« ថ្ងៃទី ១៨–២៤ ខែកក្កដា ។ អែសរ៉ា ១; ៣–៧; នេហេមា ២; ៤–៦; ៨ ៖ ‹ ខ្ញុំកំពុងតែធ្វើការមួយយ៉ាងធំ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាចាស់ ឆ្នាំ ២០២២ ( ២០២១ )
« ថ្ងៃទី ១៨–២៤ ខែកក្កដា ។ អែសរ៉ា ១; ៣–៧; នេហេមា ២; ៤–៦; ៨ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២២
រចនារូបភាព ព្រះវិហារបរិសុទ្ធ សូរ៉ូបាបិល ដោយ សែម ឡយឡ័រ
ថ្ងៃទី ១៨–២៤ ខែ កក្កដា
អែសរ៉ា ១; ៣–៧; នេហេមា ២; ៤–៦; ៨
« ខ្ញុំកំពុងតែធ្វើការមួយយ៉ាងធំ »
នៅពេលបងប្អូនអញ្ជើញសមាជិកនៅក្នុងថ្នាក់របស់បងប្អូនឲ្យចែកចាយនូវអ្វីដែលលេចធ្លោចំពោះពួកគេនៅក្នុងគម្ពីរ អែសរ៉ា និង នេហេមា បងប្អូនក៏អាចចែកចាយនូវចំណាប់អារម្មណ៍ដែលបងប្អូនបានទទួលនៅពេលដែលបងប្អូនបានសិក្សាផងដែរ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
ពេលខ្លះការសរសេរពាក្យឬឃ្លាគន្លឹះនៅលើក្តារខៀនក៏អាចជួយរំឭកសមាជិកថ្នាក់នូវអ្វីៗដែលពួកគេបានរៀនមកពីព្រះគម្ពីរ ហើយធ្វើឲ្យវាមានភាពងាយស្រួលសម្រាប់ពួកគេដើម្បីចែកចាយផងដែរ ។ ឧទាហរណ៍ បងប្អូនអាចសរសេរថា កសាងឡើងវិញ, ជួសជុល និង ស្ថាបនាឡើងវិញ នៅលើក្តារខៀន ហើយអញ្ជើញសមាជិកថ្នាក់ឲ្យចែកចាយនូវខគម្ពីរទាំងឡាយមកពីការអានរបស់ពួកគេដែលទាក់ទងទៅនឹងពាក្យទាំងនេះមួយឬច្រើន ។
បង្រៀនគោលលទ្ធិ
ព្រះវិហារបរិសុទ្ធអាចនាំមកដល់យើងនូវសេចក្តីអំណរ ។
-
ការអានអំពីសេចក្តីអំណរដែលសាសន៍យូដាបានមាននៅពេលដែលព្រះវិហារបរិសុទ្ធរបស់ពួកគេត្រូវបានកសាងឡើងវិញ អាចជួយដល់សមាជិកថ្នាក់មានអារម្មណ៍ដឹងគុណកាន់តែខ្លាំងសម្រាប់ព្រះវិហារបរិសុទ្ធនៅក្នុងជំនាន់របស់យើង ។ ប្រហែលបងប្អូនអាចអញ្ជើញសមាជិកថ្នាក់ឲ្យរំឭក អែសរ៉ា ៣:៨–១៣ និង ៦:១៦–២២ ហើយបន្ទាប់មកពិភាក្សានូវរបៀបមួយចំនួនដែលសាសន៍យូដា បានធ្វើដើម្បីអបអរសាទរចំពោះការកសាងឡើងវិញ និងការឧទ្ទិសឆ្លងនៃព្រះវិហារបរិសុទ្ធ ។ ហេតុអ្វីក៏កសាងព្រះវិហារបរិសុទ្ធគឺជាបុព្វហេតុដើម្បីអបអរសាទរទៅវិញ ? បងប្អូនអាចសូមឲ្យសមាជិកថ្នាក់ចែកចាយនូវរបៀបដែលព្រះវិហារបរិសុទ្ធ និងកិច្ចការដែលយើងធ្វើនៅទីនោះ នាំមកនូវសេចក្តីអំណរដល់ពួកគេ ។ សេចក្ដីថ្លែងការណ៍នៅក្នុង « ធនធានបន្ថែមទាំងឡាយ » អាចលើកទឹកចិត្តសមាជិកថ្នាក់ដើម្បីមានបទពិសោធន៍សេចក្តីអំណរនៃកិច្ចការព្រះវិហារបរិសុទ្ធ ។
រូបភាពគ្រួសារដើរនៅក្នុងបរិវេណព្រះវិហារបរិសុទ្ធព្រះវិហារបរិសុទ្ធអាចជាប្រភពនៃសេចក្តីអំណរនៅក្នុងជីវិតរបស់យើង ។
អែសរ៉ា ៤–៥; នេហេមា ២; ៤; ៦
យើងអាចជួយកិច្ចការនៃព្រះបន្តទៅមុខ បើទោះបីជាមានឧបសគ្គរារាំងក៏ដោយ ។
-
