« អ្នកគឺជាគ្រូបង្រៀនម្នាក់នៅក្នុងសាសនាចក្រនៃព្រះយេស៊ូវគ្រីស្ទ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )
« អ្នកគឺជាគ្រូបង្រៀនម្នាក់នៅក្នុងសាសនាចក្រនៃព្រះយេស៊ូវគ្រីស្ទ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២១
អ្នកគឺជាគ្រូបង្រៀនម្នាក់នៅក្នុងសាសនាចក្រនៃព្រះយេស៊ូវគ្រីស្ទ
អ្នកត្រូវបានព្រះហៅមកដើម្បីផ្តល់ក្តីស្រឡាញ់ និងបង្រៀនបុត្រាបុត្រីរបស់ទ្រង់ទៅតាមរបៀបរបស់ព្រះអង្គសង្គ្រោះ ។ អ្នកត្រូវបានញែកចេញចំពោះការហៅនេះដោយអ្នកដែលមានសិទ្ធិអំណាចនៃបព្វជិតភាពដ៏បរិសុទ្ធរបស់ទ្រង់ ។ ទោះបីជាអ្នកគ្មានបទពិសោធន៍ជាគ្រូបង្រៀនក៏ដោយ នៅពេលអ្នករស់នៅដោយស័ក្ដិសម អធិស្ឋានប្រចាំថ្ងៃ ហើយសិក្សាព្រះគម្ពីរ នោះព្រះវរបិតាសួគ៌នឹងប្រទានឥទ្ធិពល និងព្រះចេស្ដានៃព្រះវិញ្ញាណបរិសុទ្ធដើម្បីជួយអ្នកទទួលបានជោគជ័យ ( សូមមើល នីហ្វៃទី២ ៣៣:១ ) ។
អស់កុមារទាំងឡាយដែលត្រូវនៅក្នុងការមើលថែរបស់អ្នក គឺជាកូនចៅរបស់ព្រះវរបិតាសួគ៌ ហើយទ្រង់ជ្រាបពីអ្វីដែលពួកគេត្រូវការ និងពីរបៀបដ៏ល្អបំផុតដើម្បីជួយដល់ពួកគេ ។ តាមរយៈព្រះវិញ្ញាណបរិសុទ្ធ នោះព្រះនឹងដឹកនាំអ្នកពេលអ្នករៀបចំមេរៀន និងពេលដែលអ្នកកំពុងបង្រៀន ។ ទ្រង់នឹងបើកសម្ដែងដល់អ្នកនូវអ្វីដែលអ្នកគួរនិយាយ និងអ្វីដែលអ្នកគួរធ្វើ ( សូមមើល នីហ្វៃទី ២ ៣២:៥ ) ។
គោលបំណងដ៏សំខាន់នៃការបង្រៀនដំណឹងល្អគឺដើម្បីផ្លាស់ប្ដូរជីវិត ។ គោលបំណងរបស់អ្នកក្នុងនាមជាគ្រូបង្រៀនគឺដើម្បីជួយមនុស្សដែលអ្នកបង្រៀនធ្វើឲ្យអស់ពីលទ្ធភាពរបស់គេ ដើម្បីកាន់តែប្រែចិត្តជឿចំពោះដំណឹងល្អនៃព្រះយេស៊ូវគ្រីស្ទ—ជាការខិតខំមួយលើសពីម៉ោងរៀនទៅទៀត ។ សូមអញ្ជើញសិស្សទាំងនោះឲ្យចូលរួមយ៉ាងសកម្មនៅក្នុងការរៀនសូត្រអំពីគោលការណ៍ និងគោលលទ្ធិទាំងឡាយនៃព្រះគ្រីស្ទ ហើយធ្វើតាមអ្វីដែលពួកគេរៀន ។ សូមលើកទឹកចិត្តពួកគេដើម្បីធ្វើឲ្យការសិក្សាផ្ទាល់ខ្លួន និងជាគ្រួសារនៅក្រៅម៉ោងសិក្សាគឺជាប្រភពដ៏សំខាន់នៃការរៀនសូត្ររបស់ពួកគេអំពីដំណឹងល្អ ។ នៅពេលពួកគេធ្វើសកម្មភាពដោយសេចក្ដីជំនឿតាមរយៈការសិក្សាផ្ទាល់ខ្លួន និងជាក្រុមគ្រួសារ ពួកគេនឹងយាងអញ្ជើញព្រះវិញ្ញាណឲ្យចូលមកក្នុងជីវិតរបស់ពួកគេ ហើយព្រះវិញ្ញាណគឺជាអង្គដែលនាំមកនូវការប្រែចិត្តជឿពិត ។ អ្វីគ្រប់យ៉ាងដែលអ្នកធ្វើក្នុងនាមជាគ្រូបង្រៀនម្នាក់គួរចង្អុលទៅគោលដៅដ៏ពិសិដ្ឋនេះ ។
សូមបង្រៀនតែគោលលទ្ធិនៃដំណឹងល្អដែលបានស្ដារឡើងវិញនៃព្រះយេស៊ូវគ្រីស្ទដូចដែលមាននៅក្នុងបទគម្ពីរ និងប្រសាសន៍របស់ពួកព្យាការីថ្ងៃចុងក្រោយប៉ុណ្ណោះ ។ គោលលទ្ធិបរិសុទ្ធ—ជាសេចក្ដីពិតអស់កល្ប ពុំផ្លាស់ប្ដូរដែលព្រះ និងពួកអ្នកបម្រើរបស់ទ្រង់បានបង្រៀន—យាងអញ្ជើញព្រះវិញ្ញាណ ហើយមានអនុភាពដើម្បីផ្លាស់ប្ដូរជីវិត ។
ការហៅឲ្យបង្រៀនគឺជាការទុកចិត្តដ៏ពិសិដ្ឋមួយ ហើយពេលខ្លះវាគឺជារឿងធម្មតាទេដែលមាននូវការថប់បារម្ភ ។ ប៉ុន្ដែសូមចងចាំថា ព្រះវរបិតាសួគ៌របស់អ្នកបានហៅអ្នក ហើយទ្រង់នឹងមិនដែលបោះបង់អ្នកចោលឡើយ ។ នេះគឺជាកិច្ចការរបស់ព្រះអម្ចាស់ ហើយនៅពេលអ្នកបម្រើ « អស់ពីចិត្ត អស់ពីពលំ អស់ពីគំនិត ហើយអស់ពីកម្លាំងរបស់អ្នក » ( គ. និង ស. ៤:២ ) នោះទ្រង់នឹងពង្រីកសមត្ថភាព អំណោយទាន និងទេពកោសល្យរបស់អ្នក ហើយការបម្រើរបស់អ្នកនឹងផ្តល់ជាពរជ័យដល់ជីវិតមនុស្សដែលអ្នកបង្រៀន ។