang sa lokal nga pagreport pinaagi sa help line sa Simbahan (tan-awa sa 38.6.2.1). Kon ang mga miyembro adunay mga pangutana mahitungod sa mga kinahanglanon sa pag-report, siya moawhag kanila sa pagkuha og kwalipikadong legal nga tambag.

Ang mga lider sa Simbahan ug ang mga miyembro kinahanglan nga motuman sa tanang legal nga mga obligasyon sa pag-report sa pag-abuso ngadto sa sibil nga mga awtoridad. Sa ubang mga dapit, ang mga lider ug mga magtutudlo kinsa nakigtambayayong sa kabataan ug kabatan-onan gikonsiderar nga “sinugo nga mga reporter” ug kinahanglang mo-report sa pag-abuso ngadto sa legal nga mga awtoridad. Sa samang paagi, sa daghang mga dapit, si bisan kinsang tawo nga nakahibalo og pag-abuso kinahanglang mo-report niini ngadto sa legal nga mga awtoridad. Ang mga bishop ug ang mga presidente sa stake kinahanglang motawag sa help line alang sa mga detalye mahitungod sa sinugo nga mga reporter ug sa ubang legal nga mga kinahanglanon alang sa pag-report sa pag-abuso. Ang palisiya sa Simbahan mao ang pagsunod sa balaod.

38.6.3

Artipisyal nga Pagpamabdos

Tan-awa sa 38.6.9.

38.6.4

Pagkontrol sa Pagpanganak

Ang pisikal nga kasuod tali sa bana ug asawa gituyo nga maanindot ug sagrado. Kini gi-orden sa Dios aron malalang ang mga anak ug alang sa pagpadayag sa gugma tali sa bana ug asawa (tan-awa sa 2.1.2).

Usa kini ka talagsaong pribilehiyo sa minyo nga magtiayon kinsa makahimo sa pagpanganak sa paghatag og mortal nga mga lawas alang sa espiritu nga mga anak sa Dios, diin sila maoy responsable sa pag-alima ug pagpadako (tan-awa sa 2.1.3). Ang desisyon sa pagbaton og pila ka anak ug kanus-a magbaton og mga anak personal ug pribado kaayo. Kinahanglan kini nga ipabilin tali sa magtiayon ug sa Ginoo. Ang mga miyembro sa Simbahan kinahanglan nga dili mohukom sa usag usa niini nga butang.

Ang Simbahan nagdili sa surgical sterilization nga usa ka kapilian nga matang sa pagkontrol sa pagpanganak. Ang surgical sterilization naglakip sa mga pamaagi sama sa mga pagpakapon [vasectomy] ug mga tubal ligation. Hinoon, kini nga desisyon usa ka personal nga butang nga sa kataposan anaa sa paghukom ug mainampoong konsiderasyon sa bana ug asawa. Ang mga magtiayon kinahanglan nga magkahiusa sa pagtinambagay ug magtinguha og kompirmasyon sa Espiritu sa paghimo niini nga desisyon.

Ang surgical sterilization usahay gikinahanglan alang sa medikal nga mga rason. Makatabang sa mga miyembro ang pagpakitambag sa medikal nga mga propesyonal.

38.6.5

Kaputli ug Kamaunungon

Ang balaod sa Ginoo sa kaputli mao:

• Ang pagpugong gikan sa sekswal nga mga relasyon gawas sa legal nga kaminyoon tali sa usa ka lalaki ug usa ka babaye.

• Ang kamaunungon sulod sa kaminyoon.

Ang pisikal nga kasuod tali sa bana ug asawa gituyo nga maanindot ug sagrado. Kini gi-orden sa Dios aron malalang ang mga anak ug alang sa pagpadayag sa gugma tali sa bana ug asawa.

Ang usa ka lalaki ug usa ka babaye lamang kinsa legal ug pinasubay sa balaod nga naminyo isip bana ug asawa ang adunay katungod sa sekswal nga mga relasyon. Sa panan-aw sa Dios, ang moral nga kalimpyo importante kaayo. Ang kalapasan sa balaod sa kaputli seryoso kaayo (tan-awa sa Exodo 20:14; Mateo 5:28; Alma 39:5). Kadtong nalambigit migamit sa sayop nga paagi sa sagrado nga gahom nga gihatag sa Dios sa paglalang og kinabuhi.

Ang usa ka konseho sa pagkamiyembro [membership council] mahimong gikinahanglan kon ang usa ka miyembro:

• Adunay sekswal nga mga relasyon nga gawas sa legal nga kaminyoon tali sa usa ka lalaki ug usa ka babaye, sama sa pagpanapaw, pakighilawas nga dili pa minyo, mga relasyon sa managsama og sekso, ug sekswal nga pagpakigtubay diha sa online o sa telepono (tan-awa sa 32.6.2).

• Anaa sa matang sa kaminyoon o panag-uban nga gawas sa legal nga kaminyoon tali sa usa ka lalaki ug usa ka babaye, sama sa puyo-puyo, sibil nga panagtipon ug panag-uban, ug kaminyoon sa managsama og sekso.

• Hilabihan o dili mapugngan nga paggamit og pornograpiya, nga nakaingon sa dakong kadaot sa kaminyoon ug pamilya sa usa ka miyembro (tan-awa sa 38.6.13

Ang desisyon kon mopahigayon ba og konseho sa pagkamiyembro niini nga mga sitwasyon mag-agad sa daghang sirkumstansiya (tan-awa sa 32.7). Pananglitan, ang usa ka konseho mas lagmit nga kinahanglanon aron matabangan ang usa ka miyembro sa paghinulsol kon siya nakalapas sa mga pakigsaad sa templo o kon ang sala balik-balik na.

Tan-awa sa 32.6.1.2 kon kanus-a ang usa ka konseho gikinahanglan alang sa sekswal nga mga sala.

Sa pipila ka sitwasyon, ang personal nga pagtambag ug dili pormal nga mga restriksiyon sa pagkamiyembro igo na (tan-awa sa 32.8

38.6.6

Pornograpiya nga naggamit og Bata

Ang Simbahan supak sa pornograpiya nga naggamit og bata sa bisan unsa nga matang. Kon ang usa ka bishop o ang presidente sa stake makahibalo nga ang usa ka miyembro nalambigit sa pornograpiya nga naggamit og bata, sundon dayon niya ang mga instruksiyon diha sa 38.6.2.1.

Usa ka konseho sa pagkamiyembro sa Simbahan ug pagbutang og annotation gikinahanglan kon ang usa ka miyembro mohimo, mopakigbahin, magtiner, o mobalik-balik sa pagtan-aw sa mga litrato sa pornograpiya sa mga bata (tan-awa sa 32.6.1.2 ug 32.14.5). Kini nga lagda sa kinatibuk-an dili alang sa kabataan ug kabatan-onan nga dunay gibana-bana nga managsama og edad nga mopaambit og sekswal nga mga litrato sa ilang mga kaugalingon o sa uban. Ang personal nga pagtambag ug dili pormal nga mga restriksiyon tingali angay niadto nga mga sitwasyon.

Alang sa dugang nga giya, tan-awa sa 38.6.13.

38.6.7

Pagdonar o Pagbaligya og Similya [Sperm] o mga Itlog [Egg]

Ang sumbanan sa usa ka bana ug asawa sa pagsangkap og mga lawas alang sa espiritu nga mga anak sa Dios balaan nga gitakda (tan-awa sa 2.1.3). Tungod niini nga rason, ang Simbahan dili moawhag sa pagdonar og similya o itlog. Hinoon, kini usa ka personal nga butang nga sa kataposan anaa sa paghukom ug mainampoong konsiderasyon sa potensyal nga modonar. Tan-awa sa 38.6.9. Ang Simbahan wala usab moawhag sa pagbaligya og similya o mga itlog.

38.6.8

Pag-usab sa Kinatawo sa Babaye [Female Genital Mutilation]

Ang Simbahan mikondinar sa pag-usab sa kinatawo sa babaye.

38.6.9

Mga Pagtambal sa Fertility

Ang sumbanan sa usa ka bana ug asawa sa pagsangkap og mga lawas alang sa espiritu nga mga anak sa Dios balaan nga gitakda (tan-awa sa 2.1.3). Kon gikinahanglan, ang teknolohiya sa pagpanganak makaabag sa minyo nga babaye ug lalaki sa ilang matarong nga tinguha nga makabaton og mga anak. Kini nga teknolohiya naglakip sa artipisyal nga pagpasulod sa mga selula sa similya ngadto sa sabakan sa babaye [artrificial insemination] ug sa pagkuha sa mga selula sa lalaki ug sa babaye ug isulod sa test tube aron kini mahimong binhi ug dayon isulod sa sabakan sa babaye [vitro fertilization].

Ang Simbahan dili moawhag sa artificial insemination o in vitro fertilization gamit ang similya gikan ni bisan kinsa gawas sa bana o sa itlog gikan ni bisan kinsa gawas sa asawa. Hinoon, kini usa ka personal nga butang nga sa kataposan anaa sa paghukom ug mainampoong konsiderasyon sa lalaki ug babaye nga nakasal pinasubay sa balaod.

Alang sa impormasyon mahitungod sa pagselyo sa mga anak nga gimabdos pinaagi sa in vitro fertilization, tan-awa sa 38.4.2.6.

Tan-awa usab sa “Adoption” (Topics and Questions, topics.ChurchofJesusChrist.org).

38.6.10

Pakighilawas sa duol nga kabanay [Incest]

Ang Simbahan supak sa bisan unsa nga matang sa pakighilawas sa duol nga kabanay. Sumala sa paggamit dinhi, ang pakighilawas sa duol nga kabanay [incest] mao ang sekswal nga mga relasyon tali sa:

• Usa ka ginikanan ug usa ka anak.

• Usa ka apohan ug usa ka apo.

• Mga igsoon.

• Usa ka uyoan o iyaan ug usa ka pag-umangkon nga babaye o lalaki.

Sumala sa paggamit dinhi, ang anak, apo, mga igsoon, pag-umangkon nga babaye, ug pag-umangkon nga lalaki naglakip sa biyolohikanhon, sinagop, humabdos, o temporaryong giamuma nga mga relasyon. Ang pakighilawas sa duol nga kabanay mahimong mahitabo tali sa duha ka menor de edad, sa usa ka hamtong ug usa ka menor de edad, o duha ka mga hamtong. Kon ang usa ka presidente sa stake adunay mga pangutana mahitungod kon ang usa ka relasyon usa ba ka incest ubos sa lokal nga mga balaod, siya mangayo og giya gikan sa Buhatan sa Unang Kapangulohan.

Kon ang usa ka menor de edad mao ang biktima sa pakighilawas sa duol nga kabanay [incest], ang bishop o ang presidente sa stake motawag sa help line sa Simbahan sa pag-abuso sa mga nasod nga kini anaa (tan-awa sa 38.6.2.1). Sa ubang mga nasod, ang presidente sa stake mangayo og giya gikan sa area legal counsel sa buhatan sa area. Siya usab giawhag nga magpakitambag sa kawani sa Mga Serbisyo sa Pamilya [Family Services] o sa manedyer sa welfare ug pagbarog pinaagi sa kinaugalingong paningkamot sa buhatan sa area.

Ang konseho sa pagkamiyembro diha sa Simbahan ug ang pagbutang og annotation gikinahanglan kon ang usa ka miyembro nakahimo og pakighilawas sa duol nga kabanay [incest] (tan-awa sa 32.6.1.2 ug 32.14.5). Ang pakighilawas sa duol nga kabanay hapit magkinahanglan kanunay nga bakwion sa Simbahan ang pagkamiyembro sa usa ka tawo.

Kon usa ka menor de edad ang nakahimo og pakighilawas sa duol nga kabanay [incest], ang presidente sa stake mokontak sa Buhatan sa Unang Kapangulohan alang sa direksyon.

Ang mga biktima sa pakighilawas sa duol nga kabanay sa kasagaran mag-antos og grabe nga truma. Ang mga lider motubag uban ang kinasingkasing nga kapuangod ug empatiya. Sila mohatag og espirituwal nga suporta ug tambag sa pagtabang kanila nga mabuntog ang makadaot nga mga epekto sa pakighilawas sa duol nga kabanay [incest].

Usahay ang mga biktima mobati nga naulaw o sad-an. Ang mga biktima dili sad-an. Ang mga lider makatabang nila ug sa ilang mga pamilya nga makasabot sa gugma sa Dios ug sa pagkaayo nga magagikan pinaagi ni Jesukristo ug sa Iyang Pag-ula (tan-awa sa Alma 15:8; 3 Nephi 17:9).

Agi og dugang sa pagdawat sa dinasig nga tabang sa mga lider sa Simbahan, ang mga biktima ug ang ilang mga pamilya mahimong magkinahanglan og propesyonal nga pagtambag. Alang sa impormasyon, tan-awa sa 38.6.18.2.

38.6.11

In Vitro Fertilization

Tan-awa sa 38.6.9.

38.6.12

Ang Okulto

“Kana nga gikan sa Dios mao ang kahayag” (Doktrina ug mga Pakigsaad 50:24). Ang okulto nakatutok sa kangitngit ug mosangpot ngadto sa pagpanglimbong. Makaguba kini sa hugot nga pagtuo diha ni Kristo.

Ang okulto naglakip sa pagsimba ni Satanas. Naglakip usab kini sa espirituwal nga mga kalihokan nga wala mahiuyon sa ebanghelyo ni Jesukristo. Ang mao nga mga kalihokan naglakip (apan dili limitado sa) pagpanag-an, pagpanunglo, ug pagpang-ayo nga mga imitasyon sa gahom sa Dios sa pagkapari (tan-awa sa Moroni 7:11–17).

Ang mga miyembro sa Simbahan kinahanglan nga dili moapil sa bisan unsa nga matang sa pagsimba ni Satanas o pagpakig-abin sa bisan unsa nga paagi sa okulto. Kinahanglang dili sila motutok sa maong kangitngit diha sa mga panag-istorya o diha sa mga miting sa Simbahan.

38.6.13

Pornograpiya

Ang Simbahan supak sa pornograpiya sa bisan unsa nga matang. Ang paggamit og pornograpiya sa bisan unsa nga matang makadaot sa indibidwal nga mga kinabuhi, mga pamilya, ug katilingban. Makapalayo usab kini sa Espiritu sa Ginoo. Ang mga miyembro sa Simbahan kinahanglang maglikay sa tanang matang sa materyal sa pornograpiya ug mosupak sa paghimo, pag-apud-apod, ug paggamit niini.

Ang Simbahan mihatag sa mosunod nga mga kapanguhaan aron sa pagtabang sa mga tawo kansang mga kinabuhi naapektohan sa pornograpiya:

• AddressingPornography.ChurchofJesusChrist.org

• AddictionRecovery.ChurchofJesusChrist.org

• Helping Those Who Struggle with Pornography (booklet)

• Himoa ang Hiyas nga Modayandayan sa Inyong mga Hunahuna (booklet)

Ang mga presidente sa stake ug ang mga bishop mohatag usab og suporta ngadto sa mga sakop sa pamilya kon gikinahanglan.

Ang pipila ka pagtan-aw sa pornograpiya tingali wala tuyoa. Ang tinuyo nga paggamit sa pornograpiya—panagsa man o naghinubra.

Ang personal nga pagtambag ug dili pormal nga mga restriksiyon sa pagkamiyembro sa kasagaran igo na alang sa pagtabang sa usa ka tawo nga maghinulsol sa paggamit og pornograpiya (tan-awa sa 32.8). Ang mga konseho sa pagkamiyembro sa kasagaran dili ipahigayon. Hinoon, ang usa ka konseho posible nga gikinahanglan alang sa grabe ug dili mapugngan nga gana sa paggamit sa pornograpiya nga nakaingon og dakong kadaot sa kaminyoon o pamilya sa usa ka miyembro (tan-awa sa 38.6.5). Ang konseho gikinahanglan kon ang usa ka miyembro mohimo, mopakigbahin, magtiner, o mobalik-balik sa pagtan-aw sa mga litrato sa pornograpiya sa mga bata (tan-awa sa 38.6.6).

Agi og dugang sa dinasig nga tabang sa mga lider sa Simbahan, ang ubang mga miyembro mahimong magkinahanglan og propesyonal nga pagtambag. Ang mga lider mahimong mokontak sa Family Services alang sa tabang kon gikinahanglan. Tan-awa sa 31.3.6 alang sa impormasyon sa pagkontak.

38.6.14

Diskriminasyon

Ang tanang mga tawo mga anak sa Dios. Ang tanan mga igsoon kinsa kabahin sa Iyang balaan nga pamilya (tan-awa sa “Ang Pamilya: Usa ka Pamahayag ngadto sa Kalib[o]tan”). “Gibuhat [sa Dios] ang tanang kaliwat sa katawhan” (Mga Buhat 17:26). “Ang tanan managsama ngadto sa Dios” (2 Nephi 26:33). Ang matag tawo “sama ka bililhon sa iyang panan-aw ingon sa uban” (Jacob 2:21).

Ang diskriminasyon dili subay sa gipadayag nga pulong sa Dios. Ang pagpabor o wala pagpabor sa Dios magdepende sa debosyon ngadto Kaniya ug sa Iyang mga sugo, dili sa kolor sa panit sa tawo o sa ubang mga kinaiya.

Ang Simbahan nanawagan sa tanang tawo sa pagbiya sa mga kinaiya ug mga aksiyon sa diskriminasyon ngadto sa bisan unsa nga grupo o indibidwal. Ang mga miyembro sa Simbahan kinahanglang mangulo sa pagpasiugda og pagtahod alang sa tanang anak sa Dios. Ang mga miyembro mosunod sa sugo sa Manluluwas sa paghigugma sa uban (tan-awa sa Mateo 22:35–39). Sila maningkamot nga mahimong mga tawo nga mabination ngadto sa tanan, mosalikway sa diskriminasyon sa bisan unsa nga matang. Kini naglakip sa diskriminasyon base sa kaliwat, gigikanan, nasyonalidad, tribo, gender [pagkalalaki o pagkababaye], edad, kakulangan, ekonomikanhong kahimtang sa katilingban, relihiyoso nga pagtuo o walay pagtuo, ug giila nga sekso.

38.6.15

Pagkaibog sa Managsama og Sekso ug Binuhatan sa Managsama og Sekso

Ang Simbahan nag-awhag sa mga pamilya ug mga miyembro sa pagtabang uban ang kasensitibo, gugma, ug pagtahod ngadto sa mga tawo kinsa naibog sa uban nga managsama og sekso. Ang Simbahan nagpasiugda usab og panagsinabtanay sa katilingban sa kinatibuk-an nga nagpakita sa mga pagtulon-an niini mahitungod sa pagkamabination, pagkasakop, paghigugma alang sa uban, ug pagtahod alang sa tanang mga tawo. Ang Simbahan walay gihuptan nga posisyon kalabot sa mga hinungdan sa pagkaibog sa managsama og sekso.

Ang mga sugo sa Dios nagdili sa tanang dili putli nga kinaiya, managlahi man og sekso o managsama nga sekso. Ang mga lider sa Simbahan motambag sa mga miyembro kinsa nakasupak sa balaod sa kaputli. Ang mga lider motabang kanila nga makaangkon og klarong pagsabot sa pagtuo kang Jesukristo ug sa Iyang Pag-ula, sa proseso sa paghinulsol, ug sa katuyoan sa kinabuhi dinhi sa yuta. Ang kinaiya nga dili masubay sa balaod sa kaputli mahimong maoy hinungdan sa pagpahigayon og konseho sa pagkamiyembro sa Simbahan (tan-awa sa 38.6.5). Kini mahimong mapasaylo pinaagi sa sinsero nga paghinulsol.

Ang pagbati og pagkaibog sa sama og sekso dili sala. Ang mga miyembro nga nagbaton niining mga pagbati ug wala mopadayon o mobuhat niini nagkinabuhi pinasubay sa plano sa Langitnong Amahan alang sa Iyang mga anak ug sa doktrina sa Simbahan. Ang mga lider mosuporta ug moawhag nila sa ilang pag-usab sa pagpakabuhi pinasubay sa mga sugo sa Ginoo. Ang mga miyembro nga aduna niini nga mga pagbati mahimong modawat og mga calling sa Simbahan, maghupot og mga rekomend sa templo, ug modawat og mga ordinansa sa templo kon sila takos. Ang lalaki nga mga miyembro sa Simbahan mahimong modawat ug mogamit sa pagkapari.

Ang tanan nga mga miyembro kinsa nagtuman sa ilang mga pakigsaad makadawat sa tanan nga gisaad nga mga panalangin sa kahangtoran dili igsapayan kon ang ilang mga sirkumstansiya nagtugot kanila sa pagdawat sa mga panalangin sa mahangtoron nga kaminyoon ug sa pagkaginikanan niining kinabuhia (tan-awa sa Mosiah 2:41).

