« ថ្ងៃទី ១៤–២០ ខែ សីហា ។ រ៉ូម ៧–១៦ ៖ ‹ ឈ្នះសេចក្ដីអាក្រក់ដោយសារសេចក្ដីល្អ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ១៤–២០ ខែ សីហា ។ រ៉ូម ៧–១៦ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣
ថ្ងៃទី ១៤–២០ ខែ សីហា
រ៉ូម ៧–១៦
« ឈ្នះសេចក្ដីអាក្រក់ដោយសារសេចក្ដីល្អ »
សូមអាន រ៉ូម ៧–១៦ ហើយកត់ត្រាចំណាប់អារម្មណ៍ ដែលបងប្អូនទទួលបានអំពីរបៀបជួយសមាជិកក្នុងថ្នាក់របស់បងប្អូនឲ្យរៀនមកពីបទគម្ពីរ ។ នៅពេលបងប្អូនពិចារណាអំពីចំណាប់អារម្មណ៍របស់បងប្អូន នោះវាអាចដឹកនាំទៅរកសកម្មភាពរៀនសូត្រដ៏មានអត្ថន័យបាន ។
អញ្ជើញឲ្យចែកចាយ
សូមពិចារណាអាន រ៉ូម ១០:១៧ និង ១៥:៤ ហើយសូមឲ្យសមាជិកក្នុងថ្នាក់ចែកចាយបទគម្ពីរមកពី រ៉ូម ៧–១៦ ដែលស្ថាបនាសេចក្ដីជំនឿរបស់ពួកគេលើព្រះយេស៊ូវគ្រីស្ទ ឬផ្ដល់សេចក្ដីសង្ឃឹមដល់ពួកគេ ។
បង្រៀនគោលលទ្ធិ
យើងអាចក្លាយជា « អ្នកគ្រងមរតកនៃព្រះជាមួយនឹងព្រះគ្រីស្ទ » ។
-
ក្នុងនាមជាពួកបរិសុទ្ធថ្ងៃចុងក្រោយ យើងជឿថា ឃ្លាដូចជា « អ្នកគ្រងមរតកនៃព្រះ » និង « អ្នកគ្រងមរតកនៃព្រះជាមួយនឹងព្រះគ្រីស្ទ » មានន័យថា ដោយមានជំនួយពីព្រះយេស៊ូវគ្រីស្ទ នោះយើងអាចប្រែក្លាយដូចជាព្រះវរបិតាសួគ៌ ហើយទទួលអ្វីៗទាំងអស់ដែលទ្រង់មាន ( រ៉ូម ៨:១៧; សូមមើលផងដែរ គោលលទ្ធិ និង សេចក្ដីសញ្ញា ១៣២:២០–២១ ) ។ ដើម្បីជួយសមាជិកក្នុងថ្នាក់ឲ្យមើលឃើញពីរបៀប ដែលគោលលទ្ធិនេះត្រូវបានបង្រៀនពេញទាំងព្រះគម្ពីរ នោះបងប្អូនអាចអញ្ជើញពួកគេឲ្យធ្វើការជាដៃគូ ឬជាក្រុមតូចៗ ហើយសិក្សាបទគម្ពីរមួយចំនួនដែលមាននៅក្នុង « ធនធានបន្ថែមទាំងឡាយ » ។ រួចហើយសមាជិកក្នុងថ្នាក់អាចចែកចាយអ្វីដែលពួកគេបានរៀនសូត្រ ហើយពិភាក្សាគ្នាអំពីមូលហេតុដែលគោលលទ្ធិនេះមានសារៈសំខាន់យ៉ាងខ្លាំង ។
-
