“15. Mga Seminary ug mga Institute of Religion,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2024).
“15. Mga Seminary ug mga Institute of Religion,” Kinatibuk-ang Tamdanan nga Basahon.
Imahe
batan-ong babaye nga nagpataas sa iyang kamot diha sa klase
15.
Mga Seminary ug mga Institute of Religion
15.0
Pasiuna
Ang mga Seminary ug mga Institute of Religion (S&I) moabag sa mga ginikanan ug sa mga lider sa Simbahan sa pagtabang sa kabatan-onan ug mga young adult nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo. Kini mahimo pinaagi sa pagsuporta sa nakasentro sa panimalay nga pagtuon sa mga kasulatan ug sa mga pulong sa buhi nga mga propeta ug sa ubang mga lider sa Simbahan.
Ang mga programa sa seminary ug institute gidumala sa mga palisiya nga giestablisar sa Church Board of Education sa Simbahan. Kini nga board gidumala sa Presidente sa Simbahan. Ang kapangulohan sa stake mopatuman niini nga mga programa diha sa stake ug mga ward. Ang mga lider sa stake ug ward regular nga morebyo sa pag-apil sa ilang kabatan-onan sa mga programa sa seminary ug institute.
Usa ka S&I nga representante gisangonan sa pagtudlo sa matag stake aron sa pagtabang sa mga lider nga mangalagad sa mga programa sa S&I.
15.1
Seminary
Ang seminary usa ka programa nga molungtad og upat ka tuig diin ang kabatan-onan magtuon sa ebanghelyo ni Jesukristo sumala sa makita diha sa mga kasulatan ug sa mga pagtulon-an sa mga propeta sa ulahing mga adlaw. Ang mga estudyante sa seminary sa kasagaran 14–18 anyos ang edad.
Ang mga klase ipahigayon atol sa mga adlaw sa tingklase. Ang gidaghanon sa mga adlaw sa klase sa seminary matag semana mahimong ipahiangay sa lokal nga mga kahimtang. (Tan-awa sa Mga Opsiyon sa Klase sa Seminary alang sa dugang nga impormasyon.) Ang mga klase o mga online assignment kinahanglang molungtad og upat ka oras matag semana sa pagkompleto.
Ang bishopric, mga lider sa kabatan-onan, ug mga kapangulohan sa korum ug sa klase moawhag sa matag batan-on sa pag-apil sa hingpit sa seminary. Ang bishopric moawhag sa mga ginikanan sa pagparehistro sa ilang mga anak matag tuig sa dili pa magsugod ang mga klase sa seminary. Alang sa dugang nga impormasyon, tan-awa sa Seminary Registration sa ChurchofJesusChrist.org.
Ang lokal nga board sa edukasyon mahimo nga iestablisar kon ang pipila ka stake nga adunay mga klase sa seminary (lakip ang home-study nga mga klase) anaa sa duol nga dapit ug adunay komon nga mga problema ug mga hagit. Tan-awa sa seminary.ChurchofJesusChrist.org.
15.1.1
Mga Magtutudlo
Ang mga magtutudlo sa Seminary kinahanglang mga miyembro sa Simbahan kinsa adunay hugot nga pagtuo ni Ginoong Jesukristo ug pagpamatuod sa Iyang gipahiuli nga ebanghelyo. Sila kinahanglan nga nagsunod sa mga baroganan nga ilang itudlo ug maayo nga motrabaho uban sa kabatan-onan. Kon mahimo, ang mga magtutudlo kinahanglang adunay balido nga rekomend sa templo.
Usa ka sakop sa kapangulohan sa stake makigtambagay sa bishop, sa supervisor sa stake, ug sa representante sa S&I mahitungod sa potensyal nga mga magtutudlo sa seminary. Ang usa ka sakop sa kapangulohan sa stake o usa ka gisangonan nga high councilor motawag, mo-set apart, ug mo-release sa mga magtutudlo sa seminary sa stake ug sa mga supervisor sa stake. Human ang tawo natawag ug na-set apart, ang representante sa S&I mobansay ug mosuporta kaniya.
Sa pagpanalipod sa mga magtutudlo ug sa mga estudyante, duha ka hamtong kinahanglan nga anaa sa gambalay o panimalay diin gitudlo ang klase sa seminary. Mahimong magtawag og dugang nga magtutudlo, o ang laing responsable nga hamtong mahimong sangonan nga motambong. Ang ikaduha nga hamtong mahimong ang kapikas sa magtutudlo o ang ginikanan sa usa ka sakop sa klase. Siya kinahanglan nga sama og sekso [gender] sa magtutudlo, gawas kon kana nga tawo usa ka hamtong nga sakop sa pamilya sa magtutudlo. Ang usa ka magtutudlo kinahanglang dili mag-inusara kauban sa usa ka estudyante gawas kon ang estudyante anak sa magtutudlo. Magamit usab kini sa bisan unsa nga kahimtang, sama sa usa ka lawak nga klasehanan, gambalay, birtuwal nga panagtigom, o diha sa sakyanan.
15.1.2
Mga Gambalay, Ekipo, ug mga Materyal
Ang mga lider sa stake ug ward moseguro nga ang mga dapit sama sa mga meetinghouse [balay tigomanan] o mga panimalay sa mga miyembro magamit alang sa mga klase sa seminary. Ang mga gambalay o mga kwarto kinahanglang dili abangan alang sa mga klase sa seminary. Kon ang mga klase ipahigayon diha sa mga meetinghouse, ang mga magtutudlo kinahanglang adunay access sa ekipo diha sa sentro sa kapanguhaan.
