Kalbuuj Liberty Spring, jān Al Rounds

Oktoba 18–24

Katak im Bujen Ko 121–123

“O Anij, Kwo Pād Ia?”

Wāween eo em̧m̧an tata n̄an m̧aanjabpoo n̄an katakin ej n̄an riiti jeje ko rekwojarjar, ļōmņak kōn armej ro kwoj katakin, im ļoor Jetōb eo. M̧akūtkūt ko ilo laajrak in emaron̄ jipan̄ im̧we eo kwoj bōke.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ro uwaan kūlaaj eo n̄an kāālet juon ennaan jān Katak im Bujen Ko 121–23 me renaaj kōņaan kwaļo̧ke ippān juon eo ej en̄taan. Kōtļo̧k bwe ren kōmeļeļeik kāālet eo aer.

Katakin Katak eo

Katak im Bujen Ko 121:1–33; 122

Eļan̄n̄e em̧m̧an ad niknik ilo mālijjon̄ ko ad, Anij enaaj kotak lōn̄ļo̧k kōj n̄an ijo utiejtata.

• Emaron̄ wōr ro uwaan kūlaaj eo am̧ me, kōn mellijon̄ ko reppen, rej en̄jake āinļo̧k wōt ta eo Josep Smith ekar kwaļo̧ke ilo Katak im Bujen Ko 121:1–6. Ālkin riiti eoon kein ippān doon, kwomaron̄ kajjitōk ippān ro uwaan kūlaaj eo n̄an pukot im kwaļo̧k ennaan ko ilo eoon 7–33 me ej leļo̧k n̄an er kōjatdikdik im kaenōm̧m̧an ilo iien mālijjon̄ ko aer. Ta meļeļe in n̄an “kijejetoiki … em̧m̧an”? (eoon 8). Ekōjkan an Rilo̧mo̧o̧r jipan̄ kōj kijejetoiki em̧m̧an? Ekōjkan ad maron̄ jipan̄ doon kijejetoiki em̧m̧an?

• N̄an jipan̄ ro uwaan kūlaaj eo ļōmņak kōn ekōjkan an mālijjon̄ ko maron̄ “letok n̄an [kōj] iminene” im “n̄an em̧m̧anļo̧k eo [ad] ” (Katak im Bujen Ko 122:7), kwomaron̄ leļo̧k n̄an er juon m̧ōttan peba im kajjitōk ippāer n̄an je juon mālijjon̄ rekar en̄jake. Ilo turājet eo juon ilo peba eo, ro uwaan kūlaaj eo remaron̄ je naan ko “iminene” im “em̧m̧an.” Ilo ami ekōnono ippān doon kōn Katak im Bujen Ko 122, kōketak ro uwaan kūlaaj eo n̄an je jabdewōt ļōmņak ko ewōr ippāer kōn “turājet eo juon” in mālijjon̄ ko aer: “iminene” ak “em̧m̧an” eo raar en̄jaki. Jet ro uwaan kūlaaj eo remaron̄ peran ilo aer kwaļo̧k ekōjkan an mālijjon̄ ko aer ilo jem̧lo̧kin erom̧ em̧m̧anļo̧k eo n̄an er. Ak remaron̄ riiti en̄jake eo an Elder Koichi Aoyagi ilo “Hold on Thy Way” (Ensign ak Liaona, Nob. 2015, 126–28).

Katak im Bujen Ko 121:34–46

Jej aikuj in jim̧we n̄an tōpar “kajoor ko an lan̄.”

• Emaron̄ in kaitoktok limo n̄an keidi ekōjkan an “kajoor ak im̧we” jerbal ilo laļ in kōn wāween an Irooj kar katakin bwe eaikuj dāpdep wōt kajoor ak kareel eo (lale jekjōn 121). N̄an jipan̄ ilo iien ekōnono in, kwomaron̄ kōm̧m̧ane ruo kaļōm̧ tebōļ ioon boot eo im je Kajoor an Laļ im Kajoor ko an Lan̄. Ro uwaan kūlaaj eo remaron̄ kanne tebōļ eo kōn naan ko im eoon ko jān Katak im Bujen Ko 121:34–46. Ekōjkan an eoon kein maron̄ ukot wāween ad lo eddo ko ad ilo baam̧le ko ad, āinwōt rikarejar jeid im jatūd m̧aan im kōrā ro, ak ilo jekjek ko jet ijo jej kōjatdikdik n̄an im̧we ro jet n̄an em̧m̧anļo̧k?