រឿងប្រៀបធៀបដែលបានតំណាលដោយប្រធាន ដាល្លិន អេក អូក នៅក្នុង « ធនធានបន្ថែមទាំងឡាយ » អាចជួយសមាជិកក្នុងថ្នាក់ឲ្យពិភាក្សាអំពីរបៀបដែលយើងអាចត្រៀមខ្លួនដើម្បីក្លាយជា « អ្នកគ្រងមរតកនៃព្រះ » ( រ៉ូម ៨:១៧ ) បាន ។ តើអ្វីទៅគឺជា « ក្រឹត្យវិន័យ និងគោលការណ៍ » មួយចំនួនដែលប្រធាន អូក បានលើកឡើង ? តើវាធ្វើឲ្យមានភាពខុសប្លែកគ្នាអ្វីខ្លះ នៅក្នុងជីវិតរបស់យើងពេលដឹងថា យើងអាចក្លាយជា « អ្នកគ្រងមរតកនៃព្រះ និងអ្នកគ្រងមរតកនៃព្រះជាមួយនឹងព្រះគ្រីស្ទ » នោះ ? ( រ៉ូម ៨:១៧ ) ។
« តើអ្នកណានឹងពង្រាត់យើងចេញពីសេចក្តីស្រឡាញ់របស់ផងព្រះគ្រីស្ទបាន ? »
-
ការពិភាក្សាអំពី រ៉ូម ៨ ជាមួយគ្នាអាចផ្ដល់ឱកាសមួយ ដើម្បីជួយសមាជិកក្នុងថ្នាក់ឲ្យទទួលអារម្មណ៍នូវសេចក្ដីស្រឡាញ់របស់ព្រះអង្គសង្គ្រោះ ។ សូមពិចារណាបង្ហាញរូបភាពព្រះយេស៊ូវគ្រីស្ទមួយ ( សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ខណៈបងប្អូនអាន រ៉ូម ៨:១៨, ២៨, ៣១–៣៩ រួមគ្នាក្នុងថ្នាក់ ។ បងប្អូនអាចអញ្ជើញសមាជិកក្នុងថ្នាក់ឲ្យចែកចាយគំនិត ឬអារម្មណ៍នានាដែលពួកគេមាន បន្ទាប់ពីអានខគម្ពីរទាំងនេះហើយ ។ សមាជិកមួយចំនួនអាចនឹងស្ម័គ្រចិត្តចែកចាយអំពីរបៀប ដែលពួកគេទទួលបានទីបន្ទាល់អំពីសេចក្ដីពិត ដែលពួកគេបានរកឃើញនៅក្នុងខគម្ពីរទាំងនេះ ។
រាល់បទបញ្ញត្តិរបស់ព្រះត្រូវបានបំពេញនៅក្នុងបទបញ្ញត្តិឲ្យមានសេចក្ដីស្រឡាញ់ ។
-
ដើម្បីជួយសមាជិកក្នុងថ្នាក់ឲ្យមើលឃើញអំពីរបៀប ដែលរាល់បទបញ្ញត្តិទាំងអស់គឺត្រូវបាន « រួមគ្នាមកក្នុង » បទបញ្ញត្តិឲ្យមានសេចក្ដីស្រឡាញ់ដល់អ្នកជិតខាងរបស់ខ្លួន ( រ៉ូម ១៣:៩ ) សូមអញ្ជើញពួកគេឲ្យធ្វើបញ្ជីមួយនៅលើក្ដារខៀនស្ដីពីរាល់បទបញ្ញត្តិដែលពួកគេអាចគិតឃើញ ។ សូមអាន រ៉ូម ១៣:៨–១០ និង ម៉ាថាយ ២២:៣៦–៤០ រួមគ្នា ហើយពិភាក្សាជាមួយសមាជិកក្នុងថ្នាក់ទាំងមូលអំពីទំនាក់ទំនងរវាងព្រះជាទីស្រឡាញ់ និងអ្នកជិតខាងរបស់យើង ព្រមទាំងការគោរពប្រតិបត្តិតាមបទបញ្ញត្តិនីមួយៗដែលមាននៅលើក្ដារខៀន ។ តើសេចក្ដីពិតនេះផ្លាស់ប្ដូររបៀបដែលយើងគិតអំពីបទបញ្ញត្តិ និងការគោរពប្រតិបត្តិដោយរបៀបណា ? ឧទាហរណ៍ តើសេចក្ដីពិតនេះផ្ដល់យោបល់អ្វីខ្លះអំពីគោលបំណងនៃបទបញ្ញតិ្តទាំងឡាយ ?
