« ថ្ងៃទី ១៧–២៣ ខែ មេសា ។ ម៉ាថាយ ១៨; លូកា ១០ ៖ ‹ តើត្រូវឲ្យខ្ញុំធ្វើដូចម្ដេចដើម្បីឲ្យបានជីវិតអស់កល្បជានិច្ច ? › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ១៧–២៣ ខែ មេសា ។ ម៉ាថាយ ១៨; លូកា ១០ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២៣

រូបភាព

សាសន៍សាម៉ារីចិត្តល្អ

សាសន៍សាម៉ារីចិត្តល្អ ដោយ ឌេន ប៊ើរ

ថ្ងៃទី ១៧–២៣ ខែ មេសា

ម៉ាថាយ ១៨; លូកា ១០

« តើត្រូវឲ្យខ្ញុំធ្វើដូចម្ដេចដើម្បីឲ្យបានជីវិតអស់កល្បជានិច្ច ? »

សូមអាន ម៉ាថាយ ១៨ និង លូកា ១០ ហើយកត់ត្រាចំណាប់អារម្មណ៍ខាងវិញ្ញាណរបស់បងប្អូន ។ នៅពេលបងប្អូនទទួលបានចំណាប់អារម្មណ៍ បងប្អូនអាចសួរសំណួរដូចដែលអែលឌើរ រីឆាដ ជី ស្កត បានណែនាំ « តើមានរឿងច្រើនទៀតដែលខ្ញុំគួរតែដឹងមែនទេ ? » ( « To Acquire Spiritual Guidance » Liahona ខែ វិច្ឆិកា ឆ្នាំ ២០០៩ ទំព័រ ៨ ) ។

រូបភាព

រូបតំណាងការចែកចាយ

អញ្ជើញឲ្យចែកចាយ

ជំពូកទាំងនេះមាននូវឧទាហរណ៍យ៉ាងច្រើន អំពីការបង្រៀនដំណឹងល្អដែលមានភាពខុសគ្នាពីអ្វីដែលពិភពលោកនេះបង្រៀនយើង ។ ប្រហែលជាសមាជិកក្នុងថ្នាក់អាចចែកចាយពីគំរូមួយចំនួន ដែលពួកគេបានរកឃើញនៅក្នុងការអានរបស់ពួកគេនៅសប្ដាហ៍នេះ ។ តើព្រះអម្ចាស់ប្រទានពរដល់យើងយ៉ាងដូចម្ដេច នៅពេលយើងអនុវត្តតាមការបង្រៀនរបស់ទ្រង់ ?

រូបភាព

រូបតំណាងការបង្រៀន

បង្រៀនគោលលទ្ធិ

ម៉ាថាយ ១៨:២១–៣៥

យើងត្រូវតែអភ័យទោសឲ្យមនុស្សដទៃទៀត ប្រសិនបើយើងចង់ទទួលបានការអភ័យទោសមកពីព្រះអម្ចាស់ ។