• Juon wāween n̄an ekōnono kōn kapilōk eo im kōjeraam̧m̧an ko raiboojoj ilo Katak im Bujen Ko 121:45–46 ej n̄an ajije kūlaaj eo n̄an kurup ko im kajjitōk ippān kajjojo kurup n̄an ekkatak im ekōnono kōn juon eoon jān eoon kein, ko āinwōt “erreo en kainōknōk ļōmņak ko am ilo ejjeļo̧k m̧wijkōk” ak “āinwōt m̧ōļawi jān lan̄.” Remaron̄ lale meļeļe in naan ko, riiti eoon ko rej ekkeijel ippān eoon ko ilo footnote ko, im ekōnono kōn ta meļeļe in eoon ko n̄an er. Jet kurup remaron̄ kōņaan jin̄aik pija ko n̄an kōmeļeļeik eoon eo aer. Kajjitōk ippān kajjojo kurup n̄an kwaļo̧k n̄an kūlaaj eo ta eo rekar ekkatak.

Katak im Bujen Ko 122:8–9

Jisōs Kraist ekar wanlaļļo̧k ium̧win aolep men ko im ej kōkajoorļo̧k kōj ilo mālijjon̄ ko ad.

• Meļeļe in bwe Jisōs Kraist “eaar wanlaļļo̧k ium̧win … aolep [men ko]” emaron̄ leļo̧k n̄an ro uwaan kūlaaj eo lōke eo n̄an bar ro̧o̧lļo̧k n̄an E. Eoon ko jet remaron̄ in jipan̄ kōmeļeļeik ta meļeļein naan in: Aiseia 53:3–4; Hibru 2:17–18; 1 Nipai 11:16–33; Alma 7:11–13. Ro uwaan kūlaaj eo remaron̄ riiti eoon kein, ippānļo̧k Katak im Bujen Ko 122:8, pukot juon men eo me ej kalōk tōmak eo aer bwe Jisōs Kraist emaron̄ jipan̄ er ilo mālijjon̄ ko aer. Remaron̄ barāinwōt lo al ko reim̧we kōn Rilo̧mo̧o̧r, eo āinwōt “Where Can I Turn for Peace?” (Hymns, nō. 129).

• Ennaan eo ilo “Kein Jipan̄ ko Jet” ej letok eļapļo̧k kōļmenļo̧kjeņ kōn ekōjkan an Rilo̧mo̧o̧r kar wanlaļļo̧k ium̧win aolep men ko. Kwomaron̄ ļōmņak kōn juon wāween kwomaron̄ kwaļo̧k ekōjkan an “ium̧win” juon men eo eddo ekōm̧m̧an bwe jen “jitm̧anm̧an n̄an kotak [e].” Ekōjkan ilo ad jeļā ke Rilo̧mo̧o̧r ekar wanlaļļtak ium̧win aolep men ko kar jipan̄ kōj ilo mālijjon̄ ko ad?

  

  Jisōs emeļeļe en̄taan eo ad. A En Jab Ankil Aō, A Am̧ Wōt, jān Walter Rane.

Kein Jipan̄ ko Jet

Kraist wanlaļļo̧k ilaļ in men ko otemjej.

Būreejtōn Dallin H. Oaks ekar katakin, “Ewōr milien armej ro rej mijak Anij me rej jar n̄an Anij n̄an kotak er jān en̄taan ko aer. Ad Rilo̧mo̧o̧r eaar kwaļo̧k bwe E eaar ‘wanlaļļo̧k ilaļ in men otemjej’ (K&B 88:6). Āinwōt an Elder Neal A. Maxwell kar katakin, ‘An “wanlaļļo̧k ium̧win aolep men ko,” E emeļeļe, ilo weppān im ippān make, aolepān en̄taan ko an armej’ [Ensign, Nob. 1997, 23]. Em̧ool jemaron̄ ba bwe an wanlaļtak ilaļ in aolep, ejejjet An pād n̄an kotak kōj im letok n̄an kōj kajoor eo jej aikuji n̄an niknik ilo en̄taan ko ad” (“Kajoorļo̧k kōn Pinmuur eo an Jisōs Kraist,” Ensign ak Liaona Nob. 2015, 64).

Kōkōm̧anm̧anļo̧k Ad Katakin

Kūr eo am̧ ej im̧we. Āinwōt juon rūkaki, kar kūr eok jān Irooj n̄an kōjeraam̧m̧an ajri ro Nejin. Ekōņaan bwe kwon jeraam̧m̧an, kōn menin ilo am̧ mour erreo kōn jipan̄ eo An, Enaaj lewaj n̄an eok revelesōn eo kwoj aikuji (lale Teaching in the Savior’s Way, 5).