« ថ្ងៃទី ៣–៩ ខែ កក្កដា ។ កិច្ចការ ១–៥ ៖ ‹ អ្នករាល់គ្នានឹងធ្វើជាទីបន្ទាល់ពីខ្ញុំ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ៣–៩ ខែ កក្កដា ។ កិច្ចការ ១–៥ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣
បុណ្យថ្ងៃទីហាសិប ដោយ ស៊ីឌនី ឃីង
ថ្ងៃទី ៣–៩ ខែ កក្កដា
កិច្ចការ ១–៥
« អ្នករាល់គ្នានឹងធ្វើជាទីបន្ទាល់ពីខ្ញុំ »
ប្រសិនបើបងប្អូនអាន កិច្ចការ ១–៥ ហើយស្វែងរកការដឹកនាំមកពីព្រះវិញ្ញាណ នោះបងប្អូននឹងទទួលបានការបំផុសគំនិតអំពីសេចក្ដីពិតអ្វីទៅនៅក្នុងជំពូកទាំងនេះ ដែលនឹងជួយសមាជិកក្នុងថ្នាក់របស់បងប្អូនឲ្យពឹងផ្អែកទាំងស្រុងទៅលើព្រះវិញ្ញាណបរិសុទ្ធ ហើយក្លាយជាសាក្សីដ៏ស្មោះត្រង់ម្នាក់របស់ព្រះអម្ចាស់ព្រះយេស៊ូវគ្រីស្ទ ។
អញ្ជើញឲ្យចែកចាយ
មានវគ្គ និងគោលការណ៍ដ៏មានអត្ថន័យជាច្រើននៅក្នុង កិច្ចការ ១–៥ ។ វិធីដ៏អស្ចារ្យមួយដើម្បីដឹងថា តើអ្វីមួយដែលមានតម្លៃបំផុត ហើយទាក់ទងនឹងសមាជិកក្នុងថ្នាក់របស់បងប្អូនបំផុត គឺតាមរយៈការអនុញ្ញាតឲ្យពួកគេប្រាប់បងប្អូន អំពីអ្វីដែលពួកគេចាប់អារម្មណ៍នៅក្នុងការសិក្សារបស់ពួកគេ ។ តើបងប្អូននឹងអញ្ជើញឲ្យមានការចែកចាយប្រភេទនេះដោយរបៀបណា ? វាអាចជារឿងដ៏សាមញ្ញមួយ ដូចជាការទុកពេលឲ្យពួកគេពីរបីនាទីដើម្បីស្វែងរក ហើយចែកចាយខគម្ពីរមួយមកពី កិច្ចការ ១–៥ ដែលពួកគេមានអារម្មណ៍ថា ព្រះសូរសៀងរបស់ព្រះអម្ចាស់កំពុងមានបន្ទូលមកកាន់ពួកគេ ។
បង្រៀនគោលលទ្ធិ
កិច្ចការ ១:១–៨; ២:៣៧–៣៩; ៤:១–១៣, ៣១–៣៣
ព្រះយេស៊ូវគ្រីស្ទដឹកនាំសាសនាចក្ររបស់ទ្រង់តាមរយៈព្រះវិញ្ញាណបរិសុទ្ធ ។
-
ការអានអំពីបទពិសោធន៍របស់ពួកសាវក អាចជួយសមាជិកក្នុងថ្នាក់របស់បងប្អូនឲ្យមើលឃើញនូវរបៀប ដែលពួកគេអាចទទួលបានព្រះចេស្ដា និងការដឹកនាំមកពីព្រះវិញ្ញាណបរិសុទ្ធនៅក្នុងការហៅ និងការចាត់តាំងរបស់ពួកគេក្នុងសាសនាចក្របាន ។ វិធីមួយដើម្បីរំឭកបទពិសោធន៍នៅក្នុង កិច្ចការ ១–៥ ឡើងវិញ អាចជាការសរសេរនៅលើក្ដារខៀននូវឃ្លាថា ព្រះវិញ្ញាណបរិសុទ្ធបានជួយដល់ពួកសាវកឲ្យដឹកនាំសាសនាចក្រតាមរយៈ ៖ រួចហើយអញ្ជើញសមាជិកក្នុងថ្នាក់ឲ្យស្រាវជ្រាវក្នុង កិច្ចការ ១:១–៨; ២:៣៧–៣៩ និង ៤:១–១៣, ៣១–៣៣ ដោយរកមើលវិធីដើម្បីបញ្ចប់ប្រយោគនេះ ។ បន្ទាប់មក សមាជិកក្នុងថ្នាក់អាចចែកចាយបទពិសោធន៍នានា ដែលព្រះវិញ្ញាណបរិសុទ្ធបានជួយពួកគេតាមរបៀបទាំងនេះ ។ ហេតុអ្វីបានជាពួកសាវកត្រូវការព្រះវិញ្ញាណបរិសុទ្ធ—ហើយហេតុអ្វីបានជាយើងត្រូវការទ្រង់ ?
