“11. Tamaitai Talavou,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2020).
“11. Tamaitai Talavou,” Tusitaulima Aoao.
Ata
tamaitai talavou i fafo
11.
Tamaitai Talavou
11.1
Faamoemoega ma le Faatulagaga
O le faalapotopotoga a Tamaitai Talavou e fesoasoani i fanau a le Atua e sauniuni e toe foi atu i Lona afio’aga. A o latou taumafai malosi e tausia a latou feagaiga ma le Atua, o tamaitai talavou o le a “faaauupegaina i latou i le amiotonu ma le mana o le Atua i le mamalu tele” (1 Nifae 14:14).
11.1.1
Faamoemoega
O le faalapotopotoga o Tamaitai Talavou e fesoasoani i tamaitai talavou e osia ma tausia feagaiga paia ma faalolotoina lo latou liua ia Iesu Keriso ma Lana talalelei.
O le faamoemoega o se vasega a Tamaitai Talavou o le fesoasoani lea i tamaitai talavou e galulue faatasi e auai i le faatinoina o le galuega a le Atua mo le faaolataga ma le faaeaga. I a latou vasega, e auauna atu tamaitai talavou i isi, e faataunuuina tiutetauave o feagaiga, fausia le lotogatasi, ma aoao ma ola i aoaoga faavae.
11.1.2
Autu a Tamaitai Talavou
E mafai ona fesoasoani le autu a Tamaitai Talavou i tamaitai talavou taitoatasi ia malamalama ai i lona faasinomaga paia ma ia liua ia Iesu Keriso. E fai faatasi e tamaitai talavou ma o latou taitai le autu i le amataga o fonotaga/sauniga i Aso Sa ma i isi faatasiga a Tamaitai Talavou. O le autu e faitauina faapenei:
“O a’u o se afafine faapelepele a ni matua faalelagi, e i ai se natura paia ma se taunuuga e faavavau.
“I le avea ai ma se so’o o Iesu Keriso, ou te tauivi ina ia avea e faapei o Ia. Ou te saili atu ma faatino e tusa ma faaaliga faaletagata lava ia ma auauna atu i isi i Lona suafa paia.
“O le a ou tu e avea ma se molimau a le Atua i taimi uma ma i mea uma ma i nofoaga uma.
“A o ou taumafai malosi ia agavaa mo le faaeaga, ou te faatauaina le meaalofa o le salamo ma saili ia lelei atili i aso taitasi. I le faatuatua, o le a ou faamalosia ai lo’u aiga ma le auaiga, osia ma tausia feagaiga paia, ma maua ia sauniga ma faamanuiaga o le malumalu paia.”
E avea tamaitai talavou ma sui auai o se vasega a Tamaitai Talavou e amata ia Ianuari o le tausaga e atoa i ai lo latou ta’i 12.
O vasega a Tamaitai Talavou e faatulagaina i vaega o vaitausaga. O se vaega o vaitausaga, o tamaitai talavou uma o le a atoa vaitausaga tutusa i le aluga o le tausaga faalekalena. O se vasega e mafai ona aofia ai le silia ma le tasi le vaitausaga. E si’i atu ia tamaitai talavou i se vasega fou ia Ianuari o le tausaga e atoa i ai lo latou tausaga o tamaitai talavou i lena vasega fou.
O au epikopo ma taitai matutua o Tamaitai Talavou e faia ma le agaga tatalo faai’uga pe faapefea ona faatulaga ia vasega e tusa ai ma tausaga. Latou te iloiloina avanoa faaletaitaiga mo tamaitai talavou. O vasega taitasi tusa po o le a le toatele, e tatau ona i ai se peresitene ma, i nofoaga e mafai ai, e toatasi pe toalua ni fesoasoani ma se failautusi. I iunite e lava ia tamaitai talavou, e tatau ona lava le toatele o vasega ina ia i ai tagata o vasega e auauna atu i ai au peresitene o vasega.
Ata
vasega a tamaitai talavou
O vasega e faasino atu i ai e ala i le ta’uga tuufaatasi o “Tamaitai Talavou.” Afai e sili atu i le tasi ia vasega i se uarota, e faaaoga vaega o vaitausaga e iloga ai vasega.
11.2
Auai i le Faatinoina o le Galuega a le Atua mo le Faaolataga ma le Faaeaga
Ua valaaulia e le Atua tagata uma e o mai ia Keriso ma fesoasoani i Lana galuega e ala i le:
Ola i le talalelei a Iesu Keriso.
Tausiga o i latou e le tagolima.
Valaaulia tagata uma ia talia le talalelei.
Tuufaatasia o aiga mo le faavavau.
