« ថ្ងៃទី ៨–១៤ ខែ ឧសភា ។ ម៉ាថាយ ១៩–២០; ម៉ាកុស ១០; លូកា ១៨ ៖ ‹ តើនៅខ្វះអ្វីទៀត ? › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ៨–១៤ ខែ ឧសភា ។ ម៉ាថាយ ១៩–២០; ម៉ាកុស ១០; លូកា ១៨ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣
ថ្ងៃទី ៨–១៤ ខែ ឧសភា
ម៉ាថាយ ១៩–២០; ម៉ាកុស ១០; លូកា ១៨
« តើនៅខ្វះអ្វីទៀត ? »
នៅពេលបងប្អូនរៀបចំខ្លួនបង្រៀន សូមពិចារណាប្រកបដោយការអធិស្ឋានអំពីរបៀបដែលបងប្អូនអាចជួយសមាជិកក្នុងថ្នាក់ ឲ្យចែកចាយអ្វីដែលពួកគេបានរៀនសូត្រ ឬមានអារម្មណ៍ក្នុងអំឡុងការសិក្សាផ្ទាល់ខ្លួនរបស់ពួកគេ ។
អញ្ជើញឲ្យចែកចាយ
វាអាចមានប្រយោជន៍ ដើម្បីពិភាក្សាអំពីបទពិសោធន៍ទូទៅរបស់សមាជិកក្នុងថ្នាក់ជាមួយនឹងការរៀនសូត្រដំណឹងល្អនៅផ្ទះយូរម្ដងៗ ។ តើពួកគេអាចចែកចាយបទពិសោធន៍ដ៏ជោគជ័យអ្វីខ្លះ ? តើឧបសគ្គ ឬការប្រឈមអ្វីខ្លះដែលពួកគេកំពុងជួបប្រទះ ? តើពាក្យទូន្មានអ្វីខ្លះដែលពួកគេអាចផ្ដល់ឲ្យគ្នាទៅវិញទៅមកបាន ?
បង្រៀនគោលលទ្ធិ
អាពាហ៍ពិពាហ៍រវាងបុរសម្នាក់ និងស្ត្រីម្នាក់គឺជាផ្នែកដ៏សំខាន់មួយនៅក្នុងផែនការដ៏អស់កល្បរបស់ព្រះ ។
-
ទស្សនៈរបស់ពិភពលោកស្ដីពីអាពាហ៍ពិពាហ៍ ឃ្លាតចេញខ្លាំងទៅៗពីសេចក្ដីពិតដ៏នៅអស់កល្បជានិច្ច ។ ដើម្បីជួយសមាជិកក្នុងថ្នាក់របស់បងប្អូនឲ្យរៀនអំពីទស្សនៈរបស់ព្រះស្ដីពីអាពាហ៍ពិពាហ៍ បងប្អូនអាចអញ្ជើញពួកគេឲ្យអាន ម៉ាថាយ ១៩:៣–៩ ហើយសរសេរសេចក្ដីពិតដែលពួកគេបានរកឃើញទាក់ទងនឹងអាពាហ៍ពិពាហ៍ដាក់នៅលើក្ដារខៀន ។ ពួកគេក៏អាចសរសេរសេចក្ដីពិតបន្ថែមទៀត ដែលពួកគេរកឃើញនៅក្នុងបទគម្ពីរដូចតទៅនេះផងដែរ ៖ លោកុប្បត្តិ ១:២៧–២៨; កូរិនថូស ទី១ ១១:១១; គោលលទ្ធិ និង សេចក្ដីសញ្ញា ៤២:២២; ៤៩:១៥–១៧; ១៣១:១–៤; ១៣២:១៩ និង ម៉ូសេ ៣:១៨, ២១–២៤ ។ តើសេចក្ដីពិតទាំងនេះត្រូវបានពង្រឹងនៅក្នុង « ក្រុមគ្រួសារ ៖ ការប្រកាសដល់ពិភពលោក » តាមរបៀបណា ? ( នៅលើគេហទំព័រ ChurchofJesusChrist.org ) ។
មនុស្សគ្រប់រូបអាចទទួលពរជ័យនៃជីវិតអស់កល្បជានិច្ច មិនថាពួកគេពួកគេទទួលបានដំណឹងល្អនៅពេលណានោះទេ ។
-