Ang Simbahan mihatag sa mosunod nga mga kapanguhaan aron mas makasabot ug makasuporta sa mga tawo kansang mga kinabuhi naapektohan sa pagkaibog sa managsama og sekso:

• “Same-Sex Attraction [Pagkaibog sa Managsama og Sekso],” Topics and Questions, topics.ChurchofJesusChrist.org

• “Same-Sex Attraction [Pagkaibog sa Managsama og Sekso],” Tabang sa Kinabuhi, ChurchofJesusChrist.org

Agi og dugang ngadto sa dinasig nga tabang sa mga lider sa Simbahan, ang mga miyembro mahimong makabenepisyo gikan sa propesyonal nga pagtambag. Ang mga lider mahimong mokontak sa Family Services alang sa tabang. Tan-awa sa 31.3.6 alang sa impormasyon sa pagkontak.

38.6.16

Kaminyoon sa Managsama og Sekso

Isip usa ka doktrinal nga baroganan, base sa mga kasulatan, ang Simbahan nagmatuod nga ang kaminyoon tali sa usa ka lalaki ug usa ka babaye importante sa plano sa Tiglalang alang sa walay kataposan nga destinasyon sa Iyang mga anak. Ang Simbahan nagmatuod usab nga ang balaod sa Dios nagpasabot sa kaminyoon isip legal ug pinasubay sa balaod nga panaghiusa tali sa usa ka lalaki ug sa usa ka babaye.

Ang usa ka lalaki ug usa ka babaye lamang kinsa legal ug pinasubay sa balaod nga naminyo isip bana ug asawa ang adunay katungod sa sekswal nga mga relasyon. Ang bisan unsang sekswal nga mga relasyon, lakip na niadtong tali sa mga tawo nga sama og sekso, makasasala ug wala maghatag og bili sa balaan nga gilalang nga institusyon sa pamilya.

38.6.17

Sekswal nga Edukasyon

Ang mga ginikanan adunay importante nga responsibilidad alang sa sekswal nga edukasyon sa ilang mga anak. Ang mga ginikanan kinahanglang adunay matinuoron, klaro, ug padayon nga panagsultihanay kauban sa ilang mga anak mahitungod sa himsog, matarong nga sekswalidad. Kini nga panagsultihanay kinahanglan nga:

• Haom sa edad ug kahingkod sa bata.

• Motabang sa mga bata nga maandam alang sa kalipay diha sa kaminyoon ug mosunod sa balaod sa kaputli (tan-awa sa 2.1.2).

• Mohisgot sa mga kakuyaw sa pornograpiya, sa panginahanglan sa paglikay niini, ug unsaon sa pagtubag kon sila makasugat niini.

Alang sa dugang nga impormasyon, tan-awa sa “Sex Education and Behavior” (Topics and Questions, topics.ChurchofJesusChrist.org).

Isip kabahin sa ilang responsibilidad sa pagtudlo sa ilang mga anak, ang mga ginikanan kinahanglang makahibalo ug sa tukma nga paagi maningkamot sa pag-impluwensya sa edukasyon sa sekso nga gitudlo sa eskwelahan. Ang mga ginikanan motudlo sa husto nga mga baroganan ug mosuporta sa instruksiyon sa eskwelahan nga nagsubay sa ebanghelyo.

38.6.18

Sekswal nga Pag-abuso, Pagpanglugos, ug Ubang mga Matang sa Sekswal nga Pag-ataki

Ang Simbahan supak sa sekswal nga pag-abuso. Sumala sa paggamit dinhi, ang sekswal nga pag-abuso gipasabot nga pagpahamtang sa bisan unsa nga walay pagtugot nga sekswal nga kalihokan diha sa laing tawo. Ang sekswal nga kalihokan uban sa usa ka tawo kinsa wala mohatag o dili makahatag og legal nga pag-uyon giisip nga sekswal nga pag-abuso. Ang sekswal nga pag-abuso mahitabo usab nganha sa usa ka kapikas o sa relasyon sa pagpakig-date. Alang sa impormasyon mahitungod sa sekswal nga pag-abuso sa usa ka bata o batan-on, tan-awa sa 38.6.2.3.

Ang sekswal nga pag-abuso naglakip sa daghang nagkalain-laing mga aksiyon, gikan sa pagsamok-samok ngadto sa pagpanglugos ug sa ubang mga matang sa sekswal nga pag-ataki. Mahitabo kini pinaagi sa pisikal, pinaagi sa pagsulti, ug sa ubang mga paagi. Alang sa giya mahitungod sa pagtambag sa mga miyembro kinsa nakasinati og sekswal nga pag-abuso, pagpanglugos, o ubang mga matang sa sekswal nga pag-ataki, tan-awa sa 38.6.18.2.

Kon ang mga miyembro magduda o mahibalo mahitungod sa sekswal nga pag-abuso, molihok sila sa pagpanalipod sa mga biktima ug sa uban sa labing sayo nga ilang mahimo. Kini naglakip sa pag-report ngadto sa sibil nga mga awtoridad ug sa pagpahibalo sa bishop o presidente sa stake. Kon ang usa ka bata giabusohan, ang mga miyembro kinahanglang mosunod sa mga instruksiyon sa 38.6.2.

38.6.18.1

Help Line kalabot sa Pag-abuso

Kon ang usa ka bishop o presidente sa stake makahibalo sa sekswal nga pag-abuso, pagpanglugos, o laing matang sa sekswal nga pag-ataki, siya motawag sa help line sa Simbahan sa pag-abuso diha sa mga nasod diin kini anaa (tan-awa sa 38.6.2.1 alang sa impormasyon sa pagkontak). Ang legal ug klinikal nga mga propesyonal motubag sa iyang mga pangutana. Kini nga mga propesyonal mohatag usab og mga instruksiyon mahitungod kon unsaon sa:

• Pagtabang sa mga biktima ug pagtabang sa pagpanalipod kanila gikan sa dugang nga kadaot.

• Pagtabang sa pagpanalipod sa potensyal nga mga biktima.

• Pagtuman sa legal nga mga kinahanglanon alang sa pag-report.

Sa mga nasod nga walay help line, ang usa ka bishop nga nakahibalo niini nga mga salaod kinahanglang mokontak sa iyang presidente sa stake. Ang presidente sa stake kinahanglang mangayo og giya gikan sa legal counsel sa area sa buhatan sa area. Siya usab giawhag nga magpakitambag sa kawani sa Mga Serbisyo sa Pamilya [Family Services] o sa manedyer sa welfare ug pagbarog pinaagi sa kinaugalingong paningkamot sa buhatan sa area.

38.6.18.2

Pagtambag alang sa mga Biktima sa Sekswal nga Pang-abuso, Pagpanglugos, ug Ubang mga Matang sa Sekswal nga Pag-ataki

Ang mga biktima sa sekswal nga pang-abuso, pagpanglugos, o ubang mga matang sa sekswal nga pag-ataki sa kasagaran mag-antos og grabe nga truma. Kon sila motug-an sa bishop o sa presidente sa stake, siya motubag uban ang kinasingkasing nga kapuangod ug empatiya. Siya mohatag og espirituwal nga tambag ug suporta aron sa pagtabang sa mga biktima nga makabuntog sa makadaot nga mga epekto sa pang-abuso. Siya usab motawag sa help line sa Simbahan sa pang-abuso alang sa giya kon kini anaa (tan-awa sa 38.6.18.1).

Usahay ang mga biktima mobati nga naulaw o sad-an. Ang mga biktima dili sad-an. Ang mga lider dili mobasol sa biktima. Sila motabang sa mga biktima ug sa ilang mga pamilya nga makasabot sa gugma sa Dios ug sa pagkaayo nga magagikan pinaagi ni Jesukristo ug sa Iyang Pag-ula (tan-awa sa Alma 15:8; 3 Nephi 17:9).

Samtang ang mga miyembro mahimong mopili sa pagpaambit sa impormasyon mahitungod sa pag-abuso o pag-ataki, ang mga lider kinahanglang dili motutok pag-ayo sa mga detalye. Kini mahimong makadaot sa mga biktima.

Agi og dugang sa pagdawat sa dinasig nga tabang sa mga lider sa Simbahan, ang mga biktima ug ang ilang mga pamilya mahimong magkinahanglan og propesyonal nga pagtambag. Alang sa impormasyon, tan-awa sa 31.3.6.

38.6.18.3

Konseho sa Pagkamiyembro, Mga

Ang konseho sa pagkamiyembro mahimong gikinahanglan alang sa tawo kinsa sekswal nga nangataki o miabuso og usa ka tawo. Ang usa ka konseho sa pagkamiyembro gikinahanglan kon ang usa ka miyembro nakahimo og pagpanglugos o nakombikto sa laing matang sa sekswal nga pag-ataki (tan-awa sa 32.6.1.1).

Ang usa ka konseho kinahanglan usab nga ipahigayon alang sa sekswal nga kalihokan sa daling mabiktima nga hamtong. Sumala sa paggamit dinhi, ang daling mabiktima nga hamtong mao ang usa ka tawo kinsa, tungod sa pisikal o mental nga mga limitasyon, dili makahatag og pag-uyon sa kalihokan o dili makasabot sa matang niini.

Sa pag-atubang sa ubang mga matang sa sekswal nga pag-abuso, ang mga lider magtinguha sa giya sa Espiritu mahitungod kon ang personal nga pagtambag o usa ka konseho sa pagkamiyembro mao ba ang labing angay nga sitwasyon (tan-awa sa 32.6.2.2 ug 32.8). Sa grabe nga mga kaso ang usa ka konseho gikinahanglan. Ang mga lider mahimong magpakitambag sa ilang direkta nga lider sa pagkapari mahitungod sa sitwasyon.

Kon ang mga restriksiyon sa pagkamiyembro moresulta gikan sa usa ka konseho sa pagkamiyembro nga gipahigayon alang sa tagsala sa sekswal nga pang-abuso, ang rekord sa pagkamiyembro niana nga tawo butangan og annotation.

Alang sa impormasyon mahitungod sa pagtambag sa mga kaso sa pag-abuso, tan-awa sa 38.6.2.2. Alang sa impormasyon mahitungod sa pagtambag sa mga biktima sa sekswal nga pag-ataki, tan-awa sa 38.6.18.2.

38.6.19

Dili Minyo nga Mabdos nga mga Ginikanan

Ang mga miyembro sa Simbahan nga dili minyo ug mabdos giawhag sa pagpakigkita sa ilang bishop. Sa Estados Unidos o Canada, ang Family Services anaa alang sa:

• Pagpangonsulta sa mga lider sa Simbahan.

• Pagtambag sa dili minyo nga mabdos nga mga ginikanan ug sa ilang mga pamilya.

Wala kinahanglana ang rekomendasyon sa bishop niini nga pagserbisyo. Kini walay bayad. Tan-awa sa 31.3. 6 alang sa impormasyon sa pagkontak sa Family Services.

Sa ubang mga dapit, ang mga lider mahimong mokontak sa kawani sa Family Services o sa manager sa welfare ug self-reliance diha sa buhatan sa area alang sa pagpangonsulta.

Ang giya sa pagtambag sa dili minyo nga mabdos nga mga ginikanan gihatag usab diha sa “Unwed Pregnancy” (Topics and Questions, topics.ChurchofJesusChrist.org).

38.6.20

Hikog

Ang mortal nga kinabuhi usa ka bililhon nga gasa gikan sa Dios—usa ka gasa nga kinahanglang hatagan og bili ug panalipdan. Ang Simbahan kusganon nga nagsuporta sa pagpugong sa paghikog. Alang sa impormasyon mahitungod kon unsaon sa pagtabang sa usa ka tawo nga gustong maghikog o usa ka tawo nga naapektohan sa paghikog, tan-awa sa suicide.ChurchofJesusChrist.org.

Kadaghanan sa mga tawo kinsa naghunahuna sa paghikog gusto nga makasinati og kahupayan gikan sa pisikal, mental, emosyonal, o espirituwal nga kasakit. Ang maong mga indibidwal nagkinahanglan og gugma, tabang, ug suporta gikan sa pamilya, mga lider sa Simbahan, ug sa kwalipikado nga mga propesyonal.

Ang bishop mohatag og eklesiyastikanhong suporta kon ang usa ka miyembro naghunahuna sa paghikog o misulay niini. Siya usab motabang dayon sa miyembro nga makakuha og propesyonal nga tabang. Siya moawhag niadtong suod ngadto sa tawo sa pagpangayo og propesyonal nga tabang kon gikinahanglan.

Bisan pa sa labing maayong mga paningkamot sa mga minahal, mga lider, ug mga propesyonal, ang paghikog dili kanunay nga mapugngan. Kini nagbilin og grabe nga kasubo, emosyonal nga kasamok, ug wala matubag nga mga pangutana alang sa mga minahal ug sa uban. Ang mga lider kinahanglang motambag ug mohupay sa pamilya. Sila mohatag og pag-amuma ug suporta. Ang pamilya magkinahanglan usab og propesyonal nga suporta ug pagtambag.

Dili sakto alang sa usa ka tawo nga iyang kutloon ang iyang kaugalingong kinabuhi. Hinoon, ang Dios lamang ang makahimo sa paghukom sa mga hunahuna, mga aksiyon, ug lebel sa pagkamaytulubagon sa tawo (tan-awa sa 1 Samuel 16:7; Doktrina ug mga Pakigsaad 137:9).

Ang pamilya, sa pagkonsulta sa bishop, motino sa lugar ug matang sa tulumanon sa haya alang sa tawo. Ang pamilya mahimong mopili sa paggamit sa mga pasilidad sa Simbahan. Kon ang tawo natugahan dinhi sa kinabuhi, siya mahimong ilubong o sunugon nga nagsul-ob sa sinina sa templo.

Kadtong kinsa nawad-an og minahal tungod sa paghikog makakaplag og paglaom ug pagkaayo diha ni Jesukristo ug sa Iyang Pag-ula.

Alang sa impormasyon mahitungod sa pagpugong sa paghikog ug sa pagpangalagad, tan-awa sa suicide.ChurchofJesusChrist.org.

38.6.21

Surgical Sterilization (Lakip sa Pagkapon)

Tan-awa sa 38.6.4.

38.6.22

Puli [Surrogate] nga Pagkainahan

Ang sumbanan sa usa ka bana ug asawa sa pagsangkap og mga lawas alang sa espiritu nga mga anak sa Dios balaan nga gitakda (tan-awa sa 2.1.3). Tungod niini nga rason, ang Simbahan nagtambag batok sa puli nga pagkainahan. Hinoon, kini usa ka personal nga butang nga sa kataposan anaa sa paghukom ug mainampoong konsiderasyon sa bana ug asawa.

Ang mga anak nga natawo ngadto sa usa ka puli nga inahan wala matawo diha sa pakigsaad. Pagkahuman sa ilang pagkatawo, sila mahimong maselyo lamang ngadto sa mga ginikanan uban sa pagtugot sa Unang Kapangulohan (tan-awa sa 38.4.2.7). Ang mga ginikanan mosulat ngadto sa Unang Kapangulohan ug ihatag kini ngadto sa presidente sa stake. Kon siya mosuporta sa hangyo, isumiter niya ang sulat uban sa iyang kaugalingong sulat.

38.6.23

Mga Indibidwal nga Mikonsiderar sa Ilang Kaugalingon isip Transgender

Ang gender usa ka importante nga bahin sa plano sa Langitnong Amahan sa kalipay (tan-awa sa Genesis 1:27). Ang gipasabot nga kahulogan sa gender sa “Ang Pamilya: Usa ka Pamahayag ngadto sa Kalibotan” mao ang biyolohikanhong natawhang sekso. (Alang niadtong kansang sekso nga natawhan dili klaro, tan-awa sa 38.7.7

Pipila ka tawo mibati nga ang ilang kaugalingong gender wala mahisubay sa ilang biyolohikanhong natawhang sekso. Ang Simbahan walay gibarogan nga posisyon sa hinungdan niini nga mga pagbati. Ang pipila nga nakasinati niini nga mga pagbati mikonsiderar sa ilang kaugalingon isip transgender.

Kini nga mga indibidwal sa kasagaran nag-atubang og komplikado nga mga hagit. Sila—ug ang ilang pamilya ug mga higala—kinahanglang tagdon uban sa kasensitibo, kamabination, kapuangod, ug Kristohanong gugma. Ang tanan anak sa Dios ug adunay balaanon nga bili.

Ang mga ordinansa sa kaluwasan ug kahimayaan dawaton sumala sa biyolohikanhong natawhang sekso sa usa ka tawo. Alang sa giya mahitungod sa pagpangalagad niini nga mga ordinansa, adto sa mosunod:

• Bunyag ug kompirmasyon (tan-awa sa 38.2.8.9)

• Ordinasyon sa pagkapari (tan-awa sa 38.2.9.9)

• Mga ordinansa sa templo (tan-awa sa 26.5.7)

Ang takos nga mga miyembro nga wala mopadayon sa pagpaopera, medikal o sosyal nga kausaban sa ilang biyolohikanhong natawhang sekso mahimong makatagamtam sa tanang pribilihiyo sa pagkamiyembro sa Simbahan.

Ang mga lider sa Simbahan nagtambag batok sa pagpaopera o medikal, o sosyal nga kausaban sa biyolohikanhong natawhang sekso sa usa ka tawo. (Ang sosyal nga kausaban nagpasabot sa tinuyo nga pagpresentar sa kaugalingon nga lahi kaysa biyolohikanhong natawhang sekso sa usa ka tawo, ug mahimong maglakip sa pag-usab sa sinina, pamostura, mga ngalan, o mga puling ngalan [pronouns].) Ang mga lider nagtambag nga ang paghimo niini nga mga aksiyon moresulta sa pipila ka restriksiyon sa pagkamiyembro sa Simbahan. Kini nga mga restriksiyon naglakip sa pagdawat o paggamit sa pagkapari, pagdawat o paggamit og rekomend sa templo, ug pagdawat sa pipila ka calling sa Simbahan.

Ang mga indibidwal nga naghimo og kausaban sa ilang biyolohikanhong natawhang sekso hangopon nga motambong sa mga panagtigom alang sa sakramento ug moapil sa Simbahan sa daghang ubang paagi. Kini nga mga indibidwal ug ang ilang mga pamilya giawhag nga magpakitambag sa ilang lokal nga mga lider kabahin sa pag-apil sa simbahan. Ang mga lider sa Simbahan motudlo sa kamatuoran sa ebanghelyo ug mangalagad sa Kristohanong paagi. Ilang ikonsiderar ang mga panginahanglan sa tanan nga nalambigit. Ang mga seksiyon niini nga tamdanan nga basahon—sama sa pagtambong sa mga miting ug mga kalihokan sa Simbahan (tan-awa sa 38.1.1), pag-apil sa buhat sa family history (tan-awa sa 25.1 ug 25.4), pagserbisyo sa uban (tan-awa sa 22.2.3), ug uban pa—mogiya sa mga lider samtang sila motambag sa mga indibidwal ug sa ilang mga pamilya. Alang sa dugang nga giya bahin sa pag-apil diha sa Simbahan sa mga indibidwal nga mikonsiderar sa ilang kaugalingon isip transgender, gamita kining giya nga mga baroganan.

Ang mga miyembro nga naghimo og kausaban ug dayon mibalik ngadto sa ilang biyolohikanhong natawhang sekso ug takos ug mapasaligon nga motuman sa mga sugo sa Dios mahimong makatagamtam sa tanang pribilihiyo sa pagkamiyembro sa Simbahan.

Ang mga sirkumstansiya magkalahi kaayo sa matag tawo ug mahimong mausab paglabay sa panahon. Ang mga miyembro nga mibati nga ang ilang kaugalingong gender wala mahisubay sa ilang biyolohikanhong natawhang sekso o kinsa mikonsiderar sa ilang kaugalingon isip transgender, ingon man usab ang mga ginikanan o mga tigbantay sa mga menor de edad nga nag-atubang sa mao nga mga sirkumstansiya, giawhag sa pagpangayo og tambag sa ilang bihop. Ang mga bishop magpakitambag sa presidente sa stake sa pagtabang sa indibidwal nga mga sitwasyon uban sa kasensitibo ug Kristohanong gugma. Ang mga presidente sa stake ug misyon mangayo og tambag gikan sa Kapangulohan sa Area.

Ang nasyonal ug lokal nga mga balaod kalabot sa mga indibidwal nga mikonsiderar sa ilang kaugalingon isip transgender managlahi. Sa Estados Unidos ug Canada, ang mga presidente sa stake ug mga presidente sa misyon kinsa adunay mga pangutana mahitungod sa legal nga mga kinahanglanon mokontak sa Church’s Office of General Counsel:

1-800-453-3860, ekstensiyon 2-6301

1-801-240-6301

Sa gawas sa Estados Unidos ug Canada, kini nga mga lider mokontak sa legal counsel sa area diha sa buhatan sa area.

Alang sa dugang nga impormasyon mahitungod sa pagsabot ug pagsuporta sa mga indibidwal nga mibati nga ang ilang kaugalingong gender wala mahisubay sa ilang biyolohikanhong natawhang sekso o mikonsiderar sa ilang kaugalingon isip transgender, tan-awa sa “Transgender” diha sa ChurchofJesusChrist.org.

38.7

Mga Palisiya sa Medikal ug sa Panglawas

38.7.1

Mga Awtopsiya [Autopsy]

Ang usa ka awtopsiya mahimong ipahigayon kon ang pamilya sa namatay mouyon ug kon ang awtopsiya nagtuman sa balaod. Sa pipila ka kaso, ang awtopsiya gikinahanglan sa balaod.