O au peresitene o vasega, e lagolagoina e taitai matutua, e fefautuaai faatasi e uiga i le ala e fesoasoani ai e faataunuu lenei galuega. Mo nisi faamatalaga e uiga i le galuega a le Atua mo le faaolataga ma le faaeaga, suesue le mataupu 1.
11.2.1
Ola i le Talalelei a Iesu Keriso
11.2.1.1
O Matafaioi a Matua ma Taitai
O matua ua i ai le tiutetauave e a’oa’o atu le talalelei i a latou fanau ma fesoasoani ia i latou e ola ai (tagai i le Mataupu Faavae ma Feagaiga 68.25-28). O le au epikopo, taitai o Tamaitai Talavou, ma au peresitene o vasega e lagolagoina matua i lenei tiutetauave e pei ona ta’ua i lalo:
Uunaia fesootaiga i le va o tamaitai talavou ma o latou aiga.
Ia mautinoa o gaoioiga a le autalavou e lagolago atu ma faamanuia ai aiga.
Fesoasoani i matua e saunia o latou afafine mo faaeega paia o le malumalu, auaunaga faafaifeautalai faamisiona (pe a mananao ai tamaitai talavou), faaipoipoga i le malumalu, ma le tulaga faaletina.
E tatau i taitai ona nofouta i talavou e le o maua se lagolago mai le aiga mo le ola ai i le talalelei.
O matua ma taitai e tauivi ia avea o ni faataitaiga lelei i le autalavou. Latou te fautuaina le autalavou i a latou taumafaiga ia avea atili e faapei o Iesu Keriso. O le polokalama a Tamaiti ma le Autalavou e mafai ona fesoasoani i nei taumafaiga (tagai i le ChildrenandYouth.ChurchofJesusChrist.org).
11.2.1.2
A’oa’oina o le Talalelei
O taitai o Tamaitai Talavou ma au peresitene o vasega e fautuaina tamaitai talavou ma o latou aiga e a’oa’o le talalelei i le aiga. E suesue e taitai le talalelei ma faasoa atu i tamaitai talavou mea latou te a’oa’oina. Latou te valaaulia tagata o le vasega e faasoa mai i le lotu mea o loo latou a’oa’oina i le fale.
E potopoto vasega a Tamaitai Talavou i Aso Sa e fefaamalosia’i ai le faatuatua, fausia le lotogatasi, faamalolosia auaiga ma aiga, ma faia fuafuaga e auai i le faatinoina o le galuega a le Atua mo le faaolataga ma le faaeaga. O au peresitene o vasega, e lagolagoina e taitai matutua, e fuafuaina fonotaga/sauniga o Aso Sa.
O fonotaga a vasega e faia i Aso Sa lona lua ma le lona fa o le masina. E 50 minute le umi. E amata fonotaga i se tatalo. O se tasi o le au peresitene o le vasega e taitai. Na te taitaia le vasega i le taulotoina o le autu ma fefautuaai faatasi e uiga i tofiga ma isi mataupu.
Ona taitai lea e se tagata o le vasega po o se taitai matua le a’oa’oga o le talalelei. O au peresitene o vasega e fefautuaai ma taitai matutua po o ai e tatau ona faiaoga. O otootoga mo fonotaga/sauniga o loo maua i le Sau, Mulimuli Mai ia te A’u—Mo Korama o le Perisitua Arona ma Vasega a Tamaitai Talavou (tagai i le ComeFollowMe.ChurchofJesusChrist.org). E ao ona faai’u ia fonotaga i se tatalo.
Afai e silia ma le tasi le vasega a Tamaitai Talavou o se uarota, latou te potopoto eseese. Peitai, e mafai ona latou potopoto faatasi pe afai e i ai se manaoga faapitoa. E mafai e tamaitai talavou ma alii talavou ona potopoto faatasi i nisi taimi mo se lesona i le Aso Sa, pe a faatulagaina ai e le au epikopo ma le au peresitene o Tamaitai Talavou.
O tamaitai talavou e uunaia e auai i le seminare (tagai i le 15.1).
11.2.1.3
Auaunaga ma Gaoioiga
O au peresitene o vasega, e lagolagoina e taitai matutua, e fuafuaina auaunaga ma gaoioiga. E tatau ona fesoasoani nei mea e faataunuu ai le galuega a le Atua mo le faaolataga ma le faaeaga. O auaunaga ma gaoioiga e tatau ona fausia ai molimau, faamalolosia ai aiga, faafaileleina ai le lotogatasi o le vasega, ma maua ai avanoa e faamanuia ai isi. E tatau ona faapaleni i vaega e fa o le tuputupu a’e o le tagata lava ia: faaleagaga, faaleagafesootai, faaletino, ma faaleatamai.