តើអ្វីទៅដែលនឹងជួយដល់សមាជិកក្នុងថ្នាក់របស់បងប្អូន ឲ្យអនុវត្តតាមគោលការណ៍នៅក្នុងពាក្យប្រៀបប្រដូចស្ដីពីជើងឈ្នួលនៅក្នុងចម្ការទំពាំងបាយជូរ ? បងប្អូនអាចអញ្ជើញសមាជិកក្នុងថ្នាក់ពីរបីនាក់ឲ្យរៀបចំការដើរតួសម្ដែងមួយ អំពីពាក្យប្រៀបប្រដូចនេះដើម្បីបង្ហាញដល់សមាជិកក្នុងថ្នាក់បាន ។ បន្ទាប់ពីការបង្ហាញនេះ មនុស្សដែលសម្ដែងជាជើងឈ្នួលអាចចែកចាយពីអារម្មណ៍របស់ពួកគេ អំពីការបង់ថ្លៃដែលពួកគេបានទទួល និងហេតុផលនៃអារម្មណ៍នោះបាន ។ តើពាក្យប្រៀបប្រដូចនេះប្រាប់អ្វីខ្លះអំពីនគរស្ថានសួគ៌ ? តើយើងទទួលបានការយល់ដឹងបន្ថែមទៀតអ្វីខ្លះ អំពីពាក្យប្រៀបប្រដូចនេះចេញមកពីសារលិខិតរបស់អែលឌើរ ជែហ្វ្រី អ័រ ហូឡិន « The Laborers in the Vineyard » ? ( Liahona ខែ ឧសភា ឆ្នាំ ២០១២ ទំព័រ ៣១–៣៣ ) ។
ម៉ាថាយ ១៩:១៦–២២; ម៉ាកុស ១០:១៧–២៧
ព្រះអង្គសង្គ្រោះនឹងដឹកនាំយើងឲ្យខិតកាន់តែជិតទ្រង់ នៅពេលយើងទូលសូមជំនួយរបស់ទ្រង់ ។
-
តើបងប្អូនអាចជួយសមាជិកក្នុងថ្នាក់ឲ្យស្គាល់ ហើយអនុវត្តតាមគោលការណ៍នានានៅក្នុងដំណើររឿងស្ដីពីកម្លោះអ្នកមានតាមរបៀបណា ? វិធីមួយគឺអាចសូមឲ្យពួកគេអាន ម៉ាកុស ១០:១៧–២៧ ហើយពិចារណាថាតើពួកគេធ្លាប់មានអារម្មណ៍ដូចជាកម្លោះអ្នកមាននោះដែរឬទេ ។ តើមានអ្វីខ្លះដែលបានជួយយើងឲ្យធ្វើតាមព្រះឱវាទរបស់ព្រះអង្គសង្គ្រោះ ទោះបីជាពេលធ្វើដូច្នោះពិបាកខ្លាំងក្ដី ? សមាជិកក្នុងថ្នាក់អាចស្ម័គ្រចិត្តចែកចាយបទពិសោធន៍នានា ដែលបានឆ្លើយនឹងសំណួរថា « តើនៅខ្វះអ្វីទៀត ? » ( ម៉ាថាយ ១៩:២០ ) ហើយបានទទួលការបំផុសគំនិតផ្ទាល់ខ្លួនមួយដើម្បីកែលម្អ ។ ដើម្បីជួយសមាជិកក្នុងថ្នាក់ដែលអាចបាក់ទឹកចិត្ត ដោយសារការផ្ដោតលើអ្វីដែលពួកគេខ្វះខាតនោះ បងប្អូនអាចចែកចាយសេចក្ដីថ្លែងការណ៍ដែលមាននៅក្នុង « ធនធានបន្ថែមទាំងឡាយ » បាន ។
-
សមាជិកក្នុងថ្នាក់អាចបានអានសារលិខិតសន្និសីទទូទៅមួយ ដែលទាក់ទងនឹងខគម្ពីរទាំងនេះ ដូចបានផ្ដល់យោបល់នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមអញ្ជើញពួកគេឲ្យចែកចាយការយល់ដឹង ដែលពួកគេបានទទួល ។
ពួកអ្នកយកពន្ធដែលប្រែចិត្ត និងពួកផារិស៊ីដែលជឿថាខ្លួនសុចរិតនៅក្នុងព្រះវិហារ ដោយ ហ្វ្រេង អ័ដាម
យើងគួរតែទុកចិត្តលើសេចក្ដីមេត្តាករុណារបស់ព្រះ ពុំមែនលើសេចក្ដីសុចរិតរបស់យើងផ្ទាល់ឡើយ ។
-
ពាក្យប្រៀបប្រដូចរបស់ព្រះអង្គសង្គ្រោះក្នុងការប្រៀបធៀបការអធិស្ឋានរបស់ពួកផារិស៊ី ជាមួយនឹងការអធិស្ឋានរបស់ពួកអ្នកយកពន្ធ អាចជួយយើងឲ្យគូសបញ្ជាក់ពីឥរិយាបថសំខាន់ៗដែលព្រះអម្ចាស់សុំដល់អស់អ្នកដែលចង់ដើរតាមទ្រង់ ។ ដើម្បីជួយសមាជិកក្នុងថ្នាក់ឲ្យអនុវត្តតាមពាក្យប្រៀបប្រដូចនេះនៅក្នុងជំនាន់របស់យើង បងប្អូនអាចអញ្ជើញពួកគេឲ្យសរសេរឡើងវិញនូវការអធិស្ឋានរបស់ពួកផារិស៊ី