38.7.2

Paglubong o Pagsunog sa Patay nga Lawas [Cremation]

Ang pamilya sa namatay nga tawo mohukom kon ang iyang lawas ilubong ba o sunugon. Sila motahod sa mga tinguha sa indibidwal.

Sa pipila ka nasod, ang balaod nagmando sa cremation. Sa ubang mga sitwasyon, ang paglubong dili praktikal o dako ra nga galastohan alang sa pamilya. Sa tanang sitwasyon, ang lawas kinahanglang respetohan ug tahuron. Ang mga miyembro kinahanglang hatagan og kasegurohan nga ang gahom sa Pagkabanhaw magamit kanunay (tan-awa sa Alma 11:42–45).

Kon posible, ang lawas sa namatay nga miyembro kinsa natugahan kinahanglang sul-oban sa sinina alang sa seremonya sa templo kon kini ilubong o sunogon (tan-awa sa 38.5.10).

Ang lubong o tulumanon sa paghandom naghatag og oportunidad alang sa mga pamilya sa pagpundok ug pagpadayon sa mga relasyon ug mga mithi sa pamilya (tan-awa sa 29.5.4).

38.7.3

Mga Bata Kinsa Namatay sa wala pa Matawo (Natawo nga Patay ug Nakuha nga mga Bata)

Ang mga ginikanan kinsa nakasinati sa kamatayon sa usa ka wala pa matawo nga anak nag-antos sa kasubo ug pagkawala. Ang mga lider, mga sakop sa pamilya, ug ang tigpangalagad nga mga igsoong lalaki ug mga babaye mohatag og emosyonal ug espirituwal nga suporta.

Ang mga ginikanan mahimong mohukom kon mohimo ba og mga tulumanon sa paghandom ug diha sa lubnganan.

Ang mga ginikanan mahimong morekord sa impormasyon mahitungod sa bata diha sa FamilySearch.org. Ang mga instruksiyon gihatag diha sa website.

Ang mga ordinansa sa templo dili kinahanglanon o ipahigayon alang sa mga bata kinsa namatay sa wala pa matawo. Wala kini magwagtang sa posibilidad nga ang usa ka bata mahimong kabahin sa pamilya sa kahangtoran. Ang mga ginikanan giawhag sa pagsalig sa Ginoo ug sa pagtinguha sa Iyang kahupayan.

38.7.4

Euthanasia

Ang mortal nga kinabuhi usa ka bililhong gasa gikan sa Dios. Ang euthanasia mao ang tinuyo nga pagpatay sa tawo nga nag-antos gikan sa walay kaayohan nga sakit o laing kondisyon. Ang usa ka tawo nga moapil sa euthanasia, lakip sa pagtabang sa usa ka tawo nga mamatay pinaagi sa paghikog, nakasupak sa mga sugo sa Dios ug mahimong nakasupak sa lokal nga mga balaod.

Ang dili pagpadayon o dili pagtaod sa mga kagamitan sa pagsuporta og kinabuhi alang sa usa ka tawo nga hapit na mamatay dili maisip nga euthanasia (see 38.7.11).

38.7.5

HIV Infection ug AIDS

Ang mga miyembro kinsa nasakit og HIV (human immunodeficiency virus) o adunay AIDS (acquired immunodeficiency syndrome) kinahanglan nga hangupon diha sa mga miting ug mga kalihokan sa Simbahan. Ang ilang pagtambong dili risgo sa panglawas ngadto sa uban.

38.7.6

Hypnosis

Alang sa pipila ka tawo, ang hypnosis makakompromiso sa kabubut-on. Ang mga miyembro kinahanglan nga dili moapil sa hypnosis alang sa mga katuyoan sa demonstrasyon o kalingawan.

Ang paggamit sa hypnosis alang sa pagtambal sa mga sakit o mga problema sa panghunahuna kinahanglan nga tinoon pinaagi sa pakigkonsulta sa hanas nga medikal nga mga propesyonal.

38.7.7

Mga Indibidwal Kansang Sekso sa Pagkahimugso Dili Klaro

Sa talagsa ra kaayo nga mga sirkumstansiya, ang usa ka masuso matawo nga ang kinatawo dili klaro nga lalaki ba o babaye (makalibog nga kinatawo, dili klaro nga sekso, o intersex). Ang mga ginikanan o ang uban kinahanglang mohimo og desisyon sa pagtino sa sekso sa ilang anak uban sa giya sa takos nga medikal nga mga propesyonal. Ang mga desisyon mahitungod sa pagpadayon sa medikal o sa operasyon nga pamaagi sa kasagaran himoon panahon sa bag-ong pagkahimugso. Hinoon, kini mahimong langayon gawas kon kini medikal nga gikinahanglan.

Espesyal nga kaluoy ug kaalam ang gikinahanglan kon ang mga batan-on o mga hamtong kinsa natawo nga dili klaro ang sekso makasinati og nagsumpaki nga emosyon kalabot sa mga desisyon sa gender nga gihimo sa masuso o sa bata pa ug sa gender nga ilang gikonsiderar sa ilang kaugalingon.

Ang mga pangutana mahitungod sa mga rekord sa pagkamiyembro, ordinasyon sa pagkapari, ug mga ordinansa sa templo alang sa mga batan-on o mga hamtong kinsa natawo nga dili klaro ang sekso kinahanglan ipaabot ngadto sa Buhatan sa Unang Kapangulohan.

38.7.8

Medikal ug Kahimsog nga Pag-atiman

Ang pagpangayo og hanas nga medikal nga tabang, pagbaton og hugot nga pagtuo, ug pagdawat og mga panalangin sa pagkapari katambayayong alang sa pagkaayo, sumala sa kabubut-on sa Ginoo.

Ang mga miyembro kinahanglan nga dili mogamit o moawhag og pamaaging medikal o panglawas nga dili maayo sa pamatasan, sa espirituwal, o sa legal nga paagi. Kadtong kinsa adunay mga problema sa panglawas kinahanglang mokonsulta sa hanas nga medikal nga mga propesyonal kinsa lisensyado sa mga bahin nga ilang gipraktis.

Agig dugang sa pagtinguha og hanas nga medikal nga tabang, ang mga miyembro sa Simbahan giawhag sa pagsunod sa sugo sa kasulatan diha sa Santiago 5:14 nga “ipatawag ang mga pangulo sa simbahan aron mag-ampo alang kaniya ug sa ngalan sa Ginoo magdihog kaniyag lana.” Ang mga panalangin sa pagkapari sa pagkaayo ihatag niadtong kinsa naghupot sa gikinahanglan nga katungdanan sa pagkapari. Kini ihatag kon gihangyo ug kini walay bayad (tan-awa sa 18.13).

Ang mga miyembro sa Simbahan wala awhaga nga mangita og milagroso o talagsaong gahom sa pagkaayo gikan sa usa ka indibidwal o grupo nga nangangkon nga adunay espesyal nga mga pamaagi sa paggamit sa gahom sa pagkaayo gawas sa pag-ampo ug sa tukma nga gipahigayon nga mga panalangin sa pagkapari. Kini nga mga binuhatan sa kasagaran gitawag nga “pagpang-ayo gamit sa enerhiya [energy healing].” Ang ubang mga ngalan gigamit usab. Ang mao nga mga saad alang sa pagkaayo sa kasagaran gihatag baylo sa kwarta.

38.7.9

Medikal nga Marijuana

Ang Simbahan supak sa paggamit sa marijuana alang sa dili medikal nga mga katuyoan. Tan-awa sa 38.7.14.

Hinoon, ang marijuana mahimong gamiton alang sa medikal nga mga katuyoan kon ang mosunod nga mga kondisyon anaa:

• Ang paggamit natino sa usa ka lisensyado nga doktor o sa laing giaprobahan nga medikal nga tigsangkap sa legal nga paagi nga gikinahanglan sa medikal nga paagi.

• Ang tawo mosunod sa doses ug paagi sa paggamit gikan sa doktor o sa laing gitugotan nga medikal nga tigsangkap. Ang Simbahan wala moaprobar sa pagsuyop og marijuana gawas kon ang medikal nga tigsangkap mitugot niini base sa medikal nga panginahanglan.

Ang Simbahan wala motugot sa pagsigarilyo og marijuana, lakip sa medikal nga mga katuyoan.

38.7.10

Mga Donasyon ug Pagbalhin sa Organ ug Tissue

Ang donasyon sa mga organ ug mga tissue usa ka dili hinakog nga buhat nga sa kasagaran moresulta sa dakong benepisyo ngadto sa mga indibidwal nga adunay medikal nga mga kondisyon.

Ang desisyon sa usa ka buhi nga tawo nga modonar og organ ngadto sa lain o modawat og gidonar nga organ kinahanglan nga pagahimoon uban sa hanas nga medikal nga tambag ug mainampoong konsiderasyon.

Ang desisyon sa pagtugot sa pagbalhin sa mga organ o tisyu gikan sa usa ka patay nga tawo himoon sa tawo o sa iyang pamilya.

38.7.11

Pagpatunhay og Kinabuhi (Lakip sa Suporta sa Kinabuhi)

Kon makasinati og grabe nga sakit, ang mga miyembro kinahanglan nga magpakita og pagtuo sa Ginoo ug magtinguha og hanas nga medikal nga tabang. Hinoon, kon ang pagkamatay dili kapugngan, kinahanglang isipon kini nga usa ka panalangin ug usa ka mahinungdanong bahin sa walay kataposan nga pagkapabuhi (tan-awa sa 2 Nephi 9:6; Alma 42:8).

Ang mga miyembro kinahanglan nga dili mobati nga obligado sa pagpatunhay sa mortal nga kinabuhi sa mga paagi nga dili resonable. Kini nga mga desisyon labing maayo nga himoon sa tawo, kon posible, o sa mga sakop sa pamilya. Kinahanglan sila nga magtinguha og hanas nga medikal nga tambag ug balaan nga giya pinaagi sa pag-ampo.

Ang mga lider motanyag og suporta niadtong kinsa mohukom nga kuhaon ba o dili ang suporta sa kinabuhi alang sa usa ka sakop sa pamilya.

38.7.12

Pagpaamgo sa Kaugalingon [Self-Awareness] nga mga Grupo

Daghang pribado nga mga grupo ug komersyal nga mga organisasyon adunay mga programa nga nangangkon nga makadugang og pagpaamgo sa kaugalingon, pagtamod sa kaugalingon, pagkaespirituwal, o mga relasyon sa pamilya. Kini nga mga grupo ingon og mosaad og dali nga mga kasulbaran sa mga problema nga sa kasagaran magkinahanglan og panahon, pag-ampo ug personal nga paningkamot sa pagsulbad. Bisan og ang mga partisipante makasinati og temporaryo nga emosyonal nga kahupayan o kalagsik, ang kaniadto nga mga problema sa kasagaran mobalik, nga mosangpot ngadto sa kahigawad ug kasubo.

Pipila niini nga mga grupo nangangkon o nagpasabot nga ang Simbahan o ang indibidwal nga Kinatibuk-ang mga Awtoridad miendorso kanila. Bisan pa, kini nga mga pangangkon dili tinuod.

Ang mga miyembro sa Simbahan gipasidan-an nga ang pipila niini nga mga grupo nagtudlo og mga konsepto ug naggamit og mga pamaagi nga mahimong makadaot. Daghang mga grupo nangolekta og dagkong bayranan ug nag-awhag og malungtaron nga mga pasalig. Ang pipila mosagol og kalibotanon nga mga konsepto sa mga baroganan sa ebanghelyo sa mga paagi nga makapahuyang sa pagkaespirituwal ug sa pagtuo.

Ang mga lider sa Simbahan kinahanglan nga dili mobayad, moawhag, o moendorso sa maong mga grupo o mga binuhatan. Ang mga pasilidad sa Simbahan dili mahimong gamiton alang niini nga mga kalihokan.

Ang mga miyembro kinsa adunay sosyal o emosyonal nga mga problema mahimong mokonsulta sa mga lider alang sa giya sa pag-ila sa mga tinubdan sa tabang nga nahiuyon sa mga baroganan sa ebanghelyo. Alang sa dugang nga impormasyon, tan-awa sa 22.3.4.

38.7.13

Mga Pagbakuna

Ang mga pagbakuna nga ipahigayon sa hanas nga medikal nga mga propesyonal manalipod sa kahimsog ug mopreserbar og kinabuhi. Ang mga miyembro sa Simbahan giawhag sa pagbantay sa ilang kaugalingon, sa ilang mga anak, ug sa ilang mga komunidad pinaagi sa pagpabakuna.

Sa kataposan, ang mga indibidwal maoy responsable sa paghimo sa ilang kaugalingong mga desisyon mahitungod sa pagpabakuna. Kon ang mga miyembro adunay mga kabalaka, sila magpakitambag sa hanas nga medikal nga mga propesyonal ug magtinguha usab sa giya sa Espiritu Santo.

Ang umaabot nga mga misyonaryo kinsa wala mabakunahi malagmit nga malimitahan ang mga assignment diha sa ilang kaugalingon nga nasod.

38.7.14

Ang Pulong sa Kaalam ug Mahimsog nga mga Praktis

Ang Pulong sa Kaalam usa ka sugo sa Dios. Siya mipadayag niini alang sa pisikal ug espirituwal nga kaayohan sa Iyang mga anak. Ang mga propeta miklaro nga ang mga pagtulon-an sa Doktrina ug mga Pakigsaad 89 naglakip sa paglikay gikan sa tabako, isog nga mga ilimnon (alkohol), ug init nga mga ilimnon (tsa ug kape).

Ang mga propeta mitudlo usab sa mga miyembro sa paglikay sa mga butang nga makadaot, supak sa balaod, o makapaadik o makaapekto sa paghukom.

Adunay ubang makadaot nga mga butang ug mga binuhatan nga wala hinganli diha sa Pulong sa Kaalam o sa mga lider sa Simbahan. Ang mga miyembro kinahanglang mogamit og kaalam ug mainampoong paghukom sa paghimo og mga pagpili aron sa pagpalambo sa ilang pisikal, espirituwal, ug emosyonal nga kahimsog.

Si Apostol Pablo mipahayag: “Wala ba kamo masayod nga ang inyong lawas mao ang templo sa Espiritu Santo nga nagpuyo diha kaninyo, ug nga gihatag sa Dios kaninyo, dili kamo ang tag-iya sa inyong kaugalingon kondili ang Dios? Gipalit na kamo niya. Busa gamita ang inyong lawas alang sa himaya sa Dios” (1 Mga Taga-Corinto 6:19–20).

Ang Ginoo misaad og espirituwal ug temporal nga mga panalangin niadtong kinsa mosunod sa Pulong sa Kaalam ug sa giya sa buhi nga mga propeta (tan-awa sa Doktrina ug mga Pakigsaad 89:18–21).

38.8

Administratiba nga mga Palisiya

38.8.1

Pagsagop ug Temporaryong Pag-amuma

Ang pagsagop og mga bata ug temporaryong pag-amuma makapanalangin sa mga bata ug sa mga pamilya. Ang mahigugmaon, mahangtoron nga mga pamilya mahimong maugmad pinaagi sa pagsagop. Kon ang mga bata moabot sa usa ka pamilya pinaagi sa pagsagop o pagpakatawo, sila parehas nga bililhon nga panalangin.

Ang mga miyembro nga nagtinguha nga mosagop o mohatag og temporaryong pag-amuma ngadto sa mga bata kinahanglang mosunod sa tanang angay nga mga balaod sa mga nasod ug mga gobyerno nga nalambigit.

Ang Simbahan dili mopahigayon og mga pagsagop. Hinoon, sa Estados Unidos ug Canada, ang mga lider makaduso sa mga miyembro ngadto sa Family Services isip usa ka kapanguhaan sa pagpangonsulta. Alang sa impormasyon sa pagkontak, tan-awa sa 31.3.6.

Alang sa impormasyon mahitungod sa dili minyo nga mabdos nga mga ginikanan, tan-awa sa 38.6.19

Alang sa dugang nga impormasyon, tan-awa sa “Adoption” (Topics and Questions, topics.ChurchofJesusChrist.org).

38.8.2

Pagpangilad sa Kauban

Ang pagpangilad sa kauban mahitabo kon ang usa ka tawo mopahimulos sa pagsalig sa laing tawo aron sa pag-ilad kaniya. Mahitabo kini kon ang duha ka tawo nahisakop sa samang grupo, sama sa Simbahan. Mahitabo usab kini pinaagi sa pag-abuso sa kahimtang sa panaghigala o pagsalig, sama sa calling sa Simbahan o relasyon sa pamilya. Ang pagpangilad sa kauban sa kasagaran alang sa pinansyal nga pamintaha.

Ang mga miyembro sa Simbahan kinahanglang matinuoron sa ilang mga pagpakigsabot ug molihok uban ang kaligdong. Ang pagpangilad sa kauban usa ka makauulaw nga pagbudhi sa pagsalig. Ang responsable niini mahimong mag-atubang og kriminal nga prosekusyon. Ang mga miyembro sa Simbahan kinsa mangilad sa kauban mahimong mag-atubang usab og mga restriksiyon o pagbakwi. Tan-awa sa 32.6.1.3 ug 32.6.2.3 alang sa giya mahitungod sa mga konseho sa pagkamiyembro tungod sa mga buhat sa pagpangilad.

Ang mga miyembro dili mahimong mopahayag o mopasabot nga ang ilang mga kalihokan sa negosyo gipasiugdahan, giendorso, o nagrepresentar sa Simbahan o sa mga lider niini.

38.8.3

Audiovisual nga mga Materyal

Ang audiovisual nga mga materyal makatabang sa pagdapit sa Espiritu ug makapalambo sa pagtulon-an sa ebanghelyo diha sa mga klase ug mga miting sa Simbahan. Ang mga ehemplo niini nga mga materyal naglakip sa mga video, mga litrato, ug mga rekording sa musika. Ang paggamit niini nga mga materyal kinahanglan dili makabalda o maoy gitutokan pag-ayo sa klase o miting.

Ang mga miyembro kinahanglang dili mogamit sa audiovisual nga mga materyal diha sa mga panagtigom alang sa sakramento o sa kinatibuk-ang sesyon sa komperensiya sa stake. Hinoon, ang girekord nga musika mahimong gamiton niini nga mga miting kon gikinahanglan aron sa pagduyog og mga himno.

Ang mga miyembro kinahanglang mosunod sa tanang balaod sa katungod sa sinulat kon mogamit og audiovisual nga mga materyal (tan-awa sa 38.8.11). Kinahanglang mogamit lamang sila og mga materyal nga nahiuyon sa ebanghelyo ug makatabang sa pagdapit sa Espiritu.

38.8.4

Mga Autograph ug mga Litrato sa Kinatibuk-ang mga Awtoridad, Kinatibuk-ang mga Opisyal, ug mga Area Seventy

Ang mga miyembro sa Simbahan kinahanglang dili magpa-autograph sa Kinatibuk-ang mga Awtoridad, Kinatibuk-ang mga Opisyal, o sa mga Area Seventy. Ni ang mga miyembro mohangyo niini nga mga lider sa pagpirma sa ilang mga kasulatan, mga himno, o mga programa. Ang pagbuhat sa ingon makapawala sa ilang sagrado nga mga calling ug sa espiritu sa mga miting. Makapugong usab kini kanila sa pagtimbaya sa ubang mga miyembro.

Ang mga miyembro kinahanglang dili mokuha og mga litrato sa Kinatibuk-ang mga Awtoridad, Kinatibuk-ang mga Opisyal, o mga Seventy diha sa mga chapel atol sa mga miting (tan-awa sa 29.8).

38.8.5

Mga Negosyo

Ang mga meetinghouse sa Simbahan ug ang ubang mga pasilidad, mga miting ug mga klase sa Simbahan, ug mga website sa Simbahan ug social media nga mga channel dili mahimong gamiton aron sa pagdasig og bisan unsa nga negosyo o dili sa Simbahan nga mga organisasyon.

Ang mga lista sa mga grupo sa Simbahan o ubang impormasyon mahitungod sa mga miyembro kinahanglang dili ihatag ngadto sa bisan unsa nga negosyo o dili sa Simbahan nga organisasyon. Kini naglakip sa (apan dili limitado) niadtong nagdasig sa pagpakig-date, edukasyon, ug mga oportunidad sa panarbaho. Tan-awa sa 38.8.31.

38.8.6

Mga Empleyado sa Simbahan

Ang mga empleyado sa Simbahan kinahanglang mosunod ug mohupot sa mga sumbanan sa Simbahan sa tanang higayon. Kinahanglan usab silang mosunod sa lokal nga mga balaod sa panarbaho.

Sa pagsugod o pagpadayon sa panarbaho diha sa Simbahan, ang mga miyembro kinahanglan nga takos sa rekomend sa templo. Matag karon ug unya, ang mga representante sa Church Human Resource Department mokontak sa mga presidente sa stake o mga bishop sa pagsuta sa katakos alang sa templo sa kasamtangan ug sa potensyal nga mga empleyado sa Simbahan. Ang mga lider kinahanglang motubag dayon.

38.8.7

Mga Magasin sa Simbahan

Ang mga magasin sa Simbahan naglakip sa:

• Ang Higala alang sa mga bata.