O le tele o gaoioiga a le autalavou e faia i taimi e ese mai le Aso Sa po o afiafi o Aso Gafua. E masani ona faia faalevaiaso. I nisi o eria, o le mamao, saogalemu, po o isi itu taua e le talafeauga ai ni gaoioiga faalevaiaso. I nei eria, e mafai ona le fai sooa ia gaoioiga, ae e masani lava ona faia pe ta’imasina. O gaoioiga e mafai ona fuafua i luga o le Sample Service and Activity Planner, o loo maua i luga o le ChurchofJesusChrist.org.
O nisi o auaunaga ma gaoioiga e tatau ona faaaofia ai alii talavou ma tamaitai talavou, aemaise mo talavou matutua atu.
E mafai ona manuia le autalavou mai fegalegaleaiga ma vaega toatele atu. O autalavou i ni uarota se lua pe sili atu e mafai ona tuufaatasia i nisi o taimi mo auaunaga ma gaoioiga. E mafai e siteki po o itu ona fuafuaina i nisi o taimi ni auaunaga ma gaoioiga mo le autalavou (tagai i le 20.3.2).
O taitai matutua e fesoasoani e faamautinoaina e saogalemu ia gaoioiga (tagai i le safety.ChurchofJesusChrist.org; tagai foi 20.7 i le tusitaulima lenei). Ia le itiiti ifo i le toalua ni taitai matutua faatuatuaina e tatau ona i ai i gaoioiga uma (tagai i le 11.6.1).
Mo nisi faamatalaga, tagai i le YoungWomen.ChurchofJesusChrist.org. Tagai foi i le JustServe.org i nofoaga e maua ai. O nei punaoa o loo maua atu ai aitia po o manatu mo auaunaga ma gaoioiga.
Gaoioiga Faaletausaga. E faaopoopo i gaoioiga fai so’o a le autalavou, e mafai foi ona auai ia tamaitai talavou i mea nei i tausaga taitasi:
Se fonotaga mo le autalavou ma o latou matua e latalata i le amataga o le tausaga. E mafai ona fai eseese pe fai faatasi mo alii talavou ma tamaitai talavou. E mafai foi ona faia i le tulaga faaleuarota pe faalesiteki. E fuafuaina ma taitaia e fesoasoani o le epikopo i le korama a ositaulaga ma le au peresitene o le vasega pito matutua a Tamaitai Talavou. O tamaitai talavou e atoa le ta’i 12 i le aluga o le tausaga e mafai ona mauaina a latou faatusa o le avea ai, i le taimi o lenei fonotaga (tagai i le 11.6.3). Mo nisi faamatalaga, tagai i le ChildrenandYouth.ChurchofJesusChrist.org.
O se tolauapiga a Tamaitai Talavou (tagai i le Taiala mo Tolauapiga a Tamaitai Talavou). O tamaitai talavou e mafai ona auai i tolauapiga faaopoopo e moea, o mea taua e fai, ma gaoioiga i le aluga o le tausaga, i nofoaga e mafai ai.
O se konafesi a le autalavou a le uarota po o le siteki po o se konafesi a le Mo Le Malosi o le Autalavou (MMA). Mo faamatalaga e uiga i konafesi a MMA, tagai i le FSY.ChurchofJesusChrist.org. Mo faamatalaga e uiga i valaauga ma tiutetauave o le MMA a le uarota ma le siteki, tagai i le FSYLeader.ChurchofJesusChrist.org (mo le I.S. ma Kanata) po o le Taiala mo Fuafuaga a le MMA (mo isi eria uma).
A itiiti o le tasi le gaoioiga e faamamafaina ai ia tulaga faatonuina i le Mo Le Malosi o le Autalavou. O lea gaoioiga e mafai ona aofia uma ai alii talavou ma tamaitai talavou. E mafai foi ona valaaulia ia matua.
O Tulaga Manaomia o Tausaga. Faatasi ma le faamaoniga a o latou matua, e mafai ai e tamaitai talavou ona auai i tolauapiga moea a Tamaitai Talavou e amata ia Ianuari o le tausaga e atoa i ai lo latou ta’i 12. E mafai ona latou auai i siva, konafesi a le autalavou, ma konafesi a le MMA e amata ia Ianuari o le tausaga e atoa i ai lo latou ta’i 14.
Totogi mo Gaoioiga. O gaoioiga, e aofia ai sapalai, e totogi mai le paketi a le uarota. O femalagaaiga ma tupe faaalu e le tatau ona soona faia.
E avea o se tuusaunoaga, afai e le lava tupe o le paketi a le uarota e totogi ai gaoioiga e tele aso e fai ai, e pei o tolauapiga, e mafai e taitai ona talosagaina i latou e auai e fesoasoani e totogi na mea. Peitai, e le tatau ona taofia se tamaitai talavou mai le auai ai pe afai e le mafai ona fesoasoani o ia e totogi. Afai e manaomia pea se tupe, e mafai e le epikopo ona faatagaina se gaoioiga su’etupe se tasi i tausaga taitasi (tagai i le 20.6.5).