តាមរបៀបមួយដែលប្រើព័ត៌មានលម្អិតនៅសម័យទំនើប ប៉ុន្តែបង្ហាញពីឥរិយាបថដូចគ្នា ។ ពួកគេអាចធ្វើដូចគ្នាជាមួយនឹងការអធិស្ឋានរបស់ពួកអ្នកយកពន្ធ រួចហើយចែកចាយអ្វីដែលពួកគេបានសរសេរ ។ តើ ខទី ១៥–១៧ និង ១៨–២៤ ទាក់ទងនឹងអ្វីដែលព្រះអង្គសង្គ្រោះបានបង្រៀននៅក្នុងពាក្យប្រៀបប្រដូចនេះតាមរបៀបណា ? បងប្អូនក៏អាចចែកចាយសេចក្ដីថ្លែងការណ៍ដូចតទៅនេះ ទាក់ទងនឹងខគម្ពីរទាំងនេះ មកពីអែលឌើរ ឌែល ជី រិនឡាន់ បានផងដែរ ៖ « សារលិខិតនេះមានភាពច្បាស់លាស់ចំពោះពួកយើង ៖ អ្នកមានបាបដែលប្រែចិត្តខិតកាន់តែជិតព្រះ ជាងអ្នកដែលគិតថាខ្លួនសុចរិត ដែលកាត់ទោសអ្នកមានបាប » ( « Our Good Shepherd » Liahona ខែ ឧសភា ឆ្នាំ ២០១៧ ទំព័រ ៣១ ) ។
ធនធានបន្ថែមទាំងឡាយ
ចូរយើងកុំអរសប្បាយតែនឹងខ្លួនយើង ប៉ុន្ដែក៏កុំឲ្យបាក់ទឹកចិត្តដែរ ។
អែលឌើរ ឌី ថត គ្រីស្តូហ្វឺសិន បានបង្រៀន ៖
« បើយើងសួរដោយស្មោះថា ‹ តើខ្ញុំនៅខ្វះអ្វីទៀត ? › [ ព្រះ ] ទ្រង់នឹងពុំទុកឲ្យយើងសង្ស័យឡើយ ប៉ុន្តែទ្រង់នឹងឆ្លើយតបជាប្រយោជន៍សម្រាប់សុភមង្គលរបស់យើងដោយក្ដីស្រឡាញ់ ។ ហើយទ្រង់ប្រទានក្ដីសង្ឃឹមដល់យើង ។
« វាគឺជាការខិតខំដ៏លើសលប់មួយ ហើយវានឹងគួរឲ្យខ្លាចផងដែរ បើយើងខំដើម្បីបានបរិសុទ្ធភាពតែម្នាក់ឯងនោះ ។ សេចក្ដីពិតដ៏រុងរឿងគឺថា យើងពុំនៅឯកោទេ ។ យើងមានសេចក្ដីស្រឡាញ់របស់ព្រះ ព្រះគុណរបស់ព្រះគ្រីស្ទ និងការលួងលោម និងការដឹកនាំរបស់ព្រះវិញ្ញាណបរិសុទ្ធ ហើយនឹងការរាប់អាន និងការលើកទឹកចិត្តមកពីបងប្អួនពួកបរិសុទ្ធនៅក្នុងព្រះគ្រីស្ទ ។ ចូរយើងកុំអរសប្បាយតែនឹងខ្លួនយើង ប៉ុន្ដែក៏កុំឲ្យបាក់ទឹកចិត្តដែរ » ( « The Living Bread Which Came Down from Heaven » Liahona ខែ វិច្ឆិកា ឆ្នាំ ២០១៧ ទំព័រ ៣៩ ) ។
ការកែលម្អការបង្រៀនរបស់យើង
ព្រះត្រូវការទេពកោសល្យ និងសមត្ថភាពដ៏វិសេសវិសាលរបស់បងប្អូន ។ « បងប្អូនអាចប្រទានពរដល់កូនចៅរបស់ព្រះដោយការប្រើសេចក្ដីស្រឡាញ់ ដែលបងប្អូនមានចំពោះអ្នកដទៃ អំណោយទានទាំងឡាយដែលព្រះបានប្រទានដល់បងប្អូន និងបទពិសោធន៍ជីវិតរបស់បងប្អូន ។ នៅពេលបងប្អូនបម្រើដោយស្មោះត្រង់ ហើយស្វែងរកជំនួយរបស់ព្រះ នោះទ្រង់នឹងតម្កើងបងប្អូន ហើយបងប្អូននឹងមានសមត្ថភាពរីកចម្រើនដើម្បីបង្រៀនដំណឹងល្អតាមរបៀបរបស់ព្រះអង្គសង្គ្រោះ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៥ ) ។