• Alang sa Kalig-on sa mga Kabatan-onan alang sa kabatan-onan.

• Ang Liahona alang sa mga hamtong.

Ang Unang Kapangulohan nag-awhag sa tanang miyembro sa pagbasa sa mga magasin sa Simbahan. Ang mga magasin makatabang sa mga miyembro nga makat-on sa ebanghelyo ni Jesukristo, magtuon sa mga pagtulon-an sa buhi nga mga propeta, mobati nga konektado ngadto sa tibuok kalibotan nga Simbahan, moatubang sa mga hagit uban sa hugot nga pagtuo, ug mas magpaduol ngadto sa Dios.

Ang mga lider motabang sa mga miyembro nga adunay magamit nga mga magasin nga walay bayad sumala sa mosunod:

• Motabang sa mga miyembro nga mo-subscribe sa mga magasin ug mobag-o sa ilang mga subskripsiyon sa MagazineSubscriptions.ChurchofJesusChrist.org o pinaagi sa pag-subscribe alang nila gamit ang Leader and Clerk Resources.

• Mopakita sa mga miyembro unsaon sa paggamit ang sulod sa magasin diha sa ChurchofJesusChrist.org, sa Gospel Library nga app, ug sa Gospel Living nga app. Kini nga digital content libre.

• Human gayod dayon mabunyagi ang bag-ong mga miyembro, ipakita nila unsaon sa pag-akses ang mga magasin sa Simbahan sa digital nga paagi o sa giimprinta.

• Mohatag og nagpadayon nga mga subskripsiyon ngadto sa tanang kabataan ug kabatan-onan kinsa nagsimba nga walay ginikanan o tigbantay, gamit ang Leader and Clerk Resources.

Ang mga bishop mahimong motawag og representante sa magasin aron sa pagtabang sa mga miyembro nga makagamit sa mga magasin. O sila mahimong mosangon sa executive secretary sa ward sa pag-abag (tan-awa sa 7.3).

Ang representante sa magasin o executive secretary makatabang usab sa pagpangolekta og makapadasig sa hugot nga pagtuo nga mga kasinatian ug mga pagpamatuod gikan sa lokal nga mga miyembro aron mapaambit diha sa mga magasin.

Ang mga miyembro makadumala sa mga subskripsiyon sa MagazineSubscriptions.ChurchofJesusChrist.org, gamit ang ilang account sa Simbahan. Alang sa tabang, ang mga miyembro mahimong mokontak sa klerk sa ward o sa representante sa magasin.

38.8.8

Ngalan, Matang sa Logo, ug Simbolo sa Simbahan

Matang sa logo ug simbolo sa Simbahan

Ang ngalan, matang sa logo, ug simbolo sa Simbahan mao ang mahinungdanon nga mga ilhanan sa Simbahan. Kini narehistro isip mga trademark o legal nga gipanalipdan sa tibuok kalibotan. Kini gamiton sa pagpaila sa opisyal nga literatura, mga balita, ug mga kalihokan sa Simbahan.

Ang mahinungdanon nga mga ilhanan sa Simbahan pagagamiton lamang sumala sa mga lagda nga gihatag sa ubos.

Sinulat nga ngalan sa Simbahan. Ang lokal nga mga yunit mahimong mogamit sa sinulat nga ngalan sa Simbahan (dili ang matang sa logo o simbolo) kon ang tanan nga mga kondisyon anaa:

• Ang kalihokan o katuyoan diin ang ngalan giapil opisyal nga gipasiugdahan sa yunit (pananglitan, ang programa sa panagtigom alang sa sakramento).

• Ang ngalan sa lokal nga yunit gigamit isip pasiuna ngadto sa ngalan sa Simbahan (pananglitan, Campo Rosa Branch sa Ang Simbahan ni Jesukristo sa mga Santos sa Ulahing mga Adlaw).

• Ang klase sa letra dili isundog o isusama sa opisyal nga matang sa logo sa Simbahan.

Matang sa logo ug simbolo. Ang matang sa logo ug simbolo sa Simbahan (tan-awa ang gihulagway sa ibabaw) pagagamiton lamang kon giaprobahan sa Unang Kapangulohan ug sa Korum sa Napulog Duha ka Apostoles. Kini dili mahimong gamiton isip mga elemento sa dekorasyon. Dili usab kini mahimong gamiton sa bisan unsa nga personal, pangkomersyal, o pang-promosyon nga paagi.

Ang mga pangutana mahimong ipaabot ngadto sa:

Intellectual Property Office

50 East North Temple Street

Salt Lake City, UT 84150-0005

Telepono: 1-801-240-3959 o 1-800-453-3860, ekstensiyon 2-3959

Fax: [phone]

Email: [e-mail]

38.8.9

Mga Komunikasyon ngadto sa mga Presidente sa Stake ug mga Bishop gikan sa mga Empleyado ug mga Boluntaryo sa Simbahan

Kon ang mga empleyado ug mga boluntaryo sa Simbahan kinahanglang mokontak sa presidente sa stake o sa bishop, direkta sila nga makigsulti sa executive secretary sa lider gawas kon ang butang dinalian kaayo o kompidensiyal. Motugot kini sa mga presidente sa stake ug sa mga bishop sa pagtutok sa daghang responsibilidad nga sila lamang ang makatuman.

Ang mga empleyado ug mga boluntaryo sa Simbahan naglakip sa mga representante sa tanang departamento sa Simbahan, mga programa sa edukasyon ug mga eskwelahan, mga pagpadagan sa welfare ug pagbarog pinaagi sa kinaugalingong pagpaningkamot, ug mga buluhaton nga may kalabotan sa Simbahan.

Kon walay natawag nga executive secretary o wala maghimo sa iyang buluhaton, ang usa ka lider mahimong direkta nga kontakon.

38.8.10

Mga Computer

Ang mga computer ug software nga gigamit sa mga meetinghouse sa Simbahan gihatag ug gidumala sa punoang buhatan sa Simbahan o sa buhatan sa area. Ang mga lider ug ang mga miyembro mogamit niini nga mga kapanguhaan aron sa pagsuporta sa mga katuyoan sa Simbahan, lakip sa buhat sa family history.

Ang tanan nga software niini nga mga computer kinahanglan nga tukma nga adunay lisensya ngadto sa Simbahan.

Ang presidente sa stake maoy modumala sa pagpahimutang ug sa paggamit sa mga computer diha sa stake, lakip niadtong anaa sa mga sentro sa FamilySearch. Ang espesyalista sa teknolohiya sa stake moseguro nga kini tukma nga gi-update ug gimentinar sumala sa gilatid diha sa 33.10

38.8.11

Mga Materyal nga Adunay Katungod sa Sinulat

Ang katungod sa sinulat mao ang proteksyon nga gihatag sa balaod ngadto sa mga tigmugna sa orihinal nga mga buhat sa pagsulat nga mapadayag pinaagi sa mga butang nga makita ug mahikap (lakip sa digital) nga porma, lakip sa:

• Mga buhat sa literaryo, musika, drama, ug choreography.

• Mga buhat sa arte, potograpiya, ug pagkulit.

• Mga buhat sa audio ug audiovisual (sama sa mga sine ug mga video, mga CD, ug mga DVD).

• Mga programa o mga dula sa computer.

• Internet ug ubang mga database.

Ang mga balaod nga nagdumala sa mamugnaong mga buhat ug sa pagpagamit niini magkalahi sa matag nasod. Ang mga palisiya sa Simbahan nga gilatid niining seksiyon nagsubay sa internasyonal nga mga kasabotan nga magamit sa kadaghanan nga mga nasod. Alang sa kayano, kini nga seksiyon nagpasabot sa mga katungod sa naghimo isip “katungod sa sinulat.” Hinoon, pipila niini nga mga katungod mahimong mahibaloan sa lain-laing mga ngalan sa pipila ka nasod.

Ang mga miyembro sa Simbahan kinahanglan nga estriktong mosunod sa tanang mga balaod sa katungod sa sinulat. Sa kinatibuk-an, ang mga tag-iya lamang sa katungod sa sinulat ang mahimong motugot sa mosunod nga mga paggamit sa ilang buhat:

• Duplikasyon (pagpakopya)

• Pagpang-apud-apod

• Pagpasundayag diha publiko

• Pagpakita diha sa publiko

• Paghimo og laing buhat nga gibase niini

Ang paggamit sa usa ka buhat sa bisan hain niini nga mga paagi nga walay pagtugot gikan sa tag-iya sa katungod sa sinulat supak sa palisiya sa Simbahan. Ang maong paggamit mahimo usab nga mopaubos sa Simbahan o sa naggamit ngadto sa legal nga tulubagon.

Ang naggamit sa usa ka buhat kinahanglan nga maghunahuna nga kini gipanalipdan pinaagi sa katungod sa sinulat. Ang mga buhat nga gimantala kasagaran naglakip sa pahibalo sa eksklusibong katungod sa pagmantala, sama sa “© 1959 ni John Doe.” (Alang sa mga rekording sa tingog, ang simbolo mao ang ℗.) Hinoon, ang usa ka pahibalo sa katungod sa sinulat wala kinahanglana alang sa legal nga panalipod. Sa samang paagi, ang kamatuoran nga ang usa ka publikasyon wala nay kopya o gimantala diha sa internet wala magpasabot nga kini walay katungod sa sinulat. Ni makahatag og katarongan sa pagpadoble, pag-apud-apod, pagpahigayon, pagpakita, o paghimo og laing mga buhat nga gibase niini nga walay pagtugot.

Ang Intellectual Property Office (IPO) sa Simbahan motabang sa pagproseso sa mga hangyo sa paggamit sa mga materyal o programa sa Simbahan nga adunay katungod sa sinulat, lakip sa mga materyal nga adunay katungod sa sinulat pinaagi sa Intellectual Reserve, Inc. (IRI). Ang IRI usa ka lain, dili pangnegosyo [nonprofit] nga organisasyon nga nanag-iya sa intellectual property nga gigamit sa Simbahan. Ang dugang nga impormasyon bahin sa paghangyo sa paggamit sa mga materyal nga gipanag-iya sa Simbahan, tan-awa sa “Terms of Use” sa ChurchofJesusChrist.org.

Ang mosunod nga mga pangutana ug mga tubag mahimong makatabang sa mga miyembro nga makasabot ug mosunod sa mga balaod sa katungod sa sinulat kon maggamit sa mga materyal nga adunay katungod sa sinulat diha sa simbahan ug sa panimalay. Kon ang mga miyembro adunay mga pangutana nga wala matubag niining mga lagda, mahimo silang mokontak sa IPO:

Intellectual Property Office

50 East North Temple Street

Salt Lake City, UT 84150-0005

Telepono: 1-801-240-3959 o 1-800-453-3860, ekstensiyon 2-3959

Fax: [phone]

Email: [e-mail]

Makapakopya ba ako sa gimantala nga mga materyal sa Simbahan? Gawas kon gisulti, ang mga materyal sa Simbahan mahimong makopyahan alang sa dili pangnegosyo nga paggamit sa Simbahan, panimalay, ug pamilya. Ang mga kasabotan sa paggamit nga anaa sa website sa Simbahan o app nagpakita kon sa unsa nga paagi nga ang materyal niini nga mga website ug mga app mahimong gamiton. Walay komersyal nga gamit ang himoon sa mga materyal sa Simbahan nga walay piho nga sinulat nga pagtugot gikan sa IPO.

Makakopya ba ako og musika? Ang espesyal nga mga balaod sa katungod sa sinulat magamit ngadto sa musika. Ang usa ka tawo mahimong mokopya gikan sa mosunod nga mga tinubdan alang sa dili pangkomersyal nga gamit sa Simbahan, panimalay, ug pamilya gawas kon ang restriksiyon piho nga gisulat diha sa himno o kanta:

• Mga Himno

• Ang Songbook sa mga Bata

• Mga magasin sa Simbahan

Ang paghimo og doble sa naimprinta o narekord nga musika nga walay pagtugot gikan sa tag-iya sa katungod sa sinulat supak sa palisiya sa Simbahan.

Ako ba makakopya og mga materyal nga wala panag-iyaha sa Simbahan? Sa kasagaran dili. Ang mga balaod sa eksklusibong katungod sa pagmantala maoy nagdumala sa paggamit sa pribadong gipanag-iya nga mga materyal. Sa kasagaran adunay mga restriksiyon nga naghatag og mga kondisyon nga kinahanglang sundon gayod sa publiko sa dili pa mokopya sa mga materyal nga dili iya sa Simbahan. Kini nga mga restriksiyon sa kasagaran gilista duol sa sinugdanan sa publikasyon. Ang mga miyembro kinahanglan estriktong mosunod sa tanang mga balaod sa katungod sa sinulat.

Makapakita ba ako og komersyal nga audiovisual nga mga produkto diha sa mga kalihokan sa Simbahan? Sa kasagaran dili. Ang mga miyembro sa Simbahan kinahanglan nga dili mosupak sa mga pasidaan ug mga restriksiyon nga gibutang sa komersyal nga audiovisual nga mga produkto. Kini naglakip sa mga salida, ubang video, ug musika. Ang paggamit sa komersyal nga audiovisual nga mga produkto sa mga kalihokan sa Simbahan sa kasagaran nagkinahanglan og pagtugot gikan sa mga tag-iya sa katungod sa sinulat.

Maka-download o makakopya ba ako og computer software ug ubang mga program nga gamiton alang sa Simbahan? Sa kasagaran dili. Ang mga computer program ug ubang software dili mahimong pakopyahan o ma-download gawas ang tanang lisensya napalit sa saktong paagi.

Unsa nga pagtugot ang gikinahanglan sa pagpasundayag og mga produksyon sa musika ug salida? Ang mga produksyon nga gipanag-iya sa Simbahan o IRI mahimong ipasundayag diha sa Simbahan nga walay pagtugot gikan sa punoang buhatan sa Simbahan. Kon ang usa ka produksyon nga adunay katungod sa sinulat wala panag-iyaha sa Simbahan, ang mga miyembro kinahanglan nga mangayo og pagtugot sa tag-iya sa katungod sa sinulat sa pagpasundayag sa tibuok o kabahin niini diha sa Simbahan. Sa kasagaran ang tag-iya sa katungod sa sinulat magkinahanglan og bayad o royalty bisan kon walay gipangayo nga bayad sa pasundayag. Ang tanang pasundayag kinahanglan nga adunay pagtugot sa lokal nga mga lider sa pagkapari.

38.8.12

Kurikulum nga mga Materyal

Ang Simbahan naghimo og mga materyal aron sa pagtabang sa mga miyembro nga makat-on ug makasunod sa ebanghelyo ni Jesukristo. Kini naglakip sa mga kasulatan, mga mensahe sa kinatibuk-ang komperensiya, mga magasin, mga manwal, mga libro, ug ubang mga kapanguhaan. Ang mga lider moawhag sa mga miyembro sa paggamit sa mga kasulatan ug sa ubang mga kapanguhaan kon gikinahanglan sa pagtuon sa ebanghelyo diha sa panimalay.

Ang pagkat-on ug pagtudlo sa ebanghelyo kinahanglan nga motutok sa Manluluwas ug sa Iyang doktrina. Aron matabangan nga magpadayon kini nga pagtutok diha sa mga klase sa Simbahan, ang mga lider moseguro nga ang mga magtutudlo mogamit sa gitugotan nga mga materyal. Alang sa impormasyon mahitungod sa gitugotan nga mga materyal, tan-awa sa Mga Panudlo alang sa Kurikulum.

38.8.13

Mga Directory

Ang mga miyembro ug mga lider giawhag sa paggamit sa mga directory nga gihatag sa Simbahan. Kini nga mga direktori anaa sa Ward Directory and Map sa ChurchofJesusChrist.org ug diha sa Member Tools app. Kini adunay sukaranang impormasyon sa pagkontak alang sa mga miyembro. Ang mga lider sa stake ug ward makahimo sa pagtan-aw og dugang nga impormasyon nga makatabang sa ilang mga calling. Ang mga lider makatan-aw usab niini nga impormasyon diha sa Leader and Clerk Resources.

Ang mga miyembro mahimong mobutang og restriksiyon sa unsay makita sa ilang digital nga impormasyon sa pagkontak. Sila mohimo niini pinaagi sa pagpili sa mga lebel sa pagkapribado diha sa profile sa ilang pamilya.

Ang mga lider sa stake ug ward kinahanglan nga motahod sa mga setting sa pagkapribado nga gipili sa mga miyembro. Kini nga mga lider moseguro usab nga ang impormasyon gamiton lamang alang sa gitugotan nga mga katuyoan sa Simbahan.

Ang giprinta nga mga directory sa stake ug ward sa kinatibuk-an wala kinahanglana. Kon ang mga lider motino nga adunay tinuod nga panginahanglan, ang giprinta nga mga directory pwede himoon lamang pinaagi sa paggamit sa Ward Directory and Map diha sa ChurchofJesusChrist.org. Kini nga mga directory wala maglakip sa gender, edad, o adlaw nga natawhan sa miyembro.

Ang mga listahan sa pagkamiyembro kinahanglan nga dili iprinta alang sa dili pang-Simbahan nga paggamit.

38.8.14

Sininaan ug Panagway

Ang mga lalaki ug mga babaye gilalang subay sa hitsura sa Dios (tan-awa sa Genesis 1:26–27; Abraham 4:27). Ang mortal nga mga lawas usa ka sagrado nga gasa.

Ang mga miyembro sa Simbahan giawhag sa pagpakita og pagtahod alang sa lawas diha sa ilang mga pagpili mahitungod sa angay nga sinina ug hitsura. Unsay angay magkalahi sa lain-laing mga kultura ug lain-laing mga okasyon. Pananglitan, sa panagtigom alang sa sakramento, ang mga indibidwal magsul-ob sa ilang labing maayong sinina sa Dominggo aron sa pagpakita og pagtahod alang sa ordinansa sa sakramento (tan-awa sa 18.9.3). Kini nga samang baroganan magamit usab alang sa pagtambong sa templo (tan-awa sa 27.1.5). Ang mga disipulo ni Jesukristo mahibalo unsa ang labing maayo nga pagsinina ug pamustura sa ilang kaugalingon.

Ang mga miyembro ug mga lider kinahanglang dili mohukom sa uban base sa sinina ug panagway. Kinahanglan nga ilang higugmaon ang tanang mga tawo, sumala sa sugo sa Manluluwas (tan-awa sa Mateo 22:39; Juan 13:34–35). Ang tanan kinahanglan nga hangopon diha sa mga miting ug mga kalihokan sa Simbahan (tan-awa sa 38.1.1).

Kon mag-isyu og mga rekomend sa templo ug mga calling sa ward ug stake, ang mga lider mokonsiderar sa katakos ug sa giya sa Espiritu (tan-awa sa 26.3, 30.1.1, ug 31.1.1).

38.8.15

Hilabihan nga Pagpangandam o Pagpaningkamot nga Mabuhi

Ang Simbahan nag-awhag og pagbarog pinaagi sa kinaugalingong paningkamot. Ang mga miyembro giawhag nga mangandam sa espirituwal ug pisikal nga paagi alang sa mga hagit sa kinabuhi. Tan-awa sa 22.1.

Hinoon, ang mga lider sa Simbahan mitambag batok sa hilabihan o nanghinobra nga pagpangandam alang sa posible nga makalaglag nga mga panghitabo. Ang maong mga paningkamot usahay gitawag nga pagpaningkamot nga mabuhi. Ang mga paningkamot sa pagpangandam kinahanglan nga nadasig pinaagi sa hugot nga pagtuo, dili kahadlok.

Ang mga lider sa Simbahan mitambag sa mga miyembro nga dili mangutang aron makapundo og pagkaon. Hinoon, ang mga miyembro kinahanglan nga moestablisar og suplay sa pagkaon diha sa panimalay ug pinansyal nga tagana sa paglabay sa panahon. Tan-awa sa 22.1.4 ug “Food Storage” (Topics and Questions, topics.ChurchofJesusChrist.org).

38.8.16

Adlaw sa Puasa

Ang mga miyembro mahimong magpuasa bisan kanus-a. Hinoon, sila sa kasagaran mag-obserbar sa unang Igpapahulay sa bulan isip adlaw sa pagpuasa.

Ang usa ka adlaw sa pagpuasa kasagaran naglakip sa pag-ampo, sa dili pagkaon ug pag-inom sulod sa 24 oras (kon pisikal nga makahimo), ug paghatag og madagayaon nga halad sa puasa. Ang halad sa puasa usa ka donasyon aron sa pagtabang niadtong nanginahanglan (tan-aw sa 22.2.2).

Usahay ang tibuok Simbahan o lokal nga mga miting pagahimoon sa unang Igpapahulay sa bulan. Kon kini mahitabo, ang kapangulohan sa stake motino og alternatibo nga Igpapahulay alang sa adlaw sa pagpuasa.

38.8.17

Sugal ug mga Loteriya

Ang Simbahan supak ug nagtambag batok sa sugal sa bisan unsa nga matang. Kini naglakip sa pustaanay sa mga sport ug loteriya nga gipasiugdahan sa gobyerno.