E faamautinoa e le au epikopo o le paketi ma gaoioiga mo alii talavou ma tamaitai talavou e lava ma fuatutusa. O le paketi mo tamaitai talavou e fua i le numera o tamaitai talavou i le uarota. O le paketi mo korama a le Perisitua Arona e fua i le numera o alii talavou i le uarota.
I a latou taumafaiga ia avea atili e faapei o le Faaola, e valaaulia le autalavou e faatutu ni sini ia tuputupu ae faaleagaga, faaleagafesootai, faaletino, ma le faaleatamai (tagai i le Luka 2:52). E sailia e le autalavou ia musumusuga ia iloa ai le mea e manaomia ona latou galulue ai. Faatasi ai ma le fesoasoani mai matua, latou te faia fuafuaga, faatino a latou fuafuaga, ma mafaufau i mea latou te aoaoina. E ofo atu foi e taitai le lagolagosua pe a manaomia. Peitai, e le tatau ona latou tulituliloaina ia sini po o le alualu i luma o tamaitai talavou. E mafai e matua ma taitai ona fautuaina atu ni sini, ae latou te tuu atu i le autalavou e sailia a latou lava musumusuga pe o a sini e tulitulimatagauina.
Ua uunaia le autalavou ina ia faamae’a ia le itiiti ifo ma le lua sini i vaega taitasi e fa i tausaga taitasi. E mafai ona latou faaaogaina Atinaega Faaletagata Lava Ia: Tusitaiala a le Autalavou po o le polokalama Gospel Living e seti ma faamaumau ai ia sini.
E tatau i tamaitai talavou ona maua avanoa masani e auauna atu ai i isi i totonu ma faatasi ai ma o latou aiga, i taimi o gaoioiga a le autalavou, ma i o latou lava taimi. O loo maua aitia mo auaunaga i le ChildrenandYouth.ChurchofJesusChrist.org. I nofoaga e maua ai, o le JustServe.org o loo fautuaina mai ai avanoa mo auaunaga i nuu.
11.2.2.1
Auaunaga
O le auaunaga o le tausiga o isi e pei ona faia e le Faaola. O tamaitai talavou e mafai ona maua o latou tofiga mo auaunaga e amata ia Ianuari o le tausaga e atoa i ai lo latou ta’i 14. Mo nisi faamatalaga, tagai i le mataupu 21.
11.2.3
Valaaulia Tagata Uma e Talia le Talalelei
E valaaulia e tamaitai talavou tagata uma ia talia le talalelei a o latou “tutu o ni molimau a le Atua i taimi uma ma i mea uma, ma i nofoaga uma” (Mosaea 18:9). O nisi o auala e mafai ona latou faia ai lenei mea o loo lisi atu i lalo:
Fai se faataitaiga lelei o ni so’o o Iesu Keriso.
Faasoa atu a latou molimau i uo ma tagata o aiga.
Auauna atu i uso o a latou vasega ua le o toaaga mai.
Valaaulia uo e o mai i le lotu po o gaoioiga a le autalavou.
Valaaulia uo e auai i le polokalama a Tamaiti ma le Autalavou. E galulue vavalalata taitai ma matua o nei autalavou ina ia fesoasoani ia latou malamalama i le polokalama ma filima’oti auala latou te mananao ai ina ia auai faatasi ma a latou fanau.
Valaaulia uo ia aoao e faifeautalai.
E mafai e matua ma taitai ona fesoasoani i tamaitai talavou e sauniuni e faasoa atu le talalelei i o latou olaga atoa. O nisi o auala e mafai ona latou faia ai lenei mea o loo lisi atu i lalo:
Uunaia tamaitai talavou ia maua se molimau patino i le fuafuaga o le fiafia a le Tama Faalelagi, o le Togiola a Iesu Keriso, ma le toefuataiga o Lana talalelei.
Saunia avanoa e auauna atu ai i le Ekalesia.
Saunia avanoa e aoao atu ai le talalelei i fonotaga a vasega ma isi faatulagaga.
Afai e mananao tamaitai talavou e auauna atu faamisiona tala’i, e fesoasoani matua ma taitai ia i latou ia saunia. E aofia ai i lenei mea le a’oa’o o i latou e uiga i faamanuiaga ma faamoemoega o le galuega faafaifeautalai faamisiona.
E avea o se vaega o lenei sauniuniga, e mafai e le au epikopo po o le au peresitene o le siteki ona faatulagaina se vasega sauniuni a faifeautalai. O punaoa autu mo lea vasega o tusitusiga paia, Tulaga Faatonuina Faafaifeautalai mo So’o o Iesu Keriso, ma le Tala’i La’u Talalelei. E le faia le vasega lenei i le taimi o sauniga masani o le Aso Sa.