Ang representante sa S&I mohatag og mga materyal alang sa mga magtutudlo ug sa mga estudyante alang sa matag klase. Ang mga estudyante kinahanglang magdala sa ilang kaugalingong mga kasulatan, na-imprinta o digital.
15.1.3
Mga Opisyal ug mga Kalihokan sa Klase
Ang usa ka magtutudlo sa seminary mahimong mopili og mga opisyal sa klase, sama sa usa ka presidente, bise presidente, ug usa ka secretary. Ang magtutudlo mokontak una sa mga ginikanan ug sa bishop sa estudyante alang sa pagtugot. Ang mga opisyal sa klase dili paluyohan o i-set apart. Sila makatabang sa magtutudlo sa naandan na nga mga katungdanan sa lawak-klasehanan ug moawhag sa ubang mga estudyante nga motambong ug moapil.
Ang mga magtutudlo sa seminary kinahanglang dili mohatag og mga kalihokan nga dili na oras sa normal nga klase o layo gikan sa lawak-klasehanan. Ang mga eksepsiyon magkinahanglan og pagtugot gikan sa lokal nga mga lider sa pagkapari.
15.1.4
Kredito [Credit] ug Gradwasyon
Ang mga estudyante sa seminary mas makakat-on sa epektibong paagi ug makapalig-on sa ilang pagkakabig kon sila kanunay nga motambong sa klase, moapil, ug magtuon sa mga kasulatan sa gawas sa klase. Kon buhaton nila kining mga butanga, makaangkon usab sila og kredito sa seminary matag tuig ug makagradwar gikan sa seminary.
Ang pipila ka mga estudyante tingali maglisod sa pag-angkon og kredito sa seminary tungod sa mga hagit sa pagbasa o ubang mga rason. Ang magtutudlo mahimong mopahiangay sa mga kinahanglanon ngadto sa mga panginahanglan niini nga mga estudyante. Ang representante sa S&I makahangyo og mga pagpahiangay alang sa tibuok nga programa. Kini nga mga pagpahiangay magkinahanglan og pagtugot gikan sa administrasyon sa S&I.
Aron makagradwar gikan sa seminary, ang usa ka estudyante kinahanglan nga makaangkon og upat ka tuig nga kredito ug makadawat og eklesiyastikanhong pag-endorso gikan sa usa ka sakop sa bishopric. Kini nga pag-endorso nagmatuod nga ang usa ka estudyante takos ug mapasaligon sa pagsunod sa mga sumbanan sa ebanghelyo.
Matag tuig ang stake maghimo og gradwasyon sa seminary. Kini nga kalihokan planohon sa usa ka sakop sa kapangulohan sa stake o sa usa ka high councilor. Ang representante sa S&I mahimong motabang. Alang sa dugang nga impormasyon, tan-awa sa A Guide to Seminary and Institute Graduation Exercises.
Sa pipila ka mga bahin sa Estados Unidos ug Canada, ang lokal nga mga balaod motugot sa mga estudyante sa pagbiya sa eskwelahan ug sa pagtambong sa seminary atol sa mga oras nga tingklase. Ang Church Board of Education moaprobar diin kini nga matang sa seminary gamiton. Alang sa dugang nga impormasyon, tan-awa sa Released-Time Seminary diha sa ChurchofJesusChrist.org.
Ang institute naghimo og kada adlaw nga mga klase sa pagtuon sa ebanghelyo nga makapalig-on sa hugot nga pagtuo ug pagpamatuod diha kang Jesukristo ug sa Iyang gipahiuli nga ebanghelyo. Ang mga lider sa stake moseguro nga ang institute anaa alang sa tanang young single adult nga nag-edad og 18–30.
Ang tanang young single adult kinahanglang awhagon nga moapil sa mga klase sa institute, nag-eskwela man sila o wala. Mahimo sila nga motambong sa mga klase sa institute nga gipahigayon diha sa kampus (kon aduna). Mahimo usab sila nga motambong sa online nga mga klase sa institute o mga klase nga gipahigayon diha sa stake.
Tan-awa sa Stake Institute alang sa mga lagda bahin sa mosunod:
Pag-establisar ug pagdumala og mga klase sa institute nga gipahigayon diha sa stake
Ang mga kapangulohan sa stake mahimong maghimo og mga klase sa relihiyon alang sa mga hamtong nga nag-edad og 31 anyos pataas. Kini nga mga klase dili buluhaton sa S&I ug dili tawagon nga mga klase sa institute. Hinuon, ang mga materyal sa kurikulom sa institute mahimong gamiton alang niini.
Imahe
mga babaye nga nagsulat og mga note diha sa usa ka klase
Mga Eskwelahan sa Simbahan ug Sistema sa Edukasyon sa Simbahan [Church Educational System]
Alang sa impormasyon sa primary ug sekondarya nga mga eskwelahan sa Simbahan, BYU–Pathway Worldwide, ug mga institusyon sa mas taas nga edukasyon, tan-awa sa CES.ChurchofJesusChrist.org. Ang impormasyon mahitungod sa pagkompleto sa eklesiyastikanhong mga pag-endorso alang sa mga estudyante aron makaeskwela niini nga mga eskwelahan gihatag usab didto.
Dugang pa, ang impormasyon mahitungod sa eklesiyastikanhong mga clearance sa pagpanarbaho pinaagi sa CES Ecclesiastical Clearance Office makita diha sa help.ChurchofJesusChrist.org.