38.8.18

Dinapit nga mga Mamumulong o mga Magtutudlo

Alang sa kadaghanan sa mga miting sa Simbahan, ang mga mamumulong o mga tigtudlo kinahanglang nahisakop sa lokal nga ward o stake.

Ang dinapit nga mamumulong o tigtudlo mao ang usa ka tawo nga wala mahisakop sa ward o stake. Ang pagtugot sa bishop gikinahanglan sa dili pa ang usa ka dinapit nga mamumulong dapiton ngadto sa miting o kalihokan sa ward. Ang pagtugot sa presidente sa stake gikinahanglan sa pagdapit og dinapit nga mga mamumulong ngadto sa mga miting o mga kalihokan sa stake.

Ang bishop ug ang presidente sa stake mosuta sa dinapit nga mga mamumulong o mga tigtudlo. Kini maglakip sa pagkontak sa bishop sa maong tawo.

Ang bishop o ang presidente sa stake moseguro nga:

• Ang mga pasundayag nahiuyon sa doktrina sa Simbahan.

• Ang presentasyon dili maglakip og pangagpas nga mga hilisgotan (ang mga hilisgotan kinahanglang mahisubay sa mga pakigpulong sa kinatibuk-ang komperensiya).

• Ang mga mamumulong o mga magtutudlo dili bayaran, dili manguha og mga partisipante, ug dili mo-solicit sa mga kustomer o mga kliyente.

• Ang mga gasto sa pagbiyahe sa tawo dili bayaran gamit ang lokal nga mga pundo sa badyet sa yunit o sa pribado nga mga kontribusyon.

• Ang mga presentasyon nagsubay sa mga lagda sa paggamit sa mga pasilidad sa Simbahan (tan-awa sa 35.5).

38.8.19

Paglangyaw

Ang mga miyembro nga magpabilin sa ilang yutang natawhan sa kasagaran adunay mga oportunidad sa pagtukod ug pagpalig-on sa Simbahan dinha. Hinoon, ang paglangyaw ngadto sa laing nasod usa ka personal nga pagpili.

Ang mga miyembro nga mobalhin ngadto sa laing nasod kinahanglan nga mosunod sa tanan nga magamit nga mga balaod (tan-awa sa Doktrina ug mga Pakigsaad 58:21).

Ang mga misyonaryo kinahanglan nga dili motanyag nga mo-sponsor sa paglangyaw sa uban. Ni sila mohangyo sa ilang mga ginikanan, kaparyentihan, o sa uban sa pagbuhat sa ingon.

Ang Simbahan dili mo-esponsor og paglangyaw pinaagi sa pagpanarbaho sa Simbahan.

Ang mga miyembro sa Simbahan motanyag sa ilang panahon, mga talento, ug pakighigala aron sa pag-abi-abi sa mga milangyaw ug mga bakwit isip mga sakop sa ilang mga komunidad (tan-awa sa Mateo 25:35; tan-awa usab sa 38.8.35 niini nga tamdanan nga basahon).

38.8.20

Internet

38.8.20.1

Opisyal nga mga Kapanguhaan sa Internet sa Simbahan

Ang Simbahan nagmintenar og opisyal nga mga website, mga blog, ug social media nga mga account. Kini nga mga kapanguhaan klaro nga giila isip opisyal pinaagi sa paggamit sa matang sa logo [wordmark] o simbolo sa Simbahan (tan-awa sa 38.8.8). Kini usab nagsunod sa legal nga mga kinahanglanon ug sa intellectual property ug pribado nga mga palisiya sa Simbahan.

38.8.20.2

Paggamit sa mga Miyembro og Internet sa mga Calling sa Simbahan

Ang mga miyembro dili makahimo og mga website, mga blog, o social media nga mga account alang sa Simbahan o aron opisyal nga morepresentar sa Simbahan ug sa mga panglantaw, doktrina, mga palisiya, ug mga pamaagi niini. Hinoon, makahimo sila og mga website, mga blog, o social media nga mga account sa pagtabang sa ilang mga calling. Sa pagbuhat sa ingon, ang mga miyembro kinahanglan nga motuman sa mosunod nga mga lagda:

• Ang paghimo og website, blog, o social media nga account kinahanglan nga aprobahan una sa presidente sa stake (alang sa mga kapanguhaan sa stake) o bishop (alang sa mga kapanguhaan sa ward).

• Ang matang sa logo sa Simbahan o simbolo dili mahimong gamiton o sundogon (tan-awa sa 38.8.8).

• Ang online nga kapanguhaan kinahanglan nga adunay katuyoan ug tumong ug hatagan og ngalan. Ang ngalan mahimong maglakip sa ngalan sa ward o stake. Hinooon, dili kini maglakip sa opisyal nga ngalan sa Simbahan.

• Ang mga miyembro kinahanglang dili mamahayag o mopasabot nga ang sulod, mga imahe, o uban pang mga materyal sa online nga kapanguhaan gipasiugdahan o gi-endorso sa Simbahan o opisyal nga nagrepresentar sa Simbahan sa bisan unsang paagi. Hinoon, ang dili pag-angkon kinahanglan nga iapil nga nag-ingon nga kini dili usa ka opisyal, produkto nga gipasiugdahan sa Simbahan.

• Ang tanang sulod kinahanglan nga angay alang sa gitumong nga tigpaminaw ug kinahanglan nga aktibong gipangulohan.

• Ang online nga kapanguhaan kinahanglan nga maglakip sa impormasyon sa pagkontak.

• Labaw sa usa ka tawo nga administrador kinahanglan maoy responsable alang sa kapanguhaan sa online. Kini makahimo sa pagpadayon kon ang calling o buluhaton sa usa ka tawo mausab. Malikayan usab niini nga ang usa ka tawo mahago sa pag-update ug pag-monitor sa kapanguhaan.

• Ang gipanag-iya sa Simbahan nga mga artwork, mga video, musika, ug uban pang mga materyal kinahanglang dili i-post gawas kon ang maong paggamit klaro nga gitugotan pinaagi sa Terms of Use sa opisyal nga website sa Simbahan o sa Church’s Intellectual Property Office. Ang artikulo nga adunay katungod sa sinulat gikan sa ubang mga tinubdan kinahanglan nga dili gamiton gawas kon ang tag-iya sa artikulo mihatag pag-una sa sinulat nga pagtugot. Alang sa dugang nga impormasyon mahitungod sa paggamit sa materyal nga adunay katungod nga sinulat, tan-awa sa 38.8.11.

• Kon maggamit sa mga imahe, mga video, o personal nga impormasyon, ang pagtugot gikan sa tag-iya sa artikulo o sa mga indibidwal nga naapil niini gikinahanglan. Ang pagtugot mahimong makuha pinaagi sa release form, sa usa ka pahibalo sa publiko, sa usa ka gibutang nga pahibalo alang sa usa ka piho nga kalihokan, o sinulat sa pagtugot kon gikinahanglan. Ang mga balaod sa nasod bahin sa pagkapribado kinahanglan nga sundon.

• Ang mga kapanguhaan sa online kinahanglan nga dili mopadoble sa mga himan ug mga bahin nga anaa na sa ChurchofJesusChrist.org, Member Tools, o sa ubang mga kapanguhaan sa Simbahan.

• Ang mga lider ug ang mga misyonaryo kinahanglan nga makigsabot aron malikayan nga madoble ang komunikasyon.

• Ang mga kapanguhaan sa online kinahanglan dili na gamiton kon kini wala na kinahanglana. Ang media nga importante (sama sa mga litrato ug mga video) kinahanglan nga ipreserbar diha sa kasaysayan sa ward o stake.

Alang sa dugang nga mga lagda, tan-awa sa internet.ChurchofJesusChrist.org.

38.8.20.3

Personal nga Paggamit sa Internet ug sa Social Media

Ang internet ug social media adunay daghang positibo nga gamit. Taliwala niini mao ang mga oportunidad sa pagpaambit sa mga pagpamatuod kabahin sa Manluluwas ug sa Iyang gipahiuli nga ebanghelyo. Ang mga blog, social media, ug uban pang mga teknolohiya sa internet makapahimo sa mga miyembro sa pagpasiugda og mga mensahe sa kalinaw, paglaom, ug hingpit nga kalipay nga nag-uban sa hugot nga pagtuo diha kang Kristo.

Ang mga miyembro giawhag sa pagpaambit og makapabayaw nga sulod. Sila kinahanglang mopakita usab og pagkasibilisado sa tanang mga online nga transaksiyon, lakip sa social media. Sila kinahanglan gayod molikay sa panagbingkil (tan-awa sa 3 Nephi 11:29–30; Doktrina ug mga Pagkigsaad 136:23).

Ang mga miyembro kinahanglan molikay sa tanang mga pamahayag nga dili mahigalaon ngadto sa uban (tan-awa sa 38.6.14). Sila maningkamot nga mamahimong sama ni Kristo ngadto sa uban sa tanang panahon, lakip sa online, ug mopakita og usa ka bug-os nga pagtahod alang sa tanang mga anak sa Dios.

Ang mga miyembro kinahanglan dili mogamit og pagpanghulga, pagpanakit, pagpakaulaw, pagkabayolente, o kondili abusado nga pinulongan o mga imahe diha sa internet. Kon motumaw ang mga paghulga kabahin sa ilegal nga mga buhat diha sa internet, ang tinugyanan sa balaod kinahanglan kontakon dayon.

Ang mga miyembro kinahanglan nga dili mopasabot nga ang ilang mga mensahe nagrepresentar o gipasiugdahan sa Simbahan.

38.8.21

Ekipo sa Internet, Satellite, ug Video

Ang ekipo sa internet, satellite ug video sa Simbahan gamiton lamang alang sa dili pangnegosyo nga mga katuyoan sa Simbahan. Ang bisan unsa nga paggamit kinahanglan nga tugotan sa kapangulohan sa stake o bishopric.

Kini nga ekipo dili mahimong gamiton sa pagrekord sa mga programa nga wala pasiugdahi sa Simbahan. Ni ang mga kapanguhaan sa Simbahan, sama sa mga koneksyon sa internet, gamiton sa pag-access o pagrekord sa mao nga mga programa.

Ang mga tawo lamang nga nabansay sa pag-operate sa ekipo ang mohimo sa ingon. Kinahanglan nga segurohon sa pagkandado kon wala gamita. Ang ekipo dili kuhaon gikan sa gambalay alang sa personal nga gamit.

38.8.22

Mga Balaod sa Yuta

Ang mga miyembro kinahanglang mosunod, motahod, ug mopaluyo sa mga balaod sa bisan asa nga nasod diin sila nagpuyo o nagbiyahe (tan-awa sa Doktrina ug mga Pakigsaad 58:21–22; Ang mga Artikulo sa Hugot nga Pagtuo 1:12). Kini naglakip sa mga balaod nga nagdili sa proselyting.

38.8.23

Legal Counsel alang sa mga Butang sa Simbahan

Kon ang legal nga tabang gikinahanglan alang sa mga butang sa Simbahan, ang mga lider sa Simbahan kinahanglang mokontak sa legal counsel sa Simbahan. Sa Estados Unidos ug Canada, ang presidente sa stake mokontak sa Church’s Office of General Counsel:

1-800-453-3860, ekstensiyon 2-6301

1-801-240-6301

Sa gawas sa Estados Unidos ug Canada, ang presidente sa stake mokontak sa legal counsel sa area diha sa buhatan sa area.

38.8.23.1

Pagkalambigit o mga Dokumento sa Legal nga mga Husay

Ang mga lider sa Simbahan kinahanglang dili mag-apil-apil diha sa sibil o kriminal nga mga kaso alang sa mga miyembro sa ilang mga yunit nga dili una mokonsulta sa legal counsel sa Simbahan. Kining sama nga palisiya naglakip usab sa pakigsabot sa mga abogado o mga kawani sa korte, lakip na pinaagi sa email.

Ang mga lider kinahanglang mokonsulta sa legal counsel sa Simbahan kon, sa ilang kapasidad sa Simbahan, sila:

• Nagtuo nga sila kinahanglang motestigo o mosulti sa legal nga butang.

• Gikinahanglan sa legal nga proseso nga motestigo o mosulti sa legal nga butang.

• Gimandoan sa paghatag og ebidensya.

• Gisugo nga boluntaryong mohatag og mga dokumento o impormasyon.

• Gisugo nga makigsulti sa mga abogado o sa sibil nga mga awtoridad mahitungod sa legal nga mga kahimoan, lakip sa mga husay sa pagsentensiya o parole.

Bisan unsa ka maayo ang tumong, ang pagpaambit sa mga lider sa Simbahan og impormasyon sa legal nga mga kahimoan mahimong masaypan og sabot ug makadaot. Ang maong pagpaambit mahimong makadaot gayod ngadto sa mga biktima ug sa ilang mga pamilya. Ang pagsunod sa palisiya sa Simbahan makatabang usab nga dili malambigit ang Simbahan sa legal nga mga butang.

38.8.23.2

Pagpamatuod diha sa Legal nga mga Husay

Ang mga lider sa Simbahan dili motestigo alang sa Simbahan sa bisan unsa nga legal nga husay nga walay unang pagtugot gikan sa Office of General Counsel. Kini nga palisiya magamit usab alang sa mga husay sa pagsentensiya ug parole. Ang mga lider sa Simbahan mahimong dili mohatag sa gisulti o sinulat nga ebidensya sa ilang kapasidad sa pagpangulo nga wala kini nga pagtugot.

Ang mga lider sa Simbahan kinahanglan dili mosugyot o mopasabot nga ang ilang pagtestigo sa legal nga husay nagrepresentar sa posisyon sa Simbahan.

Ang mga lider sa Simbahan kinahanglan dili moimpluwensya sa testigo sa usa ka saksi sa bisan unsa nga legal nga husay.

Ang impormasyon sa pagkontak alang sa legal nga magtatambag sa Simbahan gihatag diha sa 38.8.23.

38.8.24

Paggamit sa Huloganan sa Sulat [Mailbox]

Sa daghan nga mga nasod, kini usa ka kalapasan sa mga regulasyon sa koreyo ang pagbutang og bisan unsang materyal nga walay selyo o diha sa sulod o ibabaw sa mga huloganan sa sulat. Kini nga restriksiyon magamit ngadto sa bisan unsa nga materyal nga may kalabotan sa Simbahan, sama sa mga flyer, mga newsletter, o mga pahibalo. Ang mga lider sa Simbahan kinahanglang motudlo sa mga miyembro ug sa mga misyonaryo nga dili mobutang sa maong mga aytem diha sa sulod o sa ibabaw sa huloganan sa sulat.

38.8.25

Komunikasyon sa mga Miyembro ngadto sa Punoang Buhatan sa Simbahan

Ang mga miyembro sa Simbahan wala awhaga nga manawag sa telepono, mo-email, o mosulat ngadto sa Kinatibuk-ang mga Awtoridad mahitungod sa mga pangutana sa doktrina, personal nga mga hagit, o mga hangyo. Ang personal nga pagtubag makapalisod sa Kinatibuk-ang mga Awtoridad sa pagtuman sa ilang mga katungdanan. Giawhag ang mga miyembro sa pagduol sa ilang lokal nga mga lider, lakip sa ilang presidente sa Relief Society o presidente sa korum sa mga elder, kon magtinguha og espirituwal nga giya (tan-awa sa 31.3).

Sa kasagaran nga mga hitabo, ang bisan unsang pagkontak gikan sa mga miyembro ngadto sa Kinatibuk-ang mga Awtoridad ibalik ngadto sa ilang lokal nga mga lider. Ang presidente sa stake kinsa nagkinahanglan og pagpasabot mahitungod sa doktrina o ubang mga butang sa Simbahan mahimong mosulat alang sa ilang mga miyembro ngadto sa Unang Kapangulohan.

38.8.26

Panarbaho sa mga Miyembro

Ang mga miyembro sa Simbahan kinahanglan nga mangita og trabaho nga nahisubay sa mga baroganan sa ebanghelyo ug diin sila makahimo sa maayong konsensya makapangayo og mga panalangin sa Ginoo. Kini usa ka personal nga butang nga anaa ra gayod sa paghukom sa miyembro ug sa mainampoon nga paghunahuna.

38.8.27

Mga Miyembro nga adunay mga Kakulangan

Ang mga lider ug mga miyembro giawhag sa pagtubag sa mga panginahanglan sa tanang nagpuyo sulod sa ilang mga yunit. Ang mga miyembro nga adunay mga kakulangan adunay bili ug makatampo sa makahuluganong mga paagi. Ang mga kakulangan posible nga intelektuwal, sosyal, emosyonal, o pisikal.

Ang mga miyembro sa Simbahan giawhag sa pagsunod sa ehemplo sa Manluluwas sa paghatag og paglaom, pagsabot, ug paghigugma niadtong kinsa adunay mga kakulangan. Ang mga lider kinahanglan nga makaila kinsa kadtong adunay mga kakulangan ug magpakita og tinuod nga tinguha ug pagpakabana.

Ang mga lider moila usab sa mga miyembro kinsa magkinahanglan og dugang nga pag-atiman tungod kay ang usa ka ginikanan, kapikas, anak, o igsoon adunay kakulangan. Ang pag-atiman sa usa ka sakop sa pamilya kinsa adunay kakulangan mahimong magantihon ug mahagiton.

Ang mga lider mangita ug mangalagad sa mga miyembro nga may mga kakulangan nga nagpuyo sa mga panimalay o sa ubang mga pasilidad nga layo gikan sa mga sakop sa pamilya.

38.8.27.1

Pagpadugang sa Pagkahibalo ug Pagsabot

Ang mga lider, mga magtutudlo, ug ubang mga miyembro kinahanglang magtinguha nga makasabot sa matag indibidwal nga adunay kakulangan ug sa iyang mga kalig-on ug mga panginahanglan. Madugangan nila ang ilang pagsabot pinaagi sa pagpakigsulti sa tawo ug sa mga sakop sa iyang pamilya. Ang mga kapanguhaan anaa sa disability.ChurchofJesusChrist.org.

38.8.27.2

Paghatag og Tabang

Ang mga lider motimbang-timbang sa mga panginahanglan niadtong kinsa adunay mga kakulangan ug sa ilang mga tig-atiman. Kini nga mga lider motino kon sa unsa nga paagi ang mga kapanguhaan sa ward o stake magamit sa pagtabang nga matubag ang mga panginahanglan kon angay. Ang mga lider moawhag sa mga miyembro sa pag-abag ug pagtabang pinaagi sa gugma ug pakighigala.

Ang bishopric o kapangulohan sa stake mahimong motawag og ward o stake nga espesyalista alang sa adunay kakulangan aron sa pagtabang sa mga indibidwal, mga pamilya, mga magtutudlo, ug sa ubang mga lider (tan-awa sa 38.8.27.9).

Ang mga lider mahimo usab nga moila og angay nga mga kapanguhaan sa komunidad nga makatabang sa mga indibidwal kinsa adunay kakulangan ug sa ilang mga pamilya.

Alang sa dugang nga impormasyon bahin sa pagtabang sa mga tawo nga adunay mga kakulangan, tan-awa sa disability.ChurchofJesusChrist.org. Ang mga lider mahimo usab nga mokontak sa Family Services (kon anaa, tan-awa sa 31.3.6 alang sa impormasyon sa pagkontak).

Ang mga lider ug ang mga miyembro kinahanglan nga dili mosulay sa pagpasabot ngano nga ang usa ka tawo adunay kakulangan o ngano nga ang usa ka pamilya adunay anak nga adunay kakulangan. Kinahanglan nga dili gayod sila mosugyot nga ang kakulangan usa ka silot gikan sa Dios (tan-awa sa Juan 9:2–3) o usa ka espesyal nga pribilehiyo.

38.8.27.3

Paghatag og mga Ordinansa

Tan-awa sa 38.2.4.

38.8.27.4

Paghatag og mga Oportunidad sa Pag-alagad ug Pag-apil

Daghang mga miyembro nga adunay mga kakulangan makaalagad sa hapit sa bisan unsa nga mga buluhaton sa Simbahan. Ang mga lider mainampoong mokonsiderar sa mga abilidad, mga sirkumstansiya, ug mga tinguha sa matag tawo ug dayon mohatag sa angay nga mga oportunidad sa pagserbisyo. Ang mga lider kinahanglan nga motambag sa indibidwal ug sa iyang pamilya. Sila mokonsiderar sa mga epekto sa usa ka calling sa Simbahan diha sa tawo ug sa iyang pamilya o tig-atiman. (Tan-awa sa Doktrina ug mga Pakigsaad 46:15.)

Kon magkonsiderar sa mga buluhaton o mga calling sa Simbahan alang sa mga tig-atiman sa mga tawo nga adunay mga kakulangan, ang mga lider mainampingon nga motimbang-timbang sa mga sirkumstansiya sa mga tig-atiman.

Ang mga lider ug ang mga magtutudlo kinahanglan molakip sa mga miyembro nga adunay mga kakulangan diha sa mga miting, mga klase, ug sa mga kalihokan kutob sa mahimo. Ang mga leksiyon, mga pakigpulong, ug ang pamaagi sa pagtudlo kinahanglan nga ipahaom sa pagtubag sa mga panginahanglan sa matag tawo. Alang sa impormasyon mahitungod sa pagpahaom sa mga leksiyon, tan-awa sa disability.ChurchofJesusChrist.org.