O leMissionary.ChurchofJesusChrist.org o loo avatu ai ni punaoa faaopoopo e mafai ona fesoasoani i tamaitai talavou e mananao e saununi e auauna atu i se misiona. Tagai i le mataupu 23 ma le 24 mo nisi faamatalaga.
11.2.4
Tuufaatasia o Aiga mo le Faavavau
E mafai e tamaitai talavou ona fesoasoani e tuufaatasia aiga mo le faavavau i le tele o auala. O nisi o nei auala o loo lisi atu i lalo:
Ia āva i o latou matua ma faia se faataitaiga lelei o le ola e faapei o Keriso i totonu o o latou aiga.
Ia saunia e fai o latou lava aiga e faavavau.
I ai se pepa faataga aoga o le malumalu.
Saunia mo le mauaina o sauniga o le malumalu, e aofia ai le faaipoipoga e faavavau.
Auauna atu o ni faufautua o malumalu ma talafaasolopito o aiga, pe a tofia ai e le au epikopo (tagai i le 25.2.4).
11.3
Taitaiga o Tamaitai Talavou i le Uarota
11.3.1
Au Epikopo
O le tiutetauave aupito taua o le epikopo o le taunapa i tamaitai talavou ma alii talavou o lana uarota. E iloa e ia ma ona fesoasoani o latou igoa ma malamalama i o latou tulaga i le fale. Latou te feiloai ma tamaitai talavou taitasi a itiiti o le faalua i le tausaga (tagai i le 31.3.1).
Ua i ai i le epikopo le tiutetauave mo le faalapotopotoga a Tamaitai Talavou o le uarota. E fono e le aunoa o ia ma le peresitene o Tamaitai Talavou. Na te lipoti atu e uiga i mataupu a Tamaitai Talavou i fonotaga a le au epikopo.
O le epikopo ma ona fesoasoani e auai e le aunoa i fonotaga/sauniga, auaunaga, ma gaoioiga a Tamaitai Talavou. Afai e tele ni vasega o i ai a Tamaitai Talavou, e mafai e le epikopo ona tofi ia lava ma ona fesoasoani e galulue ma vasega patino.
11.3.2
Au Peresitene Matutua o Tamaitai Talavou
E valaau ma vaetofia e le epikopo se tamaitai matua e avea ma peresitene o Tamaitai Talavou. Afai e lava le telē o le iunite, e fautua atu e le [peresitene] se tamaitai matua se toatasi pe toalua ina ia valaauina e avea ma ona fesoasoani (tagai i le mataupu 30). E iloiloina e le au epikopo ē na ia fautuaina atu ma tuuina atu ia valaauga.
I se iunite laitiiti, e mafai ona valaauina na o le peresitene o Tamaitai Talavou e avea ma taitai matua i le faalapotopotoga a Tamaitai Talavou. I lenei tulaga, e galue faatasi o ia ma matua e faatulaga ia a’oa’oga ma gaoioiga mo tamaitai talavou. Na te faamautinoaina foi ia le itiiti ifo i le toalua tagata matutua faatuatuaina e i ai i fonotaga/sauniga ma gaoioiga uma. I le taimi e mafai ai, e tatau ona valaauina ni fesoasoani ma se failautusi.
Afai e leai se peresitene o Tamaitai Talavou i se paranesi, e mafai e le peresitene o le Aualofa ona faatulagaina ia a’oa’oga mo tamaitai talavou se’ia oo ina valaauina se peresitene o Tamaitai Talavou.
Ata
fafine ma se tamaitai talavou o loo talanoa
Ua i ai i le peresitene o Tamaitai Talavou tiutetauave nei. E lagolago atu ona fesoasoani ia te ia.
E auauna atu o ia i le aufono a le uarota. E avea o ia o (1) se sui auai o le aufono a le uarota e fesoasoani e talanoaina manaoga i totonu o le uarota, ma sue ni vaifofo ma (2) o se sui o Tamaitai Talavou (tagai i le 29.2.5).
E auauna o se sui o le aufono a le autalavou o le uarota (tagai i le 29.2.6).
Auauna atu i tamaitai talavou taitoatasi.
Tuuina atu fautuaga i le au epikopo mo tuafafine e auauna atu i Tamaitai Talavou.
Aoao atu isi taitai o Tamaitai Talavou ma au peresitene o vasega i o latou tiutetauave.
E fefautuaai ma tamaitai talavou e uiga i luitau e le manaomia ai le epikopo pe aofia ai sauaga (tagai i le 32.3, 31.3.1, ma le 38.6.2).