តើបងប្អូនអាចប្រើពាក្យប្រៀបប្រដូចអំពីអ្នកបម្រើដែលគ្មានចិត្តមេត្តា ដើម្បីបំផុសគំនិតដល់សមាជិកក្នុងថ្នាក់ឲ្យកាន់តែមានការអភ័យទោសច្រើនជាងមុនតាមរបៀបណា ? ប្រហែលជាបងប្អូនអាចសរសេរសំណួរដូចតទៅនេះដាក់នៅលើក្ដារខៀន ហើយអញ្ជើញសមាជិកក្នុងថ្នាក់ឲ្យពិចារណាអំពីវា កាលសមាជិកម្នាក់តំណាលអំពីពាក្យប្រៀបប្រដូចនោះ ៖ តើស្ដេចតំណាងឲ្យនរណា ? តើអ្នកបម្រើដែលគ្មានចិត្តមេត្តានោះតំណាងឲ្យនរណា ? តើអ្នកបម្រើម្នាក់ទៀតតំណាងឲ្យនរណា ? តើបំណុលតំណាងឲ្យអ្វី ? សូមអញ្ជើញសមាជិកក្នុងថ្នាក់ឲ្យចែកចាយថា តើពាក្យប្រៀបប្រដូចនេះមានសារលិខិតអ្វីសម្រាប់ពួកគេម្នាក់ៗ ។ ( សូមមើលផងដែរនៅក្នុង « ធនធានបន្ថែមទាំងឡាយ » ) ។
បងប្អូនអាចអញ្ជើញសមាជិកក្នុងថ្នាក់ឲ្យសម្របសម្រួលពាក្យប្រៀបប្រដូចអំពីអ្នកបម្រើដែលគ្មានចិត្តមេត្តានេះ ដែលបង្រៀនមេរៀនដូចគ្នាអំពីការអភ័យទោសដោយប្រើស្ថានភាព និងរឿងលម្អិតនៅសម័យបច្ចុប្បន្ន ។ ( សូមពិចារណាឲ្យពួកគេធ្វើកិច្ចការនេះជាក្រុម ) ។ សូមពិភាក្សាអំពីរបៀបដែលពាក្យប្រៀបប្រដូចនេះបានឆ្លើយទៅនឹងសំណួររបស់ពេត្រុសថា តើលោកគួរអភ័យទោសប៉ុន្មានដង ។

ព្រះយេស៊ូវមានបន្ទូលអំពីប្រាក់ និងបំណុលដើម្បីបង្រៀនពីការអភ័យទោស ។

លូកា ១០:២៥–៣៧

ដើម្បីទទួលបានជីវិតដ៏អស់កល្បជានិច្ច យើងត្រូវស្រឡាញ់ព្រះ និងស្រឡាញ់អ្នកជិតខាងរបស់យើង ។

នេះគឺជាគំនិតមួយ ដែលអាចផ្ដល់ជាទស្សនៈថ្មីមួយដល់សមាជិកក្នុងថ្នាក់អំពីពាក្យប្រៀបប្រដូចស្ដីពីសាសន៍សាម៉ារីចិត្តល្អ ៖ សូមអញ្ជើញពួកគេឲ្យគិតថា ពួកគេកំពុងស៊ើបអង្កេតរឿងក្ដីមួយអំពីការវាយតប់ និងចោរកម្មនៅតាមផ្លូវរវាងទីក្រុងយេរីខូ និងទីក្រុងយេរូសាឡិម ។ សូមឲ្យសមាជិកក្នុងថ្នាក់ពីរបីនាក់មកកាន់ថ្នាក់រៀន ដោយរៀបចំខ្លួនដើម្បីតំណាងឲ្យមនុស្សផ្សេងៗគ្នានៅក្នុងពាក្យប្រៀបប្រដូចនេះ ហើយពិភាក្សាអំពីការពាក់ព័ន្ធរបស់ពួកគេនៅក្នុងរឿងក្ដីនោះ ។ ឧទាហរណ៍ តើអាចមានមូលហេតុណាខ្លះ ដែលពួកសង្ឃ និងពួកលេវីមិនបានឈប់ ដើម្បីមកជួយបុរសដែលរងរបួសនោះ ? ហេតុអ្វីបានជាសាសន៍សាម៉ារីនោះបានឈប់ ? តើម្ចាស់ផ្ទះសំណាក់អាចបន្ថែមគំនិតអ្វីខ្លះ ? តើបុរសដែលត្រូវរបួសអាចមានអារម្មណ៍បែបណាអំពីអ្នកដទៃទៀតទាំងនោះ ? សូមធ្វើឲ្យប្រាកដថា ការពិភាក្សានោះបំផុសគំនិតសមាជិកក្នុងថ្នាក់ឲ្យធ្វើដូចជាសាសន៍សាម៉ារីចិត្តល្អ និងម្ចាស់ផ្ទះសំណាក់ ហើយចៀសវាងពីការធ្វើដូចជាពួកសង្ឃ និងសាសន៍លេវីនោះ ។
តើពាក្យប្រៀបប្រដូចអំពីសាសន៍សាម៉ារីចិត្តល្អ ឆ្លើយនឹងសំណួរដែលបានទូលសួរទៅកាន់ព្រះយេស៊ូវនៅក្នុង លូកា ១០:២៥–២៩ ដោយរបៀបណា ? សូមឲ្យសមាជិកក្នុងថ្នាក់និយាយពីគ្រា ដែលពួកគេមានអារម្មណ៍ថាដូចជា « មនុស្សម្នាក់ » ( ខទី ៣០ ) ដែលត្រូវការជំនួយយ៉ាងខ្លាំងនោះ ។ តើជំនួយបានកើតឡើងតាមរបៀបណា ? ក្នុងនាមជាសមាជិកវួដ តើយើងអាចធ្វើការរួមគ្នាដើម្បីជួយមនុស្សដទៃ ដូចជាសាសន៍សាម៉ារីចិត្តល្អ និងម្ចាស់ផ្ទះសំណាក់បានធ្វើដោយរបៀបណា ?