គម្ពីរ អែសរ៉ា និង នេហេមា ពិពណ៌នាអំពីការសម្រេចបាននូវកិច្ចការសំខាន់ បើទោះបីជាមានឧបសគ្គរារាំងមកពីខ្មាំងសត្រូវរបស់ពួកគេយ៉ាងណាក៏ដោយ ។ ដើម្បីចាប់ផ្តើមការពិភាក្សា បងប្អូនអាចសួរសមាជិកថ្នាក់ថាតើ « ការមួយយ៉ាងធំ » របស់នេហេមា ( នេហេមា ៦:៣ ) អាចត្រូវបានប្រៀបធៀបមកជីវិតយើងនោះមានអ្វីខ្លះ ។ តើកិច្ចការសំខាន់អ្វីដែលព្រះបានប្រទានឲ្យយើងធ្វើ ? បន្ទាប់មកបងប្អូនអាចអាន អែសរ៉ា ៤:៤ ហើយពិភាក្សាពីរបៀបដែល សាតាំង ព្យាយាមធ្វើឲ្យដៃយើងទន់ និងបង្កបញ្ហាដល់យើងនៅក្នុងពេលបំពេញកិច្ចការរបស់ព្រះ ។ តើយើងរៀនសូត្រអ្វីខ្លះពី នេហេមា និងមនុស្សរបស់គាត់នៅក្នុង នេហេមា ២:១៨–២០; ៤:៦–៩; និង ៦:១–៣ ? តើវាមានអត្ថន័យយ៉ាងណាដើម្បីមាន « មានចិត្តឧស្សាហ៍ » នៅក្នុងការបម្រើនៃព្រះអង្គសង្គ្រោះ ? ( នេហេមា ៤:៦ ) ។ សូមពិចារណាក្នុងការចែកចាយនូវចំណែកសាររបស់ប្រធាន ឌៀថើរ អេស្វ អុជដូហ្វ « We Are Doing a Great Work and Cannot Come Down » ( Liahona, ខែ ឧសភា ឆ្នាំ ២០០៩, ៥៩–៦២ ), ជាពិសេស នៅត្រង់វគ្គពីរចុងក្រោយបង្អស់ ។
-
បងប្អូនអាចមានអារម្មណ៍បំផុសឲ្យដឹកនាំការពិភាក្សាមួយដោយការប្រៀបធៀបកិច្ចខិតខំប្រឹងប្រែងរបស់ សូរ៉ូបាបិល នៅក្នុងការកសាងព្រះវិហារបរិសុទ្ធឡើងវិញទៅនឹងកិច្ចខិតខំប្រឹងប្រែងរបស់យើងនៅក្នុងការចូលរួមក្នុងព្រះវិហារបរិសុទ្ធ ហើយធ្វើកិច្ចការសេចក្តីសង្គ្រោះនៅទីនោះ ។ ឧទាហរណ៍ បងប្អូនអាចសរសេរចំណងជើងពីរនៅលើក្តារខៀន ៖ សូរ៉ូបាបិល និង យើង ។ នៅខាងក្រោម សូរ៉ូបាបិល សមាជិកថ្នាក់អាចសរសេរថាតើ « ពួកខ្មាំងសត្រូវរបស់ពួកយូដា និងបេនយ៉ាមីន » ( អែសរ៉ា ៤:១ ) បានធ្វើអ្វីខ្លះដើម្បីរារាំង សូរ៉ូបាបិល និងសាសន៍យូដាពីការកសាងព្រះវិហារបរិសុទ្ធឡើងវិញ ( សូមមើល អែសរ៉ា ៤ ) ។ នៅខាងក្រោម យើង សមាជិកថ្នាក់អាចធ្វើបញ្ជីមួយអំពីរបៀបជាច្រើនដែលខ្មាំងសត្រូវព្យាយាមដើម្បីរារាំងយើងពីការចូលរួមនៅក្នុងព្រះវិហារបរិសុទ្ធ ។ បន្ទាប់មក ពួកគេអាចចែកចាយនូវដំបូន្មានជាមួយគ្នាទៅវិញទៅមក អំពីរបៀបដែលយើងអាចស្វែងរកជំនួយរបស់ព្រះនៅក្នុងការយកឈ្នះឧបសគ្គនោះ ។
យើងទទួលបានពរជ័យ នៅពេលយើងសិក្សាព្រះគម្ពីរ ។
-
ប្រហែលជាសមាជិកថ្នាក់អាចអាន នេហេមា ៨:១–១២ ជាមួយគ្នា ហើយពិភាក្សាពីរបៀបដែល អែសរ៉ា និងប្រជាជនរបស់គាត់គិតយ៉ាងណាអំពីព្រះ និងព្រះបន្ទូលរបស់ទ្រង់ ។ សូមលើកទឹកចិត្តសមាជិកថ្នាក់ឲ្យយោងទៅលើខគម្ពីរជាក់លាក់ដែលបង្ហាញពីអារម្មណ៍របស់ពួកគេ ។ សូមអញ្ញើញសមាជិកថ្នាក់ឲ្យប្រាប់អំពីអារម្មណ៍របស់ពួកគេចំពោះព្រះបន្ទូលរបស់ព្រះ ។ តើយើងអាចកែលម្អការខិតខំរបស់យើងនៅក្នុងការសិក្សាព្រះបន្ទូលនៃព្រះឲ្យបានល្អប្រសើរតាមរបៀបណា ?