E fautuaina au peresitene o vasega i o latou tiutetauave faaletaitaiga. O vasega taitasi e vaaia ma lagolagosua i ai se sui patino o le au peresitene o Tamaitai Talavou.
Lagolagosua i tamaitai talavou o ē avea ma soa i tuafafine matutua i le auaunaga (tagai i le 21.2.2).
E faia e le aunoa fonotaga faale’au peresitene o Tamaitai Talavou ma fono ma le epikopo.
Vaavaaia faamaumauga, lipoti, paketi, ma mea tautupe a le faalapotopotoga a Tamaitai Talavou.
Afai e lava le telē o le iunite, e fautuaina atu e le peresitene o Tamaitai Talavou i le epikopo se tuafafine matua e avea ma failautusi o Tamaitai Talavou. E mafai ona ia te ia tiutetauave nei:
Fesoasoani i le au peresitene o Tamaitai Talavou e saunia lisi o mataupu mo fonotaga a le au peresitene. E auai o ia i nei fonotaga, tusia minute, ma tulitatao ia tofiga.
A’oa’o ia failautusi o vasega ma fesoasoani ia i latou e tausi faamaumauga o le auai.
I le faaaogaina o le PTF, galulue faatasi ma le failautusi o le Aualofa e tausia faamaumauga o le auai mo tuafafine matutua o loo auauna atu i Tamaitai Talavou.
Fesoasoani i le au peresitene o Tamaitai Talavou e saunia se paketi ma tusifaamaumau ia tupe faaalu.
11.3.4
Au Peresitene o le Vasega ma le Failautusi
11.3.4.1
Valaauina, Lagolagoina, ma le Vaetofiaina
E tatau ona tofu le vasega o Tamaitai Talavou ma se au peresitene o le vasega. E mafai e le au peresitene o Tamaitai Talavou ona fautuaina atu ni tamaitai talavou e avea ma peresitene o vasega. E fefautuaai faatasi ma le agaga tatalo uso o le au epikopo e fuafua ai pe o ai e valaauina.
O se tasi o le au epikopo e valaauina se tamaitai talavou e fai ma peresitene o se vasega. Pe a lava tamaitai talavou e galulue auauna atu, e mafaufau o ia ma le agaga tatalo i tagata o le vasega e fautuaina atu e avea ma fesoasoani ma se failautusi. E iloiloina e le au epikopo ē na ia fautuaina atu ma tuuina atu ia valaauga.
A o le’i fesili atu i se tamaitai talavou e auauna atu i soo se tasi o nei valaauga, e talosagaina e le uso o le au epikopo le faatagaga mai matua o le tamaitai talavou.
A uma ona tuuina atu nei valaauga, o se uso o le au epikopo e faailoa atua tamaitai talavou i a latou vasega mo le lagolagoina. O le epikopo po o se fesoasoani e tofia na te vaetofiaina ia tamaitai talavou.
O se tasi o le au epikopo e faalauina atu nei valaauga i le sauniga faamanatuga. Na te le tuuina atu i latou ina ia lagolagoina.
O peresitene o vasega e i ai i le aufono a le autalavou o le uarota (tagai i le 11.3.4.4). O au peresitene o vasega ua i ai foi tiutetauave nei:
Taitaia taumafaiga a le vasega e auai i le faatinoina o le galuega a le Atua mo le faaolataga ma le faaeaga (tagai i le mataupu 1).
Ia iloa ma auauna atu i tamaitai talavou taitasi, e aofia ai i latou e le auai mai i fonotaga/sauniga a le vasega. Ia nofouta i o latou manaoga ma tulaga o i ai.
Auai i taumafaiga a le uarota e faasoa atu le talalelei ma faamalolosia tagata fou o le Ekalesia ma e ua toe foi mai. O se sui o le au peresitene o le vasega aupito matua a Tamaitai Talavou e auai i fonotaga faamaopoopo (tagai i le 23.5.7).
Auai i taumafaiga a le uarota mo le malumalu ma talafaasolopito o aiga. O se sui o le au peresitene o le vasega aupito matua a Tamaitai Talavou e auai i fonotaga faamaopoopo (tagai i le 25.2.7).
Fuafua ma taitai i fonotaga/sauniga a le vasega i Aso Sa (tagai i le 11.2.1.2).
Fuafua ma faatino auaunaga ma gaoioiga a le vasega (tagai i le 11.2.1.3).
Faia e le aunoa ia fonotaga a le au peresitene o le vasega (tagai i le 11.3.4.3).
Pe a ua tofia failautusi o vasega, latou te saunia lisi o mataupu mo fonotaga, tusitusi minute, ma tusifaamaumau le auai.