លូកា ១០:៣៨–៤២

យើងជ្រើសយក « ចំណែកយ៉ាងល្អ » ដោយធ្វើការជ្រើសរើសប្រចាំថ្ងៃ ដែលដឹកនាំទៅកជីវិតដ៏នៅអស់កល្បជានិច្ច ។

បន្ទាប់ពីអាន លូកា ១០:៣៨–៤២ រួមគ្នាក្នុងថ្នាក់រៀនហើយ នោះបងប្អូនអាចសួរសមាជិកក្នុងថ្នាក់ថា តើអាចនឹងមានប្រតិកម្មបែបណាទៅនឹងពាក្យទូន្មានរបស់ព្រះអង្គសង្គ្រោះ ប្រសិនបើពួកគេគឺជាម៉ាថាវិញនោះ ។ តើបទពិសោធន៍នេះអាចនឹងជះឥទ្ធិពលដល់ការជ្រើសរើសនាពេលអនាគតរបស់ពួកគេយ៉ាងដូចម្ដេច ? តើយើងអាចដឹងដោយរបៀបណាថា រឿងណាដែលត្រូវទទួលបានពេលវេលា និងការយកចិត្តទុកដាក់បន្ថែមទៀតនៅក្នុងជីវិតរបស់យើង ? សមាជិកក្នុងថ្នាក់អាចសិក្សាស្រាវជ្រាវក្នុងសារលិខិតរបស់ប្រធាន ដាល្លិន អេក អូក « Good, Better, Best » ( Liahona ខែ វិច្ឆិកា ឆ្នាំ ២០០៧ ទំព័រ ១០៤–៨ ) ដើម្បីស្វែងរកការប្រឹក្សា ដែលអាចជួយដល់ពួកគេបាន ។

រូបភាព

រូបតំណាងធនធានទាំងឡាយ

ធនធានបន្ថែមទាំងឡាយ

បំណុលនៅក្នុងពាក្យប្រៀបប្រដូចស្ដីពីអ្នកបម្រើដែលគ្មានចិត្តមេត្តា ។

អែលឌើរ ជែហ្វ្រី អរ ហូឡិន បានថ្លែងអំពីរឿងបំណុល ដែលជំពាក់នៅក្នុងពាក្យប្រៀបប្រដូចអំពីអ្នកបម្រើដែលគ្មានចិត្តមេត្តា ៖

