Kōj Ippāer im Er Ippād, jān Catilin Connolly

Nobōm̧ba 1–7

Katak im Bujen Ko 125–128

“Juon Ainikien Em̧m̧an n̄an Ro Remour im Ro Remej”

Kejo̧kļo̧kjen kōn naan kein jān Elder Ulisses Soares: “Rūkaki eo em̧m̧an tata ej juon waanjon̄ak em̧m̧an. Katakin juon men me jej m̧ool in mour kake emaron̄ kōm̧m̧ane juon oktak ilo būruwōn ro jej katakin er” (“Ekōjkan Aō Maron̄ Meļeļe?” Ensign ak Liaona, Māe 2019, 7).

Je En̄jake ko Rej Im̧we Eok

Kajjitōk bwe ren Kwaļo̧k

Ro uwaan kūlaaj eo remaron̄ je ioon boot eo naan ko jān Katak im Bujen Ko 125–28 me ej im̧we er. Kōtļo̧k bwe ren kwaļo̧k ļōmņak ko aer kōn naan ko. Ekōjkan ilo am̧ kar katak kōn m̧ool kein im̧we m̧akūtkūt ko aer wiik in?

Katakin Katak eo

Katak im Bujen Ko 126

“Bōk juon kōjparok etiljek n̄an baam̧le eo am̧.”

• Kūr eo Brigham Young ekar bōke n̄an jerbal ilo Kabun̄ in ekar aikuji e im baam̧le eo an n̄an bōk eļap kaarmejete ko; naan ko an Irooj n̄an Brigham ilo jekjōn 126 emaron̄ im̧we juon iien ekōnono an kūlaaj eo kōn etke Irooj jet iien ej aikuji kaarmejete eo ilo jerbal in jipan̄ eo ad. Ekōjkan an Irooj kar kakūrm̧ool eddo ko ad ilo m̧weo, ilo kūr ko an Kabun̄ in, im ilo jekej ko jet an mour?

Katak im Bujen Ko 127:2–4

Jemaron̄ pedped ioon Irooj ilo iien ko reppen.

• Ekōjkan an Katak im Bujen Ko 127:2–4 maron̄ jipan̄ ro uwaan kūlaaj en̄jake bwe, āinwōt Josep Smith, rej aaō ilo “dān m̧wilaļ”? Kwomaron̄ kajjitōk ippān ro uwaan kūlaaj eo n̄an riiti eoon kein im kwaļo̧k ekōjkan aer naaj kar ba ilo tukadu in m̧wil eo an Josep n̄an apan̄ ko an. Ta naan ko jān eoon kein renaaj kar jipan̄ juon eo me ej lokjak? Ekōjkan an kar Josep pedped ioon Irooj ilo iien mālijjon̄ ko an? Ekōjkan ad maron̄ ļoor waanjon̄ak eo an?

Katak im Bujen Ko 128

Lo̧mo̧o̧r eo an rūtto ro ad emenin aikuj n̄an lo̧mo̧o̧r eo ad.

• Ļōmņak kōn ekōjkan am̧ maron̄ im̧we ro uwaan kūlaaj eo n̄an bōk koņaer ilo jerbal in tampeļ im menmenbwij an baam̧le. Katak im Bujen Ko 128:15–18 emaron̄ jipan̄ er en̄jake libjerjer eo an jerbal in; kwomaron̄ kajjitōk ippāer n̄an etale eoon kein kōn juon men eo me ej kakilepļo̧k ikdeelel eo aer n̄an kōm̧m̧ani peptaij ko n̄an rūtto ro aer rekar mej. Kajjitōk ko āinwōt kein remaron̄ jipan̄ er kejekļo̧kjeņ kōn eoon kein: Etke “kōj ijello̧kun rimej ro ad jeban weeppān”? (eoon 15). Etke Josep Smith ekar ba peptaij kōn ro mej ej “mennin ekkōnono in ekanooj aibojooj iaan aolep ko rej an gospel eo ejjeļo̧k jem̧lo̧kin”? (eoon 17; lale barāinwōt kout eo ilo “Kein Jipan̄ ko Jet”). Emaron̄ ilo ļōmļōm ta laļ in ekar kemour eļan̄n̄e ejjeļo̧k “juon wāween korak … ikōtaan ro jemāer im ro nejier”? (eoon 18). Eļan̄n̄e ro uwaan kūlaaj eo rej aikuj jipan̄ kōn jino jerbal in menmenbwij an baam̧le, kwomaron̄ kajjitōk ippān ritōl eo an ward tampeļ im menmenbwij an baam̧le n̄an kwaļo̧k kajjien n̄an er FamilySearch.org.