O uso o le au peresitene o Tamaitai Talavou e aoaoina e le aunoa ia au peresitene o vasega e uiga i o latou tiutetauave (tagai i le 11.3.2). E tatau i faufautua o vasega ma tagata tomai faapitoa ona fesoasoani malosi (tagai i le 11.3.5 ma le 11.3.6).
11.3.4.3
Fonotaga a le Au Peresitene o le Vasega
E fono e le aunoa ia au peresitene o vasega a Tamaitai Talavou. O le peresitene o le vasega e taitaia nei fonotaga/sauniga. E auai foi taitai matutua o Tamaitai Talavou ua tofia e lagolagosua i le au peresitene o le vasega. I le taimi o nei fonotaga/sauniga, e fefautuaai faatasi ia taitai ma saili faaaliga e uiga i le finagalo o le Alii mo la latou vasega. O le lisi o mataupu o le fono e mafai ona aofia ai le talanoaina o mea nei:
Fesoasoani e faataunuu le galuega a le Atua mo le faaolataga ma le faaeaga
Auauna atu i uso o le vasega, faatasi ai ma le gauaiga faapitoa i le lagolagoina o uso fou ma le aapa atu i uso ua le toaaga mai
Aapa atu ia i latou o isi faatuatuaga ma talitonuga.
Fuafuaina o fonotaga a vasega, auaunaga, ma gaoioiga.
Aoaoga faaletaitaiga mai taitai matutua o Tamaitai Talavou po o se tasi o le au peresitene o le vasega.
O le faamoemoega o le aufono a le autalavou o le uarota o le fesoasoani lea i le autalavou e aumaia isi ia Iesu Keriso ma fesoasoani e faataunuu le galuega a le Atua mo le faaolataga ma le faaeaga.
O le epikopo e pulefaamalumalu i le aufono a le autalavou o le uarota. O sui auai o le aufono lenei e aofia ai:
O le au epikopo.
O se tasi o fesoasoani o le epikopo i le korama a ositaulaga, peresitene o le korama a a’oa’o ma le peresitene o le korama a tiakono.
O peresitene o vasega a Tamaitai Talavou (po o le au peresitene atoa o le vasega pe afai e na’o le tasi le vasega o Tamaitai Talavou a le uarota).
O le peresitene o Tamaitai Talavou.
E talanoaina e le aufono a le autalavou o le uarota ia auala e fesoasoani ai i isi ia fausia molimau, maua sauniga faaola, tausia feagaiga, ma avea ma soo faapaiaina o Iesu Keriso (tagai i le Moronae 6:4–5). Latou te fefautuaai faatasi e uiga i manaoga o tamaitai talavou ma alii talavou i le uarota. E mafai ona latou talanoaina ia gaoioiga e fetaui ma nei manaoga. Peitai, o fuafuaga auiliili o gaoioiga e tatau ona tupu i totonu o fonotaga a au peresitene o korama po o vasega.
Tagai i le 29.2.6 mo nisi faamatalaga e uiga i le aufono a le autalavou o le uarota.
E mafai e le au peresitene o Tamaitai Talavou ona fautua atu i le au epikopo e valaau ni faufautua mo Tamaitai Talavou. E galulue faufautua taitasi ma se vaega o vaitausaga patino o tamaitai talavou.
Ua i ai i faufautua ia tiutetauave nei:
Fesoasoani i le au peresitene o Tamaitai Talavou i o latou tiutetauave.
Lagolagosua ma taiala au peresitene o vasega a o latou aoao ma faatino o latou tiutetauave.
Faiaoga i lesona o le Aso Sa pe a manaomia. Fesoasoani i tamaitai talavou o ē ua valaaulia e faiaoga i se lesona ia saunia ma aoao atu ma le mataalia.
Auai i gaoioiga a le vasega.
Auai i fonotaga a le au peresitene o Tamaitai Talavou o le uarota pe a valaaulia ai.
Ia le itiiti ifo i le toalua ni taitai matutua tamaitai faatuatuaina e tatau ona i ai i fonotaga taitasi ma gaoioiga a le vasega. E tatau i faufautua ona faamaea le aoaoga faamasani i le ProtectingChildren.ChurchofJesusChrist.org (tagai i le 11.6.1).
I nofoaga e manaomia ai, e mafai e le au peresitene o Tamaitai Talavou ona fautuaina le au epikopo e valaau ni tagata tomai faapitoa e fesoasoani i se gaoioiga faapitoa, e pei o se tolauapiga, se konafesi a le autalavou, po o taaloga.
O tagata tomai faapitoa uma e galulue i lalo o le taitaiga a le au peresitene o Tamaitai Talavou o le uarota.