Ang bishopric mahimo usab nga modapit sa usa ka miyembro sa ward sa pagtabang sa tawo nga adunay kakulangan diha sa usa ka miting o kalihokan. Alang sa klase nga naglakip sa usa ka miyembro nga adunay mga kakulangan, ang bishopric mahimong motawag og daghan nga mga magtutudlo. Ang mga magtutudlo magtambayayong sa pagtubag sa mga panginahanglan sa tanan nga mga sakop sa klase.

Kon ang usa ka tawo dili makaapil sa usa ka miting, klase, o kalihokan, ang mga lider ug mga magtutudlo mahimong mokonsulta sa miyembro ug sa iyang pamilya mahitungod kon unsaon sa pagtubag sa mga panginahanglan sa miyembro. Ang presidente sa stake o ang bishop mahimong moaprobar sa pag-organisar og espesyal nga mga klase o mga programa alang sa mga miyembro nga adunay mga kakulangan (tan-awa sa 38.8.27.5). Kon ang usa ka tawo dili makatambong og mga miting sa Simbahan, ang mga lider ug mga magtutudlo mahimong mohatag sa mga materyal sa leksiyon, mga rekording, o sibya.

Ang pagsibya sa mga kalihokan, lakip sa mga panagtigom alang sa sakramento ug mga lubong, gituyo lamang alang niadtong kinsa dili personal nga makatambong (tan-awa sa 29.7). Alang sa dugang nga impormasyon mahitungod sa pag-ambit sa sakramento, tan-awa sa 18.9.3.

Ang mga lider moawhag sa mga naghupot sa pagkapari kinsa adunay mga kakulangan nga moapil sa mga ordinansa kon angay. Sugod sa Enero sa tuig nga sila mag-edad og 12, ang mga naghupot sa pagkapari ug ang mga batan-ong babaye kinsa nabunyagan ug nakompirmahan ug kinsa takos mahimong bunyagan ug kompirmahan alang sa mga patay diha sa templo. Alang sa mga lagda mahitungod sa mga miyembro nga adunay mga kakulangan nga modawat sa ilang kaugalingon nga mga ordinansa sa templo, tan-awa sa 27.2.1.3 ug 27.3.1.2.

38.8.27.5

Pag-organisar og Espesyal nga mga Klase, mga Programa, o mga Yunit

Ang mga miyembro kinsa adunay mga kakulangan ug espesyal nga mga panginahanglan giawhag sa pagtambong sa mga miting sa Dominggo sa ilang mga ward gawas kon sila nagpuyo og pasilidad sa pag-atiman o residential nga programa sa pagtambal diin ang mga programa sa Simbahan naorganisar (tan-awa sa 37.6).

Mga yunit ug mga grupo. Ang mga ward o mga branch mahimong himoon alang sa mga miyembro kinsa adunay talagsaon nga mga panginahanglan, sama niadtong mga bungol ug naggamit og sign language (tan-awa sa 37.1). Ang pag-aprobar ihatag lamang sa Unang Kapangulohan.

Ang ward mahimong hangyoon nga mopundok og grupo alang niadtong adunay mga kakulangan, sama niadtong naggamit og sign language. Alang sa impormasyon mahitungod sa mga rekord sa pagkamiyembro niadtong motambong sa maong mga yunit o mga grupo, tan-awa sa 33.6.11.

Ang bungol nga mga miyembro kinsa wala magpuyo sulod sa makatarunganon nga gilay-on gikan sa yunit sa mga bungol mahimong motambong sa virtual nga pamaagi. Sila kinahanglang mokuha og pagtugot gikan sa mga lider niana nga yunit. Ang lokal nga mga lider sa ward moseguro nga ang bungol nga mga miyembro giatiman ug adunay oportunidad sa pag-ambit kanunay sa sakramento.

Mga Klase. Ang mga miyembro nga adunay mga kakulangan motambong og mga klase sa Dominggo uban sa mga miyembro sa ilang ward. Hinoon, kon gikinahanglan nga matubag ang mga panginahanglan sa hamtong o kabatan-onan nga adunay susama nga mga kakulangan, ang ward o stake mahimong moorganisar og espesyal nga mga klase sa Sunday School (tan-awa sa 13.3.2).

Mga programa sa kalihokan alang sa adunay kakulangan. Kon gikinahanglan aron matubag ang mga panginahanglan sa hamtong nga mga miyembro nga adunay intelektuwal nga mga kakulangan, ang usa ka ward, grupo sa mga ward, stake, o grupo sa mga stake mahimong mag-organisar og programa sa kalihokan sa adunay kakulangan. Kini nga programa nagdugang sa pagpangalagad, mga tulumanon sa Simbahan sa Dominggo, ug mga kalihokan sa lokal nga yunit.

Ang programa sa kalihokan sa adunay kakulangan sa kasagaran nagserbisyo sa mga indibidwal nga nag-edad og 18 ug pataas. Ang matag paningkamot kinahanglan nga himoon aron mahiusa ang mga miyembro nga ubos sa 18 anyos ngadto sa ilang mga ward ug mga stake. Sa dili kasagaran nga mga sitwasyon, ang mga lider mahimong modugang og mga kalihokan alang sa kabatan-onan sugod sa tuig sugod sa tuig nga sila mag-edad na og 12.

Kon daghang ward and moapil sa usa ka programa sa kalihokan sa adunay kakulangan, ang presidente sa stake mosangon og tinugyanan nga bishop [agent bishop] sa pagdumala niini. Kon daghang stake ang mosalmot, ang Kapangulohan sa Area mosangon og usa ka tinugyanan nga presidente sa stake [agent stake president] sa pagdumala niini.

Ang tinugyanan nga bishop o ang tinugyanan nga presidente sa stake mokonsulta sa ubang mosalmot nga mga bishop o mga presidente sa stake aron sa pagtino unsaon kini nga mga programa mapondohan.

Mga lider sa kalihokan sa adunay kakulangan. Ang hamtong nga mga miyembro mahimong tawagon isip mga lider sa kalihokan sa adunay kakulangan. Kini nga mga lider magplano ug maghimo og programa sa kalihokan sa adunay kakulangan. Sila mokonsulta sa ward ug stake nga mga espeyalista alang sa adunay kakulangan (tan-awa sa 38.8.27.9) aron sa pagdapit sa mga miyembro nga adunay mga kakulangan nga moapil. Sila magtinambagay kon unsaon sa pagtubag sa mga panginahanglan niadto nga mga miyembro.

Ang mga lider sa kalihokan sa adunay kakulangan gitawag ug gi-set apart ubos sa direksyon sa tinugyanan nga bishop o sa tinugyanan nga presidente sa stake. Ang presidente sa stake mahimo usab nga motahas sa usa ka high councilor aron sa pagserbisyo isip lider sa kalihokan sa adunay kakulangan.

Ang mga lider nga nagserbisyo niadtong sa bisan unsang edad nga adunay kakulangan mokompleto sa pagbansay diha sa ProtectingChildren.ChurchofJesusChrist.org. Alang sa dugang kinahanglanon sa kahilwasan alang sa mga lider, tan-awa sa Mga Kalihokan alang sa mga Miyembro nga may mga Kakulangan.

Kon dapiton, ang mga lider sa kalihokan sa adunay kakulangan mahimong motambong sa mga miting sa pagpangulo sa stake o sa ward.

Mga giya alang sa mga programa sa kalihokan sa adunay kakulangan. Ang mga programa sa kalihokan sa adunay kakulangan giorganisar aron matabangan ang mga partisipante nga molambo sa espirituwal, sosyal, pisikal, ug intelektuwal nga paagi (tan-awa sa Lucas 2:52). Ang mga lider motino sa kasagad sa mga kalihokan. Ikonsiderar nila ang gidaghanon sa mga partisipante, gilay-on sa mga biyahe, ug uban pang mga kahimtang.

Ang pipila ka tawo tingali dili makaapil tungod sa kakomplikado sa sitwasyon sa medikal, pisikal, intelektuwal, o sa kinaiya. Ang mga lider mangita og lain nga mga paagi sa pagpangalagad sa ilang mga panginahanglan.

Mga sumbanan sa pag-apil ug kasegurohan. Labing minos duha ka responsable nga mga hamtong kinahanglan nga anaa sa tanan nga mga kalihokan. Ang duha ka hamtong mahimong duha ka lalaki, duha ka babaye, o minyo nga magtiayon. Sa kinatibuk-an, daghan nga hamtong ang gikinahanglan aron modumala sa mga kalihokan alang sa mga miyembro nga adunay mga kakulangan kay sa gikinahanglan sa ubang mga kalihokan.

Ang mga hamtong nga motabang sa mga kalihokan mokompleto sa pagbansay diha sa ProtectingChildren.ChurchofJesusChrist.org. Kinahanglan nga nakadawat sila og pagtugot gikan sa ilang bishop sa dili pa moapil. Alang sa dugang kinahanglanon sa kahilwasan alang sa mga lider, tan-awa sa “Mga Kalihokan alang sa mga Miyembro nga may mga Kakulangan.”

Kon dunay dili maayo nga lihok nga mahitabo, ang dinalian nga responsibilidad sa mga lider mao ang pagpanalipod ug pagtabang sa tawo nga anaa sa kakuyaw. Alang sa dugang nga impormasyon mahitungod sa pagresponde sa gidudahan nga pag-abuso, tan-awa sa 38.6.2.1 ug abuse.ChurchofJesusChrist.org.

38.8.27.6

Mga Tighubad alang sa mga Miyembro Kinsa Bungol o Maglisod sa Pagdungog

Ang mga miyembro kinsa bungol o maglisod sa pagdungog mahimong mohimo og inisyatiba sa pagpakigtambayayong sa mga lider aron mahatag ang mga panginahanglan sa komunikasyon. Ang mga miyembro ug mga lider magtambayayong aron sa pagseguro nga ang mga tighubad anaa.

Ang mga tighubad kinahanglan nga ipahimutang diin ang mga miyembro makakita kanila ingon man usab sa tawo nga namulong.

Atol sa usa ka ordinansa o sa interbiyo, ang tighubad molingkod o mobarog duol sa tawo kinsa mopahigayon sa ordinansa o mohimo sa interbiyo. Alang sa dugang nga impormasyon sa paghubad og mga ordinansa ug mga panalangin, tan-awa sa 38.2.1.

Kon dunay igong mga tighubad, sila magpuli-puli sa gibana-bana nga kada 30 minuto aron malikayan ang kakapoy.

Agi og pag-andam sa sensitibo nga mga sitwasyon sama sa personal nga mga interbiyo o mga konseho sa pagkamiyembro diha sa Simbahan, ang mga lider motambag sa bungol nga mga miyembro. Kon ang miyembro magtinguha, ang mga lider mangita og tighubad nga dili sakop sa pamilya aron mapreserbar ang pagkakompidensyal.

Kining sama nga mga baroganan magamit alang sa mga miyembro kinsa bungol o maglisod sa pagdungog ug wala maggamit og sign language apan magkinahanglan og oral nga tighubad aron motabang kanila nga mobasa sa mga ngabil.

Ang mga lider mahimong moorganisar og mga klase sa ward o stake sa pagtudlo og sign language nga gigamit sa ilang dapit. Usa ka makatabang nga kapanguhaan mao ang Dictionary of Sign Language Terms for The Church of Jesus Christ of Latter-day Saints.

38.8.27.7

Pagkapribado

Ang mga lider kinahanglan nga motahod sa pagkapribado sa mga miyembro nga adunay mga kakulangan atol ug human sa mga miting sa pagpangulo diin ang mga panginahanglan gihisgotan. Ang mga lider dili mopaambit og mga pag-diagnose o sa ubang personal nga impormasyon nga walay pagtugot.

38.8.27.8

Mga Hayop nga Gibansay sa Pag-alagad sa mga Tawo nga adunay Kakulangan [Service Animals]

Ang mga bishop ug mga presidente sa stake mahimong motino kon tugotan ba ang mga tawo nga adunay mga kakulangan sa paggamit sa gibansay nga alalay nga mga iro [trained service dogs] diha sa mga meetinghouse. Ang ubang matang sa mga hayop, lakip ang emosyonal nga pangsuporta nga mga hayop (makapahupay nga mga binuhi), kasagaran wala gitugotan diha sa mga meetinghouse o sa mga kalihokan nga gipasiugdahan sa Simbahan, gawas lang kon piho nga gikinahanglan pinasikad sa balaod. (Sa kinatibuk-an sa Estados Unidos, ang Simbahan dili ubos sa legal nga obligasyon sa pagpasulod sa alalay nga mga iro o emosyonal nga pangsuporta nga mga hayop sa mga balay alampoanan.) Ang mga bishop ug mga presidente sa stake mohimo sa lokal nga mga desisyon. Sila motan-aw sa mga panginahanglan sa mga tawo nga adunay mga kakulangan ug sa mga panginahanglan sa uban diha sa kongregasyon.

Alang sa dugang nga mga lagda bahin sa paggamit sa alalay nga mga hayop diha sa mga pasilidad sa Simbahan, tan-awa sa 27.1.3 and disability.ChurchofJesusChrist.org.

38.8.27.9

Espesyalista sa Kakulangan

Ang bishopric o kapangulohan sa stake mahimong motawag og espesyalista sa kakulangan alang sa ward ug stake. Ang espesyalista motabang sa mga miyembro nga adunay mga kakulangan ug sa ilang mga tig-atiman nga moapil sa mga miting ug mga kalihokan sa Simbahan ug mobati nga nahilakip.

Ang espesyalista moserbisyo sa mga miyembro ug sa mga lider sa mosunod nga mga paagi:

• Makig-ilaila sa mga indibidwal nga adunay mga kakulangan ug sa ilang mga pamilya.

• Motubag sa mga pangutana nga maya kalabotan sa kakulangan ug problema gikan sa mga tig-atiman, mga lider, ug sa uban.

• Motabang sa mga indibidwal nga maka-access sa mga materyal, mga miting, ug mga kalihokan sa Simbahan. Kini mahimong mahitabo pinaagi sa paggamit og teknolohiya ug sa ubang mga paagi (tan-awa sa 38.8.27.10).

• Pag-ila sa makahuluganong mga oportunidad aron makaserbisyo ang mga miyembro nga adunay mga kakulangan.

• Pag-ila sa pihong panginahanglan sa pamilya ug, kon angay, pag-ila sa mga kapanguhaan sa komunidad, ward, ug stake.

Ang espesyalista makatabang sa mga miyembro nga adunay mga kakulangan ug sa ilang mga tig-atiman nga mopaambit og impormasyon mahitungod sa kakulangan ngadto sa uban.

38.8.27.10

Mga Kapanguhaan

Ang mga kapanguhaan alang sa mga miyembro nga adunay mga kakulangan, alang sa ilang mga pamilya ug mga tig-atiman, ug alang sa mga lider ug mga magtutudlo anaa sa disability.ChurchofJesusChrist.org. Kini nga website naghatag og:

• Impormasyon sa pagtabang nga madugangan ang pagsabot sa mga hagit nga giatubang niadtong kinsa adunay mga kakulangan.

• Mga kapanguhaan sa pagtabang sa mga miyembro kinsa adunay mga kakulangan ug sa ilang mga pamilya nga makakaplag og kahupayan diha sa ebanghelyo ni Jesukristo.

• Mga lista sa mga materyal sa Simbahan sa mga pormat nga magamit sa mga miyembro nga adunay mga kakulangan (tan-awa usab sa store.ChurchofJesusChrist.org).

Ang mga pangutana mahimong idirekta ngadto sa:

Mga Miyembro nga adunay mga Kakulangan

50 East North Temple Street

Salt Lake City, UT 84150-0024

Telepono: 1-801-240-2477 or 1-800-453-3860, ekstensiyon 2-2477

Email: [e-mail]

38.8.28

Pagpangalagad ngadto sa mga Miyembro nga Apektado sa Krimen ug Pagkabilanggo

Ang mga lider sa Simbahan giawhag sa pagsunod sa ehemplo sa Manluluwas sa paghalad og paglaom, pagsabot, ug gugma niadtong kinsa apektado sa krimen ug niadtong kinsa nabilanggo (tan-awa sa Mateo 25:34–36, 40).

Ang mga presidente sa stake modumala sa mga paningkamot sa pagpangalagad sa bilanggoan. Kini nga mga paningkamot naglakip sa pagsuporta sa mga hamtong ug kabatan-onan kinsa anaa sa kustodiya o bag-ohay lang nga nakagawas gikan sa prisohan o bilanggoan. Kini nga buhat naglakip usab sa pag-amuma alang sa mga pamilya ug mga bata nga adunay ginikanan o minahal sa kinabuhi nga gibilanggo.

Ang mga lider kinsa adunay usa ka prisohan o bilanggoan sulod sa ilang utlanan sa yunit kinahanglan mohimo og mga lakang aron masayod sa mga oportunidad sa pagpangalagad ug mga panginahanglan. Alang sa dugang nga mga kapanguhaan ug mga lagda, ang mga lider mahimong mokontak sa Prison Ministry Division sa Simbahan:

Email: [e-mail]

Telepono: 1-801-240-2644 o 1-800-453-3860, extension 2-2644

38.8.29

Ubang mga Tinuohan

Kadaghanan sa makadasig, halangdon, ug angayan sa labing taas nga pagtahud makita diha sa daghang lahi nga mga tinuohan. Ang mga misyonaryo ug ubang mga miyembro kinahanglan gayod nga sensitibo ug morespeto sa mga gituohan ug mga tradisyon sa uban. Sila maglikay usab nga makasilo.

Ang mga presidente sa stake ug misyon nga adunay mga pangutana mahitungod sa pakigrelasyon sa ubang mga tinuohan kinahanglang mokontak sa Kapangulohan sa Area. Ang ubang lokal nga mga lider nga adunay ingon niana nga mga pangutana kinahanglang mokontak sa presidente sa stake ug sa misyon.

38.8.30

Politikanhon ug Sibiko nga Kalihokan

Ang mga miyembro sa Simbahan giawhag nga moapil sa politikanhon ug panggobyerno nga mga kalihokan. Sa daghang nasod, kini maglakip sa:

• Pagbotar.

• Pag-apil o pagserbisyo sa politikanhon nga mga partido.

• Paghatag og pinansyal nga suporta.

• Pagpakigsulti sa mga opisyal ug mga kandidato sa partido.

• Pag-apil sa malinawon, legal nga mga protesta.

• Pagserbisyo diha sa gipili o gitudlo nga mga katungdanan sa publiko sa lokal ug nasyonal nga panggobyerno.

Ang mga miyembro giawhag usab nga moapil sa takos nga mga kawsa aron sa pagpalambo sa ilang mga komunidad nga mahimong maayong mga dapit nga kapuy-an ug kapadak-an sa mga pamilya.

Sumala sa lokal nga mga balaod, ang mga miyembro giawhag sa pagparehistro aron makabotar ug sa pagtuon sa mga isyu ug mga kandidato sa mainampingon nga paagi. Ang mga baroganan nga nahiuyon sa ebanghelyo mahimong makita sa nagkalin-lain nga politikanhon nga mga partido. Ang mga Santos sa Ulahing mga Adlaw adunay espesyal nga obligasyon sa pagpangita ug pagtoboy sa mga lider kinsa matinuoron, matarong, ug maalamon (tan-awa sa Doktrina ug mga Pakigsaad 98:10).

Ang Simbahan walay gidapigan kalabot sa politikanhon nga mga partido, politikanhon nga mga plataporma, ug mga kandidato alang sa politikanhon nga katungdanan. Ang Simbahan dili moendorso og bisan unsa nga partido sa politika o kandidato. Ni motambag kini sa mga miyembro unsaon sa pagbotar.

Sa talagsaon nga sitwasyon, kon ang moral nga mga isyu o ang mga kalihokan sa Simbahan nalambigit, ang Simbahan mahimong mohimo og baroganan sa politikanhon nga mga butang. Sa mao nga mga sitwasyon, ang Simbahan mahimong moapil sa politikanhon nga panaghisgot aron morepresentar sa mga hunahuna niini. Ang Unang Kapangulohan lamang ang mahimong motugot sa:

• Pagpahayag sa baroganan sa Simbahan sa moral nga mga isyu.

• Pagpasalig sa Simbahan sa pagsuporta o pagsupak sa piho nga pamalaod.

• Pagpaambit sa panglantaw sa Simbahan sa balaodnon nga mga butang.

Ang lokal nga mga lider sa Simbahan kinahanglan nga dili moorganisar sa mga miyembroo nga moapil sa politikanhon nga mga butang. Ni ang mga lider mosulay sa pag-impluwensya sa unsa nga paagi nga ang mga miyembro moapil.

Ang mga miyembro sa Simbahan kinsa nagtinguha nga magpapili o matudlo sa katungdanan sa publiko kinahanglang dili mopasabot nga sila giendorso sa Simbahan o sa mga lider niini. Ang mga lider ug mga miyembro kinahanglang maglikay usab og mga pamahayag o binuhatan nga mahimong masabot nga giendorso sa Simbahan sa bisan unsang politikanhon nga partido, plataporma, palisiya, o kandidato.