ពួកសាវករបស់ព្រះយេស៊ូវគ្រីស្ទត្រូវបានហៅដោយព្រះតាមរយៈវិវរណៈ ។
-
សូមពិចារណាអញ្ជើញសមាជិកក្នុងថ្នាក់ឲ្យពន្យល់ពីរបៀប ដែលអាជីវកម្មមួយអាចធ្វើការជ្រើសរើសបុគ្គលិកមកជំនួសសម្រាប់តំណែងជាអ្នកដឹកនាំប្រតិបត្តិម្នាក់ ។ តើពួកគេរកមើលគុណសម្បត្តិអ្វីខ្លះ ? សូមឲ្យសមាជិកក្នុងថ្នាក់ប្រៀបធៀបការណ៍នេះ ជាមួយនឹងរបៀបដែលសាវកម៉ាត់ធាសត្រូវបានហៅ ( សូមមើល កិច្ចការ ១:១៥–២៦; សូមមើលផងដែរ សាំយូអែល ទី១ ១៦:១–១៣ ) ហើយជាមួយនឹងប្រសាសន៍របស់ប្រធាន ហ្គរដុន ប៊ី ហ៊ិងគ្លី នៅក្នុង « ធនធានបន្ថែមទាំងឡាយ » ដែលពិពណ៌នាពីរបៀបដែលពួកសាវកត្រូវបានហៅនៅសព្វថ្ងៃនេះ ។ តើវិធីសាស្ដ្ររបស់ព្រះក្នុងការជ្រើសរើសថ្នាក់ដឹកនាំ ជះឥទ្ធិពលដល់សេចក្ដីជំនឿរបស់យើងលើថ្នាក់ដឹកនាំ ដែលទ្រង់បានហៅយ៉ាងដូចម្ដេចដែរ ? សមាជិកក្នុងថ្នាក់អាចចែកចាយពីរបៀបដែលពួកគេទទួលបានសាក្សីថា ពួកសាវក និងព្យាការីនៅសព្វថ្ងៃនេះត្រូវបានហៅដោយទ្រង់ ។
ព្រះវិញ្ញាណបរិសុទ្ធបំផុសគំនិតយើងឲ្យធ្វើតាមអ្វីដែលយើងរៀន ។
-
កាលសមាជិកក្នុងថ្នាក់សិក្សាបទគម្ពីរនៅគេហដ្ឋាន និងសិក្សារួមគ្នានៅក្នុងថ្នាក់រៀងរាល់សប្ដាហ៍ ជារឿយៗពួកគេអាចនឹងមាន « សេចក្តីចាក់ចុចក្នុងចិត្ត » ( កិច្ចការ ២:៣៧ ) ។ បងប្អូនអាចនឹងមានអារម្មណ៍បំផុសគំនិតឲ្យជួយពួកគេបន្ថែមទៀត ដោយការសួរសំណួរថា « តើយើងគួរតែធ្វើអ្វីខ្លះ ? » ( កិច្ចការ ២:៣៧ ) ។ សូមអាន កិច្ចការ ២:៣៧–៤៧ រួមគ្នា ដោយអញ្ជើញសមាជិកក្នុងថ្នាក់ឲ្យស្រាវជ្រាវរកអ្វីដែលក្រុមមនុស្ស ៣,០០០ នាក់នេះបានធ្វើ ដោយសារតែការអញ្ជើញរបស់ពេត្រុស ។ ពួកគេក៏អាចចែកចាយនូវរបៀប ដែលពួកគេបានធ្វើសកម្មភាពតាមការបំផុសគំនិតមកពីការសិក្សារបស់ពួកគេអំំពីព្រះបន្ទូលនៃព្រះផងដែរ ។ បន្ទាប់មក បងប្អូនអាចទុកពេលនៅចុងបញ្ចប់នៃមេរៀននេះ ដើម្បីឲ្យសមាជិកម្នាក់ៗអាចសួរខ្លួនឯងនូវសំណួរនេះ « តើខ្ញុំគួរតែធ្វើអ្វីខ្លះ ? » ហើយកត់ត្រាចំណាប់អារម្មណ៍របស់ពួកគេទុក ។
ទោះជាត្រូវបានគេចាប់ខ្លួន ហើយវាយធ្វើបាបក្ដី ក៏ពេត្រុសបានប្រកាសដំណឹងល្អយ៉ាងម៉ឺងម៉ាត់ដែរ ។
នៅពេលយើងពោរពេញដោយព្រះវិញ្ញាណបរិសុទ្ធ យើងអាចចែកចាយដំណឹងល្អដោយភាពក្លាហានបាន ។
-