« មានគំនិតផ្សេងៗមួយចំនួននៅក្នុងចំណោមអ្នកប្រាជ្ញអំពីតម្លៃប្រាក់ដែលបានថ្លែងនៅទីនេះ—ហើយដោយលុបចោលឯកសារយោងអំពីតម្លៃនៃរូបិយប័ណ្ណរបស់សហរដ្ឋ—ដើម្បីគិតលេខឲ្យងាយស្រួល ប្រសិនបើពុំអាចលែងទារបំណុល ១០០ កាក់ ឬស្មើនឹង ១០០ ដុល្លារអាមេរិកក្នុងជំនាន់របស់យើងដែលជាចំនួនតូចបានទេ នោះបំណុលចំនួន ១០០០០ កោដិដែលមានតម្លៃប្រហែលជា ១០០០ លានដុល្លារអាមេរិក —ឬច្រើនជាងនោះ រឹតតែជាចំនួនដែលត្រូវតែទាមទារហើយ ។

« បើជាបំណុលផ្ទាល់ខ្លួនមួយ នោះគឺជាចំនួនខាងតារាសាស្ត្រមួយ—សរុបទៅវាហួសពីការយល់ដឹងរបស់យើង ។ ( គ្មាននរណាអាចទិញឥវ៉ាន់ជាមួយលុយដ៏ច្រើនបែបនោះទេ ! ) មែនហើយ គោលបំណងនៃពាក្យប្រៀបប្រដូចនេះ វាគឺ ជារឿងដែល ពុំអាចយល់បាន វា ជារឿង ហួសពីសមត្ថភាពរបស់យើងដើម្បីចាប់យក គ្មានពាក្យនឹងថ្លែង ព្រោះវាហួសពីសមត្ថភាពយើងដើម្បីបង់សង ។ នោះគឺដោយសាររឿងនេះពុំមែនជារឿងអំពីអ្នកបម្រើពីរនាក់ឈ្លោះគ្នាក្នុងព្រះគម្ពីរសញ្ញាថ្មីទេ ។ វាគឺជារឿងអំពីយើង ជាគ្រួសារមនុស្សដែលធ្លាក់ចុះ—ជាអ្នកជំពាក់បំណុលខាងជីវិតរមែងស្លាប់ ជាអ្នកប្រព្រឹត្តអំពើរំលង ហើយជាអ្នកជាប់ទោសទាំងអស់គ្នា ។ យើងម្នាក់ៗគឺជាអ្នកជំពាក់បំណុល ហើយតាមសេចក្ដីសម្រេច គឺថាយើងម្នាក់ៗត្រូវចាប់ដាក់គុក ។ ហើយយើងទាំងអស់គ្នានឹងស្ថិតនៅទីនោះ បើពុំមានព្រះគុណរបស់ស្ដេចយើងដែលរំដោះយើងឲ្យរួច ដោយសារទ្រង់ស្រឡាញ់យើង ហើយ ‹ ទ្រង់មានចិត្តក្ដួល ដោយសេចក្ដីមេត្តាករុណាដល់យើង › ទេនោះ [ គោលលទ្ធិ និង សេចក្ដីសញ្ញា ១២១:៤ ] » ( « Be Ye Therefore Perfect—Eventually » Liahona ខែ វិច្ឆិកា ឆ្នាំ ២០១៧ ទំព័រ ៤១ ) ។

ការកែលម្អការបង្រៀនរបស់យើង

ធ្វើតាមគំរូរបស់ព្រះអង្គសង្គ្រោះ ។ នៅពេលបងប្អូនបានអានដំណើររឿងអំពីព្រះអង្គសង្គ្រោះ ដែលបង្រៀននៅក្នុងព្រះគម្ពីរសញ្ញាថ្មី សូមរកមើលមេរៀននៅក្នុងឧទាហរណ៍របស់ទ្រង់ ដែលអាចជួយបងប្អូនឲ្យក្លាយជាគ្រូបង្រៀនដ៏ប្រសើរបាន ។ ឧទាហរណ៍ នៅក្នុង លូកា ១០:២៥–៣៧ តើព្រះយេស៊ូវបានធ្វើអ្វីខ្លះ ដើម្បីបង្រៀនអ្នកប្រាជ្ញខាងច្បាប់នោះអំពីរបៀបដើម្បីទទួលបានជីវិតដ៏នៅអស់កល្បជានិច្ច ?