Bisan kon adunay barogan sa politikanhon nga butang, ang Simbahan dili mohangyo sa napili nga mga opisyal sa pagbotar sa piho nga paagi o sa paghimo og piho nga baroganan. Ang mga miyembro kinsa napili nga mga opisyal mohimo sa ilang kaugalingon nga mga desisyon. Kini nga mga opisyal mahimong dili mouyon sa usag usa o sa publikong gipahayag nga baroganan sa Simbahan. Sila dili mamulong alang sa Simbahan.

Ang politikanhon nga mga pagpili ug mga pagpasakop kinahanglan nga dili mahimong hisgotanan diha sa bisan unsa nga mga pagtulon-an o pag-awhag diha sa Simbahan. Ang mga lider moseguro nga ang mga miting ug mga kalihokan sa Simbahan nagtutok sa Manluluwas ug sa Iyang ebanghelyo.

Ang mga miyembro sa Simbahan kinahanglang dili gayod mohukom sa usag usa sa politikanhon nga mga butang. Ang matinud-anon nga mga Santos sa Ulahing mga Adlaw mahimong mahisakop sa nagkalain-laing politikanhon nga mga partido ug mobotar alang sa nagkalain-laing mga kandidato. Ang tanan kinahanglan nga mobati nga giabi-abi diha sa Simbahan.

Ang mga rekord, mga directory, ug susama nga mga materyal dili mahimong gamiton alang sa politikal nga mga katuyoan.

Ang mga pasilidad sa Simbahan dili mahimong gamiton alang sa politikal nga mga katuyoan. Apan, ang mga pasilidad mahimong gamiton alang sa pagbotar o pagparehistro sa mga botante kon wala nay laing alternatibo (tan-awa sa 35.5.6.3).

38.8.31

Pagkapribado sa mga Miyembro

Ang mga lider sa Simbahan obligado sa pagpanalipod sa pagkapribado sa mga miyembro. Ang mga rekord, mga directory, ug susama nga mga materyal sa Simbahan dili mahimong gamiton alang sa personal, komersyal, o politikanhon nga mga katuyoan (tan-awa usab sa 38.8.13).

Ang mga lider sa ward ug stake kinahanglan dili motipig o mopaambit sa kompidensyal nga impormasyon sa Simbahan sa gawas sa gihatag sa Simbahan nga mga application, mga sistema, o mga koneksyon sa internet. Ang mga ehemplo sa kompidensyal nga impormasyon sa Simbahan naglakip sa:

• Estado sa pagkamiyembro.

• Temporal nga mga panginahanglan.

• Ubang personal nga impormasyon nga dili dayag ngadto sa publiko.

Ang mga komunikasyon gikan sa mga indibidwal o sa mga buhatan sa gobyerno nga naghisgot sa mga balaod sa pagkapribado sa datos kinahanglan nga ipaabot dayon ngadto sa Church Data Privacy Office.

Email: [e-mail].

Ang mga lider sa ward ug stake kinahanglan nga dili motubag niini nga mga hangyo.

Alang sa pahibalo sa Simbahan bahin sa pagkapribado, tan-awa sa “Privacy Notice” diha sa ChurchofJesusChrist.org. Ang mga miyembro mahimo usab nga mohangyo sa mga lider sa stake o ward sa pagtabang kanila nga makabasa sa polisiya.

38.8.32

Pribadong Gimantala nga mga Sinulat

Ang mga miyembro dili gayod mohangyo sa Kinatibuk-ang mga Awtoridad, Kinatibuk-ang mga Opisyal, o sa mga Area Seventy nga mo-coauthor o moendorso sa mga libro sa Simbahan o ubang mga sinulat bahin sa Simbahan.

38.8.33

Pagrekord, Pagsulat, o Pagsibya sa mga Mensahe sa Kinatibuk-ang mga Awtoridad, Kinatibuk-ang mga Opisyal, ug mga Area Seventy

Ang mga miyembro kinahanglan nga dili morekord, mosulat, o mosibya sa mga mensahe sa Kinatibuk-ang mga Awtoridad, Kinatibuk-ang mga Opisyal, ug mga Area Seventy. Hinoon, sa pipila ka mga miting diin kini nga mga lider mamulong mahimong isibya ubos sa direksyon sa bishop o presidente sa stake. Alang sa impormasyon, tan-awa sa 29.7.

Ang mga miyembro mahimong morekord sa mga sibya sa kinatibuk-ang komperensiya gamit ang ekipo sa panimalay alang sa personal, dili pangkomersyal nga paggamit.

38.8.34

Pagtawag sa Simbahan ug sa mga Miyembro Niini

Ang ngalan sa Simbahan gihatag pinaagi sa pagpadayag ngadto ni Propeta Joseph Smith niadtong 1838: “Kay sa ingon ang akong simbahan pagatawgon sa katap[o]san nga mga adlaw, gani Ang Simbahan ni Jesukristo sa mga Santos sa Ulahing mga Adlaw” (Doktrina ug mga Pakigsaad 115:4). Ang pagtawag sa Simbahan ug sa mga miyembro niini sa mga paagi nga gihulagway sa ubos nagpakita sa koneksyon tali ni Jesukristo ug sa mga miyembro sa Iyang Simbahan.

Ang pagtawag sa Simbahan kinahanglang maglakip sa tibuok ngalan niini kutob sa mahimo. Human sa inisyal nga pagtawag sa tibuok ngalan, kon ang minubo nga pagtawag gikinahanglan, ang mosunod nga mga pulong sakto ug maoy giawhag:

• Ang Simbahan

• Ang Simbahan ni Jesukristo

• Ang gipahiulli nga Simbahan ni Jesukristo

Kon motawag sa mga miyembro sa Simbahan, ang mosunod nga mga pulong sakto ug mas maayo:

• Mga miyembro sa Ang Simbahan ni Jesukristo sa mga Santos sa Ulahing mga Adlaw

• Mga Santos sa Ulahing mga Adlaw (kini mao ang ngalan nga gihatag sa Ginoo ngadto sa Iyang mga tawo sa pakigsaad sa ulahing mga adlaw)

• Mga miyembro sa Simbahan ni Jesukristo

Ang pagtawag sa mga miyembro sa Simbahan sa ubang mga titulo, sama sa “Mormons” o “LDS,” wala giawhag.

Ang Mormon gigamit sa saktong paagi sa piho nga mga ngalan sama sa Basahon ni Mormon. Sakto usab ang paggamit isip usa ka paghulagway sa makasaysayanong mga pagpahayag sama sa “Mormon Trail.”

Ang pulong nga Mormonism dili sakto ug wala giawhag nga gamiton. Kon maghulagway sa kombinasyon sa doktrina, kultura, ug pamaagi sa pagpakabuhi nga talagsaon ngadto sa Simbahan, ang hugpong sa mga pulong nga “ang gipahiuli nga ebanghelyo ni Jesukristo” sakto ug mas maayo.

38.8.35

Mga Bakwit

Daghang tawo ang mibiya sa ilang mga panimalay nga nangita og kahupayan gikan sa kapintas, gubat, pagpanggukod tungod sa relihiyon, ug mga sitwasyon nga naghulga sa kinabuhi. Isip kabahin sa ilang responsibilidad sa pag-atiman niadtong nanginahanglan (tan-awa sa Mosiah 4:26), ang mga miyembro sa Simbahan motanyag sa ilang panahon, mga talento, ug panaghigala sa pag-abiabi sa mga bakwit isip mga miyembro sa ilang mga komunidad. Tan-awa sa Mateo 25:35; ChurchofJesusChrist.org/refugees.

38.8.36

Mga Hangyo alang Pinansyal nga Tabang gikan sa Simbahan

Ang naestablisar nga mga programa sa Simbahan naghatag og pinansyal nga tabang alang sa mga tawo nga nanginahanglan ug alang sa tukma nga mga hinungdan.

Ang tabang sa Simbahan ngadto sa mga miyembro nga nanginahanglan ipangalagad sa mga bishop (tan-awa sa 22.3.2). Ang mga bishop mosunod sa naestablisar nga mga baroganan ug mga palisiya aron pagtabang nga maseguro nga ang mga pundo sa Simbahan gigamit sa saktong paagi (tan-awa sa 22.4 ug 22.5).

Ang mga miyembro nga nanginahanglan giawhag sa pagpakigsulti sa ilang bishop imbis mokontak sa punoang buhatan sa Simbahan o mangayo og kwarta gikan sa ubang mga lider o mga miyembro sa Simbahan. Ang bishop lagmit mohangyo sa mga lider gikan sa korum sa mga elder o Relief Society sa pagtabang sa pagsusi sa mga panginahanglan.

38.8.37

Pagsiksik diha sa Simbahan

Ang katuyoan sa pagsiksik nga gihimo sa Simbahan mao ang pagtigom og kasaligan nga impormasyon sa pagsuporta sa deliberasyon sa kinatibuk-ang mga lider sa Simbahan. Ang Correlation Research Division (CRD) mao lamang ang gitugotan nga ahensya sa pagsiksik diha sa Simbahan. Ang CRD mahimong mokontak usab sa ikatulong grupo nga ahensya sa pagpahigayon sa pagsiksik.

Kon tugotan sa Simbahan ang mga tigsiksik mokontak sa mga miyembro o mga lider, sila mohatag og CRD sa impormasyon sa pagkontak sa empleyado. Kini nga empleyado ong motubag og mga pangutana mahitungod sa pagsiksik.

Ang CRD nagtinguha sa pagpanalipod sa pagkatawo ug mga tubag sa mga partisipante sa pagsiksik. Ang mga tawo mahimong mobalibad sa pag-apil bisan unsang orasa. Sila mahimong mopili nga dili motubag sa bisan unsa o sa tanang pangutana.

Ang mga ginikanan o mga tigbantay kinahanglan nga mohatag og pag-uyon sa dili pa ang mga bata nga ubos sa 18 anyos dapiton sa pag-apil sa pagtuon.

Ang lokal nga mga lider kinahanglang dili moaprobar sa bisan unsa nga pagsiksik nga may kalabotan sa Simbahan. Kini naglakip sa paggamit sa mga miyembro nga ipaubos sa pagsiksik.

Ang CRD nagsunod sa mga balaod sa pagkapribado sa datos. Ang lokal nga mga lider kinahanglan usab mosunod niini nga mga balaod ug kinahanglan nga dili mohatag sa personal nga impormasyon sa mga miyembro ngadto sa wala tugoti nga mga tigsiksik ug mga ahensya sa pagsiksik.

Ang pipila ka pagsiksik magkinahanglan nga mangolekta og impormasyon diha sa mga miting sa Simbahan. Tinuod gyod kini ilabi na kon ang miting mao ang gitutokan sa pagtuon. Sa maong mga sitwasyon, ang CRD makigtambayayong sa mga lider aron sa pagseguro nga ang presensya sa mga tigsiksik dili makabalda sa mga miting.

Sa pagsusi sa bisan unsa nga hangyo sa pagsiksik kontaka ang Correlation Research Division:

Telepono: 1-801-240-2727 or 1-800-453-3860, ekstensiyon 2-2727

Email: [e-mail]

38.8.38

Pagtahod sa Lokal nga mga Restriksiyon alang sa Pagpaambit sa Ebanghelyo

Ang Simbahan maningkamot sa pagtuman sa sugo ni Jesukristo sa pagdala sa ebanghelyo ngadto sa tibuok kalibotan (tan-awa sa Mateo 28:19). Ang mga misyonaryo moserbisyo lamang sa mga nasod diin sila opisyal nga giila ug gidawat sa lokal nga mga gobyerno.

Ang Simbahan ug ang mga miyembro niini motahod sa tanang balaod ug mga kinahanglanon kabahin sa misyonaryo nga mga paningkamot. Pananglitan, sa pipila ka bahin sa kalibotan, ang mga misyonaryo gipadala lamang ngadto aron moserbisyo sa humanitarian o sa ubang espesyal nga mga misyon. Kadto nga mga misyonaryo dili mo-proselytize. Ang Simbahan dili mopadala og mga misyonaryo ngadto sa pipila ka nasod.

38.8.39

Kasiguroan sa mga Palakaw sa Welfare ug Pagbarog pinaagi sa Kinaugalingong Paningkamot diha sa Simbahan

Daghang mga palakaw sa welfare ug pagbarog pinaagi sa kinaugalingong paningkamot sa Simbahan adunay ekipo ug makinarya nga makahimo og kadaot kon dili husto ang pagkagamit. Ang tinugyanan nga mga presidente sa stake (o kadtong ilang gisangonan) ug ang mga manedyer niini nga mga palakaw kinahanglan moseguro sa kasegurohan sa mga empleyado ug mga boluntaryo.

Ang mga trabahante kinahanglang tudloan kanunay sa luwas nga mga pamaagi. Ang kahimtang sa trabahoan kinahanglan nga susihon matag karon ug unya. Ang mga peligro sa panglawas ug kasegurohan kinahanglan nga makorihian. Ang igo nga pagbantay kinahanglang ihatag kanunay aron pagseguro nga ang mga nagtrabaho nagsunod sa mga instruksiyon, husto ang paggamit sa mga himan ug kagamitan, ug paglikay sa kinaiya nga makuyaw.

Sa kasagaran kadtong kinsa motrabaho niini nga mga palakaw kinahanglan nga 16 anyos o pataas. Kadtong kinsa mopaandar sa ekipo kinahanglang hingkod, nabansay pag-ayo, ug may kasinatian sa paggamit niini. Ang mga hamtong lamang ang mahimong mopaandar sa de-kuryente nga ekipo.

Kon adunay mahitabo nga aksidente, ang manedyer sa operasyon moreport niini ngadto sa mosunod:

• Welfare and Self-Reliance Services: 1-801-240-3001 o 1-800-453-3860, ekstensiyon 2-3001

• Risk Management Division sa punoang buhatan sa Simbahan (tan-awa sa 20.7.6.3 alang sa impormasyon sa pagkontak)

38.8.40

Mga Kasulatan

38.8.40.1

Mga Edisyon sa Balaan nga Biblia

Ang Simbahan moila sa mga edisyon sa Biblia nga maayong nahisubay sa doktrina sa Ginoo diha sa Basahon ni Mormon ug pagpadayag sa bag-ong panahon (tan-awa sa Mga Artikulo sa Hugot nga Pagtuo 1:8). Usa ka gipili nga edisyon sa Biblia mao dayon ang pilion alang sa daghang pinulongan nga gipamulong sa mga miyembro sa Simbahan.

Sa uban nga mga pinulongan, ang Simbahan nagmantala sa kaugalingon niining edisyon sa Biblia. Ang mga edisyon nga gimantala sa Simbahan gibase sa sumbanan nga mga teksto sa Biblia. Mga ehemplo naglakip sa:

• Ang King James nga Bersiyon sa Iningles.

• Ang Reina-Valera (2009) sa Spanish.

• Ang Almeida (2015) sa Portuguese.

Ang mga edisyon sa Biblia nga gimantala sa Simbahan naglakip og mga footnote, mga indeks sa hilisgotan, ug ubang mga tabang sa pagtuon.

Kon mahimo, ang mga miyembro kinahanglan mogamit og usa ka gipili o edisyonsa Biblia nga gimantala sa Simbahan diha sa mga klase sa Simbahan ug mga miting. Kini makatabang sa pagmentinar sa kaklaro diha sa panaghisgotan ug makanunayon sa pagsabot sa doktrina. Ang uban nga mga edisyon sa Biblia mahimong mapuslanon alang sa personal o akademikanhong pagtuon.

38.8.40.2

Hubad sa Kasulatan

Ang Ginoo midirekta sa Iyang mga propeta ug apostoles sa pagpreserbar sa mga kasulatan diha sa kahilwasan (tan-awa sa Doktrina ug mga Pakigsaad 42:56). Ang Konseho sa Unang Kapangulohan ug Korum sa Napulog Duha ka Apostoles higpit nga midumala sa paghubad sa mga kasulatan sa Simbahan. Ang paggamit sa aprobado nga mga proseso makatabang sa pagseguro sa katukma sa doktrina ug sa pagpreserbar sa ebidensiya sa gigikanan sa mga teksto.

Ang mga Kapangulohan sa Area mosumiter og opisyal nga mga hangyo alang sa bag-ong mga paghubad sa mga kasulatan ngadto sa Church Correlation Department.

38.8.40.3

Mga Kasulatan nga Moderno ang Pinulongan

Ang Konseho sa Unang Kapangulohan ug ang Korum sa Napulog Duha ka Apostoles wala mihatag og pagtugot sa mga paningkamot sa paghubad o pagsulat og usab sa teksto sa kasulatan ngadto sa moderno o dili pormal nga pinulongan. Kini nga tambag dili magamit ngadto sa mga pagmantala sa Simbahan alang sa mga bata.

38.8.40.4

Pag-access sa mga Kasulatan

Ang giimprinta nga mga kopya sa mga kasulatan lakip sa pipila ka gipili nga mga edisyon sa Biblia, makuha gikan sa Church Distribution Services. Ang gipili nga mga edisyon sa Biblia mahimo usab nga makuha diha sa lokal nga mga tindahan sa libro, sa internet, ug sa mobile nga mga application sa Biblia. Ang elektronik nga teksto ug audio nga mga rekording sa gimantala sa Simbahan nga mga edisyon ug sa pipila ka gipili nga mga edisyon anaa sa Gospel Library nga app ug sa scriptures.ChurchofJesusChrist.org. Kini nga mga kapanguhaan naghatag usab og mga lista sa mga kasulatan nga anaa sa matag pinulongan.

38.8.41

Pagpangita og Impormasyon gikan sa Kasaligan nga mga Tinubdan

Sa kalibotan karon, ang impormasyon sayon makuha ug mapaambit. Mahimo kining dako nga panalangin alang niadtong nagtinguha nga maedukar ug mahibalo. Hinoon, daghang mga tinubdan sa impormasyon dili kasaligan ug dili makaayo. Ang ubang mga tinubdan nagtinguha sa pagpasiugda og kasuko, panagbingkil, kahadlok,o dili tinuod nga mga teyoriya sa pagkunsabo (tan-awa sa 3 Nephi 11:30; Mosiah 2:32). Busa, importante nga ang mga miyembro sa Simbahan magmaalamon samtang sila mangita sa kamatuoran.

Ang mga miyembro sa Simbahan kinahanglang mangita ug mopaambit lamang sa katuohan, kasaligan, ug tinuod nga mga tinubdan sa impormasyon. Kinahanglang maglikay sila sa mga tinubdan nga pangagpas o gikan sa huhungihong. Ang giya sa Espiritu Santo, uban sa mabinantayong pagtuon, makatabang sa mga miyembro sa pag-ila tali sa kamatuoran ug sayop (tan-awa sa Doktrina ug mga Pakigsaad 11:12; 45:57). Sa mga butang kalabot sa doktrina ug palisiya sa Simbahan, ang mga tinubdan nga adunay awtoridad mao ang mga kasulatan, ang mga pagtulon-an sa buhi nga mga propeta, ug ang Kinatibuk-ang Tamdanan nga Basahon.

38.8.42

Mga Seminar ug Susama nga mga Panagpundok

Ang Simbahan mipasidaan sa mga miyembro batok sa mga seminar ug susama nga mga panagpundok nga naglakip sa mga pasundayag nga:

• Pagyubit, pagtamay, o dili maayo sa ilang pagtagad sa sagrado nga mga butang.

• Makadaot sa Simbahan, makabalda sa misyon niini, o mabutang sa peligro ang mga miyembro ug mga lider niini.

Ang mga miyembro kinahanglang dili motugot nga gamiton ang ilang katungdanan o kahimtang diha sa Simbahan sa pagpasiugda o sa pagpasabot nga nag-endorso sa maong mga panagpundok.

Alang sa dugang nga impormasyon, tan-awa sa 35.5, 38.6.12, ug 38.7.8. (Tan-awa usab sa Jacob 6:12

38.8.43

Suporta para sa mga Miyembro nga anaa sa mga Ospital ug mga Sentro sa Pag-atiman

Ang mga lider mohatag og suporta ngadto sa mga miyembro nga anaa sa mga ospital ug sa mga sentro sa pag-atiman nga sulod sa ilang mga yunit. Sila mosunod sa mga lagda nga giestablisar sa mga pasilidad.

Alang sa impormasyon mahitungod sa pagpangalagad sa sakramento alang sa mga miyembro nga anaa niini nga mga pasilidad, tan-awa sa 18.9.1. Alang sa impormasyon mahitungod sa paghimo og ward o branch, tan-awa sa 37.6.

38.8.44

Mga Kalihokan nga Mabuhisan

Ang mga lider sa ward ug stake moseguro nga ang lokal nga mga kalihokan sa Simbahan dili makapeligro sa kahimtang sa Simbahan sa pagka-exempted sa buhis. Alang sa mga lagda, tan-awa sa 34.8.1.

38.8.45

Mga Buhis

Ang mga miyembro sa Simbahan kinahanglan nga mosunod sa mga balaod sa buhis sa nasod diin sila magpuyo (tan-awa sa Ang mga Artikulo sa Hugot nga Pagtuo 1:12; Doktrina ug mga Pakigsaad 134:5). Ang mga miyembro kinsa dili mouyon sa mga balaod sa buhis mahimong mohagit niini sumala sa itugot sa mga balaod sa ilang mga nasod.