  Kwomaron̄ barāinwōt im̧we er kōn eoon ko me rej kwaļo̧k lan̄lōn̄ eo an jerbal in tampeļ im menmenbwij an baam̧le, eo āinwōt Katak im Bujen Ko 128:19–23. Ro uwaan kūlaaj eo remaron̄ riiti eoon kein im kappukot naan ko me rej kwaļo̧k ekōjkan an Josep Smith kar en̄jake kōn lo̧mo̧o̧r eo an ro remej. Innām kwomaron̄ kajjitōk ippāer n̄an kwaļo̧k en̄jake ko aer ke ekar wōr kain en̄jake rōt in ilo wiik in. Kwaļo̧k juon iaan pija in alooj ko ilo “Kein Jipan̄ ko Jet” emaron̄ barāinwōt leļo̧k n̄an er ellowetak.

• Kōnke lo̧mo̧o̧r an ro remej ejej uwaan n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata, emaron̄ wōr iien ko rem̧m̧an n̄an ad kōmeļeļeik katak in n̄an armej ro me rejjan̄in kar ron̄ kake m̧oktaļo̧k. Ro uwaan kūlaaj eo remaron̄ etale Katak im Bujen Ko 128 n̄an juon men eo remaron̄ kwaļo̧ke ilo juon bwebwenato ippān juon eo me ej kajjitōk kōn peptaij kōn ro remej. Ta eo katak in ej katakin kōj kōn Jemād Ilan̄ im Jisōs Kraist? Kōtlo̧k bwe ro uwaan kūlaaj eo ren kōkemālmel ta eo renaaj kar ba.

  

  Kōm̧m̧ane jerbal in jipan̄ an tampeļ n̄an rūtto ro ad ej liāpe būruwōd n̄an er.

Kein Jipan̄ ko Jet

Pija in alooj ko kōn jerbal in menmenbwij an baam̧le (ChurchofJesusChrist.org).

“I Couldn’t Explain the Feeling”

“If We Put God First”

“Redeeming the Dead Redeemed Me”

“A Visit from Father”

“Connected to Eternal Families”

“Gatherers in the Kingdom”

“Including Me”

“Is Anything Too Hard for the Lord?”

“A Glorious and Wonderful Provision.”

Būreejtōn Gordon B. Hinckley ekar ba:

“Pinmuur eo an Jisōs ilo etan aolep ej jutak kōn kaarmejete ko reļļap n̄an ro jet. Ekar kajutak jon̄ak eo ium̧win eo Ekar erom̧ juon ribōk jenko̧n n̄an aolep armej. Jon̄ak in eo ej pād ium̧win armej eo me emaron̄ kōm̧m̧ane jerbal ilo etan bar juon ej kōm̧m̧an kōn kain̄i ko an im̧weo im̧ōn Irooj. Ijin jej jerbal ilo etan ro me raar mej ilo aer jab jeļā kōn gospel eo. Er ej aer kāālet n̄an errā ak makoko kōn kain̄i eo em̧ōj kōm̧m̧ane ilo etaer. Rej ljon̄an wōt juon ippān ro me rej mour wōt ioon laļ in. Ro remej kar leļo̧k ejja iien in em̧m̧an wōt āinwōt ro remour. Bar juon alen, ej juon m̧weiuk aiboojoj im em̧m̧an Eo Eutiej Bōtata ekar kōm̧m̧ane kōn An revelesōn n̄an Rikanaan eo An” (“The Great Things Which God Has Revealed,” Ensign ak Liaona, Māe 2005, 82–83).

Kōkōm̧anm̧anļo̧k Ad Katakin

Jar kōn ro uwaan kūlaaj eo am̧. Jar kōn etan ro me kwoj katakin er, im kappukot n̄an meļeļe aikuj ko aer rejeno̧lok. Ilo am̧ kōm̧m̧ane āindein, Jemād Ilan̄ emaron̄ jipan̄ eok jeļā ta eo n̄an katakin n̄an maron̄ jipan̄ tōpar aikuj ko. (Lale Teaching in the Savior’s Way, 6.)