ធនធានបន្ថែមទាំងឡាយ
បទពិសោធន៍អំណរនៃព្រះវិហារបរិសុទ្ធ
ប្រធាន រ័សុល អិម ណិលសុន បានបង្រៀនថា
« យើងអាចទទួលបានការបំផុសគំនិតពេញមួយថ្ងៃអំពីបទពិសោធន៍នៃព្រះវិហារបរិសុទ្ធ និងពង្សប្រវត្តិដែលអ្នកដទៃទៀតបានមាន ។ ប៉ុន្តែយើងត្រូវតែធ្វើអ្វីមួយដើម្បីទទួលបានបទពិសោធន៍នៃអំណរនោះដោយខ្លួនយើងផ្ទាល់ ។ ខ្ញុំសូមអញ្ជើញយើងម្នាក់ៗឲ្យចែកចាយបន្ដសំណូមពរនេះដល់គ្នាយើងម្នាក់ៗ ដើម្បីឲ្យអារម្មណ៍ដ៏អស្ចារ្យនៃកិច្ចការនេះអាចបន្ត និងកាន់តែរីកចម្រើនឡើង ។ ខ្ញុំសូមអញ្ជើញបងប្អូនឲ្យពិចារណាដោយការអធិស្ឋានអំពីការលះបង់ណាមួយ—ហើយសំខាន់បំផុតនោះគឺការលះបង់ពេលវេលា—ដែលបងប្អូនអាចធ្វើបាន ដើម្បីធ្វើកិច្ចការព្រះវិហារបរិសុទ្ធ និងពង្សប្រវត្តិបន្ថែមទៀតនៅក្នុងឆ្នាំនេះ ។
« យើងចូលរួមនៅក្នុងកិច្ចការរបស់ព្រះដែលមានឫទ្ធានុភាពខ្លាំងក្លាបំផុត ។ ទ្រង់មានព្រះជន្មរស់ ។ ព្រះយេស៊ូវជាព្រះគ្រីស្ទ ។ នេះគឺជាសាសនាចក្ររបស់ទ្រង់ ។ យើងគឺជាកូនចៅក្នុងសេចក្តីសញ្ញារបស់ទ្រង់ ។ ទ្រង់អាចពឹងផ្អែកលើយើង » ( រ័សុល អិម ណិលសុន និង វិនឌី ដបុលយូ ណិលសុន « Open the Heavens through Temple and Family History Work, » Ensign ខែតុលា ឆ្នាំ២០១៧ ទំព័រ ៣៩ ) ។
ការកែលម្អការបង្រៀនរបស់យើង
រួមបញ្ចូលឪពុកម្តាយរបស់យុវវ័យ ។ ប្រសិនបើបងប្អូនបង្រៀនយុវវ័យ សូមចែកចាយអ្វីដែលបងប្អូននឹងបង្រៀនជាមួយឪពុកម្តាយរបស់ពួកគេផងដែរ ។ ពួកគាត់អាចជួយបងប្អូនឲ្យដឹងអំពីសេចក្តីត្រូវការរបស់យុវវ័យ និងរបៀបដើម្បីជួយពួកគេ ។ នេះក៏អាចជារបៀបល្អមួយដើម្បីលើកទឹកចិត្តដល់ការពិភាក្សាជាលក្ខណៈគ្រួសារអំពីអ្វីដែលយុវវ័យកំពុងរៀននៅក្នុងថ្នាក់ផងដែរ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះទំព័រ ២៧ ) ។