Ang mga miyembro sa Simbahan nagsupak sa balaod ug sa mga pagtulon-an sa Simbahan kon sila:

• Motuyo sa pagpakyas o pagdumili sa pagbayad sa gikinahanglan nga mga buhis.

• Mohimo og walay hinungdan nga legal nga mga argumento aron makalikay nga mobayad og mga buhis.

• Magdumili sa pagsunod sa kataposan nga paghukom sa usa ka kahimoan sa buhis nga magkinahanglan nila nga mobayad og mga buhis.

Kini nga mga miyembro dili takos sa rekomend sa templo. Kinahanglan nga dili tawagon ngadto sa mga katungdanan sa pagpangulo diha sa Simbahan.

Ang konseho sa pagkamiyembro diha sa Simbahan gikinahanglan kon ang usa ka miyembro nakombikto sa krimen sa tinuyo nga pagsupak sa mga balaod sa buhis (tan-awa sa 32.6.1.5).

38.8.46

Mga Palisiya sa Pagbiyahe

Ang usa ka lalaki o babaye kinahanglan nga dili mobiyahe nga sila rang duha alang sa mga kalihokan, mga miting, o mga buluhaton alang sa Simbahan gawas kon sila minyo ngadto sa usag usa o ang duha pulos dili minyo. Alang sa uban pang mga palisiya sa pagbiyahe, tan-awa sa 20.7.7.

38.9

Mga Serbisyo sa mga Relasyong Militar ug sa Chaplain [Military Relations and Chaplain Services]

Ang mga presidente sa stake ug ang mga bishop motabang nga madawat sa mga miyembro nga nagserbisyo sa militar ang mga panalangin sa pagsalmot sa Simbahan. Ang mga relasyon sa militar sa Simbahan ug mga serbisyo sa chaplain naglangkob sa:

• Suporta gikan sa mga stake ug mga ward.

• Orientation sa Simbahan alang sa mga miyembro nga mosulod sa serbisyo sa militar.

• Pag-organisar sa mga ward, mga branch, o sa mga grupo sa mga Santos sa Ulahing mga Adlaw nga sakop sa militar.

• Pag-endorso ug pagsuporta gikan sa mga chaplain nga Santos sa Ulahing mga Adlaw.

• Impormasyon kabahin kon unsaon sa pagsul-ob ang garment diha sa militar.

• Suporta gikan sa senior nga misyonaryo nga mga magtiayon nga nadestino sa pinili nga mga kampo sa militar.

38.9.1

Pagpangulo sa mga Relasyong Militar sa Stake

Kon ang mga kampo sa militar o mga miyembro nga nagserbisyo sa militar anaa sa stake, ang kapangulohan sa stake adunay mga responsibilidad nga gilatid niining seksiyon. Kon ang maong mga kampo nahimutang sa usa ka misyon imbis nga sa usa ka stake, tumanon sa presidente sa misyon kining mga responsibilidad.

Usa ka sakop sa kapangulohan sa stake modumala sa mga relasyong militar sa stake. Siya mahimong motawag og usa ka lalaki o usa ka babaye aron moserbisyo isip espesyalista sa relasyong militar. Kini nga miyembro dili kinahanglan nga adunay kasinatian sa militar. Siya moseguro nga ang mga kapanguhaan gihatag aron masuportahan ang mga miyembro nga militar diha sa stake. Naglakip kini sa oryentasyon sa pagserbisyo sa militar (tan-awa 38.9.3).

38.9.1.1

Mga Serbisyo sa Simbahan sulod sa mga Kampo sa Militar

Kon ang mga serbisyo sa Simbahan gipahigayon diha sa kampo sa militar, ang presidente sa stake diin nahimutang ang kampo moorganisar og usa sa mosunod alang sa mga kawani sa militar ug sa ilang mga pamilya (tan-awa sa 38.9.4):

• Usa ka ward nga adunay sa usa ka bishopric (kon gitugotan sa Unang Kapangulohan)

• Usa ka branch nga adunay sa usa ka kapangulohan sa branch

• Usa ka grupo sa miyembro nga sundalo nga adunay lider ug mga kaabag sa grupo sa miyembro nga sundalo

Ang presidente sa stake motawag, mo-set-apart, ug modumala sa mga lider niini nga mga yunit. Siya mohatag niining mga lider og impormasyon sa pagkontak ngadto sa Military Relations and Chaplain Services Division sa Simbahan. Mahimo niyang isangon sa usa ka ward ang pagsuporta sa matag grupo sa mga miyembro nga sundalo.

Ang presidente sa stake motrabaho uban sa Military Relations and Chaplain Services Division sa paghatag og sulat sa pagkapili ngadto sa matag bishop, presidente sa branch, o lider sa grupo. Kini nga sulat naglatid sa iyang mga responsibilidad ug nagtugot kaniya sa pagdumala sa yunit ug sa pagpahigayon og mga miting. Ang kopya sa sulat kinahanglang ihatag ngadto sa chaplain sa kampo.

Ang militar sa Estados Unidos nagkinahanglan nga ang usa ka chaplain mohatag og administratiba nga pagdumala ngadto sa bisan unsa nga relihiyuso nga serbisyo nga gipahigayon diha sa usa ka kampo sa militar. Kon adunay chaplain nga Santos sa Ulahing mga Adlaw diha sa kampo, siya sa kasagaran mohatag sa maong pagdumala ngadto sa usa ka yunit sa Simbahan nga nagtigom diha. Ang chaplain dili modumala atol sa pagsimba nga mga serbisyo gawas kon siya ang bishop, presidente sa branch, o lider sa grupo. Hinoon, siya gilaoman sa pagtambong ug pag-apil.

Usa ka sakop sa kapangulohan sa stake makigsabot uban sa senior nga chaplain sa matag kampo sa militar diha sa stake. Segurohon niya nga ang mga bishop sa mga ward kansang mga utlanan molangkob sa usa ka kampo sa militar mobuhat sa samang butang. Kining mga lider mopahibalo sa chaplain sa iskedyul sa miting sa ward, lokasyon sa miting, ug sa makontak nga tawo. Ang chaplain makahatag niini nga impormasyon ngadto sa mga miyembro didto sa kampo.

38.9.1.2

Mga Chaplain nga Santos sa Ulahing mga Adlaw diha sa Mga Stake

Ang presidente sa stake mopahigayon og tinuig nga interbiyo sa matag chaplain nga Santos sa Ulahing mga Adlaw nga nagpuyo sulod sa stake. Siya motino sa kahimtang ug katakos sa chaplain sa pagserbisyo. Ang presidente sa stake mohimo usab og lahi nga pag-interbiyo sa kapikas sa matag chaplain kada tuig.

Ang mga chaplain ug ang ilang mga kapikas kinahanglan adunay mga calling sa ward o stake. Ang chaplain nga naghupot sa Melchizedek nga Pagkapari mahimong moserbisyo sa mga calling sa pagpangulo, sama diha sa high council o modumala sa militar nga ward, branch, o sa grupo sa miyembro nga sundalo. Hinoon, kini nga calling dili mahimong magkasungi sa iyang mga katungdanan sa militar.

Ang chaplain mahimong moabag sa presidente sa stake sa mosunod nga mga paagi:

• Moreport sa mga miting sa konseho sa stake kabahin sa mga yunit sa Simbahan nga nagtagbo diha sa mga kampo sa militar. Kini nga mga report kinahanglan maglakip og impormasyon mahitungod sa bag-o ug mibalik nga mga miyembro.

• Moserbisyo isip ang liaison tali sa mga lider sa militar ug sa presidente sa stake.

• Motabang sa presidente sa stake sa pag-ila og mga miyembro diha sa militar nga tawagon isip mga lider sa grupo sa miyembro nga sundalo.

• Moabag sa mga paningkamot sa pagpalig-on sa bag-o ug sa mibalik nga mga miyembro sa Simbahan diha sa militar.

• Motabang sa pag-andam sa mga miyembro diha sa militar aron modawat og sagradong mga ordinansa ug motuman sa ilang mga pakigsaad.

38.9.2

Pagpangulo sa mga Relasyong Militar sa Ward

Usa ka sakop sa bishopric makigkita sa mga miyembro sa ward sa dili pa sila molakaw alang sa pagserbisyo sa militar. Siya moseguro nga sila adunay usa ka oportunidad sa pagtambong sa orientation sa Simbahan sa dili pa mosulod sa serbisyo sa militar (tan-awa sa 38.9.3).

Alang sa impormasyon mahitungod sa mga rekord sa pagkamiyembro alang sa usa ka miyembro nga mosulod sa militar, tan-awa sa 33.6.9. Pipila sa mga miyembro gidistino ngadto sa hilit o layo nga lokasyon o gipadala ngadto sa panggubatan. Niini nga mga sitwasyon, ang bishop mokontak sa Military Relations and Chaplain Services Division sa Simbahan alang sa giya mahitungod sa mga rekord sa pagkamiyembro (tan-awa sa 38.9.10).

Ang mga lider sa kaugalingong ward kinahanglang kanunay nga makig-istorya sa matag miyembro sa ward nga nalayo tungod kay miserbisyo sa militar.

Ang bishop makigsabot uban sa senior nga chaplain sa matag kampo sa militar diha sa ward.

38.9.3

Oryentasyon sa Pagerbisyo sa Militar

Ang oryentasyon sa pagserbisyo sa militar makatabang sa mga miyembro nga mosulod ug moserbisyo sa militar nga masayod kon unsa ang laoman kalabot sa mga serbisyo ug mga kalihokan sa Simbahan diha sa militar. Nagtudlo usab kini nila kon unsaon sa pagpalig-on sa ilang pagtuo ug sa pagtuman sa ilang mga pakigsaad panahon sa pagserbisyo sa militar.

Usa ka sakop sa kapangulohan sa stake o bishopric motawag og tigtudlo sa pagserbisyo sa militar aron mohatag og orientation. Mas nindot nga kini nga magtutudlo adunay bag-ohay lang nga kasinatian sa militar. Kon walay kwalipikado nga magtutudlo, ang presidente sa stake o ang bishop mokontak sa Military Relations and Chaplain Services Division alang sa giya.

Alang sa dugang nga impormasyon, tan-awa ang seksiyon sa “Oryentasyon sa Pagserbisyo sa Militar” sa pahina sa Mga Miyembro sa Simbahan nga Militar.

38.9.4

Mga Yunit sa Simbahan alang sa mga Miyembro nga Sundalo

Ang mga miyembro nga anaa sa militar kasagaran moapil sa mga ward nga nahimutang diha duol sa ilang mga kampo sa militar. Hinoon, sa mosunod nga mga kahimtang, ang presidente sa stake o sa misyon mahimong mo-organisar og ward, branch, o grupo sa mga miyembro nga sundalo alang sa mga kawani sa militar ug sa ilang mga pamilya diha sa kampo kon:

• Walay ward sulod sa usa ka resonable nga gilay-on sa kampo sa militar.

• Ang mga kawani sa militar wala makasabot sa pinulongan nga gigamit sa lokal nga ward.

• Ang mga kawani sa militar dili makabiya sa kampo sa militar tungod sa mga kinahanglanon alang sa pagbansay o sa ubang mga restriksiyon.

• Ang mga miyembro sa yunit sa militar nahimutang o ibutang ngadto sa usa ka lokasyon diin ang usa sa mosunod magamit:

  • Ang Simbahan wala naorganisar.

  • Ang lokal nga yunit sa Simbahan dili makapaigo sa mga miyembro tungod sa lahi nga pinulongan.

  • Ang pagtambong sa lokal nga mga miting dili mahimo.

• Ang mga miyembro nasakop sa Reserve o National Guard nga mga yunit ug moapil sa tapos sa semana nga mga pagbansay o tinuig nga mga kalihokan sa pagbansay.

Ang mga ward ug mga branch diha sa mga kampo sa militar namugna gamit ang mga pamaagi nga gilatid diha sa kapitulo 37.

Ang mga ward ug mga branch kasagaran giestablisar sa pagsuporta sa mga miyembro nga militar ug sa ilang mga pamilya. Ang usa ka ward o branch mahimo usab nga maestablisar alang sa mga miyembro nga militar kon wala ang ilang mga pamilya. Ang maong mga yunit mahimong maestablisar alang sa mga miyembro nga nagtambong sa sukaranan o nag-unang pagbansay o anaa nadistino sa hilit nga dapit. Ang militar sa kasagaran dili motugot nga ang walay labot sa militar nga mga miyembro sa Simbahan masakop sa usa ka ward o branch nga naggamit sa mga pasilidad sa kampo.

Kon ang gidaghanon sa mga miyembro o kon ang uban nga mga sirkumstansiya dili igo aron maghimo og usa ka ward o branch sa usa ka kampo sa militar, ang presidente sa stake o misyon mahimong moestablisar og usa ka grupo sa miyembro nga sundalo. Ang grupo sa mga miyembro nga sundalo usa ka gamayng yunit sa Simbahan nga mopahigayon og mga miting sa Simbahan ug moatiman sa mga miyembro. Ang lider sa grupo walay mga yawe sa pagkapari. Tungod niini, siya dili awtorisado nga modawat og mga ikapulo ug mga halad, dili motambag sa mga miyembro mahitungod sa bug-at nga mga sala, dili mohatag og mga restriksiyon sa mga pribilehiyo sa pagkamiyembro, o mopahigayon sa ubang mga katungdanan nga nagkinahanglan og mga yawe (tan-awa sa 37.7).

Alang sa impormasyon mahitungod sa mga grupo sa mga miyembro nga anaa sa serbisyo, tan-awa sa seksiyon sa “Pagpangita og Lokasyon sa Simbahan o Lider” ug “Impormasyon alang sa mga Lider sa Grupo” sa pahina sa mga Miyembro sa Simbahan nga Militar.

Kon ang usa ka yunit sa Simbahan maestablisar sa usa ka kampo sa militar, ang lider sa yunit makigsabot sa senior nga chaplain sa kampo sa paghan-ay alang sa mga oras sa panagtigom ug sa paggamit sa mga pasilidad sa base. Kon walay chaplain sa kampo nga nadestino sa base, ang presidente sa stake mokonsulta sa tigmando nga opisyal.

38.9.5

Mga Lider sa Grupo sa Hilit nga mga Dapit o sa Panggubatan

Ang mga presidente sa stake o misyon sa kasagaran motawag ug mo-set-apart sa mga lider sa grupo sa miyembro nga sundalo. Hinoon, kini tingali dili posible sa ubang hilit nga mga dapit o sa mga panggubatan. Kay ang usa ka lider sa grupo dili man hatagan og mga yawe sa pagkapari niini nga calling, tugotan ra siyang itudlo nga dili i-set apart. Ang lider sa pagkapari nga responsable sa dapit mahimong motudlo og usa ka takos nga naghupot sa Melchizedek nga Pagkapari nga moserbisyo isip lider sa grupo. Siya momatuod og una sa katakos sa tawo uban sa iyang bishop ug presidente sa stake. Kon adunay chaplain nga Santos sa Ulahing mga Adlaw nga anaa sa dapit, ang lider sa pagkapari makatugot kaniya sa pagtawag ug pag-set-apart sa usa ka lider sa grupo.

Ang mga lider sa mga grupo sa mga miyembro nga sundalo sa hilit nga mga dapit mahimong makakuha og mga kagamitan ug mga materyales sa Simbahan pinaagi sa pagkontak sa Debisyon sa mga Serbisyo sa mga Relasyong Militar ug sa Chaplain [Military Relations and Chaplain Services Division] sa Simbahan (tan-awa sa 38.9.10).

Usahay ang usa ka nadistino nga miyembro nga sundalo nahibulag gikan sa uban nga mga miyembro sa Simbahan. Kon ang miyembro nga sundalo naghupot og Melchizedek nga Pagkapari o usa ka priest diha sa Aaronic nga Pagkapari, ang iyang bishop mahimong mohatag og pagtugot kaniya sa pagpangalagad ug pag-ambit sa sakramento. Kon adunay sobra sa usa ka miyembro sa gipadalhan nga dapit, usa ka lider sa grupo kinahanglang tawagon.

Ang Military Relations ug ang Chaplain Services Division sa Simbahan kinahanglan mapahibalo kon ang usa ka lider sa grupo gitawag. Usa ka sulat sa tawag sa katungdanan ipadala ngadto kaniya (tan-awa sa 38.9.1.1).

38.9.6

Misyonaryo nga Pagserbisyo ug Obligasyon sa Militar

Alang sa mga nasod nga adunay mandato sa pagserbisyo sa militar, ang mga miyembro sa Simbahan kinahanglan gayod sa kinatibuk-an mokompleto sa ilang serbisyo sa militar sa dili pa sila makaserbisyo og usa ka misyon. Ang uban nga mga nasod mahimong motugot nga ipaulahi ang pagserbisyo sa militar hangtod ighuman sa misyonaryo nga serbisyo. Ang mga presidente sa stake ug ang mga bishop kinahanglan nga mahimong sinati sa mga gikinahanglan sa ilang nasod aron sila makatambag sa mga miyembro sa tukma nga paagi. Kadtong mga miyembro nga nagserbisyo diha sa Reserves o National Guard mahimong moserbisyo og mga misyon human sila makakompleto sa sukaranan ug advanced nga pagbansay.

Alang sa dugang nga impormasyon, tan-awa ang seksiyon sa “Misyonaryo nga Pagserbisyo ug Mga Obligasyon sa Militar” sa pahina sa Mga Miyembro sa Simbahan nga Militar.

38.9.7

Mga Chaplain nga Santos sa Ulahing mga Adlaw

Ang Debisyon sa mga Serbisyo sa mga Relasyong Militar ug sa Chaplain sa Simbahan mohatag og nakasentro nga pagtugot alang sa mga lalaki ug mga babaye nga mga chaplain kinsa moserbisyo sa lain-laing sitwasyon diha sa gobyerno ug sa dili gobyerno. Kini nga mga kahimtang naglakip sa:

• Militar.

• Mga Ospital.

• Balay-pahulayanan [Hospice] nga mga organisasyon.

• Mga Prisohan.

• Mga Sentro sa Detensiyon.

• Pulis o departamento sa bombero.

• Bantay sa utlanan [border patrol].

• Sibiko ug mga organisasyon sa beterano.

• Mga kolehiyo ug mga unibersidad.

Ang matag organisasyon mag-establisar sa kaugalingon niining pang-edukasyon ug pangalagad nga mga kinahanglanon alang sa mga chaplain. Kadaghanan sa mga organisasyon nagkinahanglan og pag-endorso sa Simbahan sa dili pa ang usa ka tawo makaserbisyo isip usa ka chaplain nga Santos sa Ulahing mga Adlaw. Ang Military Relations ug ang Chaplain Services Division sa Simbahan mohatag og pag-endorso alang sa usa ka chaplain nga Santos sa Ulahing mga Adlaw. Ang mga sulat sa pag-endorso gikan sa mga bishop ug sa mga presidente sa stake dili igo ug kinahanglang dili ihatag.

Ang mga chaplain nga Santos sa Ulahing mga Adlaw:

• Moserbisyo sa mga tawo sa tanan nga tinuohan, lakip sa mga Santos sa Ulahing mga Adlaw.

• Moseguro nga ang mga indibidwal gitanyagan sa relihiyoso nga kagawasan.

• Motabang sa pagpahimutang o pagdawat sa relihiyoso nga mga gikinahanglan niadtong ilang giserbisyohan.

Alang sa dugang nga impormasyon, tan-awa sa “Latter-day Saint Chaplains” sa ChurchofJesusChrist.org.

38.9.8

Pagsul-ob sa Garment diha sa Militar

Tan-awa sa 38.5.7.

38.9.9

Senior nga mga Magtiayong Misyonaryo

Ang miretiro nga mga magtiayon sa militar mahimong matawag sa pagserbisyo isip mga misyonaryo sa relasyong militar diha sa gipili nga mga base sa militar. Sila motabang sa lokal nga mga lider sa pagkapari sa pagpalig-on sa bag-o ug mibalik nga mga miyembro. Sila usab mohatag og suporta ngadto sa mga pamilya sa mga miyembro nga sundalo nga gipadala atol sa mga panahon sa panagbulag sa pamilya.

38.9.10

Ubang Impormasyon

Alang sa impormasyon mahitungod sa mga rekord sa pagkamiyembro sa mga miyembro nga sundalo, tan-awa sa 33.6.9.

Alang sa impormasyon mahitungod sa patriyarkal nga mga panalangin alang sa mga miyembro nga sundalo, tan-awa sa 38.2.10.3.

Alang sa impormasyon mahitungod sa pag-orden sa mga miyembro nga sundalo diha sa hilit nga mga dapit, tan-awa sa 38.2.9.6.

Alang sa impormasyon mahitungod sa paghatag og mga rekomend sa templo sa layo nga mga dapit, tan-awa sa 26.3.2.

Kon ang mga lider sa Simbahan adunay mga pangutana mahitungod sa mga relasyong militar, mahimo silang mokontak sa:

Debisyon sa mga Serbisyo sa mga Relasyong Militar ug sa Chaplain [Military Relations and Chaplain Services Division]

50 East North Temple Street, Room 2411

Salt Lake City, UT 84150-0024

Telepono: 1-801-240-2286

Email: [e-mail]