« កុំបីឲ្យយើង … និន្ទាគ្នាទៅវិញទៅមក » ។
-
ដើម្បីផ្ដល់បរិបទមួយចំនួនដល់ រ៉ូម ១៤ នោះបងប្អូនអាចចង្អុលបង្ហាញថា ពួកបរិសុទ្ធរ៉ូមមួយចំនួនបានឈ្លោះគ្នាអំពីការអនុវត្តខាងវប្បធម៌ដូចជា ទម្លាប់បរិភោគនិងការរក្សាថ្ងៃបុណ្យនានា ។ តើមានស្ថានភាពស្រដៀងគ្នាអ្វីខ្លះដែលយើងជួបប្រទះនៅសព្វថ្ងៃនេះ ? ប្រហែលជាសមាជិកក្នុងថ្នាក់អាចអានត្រួសៗក្នុង រ៉ូម ១៤ ហើយផ្ដល់ប្រយោគសង្ខេបមួយអំពីពាក្យទូន្មានរបស់ប៉ុល ។ តើយើងអាចចែកចាយដំបូន្មានអ្វីខ្លះ អំពីរបៀបចៀសវាងការវិនិច្ឆ័យគ្នាជាមួយនឹងគ្នាទៅវិញទៅមក ? ប្រហែលសមាជិកក្នុងថ្នាក់អាចរកឃើញគំនិតខ្លះៗនៅក្នុងសារលិខិតរបស់ប្រធាន ឌៀថើរ អេហ្វ អុជដូហ្វ « The Merciful Obtain Mercy » Liahona ខែ ឧសភា ឆ្នាំ ២០១២ ទំព័រ ៧០–៧៧ ។
ធនធានបន្ថែមទាំងឡាយ
ការទទួលបាន « គ្រប់អ្វីទាំងអស់ដែលព្រះវរបិតា [ ទ្រង់ ] មាន » ( គោលលទ្ធិ និង សេចក្ដីសញ្ញា ៨៤:៣៨ ) ។
-
« Becoming Like God » ( Gospel Topics នៅលើគេហទំព័រ topics.ChurchofJesusChrist.org )
ប្រធាន ដាល្លិន អេក អូក តំណាលអំពីពាក្យប្រៀបប្រដូចមួយដូចតទៅនេះ ៖
« មានឪពុកស្ដុកស្ដមម្នាក់បានដឹងថា បើគាត់នឹងប្រគល់ទ្រព្យសម្បត្តិទាំងអស់របស់គាត់ឲ្យកូនម្នាក់ ដែលពុំទាន់បានអភិវឌ្ឍដើម្បីមានប្រាជ្ញា និងភាពខ្ពង់ខ្ពស់នៅឡើយ នោះកេរ្ដិ៍មរតកនោះនឹងប្រហែលជាត្រូវបំផ្លាញអស់ហើយ ។ ដូច្នេះ ឪពុកបាននិយាយទៅកូនគាត់ថា
« ‹ អ្វីៗទាំងអស់ដែលឪពុកមាន ឪពុកមានបំណងប្រគល់ដល់កូន––ប៉ុន្តែពុំគ្រាន់តែទ្រព្យសម្បត្តិរបស់ឪពុកប៉ុណ្ណោះទេ ប៉ុន្តែទាំងតំណែង និងគោលជំហររបស់ឪពុកនៅក្នុងចំណោមមនុស្សទំាងអស់ផងដែរ ។ អ្វីដែលឪពុក មាន ឪពុកអាចប្រគល់ដល់កូនបានដោយងាយ ប៉ុន្តែដើម្បីប្រែក្លាយ ដូចជាឪពុក នោះកូនត្រូវតែពឹងលើសមត្ថភាពរបស់កូនផ្ទាល់ ។ កូននឹងស័ក្ដិសមទទួលកេរ្ដិ៍មរតករបស់កូន ដោយការរៀននូវអ្វីដែលឪពុកបានរៀន ហើយដោយការរស់នៅដូចជាឪពុកបានរស់នៅ ។ ឪពុកនឹងប្រគល់ឲ្យកូននូវច្បាប់ និងគោលការណ៍ទាំងឡាយដែលឪពុកបានទទួលប្រាជ្ញា និងភាពខ្ពង់ខ្ពស់របស់ឪពុក ។ សូមធ្វើតាមគំរូរបស់ឪពុក រៀនដូចដែលឪពុកបានរៀន ហើយកូននឹងក្លាយដូចជាឪពុក ហើយអ្វីគ្រប់យ៉ាងដែលឪពុកមាននឹងជារបស់កូន › » ( « The Challenge to Become » Ensign ខែ វិច្ឆិកា ឆ្នាំ២០០០ ទំព័រ ៣២ ) ។
ការកែលម្អការបង្រៀនរបស់យើង
ស្វែងរកធនធានទាំងឡាយដែលគាំទ្រដល់គោលការណ៍នានា ។ បន្ថែមពីលើគំនិតសម្រាប់ការបង្រៀននៅក្នុងគម្រោងមេរៀននេះ បងប្អូនអាចកែតម្រូវសកម្មភាពមកពី គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ដើម្បីប្រើនៅក្នុងថ្នាក់រៀនរបស់បងប្អូនបាន ។ ( សូមមើលផងដែរ ការបង្រៀនតាមរបៀបរបស់ព្រះអង្គសង្គ្រោះ ទំព័រ ១៧–១៨ ) ។