សមាជិកក្នុងថ្នាក់អាចរំឭក កិច្ចការ ៣; ៤:១–២១; ៥:១២–៤២ ដោយរកមើលគំរូរបស់ពេត្រុស ដែលបានថ្លែងទីបន្ទាល់យ៉ាងម៉ឺងម៉ាត់ ។ ឬពួកគេអាចមើលវីដេអូដូចតទៅនេះមួយ ៖ « Peter Preaches and Is Arrested » « Peter and John Are Judged » ឬ « Peter and John Continue Preaching the Gospel » ( នៅលើគេហទំព័រ ChurchofJesusChrist.org ) ។ តើវាមានន័យយ៉ាងណាក្នុងការផ្សាយ « ព្រះបន្ទូលដោយចិត្តក្លាហាន » ? ( កិច្ចការ ៤:៣១ ) ។ តើព្រះវិញ្ញាណបរិសុទ្ធជួយយើងឲ្យចែកចាយដំណឹងល្អដោយចិត្តក្លាហានតាមរបៀបណា ? តើការមានចិត្តក្លាហានរបៀបនេះ ខុសពីការមានចិត្តទាស់ទែងយ៉ាងដូចម្ដេច? សមាជិកក្នុងថ្នាក់អាចមានបទពិសោធន៍ដើម្បីចែកចាយ ដែលក្នុងនោះពួកគេ ឬនរណាម្នាក់ដែលពួកគេស្គាល់ បានការពារ ឬបានថ្លែងទីបន្ទាល់យ៉ាងម៉ឺងម៉ាត់អំពីដំណឹងល្អ ។
ធនធានបន្ថែមទាំងឡាយ
ការហៅសមាជិកមួយរូបនៃពួកដប់ពីរនាក់ ។
ប្រធាន ហ្គរដុន ប៊ី ហ៊ិងគ្លី បានចែកចាយការយល់ដឹងដូចតទៅនេះស្ដីពីដំណើរការនៃការហៅសាវកថ្មីមួយរូប ៖ « នីតិវិធីនេះគឺជាវិធីពិសេសចម្លែកចំពោះសាសនាចក្ររបស់ព្រះអម្ចាស់ ។ គ្មានការស្វែងរកតួនាទី គ្មានការប្រកួតប្រជែងសម្រាប់មុខតំណែង គ្មានការឃោសនាដើម្បីលើកកម្ពស់គុណធម៌របស់បុគ្គលម្នាក់ឡើយ ។ មាគ៌ារបស់ព្រះអម្ចាស់គឺផ្ទុយពីមាគ៌ារបស់លោកិយ ។ មាគ៌ារបស់ព្រះអម្ចាស់គឺស្ងប់ស្ងាត់ វាគឺជាមាគ៌ាមួយនៃសុខសន្តិភាព វាគ្មានការបង់តម្លៃសម្រាប់អ្នកគាំទ្រ ឬរូបិយវត្ថុឡើយ ។ វាគ្មានភាពអាត្មានិយម ឬការធ្វើឲ្យសាបសូន្យ ឬមហិច្ឆតានោះទេ ។ នៅក្រោមផែនការរបស់ព្រះអម្ចាស់ អ្នកទាំងឡាយណាដែលមានការទទួលខុសត្រូវដើម្បីជ្រើសរើសអ្នកកាន់តំណែង គឺត្រូវស្វែងរកចម្លើយដោយសំណួរដ៏សំខាន់បំផុតមួយ ៖ ‹ តើនរណាដែលព្រះអម្ចាស់បានជ្រើសរើស ? › មាននូវការពិភាក្សាយ៉ាងល្អិតល្អន់ និងដោយស្ងាត់ស្ងៀម ។ ហើយមាននូវការអធិស្ឋានជាច្រើនដើម្បីទទួលការបញ្ជាក់ពីព្រះវិញ្ញាណបរិសុទ្ធថា ការជ្រើសរើសនោះគឺត្រឹមត្រូវ » ( « God Is at the Helm » Ensign ខែ ឧសភា ឆ្នាំ ១៩៩៤ ទំព័រ ៥៣ ) ។
ការកែលម្អការបង្រៀនរបស់យើង
អញ្ជើញអ្នករៀនឲ្យធ្វើសកម្មភាព ។ ជាញឹកញាប់ ព្រះវិញ្ញាណបរិសុទ្ធបំផុសគំនិតយើងឲ្យធ្វើសកម្មភាពតាមអ្វីដែលយើងកំពុងរៀន ( សូមមើល កិច្ចការ ២:៣៧ ) ។ នៅពេលការណ៍នេះកើតឡើងដល់ប្រជាជន ដែលពេត្រុសកំពុងបង្រៀន នោះលោកបានផ្ដល់ការអញ្ជើញមួយ ( សូមមើល កិច្ចការ ២:៣៨ ) ។ សូមពិចារណាអំពីរបៀបដែលបងប្អូនអាចធ្វើតាមគំរូរបស់ពេត្រុសបាន ។