Fesoasoani i Tamaitai Talavou ia Sauniuni e Aufaatasi atu i le Aualofa
E mafai ona aufaatasi atu se tamaitai talavou i le Aualofa pe a atoa lona 18. E oo atu i le 19 tausaga, ua tatau loa i tamaitai talavou taitoatasi ona auai atoatoa i le Aualofa. I nisi o tulaga, e mafai ona vave sau se tamaitai talavou i le Aualofa nai lo lona aso fanau lona 18. E fefautuaai tamaitai talavou taitasi ma ona matua faatasi ma le epikopo e fai le faaiuga i le mea e sili ona fesoasoani ai ia te ia e faaauau ai pea ona faamalosia lona faatuatua ia Iesu Keriso.
E galulue faatasi ia matua ma taitai o Tamaitai Talavou ma le Aualofa e fesoasoani i tamaitai talavou taitoatasi ia alualu i luma ma le manuia i le Aualofa. E saunia e nei taitai ni avanoa faifai pea mo tamaitai talavou ma uso o le Aualofa e faia fesootaiga ma atiae ia sootaga.
O se tasi o le au peresitene o le siteki e valaauina se tamaitai ua matua e avea ma peresitene o Tamaitai Talavou o le Siteki. Afai e lava le telē o le siteki, e fautua atu e le peresitene se tamaitai matua se toatasi pe toalua e fai ma ona fesoasoani ma se isi e fai ma failautusi. O nei tamaitai e valaauina ma vaetofia e se tasi o le au peresitene o le siteki po o se fautua maualuga ua tofia. Mo faamatalaga e uiga i tiutetauave o le au peresitene o Tamaitai Talavou o le siteki ma le failautusi, tagai i le 6.7.1, 6.7.1.2, ma le 6.7.3.
O se fesoasoani o le au peresitene o le siteki ua i ai le tiutetauave mo le faalapotopotoga a Tamaitai Talavou i le Siteki. Ua ia te ia foi le tiutetauave mo le galuega a le au peresitene o Tamaitai Talavou o le siteki. Na te aoao atu foi i epikopo o latou tiutetauave mo tamaitai talavou.
E tofia e le au peresitene o le siteki se fautua maualuga e galulue faatasi ma le au peresitene o Tamaitai Talavou o le siteki (tagai i le 6.5).
O le au peresitene o Tamaitai Talavou a le siteki ma le failautusi e galulue i le komiti a le au taitai o le autalavou a le siteki (tagai i le 29.3.10).
Ata
tamaitai talavou i totonu o le vasega
11.6
Taiala ma Aiaiga Faavae Faaopoopo
11.6.1
Malupuipuia o le Autalavou
Pe a fegalegaleai ia tagata matutua ma le autalavou i faatulagaga faale-Ekalesia, ia le itiiti ifo ma le toalua tagata matutua faatuatuaina e tatau ona i ai. E ono tatau ona tuufaatasia vasega ina ia mafai ai lenei mea.
O tagata matutua uma e galulue ma le autalavou e tatau ona faamaeaina le aoaoga faamasani o le puipuiga o tamaiti ma le autalavou i totonu o le masina e tasi talu ona lagolagoina (ProtectingChildren.ChurchofJesusChrist.org). A mae’a, e ta’itolu lava tausaga ma latou toe faia le a’oa’oga faamasani lea.
Mo faamatalaga e uiga i auala e faatatau ai nei taiala i soa o auaunaga, tagai i le 21.2.2.
11.6.2
Tamaitai Talavou e i ai Manaoga Faapitoa
E tuu atu e au peresitene o vasega le vaavaaiga faapitoa i tamaitai talavou e i ai manaoga faapitoa. Mo faamatalaga e uiga i le fesoasoani i nei tamaitai talavou, tagai i le disability.ChurchofJesusChrist.org; tagai foi i le 38.8.26 i le tusitaulima lenei.
11.6.3
Faatusa mo Tamaiti ma le Autalavou
E maua e tamaitai talavou ia faatusa o se vaega o le polokalama mo Tamaiti ma le Autalavou. E tatau i tamaitai talavou uma ona maua se faatusa o le avea ai, mai le au peresitene o le vasega pe a avea o ia ma se tasi o Tamaitai Talavou. E maua foi e ia se kopi o le Atinaega Faaletagata Lava Ia: Tusitaiala a Talavou. E mafai ona faia lenei mea pe a faatasitasi o ia ma le au peresitene o le vasega ma taitai matutua o Tamaitai Talavou e faaulufale mai o ia i Tamaitai Talavou. E mafai foi ona faia i se sauniga faaletausaga mo le autalavou ma o latou matua (tagai i le 11.2.1.3).
Ia Ianuari o le tausaga e atoa i ai le 18 o se tamaitai talavou, na te mauaina se isi faatusa o le avea ai.
E mafai e tamaitai talavou ona galue ia maua se faatusa o se mea e ausia e ala i le tauivi e avea atili e faapei o le Faaola.